აჭარა. არასამთავრობო ორგანიზაციებმა „ცვლილებები თანაბარი უფლებებისათვის“ და „კოალიცია დამოუკიდებელი ცხოვრებისათვის“ ევროკავშირის პროექტის, „სამოქალაქო საზოგადოება შეზღუდული შესაძლებლობის მქონე პირთა უფლებებისთვის საქართველოში“ ფარგლებში, ბათუმში ევროპის დამოუკიდებელი ცხოვრების დღისადმი მიძღვნილ პანელურ დისკუსიას უმასპინძლეს. „ღონისძიების მთავარი თემა „შეზღუდული შესაძლებლობის მქონე პირთა დამოუკიდებელი ცხოვრება, გამოწვევები და მხარდამჭერი სერვისები“ იყო. შეხვედრაზე შეზღუდული შესაძლებლობის მქონე აქტივისტებმა და დამოუკიდებელი ცხოვრების ცენტრების ლიდერებმა განიხილეს ის გამოწვევები, რომელსაც შშმ პირები ხვდებიან და სერვისები, რომლებსაც აღნიშნული ცენტრები უზრუნველყოფენ“. სრულად... წყარო: eu4georgia.eu

სამცხე-ჯავახეთი. კავკასიის გარემოსდაცვითი არასამთავრობო ორგანიზაციების ქსელის (CENN) და საქართველოში „მერსი ქორფს“-ის წარმომადგენლობას შორის ნინოწმინდის მუნიციპალიტეტში მეწარმეობის განვითარების მიზნით უერთიერთთანამშრომლობის მემორანდუმი გაფორმდა.  ასევე, ნინოწმინდის ინოვაციური ცოდნის ჰაბში გაიმართა საინფორმაციო სესია  „ახალგაზრდული მეწარმეობა სოფლის განვითარებისთვის“ (RDYE) პროექტის შესახებ. სრულად... წყარო: ორგანიზაციის გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

2022 წლის 1 მაისიდან ამოქმედდა საქართველოს მთავრობის დადგენილებით განსაზღვრული ცვლილებები. საჯარო რეესტრის ეროვნული სააგენტოს მიერ გაწეული მომსახურების საფასურის განაკვეთებთან, საფასურის გადახდევინების წესებთან და მომსახურების ვადებთან დაკავშირებით. ცვლილებები პირდაპირ ეხება მეწარმე სუბიექტისა და არასამეწარმეო (არაკომერციული) იურიდიული პირისთვის რელევანტური მომსახურებების ღირებულებებს და აქამდე არსებული ფასების ზრდაში გამოიხატება. მათ შორის: მეწარმე სუბიექტისა და არასამეწარმეო (არაკომერციული) იურიდიული პირის რეგისტრაციის, რეგისტრირებულ მონაცემებში ცვლილებებისა და მათი შეწყვეტის რეგისტრაციის საფასური, თუ მოცემული ხორციელდება 1 სამუშაო დღის ვადაში, განისაზღვრება 200 ლარით (ნაცვლად 100 ლარისა), იმავე მომსახურების დაჩქარებული წესით მიღების (იმავე სამუშაო დღეს) საფასური კი 400 ლარი (ნაცვლად 200 ლარისა) გახდა. არასამეწარმეო (არაკომერციული) იურიდიული პირებისა და უცხო ქვეყნის არასამეწარმეო (არაკომერციული) იურიდიული პირის ფილიალის (წარმომადგენლობის) რეგისტრირებულ მონაცემებში სუბიექტის ელექტრონული ფოსტის მისამართის, ტელეფონის ნომრის რეგისტრაციის, ასევე რეგისტრირებული მონაცემის ცვლილების ან შეწყვეტის რეგისტრაციის ღირებულება – 1 სამუშაო დღის ვადაში – 26 ლარით (ნაცვლად 20 ლარისა), ხოლო იმავე მომსახურების დაჩქარებული წესით მიღების საფასური 75 ლარით (ნაცვლად 50 ლარისა) განისაზღვრა. მეწარმეთა და არასამეწარმეო (არაკომერციული) იურიდიული პირების რეესტრში რეგისტრირებული უფლების სუბიექტისა და ობიექტის საიდენტიფიკაციო მონაცემების ცვლილების რეგისტრაცია – 1 სამუშაო დღის ვადაში უსასყიდლოა, ხოლო იმავე მომსახურების დაჩქარებული წესით მიღების (იმავე სამუშაო დღეს) საფასური 75 ლარი გახდა (ნაცვლად 50 ლარისა).  საჯარო რეესტრიდან ამონაწერის მომზადება – 1 სამუშაო დღის ვადაში – 20 ლარი ეღირება (ნაცვლად 15 ლარისა), ხოლო თუ მოთხოვნა განხორციელდა ელექტრონულად, ინტერნეტის საშუალებით მომსახურების საფასურია 13 ლარი (ნაცვლად 10 ლარისა). დაჩქარებული წესით კი ამ მომსახურების საფასური, შესაბამისად, 75 ან 52 ლარი იქნება (ნაცვლად 50 ან 40 ლარისა). გაეცანით დეტალურად ცვლილებებს...

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით,  2 მაისს საქართველოს პარლამენტის თბილისის სასახლეში მოქალაქეთა განახლებული მისაღები გაიხსნა. „მოქალაქეთა მისაღები არის საქართველოს პარლამენტის მოქალაქეთა ჩართულობის ცენტრის კონცეფციის შემადგენელი ნაწილი. მოქალაქეთა განახლებული მისაღები მიზნად ისახავს საპარლამენტო საქმიანობაში მოქალაქეთა ჩართულობის ხელშეწყობას და საპარლამენტო სერვისების მოქალაქეთათვის „ერთი ფანჯრის“ პრინციპით მიწოდებას“. სრულად... წყარო: idfi.ge

სამცხე-ჯავახეთი. გრძელდება ღია კარის დღეები, რომლის ფარგლებში ახალციხეში მცხოვრები ახალგაზრდები ამჯერად ახალციხის ახალგაზრდული ცენტრის, მეცხრე არხის და დემოკრატ მესხთა კავშირის (UDM) წარმომადგენლებს შეხვდნენ. პროექტი ხორციელდება, პროექტ Civil Society STAR Initiativeს ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების წარმომადგენლები საქართველოს პრემიერ-მინისტრს მიმართავენ გასაჯაროვდეს ევროკავშირის კითხვარზე მომზადებული პასუხები, ან წარმოადგინონ არგუმენტი, საქართველოს კანონმდებლობით განსაზღვრული რა საფუძველით ხდება ინფორმაციის გასაიდუმლოება. „ბოლო კვლევის მიხედვით, საქართველოს მოსახლეობის 88% მხარს უჭერს ქვეყნის ევროკავშირში გაწევრიანებას. აღნიშნულის გათვალისწინებით, ხელისუფლებამ უნდა უზრუნველყოს პროცესის გამჭვირვალობა, ღიაობა და მასში დაინტერესებული მხარეების ჩართულობა“, ნათქვამია ერთობლივ განცხადებაში. სრულად... წყარო: transparency.ge

სამცხე-ჯავახეთი. სამცხე-ჯავახეთის სამოქალაქო საზოგადოების ორგანიზაციები განცხადებით მიმართავენ საქართველოს მთავრობას და საქართველოში მოქმედ საერთაშორისო ორგანიზაციებს. „ჩვენ, სამცხე-ჯავახეთის სამოქალაქო საზოგადოების ორგანიზაციები, შეშფოთებით ვადევნებთ თვალს რუსეთის აგრესიას უკრაინაში და მხარს ვუჭერთ უკრაინელ ხალხს ამ მძიმე ბრძოლაში.  რუსეთის აგრესია, გარდა იმისა, რომ საერთაშორისო მშვიდობას, თავისუფლებასა და დემოკრატიული განვითარების ღირებულებებს უქმნის საფრთხეს, წარმოადგენს კონკრეტულად ჩვენი რეგიონისთვის მნიშვნელოვან გამოწვევას. კერძოდ, ამ ომმა კიდევ უფრო გამოააშკარავა სამცხე-ჯავახეთის წინაშე მდგარი რისკები, რომლებიც განპირობებულია ჩვენი რეგიონის ეკონომიკური, ფინანსური და საინფორმაციო დამოკიდებულებით რუსეთზე: რეგიონიდან ბევრი ადამიანი წლებია ცხოვრობს რუსეთში და იქედან ფინანსური გადმორიცხვებით არჩენს ოჯახებს; ბევრიც რუსეთში სეზონურ სამუშაოზე მიდიოდა. ასევე, რუსეთის პროპაგანდისტული მედია საშუალებები რჩება ინფორმაციის მიღების მნიშვნელოვან წყაროდ რეგიონში.  ზემოაღნიშნულ რისკებზე ჩვენ ადრეც არაერთხელ მივუთითებდით. ახლა კი, საერთაშორისო საზოგადოების მიერ რუსეთისთვის დაწესებული სანქციების გათვალისწინებით, დიდი ალბათობით, საგრძნობლად შემცირდება რუსეთიდან გადმორიცხვები, ხოლო იქ წასული მოსახლეობის ნაწილი დაუბრუნდება თავის რეგიონს. მთლიანობაში, მოსალოდნელია, რომ სამცხე-ჯავახეთში უმუშევრობის დონე გაიზარდოს და სოციალური ფონი გაუარესდეს.  ზემოთქმულიდან გამომდინარე, ჩვენ, სამცხე-ჯავახეთის სამოქალაქო საზოგადოების ორგანიზაციები, საქართველოს მთავრობას და საქართველოში მოქმედ საერთაშორისო ორგანიზაციებს მოვუწოდებთ, გაითვალისწინონ აღნიშნული რისკები, აქციონ ისინი შესაძლებლობებად და გამოიყენონ ეს ფანჯარა რეგიონში მცხოვრები მოქალაქეების საკეთილდღეოდ“, ნათქვამია განცხადებაში. სრულად... წყარო: დემოკრატ მესხთა კავშირის გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

მცხეთა-მთიანეთი. მცხეთა-მთიანეთის ჰაბის ორგანიზებით, შეხვედრა გაიმართა მცხეთა-მთიანეთის სამოქალაქო საზოგადოების ქსელის წევრებისათვის და რეგიონის სათემო და სამოქალაქო საზოგადოების ორგანიზაციებისათვის. შეხვედრაზე განიხილეს ორგანიზაციის სტრატეგიული დაგეგმარების ასპექტები და ქსელური მუშაობის საკითხები. შეხვედრას გაუძღვა მოწვეული ექსპერტი, პიარის სპეციალისტი, საკონსულტაციო კომპანია „ჯეპრას“ უფროსი კონსულტანტი და ილიაუნის ასოცირებული პროფესორი კახა მაღრაძე. სამუშაო შეხვედრა ჩატარდა პროექტის „სამოქალაქო საზოგადოების ინიციატივის“ ფარგლებში, ევროკავშირისა და კორნად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

იმერეთი. 19 აპრილს, ქუთაისში, იმერეთის რეგიონული ჰაბის - ადგილობრივი დემოკრატიის სააგენტო საქართველოს (LDA Georgia) ორგანიზებით გაიმართა საჯარო შეხვედრა „მონაწილეობრივი ახალგაზრდობის პოლიტიკა ადგილობრივ დონეზე“.  შეხვედრა გაიმართა პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში, რომელიც ხორციელდება ევროკავშირისა (EU) და კონრად ადენაუერის ფონდის (KAS) მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. პარტნიორ უნივერსიტეტებს საუნივერსიტეტო კურსის დამხმარე სასწავლო რესურსი „სამოქალაქო საზოგადოების როლი“ გადაეცათ. სახელმძღვანელო მომზადდა კონსულტაციისა და ტრენინგის ცენტრის მიერ შემუშავებული სამოქალაქო საზოგადოების როლის შესახებ საუნივერსიტეტო კურსის დამხმარე მეთოდურ რესურსად. აღნიშნული კურსი 7 უნივერსიტეტში 2019 წლიდან ხორციელდება. სრულად... საუნივერსიტეტო კურსი მიმდინარეობს პროექტის „სამოქალაქო საზოგადოების ინიციატივა“ ფარგლებში, რომელიც ხორციელდება ევროკავშირისა და კონრად ადენაუერის ფონდის მხარდაჭერით. წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტთან (IDFI) პარტნიორობით და მონაწილეობით, განახლდა ევროპის საბჭოს სახელმძღვანელო ღია ადგილობრივი მმართველობისა და საჯარო სამსახურში ეთიკის წესების შესახებ.  სახელმძღვანელო მოიცავს ინფორმაციას საჯარო სამსახურში ეთიკის წესების, ანგარიშვალდებულების, გამჭვირვალობისა და მოქალაქეთა მონაწილეობის მექანიზმების თაობაზე, მიმოიხილავს შესაბამის ადგილობრივ კანონმდებლობას, ინსტიტუციურ მექანიზმებსა და კარგ პრაქტიკას. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: ციფრული უფლებები ღია მმართველობის პარტნიორობის ფარგლებში. „ციფრული ტექნოლოგიების როლის ზრდა ღია მმართველობის პროცესში არა მხოლოდ ხელს უწყობს ღიაობისა და გამჭვირვალობის სტანდარტის გაუმჯობესებას, არამედ აძლიერებს კარგი მმართველობის სტანდარტსა და დემოკრატიულ პროცესებს სახელმწიფოში. ინოვაციური ჩართულობის მექანიზმების განვითარება და იმპლემენტაცია დღის წესრიგში უფრო და უფრო დიდ მასშტაბებს იკავებს, შესაბამისად, ამ მიმართულებით ამბიციური ვალდებულების აღება და ეროვნულ სამოქმედო გეგმებში გათვალისწინება თითოეული OGP-ის წევრი სახელმწიფოს, მათ შორის, საქართველოს პრიორიტეტი უნდა გახდეს“, ნათქვამია ბლოგპოსტში. სრულად... წყარო: idfi.ge

თბილისი. USAID/Georgia-ს სამოქალაქო საზოგადოების ჩართულობის პროგრამის ინფორმაციით, ორბელიანი მეტი-ს პლატფორმაზე 16 ახალი სამოქალაქო ინიციატივისთვის თანხების შეგროვების კამპანია დაიწყო. „თუკი იდეის ავტორები პროექტებისთვის საჭირო თანხის 30%-ს მოქალაქეების შემოწირულობებით შეაგროვებენ, თანხის 70%-ს ისინი USAID/Georgia-ს სამოქალაქო საზოგადოების ჩართულობის პროგრამის დაფინანსებით მიიღებენ“. სრულად... წყარო: ორგანიზაციის გვერდი სოციალურ ქსელში

თბილისი. გაეროს განვითარების პროგრამა (UNDP) და დიდი ბრიტანეთის მთავრობა ხელს უწყობენ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს სერვისის დიზაინისა და მიწოდების გაუმჯობესებაში. 15 აპრილს გამართულ შეხვედრაზე სამოქალაქო საზოგადოებისა და დონორი ორგანიზაციების წარმომადგენლებმა, და ექსპერტებმა ექვსთვიანი პროექტის შედეგები და მიღწევები შეაჯამეს. ინიციატივა განხორციელდა ინოვაციებისა და რეფორმების ცენტრის მიერ გაეროს განვითარების პროგრამისა (UNDP) და ბრიტანეთის მთავრობის ხელშეწყობით. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა (IDFI), პროექტის „სოლიდარობის ბრენდინგი - შიდა ქართლის რეგიონში, ოკუპირებული ტერიტორიების ახლოს მცხოვრები მეწარმეების ხელშეწყობის“ განხორციელება დაიწყო. 13 აპრილს, პროექტის ფარგლებში, ინფორმაციის თავისუფლების განვითარების ინსტიტუტმა (IDFI), საქართველოს ფერმერთა ასოციაციასთან (GFA) ერთად გორისა და ქარელის რაიონებში, ოკუპირებულ ტერიტორიებთან ახლოს მცხოვრებ მეწარმეებთან საინფორმაციო ხასიათის შეხვედრა გამართა და მათ სამეწარმეო საქმიანობას გაეცნო. სრულად... წყარო: idfi.ge

13 აპრილს, შიდა ქართლის ჰაბში გაიმართა პირველი გაცნობითი ხასიათის შეხვედრა სამოქალაქო საზოგადოების ინსტიტუტის გორის ოფისის წარმომადგენლებსა და გორის სამოქალაქო ბიუჯეტის ახალგაზრდული კლუბის წევრებს შორის. შეხვედრას ასევე ესწრებოდა გორის სტრატეგიული განვითარების სააგენტოს წარმომადგენელი.  შეხვედრაზე კლუბის წევრებს შესაძლებლობა ჰქონდათ გაცნობოდნენ კლუბის საქმიანობის ფარგლებში დაგეგმილ აქტივობებს და კონკურსის პირობებს. სამოქალქო ბიუჯეტის კლუბის საქმიანობა ხორციელდება კონკურსის ფარგლებში და რამდენიმე ეტაპისგან შედგება. პირველი ეტაპი მოიცავს სამოქალაქო ბიუჯეტის კლუბის ჩამოყალიბებას და წევრების შესაძლებლობების გაძლიერებას. მეორე ეტაპზე კლუბის წევრები მიიღებენ მონაწილეობას სამოქალაქო ბიუჯეტის პროგრამის საინფორმაციო კამპანიაში და ასევე ტერიტორიულ ერთეულებში მოიკვლევენ საჭიროებებს, პროექტების წერის პროცესში მოსახლეობას გაუწევენ მენტორობას. მესამე ეტაპზე გაიმართება კონკურსი გამარჯვებული პროექტების გამოსავლენად; კონკურსისთვის წარდგენილი პროექტები უნდა ემსახურებოდეს თემში სოციალური პრობლემების მოგვარებას, ახალგაზრდული და კრეატიული იდეების განხორცილებას.  კამპანია განხორციელდება 2022 წლის აპრილ-ოქტომბერში.  კამპანია ხორციელბედა სამოქალაქო საზოგადოების ინსტიტუტის მიერ, პროექტის – „ადგილობრივი განვითარების აქტორებს შორის მყარი კავშირების დამყარება“ (მეორე ფაზა) ფარგლებში, გერმანული ორგანიზაცია „პური მსოფლიოს“ მხარდაჭერითა და გორის მუნიციპალიტეტთან თანამშრომლობით.

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. კოალიცია მედიის ადვოკატირებისთვის საპარლამენტო უმცირესობასა და უმრავლესობას შეთანხმებისკენ მოუწოდებს. „საზოგადოებრივი მაუწყებლის სამეურვეო საბჭოს კანდიდატების შერჩევა შესაძლოა ჩიხში შევიდეს, რადგან პარლამენტში ჯერჯერობით არ ჩანს შეთანხმება ომბუდსმენის, საპარლამენტო უმცირესობისა და უმრავლესობის მიერ წარდგენილ კანდიდატებზე. მოვუწოდებთ საპარლამენტო უმცირესობას, ყველაფერი გააკეთოს იმისათვის, რომ მათ მიერ წარდგენილი კანდიდატის მხარდაჭერა მოიპოვოს, ხოლო საპარლამენტო უმრავლესობამ უნდა შეძლოს შეთანხმება ომბუდსმენისა და ოპოზიციის მიერ წარდგენილ კანდიდატებზე“, ნათქვამია განცხადებაში. სრულად... წყარო: isfed.ge

თბილისი. „საერთაშორისო გამჭირვალობა-საქართველომ“ აშშ-ის ელჩს, კელი დეგნანისა და საელჩოს წარმომადგენლების შეხვედრას უმასპინძლა სამოქალაქო საზოგადოებრივი ორგანიზაციების ლიდერებთან. შეხვედრაზე საუბარი შეეხო რუსეთ-უკრაინის ომის ფონზე საქართველოში არსებულ ვითარებას და ევროინტეგრაციის საკითხებს. სრულად... წყარო: ორგანიზაციის გვერდი სოციალურ ქსელში

თბილისი. ღია საზოგადოების ფონდის მხარდაჭერით, საქართველოს დემოკრატიული ინიციატივა, საქართველოს ახალგაზრდა იურისტთა ასოციაცია, სოციალური სამართლიანობის ცენტრი, უფლებები საქართველო და ადამიანის უფლებათა ცენტრი/Human Rights Center ახორციელებენ ერთობლივ პროექტს „იურიდიული დახმარების ქსელი აქტივისტებისათვის“. პროექტის მოკლევადიანი მიზანია სამოქალაქო აქტივისტების დაცვა უკანონო დევნისგან, რაც, თავის მხრივ, უზრუნველყოფს სამოქალაქო აქტივიზმისა და შეკრებისა და გამოხატვის თავისუფლების რეალიზებისთვის უფრო ხელსაყრელ გარემოს.  ბლოგპოსტში წარმოდგენილია ორგანიზაციების მიერ წარმოებული საქმეების სტატისტიკა და საქმიანობის ძირითადი შედეგები. სრულად... წყარო: ორგანიზაციის გვერდი სოციალურ ქსელში