არასამთავრობო ორგანიზაციებმა ერთობლივი განცხადება გაავრცელეს. 14 მაისს საქართველოს პარლამენტის უმრავლესობის წევრებმა ქართველი ხალხის ეროვნული ინტერესებისა და კონსტიტუციის საწინააღმდეგო რუსული კანონი მესამე მოსმენით მიიღეს. საქართველოში პუტინის წესების დამკვიდრების ეს მცდელობა ღალატია ყველა ჩვენი წინაპრისა და თანამემამულისა, ვინც ორასზე მეტი წლის განმავლობაში საქართველოს გარუსების წინააღმდეგ იბრძოდა და იბრძვის. მთელი საერთაშორისო საზოგადოების მიერ დაგმობილი კანონპროექტის კანონად ქცევამდე პრეზიდენტის ვეტო რჩება, რომელიც პარლამენტმა არ უნდა დაძლიოს. კიდევ ერთხელ ვაცხადებთ, რომ ქართველი ხალხი რუსულ კანონებს, ძალადობრივ მმართველობასა და დასავლური სამყაროსგან მოწყვეტას არ მივიღებთ. სრულად ვიზიარებთ საქართველოს პრეზიდენტის პოზიციას, რომ ამ კანონის გაუმჯობესება შეუძლებელია და ევროკომისიის განცხადებას, რომლის თანახმად კანონი გაწვეულ უნდა იქნას. კანონი აღარ არის მხოლოდ სამართლებრივი ტექსტი, არამედ გადაიქცა ხელისუფლების ხალხზე ძალადობის, დაშინებისა და ქვეყნის ღალატის სიმბოლოდ. სწორედ ამ ძალადობის და დასავლური ვექტორის შეცვლის შემაკავებელი კანონზომიერი შედეგი იქნება პერსონალური ფინანსური სანქციები, რომელიც მათ და მათი ოჯახის წევრებს დაუწესდებათ, ვინც ქვეყნის კონსტიტუციაზე მაღლა პირადი ინტერესი დააყენა.  ქართველი ხალხის ნება ურყევია. ჩვენი გემი ევროპისკენ დაძრულია. კიდევ ერთხელ ვიმეორებთ - ხელისუფლებამ ეს კანონი უპირობოდ უნდა გაიწვიოს.  კი ევროპას!  არა რუსულ კანონს! სრულად...

14 მაისს, მასობრივი პროტესტის ფონზე, საქართველოს პარლამენტმა მესამე მოსმენით მხარი დაუჭირა „რუსული კანონის“ სახელიც ცნობილ კანონს, რაც ქვეყანაში სპობს სამოქალაქო საზოგადოების სასიცოცხლო სივრცეს და ქვეყანაში ზრდის პოლიტიკურ პოლარიზაციას. კანონპროექტის სასარგებლოდ ხმა 84-მა დეპუტატმა მისცა, ხოლო წინააღმდეგი საპარლამენტო ოპოზიციის 30 წევრი აღმოჩნდა. საპარლამენტო უმრავლესობის მიერ კანონპროექტის მიღებას ქვეყანაში წინ უძღოდა მასობრივი საპროტესტო აქციები, ხოლო საქართველოს უცხოელი პარტნიორებიდან მხრიდან მოწოდებები, რომ მმართველ გუნდს არ მიეღო მსგავსი გადაწყვეტილება, რადგან ეს, მათ შორის, ეწინააღმდეგებოდა ქართველი ხალხის არჩევანსა და წარმოადგენდა დაბრკოლებას საქართველოს ევროპული ინტეგრაციის გზაზე. 13 მაისს, საქართველოში ვიზიტით მყოფმა გერმანიის ბუნდესტაგის საგარეო საქმეთა კომიტეტის თავმჯდომარემ, მიხაილ როთმა ქვეყნის ევროინტეგრაციაზე საუბრისას განაცხადა, რომ იგი „ვერ ხედავდა საქართველოს ნათელი მომავლის შანსს, თუ ხელისუფლება ამ კანონს უკან არ გაიწვევდა“. მანამდე, 12 მაისს კანონ-პროექტის გაწვევა ერთობლივი განცხადებით კიდევ ერთხელ მოითხოვა 120-ზე მეტმა ქართულმა სამოქალაქო საზოგადოების ორგანიზაციამაც. საგულისხმოა, რომ კანონპროექტის მეორე მოსმენით მიღებიდან დღემდე პერიოდი ხასიათდება საპროტესტო აქციების მონაწილეთა დაკავებებით, ფიზიკური ანგარიშსწორების, სიტყვიერი შეურაცხყოფისა და მუქარის განმეორებადი ფაქტებით. აღსანიშნავია პოლიტიკური ნიშნით თავდასხმები კანონპროექტის საწინააღმდეგო აქციებში მონაწილე პირთა წინააღმდეგ და მოქალაქეებთან საქართველოსა და უცხოეთის ქვეყნებში რეგისტრირებული სატელეფონო ნომრებით განხორციელებული მუქარის შემცველი და შეურაცხმყოფელი ანონიმური ზარები. ასევე, სამოქალაქო საზოგადოების ორგანიზაციებისა და მედიის ოფისებთან თუ ცალკეული პირების საცხოვრებელ სახლებთან სიძულვილის ენის შემცველი წარწერებისა და პლაკატების დატოვება. ამჟამად, პროცედურის თანახმად, საქართველოს პარლამენტს აქვს მაქსიმუმ 10-დღიანი ვადა, რათა მიღებული კანონი ხელმოსაწერად საქართველოს პრეზიდენტს გადაუგზავნოს, ხოლო თავის მხრივ, მისი გადაცემიდან პრეზიდენტს აქვს 2-კვირიანი ვადა, რათა ხელი მოაწეროს მას, ან გამოიყენოს ე.წ. ვეტოს უფლება, რაც გულისხმობს კანონის მოტივირებული შენიშვნებით პარლამენტისთვის უკანვე დაბრუნებას. მოტივირებული შენიშვნებით დაბრუნებული კანონი პარლამენტის პლენარულ სხდომაზე განიხილება და მიიღება ერთი მოსმენით. აღსანიშნავია, რომ საქართველოს პრემიერ-მინისტრმა, ირაკლი კობახიძემ კანონის მიღებამდე რამდენიმე დღით ადრე, 10 მაისს განაცხადა, რომ მან უცხოელ პარტნიორებს აცნობა, რომ „ვეტოს პროცედურების ფარგლებში შესაძლებელი იყო პოზიციების შეჯერება.“ მოგვიანებით, 12 მაისს გაკეთებულ განცხადებაში მან დააკონკრეტა, რომ კომუნიკაცია ამ საკითხზე ევროკავშირისა და ეუთოს წარმომადგენლებთან ჰქონდა და აღნიშნა, რომ პრეზიდენტს წარსულშიც „ენჯეოები ან გარედან უწერდნენ ხოლმე ვეტოებს“. საპასუხოდ 12 მაისს საქართველოს პრეზიდენტმა, სალომე ზურაბიშვილმა განაცხადა, რომ იგი „წარმოადგენს ვეტოს, მაგრამ არცერთ მანიპულაციაში არ შევა, რადგან ამას მხოლოდ ხალხში გაუგებრობის შემოტანის მიზანი ექნება“ მისივე განცხადებით, თუ მმართველ გუნდს სურდა კანონის შეცვლა, ეს თავადვე უნდა გაეკეთებინა. კანონის საბოლოო დამტკიცება და თანმხლები პროცესები საფრთხის შემცველია და გამოიწვევს სამოქალაქო სივრცისა თუ ამ სივრცის ცალკეული წევრების მუშაობის შეფერხებას, გაზრდის პოლიტიკურ პოლარიზაციას, კიდევ უფრო გააძლიერებს მტრულ რიტორიკასა და დისკრედიტაციის კამპანიებს, გააქრობს სივრცეს სახელმწიფოსა და სამოქალაქო ორგანიზაციებს შორის თანამშრომლობისთვის და გაართულებს სამოქალაქო საზოგადოების ორგანიზაციების მხრიდან ადვოკატირებისა და სერვისის მიწოდების შესაძლებლობას, ასევე, შესაძლოა, გამოიწვიოს ქვეყნის ევროკავშირში ინტეგრაციის პროცესის შეფერხებაც.

არასამთავრობო ორგანიზაციებმა ერთობლივი განცხადება გაავრცელეს. „... კანონპროექტი საკუთარი მიზნებითა და შინაარსით არის რუსული, მიმართულია ქართველი ხალხის დასავლური კურსის წინააღმდეგ და ის უპირობოდ უნდა იქნას უკან გაწვეული. ვერანაირი შესწორება ვერ შეცვლის იმ დამანგრეველ შედეგებს, რასაც ამ კანონის ამოქმედება ჩვენს საზოგადოებას მოუტანს".  სრულად...   წყარო: gyla.ge

ევროპის ფონდმა 2023 წელს გამოაქვეყნა კვლევა, რომლის მიხედვით კითხვაზე: „ხვალ რომ ტარდებოდეს რეფერენდუმი საქართველოს ევროკავშირში გაწევრიანების შესახებ“, მოსახლეობის 77%, დადებით პასუხს შემოხაზავდა. სრულად...  წყარო: ევროპის ფონდი

თბილისი. არასამთავრობო ორგანიზაციები ერთობლივ განცხადებას ავრცელებენ. განცხადების ტექსტი: „8 მაისის ღამეს ხელისუფლებას ნერვებმა უმტყუნა და ნაადრევად დაიწყო იმის ჩვენება, თუ როგორ ქვეყანად აპირებენ საქართველოს ქცევას. ბიძინა ივანიშვილის მიერ 29 აპრილს დაანონსებული საგარეო ვექტორის ცვლილება და რეპრესიები უკვე თვალსაჩინოდ ამოქმედდა - ასობით მოქალაქესთან განხორციელებული მუქარისა და შეურაცხყოფის ზარები პოლიტიკოსებსა და აქტივისტებზე ფიზიკურ თავდასხმებსა და ორგანიზებულ ანგარიშსწორებაში გადაიზარდა. ოლიგარქსა და მის მარიონეტებს ავიწყდებათ, რომ საქართველო არ არის რუსეთი. ქართველებმა ვიცით თავისუფლების ფასი. ქვეყნის ევროპული მომავლისთვის ჩვენს ბრძოლას რუსული უშიშროების სამსახურების მეთოდებით ვერაფერს დააკლებენ. ადამიანზე მიპარვით ზურგიდან თავდასხმას, სადარბაზოებში დევნას, ან მცირეწლოვანი ბავშვისთვის კარის შემტვრევის მცდელობას ქართველი არასოდეს მოიწონებს. ასე იქცევა რუსული რეჟიმი.  ჩვენ სამართლებრივ დახმარებას ყველა დაზარალებულს გავუწევთ. აქტიურ მოქალაქეებზე მიზანმიმართული თავდასხმის თითოეულ შემთხვევას - წინა კვირებში გამართულ აქციებზე თუ ახლა - აუცილებლად ბოლომდე მივყვებით, მოვითხოვთ და უზრუნველვყოფთ დამნაშავეთა გამოვლენას. თავისუფლება ქართველი ხალხისთვის მთავარი ღირებულებაა. ამიტომ ვდგავართ და ვიდგებით საქართველოს ევროპული მომავლის სადარაჯოზე, რუსული მეთოდებისა და ძალადობისაგან ამ ქვეყნის დასაცავად. ამ ბრძოლას ქართველი ხალხი გამარჯვებით დაასრულებს, მოძალადეებს კი სათანადო პასუხი აუცილებლად მიეზღვებათ“.  სრულად... წყარო: csf.ge

თბილისი. 2013–2023 წლებში უცხოური სესხებისა და გრანტების ჯამური წილი ბუიჯეტში წლიურად საშუალოდ 16%–ს აღწევს, ნათქვამია ფაქტ–მეტრის ინფორმაციაში.  „11 წელიწადში ქვეყნის ბიუჯეტმა საზღვარგარეთიდან კრედიტის სახით ჯამურად 23 მლრდ ლარი და გრანტის სახით 3.4 მლრდ ლარი მიიღო. 2024 წლის გეგმის მიხედვით, 2 მლრდ-ზე მეტის უცხოური დაფინანსების მიღებაა გათვალისწინებული“.  სრულად...  წყარო: factcheck.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს.  ელ-ბიულეტენი…

ევროკავშირის უმაღლესი წარმომადგენელი, ევროკომისიის ვიცე-პრეზიდენტი ჯოზეფ ბორელი საქართველოში მიმდინარე მოვლენებს გამოეხმაურა.  "მკაცრად ვგმობ ძალადობას საქართველოში აქციის იმ მონაწილეების წინააღმდეგ, ვინც „უცხოური გავლენის შესახებ“ კანონს მშვიდობიანად აპროტესტებდა. საქართველო ევროკავშირის კანდიდატი ქვეყანაა, მოვუწოდებ მის ხელისუფლებას, უზრუნველყოს მშვიდობიანი შეკრების უფლება. ძალის გამოყენება აქციის ჩასახშობად მიუღებელია."  სრულად...  წყარო: ევროკავშირის წარმომადგელობა საქართველოში

რუსული კანონის სახელით ცნობილი კანონპროექტის განხილვის პარალელურად, 29 აპრილს, სახელისუფლებო გუნდის მიერ ორგანიზებული შეკრებისას გაკეთებული ოფიციალური განცხადებები ატარებს სამოქალაქო საზოგადოების ორგანიზაციების დისკრედიტაციისა და სტიგმატიზაციის აშკარა ნიშნებს და აღრმავებს პოლიტიკურ პოლარიზაციას, რაც თავის მხრივ ნეგატიურად აისახება სამოქალაქო საზოგადოების საარსებო გარემოზე. „ქართული ოცნების“ მიერ ინიცირებული კანონპროექტის საწინააღმდეგო აქციების კვალდაკვალ, თბილისში მმართველი გუნდის ორგანიზებით სახელისუფლებო პოლიტიკის მხარდამჭერი შეკრება გაიმართა. რომელსაც რეგიონებიდან ჩამოსული მოქალაქეებიც ესწრებოდნენ. შეხვედრაზე, გარდა აღმასრულებელი და საკანონმდებლო ხელისუფლებების წარმომადგენლებისა, სიტყვით გამოვიდა ბიძინა ივანიშვილიც, რომელიც ამჟამად პარტია „ქართული ოცნების“ საპატიო თავმჯდომარეა და, როგორც პარტიის წევრები აცხადებენ, პირადადაა ჩართული მნიშვნელოვანი პოლიტიკური გადაწყვეტილებების მიღების პროცესში. ბიძინა ივანიშვილმა სიტყვით გამოსვლისას არასამთავრობო ორგანიზაციები 2003 წელს რევოლუციის მოწყობაში დაადანაშაულა, რამაც, მისი თქმით, ხელისუფლებაში „გარედან დანიშნული აგენტების“ მოსვლა გამოიწვია. მისივე განცხადებით, დასავლეთში „ქართული ოცნების“ მიერ ინიცირებულ კანონპროექტს ებრძვიან, რადგან არასამთავრობო ორგანიზაციების „გაუმჭვირვალე დაფინანსება არის მთავარი ინსტრუმენტი, რომლითაც საქართველოს ხელისუფლების გარედან დანიშვნაა შესაძლებელი“. პარტიის საპატიო თავმჯდომარემ განაცხადა ისიც, რომ ამ ორგანიზაციების დაფინანსების მთავარ მიზანს „საქართველოს სუვერენიტეტის განადგურება“ და „ხელისუფლებაში კვლავ აგენტების დაბრუნება წარმოადგენს“, მაშინ, როდესაც თავად აღნიშნული კანონპროექტის მიღებას სწორედ სუვერენიტეტის განმტკიცებისთვის სურთ. მისივე განცხადებით, შემოდგომაზე დაგეგმილი არჩევნების შემდეგ სახელისუფლებო გუნდს ექნება საშუალება, რათა „კოლექტიურ ნაციონალურ მოძრაობას მკაცრი პოლიტიკური და სამართლებრივი განაჩენი გამოუტანოს“. ტერმინში „კოლექტიური ნაცმოძრაობა“ ხელისუფლების წარმომადგენლები ხშირად ოპოზიციურ პარტიებს, კრიტიკულად განწყობილ მედიასა და სამოქალაქო საზოგადოების ორგანიზაციებსაც გულისხმობენ. არასამთავრობო ორგანიზაციების მიერ რევოლუციის მოწყობის მცდელობებისა და ფინანსების აგენტურის გაძლიერებისთვის მიმართვაზე ისაუბრეს თბილისის მერმა, კახა კალაძემ და პრემიერ-მინისტრმა, ირაკლი კობახიძემ. მმართველი გუნდის წევრების რიტორიკა აშკარა ატარებს სამოქალაქო საზოგადოების ორგანიზაციების დისკრედიტაციისა და სტიგმატიზაციის გამოხატულ ნიშნებს და მიზნად ისახავს საზოგადოებაში ნეგატიური განწყობების გაღვივებას, რაც საბოლოოდ ამ ორგანიზაციებისადმი ნდობის შემცირებაში შეიძლება გამოიხატოს. გარდა ამისა, ერთგვარი დაპირება, რომ არჩევნების შემდეგ ხელისუფლება „მკაცრად აგებინებს პასუხს კოლექტიურ ნაციონალურ მოძრაობას“, კიდევ უფრო ზრდის ქვეყანაში არსებულ პოლიტიკურ პოლარიზაციას, რაც თავის მხრივ, აუარესებს ქვეყანაში სამოქალაქო საზოგადოების სასიცოცხლო გარემოს. შედეგად, სამოქალაქო საზოგადოების ორგანიზაციების წინააღმდეგ მიმართული მტრული რიტორიკა და ქვეყანაში პოლიტიკური პოლარიზაციის გაზრდილი დონე კიდევ უფრო ართულებს სამოქალაქო საზოგადოების ორგანიზაციების მუშაობას. 30 აპრილს სამოქალაქო საზოგადოების ორგანიზაციებმა ერთობლივი განცხადება გაავრცელეს, სადაც, მათ შორის, დაგმეს 29 აპრილს მმართველი გუნდის მიერ გაკეთებული განცხადებები.

სამოქალაქო საზოგადოების წარმომადგენლები ერთობლივ განცხადებას ავრცელებენ. „სამოქალაქო საზოგადოება კვირების განმავლობაში დეტალურად განმარტავდა, თუ რატომ არის რუსული კანონი ანტიკონსტიტუციური, ქართული დემოკრატიის დასასრული და ევროკავშირში ინტეგრაციის საერთო-ეროვნული სწრაფვის შეგნებულად დამაზიანებელი. თუმცა, რუსული კანონის მავნე შედეგებში საზოგადოების დარწმუნებას ხელისუფლების გუშინდელ განცხადებებზე უკეთ ვერავინ შეძლებდა. ხელისუფლებამ ღიად დააფიქსირა, რომ რუსული კანონის მიღებით ისინი ხალხის წინააღმდეგ რეპრესიების გამოცხადებას გეგმავენ. ისინი აანონსებენ არჩევნების მიტაცებას, ცენზურას და საბჭოთა სტილის ტოტალიტარულ რეჟიმს. მათ განაცხადეს, რომ დასავლეთს ხედავენ მტრად, ხოლო ჩვენი ქვეყნის ოკუპანტი ქვეყანა, რუსეთი, არც კი უხსენებიათ ამ კონტექსტში. ყველამ ნათლად გაიგო, რომ რუსული კანონის მიღების მიზანი არა ყბადაღებული “გამჭვირვალობა”, არამედ ქვეყნის საგარეო კურსის შეცვლა და რუსეთიზაციის გაფორმებაა. დღეს ხელისუფლება ამ ანტიკონსტიტუციური კანონის მისაღებად მორიგ ნაბიჯს დგამს და რუსული კანონის მეორე მოსმენით პლენარულ განხილვას გეგმავს.  ამიტომაც, ჩვენ, ამ ქვეყნის სამოქალაქო საზოგადოების წევრები და მოქალაქეები:  • შევეწინააღმდეგებით კანონის მეორე მოსმენით მიღების მცდელობას და კიდევ ერთხელ ვაჩვენებთ ხელისუფლებას, რომ რუსული კანონით კონსტიტუციის ღალატი და ევროკავშირზე უარის თქმა არასოდეს იქნება ქართველი ხალხის არჩევანი;  • მოვუწოდებთ პოლიტიკურ პარტიებს, კვლავ შეასრულონ საკუთარი მოვალეობა ხალხის წინაშე და კიდევ უფრო მტკიცედ იბრძოლონ პარლამენტში რუსული კანონის წინააღმდეგ;  • მოვუწოდებთ ყველას, საქართველოს თითოეულ მოქალაქეს, ვისთვისაც ქვეყნის დამოუკიდებლობა, კონსტიტუცია და საქართველოს ევროპული გზა მნიშვნელოვანია, შევიკრიბოთ პარლამენტის წინ 19:00 საათზე. ჩვენ თვალს მივადევნებთ, თუ როგორ იმოქმედებს ხელისუფლება და ვიმოქმედებთ არსებული სიტუაციის შესაბამისად, ქვეყნის კონსტიტუციურ ჩარჩოში დაბრუნებისა და ქართველი ხალხის გაცხადებული ნების შესაბამისად". წყარო: სამოქალაქო საზოგადოების ფონდი

ქვემო ქართლი. 26 აპრილს დმანისის ახალგაზრდულ ცენტრში გაიმართა თანატოლთა ტრენინგი თემაზე: „სახელმწიფო სტრუქტურა და სამოქალაქო აქტივიზმი“.  შეხვედრის ფარგლებში,დამსწრეებს საშუალება მიეცათ,მიეღოთ მეტი ინფორმაცია სახელმწიფოს სტრუქტურის შესახებ;  შეხვედრა გაიმართა USAID-ის პროგრამა "ერთიანობა მრავალფეროვნებაშია" ფარგლებში,რომელსაც ახორციელებს საქართველოს გაეროს ასოციაცია,აშშ-ის საერთაშორისო განვითარების სააგენტო.  სრულად...   წყარო: დმანისის ახალგაზრდული ცენტრი

თბილისი. 25 აპრილის განათლების განვითარების და დასაქმების ცენტრის (EDEC) და შიდა ქართლის რეგიონული ჰაბის - „საზოგადოება ბილიკის“ ორგანიზებით, გაიმართა მოხალისეობის რეგიონული ფორუმი. ფორუმის მიზანია შიდა ქართლის რეგიონის ახალგაზრდებში მოხალისეობის კულტურის პოპულარიზაცია, მოხალისეების მიმღებ ორგანიზაციებსა და მოხალისეობით დაინტერესებულ პირებს შორის კომუნიკაციის ხელშეწყობა, ასევე, მოსახლეობაში რეგიონული საზოგადოებრივი ორგანიზაციების ცნობადობის გაზრდა, მათი საქმიანობის, განხორციელებული პროექტების შესახებ რეგიონის მოსახლეობის ინფორმირება და სამოქალაქო საზოგადოების ორგანიზაციების მიმართ ნდობის ამაღლება.  ღონისძიება გაიმართა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ (2021-2025) ფარგლებში. სრულად...  წყარო: საზოგადოება ბილიკი

არასამთავრობო და მედია ორგანიზაციები ერთობლივ განცხადებას ავრცელებენ.  „რუსული კანონის ჩაგდებამდე საზოგადოებრივი და მედია ორგანიზაციები:  . ვაჩერებთ ხელისუფლებასთან თანამშრომლობას, სანამ ხელისუფლება რუსულ კანონს არ გაიხმობს. 2. ვაცხადებთ, რომ არასოდეს, არავითარი ფორმით არ დავრეგისტრირდებით ღირსების შემლახავ რეესტრში. 3. მოვუწოდებთ ყველას, 28 აპრილს, კვირას, 19:00 საათზე, შევიკრიბოთ რესპუბლიკის მოედანზე, რუსული კანონის წინააღმდეგ. ასევე მოვუწოდებთ შეკრებისკენ ყველას, თუკი ჩაინიშნება მეორე პლენარული განხილვა“.  სრულად...  წყარო: სამოქალაქო საზოგადოების ფონდი

თბილისი. საქართველოს კარიტასი განცხადებას ავრცელებს "უცხოური გავლენის გამჭვირვალობის შესახებ" კანონპროექტის შესახებ". "საპარლამენტო უმრავლესობის მხრიდან ინიცირებული კანონპროექტის „უცხოური გავლენის გამჭვირვალობის შესახებ“ კანონად მიღება, მომსახურების მიღმა დატოვებს მათ, ვისაც ყველაზე მეტად სჭირდება დახმარება! საქველმოქმედო ფონდი საქართველოს კარიტასი 30 წლის განმავლობაში, მეტწილად ევროპიდან და ამერიკის შეერთებული შტატებიდან მიღებული დაფინანსებით, ზრუნავს მშობლების მზრუნველობას მოკლებულ და მიუსაფარ ბავშვებზე, სიღარიბის ზღვარს მიღმა მყოფ და უსახლკარო ადამიანებზე, მარტოხელა მოხუცებზე, შშმ პირებზე, შინმოვლის მწოლიარე ადამიანებზე, ძალადობის მსხვერპლ და მარტოხელა დედებზე, ნებაყოფლობით დაბრუნებულ მიგრანტებზე...". სრულად... წყარო: საქართველოს კარიტასი

თბილისი. საქართველოს ახალგაზრდა იურისტთა ასოციაცია სტატისტიკურ მონაცემებს აქვეყნებს. 30 წლიანი მუშაობის მანძილზე 1, 300, 000 - მდე (მილიონ სამასი ათასამდე) ადამიანს გაუწია უფასო იურიდიული დახმარება/კონსულტაცია.  „მათ შორისაა საქართველოს ერვნული გმირის, გიორგი ანწუხელიძის საქმე, რომელიც 2008 წლის აგვისტოს ომის დროს რუსი და ოსი სამხედრო პირების მის წამებასა და შემდგომში მისი სიცოცხლის უკანონო ხელყოფის ფაქტს შეეხება. საია სტრასბურგის სასამართლოში გიორგი ანწუხელიძის მეუღლის, მაკა ჩიკვილაძისა და მისი ორი შვილის ინტერესებს წარმოადგენს. გახსოვდეს, ეს კანონი ათასობით ქართველს უფასო იურიდიული დახმარების გარეშე დატოვებს და შეაჩერებს ევროკავშირში საქართველოს გაწევრიანების პროცესს“. წყარო: ახალგაზრდა იურისტთა ასოციაცია

„უცხოური გავლენის გამჭვირვალობის“ შესახებ კანონის ხელახალი ინიცირების შედეგ საზოგადოებრივი პროტესტი არ განელებულა. სიტუაცია გამძაფრდა მას შემდეგ, რაც პოლიციასა და დემონსტრანტებს შორის შეტკება დაიწყო და 16 აპრილის აქციის მონაწილეების ჯანმრთელობის დაზიანებებითა და დაპატიმპრებებით დასრულდა. პოლიციამ აგრესიულად დაარბია პარლამენტის უკან შეკრებილი მომიტინგეები წიწაკის სპრეისა და ფიზიკური ძალის გამოყენებით. დაკავებულია აქციის 13 მშვიდობიანი მონაწილე. ქართული არასამთავრობო ორგანიზაციები უწევენ სამართლებრივ დახმარებას დაზარალელბულებს, ცდილობენ მათი ადგილსამყოფელის დადგენას. მოვლენათა გაშუქების პროცესში ძალადობის მსხვერპლი გახდა რამდენიმე ჟურნალისტიც. კანონის კენჭისყრის პროცესი საპარლამენტო დებატების ხანგრძლივობის გამო ერთი დღით გადაიდო, ათიათასობით ადამიანი კი პარლამენტის წინ აგრძელებდა პროტესტს. 17 აპრილს საქართველოს პარლამენტმა პირველი მოსმენით მხარი დაუჭირა კანონს „უცხოური გავლენის გამჭვირვალობის“ შესახებ 83 ხმით მომხრე და არც ერთი წინააღმდეგ, მიუხედავად საერთაშორისო პარტნიორებისა და პარლამენტის შენობასთან მიმდინარე სახალხო პროტესტისა. საპროტესტო აქციები 17 აპრილს მშვიდობიანად მიმდინარეობდა, თუმცა პოლიციამ კიდევ ორი ადამიანი დააკავა, რომელთაგან ერთ-ერთს მათი თქმით ცივი იარაღიც ჰქონდა. პრეზიდენტმა ზურაბიშვილმა მიმართა ევროპელ ლიდერებს თანადგომისათვის და თავადაც დაგმო კანონპროექტი, როგორც გამოკვეთილი საფრთხე საქართველოს ევროპული მისწრაფებების გზაზე. მიმდინარე მოვლენებს ასევე გამოეხმაურა რამდენიმე ქართველი სპორტსმენი, სადაც გამოხატეს მკაფიო მხარდაჭერა ქვეყნის ევროპული მომავლის მიმართ. კანონპროექტმა პირველი მოსმენის შემდეგ კიდევ ერთხელ გამოიწვია დასავლელი ოფიციალური პირების მხრიდან კრიტიკა. ევროკავშირის უმაღლესმა წარმომადგენელმა საგარეო საქმეთა საკითხებში, ჟოზეფ ბორელმა და ევროკომისარმა სამეზობლო და გაფართოების საკითხებში, ოლივერ ვარჰელიმ ქართულ ოცნებას მოუწოდეს გაეწვია კანონპროექტი და განაცხადეს, რომ ის ეწინააღმდეგება ევროკავშირის ფუნდამენტურ პრინციპებსა და ღირებულებებს. გაეროს ადამიანის უფლებათა ოფისმა ასევე მოუწოდა საქართველოს ხელისუფლებას, გაიწვიოს კანონპროექტი. ხელმეორედ გამოთქვა ამერიკის შეერთებული შტატების შეშფოთება ვაშინგტონში სახელმწიფო დეპარტამენტის პრესსპიკერის მოადგილემ ვედანტ პატელმა, რომ კანონპროექტი „უცხოური გავლენის გამჭვირვალობის“ შესახებ შესაძლოა, გამოიწვიოს „სტიგმატიზაცია სამოქალაქო საზოგადოებისა და მედია ორგანიზაციების, რომლებიც მუშაობენ საქართველოს მოქალაქეების ცხოვრების გაუმჯობესაბაზე“. კანონპროექტის განხილვის მეორე და მესამე მოსმენები ჯერ ისევ წინაა. ამჯერად, გასული წლისგან განსხვავებით, დაჩქარებული პროცედურის გარეშე მიმდინარეობს მოვლენები. სავარაუდოდ, მმართველი პარტია კანონპროექტს საბოლოო, მესამე მოსმენით 17 მაისს მიიღებს. კანონპროექტის მიღება და ამოქმედება ეწინააღმდეგება დემოკრატიულ პრინციპებს, იგი შეზღუდავს სამოქალაქო საზოგადოებისათვის სამუშაო გარემოს, რაც იმეორებს რუსეთში მიმდინარე პროცესებს ამ მიმართულებით.

თბილისი. ფორსეტი აქვეყნებს ვიზუალიზაციას „უცხოური გავლენის გამჭვირვალობის კანონის“ შესახებ. გაინტერესებთ რას ითვალისწინებს კანონი სხვადასხვა ქვეყანაში? გაეცანით მას. წყარო: ფორსეტი

თბილისი.არასამთავრობო ორგანიზაციები ერთობლივ განცხადებას ავრცელებენ და მოუწოდებენ პოლიციას, რომ „შეწყვიტოს გამოხატვისა და შეკრების თავისუფლებაში უკანონო ჩარევა. უკანონო დაკავებები და მოქალაქეებზე ფიზიკური ძალადობა. მოვუწოდებთ მაქსიმალურად მოკლე დროში გამოიძიოს პოლიციელთა მიერ ჩადენილი სავარაუდო დანაშაული“.  არასამთავრობო ორგანიზაციები საზოგადოებას ამცნობენ რომ იცავენ და დაიცავენ ყველა დაკავებულის უფლებას. "გუშინ, 16 აპრილს, პოლიციამ 13 მშვიდობიანი ადამიანი დააკავა, რომელიც შეკრებისა და გამოხატვის თავისუფლებით სარგებლობდა და საქართველოს ევროპულ მომავალს იცავდა.  ჩვენ, ქართული არასამთავრობო ორგანიზაციები, მთელი ღამის განმავლობაში ვეძებდით დაკავებულებს იზოლატორებში და ვხვდებოდით მათ, ვესაუბრებოდით, აღვწერდით მათი უფლებების დარღვევის ფაქტებს.  საზოგადოებას ვაცნობებთ, რომ დაკავებულთა უმეტესობას ფიზიკური დაზიანების ნიშნები აქვს, ხოლო სამი მათგანი - ამჟამად ჰოსპიტალიზებულია. ისინი აცხადებდნენ, რომ მიუხედავად დაკავებისა თუ დაზიანებისა, გააგრძელებენ ბრძოლას რუსული კანონის წინააღმდეგ, საქართველოს ევროპული მომავლისთვის".  სრულად...  წყარო: საერთაშორისო გამჭვირვალობა საქართველო

თბილისი. საერთაშორისო გამჭვირვალობა საქართველო იმ ინფრასტრუქტურული პროექტების ჩამონათვალს აქვეყნებს, რომელსაც საქართველოს ხელისუფლება დასავლეთის ქვეყნების დაფინანსებით ახორციელებს.  „რუსული კანონით საქართველოს ხელისუფლება დასავლელ მეგობრებს მტრულ სახელმწიფოებად აცხადებს, დასავლეთის ქვეყნების დაფინანსებით კი 5.7 მილიარდი ლარის ინფრასტრუქტურულ პროექტებს ახორციელებს.  •100-მდე საჯარო სკოლის რეკონსტრუქცია - 99 მლნ ლარი  •რეგიონებში საბავშვო ბაღების, სპორტული და ახალგაზდულო ცენტრების მშენებლობა -რეაბილიტაცია - 159 მლნ ლარი  •წყალმომარაგების გაუმჯობესება გუდაურში, მარნეულში, ფოთში, მესტიაში, ზუგდიდში და სხვა მუნიციპალიტეტებში - 81 მლნ ლარი  •ქუთაისის წყალარინების პროექტი - 321 მლნ ლარი •თბილისის საზოგადოებრივი ტრანსპორტისთვის 226 ავტობუსის შეძენა - 32 მლნ ლარი  •ავტობანის საგარეჯო-ბადიაურის მონაკვეთის მშენებლობა - 230 მლნ ლარი“.  სრულად...  წყარო: საერთაშორისო გამჭვირვალობა-საქართველო

თბილისი. არასამთავრობო ორგანიზაციები ერთობლივ განცხადებას აქვეყნებენ. „13 აპრილს გავრცელდა აუდიო ჩანაწერი, რომელიც კიდევ ერთხელ ადასტურებს ხელისუფლების მიერ საჯარო სამსახურში დასაქმებულებზე ზეწოლას, რათა მათ პარტიული დავალებები შეასრულონ და, მათ შორის, ევროინტეგრაციის დამაზიანებელი დეზინფორმაცია გაავრცელონ, რაც შეურაცხყოფს საჯარო მოსამსახურეებს, ლახავს მათ ღირსებას და ეწინააღმდეგება საჯარო სამსახურის პოლიტიკური ნეიტრალიტეტის პრინციპს. ძვირფასო მოხელეებო, ჩვენ თქვენ გვერდით ვართ. ჩვენი სურვილია თქვენ არ დაზიანდეთ, არ გახდეთ სამსახურებიდან პოლიტიკური ნიშნით გათავისუფლების მსხვერპლი. ხოლო თუ ასეთი რამ მაინც მოხდება, ჩვენ, როგორც წარსულში, ახლაც მზად ვართ, გვერდით დაგიდგეთ. ჩვენ, ქართველი ხალხი ამ ბრძოლას აუცილებლად მოვიგებთ. საქართველო არასდროს იქნება რუსეთი.“ - აღნიშნულია განცხადებაში სრულად...  წყარო: სამოქალაქო საზოგადოების ფონდი

თბილისი. არასამთავრობო ორგანიზაციების მოწოდება ხელისუფლებას. "ხელისუფლების ანტიევროპული განცხადებები ქართველი ხალხის ნებას და საქართველოს კონსტიტუციას ეწინააღმდეგება გუშინ, 11 აპრილს, “ქართულმა ოცნებამ” ფეისბუქის ოფიციალურ გვერდზე გამოაქვეყნა პარტიის გენერალური მდივნის, თბილისის მერის, კახა კალაძის შემდეგი შინაარსის გზავნილი: “არც ერთი გაერთიანება არ მიღირს ჩემი ქვეყნისა და ხალხის ინტერესების დასათმობად”. „ქართული ოცნება” მსგავს გზავნილებს უკვე ღიად ავრცელებს. ბოლო პერიოდში ხელახლა წამოწყებული მასშტაბური ანტი-დასავლური კამპანია, რუსული კანონის მიღების მცდელობა და საქართველოს ევროპელი და ამერიკელი მეგობრების მოწოდებების უგულვებელყოფა გვაფიქრებინებს, რომ „ქართული ოცნება” ქვეყნის დასავლური კურსის შეცვლას ცდილობს. ხელისუფლებას შევახსენებთ, რომ საქართველოს ევროატლანტიკური კურსი ქართველი ხალხის ურყევი ნება და არჩევანია, რაც საქართველოს კონსტიტუციის 78-ე მუხლშია განმტკიცებული. ეს მუხლი ხელისუფლებას ავალდებულებს, ყველა ზომა მიიღოს ევროკავშირსა და ნატოში გასაწევრებლად. რუსული კანონის მიღების მცდელობა და პარტიის მაღალჩინოსნების მხრიდან ევროკავშირში გაწევრების საწინააღმდეგო რიტორიკა კონსტიტუციისა და ქართველი ხალხის ღალატია.“  იხილეთ ვრცლად ...  წყარო: საერთაშორისო გამჭვირვალობა საქართველო

თბილისი. მემკვიდრეობის პლატფორის წევრი ორგანიზაციები ერთობლივ განცხადებას აქვეყნებს.  „მემკვიდრეობის პლატფორმის წევრი ორგანიზაციები ვგმობთ საქართველოს ხელისუფლების მიერ რუსული კანონის: „უცხოური გავლენის გამჭვირვალეობის შესახებ“ ხელახლა დარეგისტრირებას პარლამენტის ბიუროს სხდომაზე 2024 წლის 8 აპრილს ჩვენ, როგორც სამოქალაქო ორგანიზაციების წარმომადგენლები, ვეწინააღმდეგებით ამ კანონით სამოქალაქო ორგანიზაციების საქმიანობის დისკრედიტაციას. (...)  მემკვიდრეობის პლატფორმა მიმართავს საქართველოს ხელისუფლებას, უარი თქვას კანონის განხილვაზე, რომელიც საფრთხეს უქმნის კულტურული მემკვიდრეობის და მშვიდობის შენარჩუნებას.“ - ნათქვამია განცხადებაში სრულად... წყარო: მემკვიდრეობის პლატფორმა