აჭარა. 23 ივნისს, 20:00 საათზე ბათუმში, 26 მაისის პარკში, „გადადგი ნაბიჯი ევროპისკენ“ ინიციატივის ფარგლებში, მორიგი შეხვედრა გაიმართება. ადგილობრივ მოსახლეობასთან და საინიციატივო ჯგუფ - „არ გადადოს“ წევრებთან ერთად, სტუმრები განიხილავენ ისტორიული გამოცდილების გათვალისწინებით ჩვენს ეროვნულ მისიასა და საქართველოს ევროპული ინტეგრაციის პერსპექტივას. შეხვედრის სპიკერები იქნებიან: დავით ტურაშვილი - მწერალი; გიორგი მშვენიერაძე - „დემოკრატიის მცველების“ ხელმძღვანელი; ლაშა ბუღაძე - მწერალი, დრამატურგი; სრულად...  წყარო: ორგანიზაციის გვერდი სოციალურ ქსელში

გურია. ინიციატივის „გადადი ნაბიჯი ევროპისკენ“ ფარგლებში, ოზურგეთში მორიგი შეხვედრა გაიმართა. „მოწვეულმა სტუმრებმა ისაუბრეს საქართველოს პერსპექტივაზე ევროკავშირის წევრობის კანდიდატის სტატუსის მიღებასთან დაკავშირებით, ასევე, ქვეყანაში არსებულ გამოწვევებზე საპასუხოდ დემოკრატიული რეფორმების აუცილებლობაზე. შეხვედრა დისკუსიის ფორმატში წარიმართა და დამსწრე საზოგადოებას შესაძლებლობა ჰქონდა გაეჟღერებინათ კითხვები საინტერესო თემებთან დაკავშირებით“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, პრემიერ-მინისტრმა ირაკლი ღარიბაშვილმა 22 ივნისს პარლამენტში გამოსვლისას განაცხადა, რომ საქართველო კორუფციასთან ბრძოლაში ერთ-ერთი მოწინავე სახელმწიფოა. TI Georgia-ს თქმით, საქართველოს მთავრობა ხშირად იყენებს საერთაშორისო რეიტინგების არასწორ ინტერპრეტაციას ქვეყანაში არსებული რეალური პრობლემების დასამალად. პრემიერი ამჯერადაც „საერთაშორისო გამჭვირვალობის“ 2021 წლის „კორუფციის აღქმის ინდექსის“ (CPI) მონაცემებს იმოწმებდა. ირაკლი ღარიბაშვილმა თქვა, რომ CPI-ის მიხედვით საქართველო 2012 წელს 51-ე ადგილას იყო, ხოლო 2021 წელს 45-ე ადგილასაა, თუმცა არ უხსენებია, რომ მთავარი განმსაზღვრელი ინდექსში მიღებული ქულაა. „საქართველოს შემთხვევაში კი ქულა 2012 წლის შემდეგ საგრძნობლად არ გაუმჯობესებულა - 2012 წელს ქვეყანას 100-დან 52 ქულა ჰქონდა, ხოლო 9 წლის შემდეგ, 2021 წელს 55 აქვს, რაც ქვეყანაში ანტიკორუფციული რეფორმების სტაგნაციაზე მიუთითებს. 55 ქულა საშუალო მაჩვენებელია. მაგალითისთვის, საუკეთესო შედეგის მქონე 10 ქვეყნის ქულები 80-ს აღემატება. მან თქვა, რომ საქართველო ასოცირების ტრიოში უკრაინასა და მოლდოვასთან შედარებით უპირობო ლიდერია. CPI-ის შეფასებით საქართველოს მართლაც აქვს უკეთესი შედეგი, რაც დიდწილად წვრილმანი მექრთამეობის დაბალი დონითაა განპირობებული. თუმცა, მექრთამეობის წინააღმდეგ წარმატებული რეფორმები 18 წლის წინ ჩატარდა და ვერ ჩაითვლება დღევანდელი ხელისუფლების მიღწევად. CPI-ის ქულები სწორედ იმაზე მიუთითებს, რომ მსგავსი ამბიციის რეფორმები ბოლო 9 წლის განმავლობაში არ განხორციელებულა. ამასთან, მოლდოვასა და უკრაინისგან განსხვავებით, CPI მხოლოდ საქართველოსთან მიმართებაში იყენებს ტერმინ „სახელმწიფოს მიტაცებას“, რაც პრემიერ-მინისტრს ასევე არ უხსენებია“. სრულად... წყარო: TI Georgia-ს გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. რონდელის ფონდი აქვეყნებს კახა გოგოლაშვილის ბლოგპოსტს: კანდიდატის სტატუსის მომლოდინე საქართველო ევროპულ პერსპექტივას მიიღებს, რაზე გვაქვს სანერვიულო. „აუცილებელია, რომ ჩვენმა მთავრობამ დაუყოვნებლივ აღიაროს ევროკომისიის მიერ წარმოდგენილი პირობები, გამოხატოს სრული მზადყოფნა მათი დაკმაყოფილებისთვის. იმ შემთხვევაში, თუკი მთავრობა მათ არ ეთანხმება, ნებისმიერი დისკუსიის გამართვა ამის გარშემო აზრს  მოკლებულია. ჯერ არ ყოფილა შემთხვევა, რომ ევროკომისიას გაემართოს მოლაპარაკებები პირობების შემსუბუქებასთან დაკავშირებით. ამიტომ, თუ მთავრობა არ ეთანხმება და უარს ამბობს იმუშაოს წაყენებული პირობების დასაკმაყოფილებლად, გამომდინარე ქვეყნის ევროპული ინტეგრაციის კონსტიტუციური ვალდებულებიდან, მან უნდა დათმოს საკუთარი უფლებამოსილება. ამის შემდგომ უნდა დაინიშნოს ახალი მთავრობა, რომელიც აიღებს პირობების შესრულების ვალდებულებას. ეს მინიმალისტური სცენარია, რომელიც არ გულისხმობს ახალ არჩევნებსა და ხელისუფლების ცვლილებას. ცვლილება, თუ ეს საჭირო გახდა, ძალიან სწრაფად უნდა განხორციელდეს და ახალმა მთავრობამ მყისიერად და ეფექტურად დაიწყოს ევროკომისიის პირობების შესრულებაზე მუშაობა“, ნათქვამია ბლოგპოსტში. სრულად... წყარო: gfsis.org.ge

თბილისი. საქართველოს ახალგაზრდა იურისტთა ასოციაცია (GYLA) მხარს უჭერს საქართველოს ევროკავშირში გაწევრიანებას და მოუწოდებს ხელისუფლებას, ოპოზიციურ პარტიებსა და პასუხისმგებელ სახელმწიფო ინსტიტუტებს, გამოიყენონ ეს შანსი, სწრაფად და ეფექტიანად გაატარონ ევროკავშირის მიერ შემოთავაზებული რეფორმები კანდიდატის სტატუსის მოსაპოვებლად და ასოცირების ტრიოში კუთვნილი ადგილის დასაკავებლად. საია მზად არის, თავისი მანდატის ფარგლებში, აქტიურად ჩაერთოს რეფორმების განხორციელებაში და გაუზიაროს ყველა მონაწილეს წლების განმავლობაში დაგროვებული ცოდნა და გამოცდილება. სრულად... წყარო: gyla.ge

მცხეთა-მთიანეთი. 14 ივნისს დუშეთში, ცენტრალურ სკვერში, განათლების განვითარების და დასაქმების ცენტრის და მცხეთა-მთიანეთის რეგიონული ჰაბის ორგანიზებით მოხალისეობის რეგიონული ფორუმი გაიმართა. ფორუმის მიზანია მოხალისეობის კულტურის პოპულარიზაცია, მოხალისეების მიმღებ ორგანიზაციებსა და მოხალისეობით დაინტერესებულ პირებს შორის კომუნიკაციის ხელშეწყობა, ახალგაზრდული საბჭოების როლისა და საქმიანობის პოპულარიზაცია. ასევე, საზოგადოებრივი ორგანიზაციების ცნობადობის გაზრდა საზოგადოებაში და სამოქალაქო აქტივიზმის პოპულარიზაცია. ფორუმს ესწრებოდა შტეფან მალერიუსი, რეგიონული პროგრამის „პოლიტიკური დიალოგი სამხრეთ კავკასია“ ხელმძღვანელი, კონრად ადენაუერის ფონდი.  საგამოფენო სივრცეში წარმოდგენილი იყო მცხეთა-მთიანეთის რეგიონის სათემო და სამოქალაქო საზოგადოების ორგანიზაციები. ფორუმზე მცხეთა-მთიანეთის მოხალისეობის კვირეულის საინიციატივო ჯგუფებმა საკუთარი აქტივობები წარადგინეს, გამოვლინდა საუკეთესო მოხალისეობრივი აქტივობა (წეროვნის დევნილთა დასახლების საინიციატივო ჯგუფი - მიუსაფარ ცხოველებზე ზრუნვა) და გადაეცათ 150 ევროს ღირებულების პრიზი. შეხვედრაზე გამოვლინდნენ ესეების კონკურსის „მოხალისეობა და აქტიური მოქალაქეობა“ გამარჯვებულები (ნატო გაბარაშვილი, საბა მანაქანაშვილი, დარეჯან ტურაშვილი), რომლებიც წიგნის ვაუჩერებით დაჯილდოვდნენ.  მცხეთა-მთიანეთის რეგიონულმა ჰაბმა საუკეთესო პარტნიორობისათვის სიმბოლური ჯილდო გადასცა ევროკავშირის სადამკვირებლო მისიის მცხეთის რეგიონულ ოფისს, სოფლად თემთა განვითარების სააგენტოსა და განათლების განვითარების და დასაქმების ცენტრს. ფორუმზე გაიმართა ახალგაზრდული კონკურსის „ეს ქვეყანა შენია“ პრეზენტაცია და ილიას სახელმწიფო უნივერსიტეტის პროფესორის გიორგი მელაძის საჯარო ლექცია თემაზე „სამოქალაქო აქტივიზმი“. ფორუმში მონაწილეობდნენ, მცხეთა-მთიანეთის  რეგიონში მოქმედი სათემო და სამოქალაქო საზოგადოების ორგანიზაციები, ახალგაზრდული საინიციატივო ჯგუფები, სამოქალაქო განათლების პედაგოგები, ახალგაზრდები, პროფესიული სასწავლებლები, დღის ცენტრები, რეგიონში მოქმედი საერთაშორისო ორგანიზაციები. მცხეთა-მთიანეთის რეგიონული ჰაბი განსაკუთრებულ მადლობას უხდის მოხალისებს,  რომლებმაც სრულიად უსასყიდლოდ მთელი დღის განმავლობაში  დაუღალავად იშრომეს და მნიშვნელოვანი წვლილი შეიტანეს ფორუმის წარმატებით განხორციელებაში. მოხალისეობის რეგიონული ფორუმი გაიმართა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად...  წყარო: პროექტის გვერდი სოციალურ ქსელში

თბილისი. სამოქალაქო ინიციატივა „გადადგი ნაბიჯი ევროპისკენ“ ეხმაურება ევროკომისიის რეკომენდაციებს ევროკავშირის საბჭოს მიმართ ასოცირებული ტრიოს ქვეყნებისთვის ევროკავშირის წევრობის კანდიდატის სტატუსის მინიჭების გადაწყვეტილების თაობაზე. დოკუმენტის მიხედვით, საქართველოს არ ეძლევა რეკომენდაცია დაუყოვნებლივ მიიღოს ევროკავშირის წევრობის კანდიდატის სტატუსი. „საქართველოს ხელისუფლების უპასუხისმგებლო დამოკიდებულება მიმდინარე პროცესისადმი და მიზანმიმართული, დამაზიანებელი ნაბიჯები, ქართველი ხალხის ნების საწინააღმდეგოდ, ძირს უთხრიდა ჩვენი ქვეყნის ისტორიულ შესაძლებლობას - გავხდეთ ევროკავშირის ნაწილი. მიუხედავად შექმნილი მძიმე მდგომარეობისა, ევროკავშირი არ აპირებს ქართველი ხალხის მიტოვებას და ამის დასტურია ის ჩამონათვალი, რომელთა შესრულების შემთხვევაში, ევროკავშირის წევრობის კანდიდატობის მიღება გარანტირებული იქნება. 24 ივნისამდე ჯერ კიდევ არის შანსი, ხელისუფლების უმაღლესმა კონსტიტუციურმა ორგანოებმა სწრაფად გადადგან ნაბიჯები შექმნილი მდგომარეობის გამოსასწორებლად და ამით ძლიერი გზავნილი გაუგზავნონ ევროკავშირის სახელმწიფოთა ლიდერებს, პოლიტიკური გადაწყვეტილების მიღების წინ. ევროკომისიის მოსაზრების თანახმად, რომელიც ასახავს საქართველოში არსებულ რეალობას, კანდიდატობის სტატუსის მიღებისთვის აუცილებელია: ე.წ. შარლ-მიშელის შეთანხმების სულისკვეთებით პოლიტიკური პოლარიზაციის შემცირება; ყველა სახელმწიფო უწყების დამოუკიდებლობისა და ანგარიშვალდებულების გაძლიერება, მათზე დემოკრატიული ზედამხედველობის უზრუნველყოფა; საარჩევნო კანონმდებლობის გაუმჯობესება; მართლმსაჯულების სისტემის რეფორმა; ანტიკორუფციული რეფორმა; საქართველოს დეოლიგარქიზაცია; ორგანიზებული დანაშაულების წინააღმდეგ ბრძოლის გაზრდა; მედია გარემოს გაუმჯობესება; ადამიანის უფლებების, მათ შორის მოწყვლადი ჯგუფების დაცვა; გენდერული თანასწორობა და ქალთა მიმართ ძალადობის აღმოფხვრა; სამოქალაქო საზოგადოების ჩართულობის უზრუნველყოფა გადაწყვეტილების მიღების პროცესში ყველა დონეზე; სტრასბურგის სასამართლოს გადაწყვეტილებების აღსრულება; სახალხო დამცველის არჩევის პროცესში დამოუკიდებელი კანდიდატების შერჩევა; ჩვენ, სამოქალაქო საზოგადოების წარმომადგენლები, კიდევ ერთხელ მოვუწოდებთ ხელისუფლების უმაღლეს ორგანოებს, გამოავლინონ მზაობა ზემოხსენებული საკითხების გადასაწყვეტად და გადავიდნენ მოქმედებაზე, რათა 24 ივნისამდე უზრუნველყონ კონკრეტული ინიციატივების მიღება და ძირითადი დამაბრკოლებელი ბარიერების მოხსნა. ჩვენის მხრივ, მზად ვართ სახელმწიფო ორგანოებს გადავცეთ ჩვენს მიერ წლების მუშაობის შედეგად შექმნილი ცვლილებების პაკეტები“, ნათქვამია განცხადებაში. სრულად... წყარო: ინიციატივას გვერდი სოციალურ ქსელში

შიდა ქართლი. სამოქალაქო ინიციატივას „გადადგი ნაბიჯი ევროპისკენ“ ორგანიზებით, გორში, აქტიურ მოქალაქეებთან და სტუდენტებთან გაიმართა შეხვედრა თემაზე: რას მოგვცემს ევროკავშირის სტატუსი. „17 ივნისს ევროკომისია პირველ მოსაზრებას გამოაქვეყნებს, სადაც ჩვენი პერსპექტივა გამოჩნდება. ჩვენ არ შეგვიძლია დავკარგოთ შესაძლებლობა, რასაც ათწლეულების მანძილზე ველოდით. ის რაც ხალხს შეუძლია, არის გაერთიანება ევროპული არჩევანის გარშემო“. სრულად... წყარო: ინიციატივის გვერდი სოციალურ ქსელში

სამეგრელო. კამპანია „ეს ქვეყანა შენიას“ ფარგლებში, საქართველოს ყველა რეგიონში, ახალგაზრდებთან საჯარო შეხვედრები იმართება. შეხვედრებზე ახალგაზრდებს აწვდიან ინფორმაციას სამოქალაქო საზოგადოებაზე, სამოქალაქო ღირებულებებზე და საზოგადოებრივი ორგანიზაციების საქმიანობის მნიშვნელობაზე. კამპანიას „ეს ქვეყანა შენია“ ახორციელებს სამოქალაქო საზოგადოების ინსტიტუტი, ევროკავშირისა და კონრად ადენაუერის ფონდის მხარდაჭერით, პროექტის „“სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის” ფარგლებში. სრულად... წყარო: პროექტის გვერდი სოციალურ ქსელში

თბილისი. მედიის ადვოკატირების კოალიციის წევრი ორგანიზაციები საქართველოს პრეზიდენტს თხოვნით მიმართავენ, განიხილოს და დადებითად გადაწყვიტოს „მთავარი არხის“ გენერალური დირექტორის ნიკა გვარამიას შეწყალების საკითხი. „მთავარი არხის” დამფუძნებლის და გენერალური დირექტორის დაპატიმრებით რეალური საფრთხე შეექმნა ჩვენი ქვეყნის ევროპულ მომავალს. სამართლიანი კრიტიკა ნიკა გვარამიას დაკავებასთან დაკავშირებით ევროპარლამენტის 2022 წლის 8 ივნისის რეზოლუციაშიც „მედიის თავისუფლებისა და ჟურნალისტთა უსაფრთხოების დარღვევების შესახებ“ აისახა, რომლითაც ევროპარლამენტმა მოუწოდებს საქართველოს ხელისუფლებას, მტკიცედ დაიცვას დემოკრატიის უმაღლესი სტანდარტები, ისეთი მიმართულებებით, როგორიცაა კანონის უზენაესობა, სასამართლო სისტემის დამოუკიდებლობა, სამართლიანი სასამართლო პროცესები და ფუნდამენტური თავისუფლებები, მათ შორის, მედიის თავისუფლების სფეროში. მოგმართავთ, როგორც საქართველოს სახელმწიფოს მეთაურს, შეიწყალოთ ნიკა გვარამია და ამ გზით შეასრულოთ საკუთარი როლი ქვეყანაში მიმდინარე პოლიტიკური კრიზისის განმუხტვასა და საქართველოს ევროპის კავშირში ინტეგრაციის პროცესში. თქვენი უფლებამოსილების გამოყენებით დაამტკიცოთ ევროკავშირის წევრობის რეალური სურვილი და მზაობა ქვეყანამ გადალახოს არსებული დაბრკოლებები“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, ორგანიზაციამ პანელური განხილვები გამართა თემაზე „საჯარო ინფორმაციის ხელმისაწვდომობის საკანონმდებლო ჩარჩოსა და პრაქტიკის გაუმჯობესება საქართველოში“. ღონისძიება შეეხო საქართველოში საჯარო ინფორმაციის ხელმისაწვდომობის კანონმდებლობისა და პრაქტიკის მთავარ გამოწვევებსა და საჭიროებებს. ღონისძიების ფარგლებში გაიმართა ორი პანელური დისკუსია საერთაშორისო და ქართველი ექსპერტების, ასევე, სამოქალაქო, საჯარო და კერძო სექტორის წარმომადგენლების მონაწილეობით. ვრცლად... წყარო: idfi.ge

თბილისი. კოალიცია ინფორმაციის სანდოობისთვის შეშფოთებულია, რომ ხელისუფლების წარმომადგენლები საქართველოს ევროკავშირის წევრობის კანდიდატის სტატუსის საკითხის ირგვლივ, დასავლელი პარტნიორების კრიტიკულ შეფასებებს, საქართველოს ომში ჩართვის სურვილთან აკავშირებენ. „მსგავს რიტორიკას არაფერი აქვს საერთო რეალობასთან და წარმოადგენს საფრთხის შემცველ დეზინფორმაციას, რომელიც ომის შიშით მანიპულირებს და საქართველოს მოქალაქეების დასავლური არჩევანის მიზანმიმართულ დისკრედიტაციას ეწევა. სწორედ რუსული პროპაგანდის ერთ-ერთი გრძელვადიანი მიზანია დასავლურ არჩევანზე „პრაგმატულად“ უარის თქმა და 2008 წლის ომის შემდეგ „ახალ რეალობასთან მორგების“ აუცილებლობაში ჩვენი საზოგადოების დარწმუნება. დაუშვებელია დასავლური ღირებულებების აღრევა, მიზანმიმართულად დამახინჯება და მოსახლეობისთვის მცდარი სახით მიწოდება. საქართველოს მთავრობის პასუხისმგებლობაა არ დააყენოს ქვეყნის ეროვნული ინტერესები საფრთხის ქვეშ, ვიწროპარტიული ამოცანების მისაღწევად და საზოგადოებას სწორი ინფორმაცია მიაწოდოს ევროპული ინტეგრაციის შესახებ. კოალიცია ინფორმაციის სანდოობისთვის საქართველოს ხელისუფლებისგან მოითხოვს პატივი სცეს საქართველოს მოქალაქეების არჩევანს და უარი თქვას რიტორიკაზე, რომელიც ქართველი ხალხის ისტორიულ არჩევანს ეწინააღმდეგება“, ნათქვამია განცხადებაში. სრულად... წყარო: isfed.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. 2022 წლის 21 ივნისს, 14:00 (CET) (საქართველოს დროით 16:00) მიგრაციის პოლიტიკის განვითარების საერთაშორისო ცენტრის (ICMPD) თანამშრომლები, ყველა დაინტერესებული ორგანიზაციისთვის ჩაატარებენ საინფორმაციო საკონსულტაციო ონლაინ შეხვედრას,  ევროკავშირის მიერ დაფინანსებული „განვითარებაზე მიგრაციის გავლენის გაძლიერება საქართველოში“ (STREAMinG) - პროექტის ფარგლებში გამოცხადებულ საგრანტო კონკურსთან დაკავშირებულ ტექნიკურ და ადმინისტრაციულ დეტალებზე.  შეხვედრის მონაწილეებს შესაძლებლობა ექნებათ დასვან შეკითხვები და მიიღონ ამომწურავი პასუხები მათთვის საინტერესო საკითხებზე.  შეხვედრაზე უზრუნველყოფილი იქნება სინქრონული თარგმანი ქართულ და ინგლისურ ენებზე.  შეხვედრაში მონაწილეობისთვის გთხოვთ გამოიყენოთ შემდეგი ბმული... საგრანტო კონკურსი გამოცხადებულია მიგრაციის პოლიტიკის განვითარების საერთაშორისო ცენტრის (ICMPD), ევროკავშირის და შვეიცარიის განვითარების და თანამშრომლობის სააგენტოს (SDC) ფინანსური მხარდაჭერით. საგრანტო კონკურსის შესახებ დეტალური ინფორმაცია, ხელმისაწვდომია ინგლისურ ენაზე, შემდეგ ბმულზე...  წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ინსტიტუტი-ს ორგანიზებით, სამოქალაქო კამპანია „ეს ქვეყანა შენიას“ ფარგლებში, ილიას უნივერსიტეტში, ახალგაზრდებთან საჯარო შეხვედრა გაიმართა. მოწვეული სტუმრები იყვნენ: ლაშა ბუღაძე, ქეთი დევდარიანი, დათო ტურაშვილი, ნინო დანელია. მოწვეულმა სპიკერებმა გამართეს დისკუსია და განიხილეს სამოქალაქო საზოგადოების ღირებულებებისა და სამოქალაქო აქტივიზმის მნიშვნელობა. სამოქალაქო კამპანია „ეს ქვეყანა შენიას“ მიზანია საქართველოში სამოქალაქო საზოგადოების გაძლიერება, საზოგადოებრივი ორგანიზაციების საქმიანობის წარმოჩენა და სამოქალაქო აქტივიზმის ხელშეწყობა. კამპანია „ეს ქვეყანა შენია“ მიმდინარეობს ევროკავშირისა და კონრად ადენაუერის ფონდის მხარდაჭერით, პროექტის “სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის” ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. პლატფორმა „ორბელიანი მეტის“ ინფორმაციით, 16-მა ინიციატივამ Crowdfunding-ის კამპანიები წარმატებით დაასრულა. „1000-მდე მხარდამჭერის დახმარებით, სახალხო დაფინანსებით სულ 64.000 ლარზე მეტი შეგროვდა. USAID-ის სამოქალაქო საზოგადოების ჩართულობის პროგრამის 70%-იანი თანადაფინანსებითა და სახალხო დაფინანსებით სულ 200.000 ლარზე მეტი გაიცემა 16 ინიციატივაზე“. სრულად...  წყარო: ორგანიზაციის გვერდი სოციალურ ქსელში

თბილისი. მედიის ადვოკატირების კოალიცია ეხმიანება 2022 წლის 9 ივნისს ევროპარლამენტის ხუთი პოლიტიკური ჯგუფის (Verts/ALE, S&D, ECR, PPE, Renew Europe) მიერ საქართველოში მედიის თავისუფლებების დარღვევებისა და ჟურნალისტების უსაფრთხოების შესახებ ინიცირებული ერთობლივი რეზოლუციის მიღების ფაქტს. „როცა ჩვენი ქვეყანა ევროპული საბჭოს გადაწყვეტილების მოლოდინშია, მოვუწოდებთ მმართველ პარტიას, ქართველი ხალხისთვის მნიშვნელოვან ისტორიულ მომენტში ეფექტურად გამოიყენოს დარჩენილი დრო, რომ გაზარდოს საქართველოს მიერ კანდიდატის სტატუსის მოპოვების შანსი“. სტატია „ევროპარლამენტი საქართველოსთვის კანდიდატის სტატუსის პირობებით მინიჭებისკენ მოუწოდებს“ ხელმისაწვდომია... წყარო: კოალიციის გვერდი სოციალურ ქსელში

თბილისი. სამოქალაქო საზოგადოების ორგანიზაციები ეხმიანებიან 12 ივნისს ტელეკომპანია „პირველი“-ს ეთერში გასულ სიუჟეტს, რომელიც 5 ივლისის ძალადობრივი მოვლენების დაგეგმვასა და აღსრულებაში სახელმწიფო უსაფრთხოების სამსახურის თანამშრომლების სავარაუდო მონაწილეობას აღწერს. „ამ დრომდე 2021 წლის 5 ივლისს მომხდარი მასობრივი ძალადობა საპოლიციო უმოქმედობისა და ჟურნალისტებისა და აქტივისტების დასაცავად სახელმწიფოს დემონსტრაციული პასიურობის განსაკუთრებულ შემთხვევად ფასდებოდა, თუმცა 12 ივნისს გასაჯაროებული ინფორმაცია ქმნის კიდევ უფრო სახიფათო და შემაშფოთებელ დაშვებას, რომ მასობრივი ძალადობის დაგეგმვისა და პროცესების მართვის უკან სახელმწიფო უსაფრთხოების სამსახური შესაძლოა იდგეს“. სრულად... წყარო: idfi.ge ფოტო: სოციალური სამართლიანობის ცენტრი

თბილისი. „საერთაშორისო გამჭვირვალობა - საქართველო“ (TI Georgia) აქვეყნებს 2021 წლის ანგარიშს, სადაც ორგანიზაცია გაწეული სამუშაოების და მნიშვნელოვანი მოვლენების შესახებ გიყვებათ. სრულად... წყარო: transparency.ge

თბილისი. საქართველოს პოლიტიკის ინსტიტუტი (GIP) აქვეყნებს ნინო სამხარაძის ბლოგპოსტს: საზოგადოების მხარდაჭერა ევროინტეგრაციის მიმართ: რა ელის საქართველოს კანდიდატის სტატუსს მიღმა. „მაშინ, როცა ორ კვირაზე ნაკლებ დროში მოსახლეობა ბრიუსელიდან ისტორიულ გადაწყვეტილებას ელის, საზოგადოების სტაბილური მხარდაჭერა ევროინტეგრაციული პროცესის მიმართ არაერთი საფრთხის წინაშე დგება. ეს საფრთხეები კიდევ უფრო მომძლავრდება იმ შემთხვევაში, თუ საქართველო შესაძლებლობების ამ კონკრეტული ფანჯრის მიღმა დარჩება. ახლა საქართველოსთვის სასიცოცხლოდ მნიშვნელოვანია კანდიდატის სტატუსის მინიჭება, რათა შენარჩუნდეს და გაძლიერდეს საზოგადოებრივი მობილიზაცია სამომავლო დემოკრატიული რეფორმებისთვის ბრძოლისთვის“. სრულად... წყარო: gip.ge

სამეგრელო-ზემო სვანეთი. განათლების განვითარებისა და დასაქმების ცენტრის (EDEC) და სამეგრელო-ზემო სვანეთის რეგიონული ჰაბის „ათინათის“ ორგანიზებით, 24 ივნისს, 14:00-18:00 საათამდე, ზუგდიდში, ტექნოპარკში (ლაღიძის ქუჩა #2) გაიმართება მოხალისეობის რეგიონული ფორუმი 2022. „ფორუმის მასშტაბებიდან გამომდინარე ვიწვევთ მოხალისეებს (ასაკი შეზღუდული არ არის!), რომლებიც დაეხმარებიან ფორუმის საორგანიზაციო გუნდს. მსურველებს შეუძლიათ გამოთქვან მზაობა პოსტის კომენტარების სახით 2022 წლის 17 ივნისის ჩათვლით. ფორუმის მიზანი არის მოხალისეობის კულტურის პოპულარიზება და სამოქალაქო საზოგადოების გაძლიერება. ფორუმი იმართება პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში, რომელიც ხორციელდება ევროკავშირისა (EU) და კონრად ადენაუერის ფონდის (KAS) მხარდაჭერით“. სრულად...  წყარო: ჰაბის გვერდი სოციალურ ქსელში