კახეთი. 3 აპრილს თელავის დემოკრატიული ჩართულობის ცენტრში სპორტისა და ახალგაზრდობის სამინისტროს მრგვალი მაგიდის შეხვედრა გაიმართა, რომელსაც კახეთში მოქმედი არასამთავრობო ორგანიზაციების წარმომადგენლები ესწრებოდნენ. შეხვედრაზე საუბარი იყო სპორტისა და ახალგაზრდობის სამინისტროს 2013 წლის პრიორიტეტულ მიმართულებებზე, რომელიც მორგებულია ახალგაზრდებზე. ნანა ათუაშვილი, არასამთავრობო ორგანიზაცია ვოლდ ვიჟენის წარმომადგენელი. „აღნიშნული შეხვედრაზე დასწრება განსაკუთრებით მნიშვნელოვანია იმ არასამთავრობო ორგანიზაციებისთვის, რომლებიც ახალგაზრდების კუთხით ახორციელებენ პროექტებს. ასევე მნიშვნელოვანია რეგიონებში მოქმედი არასამთავრობო ორგანიზაციების ჩართვა ამ საქმიანობაშიც".

აჭარა. 26 მარტს, ასოციაცია ,,ღირსეული სიბერის" ოფისში, პროექტის ,,ხანდაზმულთა სოციალური ცენტრი" ფარგლებში, თაობებს შორის დიალოგის ფორმატში მორიგი შეხვედრა გაიმართა. შეხვედრაში ქობულეთის საჯარო სკოლის უფროსკლასელები, პედაგოგები, ასოციაციის თანამშრომლები და ველოსპორტის აჭარის ფედერაციის პრეზიდენტი, საქართველოს ველოსპორტის ფედერაციის ვიცე-პრეზიდენტი, წარსულში საგზატკეცილო ველოსპორტში ევროპის ჩემპიონი ჯონი ცივაძე მონაწილეობდნენ. ახალგაზრდები გაეცნენ გამოცდილი სპორტსმენის ბიოგრაფიას, სტუმარმა ახალგაზრდების კითხვებსაც უპასუხა.  შეხვედრა ვეტერან სპორტსმენთა ღვაწლის და დამსახურების ახალგაზრდობისთვის გაცნობას, ჯანსაღი ცხოვრების წესისა პროპაგანდას, ახალგაზრდობაში მავნე ჩვევების (ნარკოტიკები, თამბაქო, ალკოჰოლი) პრევენციას ისახავს მიზნად. წყარო:ორგანიზაციის გვერდი სოციალურ ქსელში

მცხეთა–მთიანეთი. „ჩვენ-ჯანსაღი მომავლისათვის" „ქალთა ფონდი საქართველოში"-ის დაფინანსებით წეროვნის დევნილთა დასახლებაში, ახორციელებს პროექტს - „ ქალთა ველოკლუბი-ჯანსაღი ცხოვრებისათვის". ველოკლუბში გაწევრიანება შეუძლიათ წეროვანის დევნილთა დასახლებაში მცხოვრებ დევნილ ქალბატონებს, 25 წლის ზევით. პროექტის ფარგლებში, კლუბის წევრები შეიკრიბებიან, ჩატარდება მათთვის სემინარი ჯანსაღი ცხოვრების წესის შესახებ. მსურველებისაგან ჩამოყალიბდება ჯგუფები, შედგება სასწავლო ცხრილი, ტრენერის მეშვეობით მოეწყობა მათი ერთობლივი სწავლება და გასეირნება ორგანიზაციის ველოსიპედებით. კლუბში გაწევრიანების მსურველები 15 აპრილამდე ორგანიზაციას სოციალური ქსელის საშუალებით უნდა დაუკავშირდნენ.  წყარო:ორგანიზაციის გვერდი სოციალურ ქსელში

აჭარა. 26 დეკემბერს, ბათუმის ევროპის მოედანზე, ახალგაზრდულმა ორგანიზაცია „Art Way" პროექტის „რე–ანიმაციას” ფარგლებში  მორიგი ღონისძიება – „ქუჩის სახალისო შეჯიბრი" გამართა. აღნიშნული შეჯიბრი ჩატარდა სპორტის სხვადასხვა მიმართულებით: ბოულინგი, დარცი, ბილიკის გავლა და სხვა. აქტივობა მიზნად ისახავდა უსინათლოთა მიმართ მორალური მხარდაჭერის გამოხატვას. ასევე; საზოგადოებისთვის ერთგვარი მესიჯის გაგზავნას, რათა სპორტულ ღონისძიებებში უსინათლოთა ჩართვას დაუჭირონ მხარი. შეჯიბრში მონაწილეობას იღებდნენ „Art Way” კლუბის წევრები და ღონისძიებით სპონტანურად დაინტერესებული პირები. პროექტი დაფინანსებულია აღმოსავლეთ–დასავლეთ მართვის ინსტიტუტის მიერ.

თბილისი. 9 ნოემბერს „რასიზმისა და ანტისემიტიზმის წინააღმდეგ ბრძლოლის’’ საერთაშორისო დღე აღინიშნება. მას მიეძღვნება ახალგაზრდული ასოციაცია „დრონის", საქართველოს ფეხბურთის ფედერაციის, საქართველოს ტექნიკურ უნივერსიტეტისა და კომპანია „Aqua-Geo”-ს პარტნიორობით დაგეგმილი პროექტის – „ერთად დავამარცხოთ ფაშიზმი და რასიზმი- გამოხატე შენი პოზიცია"– წარმოდგენა. პროექტის ფარგლებში რვა ფეხბურთის გუნდი, რვა სხვადასხვა ეთნიკური და ნაციონალური უმცირესობების წარმომადგენლები, შეხვდებიან ერთმანეთს ფეხბურთის ტურნირის განმავლობაში საქართველოს ტექნიკური უნივერსიტეტის სპორტულ დარბაზში. ღონისძიების მიზანია  სამართლიანობის, კაცთმოყვარეობის მესიჯის გავრცელება სხვადასხვა სქესისა და ეთნიკური წარმომავლობის, რელიგიური და ეკონომიკური კუთვნილების ადამიანებს შორის, ასევე ჩართულობის, ჯანმრთელი ცხოვრების წესისა და ტოლერანტობის პოპულარიზება. ღონისძიება 9 ნოემებერს 12 საათზე დაიწყება. სრულად წყაროო: „დრონის" გვერდი სოცალური ქსელი 

იმერეთი. საქველმოქმედო ჰუმანიტარულმა ცენტრმა „აფხაზეთმა" ბელგიელი EVS მოხალისის დახმარებით 500 ევროს შემოწირულობა მიიღო ორგანიზაციებისგან - „Gemeente Middelkerke" და „Cel Ontwikkelingssamenwerking". ცენტრ „აფხაზეთის" ოფიციალური ვებგვერდის მიხედვით, ეს თანხა მოხმარდება ლაგოდეხის რაიონის სოფელ ბაისუბნის საჯარო სკოლის სპორტული დარბაზის რეაბილიტაციას. სკოლაში 250-მდე მოზარდი სწავლობს, მათ შორის ბაისუბნის მცირე საოჯახო ტიპის სახლის აღსაზრდელები.  „სპორტული დარბაზის რეაბილიტაციის შემდეგ შესაძლებელი გახდება ზამთრის თვეებში ფეხბურთის, კალათბურთისა და სხვა წრეების ორგანიზება, რაც ხელს შეუწყობს ამ სოფელში მცხოვრები ბავშვების განვითარებას და სპორტულ აქტივობებში ჩართვას" – ნათქვამია ორგანიზაციის ვებგვერდზე გავრცელებულ განცხადებაში.  სრულად წყარო: chca.org.ge

  კახეთი. 15 სექტემბერს პროექტის – „იმოქმედე მწვანედ" – ფარგლებში მოეწყო ექსკურსია. წნორის საინიციატივო ჯგუფის აქტივისტებმა დაასუფთავეს ხორნაბუჯის ციხისა და ელიას მთის მიმდებარე ტერიტორიები. ორგანიზაცია მაისურებისთვის და საჭირო ინვენტარით უზრუნველყოფისთვის მადლობას უხდის მწვანეთა მოძრაობას. პროექტი ხორციელდება Iris Group – Managing Diversity–ისა და Joint Civic Education–ის მხარდაჭერით. სრულად წყარო: ორგანიზაციის გვერდი სოციალურ ქსელში  

შიდა ქართლი. 12 სექტემბერს საზოგადოება „ბილიკის" დღის ცენტრების  მოზარდები ახალციხეს ესტუმრნენ. ბავშვებმა მოინახულეს განახლებული ქალაქი და ციხე–ქალაქი რაბათი,სადაც მთელი დღე დაჰყვეს. ექსკურისაში მონაწილეობას იღებდნენ ცენტრების პედაგოგებიც. ბავშვები კმაყოფილები და შთაბეჭდილებებით სავსე დაბრუნდნენ ექსკურსიიდან.

ქვემო ქართლი. ორგანიზაცია „სიქამ” და მისმა მოხალისებმა დაარსეს კლუბი - „სიქა-მოგზაური". მისი მიზანია ხელი შეუწყოს მოზარდებსა და ახალგაზრდებში მოგზაურობის კულტურის პოპულარიზაციას. კლუბი მსურველებს საშუალებას მისცემს, უფრო ახლოს გაეცნოთ იმ ქვეყნებს, სადაც უმოგზაურიათ „სიქას" მოხალისეებს. ასევე სპეციალურად შექმნილი პრეზენტაციებით, კლუბის მონაწილეები მიიღებენ პრაქტიკულ და სპეციფიკურ რჩევებს მოგზაურობის შესახებ. კლუბში გაწევრიანებით დაინტერესებული პირები უნდა მივიდნენ ორგანიზაციაში - „სიქა" (საგანმანათლებლო ინიციატივების ქართული ასოციაცია) და შევასონ აპლიკაცია.  კლუბის ფუნქციონირება ორგანიზაცია „სიქას" თანადაფინანსებით არის შესაძლებელი და საწევრო გადასახადი თვეში შეადგენს 25 ლარს. სრულად წყარო: ორგანიზაციის გვერდი სოციალურ ქსელში

თბილისი.ორგანიზაცია „ტფილისის ჰამქარი’ მსურველებს სთავაზობს მორიგ საგანმანათლებლო ტურს ”ფეხით შემოვლილი თბილისი - კალა-კლდისუბანი-აბანოთუბანი-ხარფუხი”. „მარშრუტზე საუბარი იქნება გალავანს შიგნითა ქალაქზე: გავივლით ზემო კალას, კლდისუბანს, ვნახავთ თბილისის ერთ-ერთ ყველაზე ძველ საკულტო ნაგებობას - ათეშგას, ქალაქის ზღუდის ნარჩენებს და უძველესი ბასტიონის შაჰტახტის ნანგრევს, ვნახავთ აბანოთუბნის გათხრებს, წავკისის წყლის გაწმენდილ ხევს და ავალთ სეიდაბადში-ხარფუხში გრიშაშვილის სახლ-მუზეუმში." – ნათქვამია ორგანიზაციის ოფიციალურ გვერდზე სოციალურ ქსელში ტური ჩატარდება 15 სექტემბერს. სრულად წყარო: ორგანიზაციის გვერდი სოციალურ ქსელში

სამცხე–ჯავახეთი. სექტემბრის ბოლოს საქართველო უმასპინძლებს გარემოსდაცვითი განათლების საკითხებისადმი მიძღვნილ საერთაშორისო კონფერენციას - ,,გარემოსდაცვითი განათლება მდგრადი განვითარებისთვის: თბილისი+35” . აღნიშნულ კონფერენციას წინ უსწრებს გარემოსდაცვითი კვირეული, რომელიც აერთიანებს ეროვნულ დონეზე სხვადასხვა დაინტერესებულ მხარეთა მიერ ორგანიზებულ გარემოსდაცვით საგანმანათლებლო ღონისძიებებს. კვირეულის ფარგლებში 30 აგვისტოს, სამცხე-ჯავახეთის რეგიონული გარემოსდაცვითი კავშირის ,,ეკოდახისა” და ახალციხის დემოკრატიული ჩართულობის ცენტრის ინიციატივით მოეწყო დისკუსია თემაზე: ,,ეკოტურიზმის განვითარების მნიშვნელობა საქართველოში”. ღონისძიებას სტუდენტები, არასამთავრობო და სამთავრობო ორგანიზაციების წარმომადგენლები ესწრებოდნენ. დისკუსიის მონაწილეები გაეცვნენ ინფორმაციას ეკოტურისტული აქტივობების და სერვისების, განახლებული ინფრასტრუქტურისა და ეკოტურიზმის მნიშვნელობის, ფასეულობების, ეკონომიკური და სოციალური სარგებლობის შესახებ. მონაწილეებს აჩვენეს ფილმი ,,საქართველოს დაცული ტერიტორიები”, გადასცეს ბუკლეტები და გზამკვლევი რუკები.  

შიდა ქართლი. 30 აგვისტოს, გორის დემოკრატიული ჩართულობის ცენტრში გაიმართა შეხვედრა თემაზე: გორის ტურისტული პოტენციალი და ტურისტული ბიზნესის განვითარება, როგორც ისტორიულ-სანახაობრივი კუთხით, ასევე სპორტის მიმართულებით.  გორის მუნიციპალიტეტის ტურისტულ პოტენციალში მოიაზრება სამკურნალო ტურიზმი - კურორტი გორიჯვარი (რესპუბლიკური მასშტაბის ბალნეოლოგიური კურორტი); ტანას ხეობა, სადაც მდებარეობს უძველესი ქართული ხუროთმოძღვრების ძეგლი ვერეს ციხე და მონასტერი, ტანას ხეობაში მდებარე უნიკალური ჩანჩქერი, რომელიც ზამთრის პერიოდში იყინება და საინტერესოა ექსტრემალური ტურიზმის მოყვარულთათვის; ასევე - კლდეში ნაკვეთი უძველესი ქალაქი უფლისციხე და მრავალი სხვა უნიკალური ადგილი, რაც მთლიანობაში ხელსაყრელ გარემოს ქმნის ტურიზმის განვითარებისათვის. შეხვედრას ესწრებოდნენ: გორის მუნიციპალიტეტის საკრებულოს თავმჯდომარე ზვიად ხმალაძე, საკრებულოს უფროსი სპეციალისტი ეკა ჯაფიაშვილი, სამოქალაქო საზოგადოების და კერძო სექტორის წარმომადგენლები, ჟურნალისტები და მოქალაქეები.

სამცხე–ჯავახეთი. 25 ივლისს, სამოქალაქო განათლებისა და პედაგოგთა გადამზადების პროგრამის ფარგლებში, ახალციხის ახალგაზრდული ცენტრის ორგანიზებით, სამოქალაქო კლუბის წევრებისთვის ტრენინგ-ლაშქრობა მოეწყო. ღონისძიება ნასწავლის პრაქტიკაში გამოყენებას ისახავდა მიზნად და მასში ახალციხისა და ადიგენის მუნიციპალიტეტის 6 სკოლებიდან სულ 25 მოსწავლე მონაწილეობდა. კლუბის წევრებმა სოფელ ურავლის ხეობა და აქ მდებარე აგარის ეკლესია მოინახულეს, შემდეგ ადიგენის სამოქალაქო კლუბის განმანათლებელმა ლონდა მაჭარაშვილმა თანატოლებს Civics.ge–ს ონლაინ ბიბლიოთეკის საშუალებით მოამზადებული თემა „გენდერი", წარუდგინა. თემის ირგვლივ დისკუსია გაიმართა, ბოლოს კი მსმენელებმა თავიანთი დამოკიდებულება შეფასების ფურცელზე დააფიქსირეს. ,,ტრენინგ-ლაშქრობის მიზანია, მოსწავლეები გაეცნონ მხარის გარემოს, ისტორიას და სხვადასხვა აქტუალურ თემებზე ისაუბრონ”, - განმარტა ახალგაზრდული ცენტრის თანამშრომელმა მზია ინასარიძემ.

თბილისი. ასოციაცია „ელკანა" ბუნების მოყვარულებს სთავაზობს ახალ ტურისტულ ბილიკებს ონისა და ასპინძის მუნიციპალიტეტებში. ბილიკები შემუშავებულია პროექტის - „სოფლის ტურიზმის განვითარება საქართველოში" ფარგლებში, შვეიცარიის განვითარებისა და თანამშრომლობის სააგენტოს მხარდაჭერით.  ბილიკები მონიშნულია და განკუთვნილია ქვეითად მოგზაურთათვის. კერძოდ: ბუბისა და თბილისას ბილიკები. დასაწყისი კურორტი შოვიდან. მარშრუტების გავლა შესაძლებელია ორხიდიანი მანქანებითაც; ღურშევის ბილიკი ქვეითად მოსიარულეთათვის. დასაწყისი კურორტი შოვიდან; ვაიოს ველების ბილიკები. დასაწყისი ვარძიიდან. მარშრუტის გავლა შესაძლებელია ასევე მთის ველოსიპედებითა და ორხიდიანი მანქანებით. ბილიკების გავლა შესაძლებელია ინდივიდუალურად. ბილიკების ნიშნულებზე მითითებულია ადგილის სიმაღლე და მანძილი დანიშნულების ადგილამდე. დეტალური ინფორმაციის მიღება შესაძლებელია ასოციაცია „ელკანას" სოფლის ტურიზმის განყოფილებაში. წყარო: cenn

იმერეთი. 27 ივლისს, ტურიზმის განვითარების პერსპექტივებზე, ქუთაისის დემოკრატიული ჩართულობის ცენტრში საჯარო დისკუსია გაიმართა. შეხვედრის მიზანი ტურიზმის განვითარების ძირითადი მიმართულების შესახებ მოქალაქეების ინფორმირება და ამ კუთხით პრობლემური საკითხების გადაწყვეტა იყო. დისკუსიაში მონაწილეობა ქუთაისის მერიის ეკონომიკური პოლიტიკისა და სტრატეგიული განვითარების სამსახურის თანამშრომლებმა, საზოგადოებრივმა ორგანიზაციებმა, ტურისტულმა სააგენტოებმა და მედიის წარმომადგენლებმა მიიღეს. შეხვედრა ინტერაქტიულ რეჟიმში წარიმართა.

კახეთი. გურჯაანში ველო რბოლა გაიმართა. ღონისძიება საინიციატივო ჯგუფმა ,,ერთად ვაკეთოთ სიკეთე" გამართა.იგი მიზნად ახალგაზრდებში ჯანსაღი ცხოვრების წესის პოპულარიზაციას ისახავდა. მონაწილეებმა სტარტი ვაჟა–ფშაველას ქუჩის დასაწყისში აიღეს და ფინიშის ხაზი გურჯაანის ტყე–პარკის  შესასვლელთან გადაკვეთეს. ღონისძიების ჩატარების შესახებ ინიციატივა გურჯაანის პირველი საჯარო სკოლის სამოქალაქო განათლების კლუბის წევრს ლევან ყანდიაშვილს ეკუთვნის. ლევან ყანდიაშვილი, სამოქალაქო განათლების კლუბის წევრი:,,ყველა მრბოლელს გადაეცა სამახსოვრო სიგელი, ხოლო გამარჯვებული დასაჩუქრდა სიმბოლური პრიზით, რომელიც ახალგაზრდული განვითარებისა და დასაქმების ცენტრმა შეიძინა".

ბათუმი. 5 ივლისს, ბათუმის დემოკრატიული ჩართულობის ცენტრში, გაიმართა საჯარო დისკუსია თემაზე: სამთო – სათხილამურო კურორტის მოწყობა გოდერძის უღელტეხილზე, რომელიც ბათუმის დემოკრატიული ჩართულობის ცენტრის მიერ იქნა ორგანიზებული. აჭარის ა.რ. ფინანსთა და ეკონომიკის სამინისტრომ და კომპანია „გოდერძი რეზორტის" დირექტორმა, გამჭვირვალობის უზრუნველყოფისა და ინფორმაციის გავრცელების მიზნით, გამართა პროექტის პრეზენტაცია. შეხვედრის მონაწილეებმა იმსჯელეს კურორტის მშენებლობასა და ეკონომიკურ ეფექტებზე, ასევე განიხილეს სამთო კურორტის მშენებლობის არეალში მოქცეული მიწების საკითხიც. როგორც ფინანსთა და ეკონომიკის მინისტრის მოადგილემ განაცხადა, აღნიშნულ არეალში მოქცეული ოჯახების საკითხი ინდივიდუალურად გადაწყდება. დისკუსიას ესწრებოდნენ სამოქალაქო საზოგადოების, ხელისუფლების და მედიის წარმომადგენლები.

აჭარა. 25 მაისს, ბათუმის დემოკრატიული ჩართულობის ცენტრში, „სამოქალაქო საზოგადოების ინსტიტუტისა" და აჭარის ტურიზმისა და კურორტების დეპარტამენტის ორგანიზებით გაიმართა შეხვედრა თემაზე: „ახალი ტურისტული სეზონი და ტურიზმის დეპარტამენტის ახალი ტურისტული პროექტები".  ტურიზმის დეპარტამენტის წარმომადგენლებმა შეხვედრა მიმდინარე წლსი დაგეგმილი პროექტების პრეზენტაციით დაიწყეს.  ისაუბრეს აგრეთვე თავიანთი მარკეტინგული და სარეკლამო საქმიანობის შესახებ და სამოქალაქო სექტორის, ტურისტული სააგენტოების, სასტუმროებისა და ტურიზმის ფაკულტეტის სტუდენტებს ბათუმის ტურისტული სააგენტოს ახალი პროექტები და პროდუქტები გააცნეს. პრეზენტაციის შემდეგ გაიმართა დისკუსია სხვადასხვა პრობლემატურ საკითხებზე და სამომავლო გეგმებზე.

კახეთი. 3 მაისს, სიღნაღში კახეთის განვითარების სამუშაო ჯგუფის შეხვედრა გაიმართა, სადაც სახელმწიფო უწყების, კერძო სექტორის, დონორი და საზოგადოებრივი ორგანიზაციების წარმომადგენლებმა კახეთის ტურისტული შესაძლებლობებზე ისაუბრეს. შეხვედრას საქართველოს სოფლის მეურნეობის სამინისტროს, სტრატეგიული განვითარებისა და ტურიზმის სააგენტოს ერთად მსოფლიო ბანკის, აშშ–ს საერთაშორისო განვითარების სააგენტოს წარმომადგენლები ესწრებოდნენ. სტრატეგიული განვითარების სააგენტოს ხელმძღვანელის ივა დავითაიას თქმით, სამუშაო ჯგუფების შეხვედრა და კონკრეტული მიზნობრივი ბაზრების განსაზღვრა კახეთში ტურისტული პროექტების წარმატებით განხორციელებას ემსახურება.