შიდა ქართლი. გორის მუნიციპალიტეტის მერმა, ვლადიმერ ხინჩეგაშვილმა, შიდა ქართლის რეგიონული ჰაბის „საზოგადოება ბილიკის“ თავმჯდომარემ, მარიამ მღებრიშვილმა, განათლების განვითარების და დასაქმების ცენტრის აღმასრულებელმა დირექტორმა, ნათია ნამიჭეიშვილმა და ახალგაზრდული საბჭოს თავმჯდომარემ, გიორგი ტალახაძემ ურთიერთთანამშრომლობის მემორანდუმს მოაწერეს ხელი. „თანამშრომლობის მიზანია ახალგაზრდული საბჭოს გაძლიერება, ადგილობრივ და საერთაშორისო ორგანიზაციებთან თანამშრომლობის გაძლიერება, ახალგაზრდული ინიციატივების ხელშეწყობა და ახალგაზრდების საზოგადოებრივ ცხოვრებაში ჩართულობის ზრდის ხელშეწყობა". ახალგაზრდული საბჭო დაფუძნდა შიდა ქართლის რეგიონული ჰაბისა და განათლების განვითარებისა და დასაქმების ცენტრის ხელშეწყობით, პროექტის „სამოქალაქო საზოგადოების ინიციატივა“ ფარგლებში. პროექტი ხორციელდება ევროკავშირისა და კონრად ადენაუერის ფონდის მხარდაჭერით. სრულად...  წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ დახმარებით სირიის მოქალაქემ სასწავლო ბინადრობის ნებართვის გაცემის თაობაზე დავა საქართველოს უზენაეს სასამართლოში მოიგო. სრულად... წყარო: rights.ge

თბილისი. საქართველოს დემოკრატიული ინიციატივას (GDI) ცნობით, თბილისის საქალაქო სასამართლოში გრძელდება უჩა მამაცაშვილის მიერ ააიპ „ანტიკორუფციული მოძრაობისა“ და მისი წარმომადგენლების, ვასო ურუშაძისა და ლაშა ფარულავას წინააღმდეგ შეტანილი სარჩელის განხილვა. „წარდგენილ სარჩელში  ბიძინა ივანიშვილის დეიდაშვილი სადავოდ ხდის არასამთავრობო ორგანიზაციის წარმომადგენლების მიერ გაკეთებულ იმ განცხადებებს, რომელშიც ისინი უთითებდნენ უჩა მამაცაშვილის სავარაუდო ჩართულობაზე ტრანსნაციონალურ დანაშაულში (ე.წ „ქოლ-ცენტრების“ საქმე) და მის სავარაუდო კავშირზე საქართველოში ელექტროენერგიის იმპორტის გაძვირებასთან. მოსარჩელის აზრით, აღნიშნული განცხადებები არის ცილისწამება და სასამართლოს გზით მოპასუხეებისგან ითხოვს გავრცელებული ცნობების უარყოფას და მორალური ზიანის ანაზღაურებას 150 000 ლარის ოდენობით. „ანტიკორუფციული მოძრაობისა“ და მისი წარმომადგენლების, ვასო ურუშაძისა და ლაშა ფარულავას ინტერესებს სასამართლოში GDI იცავს“. სრულად... წყარო: gdi.ge

კახეთი. კახეთის რეგიონული ჰაბი აქტიურად მუშაობს ახალგაზრდების სათემო მობილიზაციის ხელშეწყობის მიმართულებით. 29 ივნისს კახეთის რეგიონული  ჰაბის მიერ  ჩატარდა ტრენინგები ყვარლის მუნიციპალიტეტის  სოფლებში ახალსოფელსა  და ზინობიანში, თემში მცხოვრები ეთნიკური უმცირესობებისა და შერეული ოჯახების წარმომადგენელი ახალგაზრდებისათვის. ტრენინგზე განიხილეს სამოქალაქო აქტივიზმისა და სამოქალაქო ჩართულობის საკითხები... კახეთის რეგიონული ჰაბის საქმიანობას უზრუნველყოფს ორგანიზაცია მედია ცენტრი კახეთი (MCK) ევროკავშირისა და კონრად ადენაუერის ფონდის  დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ (2021-2025) ფარგლებში. აღნიშნული პროექტის მიზანია, გააძლიეროს სამოქალაქო საზოგადოება როგორც დამოუკიდებელი, მდგრადი, გამჭვირვალე და ანგარიშვალდებული აქტორი მთელი ქვეყნის მასშტაბით. სრულად... წყარო: ორგანიზაციის გვერდი სოციალურ ქსელში

თბილისი. 30 ივნისს, ინფორმაციის თავისუფლების განვითარების ინსტიტუტისა (IDFI) და ელექტრონული მმართველობის აკადემიის (eGA) საერთო პროექტის, „DRIVE: ციფრულად მოწყვლადი მოქალაქეების საჭიროებების კვლევა“ ფარგლებში ვებინარი ჩატარდა, რომელიც ეფუძნებოდა მაისში გამოქვეყნებულ ანგარიშს ციფრული მოწყვლადობის შესახებ. ტრენინგი მოიცავდა სამოქალაქო ჩართულობის ეტაპებს, დაინტერესებულ მხარეებს შორის თანამშრომლობის ინსტრუმენტებს და ეფექტური კომუნიკაციის საკითხებს. სრულად... წყარო: idfi.ge

თბილისი. სოციალური სამართლიანობის ცენტრის მიერ გაზიარებულ დოკუმენტში კრიტიკულადაა გაანალიზებული საერთო სასამართლოებში საქმეთა შემთხვევით, ელექტრონულად განაწილების სისტემა. „2020-2021 წლების პერიოდზე დაკვირვება მოწმობს, რომ სისტემის გაუმჯობესება საქართველოს პარლამენტისა და იუსტიციის უმაღლესი საბჭოსთვის პრიორიტეტული აღარ არის. საქმეთა განაწილების წესი კვლავ ვერ აზღვევს ინდივიდუალური მოსამართლის დამოუკიდებლობაზე არასათანადო გავლენების რისკებს. ხშირად ბუნდოვანი და გაუმჭვირვალეა როგორც სასამართლოს თავმჯდომარეების, ისე სასამართლოების კანცელარიებისა და მენეჯმენტის დეპარტამენტის როლი ამ პროცესში. ბოლო 2 წლის განმავლობაში მნიშვნელოვნად გაუარესდა საჯარო ინფორმაციის ხელმისაწვდომობის სტანდარტები, რაც მნიშვნელოვნად ართულებს სისტემის ფუნქციონირების ეფექტიან მონიტორინგს“, ნათქვამია ანგარიშში. ანგარიში... წყარო: socialjustice.org.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. საქართველოს სამოქალაქო საზოგადოება აქვეყნებს თავიანთ ხედვას და რეკომენდაციებს წარსულის გააზრებისა და ნდობის აღდგენის შესაძლებლობების შესახებ. „დამოუკიდებლობის მოპოვებიდან დღემდე მოუგვარებელი კონფლიქტები საქართველოსთვის ერთ-ერთ უმნიშვნელოვანეს გამოწვევად რჩება. მეოცე საუკუნის 90-იანი წლების დასაწყისიდან დღემდე როგორც აფხაზეთის, ისე სამხრეთ ოსეთის მიმართულებით, უმწვავესი სამხედრო დაპირისპირებებისა და შედარებით ნაკლები დაძაბულობის პერიოდების მონაცვლეობით განვითარებული მოვლენების შედეგები, როგორც პოლიტიკური, ასევე სოციალური, ეკონომიკური, პიროვნებათაშორისი ურთიერთობების თვალსაზრისით, არათუ მსუბუქდება, არამედ სულ უფრო ღრმა კრიზისულ ხასიათს იძენს, რაც ახლო მომავალში მათი მოგვარების შესაძლებლობებს კიდევ უფრო ართულებს. მოვუწოდებთ საქართველოს სახელმწიფო ინსტიტუტებს, საერთაშორისო ორგანიზაციებსა და გაერთიანებებს, კონფლიქტების დარეგულირებაზე, შერიგებასა და მშვიდობის მშენებლობის საკითხებზე მომუშავე ორგანიზაციებსა და ჯგუფებს, აქტიურად ჩაერთონ შერიგების ერთ-ერთი უმთავრესი და ქმედითი ინსტრუმენტის - წარსულის შესწავლისა და კრიტიკული გააზრების პროცესში“, ნათქვამია ერთობლივ განცხადებაში. სრულად... წყარო: socialjustice.org.ge

თბილისი. საქართველოს სტრატეგიული კვლევებისა და განვითარების ცენტრი (CSRDG) აქვეყნებს ლელა ხოფერიას ბლოგპოსტს: „კორპორაციული სოციალური პასუხისმგებლობა: ცოტა ისტორია და ცოტაც - პრეისტორია“. მასალაში გაეცნობით კორპორაციული პასუხისმგებლობის ისტორია, სად და როდის ჩამოყალიბდა ეს ცნება და აქვს თუ არა CSR-ს დაბადების დღე. „თავიდანვე უნდა გავამხილო გულდასაწყვეტი ამბავი, რომ დაბადების დღე CSR-ს არ აქვს, არ არსებობს ერთი კონკრეტული დღე და წელი, როდესაც შეგვიძლია დიდი ტორტი გამოვაცხოთ და საზეიმოდ აღვნიშნოთ კორპორაციული პასუხისმგებლობის საიუბილეო თარიღი“, აღნიშნულია ბლოგპოსტში. სრულად... ბლოგი შექმნილია CSRDG-ის მიერ, ევროკავშირისა და კონრად ადენაუერის ფონდის (KAS) მხარდაჭერით. წყარო: csrblog.ge

თბილისი. 28 ივნისს, რონდელის ფონდში საქართველო-ევროკავშირის სამოქალაქო საზოგადოების პლატფორმის  რიგით მეცხრე შეხვედრა გაიმართა. პლატფორმა დაარსებულია საქართველოსა და ევროკავშირს შორის ასოცირების შესახებ შეთანხმების 412 მუხლის თანახმად. მისი მიზანია შეთანხმების მონიტორინგი და რეკომენდაციების შემუშავება და მიწოდება ევროკავშირსა და საქართველოს თანამშრომლობის უმაღლესი დონის ინსტიტუტებისთვის, მთავრობებისთვის, პარლამენტებისთვის. შეხვედრაზე მიიღეს ერთობლივი განცხადება. სრულად... წყარო: ორგანიზაციის გვერდი სოციალურ ქსელში

თბილისი. არასამთავრობო ორგანიზაციებმა შეიმუშავეს სამოქმედო გეგმა, რომელიც შეიძლება ადვილად განხორციელდეს 2022 წლის ბოლომდე, პოლიტიკური ნების არსებობის შემთხვევაში. სამოქმედო გეგმა შეიცავს კრიტიკულად მნიშვნელოვანი რეფორმების აბსოლუტურ მინიმუმს, რაც აუცილებელია კანდიდატის სტატუსის მინიჭებისთვის. წაიკითხეთ გეგმაზე სრულად... წყარო: transparency.ge

თბილისი. მოძრაობა „შინ ევროპისკენ“ უკიდურეს შეშფოთებას გამოთქვამს ხელის შეშლის ძალადობრივ ფაქტებთან დაკავშირებით, რომელსაც ადგილი აქვს მოძრაობის წევრებისა და მხარდამჭერების რეგიონებში მოსახლეობასთან მიმდინარე შეხვედრების დროს. „მოვუწოდებთ მმართველ პარტიას შეწყვიტოს მათთვისვე კონტრპროდუქტიული პროვოკაციები, რაც უკიდურესად აზიანებს ქვეყნის რეპუტაციას. მოძრაობა „შინ ევროპისკენ“ მკაფიოდ აცხადებს, რომ ერთგულია მხოლოდ და მხოლოდ შეკრების მშვიდობიანი ფორმების და მოუწოდებს სამართალდამცავებს, უზრუნველყონ მშვიდობიანი შეკრების თავისუფლება და ადგილზევე აღკვეთონ პროვოკაციები. მსგავსი წინააღმდეგობა, კიდევ უფრო მეტ მოტივაციას გვძენს და გვარწმუნებს იმაში, რომ სწორ საქმეს ვემსახურებით, რომელსაც თანმიმდევრულად და გეგმაზომიერად გავაგრძელებთ“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. სოციალური სამართლიანობის ცენტრის ინფორმაციით, ორგანიზაციამ მნიშვნელოვანი სასამართლო დავა მოიგო, რომელიც მარნეულის მუნიციპალიტეტის ბიუჯეტიდან ადგილობრივი ეპარქიის დაფინანსების საკითხს უკავშირდება.  „ამ დავას სოციალური სამართლიანობის ცენტრი ადგილობრივი აქტივისტის სამირა ბაირამოვას და სსიპ სრულიად საქართველოს მუსლიმთა უმაღლესი სასულიერო სამმართველოს სახელით 2019 წლიდან აწარმოებს. სასამართლომ ბათილად სცნო მარნეულის მუნიციპალიტეტის საკრებულოს დადგენილების ის ნორმა, რომლის თანახმად რელიგიური საქმიანობის დაფინანსებისთვის მუნიციპალიტეტის ბიუჯეტიდან გამოყოფილი თანხა (400 000 ლარი) სრულად გადაეცემოდა მხოლოდ მარნეულისა და ჰუჯაბის ეპარქიას. სასამართლო დაფინანსების ეს წესი დისკრიმინაციულად მიიჩნია. ეთნიკური უმცირესობებით კომპაქტურად დასახლებულ რეგიონებში, მხოლოდ 1 კონფესიისთვის დიდი ოდენობით საბიუჯეტო სახსრების რეგულარული გადაცემა, უთანასწორობის პრაქტიკას და განცდას ქმნის და მას გამაუცხოებელი სოციალური ეფექტი შეიძლება ჰქონდეს მუნიციპალიტეტში მცხოვრები არადომინანტური ეთნიკური ჯგუფებისთვის“, ნათქვამია ორგანიზაციის ვებგვერდზე. სრულად...  წყარო: socialjustice.org.ge

თბილისი. მედიის ადვოკატირების კოალიცია შეშფოთებულია მმართველი პარტიის დეპუტატების მხრიდან ჩადენილი ძალადობის ფაქტით. გავრცელებული ინფორმაციით, გუშინ, 2022 წლის 30 ივნისს კრიტიკული მაუწყებლის „ტელეკომპანია პირველის“ დირექტორს ვატო წერეთელს ამერიკის დამოუკიდებლობის დღისადმი მიძღვნილი ღონისძიებისას საელჩოს ტერიტორიაზე თავს დაესხნენ „ქართული ოცნების“ დეპუტატები. მედიის ადვოკატირების კოალიცია შეშფოთებულია მმართველი პარტიის დეპუტატების მხრიდან ჩადენილი ძალადობის ფაქტით, ასევე, ძალადობრივი ქმედებების შემდეგი შეფასებებით, რომელიც კიდევ უფრო აუარესებს მედიაგარემოს და საშიშს ხდის ქვეყანაში ჟურნალისტურ საქმიანობას. კოალიცია მოუწოდებს მმართველ პარტიას დაუყოვნებლივ დააკისროს პოლიტიკური პასუხისმგებლობა მათ წევრებს და გააკეთოს სათანადო განცხადებები მედიის წამომადგენლებზე გახშირებული თავდასხმების შესაჩერებლად. სრულად... წყარო: კოალიციის გვერდი სოციალურ ქსელში

იმერეთი. ადგილობრივი დემოკრატიის სააგენტო საქართველომ (LDA Georgia) პროექტის „სამოქალაქო საზოგადოების ინიციატივა“ ფარგლებში, სამიზნე მუნიციპალიტეტებში არსებული სამოქალაქო საზოგადოებრივი ორგანიზაციის წარმომადგენლებისა და აქტიური მოქალაქეებისათვის ჩაატარა ტრენინგი ადვოკატირების როლის, მნიშვნელობის, ეტაპებისა და მეთოდების  შესახებ. ტრენინგები ტარდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

დაახლოებით ორი წლის წინათ ხობში, სოფელ ხეთაში საზოგადოებრივმა ორგანიზაციამ „ნიკოს ეზომ“ დაიწყო მუშაობა. იგი ადგილობრივი ახალგაზრდებისთვის არაფორმალური განათლებისა და საინტერესო შეხვედრების ადგილად იქცა. ინციატივა ნიკო ბაძაღუას და მის მეგობრებს ეკუთვნით.  ნიკო ხობის სოფელ ხეთაში დაიბადა და გაიზარდა, ბავშვობიდან ყოველთვის ჰქონდა სურვილი რაც შეიძლება მეტი ცოდნა და გამოცდილება მიეღო, მაგრამ სოფლის გარემო ამის შესაძლებლობას არ იძლეოდა. წლების შემდეგ, სწორედ, ეს გახდა ახალგაზრდული საგანმანათლებლო სივრცის ნიკოს ეზოს დაფუძნების საფუძველი, სადაც ახალგაზრდები შეძლებდნენ სხვადასხვა მიმართულებით ცოდნის გაღრმავებას.  „2020 წელს გადავწყვიტე, სოფელში, წინაპრების სახლის პირველი სართული შეხვედრების ოთახად გადამეკეთებინა. ყოფილიყო სივრცე, სადაც სიახლეს გაიგებდნენ ახალგაზრდები. გარკვეული ხედვა მქონდა, რა თქმა უნდა, მაგრამ უმეტესწილად ენთუზიაზმით და საკუთარი სახსრებით შევუდექი იდეის განხორციელებას. თავიდან მეგობრები ჩამოდიოდნენ თბილისიდან, ბათუმიდან, რუსთავიდან, რომლებიც თავიანთ საქმეში პროფესიონალები იყვნენ და გამოცდილებას უზიარებდნენ ახალგაზრდებს ისეთ თემებზე, როგორიცაა: საზოგადოებასთან ურთიერთობა, მეწარმეობის საფუძვლები, ადამიანის უფლებები, ფოტოგრაფია და ა.შ. ამ ყველაფერმა იმდენად დიდი ენერგია მოგვცა, რომ გადავწყვიტე დონორი ორგანიზაციებისთვის მიმემართა“, ამბობს ნიკო ბაძაღუა.  რამდენიმე პროექტის განხორციელებამ საშუალება მისცა სხვადასხვა ექსპერტები მიეწვია „ნიკოს ეზოში“ და მათი ცოდნა და გამოცდილება გაეზიარებინა ახალგაზრდებისთვის. ასეთივე დატვირთულია 2022 წელი, ამ ეტაპზე გადაწყვიტეს საკუთარი შემოსავლებიც მიაშველონ აქტივობებს – „ნიკოს ეზოს“ შიდა და გარე სივრცე ღონისძიებებისთვის სხვა ორგანიზაციებს დაუთმონ და შემოსული თანხა ორგანიზაციის განვითარებას მოახმარონ.  ხობი, ულამაზესი სოფელი ხეთა და „ნიკოს ეზო“ თქვენ გელოდებათ...

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. საერთაშორისო გამჭვირვალობა - საქართველო, 24 ივნისს თბილისში გამართული ფართომასშტაბიანი აქციის შესახებ წერს. აქცია მას შემდეგ გაიმართა, რაც საქართველომ  ევროკავშირის წევრი ქვეყნის კანდიდატის სტატუსის მიღების შანსი დაკარგა. ორგანიზაციის ცნობით, ევროკავშირი დაგვპირდა, რომ კანდიდატის სტატუსს მივიღებთ, თუ 2022 წლის ბოლომდე საქართველო რეფორმების 12-პუნქტიან გეგმას შეასრულებს. „ჩვენ არ გვჯერა, რომ მთავრობა, რომელმაც არაერთხელ დაარღვია საერთაშორისო პარტნიორებისთვის მიცემული პირობა, ამ რეფორმებს გაატარებს. ამიტომ, 24 ივნისის აქციაზე საერთო სახალხო მოძრაობამ  შინ ევროპისკენ მოვითხოვეთ:  საქართველოს მთავრობის გადადგომა ირაკლი ღარიბაშვილის მეთაურობით, რომელმაც ევროპული საბჭოს საბოლოო გადაწყვეტილებამდე ყველაფერი გააკეთა იმისათვის, რომ საქართველოს ევროკავშირის წევრობის სტატუსი არ მიეღო - სიტყვიერ შეურაცხყოფას აყენებდა ევროპელ დიპლომატებს და ჩვენი ქვეყნის გულშემატკივრებს, ამძაფრებდა ქვეყნის შიგნით პოლიტიკურ სიტუაციას, აზიანებდა ქვეყნის საერთაშორისო იმიჯს და რეფორმებისთვის არანაირ მზაობას არ აჩვენებდა. მოვითხოვეთ ბიძინა ივანიშვილისგან, დათმოს აღმასრულებელი ძალაუფლება და ის კონსტიტუციის ფარგლებში გადასცეს „ეროვნული თანხმობის მთავრობას - ევროკავშირისთვის“, რომელიც გარდამავალ ეტაპზე მართავს სახელმწიფოს, შეასრულებს 12-ვე პუნქტს და უზრუნველყოფს საქართველოს ევროკავშირის წევრობის კანდიდატის სტატუსის მიღებას“, ნათქვამია განცხადებაში. სრულად...  წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოება იუსტიციის უმაღლესი საბჭოს არაეფექტიანად საქმიანობისა და კანონმდებლობით მისთვის დაკისრებულ მოვალეობათა არაჯეროვანი „შესრულების პრაქტიკას ეხმაურება. „ბოლო პერიოდში საბჭოს მხრიდან გახშირდა ჩანიშნული სხდომების გაურკვეველი მიზეზებით გადადების შემთხვევები. პრობლემურია სხდომების დღის წესრიგის ზოგადი სახით ფორმულირება და მათი კანონით დადგენილ ვადაში გამოუქვეყნებლობაც. მსგავსი პრაქტიკა მნიშვნელოვნად ართულებს დამკვირვებელი ორგანიზაციების საქმიანობას და ნეგატიურად აისახება საბჭოს ანგარიშვალდებულებისა და მისი საქმიანობის გამჭვირვალობის ხარისხზე. მოვუწოდებთ საქართველოს იუსტიციის უმაღლეს საბჭოს, კეთილსინდისიერად განახორციელოს დაკისრებული ფუნქციები და ზედმიწევნით შეასრულოს კანონმდებლობით დადგენილი მოთხოვნები. კერძოდ: სხდომის გამართვამდე არანაკლებ 3 სამუშაო დღით ადრე, იუსტიციის უმაღლესმა საბჭომ საკუთარ ვებგვერდზე გამოაქვეყნოს ინფორმაცია სხდომის გამართვის თარიღისა და სხდომის დღის წესრიგის თაობაზე; აღმოიფხვრას სხდომების რეგულარულად გადადების მანკიერი პრაქტიკა და სხდომის გადადების მიზეზების შესახებ ინფორმაცია გამოქვეყნდეს წინასწარ, გონივრულ ვადაში; სხდომების დღის წესრიგში განსახილველი საკითხების შესახებ ინფორმაცია აისახოს სრულყოფილად; უზრუნველყოფილ იქნას სხდომების პირდაპირი ტრანსლირება“. სრულად... წყარო: socialjustice.org.ge

გურია. კამპანია „ეს ქვეყანა შენია“-ს ფარგლებში, სამოქალაქო საზოგადოების ინსტიტუტის ორგანიზებით, გურიის ჰაბმა ახალგაზრდებთან შეხვედრას უმასპინძლა. შეხვედრაზე მოწვეულმა სტუმრებმა ლევან ბუთხუზმა და გია ჭანტურიამ სამოქალაქო საზოგადოების ღირებულებებსა და სამოქალაქო აქტივიზმის მნიშვნელობაზე ისაუბრეს. კამპანიას „ეს ქვეყანა შენია“ ახორციელებს სამოქალაქო საზოგადოების ინსტიტუტი, ევროკავშირისა და კონრად ადენაუერის ფონდის მხარდაჭერით, პროექტის „სამოქალაქო საზოგადოებიც ინიციატივა“ ფარგლებში. იხილეთ ტელეკომპანია GURIA TV-ის სიუჟეტი... სრულად... წყარო: პროექტის გვერდი სოციალურ ქსელში

იმერეთი. ადგილობრივი დემოკრატიის სააგენტო საქართველო (LDA) გიზიარებთ ვიდეოს სამოქალაქო საზოგადოების რეგიონული ფორუმის შესახებ, რომელიც გაიმართა იმერეთის რეგიონული ჰაბის - ადგილობრივი დემოკრატიის სააგენტო საქართველოსა (LDA Georgia) და განათლების განვითარებისა და დასაქმების ცენტრის (EDEC) ორგანიზებით, აკაკი წერეთლის სახელმწიფო უნივერსიტეტში.  ფორუმის მიზანი იყო მოხალისეობის კულტურის პოპულარიზაცია, პოტენციური დონორების მოზიდვა და იმერეთის მხარეში სამოქალაქო საზოგადოების გაძლიერება. შეხვედრა გაიმართა პროექტის ,,სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში, რომელიც ხორციელდება ევროკავშირისა (EU) და კონრად ადენაუერის ფონდის (KAS) მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. კოალიცია დამოუკიდებელი და გამჭვირვალე მართლმსაჯულებისთვის განცხადებას ავრცელებს და მიიჩნევს, რომ კანდიდატის სტატუსის მისაღებად აუცილებელია სასამართლოს რეფორმა. „ევროკომისიის მიერ მიღებული დასკვნების თანახმად, რომელზეც საბოლოო გადაწყვეტილება ევროპულმა საბჭომ უნდა მიიღოს, უკრაინამ - 7, მოლდოვამ – 10, საქართველომ კი - 12 პირობა უნდა შეასრულოს. საქართველოსთვის დაწესებულ პირობებს შორის განსაკუთრებული ადგილი სასამართლოს რეფორმას უჭირავს. მიგვაჩნია, რომ ვენეციის კომისიის დასკვნა, ადგილობრივი თუ საერთაშორისო აქტორების კრიტიკა და ევროკომისიის მიერ საკუთარ დასკვნაში დასახელებული პირობები მკაფიოდ მიუთითებს მართლმსაჯულების ფუნდამენტური რეფორმის აუცილებლობაზე. ცვლილებების საჭიროება განსაკუთრებით კრიტიკულია ევროპული ინტეგრაციის მიმდინარე, უმნიშვნელოვანესი პროცესების გათვალისწინებით, რამდენადაც მართლმსაჯულების რეფორმა ამ პროცესის წარმატების ერთ-ერთი ფუნდამენტური წინაპირობაა“, ნათქვამია განცხადებაში. სრულად...  წყარო: transparency.ge