თბილისი.საერთაშორიშო გამჭვირვალობა - საქართველომ ყოველკვირეული აუდიო პოდკასტის მორიგი გამოშვება გამოაქვეყნა. საპარლამენტო ამბების 20 მაისის გადაცემის მთავარი თემებია: შრომის კოდექსი მეორედ მოსმენა, 17 მაისს განვითარებული მოვლენები. საპარლამენტო ამბების პოდკასტი 20 მაისი წყარო: transparency.ge

იმერეთი.სამოქალაქო განათლებისა და პედაგოგთა გადამზადების პროგრამის ფარგლებში ქუთაისის სამიზნე სკოლების მოსწავლეებისათვის ჩატარდა ტრენინგი თემაზე: „პრეზენტაციის ტექნიკები და საჯარო გამოსვლები, დროის მართვა". ტრენინგზე მსმენელები გაეცნენ საჯარო გამოსვლის ტექნიკებს, დაეუფლნენ პრეზენტაციის უნდარ-ჩევებს, მოამზადეს წარმატებული გამოსვლის ქეისები. იმუშავეს დროის ეფექტურ გამოყენებასა და აუდიტორიის მართვის თემებზე. სხეულის ენასა და მისი მართვის მნიშვნელობაზე საჯარო გამოსვლების დროს. წყარო: ორგანიზაციის გვერდი სოციალურ ქსელში

კახეთი. 19 მაისს, თელავში, ევრაზიის თანამშრომლობის ფონდმა გამართა ანგარიშის პრეზენტაცია „სურსათის უვნებლობის სახელმწიფო რეგულირება: საქართველოს ხელისუფლების მიერ 2012 წელს გაწეული საქმიანობის შეფასება". პრეზენტაციაზე შეაფასეს 2012 წელს სურსათის უვნებლობის რეგულირების კუთხით საქართველოს ხელისუფლების მიერ გაწეულ საქმიანობას, გამოყვეს პრობლემები, რომლებიც ხელს უშლის რეფორმების განხორციელებას. ევრაზიის თანამშრომლობის ფონდის პროგრამის მენეჯერის ვახტანგ კობალაძის თქმით პრეზენტაციაზე წარმოდგენილი ანგარიში წინასწარია: ,,ევრაზიის თანამშრომლობის ფონდი, ანგარიშის ავტორებთან ერთად, აგროვებს შენიშვნებს ანგარიშის თემაზე მომუშავე კომპეტენტური ორგანიზაციებისაგან და მზად არის ყველა რელევანტური შენიშვნა გაითვალისწინოს, რის შემდეგაც ანგარიშის საბოლოო ვერსია გამოიცემა. ანგარიში მომზადდა ევრაზიის თანამშრომლობის ფონდის ინიციატივით, დამოუკიდებელ ექსპერტთა მიერ, ევროკავშირისა და შვედეთის საერთაშორისო განვითარებისა და თანამშრომლობის სააგენტოს მიერ დაფინანსებული პროექტის ფარგლებში „საქართველოში სურსათის უვნებლობის სფეროში განხორციელებულ რეფორმებში სამოქალაქო საზოგადოების ჩართულობის ხელშეწყობა". პრეზენტაციის შემდეგ გაიმართა დისკუსია.

21 მაისს, 12:00 საათზე აღმოსავლეთ–დასავლეთის მართვის ინსტიტუტი G-PAC–ის პროგრამის ფარგლებში გამართავს ღონისძიებას. სადაც ქართული ანალიტიკური ორგანიზაციები ხელს მოაწერენ ეთიკისა და ხარისხის სტანდარტების სახელმძღვანელო დოკუმენტს. მისამართი: თბილისი, სასტუმრო თბილისი მარიოტი

21 მაისს, 11:00 -14:00 საათზე, ინფორმაციის თავისუფლების განვითარების ინსტიტუტი (IDFI) ციფრულ საეთერო მაუწყებლობაზე გადასვლის სტრატეგიის პრეზენტაციას გამართავს. მისამართი: თბილისი, სასტუმრო თბილისი მარიოტი  

21 მაისს, 17:00 საათზე, სამოქალაქო საზოგადოების ინსტიტუტი გამართავს სამუშაო  შეხვედრას, სადაც წარმოდგენილი იქნება ბათუმის ურბანული განვითარების სტრატეგიული გეგმის შემუშავების მეთოდოლოგია და გრაფიკი. მისამართი: ბათუმი, ფარნავაზ მეფის 62-64, დემოკრატიული ჩართულობის ცენტრი

თბილისი. საქართველოში ევროკავშირის წარმომადგენლობამ ჰომოფობიის წინააღმდეგ ბრძოლის დღეს განვითარებულ მოვლენეთან დაკავშირებით განცხადება გაავრცელა. „საქართველოში ევროკავშირის სახელმწიფოთა წარმომადგენლობების ხელმძღვანელები და ევროკავშირის წარმომადგენლობა საქართველოში აღშფოთებულნი არიან 17 მაისს ზოგიერთი დემონსტრანტის მიერ გამოვლენილი სასტიკი შეუწყნარებლობისა და ძალადობის სამარცხვინო სცენებით, რომელთა მიზანი იყო სხვა დემონსტრანტებისათვის საკუთარი თავის მშვიდობიანად გამოხატვისათვის ხელის შეშლა.  ევროკავშირი მიიჩნევს, რომ ყოველი ადამიანის გამოხატვის თავისუფლებას გადამწყვეტი მნიშვნელობა აქვს... ...ევროკავშირს სწამს, რომ აუცილებელია ნებისმიერ ნიადაგზე, მათ შორის სექსუალური ორიენტაციის ნიადაგზე დისკრიმინაციის წინააღმდეგ ბრძოლა და შემწყნარებლობის, როგორც დემოკრატიული და მშვიდობიანი საზოგადოების საფუძვლის, წახალისება", ნათქვამია განცხადებაში. ევროკავშირი მოუწოდებს საქართველოს მთავრობას დაიცვას მის მიერ ნაკისრი ღირსებისა და უფლებების თანასწორობისა და თავისუფლების საერთაშორისო და ევროპული სტანდარტები. სრულად  წყარო: eeas.europa.eu

თბილისი. მიგრაციის საკითხთა სამოქალაქო კოალიციის და ეკომიგრაციის აჭარის საკოორდინაცო ჯგუფი ერთობლივ განცხადებას ავრცელებენ. ისინი ეკომიგრანტების პრობლემებზე ამახვილებენ ყურადღებას და „მხარდაჭერას უცხადებენ წალკის მუნიციპალიტეტის სოფლებიდან გამოსახლებული ეკომიგრანტების ოჯახებს და შექმნილ სიტუაციაზე სახელმწიფო რეაგირებას არაადეკვატურად აფასებენ". ისინი მზად არიან „რეკომენდაციები მიაწოდონ პასუხისმგებელ სახელმწიფო უწყებებს და დაეხმაროს ეკომიგრაციის სფეროში ეფექტური რეგულაციების დამკვიდრებაში".  სრულად  წყარო: ecomigration.ge

თბილისი. ინტერნეტ სივრცეში გავრცელდა „საქართველოს მოქალაქეების განცხადება 17 მაისის მოვლენებზე". განმცხადებლები მიმართავენ საქართველოს პრეზიდენტს, პრემიერ მინისტრსა და პარლამენტის თავმჯდომარეს. „მოვითხოვთ, ადეკვატურად და დროულად შეაფასოთ აღნიშნული ფაქტები. უმოქმედობა შესაძლოა მეტისმეტად ძვირად დაუჯდეს საქართველოს დემოკრატიულ სახელმწიფოებრიობას, რადგან მიგვაჩნია, რომ ამჟამად ვდგავართ რელიგიური ფუნდამენტალიზმისა და თეოკრატიის სერიოზული საფრთხის წინაშე”, ნათქვამია განცხადებაში.  განცხადება ღიაა და ამ დროისთვის მას 6022 ხელმომწერი ჰყავს.  განცხადება 

აჭარა. ასოციაცია „ღირსეულმა სიბერემ"  ევროკავშირის ფინანსური მხარდაჭერით პროექტის –„ხანდაზმულთა სოციალური ცენტრი" – ფარგლებში სოციალური რეკლამა მოამზადა. ხანდაზმულთა სოციალურ ცენტრში გამართულ პრეზენტაციას პროექტის ბენეფიციარები და მონაწილეები ესწრებოდნენ. რეკლამის შინაარსი მარტოხელა მოხუცების პრობლემას ეხება.  წყარო:ორგანიზაციის გვერდი სოციალურ ქსელში

თბილისი. ჟურნალისტური ეთიკის ქარტია ტელეკომპანია „იმედის" საინფორმაციო სამსახურის ჟურნალისტებს შეხვდნენ. ქარტიის წარმომადგენლებმა ჟურნალისტებს ქარტიის მუშაობის პრინციპები გააცნეს. ტელეკომპანია „იმედი" რიგით მესამე ტელევიზიაა იმ საინფორმაციო კამპანიის ფარგლებში, რასაც ეთიკის ქარტია ახორციელებს, კამპანიის მიზანია ქარტიის საქმიანობაში აქტიურად ჩართონ ჟურნალისტები. სრულად  წყარო: media.ge

თბილისი. ინფორმაციის თავისუფლების განვითარების ინსტიტუტმა გმირთა მოედნის ავტომაგისტრალისა და ესტაკადის მშენებლობის ხარჯები გამოაქვეყნა. ვებგვერდზე განთავსებული ინფორმაციის მიხედვით მშენებლობაზე 111 864 750 ლარი დაიხარჯა.  სრულად  წყარო: opendatablog.wordpress.com

თბილისი. საერთაშორისო გამჭვირვალობა–საქართველომ Telekritika.ge–ზე დისკუსიის მორიგი თემა გამოაქვეყნა –„ჰომოფობიის წინააღმდეგ აქციის ჩაშლა".  რამდენად ამომწურავად გაშუქდა 17 მაისის აქციის ჩაშლა? რომელმა არხმა გაართვა ამ საქმეს ყველაზე კარგად თავი? რომელი არხის გადმოცემა იყო თქვენთვის ყველაზე პრობლემატური, და რატომ? მიკერძოებულობის რაიმე ელემენტი თუ დაიჭირეთ რომელიმე არხზე და რა იყო ის? ამ კითხვებზე პასუხი ნებისმიერ მომხმარებელს ტელეკრიტიკის ვებგვერდზე შეუძლია.  ტელეკრიტიკა  წყარო:ორგანიზაციის გვერდი სოციალურ ქსელში

ქვემო ქართლი. 19 მაისს მარნეულის ახალგაზრდული ცენტრის ორგანიზებით და ეროვნული გამოცდების ცენტრის მხარდაჭერით აზერბაიჯანელი აბიტურიენტებისთვის ზოგად უნარებში საცდელი გამოცდები ჩატარდა. რეგიონში გამოცდები ეთნიკური უმცირესობებისთვის პირველად ჩატარდა და მასში ორასმა აზერბაიჯანელმა აბიტურიენტმა მიიღო მონაწილეობა. გამოცდები პროექტ „ეროვნული ინტეგრაციის გაძლიერება საქართველოშის" ფარგლებში ჩატარდა, პროექტს საქართველოს გაეროს ასოციაცია (UNAG) ახორციელებს პარტნიორ საზოგადოებრივ ორგანიზაციებთან ერთად (მარნეულში, მარნეულის ახალგაზრდული ცენტრი). წყარო:ორგანიზაციის გვერდი სოციალურ ქსელში

სამეგრელო.  ახლადდაფუძნებული არასამთავრობო ორგანიზაცია „სამართალდამცავთა დაცვის ლიგა"  20 მაისს, ზუგდიდში 1 ოქტომბრის პარლამენტის არჩევნების შემდეგ გათავისუფლებულ პოლიციელებს შეხვდა და მათ უფასო საადვოკატო მომსახურების გაწევა შესთავაზა.  სამართალდამცავთა უფლებებზე მომუშავე არასამთავრობო ორგანიზაცია შინაგან საქმეთა სამინისტროს ყოფილმა მაღალჩინოსნებმა დააფუძნეს. მისი ხელმძღვანელი შინაგან საქმეთა მინისტრის ყოფილი მოადგილე ლევან გვაზავაა. „სამართალდამცავთა დაცვის ლიგის" სამეგრელოს რეგიონის წარმომადგენლად ბახვა ჩიქობავა წარადგინეს, რომელიც  შსს–ს განსაკუთრებულ დავალებათა დეპარტამენტის სამეგრელო-ზემო სვანეთის სამხარეო სამმართველოს ყოფილი უფროსია.პოლიციის ყოფილი მაღალჩინოსნები აცხადებენ, რომ მათ მიერ დაფუძნებულ ორგანიზაციას დონორი არ ჰყავს და ისინი რეგიონებში ოფისებს საკუთარი სახსრებით ხსნიან.

სამცხე–ჯავახეთი. 18–19 მაისს, ახალციხის დემოკრატიული ჩართულობის ცენტრში, გაიმართა ტრენინგის პირველი ეტაპი სამცხე–ჯავახეთის პრობაციის ბიუროს თანამშრომლებისათვის. ტრენინგი მიზნად ისახავდა პრობაციის ბიუროს შესაძლებლობებისა და საჭიროებების ანალიზის ფარგლებში გამოვლენილი საკითხების შესახებ მონაწილეთა ცოდნის გაღრმავებასა და მიღებული ცოდნის პრაქტიკაში გამოყენების ხელშეწყობას. ტრენინგები პრობაციის ბიუროს თანამშრომლებისთვის ხორციელდება პროექტის „არასრულწლოვანთა მართლმსაჯულების რეფორმის მხარდაჭერა ქვემო ქართლისა და სამხცხე–ჯავახეთის ეროვნული უმცირესოებების თემებში" ფარგლებში, რომელიც მიმდინარეობს ევროკავშირის მხარდაჭერით. წყარო: „სიდას" გვერდი სოციალურ ქსელში

თბილისი.საზოგადოებივი ორგანიზაციების წევრებმა მოხალისეებთან ერთად გამართეს საქველმოქმედო აქცია - „გვირილები ქველმოქმედებისთვის". 18 მაისს აქციის მონაწილეებმა კოჯორში მოკრეფილი ყვავილები თბლისის ქუჩებში გაყიდეს და სოფელ  ანაგის დღის ცენტრის შესახებ ბუკლეტებიც დაარიგეს. აქციის - „გვირილები ქველმოქმედებისთვის" მიზანი სოფელ ანაგის დღის ცენტრის დახმარება იყო. აქციის შედეგად შეგროვდა 382 ლარი.  „სამოქალაქო ინიციატივის"  მიერ ინცირებულ საქველმოქმედო აქციას შეუერთდნენ სხვა არასამთავრობო ორგანიზაციებისა და საზოგადოების წარმომადგენლები. წყარო:სამოქალაქო ინიციატივის გვერდი სოციალურ ქსელში

სამეგრელო. 18 მაისს, ასოციაცია „ათინათის" ახალგაზრდული ცენტრის „ორტუსის" ორგანიზებით ზუდიდის დადიანების სახელობის პარკში მოეწყო „ცოცხალი ბიბლიოთეკა".  ორგანიზაციის 12 მოხალისემ წაიკითხა საზოგადოებისთვის ცნობილი მწერლების საუკეთესო ნაწარმოებები. აქციით, ახალგაზრული ცენტრ „ორტუსის" წევრებმა საზოგადოებას წიგნიერებისკენ მოუწოდეს.  ღონისძიება განხორციელდა პროექტის – „ეროვნული ინტერგრაციის გაძლიერება საქართველოში" – ფარგლებში. წყარო:ორგანიზაციის გვერდი სოციალურ ქსელში 

აჭარა. 18 მაისს, სამოქალაქო საზოგადოების ინსტიტუტის ფილილისა და ასოციაცია „თავისუფალ ჟურნალისტთა სახლის" ორგანიზებით აჭარის საზოგადოებრივმა ორგანიზაციებმა, 17 მაისის მოვლენებს პერფომანსით უპასუხეს. არასამთავრობო ორგანიზაციებისა და საზოგადოების წარმომადგენლები კითხულობდნენ საქართველოს კონსტიტუციის იმ მუხლებს, რომელებიც  ადამიანთა თანასწორობას უსვამს ხაზს.

თბილისი.საქართველოს ახალგაზრდა მწვანეებმა 17 მაისის აქციასთან დაკავშირებით განცხადება გაავრცელეს. „თანასწორობის პრინციპისადმი ჩვენი ერთგულებიდან გამომდინარე საქართველოს ახალგაზრდა მწვანეები ჰომოფობიისა და ტრანსფობიის წინააღმდეგ ბრძოლას ვუერთდებით", ნათქვამია განცხადებაში. ახალგაზრდა მწვანეები მიიჩნევენ, რომ „უნდა შეწყდეს ადამიანების გენდერული იდენტობისა და სექსუალური ორიენტაციის ნიშნით დისკრიმინაცია და უნდა დაიწყოს მარგინალიზებული ჯგუფების საზოგადოების სრულფასოვან ნაწილად ქცევის პროცესი.  საქართველოს ხელისუფლებამ მეტი რესურსი და ენერგია უნდა მოახმაროს სამოქალაქო განათლებას, რათა საზოგადოება ჩაგრულთა მიმართ გახდეს სოლიდარული, ხოლო მრავალფეროვნების მიმართ მიმღებლური". წყარო:ორგანიზაციის გვერდი სოციალურ ქსელში

შიდა ქართლი. გორის ინვალიდთა კლუბთან არსებულმა გორის ახალგაზრდულმა ცენტრმა შიდსით გარდაცვლილთა ხსოვნის დღე აღნიშნა. ცენტრის წევრებმა 30 მოხალისესთან ერთად ქუჩაში სანთლები აანთეს,რითაც  სოლიდარობა გამოუცხადეს შიდსით დაავადებულებსა და მათ ახლობლებს. აქტივობა დაიგეგმა პროექტის – „ეროვნული ინტეგრაციის გაძლიერება საქრთველოში" ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო: ორგანიზაციის გვერდი სოციალურ ქსელში

თბილისი. სათემო განვითარების ცენტრმა (CDC), 18 მაისს, კავკასიური სახლის საგამოფენო დარბაზში ნუკრიანის და ნაფარეულის სახელოსნოებში–სოციალური საწარმოებში დამზადებული ნივთების გამოფენა - გაყიდვას გამართა.  ნუკრიანისა და ნაფარეულის  სახელოსნოები, სოციალური საწარმოებია. სახელოსნოს მუშაობაში ამჟამად 15–მდე ქალია ჩართული; სათემო განვითარების ცენტრის მიზანია ხელი შეუწყოს  სახელოსნოების, როგორც სოციალური საწარმოების გაძლიერებასა და განვითარებას, რაც ქალთა თემის გააქტიურებისა და  სოფლის განვითარებაში  უფრო აქტიური მონაწილეობის წინაპირობაა. წყარო: ორგანიზაციის გვერდი სოციალურ ქსელში