იმერეთი. 30 სექტემბერს საიას ქუთაისის ფილიალში გაიმართა არასამთავრობო ორგანიზაციების ყოველთვიური საინფორმაციო შეხვედრა, რომელშიც მონაწილეობდნენ რეგიონალური მედიის და არასამთავრობო ორგანიზაციების წარმომადგენლები. შეხვედრის მონაწილეებმა ისაუბრეს სექტემბრის თვეში განხორციელებული აქტივობების და ოქტომბრის თვის სამუშაო გეგმების შესახებ. წყარო: ფილიალის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა განათლებისა და მეცნიერების სამინისტროში შიდა აუდიტის დეპარტამენტის მიერ მიღებულ გადაწყვეტილებასთან დაკავშირებით ადმინისტრაციული საჩივარი წარადგინა. „აღნიშნული გადაწყვეტილებით, დეპარტამენტმა არ დაადგინა თერჯოლაში, იეჰოვას მოწმეების ქრისტიანული ორგანიზაციის წინააღმდეგ, 2014 წლის ივნისის დასაწყისში, რელიგიური სიძულვილით მოტივირებულ აქციებში #2 სკოლის დირექციის, მასწავლებლების მონაწილეობისა და მათ მიერ აქციაზე მოსწავლეების ქცევის კონტროლის/ორგანიზების ფაქტი. ...განათლების სისტემაში რელიგიური ინდოქტრინაციისა და შეუწყნარებლობის პრობლემის მასშტაბის გათვალისწინებით, ვიმედოვნებთ, რომ განათლებისა და მეცნიერების სამინისტრო კანონიერ და ეფექტურ რეაგირებას მოახდენს მოცემულ საქმეზე და უზრუნველყოფს ადეკვატური პრევენციული ზომების, მათ შორის, ტოლერანტობის და დისკრიმინაციის აკრძალვის საკითხებზე თერჯოლის #2 სკოლაში სპეციალური ღონისძიებების გატარებას", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ორგანიზაცია „ახალგაზრდა ადვოკატებმა", თბილისის საქალაქო სასამართლოში, საქართველოს პარლამენტის ვიცე-სპიკერის, მურმან დუმბაძის მიმართ, სამოქალაქო სარჩელი შეიტანეს. ორგანიზაცია საქართველოს პარლამენტის წევრისგან საქმიანი რეპუტაციის შემლახველი ცნობების უარყოფას მოითხოვს.  სრულად... წყარო: barristers.ge

თბილისი. საქართველოს ახალგაზრდა იურისტთა ასოციაცია საქართველოს მთავარ პროკურორს გიორგი ბადაშვილს განცხადებით მიმართავს. რათა „დაიწყოს გამოძიება რუსთაველის გამზირზე კანონიერ მფლობელობაში არსებული ფართიდან საქართველოში ,,SONY’’- ს ოფიციალური დისტრიბუტორის გამოსახლების თაობაზე", ნათქვამია ორგანიზაციის ვებგვერდზე. განცხადება... წყარო: gyla.ge

თბილისი. კავშირმა „საფარი", ქალთა ფონდის დაფინანსებით, მოქმედ კანონმდებლობაში პროსტიტუციის რეგულირების მხრივ არსებული ხარვეზების აღმოფხვრის მიზნით სისხლის სამართლის კოდექსის ცვლილებათა პროექტი შეიმუშავა. ცვლილებათა პაკეტი ორგანიზაციამ სხვა ქვეყნების საუკეთესო პრაქტიკაზე დაყრნობით მოამზადა. ამჟამად, ორგანიზაცია მუშაობს იმაზე, რომ საკანონმდებლო ინიციატივას მხარდაჭერები გამოუჩდნენ და რამდენიმე თვეში განსახილველად პარლამენტს წარედგინოს. სრულად...  წყარო: ginsc.net

სამცხე-ჯავახეთი. ორგანიზაცია „ახალგაზრდა ადვოკატებმა" პროექტის - „ერთად ევროპული არჩევანისთვის" - რეგიონალური, დასკვნითი ღონისძიება ახალციხის მუნიციპალიტეტში გამართა. ღონისძიებაზე შეფასდა საჯარო სკოლებში, პროექტის მიმდინარეობის ოთხთვიანი პერიოდი და გამოვლინდნენ კონკურსში გამარჯვებული მოსწავლეები. სრულად... წყარო: ორგანიზაციის გვერდი სოციალურ ქსელში

კახეთი. აშშ-ს საელჩოს წარმომადგენლებმა ლაგოდეხის მუნიციპალიტეტში შეხვედრა გამართეს. შეხვედრას არასამთავრობო ორგანიზაციებისა და ადგილობრივი თვითმმართველობის წარმომადგენლები ესწრებოდნენ. აშშ-ს საელჩოს წარმომადგენლების თქმით, შეხვედრაზე განხილეს არასამთავრობო სექტორისა და ადგილობრივი თვითმმართველობის წარმომადგენლებთან სამომავლო თანამშრომლობის საკითხები. ასევე სასწავლო გაცვლით პროგრამებში და კონკურსებში ახალგაზრდობის ჩართვის საკითხები. საელჩოს წარმომადგენლებმა არასამთავრობო სექტორსა და მუნიციპალიტეტის გამგეობას საჩუქრად ასამდე სხვადასხვა ჟანრის ქართულ და ინგლისურ ენებზე გამოცემული ლიტერატურაც გადასცეს.

თბილისი. ინფორმაციის თავისუფლების განვითარების ინსტიტუტმა (IDFI) ღია მმართველობის პარტნიორობის (OGP) შესახებ სტუდენტებთან დისკუსია გამართა. შეხვედრა, რომელსაც სხვდასხვა უნივერსიტეტის სტუდენტები ესწრებოდნენ განათლების მულტიმედია ცენტრში შედგა. IDFI-ის გამგეობის თავმჯდომარე ლევან ავალიშვილმა შეხვედრის მონაწილეებს აუხსნა როგორ მუშაობს OGP, რა ვალდებულებებს იღებს საქართველო პარტნიორობაში, როგორ არის სამოქალაქო საზოგადოება ამ პროცესში ჩართული და რა უნდა გაკეთდეს იმისათვის რომ გაიზარდოს დაინტერესება როგორც ვალდებულებების შემუშავების თვალსაზრისით, ისე მათი შესრულების კონტროლის მიმართულებით. სრულად...  წყარო: ogpgeoblog.wordpress.com

თბილისი. საზოგადოებრივი ორგანიზაციების ვებპორტალს ახალი მოდული დაემატა – „ადგილობრივი და რეგიონული განვითარება”. პორტალის მომხმარებლებს შეუძლიათ იხილონ რეგიონული განვითარების და ადგილობრივი თვითმმართველობის სფეროში მომუშავე კვლევითი ორგანიზაციების, სფეროს ექსპერტების შესახებ ინფორმაცია. ასევე აღნიშნული ორგანიზაციებისა და ექსპერტების მიერ გამოცემული კვლევებისა და პუბლიკაციების ელექტრონული ვერსიები. მოდული შეიქმნა პროექტის – „გამოყენებითი კვლევების ხელშეწყობა საქართველოს რეგიონული განვითარებისთვის" - ფარგლებში . სრულად... 

თბილისი. „საერთაშორისო გამჭვირვალობა - საქართველომ" ბლოგ-პოსტი - „სახელმწიფო სატრანსპორტო საშუალებების გამოყენება საქართველოში: საკანონმდებლო ბაზა, შესყიდვები და ევროპული გამოცდილება" - გამოაქვეყნა. „საზოგადოების განსაკუთრებული ყურადღების ცენტრშია სახელმწიფოს მფლობელობაში არსებული სატრანსპორტო საშუალებების გამოყენება, რადგან ხშირია ამ პრივილეგიის ბოროტად გამოყენების შემთხვევები. ევროკავშირის წევრ და არაწევრ ქვეყნებში ხორციელდება ღონისძიებები, რომლებიც ითვალისწინებს ხარჯებისა და მთავრობის ოფიციალური პირების მიერ გამოყენებული სატრანსპორტო საშუალებების რაოდენობის შემცირებას. ამ მხრივ გამონაკლისს არც საქართველო წარმოადგენს. უმეტეს ქვეყნებში, საქართველოს ჩათვლით, მნიშვნელოვანი ღონისძიებებია გასატარებელი ზედმეტი ხარჯის შემცირებისა და სახელმწიფო სატრანსპორტო საშუალებების გამოყენების შესახებ საზოგადოებისათვის ინფორმაციის მიწოდებისათვის. ამ ფონზე, კარგი იქნება, ვნახოთ, თუ როგორ ახორციელებენ მსგავს რეფორმებს ევროპის სხვა ქვეყნები და როგორ არეგულირებს საქართველოს მთავრობა სახელმწიფოს მფლობელობაში არსებული სატრანსპორტო საშუალებების გამოყენებას”, ნათქვამია ბლოგ-პოსტში. სრულად...  წყარო: www.transparency.ge

თბილისი. 24 სექტემბერს, სტარტი აიღო „მოსიარულე ბიბლიოთეკამ", რომელიც მომდევნო 3 დღის მანძილზე პროექტის - „წიგნი ყველა სოფელს" - ფარგლებში მოგზაურობას მარტვილის, ლენტეხისა და ქუთაისის სკოლებში გეგმავს. „წიგნი ყველა სოფელს" - არასამთავრობო, სახელმწიფო, საქართველოს საპატრიარქოს და კერძო სექტორის ერთიანი ძალისხმევით და ორგანიზაცია „სტუდენტური ერთიანობის" ინიციატივით ხორციელდება. პროექტის ფარგლებში სვანეთის, იმერეთის, კახეთის, მცხეთა-მთიანეთისა და აჭარის სოფლების სასკოლო თუ ცენტრალური ბიბლიოთეკები საჭირო წიგნებით მომარაგდება. წყარო: ბავშვთა და ახალგაზრდობის ცენტრის გვერდი სოციალურ ქსელში

თბილისი. 22 სექტემბერს გაიმართა მორიგი სამუშაო შეხვედრა კანონპროექტზე - „შეზღუდული შესაძლებლობის მქონე პირებისათვის თანაბარი შესაძლებლობების უზრუნველყოფის შესახებ”. შეხვედრას დაესწრნენ სამთავრობო და არასამთავრობო ორგანიზაციებისწარმომადგენლები. აღნიშნულ სამუშაო პროცესს ექნება განგრძობითი ხასიათი. კანონპროექტზე მუშაობა ინიცირებულია ორგანიზაციის - „კოალიცია დამოუკიდებელი ცხოვრებისათვის” აშშ–ის საერთაშორისო განვითარების სააგენტოს (USAID) მხარდაჭერით. წყარო: „პარტნიორობა ადამიანის უფლებებისთვის" გვერდი სოციალურ ქსელში

თბილისი. საქართველოს სახალხო დამცველი განცხადებას ავრცელებს ტელეკომპანია რუსთავი 2–ის გადაცემა „განსხვავებულ აქცენტებში" გასულ მასალაზე. „...ტელეკომპანია „რუსთავი 2–ის" ეთერში, გადაცემაში „განსხვავებული აქცენტები" გავიდა აუდიო ჩანაწერები, რომლის მიხედვითაც, სავარაუდოდ სასჯელაღსრულების დაწესებულებაში მყოფი პატიმრები ახერხებენ ტელეფონით დაუკავშირდნენ ერთმანეთს და სხვადასხვა საკითხებზე ისაუბრონ, მათ შორის, როგორც ჟურნალისტი ასკვნის, ე.წ. „მაყურებლის" დანიშვნაზე და ე.წ. „ობშიაკის" შეგროვებაზე. „პატიმრობის კოდექსი" ზუსტად განსაზღვრავს სასჯელაღსრულების დაწესებულებებში მოთავსებულთა პირთა მიერ ტელეფონით თუ კომუნიკაციის სხვა საშუალებებით სარგებლობის წესებს, რომელთა დარღვევა შესაბამისი ადმინისტრაციული თუ სისხლის სამართლებრივ პასუხისმგებლობას იწვევს; ზემოაღნიშნულ გადაცემაში გაშუქებული სატელეფონო ჩანაწერები, ასევე შეიძლება შეიცავდეს სისხლის სამართლის სხვადასხვა დანაშაულის ნიშნებს", ნათქვამია განცხადებაში. სახალხო დამცველი მიიჩნევს,  რომ „საქართველოს მთავარმა პროკურატურამ დაუყოვნებლივ უნდა ჩაატაროს გამოძიება ზემოაღნიშნულ გადაცემაში გასული მასალების შესახებ". სრულად... წყარო: ombudsman.ge

თბილისი. 23 სექტემბერს ფონდ „ღია საზოგადოება საქართველოს" ღია გალერეაში უკრაინელი მხატვრის სერგეი პონუჩენუკის ნამუშევრების გამოფენა გაიხსნა. სერგეის ნამუშევრები უნიკალური, ინოვაციური მეთოდით არის შექმნილი - მისი ფერწერის აღქმა ხდება სმენითი და ტაქტილური მეთოდის გამოყენებით. გამოფენა გახსნეს საქართველოს უსინათლოთა კავშირის კულტურის ცენტრში მოღვაწე უსინათლო მუსიკოსებმა ღია გალერეაში გამოფენა 25 სექტემბრამდე გაგრძელდება. 27 სექტემბერს  ექსპოზიცია ქუთაისში გადაინაცვლებს, 29 სექტემბერს კი გამოფენას ბათუმის საზაფხულო თეატრი უმასპინძლებს.  წყარო: osgf.ge

თბილისი. სახალხო დამცველი განცხადებას ავრცელებს. „19 სექტემბერს, თბილისში მე 18-ე საუკუნის მიწურულს აგებული სურბ მინასის ეკლესიის სახურავი ჩამოინგრა. ეკლესია გელათის ქუჩა №13–ში მდებარეობს.... სახალხო დამცველი... მოუწოდებს საქართველოს მთავრობას, მიიღოს დროული და ეფექტური ზომები, რათა კულტურის მემკვიდრეობის ძეგლები დაიცვას დაზიანება-დანგრევისგან და დაიწყოს ე.წ. „სადავო" ეკლესიების საკითხის გადაჭრა", ნათქვამია განცხადებაში. სრულად... წყარო: ombudsman.ge

თბილისი. ორგანიზაცია „ახალგაზრდა ადვოკატები" საქართველოს ყოფილი პრეზიდენტის, მიხეილ სააკაშვილის საქართველოში არსებული ქონების მიმართ ყადაღის დადების ფაქტს ეხმაურება. ორგანიზაციის წარმომადგენლებმა ამ საკითხზე პრესკონფერენცია გამართეს. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველომ საპარლამენტო ამბების მორიგი აუდიო პოდკასტი გამოაქვეყნა. 22 სექტემბრის გადაცემის თემებია: ნაფიც მსაჯულთა ინსტიტუტის სრული მოცულობით ამოქმედება 2016 წლის 1 ოქტომბრამდე გადავადდა; დებატები უმრავლესობასა და უმცირესობას შორის პარლამენტის ადგილსამყოფელის შესახებ; უკანონო აბორტზე სასჯელი გამკაცრდა; ცხარე კამათი თბილისში მდებარე პარლამენტის შენობასთან ავტოსადგომის ფართის შეძენაზე. სრულად... წყარო: transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება სოციალურ ქსელში განცხადებას ავრცელებს. „ბოლო დღეების განმავლობაში საზოგადოების ყურადღება მიიპყრო თბილისში განხორციელებულმა ე.წ. რეიდებმა, რასაც არაერთგვაროვანი დამოკიდებულება და ხშირ შემთხვევაში მოსახლეობის უკმაყოფილება მოჰყვა. პოლიციის შესახებ საქართველოს კანონის 24-ე მუხლის მესამე პუნქტის მიხედვით, სპეციალური საპოლიციო კონტროლის ღონისძიების ჩატარება მინისტრის ბრძანების საფუძველზე ხდება. 2014 წლის 9 სექტემბერს „სამართლიანმა არჩევნებმა" მიმართა შინაგან საქმეთა სამინისტროს აღნიშნულ საკითხზე.  როგორც შსს-ს ოფიციალური წერილიდან ირკვევა, 2014 წლის 5 სექტემბერს გამოიცა შინაგან საქმეთა მინისტრის ბრძანება 2014 წლის 5 სექტემბრის 18.00 სთ-იდან 7 სექტემბრის 18.00 სთ-მდე ქ. თბილისის ტერიტორიაზე „პოლიციის შესახებ" საქართველოს კანონის 24-ე მუხლით გათვალისწინებული სპეციალური საპოლიციო კონტროლის ღონისძიების ჩატარების თაობაზე. მინისტრის ბრძანების მიხედვით, ე.წ. „რეიდები" ორი დღის განმავლობაში, 5 სექტემბრის საღამოს 6 საათიდან 7 სექტემბრის საღამოს 6 საათამდე უნდა გაგრძელებულიყო. საინტერესოა, რამდენად მოხდა აღნიშნული ფაქტის გათვალისწინება სამართალდამცავთა მხრიდან. შეესწარით თუ არა სხვა დღეებში პოლიციის მხრიდან მოქალაქეთა შემოწმებას ან ფლობთ თუ არა მსგავს ინფორმაციებს?" სრულად...  წყარო: ორგანიზაციის გვერდი სოციალურ ქსელში

სამეგრელო. 22 სექტემბერს, საქართველოს ახალგაზრდა იურისტთა ასოციაციის დაფუძნების დღიდან 20 წელი შესრულდა. საიუბილეო თარიღთან დაკავშირებით, ქალაქ ზუგდიდში ორგანიზაციის კიდევ ერთი რეგიონული ოფისი გაიხსნა. ეს იქნება საქართველოს მასშტაბით რიგით მეცხრე ოფისი თბილისის, ქუთაისის, ბათუმის, რუსთავის, გორის, თელავის, დუშეთისა და ოზურგეთის შემდეგ. „ზუგდიდის ოფისი ყველა სხვა ოფისის მსგავსად უფასო იურიდიულ დახმარებას გაუწევს მოსახლეობას, საკუთარ წვლილს შეიტანს ადამიანის უფლებების დაცვის, კანონის უზენაესობის, ანგარიშვალდებული მმართველობის დამკვიდრების, სამართლებრივი ცნობიერების ამაღლების, იურიდიული განათლების ხელშეწყობისა და საიას სხვა სტრატეგიული მიზნების მიღწევის საქმეში”. სრულად... წყარო: gyla.ge

თბილისი. 20 სექტემბერს ეროვნულ მუზეუმში გაიხსნა და 30 სექტემბრამდე გაგრძელდება საბჭოთა კვლევის ლაბორატორიის გამოფენა: „საქართველოს დამფუძნებელი კრება: პოლიტიკური ბრძოლის ქრონიკა 1921–1978". 1919 წელს საქართველოს დამოუკიდებელმა რესპუბლიკამ საყოველთაო, დემოკრატიული არჩევნების შედეგად ქვეყნის საკანონმდებლო ორგანო - დამფუძნებელი კრება აირჩია. დამფუძნებელი კრების 130 ადგილზე შემადგენლობის ცვლილების შედეგად დეპუტატის მანდატი 145 მოქალაქეს მიენიჭა. ეს 145 დეპუტატი საქართველოს მოსახლეობის ბოლო კანონიერ წარმომადგენლად დარჩა საქართველოს ოკუპაციის შემდგომი 70 წლის მანძილზე. უკანასკნელი მათგანი 1978 წელს გარდაიცვალა. გამოფენაზე წარმოდგენილია საქართველოს ოკუპაციის შემდეგ განვითარებული ის საკვანძო პოლიტიკური მოვლენები, რომლებშიც დამფუძნებელი კრების დეპუტატები მონაწილეობდნენ. გამოფენა მომზადებულია საბჭოთა წარსულის კვლევის ლაბორატორიის პროექტის „საბჭოთა წარსულის გააზრება" ფარგლებში, ორგანიზაცია „ეროვნული წვლილი დემოკრატიისთვის" (National Endowment for Democracy - NED) ფინანსური მხარდაჭერით. წყარო: ორგანიზაციის ვებგვერდი სოციალურ ქსელში

თბილისი. ტოლერანტობის კულტურის დამკვიდრების ხელშეწყობისთვის, მედიის განვითარერების ფონდმა დააწესა მრავალფეროვნების საკითხების ეთიკურად გაშუქებისთვის ჟურნალისტური პრიზი. პრიზი ყოველწლიური იქნება და მედიასაშუალებებს, ჟურნალისტებს და ბლოგერებს გადაეცემათ. 19 სექტემბერს მედიის განვითარების ფონდისა და გაეროს ასოციაციის ერთობლივ ღონისძიებაზე წლევანდელი პრიზის მფლობელები დასახელდნენ. სრულად... წყარო: media.ge

კახეთი. საქართველოს სტრატეგიული კვლევების და განვითარების ცენტრის თანამშრომლებმა პანკისის ხეობის სოფელ დუისში ჩაატარეს 5 დღიანი ტრენინგი - „ბიზნეს გეგმის შემუშავება სოციალური საწარმოებისთვის". ტრენინგის ორგანიზება განხორციელდა „არბაითერ სამარიტერ ბუნდის" მიერ და მიზნად ისახავდა სოციალური სერვისების მიმწოდებელი სოციალური საწარმოების დაფუძნების მსურველთათვის საჭირო ცოდნის გადაცემას. წყარო: ორგანიზაციის გვერდი სოციალურ ქსელში