თბილისი. აღმოსავლეთ პარტნიორობის ეროვნული პლატფორმა, რომელიც 200–მდე ორგანიზაციას აერთიანებს, მიმართვას ავრცელებს. „... მმართველი გუნდის მიერ კანონპროექტის ხელახალი ინიცირება სახელმწიფო ინტერესებთან, კულტურასთან და ქართულ ტრადიციებთან შეუთავსებელია. პირობის გატეხვა, სიტყვის უკან წაღება არის რუსეთის პოლიტიკის მახასიათებელი, რომელსაც რუსეთი, ცივილიზებული მსოფლიოს, მათ შორის საქართველოს წინააღმდეგ არაერთგზის იყენებდა. ამით საქართველოს და მის თითოეულ მოქალაქეს ადგება რეპუტაციული ზიანი. კანონპროექტის ხელახალი ინიცირება ეწინააღმდეგება საქართველოს ევროინტეგრაციას და მისი მიღება საბოლოოდ დაასამარებს საქართველოს მოსახლეობის ისტორიულ მიზანს - გახდეს ევროკავშირის წევრი. ევროპისკენ მიმავალ გზაზე სვლას ჩვენ, როგორც ეროვნული პლატფორმის წევრი ორგანიზაციები დღემდე საქართველოს პარლამენტთან დიალოგითაც ვცდილობდით. სწორედ ამ მიზნით გავაფორმეთ თანამშრომლობის მემორანდუმი, რომელიც ევროკავშირის მხრიდან დადებითად შეფასდა, როგორც სამოქალქო სექტორისა და საკანონმდებლო ორგანოს თანამშრომლობის მაგალითი.  მაგრამ დღეს ,,ქართული ოცნების” მიერ ქვეყნის სახელმწიფოებრივი ინტერესების წიანააღმდეგ მიმართული კანონპროექტის ინიცირება გვიჭრის გზას, როგორც თანამშრომლობისკენ, ისე ევროინტეგრაციისკენ. საქართველოს ეროვნული პლატფორმა აჩერებს მემორანდუმის მოქმედებას.  მოვითხოვთ , შეწყდეს საქართველოს დასავლური სვლის საბოტაჟი. მმართველმა გუნდმა კვლავ გაიწვიოს ინიცირებული კანონპროექტი. საქართველოს ეროვნული პლატფორმის წევრი ორგანიზაციები მტკიცედ ვდგავართ ევროინტეგრაციის სადარაჯოზე. ჩვენ ურყევად დავიცავთ დემოკრატიას, თავისუფლებას, სამართლიანობას, თანასწორობას, საქართველოს ეროვნულ ინტერესებს და არავის მივცემთ უფლებას დაგვაკარგინოს არაერთი თაობის ბრძოლით მონაპოვარი ევროპული მომავალი". სრულად... წყარო: პლატფორმის გვერდი სოციალურ ქსელში

თბილისი. მრავალპარტიული დემოკრატიის ცენტრი (EECMD) განცხადებას ავრცელებს. მასში ნათქვამია, რომ „გასულ წელს, „ქართული ოცნება“ საქართველოს და საერთაშორისო საზოგადოებას დაჰპირდა, რომ რუსულ კანონს აღარ დააბრუნებდა პარლამენტში. მისი ხელახლა შემოტანა ხალხის მოტყუება და სიტყვის გატეხაა. კანონის ამოქმედება მოსპობს დამოუკიდებელ არასამთავრობო, მედია და საგანმანათლებლო ორგანიზაციებს საქართველოში. რუსული კანონის პარლამენტში დაბრუნება ამტკიცებს, რომ ქართულ ოცნებას ეშინია სამართლიანი და კონკურენტული საპარლამენტო არჩევნების.  ეს კანონი შეუძლებელს გახდის არჩევნების კონკურენტულ და გამჭვირვალე ვითარებაში ჩატარებას და ამით, საფუძველს გამოაცლის მის სამართლიანობას და კანონიერებას. მოვუწოდებთ „ქართულ ოცნებას“ დაუყოვნებლივ შეაჩეროს რუსული კანონის განხილვა და არ გადაუხვიოს საქართველოს დემოკრატიულ და ევროპულ კურსს“.  სრულად... წყარო: EECMD

თბილისი.USAID-ის სამოქალაქო საზოგადოების ჩართულობის პროგრამა ვიდეო-რგოლს აქვეყნებს. "ვინ არის აქტიური მოქალაქე?" ვიდეო მოამზადა „აქტიური მოქალაქეობის აკადემიამ“ USAID-ის სამოქალაქო საზოგადოების ჩართულობის პროგრამის მხარდაჭერით. სრულად... წყარო: USAID-ის სამოქალაქო საზოგადოების ჩართულობის პროგრამა

ევროკავშირის უმაღლესი წარმომადგენლის პრეს-სპიკერის განცხადება „უცხოური გავლენის გამჭვირვალობის შესახებ“ კანონპროექტთან დაკავშირებით: "საქართველოს მმართველი პარტიის განცხადება „უცხოური გავლენის გამჭვირვალობის შესახებ“ კანონპროექტის ხელახლა შემოტანასთან დაკავშირებით სერიოზულ შეშფოთებას იწვევს. ევროკავშირი შეგახსენებთ საქართველოს მთავრობისა და მმართველი პარტიის გასული წლის საჯარო დაპირებას, ასეთი კანონპროექტის „უპირობოდ გაწვევის“ შესახებ. ევროკავშირი წუხილს გამოთქვამს, რომ ის კვლავ განიხილება 2023 წლის მარტში საზოგადოების და საერთაშორისო მძაფრი რეაქციის მიუხედავად. სამოქალაქო საზოგადოების ორგანიზაციებისთვის ხელსაყრელი გარემოს შექმნა, შენარჩუნება და მედიის თავისუფლების უზრუნველყოფა დემოკრატიის საფუძველს წარმოადგენს.  მას ასევე გადამწყვეტი მნიშვნელობა აქვს ევროკავშირში გაწევრიანების პროცესისთვის. ევროკავშირი შეგახსენებთ, რომ ევროპულმა საბჭომ საქართველოს კანდიდატის სტატუსი მიანიჭა იმის გათვალისწინებით, რომ ევროკომისიის 2023 წლის 8 ნოემბრის რეკომენდაციის შესაბამისი ნაბიჯები გადაიდგმებოდა. ნაბიჯი 9 მოიცავს რეკომენდაციას, რომ საქართველომ სამოქალაქო საზოგადოების თავისუფლად მუშაობა უზრუნველყოს და ნაბიჯი 1 მოუწოდებს საქართველოს ევროკავშირისა და მისი ღირებულებების წინააღმდეგ მიმართულ დეზინფორმაციას ებრძოლოს.  გამჭვირვალობა სამოქალაქო საზოგადოების თავისუფალი მოქმედების შესაძლებლობის შეზღუდვის ინსტრუმენტად არ უნდა იქნას გამოყენებული. მოვუწოდებთ საქართველოს პოლიტიკურ ლიდერებს მიიღონ და განახორციელონ რეფორმები, რომელიც ევროკავშირში გაწევრიანების გაცხადებულ და საქართველოს მოქალაქეების დიდი უმრავლესობის მიერ მხარდაჭერილ მიზანს შეესაბამება. ევროკავშირი მოუწოდებს საქართველოს, დემოკრატიის, კანონის უზენაესობისა და ადამიანის უფლებების ხელშეწყობის კუთხით ნაკისრი ვალდებულებები შეასრულოს."  სრულად...  წყარო: ევროკავშირის წარმომადგენლობა საქართველოში

თბილისი. საპარლამენტო უმრავლესობის გეგმა, რომ კიდევ ერთხელ შეეცადოს „რუსული კანონის“ სახელით ცნობილი კანონპროექტის მიღებას, ერთი მხრივ, სასიცოცხლო საფრთხეს წარმოადგენს სამოქალაქო სივრცის მდგრადობისა და ფუნქციონირებისთვის, ხოლო მეორე მხრივ, ემუქრება საქართველოს ევროკავშირში გაწევრიანების პროცესს. როგორც უმრავლესობის ლიდერმა, მამუკა მდინარაძემ 3 აპრილს გამართულ ბრიფინგზე განაცხადა, გადაწყვეტილება მმართველი პარტიის პოლიტიკურ საბჭოსთან კონსულტაციის შემდეგ მიიღეს და კანონპროექტი პრაქტიკულად უცვლელი ტექსტით წარედგინებოდა პარლამენტს, თუმცა ნაცვლად ტერმინი „უცხოური გავლენის აგენტისა“, კანონპროექტის ახალ რედაქციაში „უცხოური ძალის ინტერესების გამტარებელი ორგანიზაციას“ გამოიყენებდნენ. იმავე დღეს, ფრაქცია „ქართულმა ოცნებამ“ კანონპროექტი პარლამენტში წარადგინა. საპარლამენტო უმრავლესობის ლიდერის თანახმად, „სამოქალაქო სექტორი რჩება ყველაზე გაუმჭვირვალე სექტორად საქართველოში“ და არასამთავრობო ორგანიზაციები ჩართულნი არიან „რევოლუციური სცენარების“ განხორციელებასა და ექსტრემიზმის დაფინანსებაში. მისივე თქმით, არასამთავრობო ორგანიზაციები აწარმოებენ საბჭოური სტილის კამპანიას სასამართლო ხელისუფლების დამოუკიდებლობის წინააღმდეგ და ჩართულნი არიან ფსევდო ლიბერალური იდეოლოგიის გავრცელებაში, საქართველოს მართლმადიდებელი ეკლესიის მიმართ ნდობის შერყევის მცდელობაში, ქვეყნის ენერგეტიკული დამოუკიდებლობის წინააღმდეგ მიმართულ ქმედებებსა და ე.წ. „ლგბტ“ - პროპაგანდაში. მან სამოქალაქო საზოგადოების ორგანიზაციები არჩევნების გაყალბებისა და რუსეთის წინააღმდეგ ომში ჩართვის მცდელობაშიც დაადანაშაულა. მდინარაძის თანახმად, ეს კანონი „გრძელვადიან პერსპექტივაში “დააზღვევს საქართველოს ქვეყანაში არეულობის ხელოვნურად გამოწვევის მცდელობებს”.  აღსანიშნავია, რომ საპარლამენტო უმრავლესობის გადაწყვეტილებას, კვლავ წარედგინა პარლამენტში აღნიშნული კანონპროექტი, გასულ კვირებში წინ უსწრებდა მმართველი პარტიისა და აღმასრულებელი ხელისუფლების წარმომადგენლების მიერ გაკეთებული განცხადებები, სადაც სამოქალაქო საზოგადოების ორგანიზაციებს ე.წ. „ვეტინგის სისტემის“ მხარდაჭერის გამო, სასამართლო სისტემის დისკრედიტაციაში და ლგბტქ + პროპაგანდაში ადანაშაულებდნენ. 2023 წლის მარტის ცნობილი მოვლენებისა და შემდგომი პროცესების გათვალისწინებით, აღნიშნული კანონპროექტის კიდევ ერთხელ ინიცირება და შემდგომში შესაძლო დამტკიცება დააზიანებს სამოქალაქო სივრცეს, მათ შორის: გამოიწვევს სამოქალაქო სივრცისა თუ ამ სივრცის ცალკეული აქტორების მუშაობის შეფერხებასა და საქმიანობაში ხელშეშლას; გააქტიურებს სამოქალაქო სექტორის წინააღმდეგ მიმართულ მტრულ რიტორიკასა და დისკრედიტაციის კამპანიებს; შეამცირებს ან სრულად გააქრობს სივრცეს სახელმწიფოსა და სამოქალაქო საზოგადოების ორგანიზაციებს შორის თანამშრომლობის შესაძლებლობებისთვის; გააუარესებს სამოქალაქო საზოგადოების ორგანიზაციების მხრიდან ადვოკატირებისა და სერვისის მიწოდების შესაძლებლობას, მათ შორის მოწყვლადი ჯგუფებისთვის. გარდა ამისა, აღნიშნული ინიციატივა და შესაბამისად სამოქალაქო სივრცის შეზღუდვა გააუარესებს საქართველოში ადამიანის უფლებების დაცვის მდგომარეობას. საგულისხმოა, რომ მოახლოებული 2024 წლის საპარლამენტო არჩევნების გათვალისწინებით, აღნიშნული კანონპროექტის პარლამენტში წარდგენა კიდევ უფრო მეტად ზრდის ქვეყანაში პოლარიზაციის ხარისხს, რაც ნეგატიურად აისახება ქვეყანაში დემოკრატიის მდგომარეობაზე. მნიშვნელოვანია, რომ კანონპროექტის შესაძლო მიღება დააზიანებს საქართველოს მიერ  ევროკავშირში გაწევრიანებისთვის მოლაპარაკებების დაწყებისთვის საჭირო 9 ნაბიჯის განხორციელების პროცესს. გასათვალისწინებელია, ევროკავშირის სხვადასხვა სტრუქტურის წარმომადგენლების ის ნეგატიური შეფასებები, რომლებიც გასულ წელს, ამ კანონის ინიცირებისა თუ პირველი მოსმენით მხარდაჭერის დროს გაკეთდა. ამ შეფასებების მიხედვით, კანონი შეუთავსებელი იყო ევროკავშირის ღირებულებებთან და სტანდარტებთან და ეწინააღმდეგებოდა საქართველოს გაცხადებულ მიზანს გამხდარიყო კავშირის ნაწილი. ასევე, კანონის საბოლოო მიღებას, შესაძლოა, ჰქონოდა სერიოზული ზეგავლენა ევროკავშირისა და საქართველოს ურთიერთობებზე. აღსანიშნავია ევროკავშირის უმაღლესი წარმომადგენლის პრეს-სპიკერის განცხადებაც, რომლის თანახმადაც, მმართველი პარტიის განცხადება „უცხოური გავლენის გამჭვირვალობის შესახებ“ კანონპროექტის ხელახლა შემოტანასთან დაკავშირებით სერიოზულ შეშფოთებას იწვევს.

თბილისი. ინფორმაციის თავისუფლების განვითარების ინსტიტუტმა (IDFI) საქართველოში მიმდინარე საჯარო მმართველობის რეფორმის შესახებ მიმოხილვა გამოაქვეყნა.  IDFI-ს მოსაზრებით, „საჯარო მმართველობის რეფორმის მიმდინარე 2023-2026 წლების სტრატეგიაში გაწერილია საკმაოდ არაამბიციური სამიზნე მაჩვენებლები, 2023-2024 წლების სამოქმედო გეგმაში კი წარმოდგენილია ძირეულ გარდაქმნებზე ნაკლებად ორიენტირებული აქტივობები“. IDFI-ის პოზიციით, აუცილებელია მეტი ძალისხმევა იქნას გაღებული ქვეყანაში საჯარო მმართველობის რეფორმის დაგეგმვის, განხორციელებისა და მონიტორინგის პროცესში.  სრულად...  წყარო: ინფორმაციის თავისუფლების განვითარების ინსტიტუტი

თბილისი. დისტანციური სასწავლო კურსი „სამოქალაქო ორგანიზაციების საქმიანობისა და მისი შედეგების შეფასება“, წარმატებით დაასრულა 70-მდე სამოქალაქო ორგანიზაციის წარმომადგენელმა, რის შედეგადაც მათ მოიპოვეს საგრანტო კონკურსში მონაწილოების უფლება.  კონკურსის საფუძველზე შეირჩა შემდეგი 13 სამოქალაქო საზოგადოებრივი ორგანიზაცია.  აღნიშნული ორგანიზაციები საგრანტო კომპონენტის ფარგლებში იმუშავებენ ორგანიზაციის მონიტორინგის და შეფასების სისტემის განვითარებაზე და შეიმუშავებენ ორგანიზაციის განვითარების სამომავლო სტრატეგიას.  აღნიშნული ინიციატივა ხორციელდება კონსულტაციისა და ტრენინგის ცენტრის - CTC მხარდაჭერით ევროკავშირისა და კონრად ადენაუერის ფონდის მიერ დაფინანსებული პროექტის "სამოქალაქო საზოგადოების ინიციატივის" ფარგლებში  სრულად...   წყარო: კონსულტაციისა და ტრენინგის ცენტრი

თბილისი. სამართლიანი არჩევნები განცხადებას აქვეყნებს.  „მიმდინარე წლის 20 მარტს მმართველი პარტიის დეპუტატებმა საქართველოს პარლამენტში წარადგინეს საკანონმდებლო ინიციატივა, რომელიც ითვალისწინებს ცვლილებების შეტანას საქართველოს ორგანულ კანონში „საქართველოს საარჩევნო კოდექსში”.  „სამართლიანი არჩევნების” შეფასებით, მოქმედი, სრულად პროპორციული საარჩევნო სისტემის ფარგლებში, წარმოდგენილი ინიციატივა ვერ უზრუნველყოფს ქვეყნის უმაღლეს წარმომადგენლობით ორგანოში რეგიონების რეალურ წარმომადგენლობას, არ შეიცავს ამომრჩეველსა და კანდიდატს შორის კავშირის ინსტიტუციონალურ საფუძველს, როგორც ხმის მიცემის, ისე მანდატების განაწილების პროცესში. „ - ნათქვამია განცხადებაში  სრულად...  წყარო: სამართლიანი არჩევნები

გურია. 24 მარტს, ოზურგეთში, განათლების განვითარების და დასაქმების ცენტრის ორგანიზებით, გურიაში მცხოვრები ახალგაზრდებისთვის სამუშაო შეხვედრა ჩატარდა. სამუშაო შეხვედრა ორგანიზებული იყო განათლების განვითარების და დასაქმების ცენტრის (EDEC) მიერ, ევროკავშირისა და კონრად ადენაუერის ფონდის ფინანსური მხარდაჭერით, პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. პროექტს „სამოქალაქო საზოგადოების ინიციატივა“ ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად – საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: განათლების განვითარების და დასაქმების ცენტრი

იმერეთი. განათლების განვითარებისა და დასაქმების ცენტრმა, მოხალისეობრივი საქმიანობის პოპულარიზაციის მიზნით ქუთაისის საჯარო სკოლებთან თანამშრომლობა დაიწყო.  თანამშრომლობის ფარგლებში სკოლებმა სხვადასხვა მოხალისეობრივი აქტივობების განხორიელება დაიწყეს.  აქტივობა განხორციელდა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში.  პროექტს „სამოქალაქო საზოგადოების ინიციატივა“ ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად – საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP).  სრულად...  წყარო: ვოლუნტერი

გურია. კავკასიის გარემოსდაცვითი არასამთვრობო ქსელი 27, 28 და 29 მარტს გურიის სამივე მუნიციპალიტეტისთვის ევროკავშირის მხარდაჭერით შემუშავებულ ადგილობრივი განვითარების სტრატეგიების პრეზენტაციებს გამართავს.  შეხვედრა საჯაროა და დასწრება გურიის რეგიონში მცხოვრებ ნებისმიერ დაინტერესებულ პირს შეუძლია. შეხვედრების მიზანია, პროექტის „მწვანე გურია - ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის“ ფარგლებში შემუშავებული ოზურგეთის, ჩოხატაურისა და ლანჩხუთის ადგილობრივი სტრატეგიების განხილვა და დოკუმენტების ყველა დაინტერესებული მხარისთვის გაცნობა.  ასევე, შეხვედრის ფარგლებში მოხდება პროექტის ფარგლებში უკვე შესრულებული სამუშაოებისა და ოზურგეთის, ჩოხატაურისა და ლანჩხუთის ადგილობრივი სამოქმედო ჯგუფების (LAG) საქმიანობების პრეზენტაცია.  სრულად...  წყარო: კავკასიის გარემოსდაცვითი არასამთავრობო ქსელი

თბილისი. 12 საზოგადოებრივი ორგანიზაციის კოალიცია ევროკავშირის დელეგაციასა და საქართველოში აკრედიტებული ევროკავშირის წევრი ქვეყნების საელჩოების წარმომადგენლებს შეხვდა. შეხვედრის მიზანი იყო ხედვების გაზიარება და მოსაზრებების ურთიერთგაცვლა ევროკომისიის მიერ განსაზღვრული 9 ნაბიჯის შესასრულებლად საქართველოს მიერ გასატარებელი რეფორმების შესახებ, რათა ქვეყანა ევროინტეგრაციის შემდგომ ეტაპზე გადავიდეს და ევროკავშირთან გაწევრების შესახებ მოლაპარაკებები გაიხსნას.  სრულად... წყარო: სამოქალაქო საზოგადოების ფონდი

სტენფორდის უნივერსიტეტის დემოკრატიის, განვითარებისა და კანონის უზენაესობის ცენტრი (CDDRL), ეკონომიკური პოლიტიკის კვლევის ცენტრი (EPRC) და ფუკუიამას დემოკრატიის ფრონტისპირა ცენტრი, 25 მარტს, 19:00 საათზე, სასტუმრო სტამბაში გამართავს საჯარო დისკუსიას პროფესორ ფრენსის ფუკუიამასთან და ერიკ ჯენსენთან ერთად - „ამერიკა და გლობალური დემოკრატია“. სრულად... წყარო: EPRC

იმერეთი. 20 მარტს იმერეთის რეგიონული ჰაბის - ადგილობრივი დემოკრატიის სააგენტო საქართველოს (LDA Georgia) ორგანიზებით, გაიმართა საჯარო კონსულტაცია იმერეთის რეგიონის სამოქალაქო საზოგადოების ორგანიზაციების წარმომადგენლებისთვის. შეხვედრაზე მოწვეულ სტუმართან გერმანიის საერთაშორისო თანამშრომლობის საზოგადოების (GIZ) პროგრამის ,,სამოქალაქო საზოგადოების გაძლიერება აღმოსავლეთ პარტნიორობის ქვეყნებში" ეროვნულ კოორდინატორთან ქალბატონ თამარ გურეშიძესთან ერთად იმსჯელეს რეგიონულ დონოზე არსებული საჭიროებებისა და ინტერესის სფეროებზე.  შეხვედრა გაიმართა პროექტის ,,სამოქალაქო საზოგადოების ინიციატივა“ ფარგლებში, რომელიც ხორციელდება ევროკავშირისა (EU) და კონრად ადენაუერის ფონდის (KAS) მხარდაჭერით.  წყარო: ადგილობრივი დემოკრატიის სააგენტო

კახეთი. ევროკავშირის სამეზობლო პოლიტიკის გვერდი აქვეყნებს პუბლიკაციას პანკში მომუშავე „უხუცეს ქალთა საბჭოს“ საქმიანობაზე ერთი კონკრეტული პროექტის – სამოქალაქო საზოგადოების ინიციატივის – ფარგლებში.  პუბლიკაცია...  წყარო: euneighbourseast.eu

თბილისი. საზოგადოებრივი ორგანიზაციები ერთობლივ განცხადებას ავრცელებენ: „მოსამართლეთა კეთილსინდისიერების შემოწმების თემა ვერ დაიხურება, რადგან ქართველი ხალხის დაკვეთა სასამართლოს გაჯანსაღება და ევროკავშირის წევრობაა“.  „ვეხმიანებით პრემიერ-მინისტრისა და პარლამენტის თავმჯდომარის განცხადებებს, რომელთა თანახმადაც, ისინი მოსამართლეთა კეთილსინდისიერების შემოწმების მექანიზმის შექმნის საკითხს დახურულად აცხადებენ. სასამართლოს გაჯანსაღების თემა ვერ დაიხურება, რადგან ევროკომისიის ეს მოთხოვნა საქართველოსთან წევრობაზე მოლაპარაკების გახსნის მნიშვნელოვანი წინაპირობაა, ხოლო საქართველოს მოსახლეობისთვის ევროკავშირში გაწევრიანება უმნიშვნელოვანესი პრიორიტეტი“, ნათქვამია განცხადებაში.  სრულად...  წყარო: საერთაშორისო გამჭვირვალობა – საქართველო

თბილისი. სამართლიანმა არჩევნებმა სოციალურ მედიაში 20 თებერვლიდან–5 მარტის ჩათვლით პროპაგანდისტული და დისკრედიტაციული გზავნილების მიმოხილვა გამოაქვეყნა.  სრულად... წყარო: სამართლიანი არჩევნები

თბილისი. გამჭვირვალობა–საქართველო და საია ერთობლივ განცხადებას ავრცელებენ – „ცესკოს დაკომპლექტებაზე პრეზიდენტის ვეტოს დაძლევა დააბრკოლებს ევროინტეგრაციის პროცესს“.  „19 მარტს საქართველოს პარლამენტმა ჩააგდო პრეზიდენტის მოტივირებული შენიშვნები საქართველოს საარჩევნო კოდექსსა და საქართველოს პარლამენტის რეგლამენტში „ქართული ოცნების“ უმრავლესობის მიერ მიღებული ცვლილებების მიმართ, რომლებიც აშკარად ეწინააღმდეგება ცენტრალური საარჩევნო კომისიის თავმჯდომარისა და წევრების არჩევასთან დაკავშირებით ვენეციის კომისიისა და ეუთო/ოდირის მიერ გაცემულ რეკომენდაციებს“, ნათქვამია განცხადებაში.  სრულად...  წყარო: საია

თბილისი. ევროკავშირის წარმომადგენლობამ საქართველოში, ცოტა ხნის წინ, საზოგადოებას შეკითხვების დასმა შესთავაზა იმის შესახებ, თუ რას ნიშნავს ევროკავშირის კანდიდატის სტატუსი საქართველოსა და მისი მოსახლეობისთვის. უყურეთ ვიდეოში ევროკავშირის ელჩს პაველ ჰერჩინსკის, რომელიც თქვენ მიერ დასმულ რამდენიმე კითხვას პასუხობს. სხვა შეკითხვებზე პასუხების მოსასმენად, თვალი ადევნეთ ევროკავშირის ვებგვერდს. იხილეთ ყველა კითხვავები ვებ–გვერდზე...  წყარო: eu4georgia.eu

აჭარა.18 მარტს, ბათუმის „ჩაერთე მართვის“ კლუბის ფარგლებში მონაწილეებმა საინფორმაციო ბროშურების გავრცელების აქცია გამართეს. აქციის მიზანი, ადგილობრივი მნიშვნელობის გადაწყვეტილებების მიღების პროცესში მონაწილეობის მექანიზმების შესახებ მოქალაქეთა ინფორმირება იყო.  კლუბი „ჩაერთე მართვაში“ საქართველოს 4 რეგიონში ფუნქციონირებს. კლუბები შეიქმნა კამპანიის „ჩაერთე მართვის“ ფარგლებში, რომელსაც სამოქალაქო საზოგადოების ინსტიტუტი (CSI), აშშ–ის საერთაშორისო განვითარების სააგენტოს ადგილობრივი თვითმმართველობის პროგრამის ფარგლებში. წყარო: ჩაერთე მართვაში

სამოქალაქო საზოგადოების ინსტიტუტი (CSI), USAID–ის ადგილობრივი თვითმმართველობის პროგრამის ფარგლებში მოქალაქეთა მონაწილეობის ფორუმისთვის ემზადება. რომლის მიზანია მულტისექტორული სადისკუსიო სივრცის შექმნა, სადაც მონაწილეები ერთმანეთს გაუზიარებენ მოქალაქეთა მონაწილეობის კუთხით, მუნიციპალურ დონეზე არსებულ გამოცდილებას, პრაქტიკებს და გამოწვევებს.  იმისთვის, რომ ფორუმი კიდევ უფრო საინტერესო და მოქალაქეების ინტერესებზე მორგებული გავხადოთ, თქვენ გეძლევათ შესაძლებლობა გახდეთ ფორუმის დღის წესრიგის თანაავტორი. თუ გაქვთ იდეა რა თემატიკას უნდა დაეთმოს ფორუმი ან ვის ისურვებდით ფორუმზე მოწვეულ სპიკერად, მაშინ შეავსეთ მცირე კითხვარი და გაგვიზიარეთ თქვენი მოსაზრებები: https://bit.ly/4ci578a კითხვარის შევსების ბოლო ვადაა: 24 მარტი ფორუმი აპრილის თვეში იგეგმება და დეტალებს ეტაპობრივად გაგიზიარებთ

თბილისი.ეკონომიკური თანამშრომლობისა და განვითარების ორგანიზაციამ (OECD) გამოაქვეყნა აზერბაიჯანის, მოლდოვის, სომხეთის და უკრაინის ანტიკორუფციული გარემოს მონიტორინგის მე-5 რაუნდის ანგარიშები, რომლებიც ანტიკორუფციული ქსელის (OECD/ACN) მიერ მომზადდა. ამ საკითხზე საზოგადოებრივი ორგანიზაციები განცხადებას ავრცელებენ: „საქართველო ერთადერთი ქვეყანაა, რომელმაც უარი თქვა მონიტორინგის მე-5 რაუნდში მონაწილეობაზე, რომელიც მიზნად ისახავდა ქვეყნის ანტიკორუფციული რეფორმების შეფასებას“.  სსო–ები მოუწოდებენ საქართველოს მთავრობას, შეასრულოს ევროკომისიის რეკომენდაცია, დაუბრუნდეს OECD/ACN-ის პროცესს და არ შეაფერხოს ქვეყნის ევროინტეგრაციის პროცესი. სრულად...  წყარო: საერთაშორისო გამჭვირვალობა – საქართველო