17 მაისს, 14:00 საათზე, აინ რენდის ცენტრი საქართველო გიწვევთ საჯარო ლექციაზე „აინ რენდი: ადამიანის უფლებები”, რომელიც გაიმართება თბილისის სახელმწიფო უნივერსიტეტის ახალგაზრდულ ცენტრში. სპიკერი: აინ რენდის ცენტრ საქართველოს დირექტორი ირაკლი იაგორაშვილი. შეხვედრაზე საშუალება გექნებათ გაეცნოთ ამერიკელი მწერლისა და ფილოსოფოსის, აინ რენდის, ცხოვრებასა და შემოქმედებას, მის თეორიასა ადამიანის უფლებების შესახებ. სრულად...

17 მაისს, 14:00 საათზე, ვასო აბაშიძის სახელობის ახალ თეატრში გაიმართება სამუშაო შეხვედრა/დისკუსია - „თეატრის სფეროს განვითარებისთვის“. შეხვედრაზე ორგანიზატორები გაგიზიარებენ „ცვლილებების სცენის“ მიერ ინიციირებული კვლევების შედეგებს - როგორ იმართება თეატრის სფერო მსოფლიოს სხვადასხვა ქვეყანაში. შეხვედრის ამოცანაა მსჯელობა სფეროს გაუმჯობესების მრავალფეროვან შესაძლებლობებზე. სრულად...

თბილისი. ღია მმართველობის პროცესში ჩართული არასამთავრობო ორგანიზაციები შეშფოთებას გამოთქვამენ საქართველოს მთავრობის მიერ OGP-ის ძირითადი ღირებულებებისა და პრინციპების უხეშად დარღვევის გამო. „ბოლო წლებში საქართველოს მთავრობამ არაერთხელ ღიად დაადასტურა OGP-ის ფუნდამენტურ ღირებულებებთან შეუსაბამობა ე.წ აგენტების რუსული კანონის მხარდაჭერით, სასამართლო სისტემის დამოუკიდებლობის შელახვით, სამოქალაქო საზოგადოების ორგანიზაციებზე, უფლებადამცველებსა და კრიტიკული მედიის წარმომადგენლებზე ღია თავდასხმითა და მათი საქმიანობის შეზღუდვის მცდელობებით, პირადი ცხოვრების ხელშეუხებლობის პრინციპის დაცვის ვერ უზრუნველყოფით, საჯარო ინფორმაციაზე ხელმისაწვდომობის შეზღუდვით... შეჩერებულია OGP-ის ეროვნული პროცესიც. ქვეყანას უკვე მეოთხე წელია OGP-ის ფარგლებში ეროვნულ დონეზე არცერთი რეფორმა არ განუხორციელებია. საქართველოს OGP სამოქმედო გეგმა 2019 წლის შემდეგ არ აქვს, რითაც ორჯერ დაარღვია OGP-ის მონაწილეობისა და თანა-შექმნის სტანდარტები. სამწუხაროდ, ახალი სამოქმედო გეგმის შემუშავების თითქმის სამწლიანი პროცესი კვალავ ჩიხში შევიდა... არსებული ვითარებიდან გამომდინარე, საქართველოს ღია მმართველობის უწყებათაშორისი საკოორდინაციო საბჭოს/ფორუმის წევრმა არასამთავრობო ორგანიზაციებმა ღია მმართველობის პარტნიორობის (OGP) მმართველ კომიტეტს მივმართეთ წერილით „რეაგირების პოლიტიკის“ ამოქმედების მოთხოვნასთან დაკავშირებით. აღნიშნული მექანიზმი მიზნად ისახავს OGP საერთაშორისო სამდივნოს, პარტნიორი დონორი თუ საერთაშორისო ორგანიზაციების გაზრდილ ჩართულობას შექმნილი კრიზისის მოგვარებაში“, ნათქვამია ერთობლივ განცხადებაში. სრულად... წყარო: transparency.ge

იმერეთი და აჭარა. კოალიციამ დამოუკიდებელი და გამჭვირვალე მართლმსაჯულებისთვის შეხვედრები გამართა ქუთაისსა და ბათუმში ადგილობრივ არასამთავრობო ორგანიზაციებთან, მედიის წარმომადგენლებთან, სტუდენტებთან და სხვა დაინტერესებულ პირებთან.  შეხვედრები შეეხო მართლმსაჯულების სფეროში არსებულ  ძირითად გამოწვევებს. მოხსენებების შემდეგ გაიმართა დისკუსია, სადაც დამსწრეებმა იმსჯელეს სასამართლო სისტემის ირგვლივ საკითხებზე. სრულად... წყარო: ორგანიზაციის გვერდი სოციალურ ქსელში

თბილისი. „ღია საზოგადოების ფონდი“ მოუწოდებს შრომის ინსპექციას, დაუყოვნებლივ შეისწავლოს შრომითი უსაფრთხოების მდგომარეობა დასაქმების ადგილზე, სადაც კედლის მოწყობის სამუშაოებს ორი მუშის სიცოცხლე ემსხვერპლა. „საქართველოში მშენებლობის სექტორში საქმიანობა კვლავ სიცოცხლისა და ჯანმრთელობისთვის მუდმივი რისკების არსებობას გულისხმობს. ამას შრომის ინსპექციის საქმიანობის სტატისტიკაც ადასტურებს. მიუხედავად შრომის ინსპექციის სრული მანდატით აღჭურვისა, სახელმწიფო დღემდე ვერ ახერხებს საფრთხის შემცველ დასაქმების ადგილებზე, მათ შორის სამშენებლო სექტორში დასაქმებულთათვის, ღირსეული და უსაფრთხო სამუშაო გარემოს შექმნას“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ცნობით, თქვენი ანგარიშებისა და პერსონალური მონაცემების უსაფრთხოების მთავარი გარანტი ძლიერი პაროლების ქონაა. ვიდეოში ორგანიზაცია გთავაზობთ იმ 5 ძირითად რჩევას, რომელიც დაგეხმარებათ, დაიცვათ უსაფრთხოება.  ციფრული ჰიგიენის სხვა წესების გასაცნობად ეწვიეთ IDFI-ის ციფრული წიგნიერების განყოფილებას… წყარო: www.idfi.ge

თბილისი. მაკლეინის ასოციაცია ბავშვებისთვის 2023 - 2024 სასწავლო წლიდან, მომდევნო 4 წლის განმავლობაში, წელიწადში მინიმუმ 3 სტუდენტს სწავლის საფასურს დაუფინანსებს. ორგანიზაციის ცნობით, დაფინანსებას მიიღებენ ის სტუდენტები, რომლებიც ჩაირიცხებიან და სწავლას გააგრძელებენ ივ. ჯავახიშვილის თბილისის სახელმწიფო უნივერსიტეტის ოკუპაციურ თერაპევტთა საბაკალავრო პროგრამაზე. სრულად... წყარო: მაკ ჯორჯიას გვერდი სოციალურ ქსელში

თბილისი. „საერთაშორისო გამჭვირვალობა - საქართველომ“ შეისწავლა 2022 წლის 16 მაისს ტელეკომპანია „რუსთავი 2-ის“ ყოფილი დირექტორისა და „მთავარი არხის“ დამფუძნებლის ნიკა გვარამიას მიმართ გამოტანილი გამამტყუნებელი განაჩენი, რომელიც ორგანიზაციის შეფასებით ვერ პასუხობს კანონიერების, დასაბუთებულობისა და სამართლიანობის კრიტერიუმებს.  „მოსამართლის მიუკერძოებლობასა და ობიექტურობასთან დაკავშირებით არსებული ლეგიტიმური კითხვების უგულებელყოფის, ნიკა გვარამიას მსჯავრდებისა და სასჯელის განსაზღვრის კუთხით სამართლებრივი მსჯელობის სიმწირის, მტკიცებულების სახით წარმოდგენილი ფაქტების სისტემური ანალიზისა და სასამართლოების შესაბამისი პრაქტიკის, იურიდიული ლიტერატურისა თუ სამეცნიერო ნაშრომების გამოყენების ნაკლებობის გამო შეგვიძლია დავასკვნათ, რომ ნიკა გვარამიას მიმართ გამოტანილი გამამტყუნებელი განაჩენი დაუსაბუთებელია“, ნათქვამია ორგანიზაციის განცხადებაში. სრულად... წყარო: transparency.ge

თბილისი. მედიის ადვოკატირების კოალიცია სოლიდარობას უცხადებს ნიკა გვარამიას და მის დაუყოვნებლივ გათავისუფლებას მოითხოვს. „ნიკა გვარამიას პატიმრობიდან ერთი წელი გავიდა. ადგილობრივი და საერთაშორისო ორგანიზაციების შეფასებით, „მთავარი არხის“ მენეჯერი პოლიტიკურად მოტივირებულ საქმეზეა დაკავებული. ნიკა გვარამიას პატიმრობა არის უხეში თავდასხმა მედიის თავისუფლებაზე და კრიტიკული აზრის გამოხატვის უფლებაზე“, ნათქვამია კოალიციის განცხადებაში. სრულად... წყარო: კოალიციის გვერდი სოციალურ ქსელში

შიდა ქართლი. 14 მაისს, კასპის ტექნოპარკში ახალგაზრდული ფორუმის პროექტის „მოხალისეობრივი საქმიანობის პოპულარიზაცია“ ფარგლებში ინტელექტუალური თამაში „სკივრი“ ჩატარდა, რომელშიც მონაწილეობას კასპის მუნიციპალიტეტში მცხოვრები ახალგაზრდები იღებდნენ. თამაშის მიზანი იყო ევროკავშირის შესახებ ახალგაზრდების ცნობიერების ამაღლება. გამარჯვებული გუნდი დააჯილდოვა „საინფორმაციო ცენტრი ნატოსა და ევროკავშირის შესახებ“ წარმომადგენელმა ციკო შაქარაშვილმა და ადგილობრივმა მეწარმემ რუსუდან ბარნოვმა. ახალგაზრდული ფორუმის მხარდამჭერები არიან კასპის საგანმანათლებლო რესურსცენტრი, „საინფორმაციო ცენტრი ნატოსა და ევროკავშირის შესახებ“, კასპის ტექნოპარკი, ევროკავშირის პროექტის „უნარები წარმატებისთვის“ ფარგლებში მობილური ახალგაზრდული მუშაკები, სოციალური საწარმო „ბარნოვი“ და კასპის სათემო ორგანიზაცია „კომლი“. აქტივობა განხორციელდა ევროკავშირისა (EU) და კონრად ადენაუერის ფონდის (KAS) მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

16 მაისს, 19:00 საათზე, პარლამენტის შენობის უკან, გაიმართება საპროტესტო აქცია „რუსული ხომალდით ევროკავშირში ვერ შევალთ!“ სრულად...

16 მაისს 18:30 საათზე მარგარეტ ტეტჩერის ცენტრი საქართველოში პროექტის “Fake No More” ფარგლებში გამართავს პანელურ დისკუსიაზე თემაზე: როგორ მუშაობს რუსული პროპაგანდა საქართველოში. სრულად... მისამართი: თბილისი, ბიზნეს-ცენტრი ,,ტერმინალი“, ი. აბაშიძის 34

16 მაისს, 18:00 საათზე, მზიურის ამფითეატრში, ილიაუნის სტუდენტების და კაფე მზიურის ერთობლივი ინიციატივით გაიმართება შემეცნებითი, საჯარო ლექცია - „გაიგე მეტი აქონდროპლაზიაზე“. სრულად...

16 მაისს, 17:30 საათზე, კოალიცია „ინფორმაციის სანდოობისთვის“ საქართველოს ევროინტეგრაციის მხარდამჭერი მასშტაბური საინფორმაციო კამპანიის „ახლა“ პრეზენტაციას გამართავს. მისამართი: თბილისი, ლადო გუდიაშვილის #18 (არტ ჰაუსი, ქართული სახვითი ხელოვნების მუზეუმი)

16 მაისს, 13:00-ზე, ფლორიდას შტატის მოსამართლე - მარკ სპაიზერის და ადვოკატის რობერტ თრეჩმენის საჯარო ლექცია თემაზე - „ა.შ.შ-ს კონსტიტუციის შესწორებები ადამიანის უფლებების შესახებ“. საჯარო ლექციის ფარგლებში მომხსენებლები ისაუბრებენ ა.შ.შ-ს კონსტიტუციის შესწორებების მნიშვნელობაზე ადამიანის უფლებების დაცვის სფეროს განვითარებაში და მათ გამოყენებაზე პრაქტიკაში. ასევე, ლექციის ბოლო ეტაპი გაიმართება დისკუსიის ფორმატში. სრულად... მისამართი: თბილისი, თსუ-ს II კორპუსის 119-ე აუდიტორია

16 მაისს, 13:00 საათზე, World Vision საქართველოს ახალი პროექტის „არავინ დარჩეს ყურადღების მიღმა“ გახსნის ღონისძიება გაიმართება. მისამართი: თბილისი, ლ. გუდიაშვილის ქ. N3, სასტუმრო „Wyndham Grand Tbilisi“

16 მაისს, 12:00 საათზე, „საერთაშორისო გამჭვირვალობა-საქართველო" პრესკონფერენციას გამართავს. თემა: სტრასბურგში მოგებულ ლაშა ჩხარტიშვილის საქმე, რომელსაც დადებითი გავლენა ექნება აქტივისტების უფლებების დაცვის პრაქტიკაზე. მისამართი: თბილისი, აღმაშენებლის #61 („საერთაშორისო გამჭვირვალობა - საქართველოს“ თბილისის ოფისი).

გამოქვეყნდა სსო მეტრის 2022 წლის ანგარიში. შედეგების მიხედვით, საქართველო, საზოგადოებრივი ორგანიზაციებისთვის, აქტივისტებისა და ადამიანის უფლებათა დამცველებისთვის, საშუალო რისკის ქვეყანას წარმოადგენს. საქართველოში არსებულ გარემოს მაქსიმალური 7 ქულიდან - მინიჭებული აქვს 4,8 ქულა (საკანონმდებლო გარემო შეფასებულია – 5,2 ქულით, ხოლო პრაქტიკა – 4,4 ქულით). ანგარიში მიმოიხილავს და აფასებს 2022 წლის იანვრიდან ნოემბრის ჩათვლით მომხდარ მოვლენებს. შესაბამისად, 2022 წლის სსო მეტრი, საშუალებას გვაძლევს გავიგოთ თუ როგორი იყო გარემო „გუშინ“ და შევადაროთ იგი დღეს არსებულ მდგომარეობას. სსო მეტრი – ქვეყნის ანგარიში, 2022 მიუხედავად იმისა, რომ 2022 წლის საანგარიშო პერიოდში არ გამოკვეთილა ისეთი მოვლენები, რომლებმაც, წინა წელთან შედარებით, სსო-ების საარსებო გარემო მნიშვნელოვნად შეცვალა, ანგარიშში ხაზგასმულია საზოგადოებრივი სექტორის მიმართ სიტყვიერი თავდასხმების გაზრდილი მაჩვენებელი და თანმდევი ინიციატივები, რომლებიც, თავის მხრივ, მიანიშნებენ სსო–ების საარსებო გარემოს გაუარესების პოტენციალზე. ორგანიზაციების სარეგისტრაციო საფასურის გაორმაგებამ, მეწარმეთა შესახებ საქართველოს კანონში ფუნდამენტურმა ცვლილებებმა, საბანკო ანგარიშის გახსნის ეტაპზე იდენტიფიცირებულმა პრობლემებმა ნეგატიური გავლენა მოახდინეს, და წინა პერიოდთან შედარებით ქულები შემცირდა, შემდეგი მიმართულებით: გაერთიანების თავისუფლება (სამართლებრივ კომპონენტში ქულამ დაიკლო 6.2-დან 6.1-მდე) თანასწორობის უფლება (პრაქტიკის კომპონენტში ქულამ დაიკლო 5.4-დან 5.3-მდე) და პირადი ცხოვრების ხელშეუხებლობის უფლება (პრაქტიკის კომპონენტში ქულამ დაიკლო 3.1-დან 3.0-მდე). ანგარიშზე მუშაობდნენ სამოქალაქო საზოგადოების ინსტიტუტი (CSI), საქართველოს ახალგაზრდა იურისტთა ასოციაცია (GYLA) და ინფორმაციის თავისუფლების განვითარების ინსტიტუტი, პროექტის „სამოქალაქო საზოგადოების ორგანიზაციების გაძლიერების და ხელსაყრელი გარემოს შექმნის გზამკვლევის“ ფარგლებში. პროექტს ახორციელებს არაკომერციული სამართლის ევროპული ცენტრი (ECNL), ევროკავშირის (EU) ფინანსური მხარდაჭერით.

თბილისი. საერთაშორისო გამჭვირვალობა - საქართველომ, 2023 წლის იანვარ-მარტის პარტიული შემოწირულებები შეისწავლა. ორგანიზაციის ცნობით, ყველა პარტიამ ჯამში 640 569 ლარის შემოწირულება მიიღო, აქედან მმართველ პარტიაზე თითქმის ნახევარი  - 300 000 ლარი  - მოდიოდა. „„ქართული ოცნების“ 8 დონორიდან 6 ბათუმელი ბიზნესმენია, აქედან ერთ-ერთის, ბათუმის საკრებულოს ყოფილი წევრის, ნუკრი დოლიძის კომპანიები რეგულარულად იგებენ მრავალმილიონიან სახელმწიფო ტენდერებს“. სრულად... წყარო: transparency.ge

ქვემო ქართლი. 18 მაისს სოციალური სამართლიანობის ცენტრი წალკის მუნიციპალიტეტის სოფელ გუმბათისა და მიმდებარე სოფლების მოსახლეობისთვის სამართლებრივი დახმარების შეხვედრებს გამართავს. ორგანიზაციის წარმომადგენლები უზრუნველყოფენ მოსახლეობის სოციალური პრობლემების იდენტიფიცირებას და გაზიარებული პრობლემების შესახებ ინფორმაციის მიწოდებას შესაბამისი სახელმწიფო უწყებებისთვის. სოციალური სამართლიანობის ცენტრი ადამიანის უფლებების დაცვაზე და სოციალური სამართლიანობის საკითხებზე მომუშავე ორგანიზაციაა, რომელიც სხვა საკითხებთან ერთად სოციალური უფლებების და თანასწორობის პოლიტიკის მიმართულებით მუშაობს. სრულად... წყარო: ორგანიზაციის გვერდი სოციალურ ქსელში

რაჭა-ლეჩხუმი. რაჭა-ლეჩხუმის და ქვემო სვანეთის რეგიონული ჰაბის - ფონდი „აფხაზინტერკონტის“ ორგანიზებით, 2023 წლის 10-11 მაისს ტრენინგები ჩატარდა ამბროლაურის და ონის მუნიციპალიტეტში მოქმედი სამოქალაქო საზოგადოების ორგანიზაციების, სათემო კავშირების წარმომადგენლებისა და საჯარო სკოლების სამოქალაქო განათლების პედაგოგებისთვის. ტრენინგის ჩატარების მიზანი იყო: რეგიონში მოქმედ სამოქალაქო საზოგადოების ორგანიზაციების და სათემო კავშირების წარმომადგენელთა გადამზადება შემდეგი მიმართულებებით: პროექტის წერა პროექტების ფინანსური მენეჯმენტი/მართვა პროექტის ბიუჯეტი ფონდების მოძიება ორგანიზაციის ფინანსური მდგრადობა ტრენინგები ჩატარდა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. სრულად... წყარო: ორგანიზაციის გვერდი სოციალურ ქსელში

კახეთი. 13 მაისს, ნუკრიანში, ანდრონიკაანთ უბანში საუბნო შეკრება გაიმართა, რომელსაც სკოლის პედაგოგები, მოსწავლეები და სხვა დაინტერესებული პირებიც ესწრებოდნენ. შეხვედრას ცოდნის კაფეს დამფუძნებლები, ნანა ბაგალიშვილი და ქეთი მოლაშვილი უძღვებოდნენ. ანდრონიკაანთ უბანი საინტერესო არქიტექტურით გამოირჩევა და სოფლის ისტორიის მნიშვნელოვანი შემადგენელი ნაწილია. შეკრების მიზანი იყო ემსჯელათ თუ როგორ შეიძლება აქ, ამ უბანში, სამეზობლო ინიციატივა განვითარდეს, რომელიც თავის მხრივ საუბნო პრობლემების მოგვარებაზე, მის პოპულარიზაციაზე, საერო კულტურული მემკვიდრეობის შენარჩუნებაზე იზრუნებს სოფლის სათემო კავშირთან ნუკრიანის სახელოსნოებთან ერთად. სრულად... წყარო: ორგანიზაციის გვერდი სოციალურ ქსელში