აჭარა. 24 დეკემბერს ორგანიზაციის – „ცვლილებები თანაბარი უფლებებისათვის" ინიციატივით მედიის წარმომადგენლებისთვის გაიმართა შეხვედრა, რომლის მიზანიც იყო შშმ პირებთან დაკავშირებული ტერმინებზე საუბარი. ორგანიზატორებმა მედიის წარმომადგენლებს მიაწოდეს არასწორი ტერმინების სწორი შესატყვისები და მოუწოდეს სიუჟეტებისა თუ სტატიების მომზადებისას მათი სწორი გამოყენებისკენ.

კახეთი. არასამთავრობო ორგანიზაცია „ვოლდ ვიჟენის",(World Vision) ინიციატივით, თელავის მედია კაფეში, ჟურნალისტური და შემოქმედებითი კლუბის მოსწავლეებს ჩაუტარდათ საინფორმაციო შეხვედრა ჟურნალისტური საქმიანობის შესახებ. რეგიონული გაზეთის „კახეთის ხმა" ჟურნალისტებმა სკოლის მოსწავლეებს მიაწოდეს ინფორმაცია და საკუთარი გამოცდილება გაუზიარეს გაზეთისთვის ინფორმაციის, რეპორტაჟებისა და სტატიების მომზადების შესახებ.

თბილისი. 24 დეკემბერს „რეგიონული მედიის სარეკლამო გამოფენა 2013" გაიმართა. გამოფენაზე საქართველოს რეგიონებში მოქმედმა მედიასაშუალებებმა ბიზნეს სექტორის წარმომადგენლებს თავიანთი საქმიანობა გაააცნეს და თანამშრომლობა შესთავაზეს. ღონისძიება კავკასიის უნივერსიტეტის მედიის სკოლისა და ფონდ „ღია საზოგადოება – საქართველოს" ორგანიზებით გაიმართა. სრულად წყარო: media.ge

მცხეთა–მთიანეთი. სასტუმრო ბაზალეთში, სახალხო დამცველთან არსებულმა ტოლერანტობის ცენტრმა ჩაატარა ტრენინგი ჟურნალისტებისათვის „ტოლერანტობის კულტურა და მედია". ტრენინგი ჩატარდა აშშ–ის საერთაშორისო განვითარების სააგენტოს მიერ დაფინანსებული, გაეროს ასოციაციის პროექტის – „ეროვნული ინტეგრაციის გაძლიერება საქართველოში” – ფარგლებში. ტრენინგზე განხილეს ისეთი თემები როგორიცაა: ტოლერანტობის კულტურის საფუძვლები, რელიგიური და ეთნიკური უმცირესობების უფლებები და მედია, შეზღუდული შესაძლებლობების თემა და მედია, გენდერული საკითხები და ლგბტ თემები, მედიასტანდარტები და ეთიკა. წყარო: მედიის განვითარების ფონდის ვებგვერდი სოციალურ ქსელში

აჭარა. 23 დეკემბერს, ბათუმის დემოკრატიული ჩართულობის ცენტრში, საზოგადოებრივი მაუწყებლის სამეურვეო საბჭოს წევრობის კანდიდატმა გენო გელაძემ საზოგადოებრივი ორგანიზაციების წარმომადგენლებს საზოგადოებრივი მაუწყებლის შესახებ თავისი კონცეფცია წარუდგინა. ამ ეტაპზე დასახელებული 27 კანდიდატიდან გენო გელაძე ერთ-ერთია, რომელმაც კომისიის ცხრავე წევრის ხმა მიიღო. შეხვედრაზე ყურადღება სხვადასხვა მიმართულებით გამახვილდა, რომელთაგანაც განსაკუთრებული ყურადღება დაეთმო მაუწყებლის ფინანსურ საკითხებს. კანდიდატმა მესამე სექტორის წარმომადგენლებს აუხსნა თავისი კონცეფცია.

თბილისი. მედიის განვითარების ფონდი (MDF) შეშფოთებულია 20 დეკემბერს კიევში, ბორისპოლის აეროპორტში მომხდარ ფაქტთან დაკავშირებით, როდესაც უკრაინის ხელისუფლებამ ქართველ ჟურნალისტს, დავით კაკულიას არ მისცა ქვეყანაში შესვლის უფლება. ფონდი ამ ფაქტთან დაკავშირებით საერთაშორისო ორგანიზაციებს - „ჟურნალისტთა დაცვის კომიტეტსა" (CPJ) და „რეპორტიორები საზღვრებს გარეშე" (RWB) ქართველი ჟურნალისტების დაცვას სთხოს. სრულად წყარო: media.ge

თბილისი. საქართველოს ჟურნალისტური ეთიკის ქარტიის საბჭოს ახალი თავმჯდომარე ჰყავს, 21 დეკემბერს ქარტიის წევრებმა, ერთი წლის ვადით, აირჩიეს ნათია კუპრაშვილი. ამ თანამდებობაზე მან გიორგი მგელაძე შეცვალა. ეთიკის ქარტიის წევრმა ჟურნალისტებმა ქარტიის საბჭოს 3 ახალი წევრი აირჩიეს. საბჭოს წევრები გახდნენ - თბილისის კვოტით ნინო ზურიაშვილი ("სტუდია მონიტორი") და რეგიონული მედიის კვოტით - ნინო ნარიმანიშვილი (გაზეთი "სამხრეთის კარიბჭე") და ირინა ყურუა (ტელეკომპანია "აჭარა"). ისინი სამი წლის ვადით აირჩიეს. 21 დეკემბერსვე ჟურნალისტური ეთიკის ქარტიის კონკურსის „ქარტიის პრიზის" გამარჯვებული ჟურნალისტები დაასახელდნენ. სრულად: ქარტიის საბჭოს ახალი თავმჯდომარე სრულად: ქარტიის საბჭოს ახალი წევრები სრულად: „ქარტიის პრიზის" გამარჯვებულები წყარო:media.ge

თბილისი. მედიის განვითარების ფონდმა „ფრონტლაინ ჯორჯიაში" ანგაროშის - „„სიძულვილის ენა და დისკრიმინაცია ქართულ მედიაში" - პრეზენტაცია გამართა. პროექტი მომზადდა „ეროვნული ინტეგრაციის გაძლიერება საქართველოში" პროექტის მცირე გრანტების მექანიზმის ფარგლებში, რომელსაც ახორციელებენ საქართველოს გაეროს ასოციაცია და ფონდი „ღია საზოგადოება საქართველო" აშშ-ის საერთაშორისო განვითარების სააგენტოს (USAID) ფინანსური მხარდაჭერით. ანგარიში წყარო: „ფრონტლაინ ჯორჯიას" გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის მედიის სამართლებრივი დაცვის ცენტრმა ჩაატარა კვლევა საქართველოში გამოხატვის თავისუფლების შესახებ. რომელშიც გაანალიზებულია გამოხატვის თავისუფლების თვალსაზრისით მედიის მდგომარეობა 2006 წლის იანვრიდან 2013 წლის ოქტომბრამდე პერიოდში. კვლევის ფარგლებში შესწავლილ იქნა ჟურნალისტის პროფესიული საქმიანობისათვის უკანონოდ ხელშეშლის ფაქტები და სასამართლოს მიერ მიღებული გადაწყვეტილებები. ასევე, განხორციელდა მედიის მარეგულირებელი კანონმდებლობის და საქართველოში მედიის მდგომარეობის თაობაზე საერთაშორისო ორგანიზაციების შეფასებების ანალიზი. კვლევაში წარმოდგენილია კვლევის შედეგად გამოვლენილი ძირითადი მიგნებები და საიას რეკომენდაციები ქვეყანაში მედიის გამოხატვის თავისუფლების მდგომარეობის გაუმჯობესების მიზნით გასატარებელი ღონისძიებების თაობაზე. კვლევა: გამოხატვის თავისუფლება საქართველოში– მედიის მდგომარეობის ანალიზი წყარო: gyla.ge

შიდა ქართლი. დასრულდა კონკურსი, რომელიც მედია ბანაკ - „მედია და ჟურნალიტი - პროფესია და პროფესიონალის" - ფარგლებში მიმდინარეობდა. საზოგადოება „ბილიკის" ორგანიზებით აღნიშნული ბანაკი სეტემბერში მოეწყო. მონაწილეებს დამოუკიდებლად უნდა ემუშავათ ჟურნალისტიკის ხუთი მიმართულებით და ნამუშევრები საკუთარ ბლოგებზე განეთავსებინათ, რომელსაც ჟიური შეაფასებდა და გამარჯვებულს გამოავლენდა. ჟიური ბანაკის ტრენერებისგან შედგებოდა. გამარჯვებულებს პრიზები და სერტიფიკატები. დაჯილდოვდნენ სხვა მონაწილებიც. ღონისძიება პროექტ „საზაფხულო ბანაკის" ფარგლებში განხორციელდა, რომელიც დაფინანსებულია „ღია საზოგადოების ფონდის" მიერ. წყარო:ორგანიზაციის გვერდი სოციალურ ქსელში

მცხეთა-მთიანეთი. 14-15 დეკემბერს, UNICEF Georgia-ს ორგანიზებით, გუდაურში გაიმართა საინფორმაციო შეხვედრა ჟურნალისტებთან ბავშვთა მიმართ ძალადობის საკითხებზე. UNICEF-ის წარმომადგენლებმა ჟურნალისტებს საქართველოში ჩატარებული კვლევის შედეგები გააცნეს. წყარო:ორგანიზაციის გვერდი სოციალურ ქსელში

თბილისი. 14 დეკემბერს ევროკავშირის წარმომადგენლობამ საქართველოში და ევროკავშირის სადამკვირვებლო მისიამ გამოავლინა გამაჯვებული ჟურნალისტები კონკურსის „ევროკავშირის პრიზი ჟურნალისტიკაში 2013" – ფარგლებში. ჟიურიმ საკონკურსოდ 1 ოქტომბრიდან 30 ოქტომბრამდე გამოქვეყნებული მასალები განიხილა და გამარჯვებულები 4 კატეგორიაში გამოავლინა. სრულად წყარო: media.ge

იმერეთი. 11 დეკემბერს ქუთაისის ახალგაზრდული ცენტრის წევრებისათვის გაიმართა დისკუსია: „მედიის როლი და თავისუფლება საქართველოში". სადისკუსიო კლუბის მუშაობას უძღვებოდა ჟურნალისტი დავით ლიკლიკაძე. შეხვედრაზე განხილეს მედიის თავისუფლების ხარისხი საქართველოში, თუ რა როლი მიუძღვის მასობრივ საინფორმაციო საშუალებებს დემოკრატიული საზოგადოების ფორმირების პროცესში და როგორია მოსახლეობის დამოკიდებულება მედიის მიმართ. ყურადღება გამახვილდა სოციალურ მედიაზე და მის მნიშვნელობაზე. დისკუსია გაიმართა „საქართველოში ეროვნული ინტეგრაციის გაძლიერების პროექტის" ფარგლებში, რომელსაც საქართველოს გაეროს ასოციაცია (UNAG), აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოებამ პრესის საარჩევნო მონიტორინგის მეოთხე შუალედური ანგარიში გამოაქვეყნა. ანგარიში მოიცავს 27 ოქტომბრიდან 15 ნოემბრამდე პერიოდს. სრულად წყარო: isfed.ge

თბილისი. საქართველოს ჟურნალისტური ეთიკის ქარტიის საბჭოს განცხადებით მიმართა მოქალაქეთა ჯგუფმა. განმცხადებლები მიიჩნევენ, რომ ვებ გვერდებმა primetimenews.ge, news.ge და ambebi.ge ლაშა ბაქრაძის მიერ ფეისბუქის საკუთარ გვერდზე გამოქვეყნებული ფოტოს გავრცელებითა და ამ მასალისთვის შერჩეული სათაურით დაარღვიეს ჟურნალისტური ეთიკისა და პროფესიული საქმიანობის სტანდარტები. ჟურნალისტური ეტიკის ქარტიის საბჭომ აღნიშნულ ფაქტთან დაკავშირებით მოსაზრება გამოაქვეყნა. სრულად წყარო: qartia.org.ge

თბილისი. საერთაშორისო ასოციაცია კივიტას გეორგიკას დაფინანსებით, არასამთავრობო ორგანიზაცია „ჯუნიორ ეჩივმენტ საქართველომ" მოქმედი და დამწყები ჟურნალისტებისა და ბლოგერებისთვის ტრენინგ პროგრამა განახორციელა. ტრენინგის - „ეკონომიკა და ბიზნესი ჟურნალისტებისთვის" - მიზანი იყო ჟურნალისტებისა და ბლოგერების გარკვევა ეკონომიკურ და სამართლებრივ ცნებებში, ასევე ბიზნეს საქმიანობაში, მათი კომპეტენციის გაზრდა ეკონომიკისა და ბიზნესის საკითხების გაშუქების პროცესში. ტრენინგების დასასრულს მონაწილეებს სერთიფიკატები გადაეცათ, ისინი ბიზნეს-საკითხებზე სტატიას მოამზადებენ. წყარო:civitas.ge

კახეთი. კაჭრეთში, სასტუმრო „ამბასადორში", კახეთის რეგიონში მომუშავე ჟურნალისტებისთვის 2 დღიანი ტრენინგი გაიმართა. ტრენინგი გაეროს განვითარების პროგრამა (UNDP) და გარემოს და ბუნებრივი რესურსების დაცვის სამინსტროს წარმომადგენლებმა გამართეს. ტრენინგის მიზანი იყო მედიის წარმომადგენლებისთვის მიეწოდებინათ ინფორმაცია მონრეალის ოქმის და ვენის კონვენციის შესახებ, რომელიც ითვალისწინებს ოზონის ფენის დამცავ და ასევე ოზონდამშლელი ნივთიერებების მოხმარებიდან ეტაპობრივად ამოღების ღონისძიებებს.

თბილისი. 3 დეკემბერს საქართველოს ჟურნალისტური ეთიკის ქარტიის ელექტრონული კენჭისყრის შედეგები გახდა ცნობილი. ქარტიის 197-მა წევრმა მხარი დაუჭირა ორგანიზაციის მანდატის გაფართოებას -  21 დეკემბრიდან ჟურნალისტური ეტიკის ქარტია არაწევრი ჟურნალისტების ეთიკური დარღვევების შესახებაც იმსჯელებს. ქარტიის საბჭო არაწევრი ჟურნალისტების მიმართ განცხადებებს საქმის წარმოების არსებული წესის მიხედვით განიხილავს. განხილვის წესში ერთი განსხვავება იქნება - არაწევრი ჟურნალისტის წინააღმდეგ განცხადების შეტანა ერთი თვის განმავლობაში იქნება შესაძლებელი, წევრის მიმართ კი უცვლელად დარჩება - სამი თვე. ვადის გასვლის შემდეგ ქარტია აღარ მიიღებს სადავო განცხადებას. წყარო:media.ge

თბილისი. 29 დეკემბერს თბილისის მედიაკონფერენცია 2013 გაიმართა.  ღონისძიებაში სხვადასხვა მედიასაშუალებების, საერთაშორისო და არასამთავრობო ორგანიზაციების, ასევე სახელმწიფო უწყებების 100-მდე წარმომადგენელი მონაწილეობდა. საერთაშორისო და ადგილობრივმა მედიაექსპერტებმა ისაუბრეს ოთხ ძირითად თემაზე:  ახალი პოლიტიკური რეალობის გავლენა მედიაზე;  ციფრული მაუწყებლობის გამოწვევები;  საზოგადოებრივი მაუწყებლის რეფორმა; მედიის ფინანსური გამჭვირვალობა და სარეკლამო ბაზარი. მედიაკონფერენცია 2013 წელს მეორედ გაიმართა, ღონისძიების ორგანიზატორები იყვნენ კოალიცია მედიის ადვოკატირებისათვის და ფონდი „ღია საზოგადოება-საქართველო". კონფერენციის თემებისა და მომხსენებლების შესახებ დეტალური ინფორმაცია  წყარო:ფონდ ღია საზოგადოება საქართველოს გვერდი სოციალურ ქსელში

თბილისი. 29 ნოემბერს, კოალიცია მედიის ადვოკატირებისთვის და ფონდი ღია საზოგადოება - საქართველოს ორგანიზებით თბილისის მედიაკონფერენცია 2013 ჩატარდება. ღონისძიებას ქართველი და უცხოელი ჟურნალისტები და ექსპერტები დაესწრებიან და ქართულ მედიაში არსებულ ვითარებას შეაფასებენ, იმსჯელებენ განვითარების პერსპექტივაზე. კონფერენციაზე შემდეგი თემები განიხილება: ახალი პოლიტიკური რეალობის გავლენა მედიაზე, სარედაქციო დამოუკიდებლობა, ჟურნალისტური სტანდარტი, თემების მრავალფეროვნება, მაუწყებლის რეგულირება, თვითრეგულირება, ციფრული მაუწყებლობის გამოწვევები, საზოგადოებრივი მაუწყებელის საკითხი, მედიის ფინანსური გამჭვირვალობა და სარეკლამო ბაზარი. კონფერენციის დღის წესრიგი წყარო:media.ge

თბილისი. 26 ნოემბერს, ფონდ „ღია საზოგადოება საქართველომ" მედიაკონკურსში – „ადამიანის უფლებები და ჯანდაცვა" – ხუთი გამარჯვებულებული ჟურნალისტი გამოავლინა. კონკურსის მიზანი იყო საზოგადოების და მედიის ყურადღების მიპყრობა ისეთი თემებისადმი, როგორებიცაა პალიატიური მზრუნველობის ქვეშ მყოფი, შეზღუდული შესაძლებლობის მქონე, აივ ინფიცირებულთა და შიდსით დაავადებული ადამიანების უფლებრივი მდგომარეობა. ასევე ყურადღების გამახვილება იმაზე, თუ როგორია მათთვის მკურნალობის და სერვისების ხელმისაწვდომობა. მედიაკონკურსი 2013 წლის ივლისში გამოცხადდა და მასში ტელე, ბეჭდური და ონლაინ მედიის 15-მა ჟურნალისტმა მიიღო მონაწილეობა. წყარო:media.ge

თბილისი. საქართველოს ჟურნალისტური ეთიკის ქარტია წესდებაში ცვლილებების შესატანად კენჭისყრას ატარებს. ქარტიას საბჭოს მანდატის გაფართოება სურს. კენჭისყრაში მონაწილეთა უმრავლესობა გადაწყვეტს შეეძლება თუ არა ქარტიას მისი არაწევრი ჟურნალისტების წინააღმდეგ შესული განცხადებების განხილვა. კენჭისყრაში მონაწილეობაზე შეთავაზება ქარტიის ხელმომწერ ჟურნალისტებს 25 ნოემბერს გაეგზავნათ. მათ საკუთარი აზრის დასაფიქისრებლად 7 დღე აქვთ. წესდებაში ცვლილებების დამატების შემთხვევაში, ქარტიის საბჭო არაწევრი ჟურნალისტების მიმართ განცხადებებს საქმის წარმოების არსებული წესის მიხედვით განიხილავს. განხილვის წესში ერთი განსხვავება იქნება - არაწევრი ჟურნალისტის წინააღმდეგ განცხადების შეტანა ერთი თვის განმავლობაში იქნება შესაძლებელი, წევრის მიმართ კი უცვლელად დარჩება - სამი თვე. ვადის გასვლის შემდეგ ქარტია აღარ მიიღებს სადავო განცხადებას. წყარო:media.ge