თბილისი. არასამთავრობო ორგანიზაცია „ახალგაზრდა ადვოკატები" ეხმაურება 27 მაისს, „ერთიანი ნაციონალური მოძრაობის" წევრ ზურაბ ჭიაბერაშვილზე განხორციელებული თავდასხმის ფაქტს. „დაუშვებლად მივიჩნევთ, მსგავსი ძალადობრივი ქმედებების განხორციელებას და სახელმწიფოს დროული და ადეკვატური რეაგირებისკენ მოუწოდებს. მომხდარი ფაქტი დადებითად ვერ აისახება საქართველოს საგარეო იმიჯზე და მიმდინარე თვითმმართელობის არჩევნების წინა პროცესში, ნეგატიურ განწყობებს აჩენს. შესაბამისად, მნიშვნელოვანია სამართლიანობის აღდგენა ქვეყანაში რეალურად განხორციელდეს, მაგრამ დაუშვებელია ძალადობრივი გზით, ნებისმიერი ქმედება, სამართლიანობის აღგენის შემადგენელი ნაწილი გახდეს”, ნათვამია განცხადებაში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს დემოკრატიული ინიციატივამ, მედიის განვითარების ფონდმა და ტოლერანტობისა და მრავალფეროვნების ინსტიტუტმა ერთობლივი განცხადება გაავრცელეს. „გამოხატავთ უკიდურეს შეშფოთებას  ზურაბ ჭიაბერაშვილსა და ნოდარ ლადარიაზე 27 მაისს განხორციელებული თავდასხმის გამო და მოუწოდებს ხელისუფლებას ეს ფაქტი დროულად და ეფექტურად გამოიძიოს, ასევე პასუხისგებაში მისცეს ყველა დამნაშავე პირი. იმავდროულად, მოვუწოდებთ ყველა პოლიტიკოსს და საჯარო პირს, თავი შეიკავონ სიძულვილის ენის შემცველი კომენტარებისა და აგრესიის წახალისებისგან”, ნათქვამია განცხადებაში. სრულად წყარო: gdi.ge

თბილისი. ადამიანის უფლებების სწავლებისა და მონიტორინგის ცენტრმა, ფონდ „ღია საზოგადოება – საქართველოს" მხარდაჭერით ახალი კვლევის პრეზენტაცია გამართა. კვლევა – „არაეთიკური ნარკოპოლიტიკა – ეროვნული კანონმდებლობისა და პრაქტიკის ანალიზი" - შეეხება ნარკოტიკული დანაშაულების წინააღმდეგ ბრძოლის ეროვნული პოლიტიკის კვლევას. დეკლარირებული ნარკოპოლიტიკის ანალიზის გარდა, კვლევაში მიმოხილულია ნარკოტიკულ დანაშაულებთან დაკავშირებული კანონმდებლობა და პრაქტიკის ბოლო ტენდენციები(2012-2013 წლების სასამართლო განაჩენები). კვლევა წყარო: emc.org.ge

თბილისი. საერთაშორისო გამჭვირვალობა – საქართველომ, სამართლიანი არჩევნებისა და დემოკრატიის საერთაშორისო საზოგადოებამ და სამოქალაქო განვითარების სააგენტომ განცხადება გაავრცელეს.  „...ზურაბ ჭიაბერაშვილს თავს დაესხნენ, რის შედეგადაც მან სხეულის დაზიანება მიიღო და საჭირო გახდა მისი საავადმყოფოში გადაყვანა. ...ადამიანების ჯანმრთელობის დაზიანება სისხლის სამართლის დანაშაულია, თუმცა პრობლემას კიდევ უფრო აღრმავებს ის ფაქტი, როდესაც პოლიტიკურად აქტიური პირების მიმართ მათი პოლიტიკური შეხედულებებისა და განსხვავებული აზრის გამო ხდება ფიზიკური ანგარიშსწორება. იმის გათვალისწინებით, რომ მიმდინარეობს წინასაარჩევნო კამპანია, აუცილებელია არჩევნებში ჩართული პირების უსაფრთხოება უზრუნველყოფილი და დაცული იყოს”, ნათვამია განცხადებაში. ორგანიზაციები მიიჩნევენ, რომ ხელისუფლებამ ხელი უნდა შეუშალოს პოლიტიკურად აქტიური პირების მიმართ ძალადობის სახიფათო ტენდენციად ჩამოყალიბებას. სრულად წყარო: transparency.ge

თბილისი. საქართველოს ახალგაზრდა იურისტთა ასოციაცია გამოეხმაურა მედიით გავრცელებულ ინფორმაციას ზურაბ ჭიაბერაშვილზე თავდასხმის შესახებ და განცხადება გაავრცელა. „მსგავსი ძალადობრივი ფაქტები მიუღებელია და სახელმწიფოს მხრიდან  სწორ, დროულ და ადეკვატურ რეაგირებას მოითხოვს.  გარდა იმისა, რომ ზემოაღნიშნული ფაქტი დანაშაულის ნიშნებს შეიცავს, ასეთი ქმედებები წინასაარჩევნო პერიოდში ზრდის დაძაბულობას და საფრთხეს უქმნის არჩევნების თავისუფალ, სამართლიან გარემოში ჩატარებას.    მოვუწოდებთ ყველას, წინასაარჩევნო პერიოდში უარი თქვან პროტესტის ძალადობრივი ფორმით გამოხატვაზე. მოვუწოდებთ ხელისუფლებას, მაქსიმალურად სწრაფად, ეფექტიანად და ობიექტურად გამოიძიოს ზურაბ ჭიაბერაშვილზე განხორციელებული თავდასხმა", ნათქვამია განცხადებაში. სრულად წყარო: gyla.ge

თბილისი. საერთაშორისო გამჭვირვალობა საქართველო აქვეყნებს ანა დაბრუნდაშვილის ბლოგს: „წყალი ოფშორებიდან: ვინ ფლობს ჯორჯიან უოთერ ენდ ფაუერს?". ბლოგი საზოგადოებას ინფორმაციას აწვდის კომპანიის შესახებ, რომელიც თბილისსა და მის მიმდებარე ტერიტორიაზე მცხოვრებ 400 000 აბონენტს აწვდის წყალს. სრულად... წყარო: transparency.ge

აჭარა. 23 მაისს, ბათუმის საკრებულოს სხდომათა დარბაზში, საზოგადოებრივმა დარბაზმა ქალაქ ბათუმის ინფრასტრუქტურის სამსახურმა საჯარო შეხვედრა გამართა. სადაც განხილეს ბათუმის ბიუჯეტის 2015-2018 წწ საშუალოვადიან გეგმის პროექტი. შეხვედრას ესწრებოდნენ ადგილობრივი მოსახლეობა, საზოგადოებრივი დარბაზის წევრები და ლიდერები. ასევე საზოგადოებრივი ორგანიზაციების წარმომადგენლები. დამსწრე საზოგადოებისგან რეკომენდაციები ძირითადად ეხებოდა ადაპტირებული გარემოს მოწყობას შშმ პირებისათვის, კერძოდ, სხვადსხვა შენობების რაბილიტაციის პროგრამის ფარგლებში პანდუსებისა გათვალისწინებას. ასევე, პრიორიტებებში გათვალისწინებულია ხმოვანი შუქნიშნების დამონტაჟება, რაც საკითხით დაინტერესებულმა პირებმა დადებითად შეაფასეს.

თბილისი. სამართლიანმა არჩევნებმა 15 ივნისის ადგილობრივი თვითმმართველობის არჩევნებისთვის სპეციალური ვიდეო რგოლები შექმნა. მათი მიზანია ამომრჩეველთა ინფორმირება არჩევნებთან დაკავშირებულ საკითხებზე. ვიდეორგოლები წყარო: isfed.ge

თბილისი. საერთაშორისო გამჭვირვალობა ეხმაურება საზოგადოებაში არსებულ კითხვას თუ ვინ უნდა მოაწეროს ხელი ევროკავშირთან ასოცირების შეთანხმებას: საქართველოს პრეზიდენტმა თუ პრემიერმინისტრმა და საზოგადოებას საქართველოს კანონმდებლობის ანალიზს სთავაზობს. „...როგორც ცნობილია, ასოცირების შეთანხმების პარაფირება მთავრობის წარმომადგენლის, საგარეო საქმეთა მინისტრის მიერ მოხდა, რაც თავისთავად საგარეო პოლიტიკურ კურსთან დაკავშირებით გადაწყვეტილების განხორციელების აქტს წარმოადგენს. ხოლო, რაც შეეხება საქართველოს პრეზიდენტს, მას, როგორც ქვეყნის საგარეო ურთიერთობებში ქვეყნის წარმომადგენელს, ხალხის მიერ პირდაპირ არჩეულ უმაღლესი ლეგიტიმაციის მქონე პირს, კონსტიტუციით აქვს მინიჭებული უფლებამოსილება, უმაღლეს დონეზე წარმოადგინოს ქვეყანა. შესაბამისად, ასოცირების ხელშეკრულებაზე ხელი სწორედ პრეზიდენტმა უნდა მოაწეროს. რა თქმა უნდა, შესაძლებელია, შეთანხმების საფუძველზე, ხელშეკრულებას საქართველოს პრემიერმინისტრმა ან სხვა პოლიტიკური თანამდებობის პირმა მოაწეროს ხელი. ასეთ შემთხვევაში, კონსტიტუციის დარღვევად არ ჩაითვლება, თუ ხელშეკრულებას ხელს სხვა პირი მოაწერს...", ნათქვამია ორგანიზაციის ვებგვერდზე. სრულად... წყარო: transparency.ge

თბილისი. კამპანიის „ეს შენ გეხებას" ვებგვერდზე გამოქვეყნდა საქართველოს ახალგაზრდა იურისტთა ასოციაციის თავმჯდომარის კახა კოჟორიძის ბლოგპოსტი: „დაისაჯა თუ არა ვინმე სხვისი პირადი ცხოვრების უფლების დარღვევისთვის?". „... გვსურს მივმართოთ ყველა თანამდებობის პირს, მათ შორის იმ დეპუტატებს, რომლებიც ადრე საკუთარი სურვილით იცავდნენ ადამიანის უფლებებს და დღეს იგივეს გაკეთება მათ პირდაპირ ვალდებულებას წარმოადგენს: ხელისუფლებაში მყოფ პირს ადამიანის უფლებათა დასაცავად ბევრად უფრო მძლავრი ბერკეტები გააჩნია. გაზრდილ უფლებამოსილებას მომეტებული პასუხისმგებლობაც ახლავს. ცხადია, საინტერესოა დისკუსია იმის შესახებ, თუ სად გადის ზღვარი გამოხატვის თავისუფლებასა და პირადი ცხოვრების უფლებას შორის. მაგრამ შექმნილ სიტუაციაში ბევრად უფრო პრიორიტეტულია ათასობით უკანონო ჩანაწერის შემქმნელთა პასუხისმგებლობის საკითხის დაყენება და იმ კანონპროექტის სრულად (შეცვლილ დებულებათა ჩათვლით) მხარდაჭერა, რომლის პლენარულ სესიაზე 1 კვირის წინ განსახილველად საჭირო ქვორუმი არ აღმოჩნდა", ნათქვამია ბლოგპოსტში. სრულად... წყარო: esshengexeba.ge

იმერეთი. 22 მაისს, ქუთაისის ახალგაზრდული ცენტრის წევრებისათვის ჩატარდა ტრენინგი „სამოქალაქო აქტივიზმი და ქალთა პოლიტიკური ჩართულობა". შეხვედრას მედიის განვითარების ფონდისა და კონსტიტუციური სწავლების ცენტრის წარმომადგენლები უძღვებოდნენ. ტრენინგის მიზანი იყო ახალგაზრდების ცნობიერების ამაღლება ქალთა პოლიტიკური და სამოქალაქო უფლებების, საარჩევნო პროეცესში ქალთა მონაწილეობის ზრდის საკანონმდებლო გარანტიების შესახებ. ტრენინგის შემდეგ გაიმართა მედიის განვითარების ფონდის მიერ ინიცირებული გამოფენა „ქალები წარსულიდან - მაგალითი მომავლისთვის", რომლის მიზანს წარმოადგენდა სხვადასხვა ეპოქაში მოღვაწე ქალთა შესახებ საზოგადოების უკეთ ინფორმირება და ისტორიული მაგალითების საფუძველზე, გენდერული თანასწორობის ღირებულების დამკვიდრება, ასევე ამ პროცესში მედიის განსაკუთრებული როლის წარმოჩენა. გამოფენაზე წარმოდგენილი ექსპონატები საქართველოს დემოკრატიული რესპუბლიკის დამფუძნებელი კრების წევრი ქალების, ასევე სხვა ისტორიული პირების (მარიამ გარიყული, ეკატერინე გაბაშვილი, კატო მიქელაძე, ნინო ყიფიანი, ბარბარე ყიფიანი და სხვა) საზოგადოებრივ აქტივობას ასახავდა. წყარო:ორგანიზაციის გვერდი სოციალურ ქსელში

თბილისი. ამერიკის შეერთებული შტატების საერთაშორისო განვითარების სააგენტომ (USAID) და ბუნებრივი რესურსების დაცვის სამინისტრომ ერთობლივი პროექტის ფარგლებში კითხვარი გამოაქვეყნეს. კითხვარი შეეხება პოლიეთილენის პარკებს და მათ მოხმარებას. კითხვარი წყარო: გარემოს დაცვის სამინისტროს გვერდი სოციალურ ქსელში

კახეთი. საზოგადოებრივი გაერთიანების „სამოქალაქო დარბაზის" ორგანიზებითა და ინიციატივით, თელავის დემოკრატიული ჩართულობის ცენტრში, თელავის მერობის კანდიდატებთან შეხვედრა გაიმართა. შეხვედრას დაესწრნენ არასამთავრობო სექტორისა და საჯარო სამსახურების წარმომადგენლები, ასევე, სტუდენტები და დაინტერესებული მოქლაქეები. ქალაქის მერობის კანდიდატებმა დამსწრე საზოგადოებას საარჩევნო პრიორიტეტები გააცნეს. ,,შეხვედრაზე განხილეთ ქალაქისთვის პრობლემატური საკითხები, რომელიც არც ისე ცოტაა. თელავის მერობის კანდიდატებმა ისაუბრეს თავიანთ საარჩევნო პრიორიტეტებზე. შეხვედრაზე ყველა კანდიდატმა ვერ მოახერხა მოსულიყო, თუმცა კარგია, რომ მსგავსი ღონისძიებები იმართება და მოსახლეობისთვის არ არის კომუნიკაციის პრობლემა ადგილობრივ პოლიტიკოსებთან", განაცხადა „კახეთის სამოქალაქო დარბაზის" წარმომადგენელმა ჯუმბერ სახეიშვილმა.

თბილისი. საქართველოს ახალგაზრდა ეკონომისტთა ასოციაციამ სახელმწიფო პროგრამა - „აწარმოე  საქართველოსთან" - დაკავშირებით განცხადება გაავრცელა. „მნიშვნელოვანია, რომ წარმოდგენილმა პროგრამამ არ გაიზიაროს ის პრობლემები რომლებიც ჰქონდა „იაფი სესხის" პროგრამას. უნდა მოხდეს ისეთი რისკების მინიმიზაცია რაც დაკავშირებულია კორუფციასთან (მაგ კორუფციული გარიგებით კონკრეტული კერძო მეწარმის მხარდაჭერა) მეწარმის მხრიდან  საინვესტიციო  ვალდებულებების არ შესრულება, დაბალი ხარიხსის  საკონსულტაციო მომსახურების მიწოდება და სხვა. ამასთან, გსურს წარმოვადგინოთ რამოდენიმე საკითხი რომელებზეც მნიშვნელოვანია პროგრამის დაწყებამდე გამახვილდეს ყურადღება". სრულად წყარო: ორგანიზაციის გვერდი სოციალურ ქსელში

21 მაისს, ახალციხის, თელავის დემოკრატიული ჩართულობის ცენტრებში, „სამოქალაქო კულტურის საერთაშორისო ცენტრის" ორგანიზებით, ადგილობრივი თვითმმართველობის რეფორმასა და თვითმმართველობის არჩევნების მნიშვნელობაზე იმსჯელეს.  შეხვედრა,  აშშ–ის საერთაშორისო განვითარების სააგენტოს ეგიდით მიმდინარე პროექტის, „დემოკრატიული მმართველობა საქართველოს" პროგრამის ფარგლებში მოეწყო.  დისკუსიას ახალციხის მუნიციპალიტეტის საჯარო სკოლებისა და სკოლამდელი აღზრდის დაწესებულებების პედაგოგები, სკოლის მოსწავლეები და სამცხე–ჯავახეთის სახელმწიფო უნივერსიტეტის სტუდენტები ესწრებოდნენ. თვითმმართველობის კოდექსში შესული ცვლილებები დამსწრეებს „სამოქალაქო კულტურის საერთაშორისო ცენტრის" წარმომადგენელმა კოტე კანდელაკმა გააცნო. შემდეგ, შეხვედრა კითხვა-პასუხის რეჟიმში გაგრძელდა. როგორ გაიმიჯნება მერისა და გამგებლის უფლებამოსილებები, როგორ უნდა აირჩიონ საკრებულოს წევრები, მერი, გამგებლები და რა კომპეტენციები ექნება თვითმმართველობას არჩევნების შემდეგ. როგორ უნდა ჩამოყალიბდეს საკონსულტაციო საბჭო, რომელიც გუბერნატორის აპარატში შეიქმნება, ვინ იქნებიან წევრები და რა უფლება-მოვალეობები ექნებათ, – ამ საკითხებით დაინტერესდნენ შეხვედრის მონაწილეები. პროექტის ფარგლებში მსგავსი შეხვედრა 26 ქალაქში გაიმართება.

თბილისი.  ინფორმაციის თავისუფლების განვითარების ინსტიტუტმა განცხადება გაავრცელა, რომლითაც სასჯელაღსრულების და პრობაციის მინისტრს მიმართავს. „გვინდა გაცნობოთ, რომ 2014 წლის 11 თებერვალს IDFI - იმ მიმართა სასჯელაღსრულების დეპარტამენტს 17 სხვადასხვა შინაარსის საჯარო ინფორმაციის მოთხოვნით. … სამწუხაროდ, სასჯელაღსრულების დეპარტამენტის საჯარო ინფორმაციის გაცემის უზრუნველყოფაზე პასუხისმგებელმა პირმა არ შეასრულა კანონმდებლობით მასზე დაკისრებული  ვალდებულება და ინსტიტუტის მოთხოვნები უპასუხოდ დატოვა”. მაღალი საზოგადოებრივი ინტერესიდან გამომდინარე, IDFI მოუწოდებს სასჯელაღსრულებისა და პრობაციის სამინისტროს, საკუთარი კომპეტენციის ფარგლებში, უზრუნველყოს საქვეუწყებო დაწესებულება სასჯელაღსრულების დეპარტამენტის მიერ  კანონმდებლობით დაკისრებული ვალდებულებების შესრულება.  სრულად...  წყარო: idfi.ge

თბილისი. წინასაარჩევნოდ ამუშავდა ვებგვერდი WWW.PARTIEBI.GE, რომლის მიზანია ხელი შეუწყოს საზოგადოებისთვის მნიშვნელოვან საკითხებზე ინფორმირებულ პოლიტიკურ მსჯელობასა და დისკუსიას 2014 წლის 15 ივნისის თვითმმართველობის არჩევნების წინ. ამ მიზნით, NIMD-მა არჩევნებში მონაწილე საარჩევნო სუბიექტებსა და მერობის კანდიდატებს შესთავაზა აქტუალურ და მნიშვნელოვან საკითხებზე დასმული შეკითხვებისათვის ეპასუხათ. საარჩევნო სუბიექტებს/მერობის კანდიდატებს თითოეულ კითხვაზე თანაბარი მოცულობის - მაქსიმუმ 250 სიტყვიანი პასუხის გაცემა შეეძლოთ. ამ ვებგვერდის საშუალებით, შესაძლებელია როგორც ცალკეულ საარჩევნო სუბიექტების, ასევე მერობის კანდიდატების ხედვების გაცნობა და მათი ერთმანეთთან შედარება. სოციალური მედიის აპლიკაციები კი საშუალებას მოგცემთ თქვენი საკუთარი დისკუსია წამოიწყოთ, ადვილად გაავრცელოთ და იმსჯელოთ თქვენთვის საინტერესო იმ საკითხებზე. ვებგვერდი:  partiebi.ge წყარო: partiebi.ge

თბილისი. ინფორმაციის თავისუფლების განვითარების ინსტიტუტი აქვეყნებს მიმოხილვას: „როგორ გაიზრდება პარლამენტის ბიუჯეტი". „მედიაში გავრცელებული უახლოესი ცნობების მიხედვით საქართველოს პარლამენტის ბიუჯეტი მომავალი წლისათვის 54 მილიონ 695 ათასი ლარი იქნება, რაც წლევანდელს დაახლოებით 2 მილიონ ლარით აღემატება. საქართველოს პარლამენტის საფინანსო-საბიუჯეტო კომიტეტის თავმჯდომარის პირველი მოადგილის ნოდარ ებანოიძის განცხადებით, მომავალი წლისათვის ბიუჯეტის გაზრდილი თანხა ძირითად შრომითი ანაზღაურების ზრდას და ავტოპარკის განახლებას მოხმარდება", ნათქვამია მიმოხილვაში. პუბლიკაციაში ინსტიტუტი მიმოიხლავს საქართველოს პარლამენტის შრომის ანაზღაურებისა და ავტოპარკის შენახვის შესახებ 2013 წლის ინფორმაციას. სრულად... წყარო: idfi.ge

აჭარა. საერთაშორისო გამჭვირვალობა – საქართველომ ბათუმის ოფისის კოორდინატორის, მალხაზ ჭკადუას ბლოგპოსტი გამოაქვეყნა – „რას ფიქრობენ მოქალაქეები ადგილობრივი თვითმმართველობის ორგანოების მუშაობაზე?". იგი ეფუძნება გამჭვირვალობის დაკვეთით კავკასიის კვლევითი რესურსების ცენტრის მიერ ჩატარებული სოციოლოგიური გამოკითხვის მონაცემებს. პუბლიკაციის თანახმად „„საქართველოს მოქალაქეები ნაკლებად არიან ჩართულები ადგილობრივი თვითმმართველობების მიერ გადაწყვეტილების მიღების პროცესში, მათ ასევე მწირი ინფორმაცია აქვთ ადგილობრივი ხელისუფლების აქტივობების შესახებ"... ბლოგპოსტს ახლავს კვლევის შედეგების მიხედვით შექმნილი ინფოგრაფიკა. სრულად... წყარო: transparency.ge

სამოქალაქო კულტურის საერთაშორისო ცენტრი საქართველოს 26 ქალაქსა და სოფელში იწყებს შეხვედრებს, რომელიც ადგილობრივი თვითმმართველობის რეფორმის შესახებ ინფორმაციის მიწოდებას ისახავს მიზნად. ღონისძიებები გაიმართება პროექტის „ადგილობრივი თვითმმართველობის რეფორმის შესახებ საზოგადოებრივი ცნობიერების ამაღლების საინფორმაციო კამპანიის" ფარგლებში, რომელსაც სამოქალაქო კულტურის საერთაშორისო ცენტრი, აშშ–ის საერთაშორისო განვითარების სააგენტოს პროგრამის დემოკრატიული მმთველობის ფარგლებში, ახორციელებს. პროექტის ფარგლებში დაგეგმილია შესაბამისი ბეჭდვითი და ვიდეო მასალის მომზადება და გავრცელება, რეფორმის პროცესში ჩართული სამოქალაქო საზოგადოების წარმომადგენელთა მიერ საზოგადოებრივი შეხვედრების მოწყობა საქართველოს 26 ქალაქსა და სოფელში. შეხვედრები გაიმართება დემოკრატიული ჩართულობის ცენტრებსა და საზოგადოებრივ ცენტრებში, 20-29 მაისის პერიოდში. საკონტაქტო ინფორმაცია: სამოქალაქო კულტურის საერთაშორისო ცენტრი - info@iccc.org.ge +995 (32) 940296 შეხვედრების განრიგი...

თბილისი. საერთაშორისო გამჭვირვალობა – საქართველომ გამოაქვეყნა განცხადება – „მთავრობა ტელეკომპანია „მაესტროს" არ უნდა კიცხავდეს კრიტიკული სიუჟეტის გამო". „საქართველოს მთავრობამ გაავრცელა განცხადება, რომელშიც ტელეკომპანია „მაესტროს" ჟურნალისტის ვახო სანაიას საავტორო გადაცემაში 18 მაისს გასული სიუჟეტი გააკრიტიკა. მიმართვაში ნათქვამია, რომ სიუჟეტი ტენდენციურ ხასიათს ატარებდა და ჟურნალისტი ცდილობდა, შეექმნა ისეთი სურათი, თითქოს ხელისუფლებამ არც ერთი წინასაარჩევნო დაპირება არ შეასრულა... ვფიქრობთ, რომ ხელისუფლების ნებისმიერი წარმომადგენელი უნდა შეეგუოს იმ ფაქტს, რომ ყველა მედიასაშუალება მათთვის მისაღები ფორმით არ გააშუქებს მიმდინარე პროცესებს. ასევე, ხელისუფლების საქმიანობისა და პარტიების წინასაარჩევნო დაპირებების კრიტიკული ანალიზი განსაკუთრებით მნიშვნელოვანია მოახლოვებული ადგილობრივი თვითმმართველობის არჩევნების წინ, რათა ამომრჩეველს ინფორმირებული არჩევანის გაკეთების საშუალება მიეცეს. მედიის მხრიდან მთავრობის მუშაობის მონიტორინგი და საზოგადოების ლეგიტიმური ინტერესების დაცვა მედიის უმნიშვნელოვანესი ფუნქციაა. სწორედ ეს, ხშირად უსიამოვნო, საჯარო კონტროლი უწყობს ხელს მოხელეებისა და პოლიტიკოსების ანგარიშვალდებულების ამაღლებას და ქვეყანაში დემოკრატიული მმართველობის სისტემის დამკვიდრებას...", ნათქვამია გამჭვირვალობის განცხადებაში. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი ნარკოტიკული დანაშაულისთვის გათვალისწინებული სასჯელის კონსტიტუციურობის საკითხზე მოსარჩელის ინტერესებს დაიცავს, ორგანიზაციამ ინფორმაცია ვებგვერდზე გამოაქვეყნა. „2014 წლის 5 მაისს, ადამიანის უფლებების სწავლებისა და მონიტორინგის ცენტრის (EMC) დახმარებით, საკონსტიტუციო სასამართლოს მიმართა EMC-ის თანამშრომელმა, ბექა წიქარიშვილმა. ...მოსარჩელის აზრით, აღნიშნული ნორმით გათვალისწინებული სანქცია არღვევს საქართველოს კონსტიტუციით აღიარებულ, თანასწორობობის, სასტიკი სასჯელის გამოყენების აკრძალვისა და პიროვნების თავისუფალი განვითარების უფლებას და ითხოვს, სადავო ნორმის არაკონსტიტუციურად ცნობას. საკონსტიტუციო სასამართლოში მოსარჩელის ინტერესების დაცვას EMC ახორციელებს". სრულად...  წყარო: emc.org.ge