თბილისი. არასამთავრობო ორგანიზაციები ოკუპირებულ ტერიტორიებიდან იძულებით გადადგილებულ პირთა, ლტოლვილთა და განსახლების მინისტრ დავით დარახველიძის 9 მაისს „ვერსიაში" გამოქვეყნებულ ინტერვიუს განცხადებით გამოეხმაურნენ. „მინისტრის მიერ ლგბტ პირების "ავადმყოფებად” და "სექსუალური გადახრის” მქონე ადამიანებად მოხსენიება, აღვივებს სიძულვილს ლგბტ თემის მიმართ და არ შეესაბამება განსხვავებული სექსუალური იდენტობის მქონე პირების მიმართ, მედიცინასა და სამართალში საყოველთაოდ აღარებულ მიდგომებს, რაც ყველა ადამიანის უმაღლეს ფასეულებად აღიარებისა და მისი უფლებების დაცვის უნივერსალობის პრინციპს ეფუძნება... მივმართავთ საქართველოს ამჟამინდელ პრემიერ-მინისტრს, ადეკვატური რეაგირება მოახდინოს აღნიშნულ განცხადებაზე...", ნათქვამია განცხადებაში. სრულად წყარო: emc.org.ge

თბილისი. თორმეტმა არასამთავრობო ორგანიზაციამ ანტიდისკრიმინაციულ კანონთან დაკავშირებით შემაჯამებელი შეფასება გამოაქვეყნა. "სამწუხაროა, რომ 40-მდე არასამთავრობო და რელიგიური ორგანიზაციის, ასევე სახალხო დამცველის პრინციპული მოთხოვნის მიუხედავად, არც პარლამენტმა და არც მთავრობამ კანონში არ ასახეს დაჯარიმების მექანიზმი, რაც მნიშვნელოვან წვლილს შეიტანდა დისკრიმინაციის ყველა ფორმის ეფექტიან აღმოფხვრაში. დასანანია, რომ საქართველოს მთავრობამ სამოქალაქო საზოგადოების ინფორმირების გარეშე შეცვალა და საგრძნობლად დაასუსტა იუსტიციის სამინისტროს მიერ ფართო საზოგადოებრივი ჩართულობის გზით მომზადებული პროგრესული კანონპროექტი. აღსანიშნავია ისიც, რომ გაუთვალისწინებელი ცვლილებები შევიდა კანონპროექტის ტექსტში პარლამენტის მიერ მისი მეორე მოსმენით პლენარულ სხდომაზე განხილვისას, რომელმაც დისკრიმინაციის დეფინიციაში ლეგიტიმურ მიზნებად საზოგადოებრივი წესრიგი და ზნეობა მიუთითა. ...მოვუწოდებთ საქართველოს ხელისუფლებას, ყველა ზომა გამოიყენოს მისი ცხოვრებაში დანერგვისა და პრაქტიკაში სათანადოდ იმპლემენტაციისათვის", ნათვამია განცხადებაში. სრულად  წყარო: gyla.ge

თბილისი. 8 მაისს, ინფორმაციის თავისუფლების განვითარების ინსტიტუტმა და გადასახადის გადამხდელთა კავშირმა მრგვალი მაგიდა გამართეს თემაზე: „სახელმწიფო საწარმოების როლი სოფლის მეურნეობის განვითარებაში". შეხვედრაზე წარმოადგინეს სოფლის მეურნეობის სფეროში მოქმედი სახელმწიფო საწარმოების მიმოხილვითი ანალიზი. რომლის შემდგომაც გაიმართა დისკუსია. მონაწილე ექსპერტებმა და არასამთავრობო და კვლევითი ორგანიზაციის წარმომადგენლებმა სახელმწიფო საწარმოების არსებობის მიზანშეწონილობასა და მათი ეფექტიანობის გაზრდის გზებზე იმსჯელეს და სექტორის სამომავლო განვითარებაზე საკუთარი ხედვები და მოსაზრებები წარმოადგინეს. ღონისძიება აღმოსავლეთ-დასავლეთის მართვის ინსტიტუტის (EWMI) პროგრამის "საჯარო პოლიტიკის, ადვოკატირებისა და სამოქალაქო საზოგადოების განვითარება საქართველოში” (G-PAC) ფარგლებში ჩატარდა. სრულად წყარო: ორგანიზაციის ვებგვერდი სოციალურ ქსელში

თბილისი. 7 მაისს, „საქართველოს სოფლის პარლამენტის" სადამფუძნებლო ყრილობა გაიმართა. საქართველოს პარლამენტისა და მთავრობის წარმომადგენლებმა საქართველოს სოფლებში არსებულ პრობლემატიკაზე და ამ კუთხით ადგილობრივი თვითმმართველობის შესახებ კანონის დახვეწაზე ისაუბრეს. სასოფლო ტერიტორიების განვითარება, სოფლის განვითარების პრობლემები და პერსპექტივები საქართველოში, ეს ის საკითხები იყო, რომელიც ყრილობაზე მოწვეულმა სტუმრებმა და დელეგატებმა განიხილეს. საქართველოს სოფლის პარლამენტის თავმჯდომარის არჩევამდე, ოთხმა კანდიდატმა, ყვარელის, ხაშურის, ლანჩხუთის და სენაკსი მუნიციპალიტეტებიდან საკუთრი ხედვები წარმოადგინა. ფარული კენჭისყრის შედეგად სოფლის პარლამენტის თავმჯდომარედ ლანჩხუთის მუნიციპალიტეტიდან ნინო მშვიდობაძე აირჩა. ღონისძიებას სხვადასხვა მუნიციპალიტეტიდან 100-ზე მეტი დელეგატი ესწრებოდა. ყრილობა საერთაშორისო ასოციაცია კივიტას გეორგიკას, ჩეხური არასამთავრობო ორგანიზაიცა Agora CE-სა და საზოგადოების კვლევის ცენტრის ორგანიზებით გაიმართა. წყარო:civitas.ge

თბილისი. კოალიცია „მედია ადვოკატირებისათვის" რუსთავი 2-ის გენერალური დირექტორის საგანგებო განცხადებას ეხმიანება. „კოალიციას მიაჩნია, რომ ნებისმიერი მედიასაშუალების საქმიანობის ხელის შეშლა, მით უფრო, თვალთვალისა და ფარული მიყურადების გზით, წარმოდგენს ჩარევას მედიის დამოუკიდებლობაში, ყოვლად დაუშვებელია დემოკრატიულ საზოგადოებაში. ...კოალიცია მედიის ადვოკატირებისათვის მოუწოდებს სახელმწიფოს შესაბამის ორგანოებს უზრუნველყონ ტელეკომპანია რუსთავი 2-ში მომხდარ ფაქტთან დაკავშირებით დაწყებული გამოძიების ჩატარება მედიის თავისუფლების დაცვის უმნიშვნელოვანესი ინტერესის გათვალისწინებით დროულად, ობიექტურად და მიუკერძოებლად", ნათვამია განცხადებაში. სრულად წყარო:idfi.ge

თბილისი. საზოგადოებრივმა ორგანიზაციებმა პლატფორმა „არა ფობიას!" პრეზენტაცია გამართეს. პლატფორმის მიზანია უზრუნველყოს არასამთავრობო ორგანიზაციათა მჭიდრო თანამშრომლობა ქართულ პოლიტიკასა და მედია სივრცეში სიძულვილის ენისა და დისკრიმინაციის ყოველგვარი გამოვლინებების აღმოსაფხვრელად. სრულად წყარო: notophobia.org

თბილისი. ფონდი „ღია საზოგადოება – საქართველო" 15 მაისს გამართავს კონსულტაციებს ფონდის ოფისში. პროექტის მენეჯერები უპასუხებენ დაინტერესებულ პირთა შეკითხვებს. კონსულტაციები ჩატარდება პროგრამების მიხედვით: უმაღლესი განათლება - 11:00 სთ; საზოგადოებრივი ჯანმრთელობა-12:00 სთ; ადგილობრივი დემოკრატიის განვითარება-14:00; მედია-15:00 სთ; ევროინტეგრაცია - 16:00 სთ; ადამიანის უფლებები - 17:00 სთ. ფონდის 2014–2016 წლის სტრატეგია  მისამართი: თბილისი, ჭოველიძის 10, ფონდი „ღია საზოგადოება – საქართველო"

თბილისი. საქართველოს დემოკრატიული ინიციატივა განცხადებას ავრცელებს. „უკიდურეს შეშფოთებას გამოთქვამს დღეს, ტელეკომპანია "რუსთავი 2”-ის გენერალური დირექტორის მიერ, საგანგებო ბრიფინგზე გაჟღერებული ინფორმაციის თაობაზე. რომლის თანახმადაც, ტელეკომპანიის ხელმძღვანელობას ფარულმა წყარომ მიაწოდა "რუსთავი 2″-ის გენერალური დირექტორის, ნიკა გვარამიასა და საინფორმაციო სამსახურის უფროსის, ნინო შუბლაძის აუდიო და ვიდეოჩანაწერები, რომლებიც, მათი განცხადებით, შინაგან საქმეთა სამინისტროში ინახებოდა. ...მოვუწოდებთ საქართველოს მთავარ პროკურატურას, ჩაატაროს ობიექტური, სრულყოფილი და დროული გამოძიება ...", ნათქვამია განცხადებაში. სრულად წყარო: gdi.ge

თბილისი. არასამთავრობო ორგანიზაციების წარმომადგენლები ტელეკომპანია „რუსთავი 2"-ის მიერ გენერალური დირექტორის, ნიკა გვარამიასა და მისი მოდგილის, ნინო შუბლაძის სამუშაო ოთახებში გადაღებული ვიდეოჩანაწერების გავრცელებასთან დაკავშირებით გამოძიების დაწყებას ითხოვენ - ინფორმაციას media.ge ავრცელებს. ნიკა გვარამიამ 6 მაისს არასამთავრობო ორგანიზაციის წარმომადგენლებს შეხვედრა სთხოვა. არხის გენერალურმა დირექტორმა მათ შსს-ს ერთერთი თანამშრომლის მიერ მიწოდებული ფარულად ჩაწერილი ვიდეომასალა აჩვენა, რომელზეც ასახული იყო მისი და მისი მოადგილის შეხვედრები. სრულად წყარო: www.media.ge

თბილისი. დემოკრატიული განვითარების ეროვნულმა ცენტრმა განცხადება გაავრცელა. „დღეს კიდევ ერთხელ დადასტურდა რომ ისევ გვისმენენ და პრემიერ მინისტრმა მოგვატყუა როდესაც უარყო ეს ფაქტი. ამასთან საგანგაშოა როდესაც ამას ნიკა გვარამიასგან ვისმენთ. ჩვენს შეშფოთებას იწვევს ის ფაქტი, რომ მოსმენის რეჟიმშია მედია, რომელიც საზოგადოების განვითარების საშუალებაა. შესაბამისად მედია როგორც თავისუფალი სიტყვა და ტელევიზია როგორც ბიზნესი განიცდის ზეწოლას. ... სასწრაფოდ უნდა იქნეს გამოძიებული აღნიშნული ფაქტი და მნიშვნელოვანია კონკრეტული დამნაშავეების დადგენა, რადგან მომავალშიც არ ვიხილოთ ყოფილი მინისტრი, რომელიც უბრალოდ ბოდიშს მოგვიხდის და მოგვიწოდებს აღარ დავაშავოთ”, ნათვამია განცხადებაში. სრულად წყარო: ncdd.ge

თბილისი. სახალხო დამცველის ვებ-გვერდზე განცხადება გამოქვეყნდა. სახალხო დამცველი „პოზიტიურად აფასებს საქართველოს პარლამენტის მიერ ანტიდისკრიმინაციული კანონმდებლობის მიღებას, რაც საქართველოს მიერ ევროპის კავშირთან ასოცირების ხელშეკრულების ხელმოწერისა და ვიზა-ლიბერალიზაციის პროცესისათვის არსებითი მნიშვნელობისაა. ...მიუხედავად დადებითი შეფასებისა, საქართველოს სახალხო დამცველს მიღებულ კანონპროექტთან დაკავშირებით გააჩნია სამი არსებითი ხასიათის შენიშვნა, რაც ამ ძალზედ მნიშვნელოვანი მოვლენის ეფექტურად იმპლემენტაციისათვის გადამწყვეტია და ამ ეტაპზე საქართველოს მთავრობის და პარლამენტის მიერ არ იქნა გათვალისწინებული", ნათქვამია განცხადებაში. სრულად წყარო: www.ombudsman.ge

კახეთი. თელავში, მუნიციპალიტეტის გამგეობის მიმდებარე ტერიტორიაზე, ძალადობის წინააღმდეგ მშვიდობიანი აქცია გაიმართა. არასამთავრობო ორგანიზაციების წარმომადგენლებმა, ჟურნალისტებმა და სტუდენტებმა, ბოლო დროს ქალაქში გახშირებული ძალადობის ფაქტები და აღნიშნულ თემაზე საზოგადოების გულგრილობა გააპროტესტეს.

თბილისი. სამოქალაქო საზოგადოების ინსტიტუტმა გამოსცა ალმანახი „სამოქალაქო საზოგადოება – პუბლიცისტიკა, ესეები". იგი აერთიანებს სხვადასხვა დროს შექმნილ ნაშრომებს სამოქალაქო საზოგადოებისა და დემოკრატიის შესახებ. კრებულში შესულია ქართველი და უცხოელი ავტორების მოსაზრებები. ალმანახი

თბილისი. 3 მაისს, „მზესუმზირის" სახელობის მსოფლიო პარტიზანული მებაღეობის დღე აღნიშნეს. ვაკის პარკში შეიკრიბნენ სხვადასხვა პროფესიის მოქალაქეები. მათ ორგანიზატორებთან ერთად შექმნეს მზესუმზირის ხეივანი. ამავე თემაზე შექმნეს აპლიკაციები და სამაჯურები. ღონისძიების ორგანიზატორი იყო სამოქალაქო მოძრაობა „პარტიზანული მებაღეობა".

თბილისი. არასამთავრობო ორგანიზაცია „ახალგაზრდა ადვოკატები" საქართველოს მთავრობას რეკომენდაციით მიმართავს. ისინი ინიციატივით გამოდიან, ხელისუფლება დაიწყოს მუშაობა რეგიონში მცხოვრები წარჩინებული ახალგაზრდების სწავლის დაფინანსებისა და შემდგომი დასაქმების ახლებური რეგულაციების დანერგვისათვის. ორგანიზაცია „ახალგაზრდა ადვოკატები" საკითხით დაინტერესების შემთხვევაში, შესაბამისი ცვლილებებისა და დეტალური რეგულაციების პროცესებში ჩართულობისა და მონაწილეობის მზადყოფნას გამოთქვას მთავრობისა და ადგილობრივი ხელისუფლების შესაბამის სტრუქტურებთან ერთად. სრულად წყარო: barristers.ge

თბილისი. დემოკრატიული განვითარების ეროვნული ცენტრი პრემიერს მიმართავს. „ბატონო პრემიერო, მოგმართავთ თხოვნით გაიზიაროთ ჩვენი მოსახლეობის შეშფოთება. ჩვენი მოქალაქეები მშვიდად ვეღარ გადაადგილდებიან, მათთვის არ არსებობს არანაირი უსაფრთხო გარემო და მშვიდი ცხოვრების გარანტიები. პოლიცია ვეღარ ახერხებს მათ დაცვას და ჩვენს მოქალაქეებს ადგებათ ზიანი. ...მოგმართავთ თხოვნით გაიზიაროთ ჩვენი ხალხის გულის წუხილი და მოახდინოთ ამაზე მკვეთრი რეაგირება. საზოგადოების უსაფრთხოების ინტერესებიდან გამომდინარე გთხოვთ დააყენოთ საქართველოს შინაგან საქმეთა მინისტრის ბატონი ალექსანდრე ჭიკაიძის თანამდებობიდან გადაყენების საკითხი...", ნათქვამია ორგანიზაციის ვებგვერდზე. სრულად წყარო: ncdd.ge

თბილისი. საერთაშორისო გამჭვირვალობა – საქართველომ სოციალურ ქსელში, პარლამენტის მიერ მიღებული კანონის „დისკრიმინაციის ყველა ფორმის აღმოფხვრის შესახებ", განცხადება გავრცელა. „მართალია, ქართული კანონმდებლობა ისედაც კრძალავს სხვადასხვა ნიშნით დისკრიმინაციას და კონსტიტუცია თანაბარ უფლებებს ანიჭებს ყველა ადამიანს, მნიშვნელოვნად მიგვაჩნია თანასწორობის პრინციპების დაცვის კიდევ უფრო მაღალი სტანდარტის შექმნა. მიუხედავად ჩვენი სურვილისა, რომ კანონით გათვალისწინებული კონკრეტული აღსრულების მექანიზმები კიდევ უფრო დახვეწილიყო, მივესალმებით ხელისუფლების მტკიცე ნებას, შექმნას დამატებითი გარანტიები ყველა ადამიანის თანასწორობის უზრუნველსაყოფად", ნათქვამია ორგანიზაციის ვებგვერდზე სოციალურ ქსელში სრულად წყარო: ორგანიზაციის ვებგვერდი სოციალურ ქსელში

თბილისი. 1 მაისს ლიბცენტრმა გამართა დისკუსია თემაზე „უნდა აშენდეს თუ არა ხუდონჰესი?". დისკუსიაზე ცენტრის წევრებმა წარმოადგინეს არგუმენტები თუ რატომ უნდა აშენდეს ან არ აშენდეს ხუდონჰესი. მხარეების პოზიციის წარმოდგენის შემდეგ არგუმენტები შეაჯამა და ანალიზი გაუკეთა მენტორმა – კახა ბახტაძემ, კავკასიის გარემოსდაცვითი არასამთავრობო ორგანიზაციების ქსელის (CENN) პროგრამების მენეჯერმა. დისკუსიის ბოლოს კი კითხვების დასმისა და მოსაზრებების გამოთქმის საშუალება მიეცა აუდიტორიასაც. წყარო: ცენტრის ვებგვერდი სოციალურ ქსელში

თბილისი. ახალგაზრდა კონსტიტუციონალისტთა ასოციაცია ეხმიანება საქართველოს ცენტრალური საარჩევნო კომისიის გადაწყვეტილებას ირაკლი ოქრუაშვილის მერობის კანდიდატად რეგისტრაციის გაუქმების საკითხს. „ასოციაცია მიიჩნევს, რომ ცესკოს განკარგულება, რომლითაც ბათილად იქნა ცნობილი გორის საოლქო საარჩევვნო კომისიის 19 აპრილის გადაწყვეტილება ბ-ნი ირაკლი ოქრუაშვილის რეგისტრაციის თაობაზე, საარჩევნო კანონმდებლობასთან შესაბამისობაშია", ნათქვამია ორგანიზაციის ვებგვერდზე. სრულად წყარო: gyca.ge

თბილისი. ახალგაზრდული ორგანიზაცია „დავითიანნი", რომელიც მესამე კვირაა აქტიურად იღებს მონაწილეობას საყდრისის აქციაში, განცხადებას ავრცელებს. განცხადება წყარო: davitianni.ge

თბილისი. ფონდ „ღია საზოგადოება – საქართველოს" ვებგვერდზე სოციალურ ქსელში განთავსდა ფონდის დირექტორის, ქეთი ხუციშვილის მოსაზრება დისკრიმინაციის ყველა ფორმის აღმოფხვრის შესახებ კანონთან დაკავშირებით.  ფონდის დირექტორის, ქეთი ხუციშვილის თქმით, „შეიქმნა ძალიან არაჯანსაღი სიტუაცია ქვეყანაში. ძალიან მწვავე დისკუსია დაიწყო ამ თემებზე ისე, რომ მე ეჭვი მეპარება, რომ ბევრს ეს კანონპროექტი წაკითხული ჰქონდეს. საერთოდ, კანონების წაკითხვა ადვილი არ არის. მეც ყოველთვის ვითხოვ ხოლმე იურისტების დახმარებას, რომ დამატებით განმიმარტონ ესა თუ ის პუნქტი. კანონი, რომელზეც დღეს არის საუბარი, ეს არის დისკრიმინაციის ყველა ფორმის აღმოფხვრის თაობაზე. აქ იგულისხმება ყველა სახის დისკრიმინაცია, იქნება ეს რასა, ეთნიკური კუთვნილება, შეზღუდული შესაძლებლობები, სექსუალური ორიენტაცია თუ სხვა რამ. მე მჯერა, რომ საქართველო ისტორიულად ტოლერანტული ქვეყანა იყო. ამიტომ, მე ძნელად წარმომიდგენია საქართველოში ადამიანი, რომელიც დისკრიმინაციის მომხრეა ან მომხრე იქნება იმისა, რომ ადამიანი, ვთქვათ, არ აიყვანო სამსახურში მხოლოდ იმის გამო, რომ არის შეზღუდული შესაძლებლობის მქონე, ან ადამიანი არ აიყვანო სამსახურში მხოლოდ იმის გამო, რომ მისი კანის ფერი არ ემთხვევა ჩვენსას, ან იმის გამო, რომ იგი ქართველი კი არა, სომეხია. მე მეჩვენება, რომ მოხდა ამ თემის არაჯანსაღად აგორება და ზოგიერთი პოლიტიკური ძალის მიერ საკუთარი რეიტინგის გაზრდაზე ზრუნვა, მოხდა ხალხის ყურადღების გადატანა, რომ თითქოს ეს ეხება სექსუალური ორიენტაციის ადამიანებს, თითქოს ეს კანონპროექტი განსაკუთრებულ უფლებებს ანიჭებს მათ. რა თქმა უნდა, ეს სიმართლე არ არის. რა თქმა აქ საუბარია იმაზე, რომ ისევე, როგორც ღმერთის წინაშე, კანონის წინაშეც ყველანი უნდა ვიყოთ თანასწორნი. მემგონი, ეს არის ელემენტარული ჭეშმარიტება, რაც სადავო არ უნდა იყოს". წყარო: ფონდის ვებგვერდი სოციალურ ქსელში

თბილისი. CENN-ი და ICOMOS საქართველო მადნეულისა და საყდრისის საბადოებზე სამთო-მოპოვებითი სამუშაოების განხორციელების შედეგად ბუნებრივ და სოციალურ გარემოსა და კულტურულ მემკვიდრეობაზე გამოწვეულ ზემოქმედებასთან დაკავშირებით ერთობლივ განცხადებას ავრცელებს. სრულად წყარო: newposts.ge