თბილისი. არასამთავრობო ორგანიზაცია „ჰელფინგ ჰენდის" ოფისში საქართველოს ახალგაზრდული პარლამენტის სპორტისა და ახალგაზრდულ საქმეთა კომიტეტის წევრები ამავე ორგანიზაციის წევრებს, ბავშვთა და ახალგაზრდობის ეროვნული ცენტრის წარმომადგენელს და მშვიდობის კორპუსის ამერიკელ მოხალისეებს შეხვდნენ. აღნიშნულ ორგანიზაციებთან შეხვედრა მოხალისეობის საკითხებთან დაკავშირებით მათი ურთიერთთანამშრომლობის ფარგლებში შედგა. საუბარი შეეხო მოხალისეობის პერსპექტივებს საქართველოში და იმ აქტივობებს, რაც ხელს შეუწყობს მის განვითარებას. წყარო:ორგანიზაციის გვერდი სოციალურ ქსელში

შიდა ქართლი. საქველმოქმედო ჰუმანიტარული ცენტრი „აფხაზეთი", პროექტის -„ახალგაზრდების ჩართულობა და განვითარება" ფარგლებში ცდილობს საქმიანი ურთიერთობები დაამყაროს შიდა ქართლის რეგიონში მოქმედ საზოგადოებრივ ორგანიზაციებთან. თანამშრომლობის კარგი მაგალითია 2013 წლის 24 სექტემბერს „მეგობრობის ხიდი - ქართლოსის" ოფისში გამართული ორმხრივი შეხვედრა. აღნიშნულ შეხვედრაზე მოხდა მოსაზრებების და გამოცდილების გაზიარება ცენტრ „აფხაზეთსა" და „ქარლოსს" შორის ახალგაზრდებისა და მოზარდი თაობების პრობლემების ირგვლივ. ასევე საუბარი წარიმართა ახალგაზრდა თაობის როლზე კონფლიქტების მოგვარებასა მშვიდობის მშენებლობაში. შეხვედრის ბოლოს მეგობრობის ხიდი - ქართლოსის წარმომადგენელმა ცენტრ „აფხაზეთს" გადასცა მეთოდოლოგიური მასალა მასწავლებლებისათვის - ბუნებრივად საინტერესო გაკვეთილის როგორც ნაბეჭდი, ასევე ელექტრონული ვერსია კომპაქტ დისკის სახით. აღნიშნული მასალა გადაეცემათ ცენტრ „აფხაზეთის" მიერ გორის მუნიციპალიტეტის რვა სოფლის საჯარო სკოლაში ჩამოყალიბებულ ახალგაზრდულ კლუბებს.

თბილისი. ორგანიზაცია „იდენტობამ" ვებ–გვერდზე განცხადება გაავრცელა, რომლითაც მწერალ ნაირა გელაშვილს ღია დისკუსიაში მონაწილეობას სთავაზობს. „ადამიანის უფლებების საკითხზე პოზიციაში სიცხადის შეტანის მიზნით, ორგანიზაცია „იდენტობა" ქალბატონ ნაირა გელაშვილს საჯარო დისკუსიაში მონაწილეობას სთავაზობს. ვიმედოვნებთ, მსგავსი დისკუსია ნათელს მოჰფენს იმ სამწუხარო გაუგებრობას, რაც 2013 წლის 25 მაისს, ტელეკომპანია კავკასიის პირდაპირ ეთერში 17 მაისის მოვლენებზე მის წინააღმდეგობრივ მსჯელობს მოჰყვა", ნათქვამია ორგანიზაციის ვებ–გვერდზე. სრულად წყარო: identoba.com

თბილისი. როგორც ცნობილია, 19 სექტემბერს „ლიბერალურმა აკადემია" გამართა პროექტის – „ვიზის ლიბერალიზაციის პერსპექტივები: სამოქალაქო ჩართულობა და ადვოკატირება" – შუალედური ანგარიშის პრეზენტაცია. მისი მიზანია ვიზის ფასილიტაციის ხელშეკრულებისა და ევროპის სავიზო კოდექსის იმპლემენტაციის მონიტორინგი, შედეგების შესახებ საზოგადოების ინფორმირება და ადვოკატირება. ორგანიზაცია გამოაქვეყნა ანგარიში. ვიზის ლიბერალიზაციის პერსპექტივები: სამოქალაქო ჩართულობა და ადვოკატირება (შუალედური კვლევა)  წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველომ საპარლამენტო ამბების პოდკასტის 23 სექტემბრის გამოშვება გამოაქვეყნა. გამოშვების თემებია: დეპუტატებმა განიხილეს 80-მდე კანონპროექტი, მათ შორის ცვლილებები „მაუწყებლობის შესახებ" კანონში; 112 ხმით 0-ის წინააღმდეგ პარლამენტმა პირველი მოსმენით მიიღო ცვლილებები კონსტიტუციაში, რომლებიც ზღუდავს პრემიერის უფლებამოსილებებს; ტერორიზმის შესახებ ცრუ შეტყობინებისათვის იურიდიული პასუხისმგებლობის ზომა მძიმდება; ადმინისტრაციული პასუხისმგებლობის ზომა დგინდება „112"-ის არამიზნობრივი გამოყენებისათვის; კომუნიკაციების მარეგულირებლის საქმიანობის შემსწავლელი საგამოძიებო კომისიის საქმიანობა. საპარლამენტო ამბების აუდიო პოდკასტი – 23 სექტემბერი წყარო: transparency.ge

ქვემო ქართლი. 21 სექტემბერს დმანისის ახალგაზრდული ცენტრის წევრებმა მოსახლეობასთან მშვიდობის საერთაშორისო დღისადმი მიძღვნილი საინფორმაციო აქცია გამართეს. ცენტრის წევრებმა მოამზადეს პლაკატები, მისალოცი ბარათები და დაურიგეს მოსახლეობას, რითაც საზოგადოებას კიდევ ერთხელ შეახსენეს, რომ მშვიდობაა ყვერაფერზე წინ დგას. წყარო:ორგანზიაციის გვერდი სოციალურ ქსელში სფერო – ახალგაზრდული

თბილისი. 22 სექტემბერს. „სამოქალაქო მონიტორინგისა და კვლევების ცენტრსა" და „განვითარებისა და დემოკრატიის ცენტრს" შორის ურთიერთთანამშორმლობის მემორანდუმი გაფორმდა. მემორანდუმის თანახმად „სამოქალაქო მონიტორინგისა და კვლევების ცენტრი" პროექტის – „დაკვირვება დემოკრატიისა და განვითარებისათვის" – ფარგლებში, „განვითარებისა და დემოკრატიის ცენტრის" მანდატით განახორციელებს წინასაარჩევნო პერიოდისა და არჩევნების დღის მონიტორინგს ზუგდიდის, ხობის, წალენჯიხისა და ჩხოროწყუს საარჩევნო ოლქებში. პროექტი მხარდაჭერილია ფონდ ღია საზოგადოება საქართველოს მიერ. წყარო:სამოქალაქო მონიტორინგისა და კვლევების ცენტრის გვერდი სოციალურ ქსელში

სამცხე–ჯავახეთი. თანატოლთა განათლების ფარგლებში ახალციხის ახალგაზრდული ცენტრის წევრებმა წარადგინეს პრეზენტაცია, ტაო-კლარჯეთში არსებულ ისტორიულ კულტურული ძეგლის ბანის შესახებ. ღონისძიება ჩატარდა, პროექტის – „ეროვნული ინტეგრაციის გაძლიერება საქართველოში" – ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო:დემოკრატ მესხთა კავშირის გვერდი სოციალურ ქსელში

თბილისი. „ახალგაზრდა ადვოკატებმა" ორგანიზაციის სტრატეგიული ხედვისა და საქმისწარმოების დოკუმენტის „დემოკრატია და უფლებები საქართველოში 2012–2015" სრულყოფისა და საქმანობის მდგრადობის მიზნით, ყოველწლიური, სამუშაო გუნდის შიდა ტრენინგი გამართეს. ორგანიზაციაში შიდა სემინარის მიზანია შესაძლებლობების შეფასება, ადამიანური რესურსის სწორი განვითარება, მმართველობის მენეჯმენტის დახვეწა, გამოწვევების მიმართ დამოკიდებულების ჩამოყალიბება და გადაწყვეტილებების პროცესში პასუხისმგებლობის დადგენა. სემინარის თემა მომზადდა „ინსტიტუციონალური განვითარება და ორგანიზაციის გამყარება" East Foundation 2007-2010 საკონსულტაციო მასალაზე დაყრდნობით. შიდა ტრენინგის დავალებების შესრულების შედეგად დგება „საქმინაობის დაგეგმარებისა და სტრატეგიული განვითარების შეფასების" დოკუმენტი, რომელიც სახელმძღვანელოა „ახალგაზრდა ადვოკატების" გუნდის თითოეული წევრისთვის და გადაწყვეტილებებისთვის. წყარო: ორგანიზაციის გვერდი სოციალურ ქსელში

აჭარა. 21 სექტემბერს „ბათუმის ახალგაზრდულ ცენტრში" მშვიდობის საერთაშორისო დღე სამოქალაქო აქტივობით აღინიშნა. ახალგაზრდებმა მოაწყეს „მშვიდობის კედელი" სადაც ყველა მსურველს შეეძლო მშვიდობასთან დაკავშირებით თავისი სურვილები და ასოციაციები დაეწერა. ამას გარდა ყველა გამვლელს დაურიგდა ბუშტები და მისალოცი ბარათები. აქტივობის ბოლოს იმსჯელეს და გაიხსენეს მსოფლიოში მომხდარი ფაქტები, რომლებმაც დიდი ზიანი მიაყენა მშვიდობიან მოსახლეობას, მათ შორის ყველაზე ცნობილი 2001 წლის 11 სექტემბერს ნიუ-იორკში მომხდარი ტერაქტი, ისაუბრეს აგრეთვე სამანტა სმიტის მაგალითზე, რომელიც მშვიდობის დესპანის სახელითაა ცნობილი. აღნიშნული აქტივობები მიზნად ისახავდა ახალგაზრდების ცნობიერების ამაღლებას. წყარო:ორგანიზაციის გვერდი სოციალურ ქსელში

შიდა ქართლი. საზოგადოება ,,ბოლიკი” მშვიდობის საერთშორისო დღეს შეუერთდა და სამოქალაქო კლუბების წევრების ორგანიზებით გორის დრამატული თეატრის ეზოში აქცია გამართა. ღონისძიების დაწყებამდე აქციის მონაწილეებმა წუთიერი დუმილით პატივი მიაგეს მშვიდობისთვის ბრძოლაში დაღუპულ გმირებს. სამოქალაქო კლუბის წევრებმა მშვიდობის დარგში მინიჭებული ნობელის პრემიის ლაურეატების შესახებ პრეზენტაციები გააკეთეს. ამის შემდგომ მსვლელობა მოაწყეს ქალაქის ქუჩებში და გაეროს გენერალური მდივნის გზავნილი, მისალოცი ბარათები და თეთრი ბუშტები დაარიგეს. აქციის დასასრულს შეკრებილები დემოკრატიის სკოლაში თომა ჩაგელიშვილის დოკუმენტური ფილმის ,,ომის ნაკვალევი” ჩვენებას დაესწრნენ, რომელსაც ასევეგორის სამთავრობო და არასამთავრობო სექტორის წარმომადგენლები ესწრებოდნენ. წყარო:ორგანიზაციის გვერდი სოციალურ ქსელში

იმერეთი. 20 სექტემბერს, სამოქალაქო განათლებისა და პედაგოგთა გადამზადების პროგრამის ფარგლებში, ქუთაისის განათლების განვითარების და დასაქმების ცენტრის ინიციატივით, პროექტში ჩართული ჭიათურისა და საჩხერეს სამიზნე სკოლების პედაგოგებისა და მოსწავლეების მონაწილეობით მოეწყო ღია კარის დღე. მონაწილეები გაეცვნენ პროექტის ფარგლებში გამოცხადებულ მცირე საგრანტო კონკურსის პირობებს, გაიარეს კონსულტაციები საპროექტო წინადადებების მომზადების შესახებ. ასევე გაეცვნენ პროგრამის წლის სამუშაო გეგმის პრიორიტეტებს და ისაუბრეს სამომავლო გეგმებსა და ინიციატივებზე. შეხვედრას საჯარო სკოლების 12 წარმომადგენელი ესწრებოდა. წყარო:ორგანიზაციის გვერდი სოციალურ ქსელში

თბილისი. ორგანიზაცია „ახალგაზრდა ადვოკატების" წარმომადგენლები ივანე ჯავახიშვილის სახელობის თბილისის სახელმწიფო უნივერსტეტის იურიდიული ფაკულტეტის სტუდენტებს შეხვდნენ. შეხვედრაზე სტუდენტები გაეცნენ უფლებადაცვითი ორგანიზაციის საქმიანობას, მიმდინარე და დასრულებულ პროექტებს, ორგანიზაციის სტრუქტურას და სასამართლო ინსტანციებში წარმოებული საქმეების სტატისტიკას. ორგანიზაციამ სტუდენტებს ასევე შესთავაზა პროექტის – „სტუდენტები გამჭვირვალე სტუდენტური თვითმმაართველობისთვის" – მომზადება. ორგანიზაციამ სტუდენტებს ჩართულობა შესთავაზა და საუკეთესო საპროექტო წინადადებების განხორციელების მხარდაჭერა გამოთქვა. „ახალგაზრდა ადვოკატები" მსგავს შეხვედრას ჟურნალისტიკის სპეციალობის სტუდენტებთანაც გამართავს. წყარო:ორგანიზაციის გვერდი სოციალურ ქსელში

კახეთი. მშვიდობის კვირეულის ფარგლებში, თელავის ახალგაზრდული ცენტრის მონაწილეები მშვიდობის კორპუსის ამერიკელ მოხალისეს შეხვდნენ.  შეხვედრაზე ახალგაზრდები გაეცნენ ამერიკულ კულტურას, ისაუბრეს მოხალისეობასა და აქტიურ მოქალაქეობაზე. მიმოიხილეს მშვიდობის კორპუსის მისია და ამერიკელი მოხალისეების როლი საქართველოში. ღონისძიება ორგანიზებულ იქნა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: ეროვნული ინტეგრაციის გაძლიერება საქართველოში-თელავის ცენტრის გვერდი სოციალურ ქსელში

თბილისი. ევროპულმა ინიციატივამ–ლიბერალურმა აკადემია, 19 სექტემბერს გამართა შუალედური ანგარიშის – „ვიზის ლიბერალიზაციის პერსპექტივები სამოქალაქო ჩართულობა და ადვოკატირება" – პრეზენტაცია. პროექტის მიზანი იყო ვიზის ფასილიტაცის ხელშეკრულებისა და ევროპის სავიზო კოდექსის განხორციელების მონიტორინგი, შედეგების შესახებ საზოგადოების ინფორმირებულობის დონის გაზრდა, სამოქალაქო თანამონაწილეობის უზრუნველყოფა და ადვოკატირება. პროექტის პირველი შუალედურ კვლევაში წარმოდგენილი იყო ევროკავშირის წევრი ქვეყნების საკონსულოების პროფილები, გამოიკვეთა ძირითადი ტენდენციები და პროგრესთან ერთად აღიწერა იპმპლემენტაციის პროცესში გამოვლენილი კონკრეტული პრობლემები. სრულად წყარო: ორგანიზაციის გვერდი სოციალურ ქსელში

იმერეთი. 19 სექტემბერს სამოქალაქო განათლებისა და პედაგოგთა გადამზადების პროგრამის ფარგლებში სამოქალაქო კლუბების კოორდინატორმა შეხვედრები ქუთაისის საჯარო სკოლის სამოქალაქო კლუბის მეურვე პედაგოგებთან და ლიდერებთან გამართა. შეხვედრების მონაწილეები გაეცვნენ პროგრამის წლის სამუშაო გეგმის პრიორიტეტებს და მიიღეს კონსულტაციები სამომავლო გეგმების შესახებ. ასევე სამოქალაქო კლუბის ლიდერებმა დაგეგმეს 3 ოქტომბრის, მასწავლებლის დღესთან დაკავშირებული ღონისძიება. წყარო:ორგანიზაციის გვერდი სოციალურ ქსელში

თბილისი. „ახალგაზრდა ადვოკატები" ინსტიტუციური დიალოგის ფარგლებში, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრ დავით დარახველიძეს შეხვდნენ. დიალოგის მთავარი საკითხები იყო: სამინისტროს ახალი პოლიტიკა ადგილნაცვალი პირების სოციალურ-ეკონომიკურ, სამოქალაქო და პოლიტიკური უფლებების გაუმჯობესების მიმართულებით, სამინისტროს ახალი ხედვა ოკუპირებული ტერიტორიებიდან ადგილნაცვალი პირების რეინტეგრაციის მიმართულებით, სამინისტროს ახალი პოლიტიკის პერსპექტივები და მოლოდინები დევნილთა ოკუპირებულ ტერიტორიებზე დაბრუნების მიმართულებით, სამინისტროს საერთაშორისო და რეგიონალური კავშირების გამოყენების შესაძლებლობა აფხაზეთისა და სამაჩაბლოს რეგიონებთან მჭიდრო კავშირების მიმართულებით, სამინისტროს 2014 წლის პრიორიტეტები და ა.შ პროექტის ფარგლებში, ეს ორგანიზაციის მიერ გამართული მეორე შეხვედრა იყო. სრულად წყარო:ორგანიზაციის გვერდი სოციალურ ქსელში

იმერეთი. 20-21 სექტემბერს კონსტიტუციის 42-ე მუხლის ექსპერტები ქუთაისში გამართავენ შეხვედრებს მეწარმეებთან და ადვოკატებთან პროექტის – „მცირე და საშუალო ბიზნესმესაკუთრეთა ნდობის ხარისხის ამაღლება საქართველოს მართლმსაჯულების სისტემის მიმართ" – ფარგლებში. დაინტერესებულ პირებს 42–ე მუხლის იურისტ–ექსპერტები გაუწევენ კონსულტაციებს საგადასახადო საკითხებზე, ასევე გააცნობენ საგადასახადო სფეროს საკანონმდებლო ცვლილებებს, საგადასახადო კონტროლის პროცედურებს და შემოწმების სახეებს. მცირე და საშუალო ბიზნესის წარმომადგენლები ასევე მიიღენბ საჭირო ინფორმაციას საგადასახადო დავალიანების გადახდის უზრუნველყოფის ღონისძიებებისა და საგადასახადო დავების გადაწყვეტის ეფექტური გზების შესახებ. წყარო: ორგანიზაციის გვერდი სოციალურ ქსელში

თბილისი. არასამთავრობო ორგანიზაციების კოალიციამ „ძლიერი სამოქალაქო საზოგადოებისთვის" დაიწყო კამპანია „ერთი პროცენტის კანონი – საქართველოს დროა". სექტემბრის ბოლოს კოალიცია ამ საკითხზე კონფერენციის გამართვას გეგმავს. სადაც განიხილავენ თუ როგორ მოხერხდეს აღნიშნული ინიციატივს განხორციელება. სრულად წყარო: კამპანიის გვერდი სოციალურ ქსელში

თბილისი. 19 სექტემბერს, 11:45 საათზე, ევროპული ინიციატივა - ლიბერალური აკადემია თბილისი წარმოადგენს კვლევითი პროექტის შედეგებს:"ვიზის ლიბერალიზაციის პერსპექტივები: სამოქალაქო ჩართულობა და ადვოკატირება".  პროექტის მიზანია ვიზის ფასილიტაცის ხელშეკრულებისა და ევროპის სავიზო კოდექსის იმპლემენტაციის მონიტორინგი, შედეგების შესახებ საზოგადოების ინფორმირებულობის დონის გაზრდა, სამოქალაქო თანამონაწილეობის უზრუნველყოფა და ადვოკატირება. ანგარიშის წარდგენის შემდგომ გაიმართება დისკუსია საქართველოს სამოქალაქო სექტორის, ხელისუფლების, მედიისა და საერთაშორისო ორგანიზაციების, მათ შორის ევროკავშირის წევრი ქვეყნების საელჩოების წარმომადგენლების მონაწილეობით.პროექტი ხორციელდება ფონდი "ღია საზოგადოება - საქართველოს" მხარდაჭერით. წყარო:osgf.ge

აშშ–ს საელჩოს გვერდი სოციალურ ქსელში მაიკროსოფთის კონკურსის Imagine Cup-ის 2014 წლის სეზონი გახსნისა და რეგისტრაციის დაწყების შესახებ იუწყება. „3 ძირითადი კონკურსი: თამაშები, ინოვაცია და მსოფლიო მოქალაქეობა კვლავ დაბრუნდა. თითოეული კონკურსის პრიზი 50,000 აშშ დოლარს შეადგენს", ნათქვამია საიტზე. რეგისტრაციისა და სრული ინფორმაციისთვის იხილეთ საიტი www.imaginecup.com წყარო: აშშ–ს საელჩოს გვერდი სოციალურ ქსელში

სამეგრელო. 17 სექტემბერს, ამერიკის შეერთებული შტატების ელჩი საქართველოში რიჩარდ ნორლანდი „საერთაშორისო გამჭვირვალობა – საქართველოს" ზუგდიდის ოფისს ეწვია. ორგანიზაციის წარმომადგენლებთან ერთად ელჩი შეხვდა სახალხო დამცველის რწმუნებულს სამეგრელო-ზემო სვანეთის რეგიონში, „სამართლიანი არჩევნებისა და დემოკრატიის საერთაშორისო საზოგადოებისა" და ასოციაცია „ათინათის" წარმომადგენლებს. ელჩი დაინტერესდა ზუგდიდში არსებული წინასაარჩევნო გარემოთი, ასევე ადგილობრივი თვითმმართველობის ორგანოებისა და არასამთავრობო ორგანიზაციების თანამშრომლობის საკითხებით. „საერთაშორისო გამჭვირვალობა – საქართველოს" წარმომადგენლებმა კი თავის მხრივ რიჩარდ ნორლანდს მიაწოდეს ინფორმაცია წინასაარჩევნო პერიოდში ზუგდიდში მიმდინარე მოვლენებზე და ასევე ადგილობრივ მოსახლეობასთან გამართული შეხვედრების შედეგებზე. წყარო:ორგანიზაციის გვერდი სოციალურ ქსელში