თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ინტერნეტ უსაფრთხოების გზამკვლევს. „არაავტორიზებული შესვლისგან თავის დასაცავად, სადაც შესაძლებელია, ჩართეთ ორფაქტორიანი ავტორიზაცია. ეს არის დამატებითი დაცვის საშუალება სოციალურ ქსელებში, მესენჯერებში, ელფოსტაზე, Google-ში და ა.შ. ამ ფუნქციის ჩართვის შემთხვევაში, თქვენს ანგარიშზე შესასვლელად პაროლთან ერთად ერთჯერადი კოდის შეყვანაც მოგიწევთ. კოდს SMS-ის საშუალებით მიიღებთ. ასევე, თუ ტელეფონზე დაყენებული გაქვთ პაროლების გენერატორი აპლიკაცია, კოდს ამ პროგრამიდან მიიღებთ", ნათქვამია გზამკვლევში. სრულად... წყარო: idfi.ge

თბილისი. 2017 წლის 8 დეკემბერს საქართველოს სახალხო დამცველი, ნინო ლომჯარია უფლებამოსილების შესრულებას შეუდგა. საქართველოს პარლამენტმა რიგით მეექვსე სახალხო დამცველი 5 წლის ვადით 30 ნოემბერს აირჩია. თავის პირველ სამუშაო დღეს ნინო ლომჯარიამ მედიასთან საუბარში განაცხადა, რომ სამოქალაქო და პოლიტიკურთან ერთად მისი პრიორიტეტი იქნება სოციალური და ეკონომიკურ უფლებების დაცვა, აპირებს გააძლიეროს ოფისის მუშაობა მოწყვლადი ჯგუფების (ბავშვთა, ქალთა, შეზღუდული შესაძლებლობის მქონე პირთა) უფლებების დაცვის მიმართულებით, ასევე ყურადღებას გაამახვილებს ჯანსაღი ცხოვრების და დასაქმებულთა უფლებების დაცვაზე. ერთ–ერთ მნიშვნელოვან საკითხად მიიჩნევს რეგიონული ოფისების გაძლიერებას და აპარატის თანამშრომელთათვის ღირსეული სამუშაო პირობებს შექმნას. თბილისის ივანე ჯავახიშვილის სახელმწიფო უნივერსიტეტის და ვაშინგტონის სენტ-ლუისის უნივერსიტეტის სამართლის მაგისტრი ნინო ლომჯარია 2016–2017 წლებში იყო გენერალური აუდიტორის პირველი მოადგილე, 2003 წლიდან 2016 წლამდე ხელმძღვანელ პოზიციებზე მუშაობდა ორგანიზაციებში: „სამართლიანი არჩევნებისა და დემოკრატიის საერთაშორისო საზოგადოება" (ISFED), „ევროპული სადამკვირვებლო ორგანიზაციების ქსელი" (ENEMO), საქართველოს ახალგაზრდა იურისტთა ასოციაცია. ნინო ლომჯარია საქართველოს უნივერსიტეტში დღემდე კითხულობს სალექციო კურსს – „დემოკრატია და საარჩევნო სისტემები", გასულ წლებში ილიას სახელმწიფო უნივერსიტეტში მოწვეული პროფესორის რანგში კითხულობდა „საარჩევნო სამართალის" კურსს; არის ოცამდე კვლევისა და პუბლიკაციის ავტორი. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო” (TI) დადებითად აფასებს მთავრობის გადაწყვეტილებას, უარი თქვას უსაფრთხოების და დაზვერვის სამსახურების გაერთიანებაზე. „საერთაშორისო გამჭვირვალობა - საქართველო” მიესალმება ამ ნაბიჯს და საერთაშორისო და ადგილობრივი ექსპერტების მოსაზრებების გათვალისწინებას. უსაფრთხოების სისტემის რეფორმა ქვეყნისათვის ერთ-ერთ მთავარ პრიორიტეტს წარმოადგენს. „უსაფრთხოების სექტორის თანამედროვე სისტემის შექმნის ადვოკატირების" პროექტის ფარგლებში „საერთაშორისო გამჭვირვალობა-საქართველო" „ადამიანის უფლებების სწავლებისა და მონიტორინგის ცენტრთან" ერთად 2018 წლის გაზაფხულზე წარადგენს რეფორმის თაობაზე რეკომენდაციებს. იმედს ვიტოვებთ რომ რეფორმა მაქსიმალურად ღიად, ექსპერტთა ჩართულობით წარიმართება და შედეგად მივიღებთ უსაფრთხობის სამსახურს ანგარიშვალდებულებისა და ზედამხედველობის ძლიერი დემოკრატიული მექანიზმებით", - ვკითხულობთ TI-ის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. ადმინისტრაციული ორგანოს მიერ, მშენებლობის ნებართვის გაცემის პროცესში, რელიგიის საკითხთა სააგენტოს რეკომენდაციის მოთხოვნა უკანონოა - თბილისის საქალაქო სასამართლოს ეს განმარტება თბილისის სააპელაციო სასამართლომაც გაიზიარა. „რელიგიური გაერთიანების ინტერესებს სასამართლოსა და ადმინისტრაციულ ორგანოში TDI წარმოადგენს. პირველი და მეორე ინსტანციის სასამართლოს გადაწყვეტილებები სტრატეგიული მნიშვნელობისაა და კიდევ ერთხელ ადასტურებს მშენებლობის ნებართვის გაცემის პროცესში, ადმინისტრაციული ორგანოების მხრიდან არადომინანტური რელიგიური გაერთიანებებისთვის უკანონო დაბრკოლებების შექმნის ფაქტს", ნათქვამია ორგანიზაციის ვებგვერდზე. სრულად... წყარო: www.tdi.ge

თბილისი. 6 დეკემბერს, ევროკავშირის დაფინანსებით „სამართლიანი არჩევნების" მიერ გამართულ დისკუსიაზე შშმ პირთათვის ინკლუზიური წინასაარჩევნო გარემოს უზრუნველყოფის კუთხით არსებულ გამოწვევებზე იმსჯელეს. „შეხვედრის ძირითადი მიზანი შეზღუდული შესაძლებლობების პირთა საჭიროებების მხრივ პოლიტიკური პარტიების წინასაარჩევნო კამპანიებსა და პროგრამებზე დისკუსია იყო. ხედავენ თუ არა პოლიტიკური პარტიები შშმ პირებს, როგორც ამომრჩეველთა ჯგუფს; რა ნაბიჯებს დგამენ იმისათვის, რომ კამპანიის მესიჯები შშმ ამომრჩევლებამდე მიიტანონ; პასუხობს თუ არა პარტიების პროგრამები შშმ ამომრჩევლების მოთხოვნებსა და საჭიროებებს - ამ კითხვებზე საპასუხოდ შეიკრიბნენ პოლიტიკური პარტიების წარმომადგენლები, შშმ უფლებების აქტივისტები და სამოქალაქო საზოგადოების სხვა წევრები. ორგანიზაციის კვლევა: „საარჩევნო ხმის უფლება შეზღუდული შესაძლებლობის მქონე პირთათვის” ხელმისაწვდომია ბმულზე...", ნათქვამია განცხადებაში. სრულად... წყარო: www.isfed.ge

თბილისი. 21 ნოემბერს, ტოლერანტობისა და მრავალფეროვნების ცენტრმა ადიგენის მუნიციპალიტეტის გამგეობის წინააღმდეგ სასამართლოში სარჩელი შეიტანა. „გამგეობამ TDI-ს უარი უთხრა სოფელ მოხეში ახალი მეჩეთის მშენებლობის შესახებ საჯარო ინფორმაციის მოწოდებაზე. TDI-მ სარჩელით მოითხოვა ინდივიდუალური ადმინისტრაციულ-სამართლებრივი აქტის ბათილად ცნობა და საჯარო ინფორმაციის გაცემა. 5 დეკემბერს ახალციხის რაიონულმა სასამართლომ სარჩელი წარმოებაში მიიღო”, ნათქვამია ორგანიზაციის ვებგვერდზე. სრულად... წყარო: www.tdi.ge

საქართველოს სახალხო დამცველი აპარატი საერთაშორისო ომბუდსმენის ინსტიტუტის განცხადებას ავრცელებს. „საერთაშორისო ომბუდსმენის ინსტიტუტისათვის ცნობილი გახდა იმ სირთულეების შესახებ, რომლის წინაშეც აღმოჩნდა მისი ერთ-ერთი წევრი, საქართველოს სახალხო დამცველის აპარატი და მოქმედი ომბუდსმენი უჩა ნანუაშვილი", - ვკითხულობთ განცხადებაში, - „ომბუდსმენის ინსტიტუტი ნებისმიერი დემოკრატიის ძირითად ელემენტს და კონსტიტუციური რეალობის განუყოფელ ნაწილს წარმოადგენს. სამართლებრივ სახელმწიფოში, ომბუდსმენის დამოუკიდებელი საგამოძიებო მანდატის სრული პატივისცემა და მხარდაჭერა საზოგადოებრივ ინტერესშია. შესაბამისად, საერთაშორისო ომბუდსმენის ინსტიტუტი საქართველოს სახალხო დამცველის მანდატის პატივისცემას და ომბუდსმენის საქმიანობაზე დასაბუთებულ და პროფესიულ რეაგირებას მოითხოვს". სრულად წყარო: ორგანიზაციის ვებგვერდი

თბილისი. შოთა რუსთაველის საქართველოს ეროვნულმა სამეცნიერო ფონდმა გამარჯვებული პროექტებისა და სამეცნიერო მიმართულებების მიხედვით რანჟირებული სიები გამოაქვეყნა. „გამარჯვებული პროექტის ავტორებმა არაუგვიანეს 6 დეკემბრის 18:00 საათისა ფონდის კანცელარიაში უნდა წარმოადგინონ გენერალური დირექტორის ბრძანებით განსაზღვრული დოკუმენტები. გთხოვთ, გაითვალისწინოთ დოკუმენტების ვადის დარღვევით წარმოდგენის შემთხვევაში გამარჯვებულ აპლიკანტებთან საგრანტო ხელშეკრულება არ გაფორმდება", ნათქვამია ფონდის განცხადებაში. სრულად... წყარო: rustaveli.org.ge

თბილისი. საქართველოს პარლამენტის ღია და გამჭვირვალე მმართველობს მუდმივმოქმედმა საბჭომ პარლამენტის თბილისის შენობაში გამართა კონფერენცია - „ხელმისაწვდომი პარლამენტი ყველას". ღონისძიება ჩატარდა პროექტის - "საპარლამენტო დემოკრატიის სისტემის გაძლიერება საქართველოში" ფარგლებში, რომელიც დაფინანსებულია ევროკავშირის (EU) მიერ და ხორციელდება გაეროს განვითარების პროგრამის (UNDP) მიერ IDFI-თან თანამშრომლობით. კონფერენციაზე საქართველოს პარლამენტმა წარმოადგინა პარლამენტის თბილისის შენობის ადაპტირების გეგმა, რომლის შესრულება გაუადვილებს მობილობისა და მხედველობის შეზღუდვის მქონე პირებს პარლამენტის ტერიტორიაზე გადაადგილებას. საქართველოს პარლამენტის შენობის ადაპტირების გეგმა შემუშავებულ იქნა საქართველოს პარლამენტის მიერ, არასამთავრობო ორგანიზაცია „მარიანი"-სთან ერთად, ხოლო ინიციატივის მხარდამჭერებს წარმოადგენდნენ ევროკავშირი (EU) და გაეროს განვითარების პროგრამა (UNDP), ინფორმაციის თავისუფლების განვითარების ინსტიტუტთან (IDFI) თანამშრომლობით. სრულად  წყარო: ორგანიზაციის ვებგვერდი

2017 წლის 28-29 ნოემბერს საქართველოს სახალხო დამცველი, ბრიუსელში ოფიციალური ვიზიტის ფარგლებში, ნატოსა და ევროპარლამენტის წარმომადგენლებს შეხვდა. სახალხო დამცველმა შეხვედრებზე ყურადღება გაამახვილა საქართველოში ადამიანის უფლებების კუთხით არსებულ მდგომარეობაზე, გახმაურებულ საქმეებზე, მათ შორის მუსტაფა ემრე ჩაბუქის, აფგან მუხთარლისა და ე.წ. ციანიდის საქმეზე; ასევე, ხელისუფლების მხრიდან ომბუდსმენის ინსტიტუტზე განხორციელებულ შეტევებსა და ღია დაპირისპირებაზე, რომელმაც მისი შეფასებით, ბოლო პერიოდში კამპანიური სახე მიიღო; განიხილა ახალი სახალხო დამცველის არჩევის კრიტერიუმები და ხაზი გაუსვა პროცესის გამჭვირვალობის აუცილებლობას. სახალხო დამცველმა ასევე შეაფასა სამართალდამცავი სტრუქტურების მუშაობა, მართლმსაჯულების ხარვეზები, საკონსტიტუციო რეფორმა და ქვეყანაში არსებული მედია გარემო. მიაწოდა ინფორმაცია კონფლიქტურ რეგიონებში ადამიანის უფლებათა მდგომარეობის შესახებ. სრულად  წყარო: ორგანიზაციის ვებგვერდი

თბილისი. 30 ნოემბერს, ფონდი „ღია საზოგადოება-საქართველოს" ორგანიზებით გამართულ კონფერენციაზე, აღმოსავლეთის პარტნიორობის სამიტის შედეგების თაობაზე საქართველოს ხელისუფლების, აქ მოქმედი საელჩოებისა და სამოქალაქო საზოგადოების წარმომადგენლებმა იმსჯელეს. კონფერენციის მონაწილეებმა განიხილეს ევროკავშირ-საქართველოს ურთიერთობები და საქართველოს სამომავლო ვალდებულებები ევროინტეგრაციის გზაზე. არასამთავრობო ორგანიზაციებმა გაავრცელეს ერთობლივი განცხადება „აღმოსავლეთ პარტნიორობიდან ევროკავშირის წევრობამდე" და მოუწოდეს მთავრობას, რომ საქართველოს პარლამენტთან და სამოქალაქო საზოგადოებასთან თანამშრომლობით საქართველოს ევროკავშირში გაწევრიანების ყოვლისმომცველი უწყებათაშორისი საგზაო რუკის შემუშავება დაიწყოს. განცხადებას ხელს აწერენ საქართველოს რეფორმების ასოციაცია, საქართველოს პოლიტიკის ინსტიტუტი და ფონდი „ღია საზოგადოება-საქართველო". სრულად  წყარო: ორგანიზაციის ვებგვერდი

თბილისი. საქართველოს სახალხო დამცველმა შეზღუდული შესაძლებლობის მქონე პირთა უფლებების კონვენციის პოპულარიზაციის, დაცვისა და იმპლემენტაციის მონიტორინგის საკონსულტაციო საბჭოს ვაკანტურ პოზიციებზე ახალი კანდიდატები შეარჩია. ესენი არიან: კობა ნადირაძე – შშმ პირთა უფლებების დამოუკიდებელი აქტივისტი; მარინე კორკოტაძე – შშმ ბავშვთა მშობელთა ორგანიზაციის წარმომადგენელი; მარინა კობახიძე – სამართლის მაგისტრი, შშმ პირთა თემის წარმომადგენელი; ესმა გუმბერიძე – ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის სტუდენტი, შშმ პირთა თემის წარმომადგენელი. საბჭოს საქმიანობის მიზანია საქართველოს სახალხო დამცველის აპარატის მიერ, „შეზღუდული შესაძლებლობის მქონე პირთა უფლებების" გაეროს 2006 წლის კონვენციის იმპლემენტაციის მონიტორინგის ეფექტიანი განხორციელების ხელშეწყობა, კონვენციის პრინციპების გათვალისწინებით. სრულად  წყარო: ორგანიზაციის ვებგვერდი

30 ნოემბერს, 09:30 საათზე საქართველოს სტრატეგიული კვლევებისა და განვითარების ცენტრი მართავს დაინტერესებულ მხარეთა ფორუმს - „კორპორაციული სოციალური პასუხისმგებლობა და შრომითი სტანდარტები”.  სამუშაო ენები: ქართული და ინგლისური (სინქრონული თარგმანის უზრუნველყოფით). მისამართი: თავისუფლების მოედანი #4, სასტუმრო Courtyard by Marriott Tbilisi, დიდი საკონფერენციო დარბაზი.

თბილისი. საქართველოს ახალგაზრდა იურისტთა ასოციაცია, მთავრობაში დაგეგმილ ცვლილებებთან დკავშირებით, განცხადებას ავრცელებს. „მისასალმებელია, საქართველოს მთავრობის მიზანი შეიქმნას მოქნილი სახელმწიფო აპარატი, შემცირდეს ბიუროკრატია და მოხდეს ხარჯების მაქსიმალური ოპტიმიზაცია, თუმცა, აღსანიშნავია, რომ ძირეული ცვლილებები დაიგეგმა საზოგადოებრივი ჩართულობისა და საჯარო დისკუსიების გამართვის გარეშე. განმარტებითი ბარათის თანახმად, ცვლილებები განპირობებულია საჯარო მმართველობის რეფორმის ფარგლებში საჯარო სამსახურის ბიუროსა და საქართველოს მთავრობის ადმინისტრაციის მიერ განხორციელებული ინსტიტუციური და ფუნქციური ანალიზის საფუძველზე, თუმცა აღნიშნული დოკუმენტი ამ დროისათვის არ არის საჯარო და ხელმისაწვდომი", - აცხადებს საია. სრულად წყარო: ორგანიზაციის ვებგვერდი

თბილისი. ნარკოპოლიტიკის რეფორმის მხარდამჭერი ორგანიზაციები ეხმაურებიან საქართველოს პარლამენტში დღეს დაგეგმილი საკომიტეტო მოსმენის გაუქმებას, რომელზეც ნარკოპოლიტიკის რეფორმის საკანონმდებლო პაკეტის პირველი განხილვა უნდა გამართულიყო. „გუშინ გვიან ღამით, ჩვენთვის მედიიდან გახდა ცნობილი, რომ დანიშნული საკომიტეტო განხილვა მოულოდნელად გაუქმდა, ისე რომ მიზეზების შესახებ განმარტება არავის გაუკეთებია. ასევე, მედიიდან ხდება ცნობილი, რომ განათლების კომიტეტის თავმჯდომარე კომიტეტის გაუქმებას კანონპროექტზე პოზიციების შეუჯერებლობას უკავშირებს, რაც ჩვენთვის გაუგებარი და საგანგაშოა", - ნათქვამია პლათფორმის მიერ გავრცელებულ განცხადებაში, - „ხანგრძლივი მოლაპარაკებების და კანონპროექტზე უკვე მიღწეული შეთანხმებების მიღმა, პლატფორმა ვერ ხედავს კომპრომისის დამატებით რესურსს და საკანონმდებლო განხილვების გადავადების საფუძველს. ამის გათვალისწინებით, ვითხოვთ კანონპროექტის შეთანხმებული ვერსია დადგეს კენჭისყრაზე და პარლამენტმა ფორმალურ პროცესში დააფიქსიროს უჭერს თუ არა მხარს რეპრესიული ნარკოპოლიტიკის დასრულებას ქვეყანაში". სრულად  წყარო: emc.org.ge

კახეთი. 30 ოქტომბრიდან 8 ნოემბრის ჩათვლით, საქართველოს წითელი ჯვრის საზოგადოებამ ჩაატარა საბაზისო ტრენინგები ხუთი სამიზნე ფილიალის მოხალისებისათვის (საგარეჯო, თელავი, ყვარელი, ლაგოდეხი და ახმეტა). ტრენინგები მიზნად ისახავდა მონაწილეების ცოდნის ამაღლებას კატასტროფების მართვის, პირველ დახმარებისა და ფსიქოსოციალურ დახმარების მიმართულებით. სრულად... წყარო: ორგანიზაციის ვებგვერდი სოციალურ ქსელში

თბილისი. 2017 წლის 27 ნოემბერს საქართველოს სახალხო დამცველმა საქართველოს პარლამენტის, სამთავრობო უწყებების, საერთაშორისო ორგანიზაციებისა და არასამთავრობო სექტორის წარმომადგენლებს 2012-2017 წლების საქმიანობის შემაჯამებელი ანგარიში გააცნო. ანგარიშში წარმოდგენილია საქართველოს სახალხო დამცველის მანდატის ფარგლებში განხორციელებული საქმიანობა ინდივიდუალური საქმისწარმოების, მონიტორინგის, საზოგადოების ცნობიერების ამაღლებისა და განათლების, ასევე საერთაშორისო უფლებადაცვით ორგანიზაციებთან ურთიერთობის მიმართულებით. სრულად წყარო: ორგანიზაციის ვებგვერდი

თბილისი. ყოველი თვის ბოლო ხუთშაბათს, ფონდი "ღია საზოგადოება-საქართველოს" ოფისში გრანტის მაძიებლებთან საკონსულტაციო შეხვედრები იმართება. ფონდის განცხადებით, ეს საკონსულტაციო შეხვედრები 2018 წლის იანვრიდან განახლდება. სრულად  წყარო: ორგანიზაციის ვებგვერდი

სამცხე-ჯავახეთი. 17-20 ნოემბერს, საქართველოს წითელი ჯვრის საზოგადოების რვა ფილიალიდან (ახმეტა, ბათუმი, სენაკი, ზუგდიდი, ქუთაისი, რუსთავი, მარნეული, თბილისი) მოხალისეები და თანამშრომლები გამოცდილების გაზიარების მიზნით დაბა ბაკურიანში შეიკრიბნენ. „თითოეულმა მონაწილემ წარმოადგინა საკუთარი ისტორია „რატომ და როგორ წითელ ჯვართან ერთად". გაიმართა მწვავე დისკუსია ფილიალში მოხალისეობრივი მოძრაობის განვითარების ხელშეწყობაზე (მოხალისეთა მოზიდვა, აღიარება და შენარჩუნება), ცნობადობის ამაღლებაზე, ადგილობრივ დონეზე პარტნიორთა მობილიზებასა და რესურსების მოძიების გაუმჯობესებაზე. შეხვედრის მონაწილეებმა ისაუბრეს იმ კარგი მაგალითებისა და იდეების შესახებ, რომელთა გაზიარება მომავალში შესაძლებელია რეგულარული სერვისებისა და მოხალისეობრივი ინიციატივების განსახორციელებლად", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ტოლერანტობისა და მრავალფეროვნების ინსტიტუტი (TDI) აქვეყნებს დოკუმენტურ ვიდეოს: „ჰურიე". ვიდეო მომზადებულია PROLoG-ის ცნოებიერების ამაღლების პროექტის ფარგლებში. დოკუმენტური ვიდეო ეხება 25 წლის ჰურიე აბაშიძეს, რომელიც თბილისში, ილიას სახელმწიფო უნივერსიტეტში ფსიქოლოგიის მიმართულებით მაგისტრატურაზე სწავლობს. წყარო: ორგანიზაციის ვებგვერდი სოციალურ ქსელში

თბილისი. საზოგადოების მაღალი ინტერესიდან გამომდინარე, სახალხო დამცველი უჩა ნანუაშვილი რელიგიათა საბჭოს მიერ 2017 წლის 16 ნოემბერს „ტოლერანტობის ქომაგის" ჯილდოს გადაცემის საკითხზე დამატებით განმარტებას აკეთებს. სახალხო დამცველი ხაზგასმით აღნიშნავს, რომ „ტოლერანტობის ქომაგებს" გამოავლენს რელიგიათა საბჭო, სახალხო დამცველის ყოველგვარი ჩარევის გარეშე. წესდების მიხედვით, რელიგიათა საბჭო ხმათა უმრავლესობით ირჩევს „ტოლერანტობის ქომაგს", ხოლო ხმის უფლება მხოლოდ საბჭოში გაწევრიანებული რელიგიური ორგანიზაციების წარმომადგენლებს აქვთ. სრულად  წყარო: ორგანიზაციის ვებგვერდი

თბილისი. ევროპის ფონდი და აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის ოცდაოთხი წევრი ორგანიზაცია მიმართავს საქართველოს პრემიერ-მინისტრს, საქართველოს მთავრობას, საქართველოს პარლამენტს და ყველა სხვა დაინტერესებულ მხარეს, ღიად განიხილოს ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის პოლიტიკური მნიშვნელობა და ფუნქციები, რათა მიმდინარე სტრუქტურულმა ცვლილებებმა ზიანი არ მიაყენოს საქართველოსთვის სტრატეგიულად მნიშვნელოვან ევროატლანტიკური ინტეგრაციის პროცესს. სრულად  წყარო: http://www.epfound.ge