თბილისი. ორგანიზაცია „იარე ფეხით" დაინტერესებულ პირებს სთავაზობს ვიდეოების ციკლს, სადაც ასახულია საქართველოს ქალაქებში არსებული პრობლემები, რომლებიც დაბრკოლებას უქმნიან ფეხით მოსაირულეებს. „იარე ფეხით" არის ორგანიზაცია, მხარს უჭერს ფეხით სიარულს ქალაქებში, ცდილობს დაიცვას ფეხით მოსიარულეთა უფლებები და იმედოვნებს, რომ შეძლებს ხელისუფლების დარწმუნებას, როგორც ეროვნულ ისე მუნიციპალურ დონეზე, დაეხმაროს ფეხით მოსიარულეებს და ამ კუთხით, უკეთესი პოლიტიკა გაატაროს. ორგანიზაცია მოუწოდებს საზოგადოებას შეუერთდნენ მას და ერთად მოითხოვონ უსაფრთხო მოძრაობის უფლება. ვიდეო წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა საქართველომ განცხადება გაავრცელა. „საერთაშორისო გამჭვირვალობა – საქართველო" შეშფოთებულია უკანასკნელ დღეებში სექსუალური ორიენტაციის ნიშნით ძალადობის ფაქტების გახშირების გამო. „...მიგვაჩნია, რომ 17 მაისის აქციის დაშლაში მთავარი დამნაშავე პირების ამ დრომდე დაუსჯელობა უფრო მეტად ახალისებს მსგავსი ძალადობის ფაქტებს და საფრთხეს უქმნის ბევრ ადამიანს. შესაბამისად, კიდევ უფრო მნიშვნელოვანია, რომ პროკურატურამ და შინაგან საქმეთა სამინისტრომ დროულად გამოძიონ და დასაჯონ ჰომოფობიასა და ტრანსფობიასთან ბრძოლის საერთაშორისო დღესთან დაკავშირებული აქციის ჩაშლისა და ძალადობისათვის პასუხისმგებელი პირები", ნათქვამია ორგანიზაციის გვერდზე სოციალურ ქსელში სრულად წყარო:ორგანიზაციის გვერდი სოციალურ ქსელში

თბილისი.„იდენტობის" ვებგვერდზე ანკეტა განთავსდა მათთვის, ვინც 17 მაისის  შემდეგ დაზარალდა. ორგაინიზაცია მიწოდებულ ინფორმაციას არ გაასაჯაროებს. „ინფორმაცია გვჭირდება იმისთვის რათა ხელისუფლებას და საერთაშორისო ორგანიზაციებს მივაწოდოთ დაზუსტებული ინფორმაცია ძალადობის ფაქტების შესახებ", ნათქვამია ორგანიზაციის ვებგვერდზე. ანკეტა წყარო: identoba.com

თბილისი. საქართველოში ევროკავშირის წარმომადგენლობამ ჰომოფობიის წინააღმდეგ ბრძოლის დღეს განვითარებულ მოვლენეთან დაკავშირებით განცხადება გაავრცელა. „საქართველოში ევროკავშირის სახელმწიფოთა წარმომადგენლობების ხელმძღვანელები და ევროკავშირის წარმომადგენლობა საქართველოში აღშფოთებულნი არიან 17 მაისს ზოგიერთი დემონსტრანტის მიერ გამოვლენილი სასტიკი შეუწყნარებლობისა და ძალადობის სამარცხვინო სცენებით, რომელთა მიზანი იყო სხვა დემონსტრანტებისათვის საკუთარი თავის მშვიდობიანად გამოხატვისათვის ხელის შეშლა.  ევროკავშირი მიიჩნევს, რომ ყოველი ადამიანის გამოხატვის თავისუფლებას გადამწყვეტი მნიშვნელობა აქვს... ...ევროკავშირს სწამს, რომ აუცილებელია ნებისმიერ ნიადაგზე, მათ შორის სექსუალური ორიენტაციის ნიადაგზე დისკრიმინაციის წინააღმდეგ ბრძოლა და შემწყნარებლობის, როგორც დემოკრატიული და მშვიდობიანი საზოგადოების საფუძვლის, წახალისება", ნათქვამია განცხადებაში. ევროკავშირი მოუწოდებს საქართველოს მთავრობას დაიცვას მის მიერ ნაკისრი ღირსებისა და უფლებების თანასწორობისა და თავისუფლების საერთაშორისო და ევროპული სტანდარტები. სრულად  წყარო: eeas.europa.eu

აჭარა. 18 მაისს, სამოქალაქო საზოგადოების ინსტიტუტის ფილილისა და ასოციაცია „თავისუფალ ჟურნალისტთა სახლის" ორგანიზებით აჭარის საზოგადოებრივმა ორგანიზაციებმა, 17 მაისის მოვლენებს პერფომანსით უპასუხეს. არასამთავრობო ორგანიზაციებისა და საზოგადოების წარმომადგენლები კითხულობდნენ საქართველოს კონსტიტუციის იმ მუხლებს, რომელებიც  ადამიანთა თანასწორობას უსვამს ხაზს.

თბილისი.საქართველოს ახალგაზრდა მწვანეებმა 17 მაისის აქციასთან დაკავშირებით განცხადება გაავრცელეს. „თანასწორობის პრინციპისადმი ჩვენი ერთგულებიდან გამომდინარე საქართველოს ახალგაზრდა მწვანეები ჰომოფობიისა და ტრანსფობიის წინააღმდეგ ბრძოლას ვუერთდებით", ნათქვამია განცხადებაში. ახალგაზრდა მწვანეები მიიჩნევენ, რომ „უნდა შეწყდეს ადამიანების გენდერული იდენტობისა და სექსუალური ორიენტაციის ნიშნით დისკრიმინაცია და უნდა დაიწყოს მარგინალიზებული ჯგუფების საზოგადოების სრულფასოვან ნაწილად ქცევის პროცესი.  საქართველოს ხელისუფლებამ მეტი რესურსი და ენერგია უნდა მოახმაროს სამოქალაქო განათლებას, რათა საზოგადოება ჩაგრულთა მიმართ გახდეს სოლიდარული, ხოლო მრავალფეროვნების მიმართ მიმღებლური". წყარო:ორგანიზაციის გვერდი სოციალურ ქსელში

იმერეთი. ბიოლის ფონდის ორგანიზებით, 17 მაისს, ქუთაისში გაიმართა საჯარო დისკუსია – „კანონი, სამართლიანობა და თანასწორობა ჰომოფობიის წინააღმდეგ". დისკუსიის დასრულების შემდგომ მონაწილეთა ნაწილმა ლადო მესხიშვილის სახელობის თეატრის წინ გადაინაცვლა და თბილისში მომხდარი ძალადობის გაპროტესტებას აპირებდა. ბიოლის ფონდის გვერდზე აღნიშნულია, რომ პოლიციისა და ჟურნალისტების სიუხვის მიუხედავად აქცია ვერ შედგა. „აგრესიულად განწყობილი პირების ჯგუფმა სახელდახელოდ გამზადებული პლაკატები დახიეს და აქციის მონაწილეებს შეურაცხყოფა მიაყენეს". ახალგაზრდების ნაწილმა პარლამენტის შენობასთან გადაინაცვლა, სადაც იგივე სიტუაციაში აღმოჩნდნენ. სრულად წყარო: ბიოლის ფონდის გვერდი სოციალურ ქსელში

„სამართალდამცავთა დაცვის ლიგა" 20 მაისს სამეგრელოსა და იმერეთის რეგიონული ცენტრის წევრებთან შეხვედრებს გამართავს. ღონისძიებაზე „სამართალდამცავთა დაცვის ლიგის" დამფუძნებლები ადგილობრივ წევრებს ორგანიზაციის სამომავლო გეგმებს გააცნობენ და რეგიონში არსებულ პრობლემატურ საკითხებზე იმსჯელებენ. „სამართალდამცავთა დაცვის ლიგის" მთავარ მიზანს ძალოვანი სტრუქტურების ყოფილი და მოქმედი თანამშრომლების კანონით გარანტირებული უფლებების დაცვა წარმოადგენს, ორგანიზაციამ მიიღო გადაწყვეტილება აღნიშნულ ფაქტებზე განსაკუთრებული ყურადღება გაამახვილოს. სამართალდამცავთა დაცვის ლიგა ძალოვანი სტრუქტურებიდან გათავისუფლებულ თითოეულ პირს უფასო საადვოკატო მომსახურეობას სთავაზობს. 20 მაისი 12:00 საათი ზუგდიდი, რუსთაველის ქუჩა 52 20 მაისი 15:00 საათი ქუთაისი, პუშკინის 6 წყარო:ორგანიზაციის გვერდი სოციალურ ქსელში

თბილისი. არასამთავრობო ორგანიზაციებმა 17 მაისის აქციასთან დაკავშირებით განცხადება გაავრცელეს. „17 მაისს ჰომოფობიისა და ტრანსფობიის დღესთან დაკავშირებით დაგეგმილი აქციის ჩატარების უზრუნველყოფა სახელმწიფომ ვერ შეძლო, რითაც აქციის მონაწილეების მიმართ დაარღვია შეკრებისა და მანიფესტაციის თავისუფლება", – ნათქვამია არასამთავრობო ორგანიზაციების განცხადებაში.  ამ ეტაპზე ორგანიზაციები პირველად შეფასებას აკეთებენ და აცხადებენ, რომ შსს–მ „სათანადოდ ვერ შეაფასა კონტრდემონსტრანტების მხრიდან მომდინარე შესაძლო რისკები და ვერ შეიმუშავა უსაფრთხოების შესაბამისი სტრატეგია…პოლიცია არ მოქმედებდა კოორდინირებულად და ხშირ შემთხვევაში იყო უსუსური დაეცვა მოქალაქეთა გამოხატვის თავისუფლება. უფრო მეტიც, იქმნება შთაბეჭდილება, რომ შინაგან საქმეთა სამინისტრო ორიენტირებული იყო აქციის მონაწილეთა ტერიტორიიდან უსაფრთხოდ გაყვანაზე და არა აქციის დაცვაზე. პოლიციამ არ გამოავლინა საკმარისი ძალისხმევა რათა უზრუნველეყო აქციის მონაწილეთა  უსაფრთხოება აქციის გამართვის პროცესში...", ნათქვამია განცხადებაში. ორგანიზაციები მოუწოდებენ შინაგან საქმეთა სამინისტროს საზოგადოებრივი წესრიგისა და მოქალაქეთა უსაფრთხოების უზრუნველყოფის მიზნით გაატაროს ეფექტური ღონისძიებები, ამავე დროს დააყენოს ყველა იმ თანამდებობის პირის პასუხისმგებლობა, ვინც სათანადოდ ვერ შეაფასა არსებული რისკები. ასევე, „გამოიძიოს და დააყენოს ყველა იმ პირის პასუხისმგებლობის საკითხი, რომლებმაც არ მისცეს საშუალება მოქალაქეებს ჰომოფობიისა და ტრანსფობიის დღესთან დაკავშირებით ჩაეტარებინათ დაგეგმილი აქცია, ძალადობდნენ განსხვავებული შეხედულების ადამიანების მიმართ, აყენებდნენ მათ სიტყვიერ და ფიზიკურ შეურაცხყოფას". განცხადებას ხელს აწერენ საერთაშორისო გამჭვირვალობა – საქართველო, საქართველოს  დემოკრატიული  ინიციატივა (GDI), ადამიანის  უფლებების  სწავლებისა  და  მონიტორინგის ცენტრი (EMC), საქართველოს ახალგაზრდა იურისტთა ასოციაცია, საქართველოს კონსტიტუციის   42-ე  მუხლი, სამართლიანი  არჩევნებისა და დემოკრატიის საერთაშორისო საზოგადოება (ISFED). სრულად  წყარო: ადამიანის უფლებების სწავლებისა და მონიტორინგის ცენტრის (EMC) გვერდი სოციალურ ქსელში

თბილისი. საერთაშორისო გამჭვირვალობა შეშფოთებას გამოთქვამს, რომ „პოლიციამ ვერ გაართვა თავი კანონით მასზე დაკისრებულ მოვლეობებს და ვერ უზრუნველყო „იდენტობის" მიერ გამართული აქციის მონაწილეთა უსაფრთხოება", – ნათქვამია ორგანიზაციის გვერდზე სოციალურ ქსელში 17 მაისის აქციასთან დაკავშირებით. საერთაშორისო გამჭვირვალობა–საქართველო, პარტნიორ ორგანიზაციებთან ერთად 17 მაისის მოვლენებთან დაკავშირებით განცხადებას მოგვიანებით გაავრცელებს. შეგახსენებთ, რომ არასამთავრობო ორგანიზაციების წარმომადგენლები, მათ შორის გამჭვირვალობა, დღეს მიმდინარე აქციას აკვირდებოდნენ. სრულად წყარო: ორგანიზაციის გვერდი სოციალურ ქსელში

თბილისი.არასამთავრობო ორგანიზაციები 17 მაისის დღესთან დაკავშირებით განცხადებას ავრცელებენ. 17 მაისი ჰომოფობიისა და ტრანსფობიის წინააღმდეგ ბრძოლის საერთაშორისო დღეა (აიდაჰო), რომელიც ოფიციალურად აღიარებულია ევროპის პარლამენტისა და მსოფლიოს არაერთი ქვეყნის მიერ.    „ამ დღესთან დაკავშირებით ”იდენტობა”, ”ქალთა ინიციატივების მხარდამჭერი ჯგუფი” და სხვა ორგანიზაციები პარლამენტის ყოფილი შენობის წინ მშვიდობიანი აქციის გამართვას აპირებენ... აღნიშნული აქციის საპასუხოდ სხვადასხვა ჯგუფებმა ყოფილი პარლამენტის შენობის მახლობლად დაგეგმეს კონტრდემონსტრაციის გამართვა, რომელიც 17 მაისის აქციას ლგბტ თემის პროპაგანდად, უზნეობად განიხილავს და აპროტესტებს მას", ნათქვამია განცხადებაში. ხელმომწერი ორგანიზაციები – საერთაშორისო გამჭვირვალობის, საქართველოს დემოკრატიული ინიციატივის, ადამიანის უფლებების სწავლებისა და მონიტორინგის ცენტრის, ახალგაზრდა იურისტთა ასოციაციის, კონსტიტუციის 42–ე მუხლისა და სამართლიანი არჩევნების ერთობლივ განცხადებაში ნათქვამია, რომ არასამთავრობო ორგანიზაციები 17 მაისს მიმდინარე აქციებს დილიდანვე კოორდინირებულად დააკვირდებიან. წინა წლების გამოცდილების საფუძველზე ორგანიზაციები საჭიროდ მიიჩნევენ, რომ პოლიციამ „წინასწარ შეიმუშავოს უსაფრთხოების ეფექტური სტრატეგია და მიიღოს ყველა ზომა ორივე აქციის მშვიდობიან და უსაფრთხო გარემოში ჩატარების უზრუნველსაყოფად". სრულად წყარო: gyla.ge

სამეგრელო. საქართველოს სახალხო დამცველის მოადგილე პაატა ბელთაძე ზუგდიდში, 15 მაისს, არასამთავრობო ორგანიზაციების და მედიის წარმომადგენლებს შეხვდა. მან ზუგდიდის ოფისის ადამიანის უფლებათა ოფიცერი და სამეგრელო-ზემო სვანეთის მუნიციპალიტეტების - ხობი, წალენჯიხა, ჩხოროწყუ, მარტვილი, აბაშა, სენაკი, მესტიასა და ქალაქ ფოთში ომბუდსმენის ახალი თანამშრომლები წარადგინა. „ეს იქნება მნიშვნელოვანი გამოწვევა, რა შეიძლება მისცეს ამ ინიციატივამ სახალხო დამცველს, როგორც ინსტიტუციას, სამომავლოდ იფიქროს უფრო ფართო და ეროვნული ადამიანის უფლებათა დაცვის ქსელის ჩამოყალიბებაზე. რთულია ამ ეტაპზე ვისაუბრო, რამდენ ხანს შესაძლოა იფუნქციონირონ ცენტრებმა მუნიციპალიტეტებში. სურვილი ერთია, მაგრამ ყველაფერი ბიუჯეტსა და მატერიალურ სახსრებზეა დამოკიდებული, რადგან პროექტი ოქტომბერში სრულდება", - განაცხადა დემოკრატიული ჩართულობის ზუგდიდის ოფისში გამართულ შეხვედრაზე სახალხო დამცველის მოადგილე პაატა ბელთაძემ. სახალხო დამცველის წარმომადგენლის შეხვედრა გაეროს განვითარების პროგრამის მიერ დაფინანსებული პროექტის - „ადამიანური უსაფრთხოების და სოციალური ინტეგრაციის" –ფარგლებში ჩატარდა.

შიდა ქართლი. 16 და 17 მაისს, ხაშურში, ორგანიზაცია „კონსტიტუციის 42-ე მუხლი”, ქალთა გაძლირების პროექტის ფარგლებში ორდღიან სემინარს გამართავს. პროექტის სამიზნე ჯგუფებს წარმოადგენენ  საქართველოს რეგიონებში მცხოვრები, საზოგადოებრივ ცხოვრებაში აქტიურად ჩართული ქალბატონები, რომელთა შეუძლიათ საკუთარ რაიონებში ქალთა უფლებების რეალიზაციის პროცესში გარკვეული წვლილი შეიტანონ. ორგანიზაციის სემინარები მიეძღვნება უფლებებისა და თავისუფლებების შესახებ ცოდნის ამაღლებას, აგრეთვე სამოქალაქო საზოგადოების როლის გაძლიერებასა და დემოკრატიული პროცესების სტიმულირებას. პროექტი ხორციელდება გერმანიის საერთაშორისო თანამშრომლობის საზოგადოების (GIZ) მხარდაჭერით და მოიცავს საქართველოს 31 რაიონსა და სოფელში ანალოგიური შეხვედრების ორგანიზებას და ჩატარებას. წყარო: ორგანიზაციის გვერდი სოციალურ ქსელში

თბილისი. საია ეხმაურება 10 მაისს სტუდენტებთან შეხვედრისას  საქართველოს პრეზიდენტის მიერ გამოთქმულ შეფასებას. საქმე ეხება მიხეილ სააკაშვილის განცხადებას ზურა ვაზაგაშვილთან დაკავშირებით. „უდანაშაულობის პრეზუმფციის დარღვევასთან ერთად, სამწუხაროდ, პრეზიდენტმა არც ის გაითვალისწინა თუ რა სიმძიმის მორალურ ზიანს მიაყენებდა მისი ზემოაღნიშნული გამონათქვამები გარდაცვლილი ზურა ვაზაგაშვილის ოჯახის წევრებს. საია, ზ. ვაზაგაშვილის მშობლების მომართვის საფუძველზე, სარჩელით მიმართავს თბილისის საქალაქო სასამართლოს პრეზიდენტის წინააღმდეგ ზურა ვაზაგაშვილის პატივისა და ღირსების შელახვის ფაქტზე", ნათქვამია განცხადებაში. სრულად წყარო: gyla.ge

იმერეთი. სამოქალაქო განათლებისა და პედაგოგთა გადამზადების პროგრამის ფარგლებში ხონის მუნიციპალიტეტის სამიზნე სკოლების მოსწავლეებისათვის ტრენინგი ჩატარდა ბავშვის უფლებების თემაზე. ტრენინგს უძღვებოდა ახალგაზრდა იურისტთა ასოციაციის ადვოკატი. ტრენინგზე განიხილეს თავისუფლების გამიჯვნა, თავისუფლებათა კლასიფიკაცია, საერთაშორისო დეკლარაციებში მათი ადგილი, პრაქტიკული სავარჯიშოები, ევრო სამართლის პრაქტიკული კაზუსები და უფლებათა დარღვევის საკითხები. მსმენელები აქტიურად ჩაერთვნენ სამუშაო პროცესში. წყარო: kedec.ge

თბილისი. საქართველოს ახალგაზრდა იურისტთა ასოციაციის წარმომადგენელმა გლდანის დაწესებულებაში მოინახულა სოფლის მეურნეობის სამინისტროს საქმეზე პატიმრობაში მყოფი შვიდი პირი.  „პატიმრობაში მყოფი პირებიდან ოთხი აცხადებს, რომ ე.წ. მოდულის შენობაში დაკითხვის დროს, პროკურორ შოთა რიჟამაძისა  და გამომძიებლების მხრიდან მათზე ხორციელდებოდა ფსიქოლოგიური ზეწოლა და სიტყვიერი შეურაცხყოფა. დაკითხვა იწყებოდა საღამოს საათებში და გრძელდებოდა ზოგჯერ 8 საათის განმავლობაშიც კი. პატიმრობაში მყოფი პირების განცხადებით, მიუხედავად იმისა, რომ მათ მოდულის შენობაში დიდი ხნის განმავლობაში უწევდათ ყოფნა, უშუალოდ დაკითხვის პროცესი მხოლოდ საათი ან საათნახევარი გრძელდებოდა. ამასთან აღსანიშნავია, რომ ყველა მათგანის დაკითხვა მოწმის სტატუსით და ადვოკატის მონაწილეობის გარეშე მიმდინარეობდა. პატიმრობაში მყოფმა პირებმა საქმეში მონაწილე პროკურორის შ. რიჟამაძის მხრიდან ზეწოლაზე სასამართლოს წინაშეც განაცხადეს და მისი საქმიდან აცილებაც მოითხოვეს, რაც მოსამართლემ არ დააკმაყოფილა", – ნათქვამია საიას ინფორმაციაში. ისინი მიიჩნევენ, რომ დაპატიმრებულ პირებზე ზეწოლისა და სიტყვიერი შეურაცხყოფის ფაქტები გამოძიებული უნდა იქნეს.  სრულად  წყარო:gyla.ge

თბილისი. ორგანიზაცია „კონსტიტუციის 42-ე მუხლი" გამოეხმაურა ავტო–მოტომოყვარულთა 12 მაისის მანიფესტაციას, ასევე 28 აპრილს საპატრულო პოლიციის მიერ მოტოტრანსპორტის მფლობელთა დაჯარიმებებს. „საქართველოს კონსტიტუციის 25-ე მუხლის შესაბამისად, ყველას აქვს უფლება წინასწარი ნებართვის გარეშე შეიკრიბოს საჯაროდ და უიარაღოდ როგორც ჭერქვეშ, ისე გარეთ. იმავე მუხლის შესაბამისად კანონით შეიძლება დაწესდეს წინასწარი გაფრთხილების აუცილებლობა, თუ შეკრება ან მანიფესტაცია ხალხისა და ტრასნპორტის სამოძრაო ადგილას იმართება", ნათქვამია ორგანიზაციის მიერ გავრცელებულ განცხადებაში. „კონსტიტუციის 42-ე მუხლი" მოუწოდებს საქართველოს შინაგან საქმეთა სამინისტროს შეიმუშავოს მოტოციკლეტის სანომრე ნიშანთან დაკავშირებით კონკრეტული აქტები, საჭიროების შემთხვევაში ამ საკითხით დაკავშირებული გაერთიანებების მონაწილეობით. სრულად  წყარო:ორგანიზაციის გვერდი სოციალურ ქსელში

აჭარა. 11 მაისს, ბათუმის პრეს-კაფეში, ასოციაციამ „თავისუფალ ჟურნალისტთა სახლმა’" დისკუსია გამართა თემაზე: „პოლიტპატიმრები - პოლიტპატიმრების შესახებ". პოლიტპატიმრის სტატუსის მინიჭების შემდეგ საპყრობილეში მყოფი ადამიანები გათავისუფლდნენ პატიმრობიდან, თუმცა დღემდე პოლიტპატიმრების სამართლებრივი და ფსიქოლოგიური რეაბილიტაცია არ მომხდარა. დისკუსიის მონაწილეებმა პოლიტპატიმრების დღევანდელ მდგომარეობასა და საზოგადოებაში მათი ინტეგრაციაციის გზებზე ისაუბრეს. 

თბილისი. ორგანიზაცია „იდენტობამ" 17 მაისს დაგეგმილი აქციის დეტალებთან დაკავშირებით პრესკონფერენცია გამართა.  ჰომოფობიასა და ტრანსფობიასთან ბრძოლის საერთაშორისო დღეს პარლამენტის ყოფილი შენობის წინ ლგბტ ადამიანების უფლებადამცველი ორგანიზაცია მდუმარე აქცია-ფლეშმობს გამართავს, სადაც ცისარტყელის ფერებში ჩაცმული აქციის მონაწილეები საქართველოში ლგბტ პირების მიმართ დისკრიმინაციის ფაქტებს გააპროტესეტებენ. 10 მაისს „იდენტობა" ჟურნალისტებისთვის ტრენინგსაც გამართავს, ორგანიზაციის წარმომადგენლის თქმით, ტრენინგის მიზანია „რეპორტიორებმა არ დაუშვან შეცდომები ლგბტ ადამიანების მოხსენიების დროს და შეურაცხმყოფელი ტერმინებით არ ისაუბრონ მათზე, როგორც ხშირად ხდება ქართულ მედიაში. ისინი ამ თემის გაშუქების სპეციფიკის შესახებ სხვა დეტალებსაც გაიგებენ". პრესკონფერენცია, სასტუმროს მიმდებარე ტერიტორიაზე ორგანიზაცია „ყოფილი პოლიტპატიმრები ადამიანის უფლებებისთვის", „ახალი თაობა დემოკრატიული საქართველოსთვის" და პარტია „თავისუფალი საქართველოს" წარმომადგენლებმა გააპროტესტეს. წყარო:media.ge

თბილისი. „სამოქალაქო საზოგადოების საქართველოს ეროვნული პლატფორმის" და მედიის წარმომადგენლების ინიციატივით, 27 აპრილს სასტუმრო „რედისონში" გაიმართა კონფერენცია თემაზე - „სამოქალაქო კონტროლი უკანონო მოსმენების აღსაკვეთად". შეხვედრის მონაწილეებმა იმსჯელეს წინა ხელისუფლების მიერ მოქალაქეებზე უკანონო თვალთვალისა და მოსმენების შედეგად მოპოვებული მასალების საკითხთან დაკავშირებით. ღონისძიების ერთერთი ორგანიზატორისა და გაზეთ „რეზონანსის" რედაქტორის ლაშა ტუღუშის თქმით,"აუცილებელია მოხდეს იმ მასალების განადგურება, რომელიც წინა ხელისუფლებამ უკანონო გზით მოიპოვა. ეს მასალები არის საქართველოს უახლოესი ისტორიის შავი ლაქა" - აღნიშნა ტუღუშმა. კონფერენციაში მონაწილეობდნენ პრემიერ-მინისტრი ბიძინა ივანიშვილი, პარლამენტის თავმჯდომარე დავით უსუფაშვილი, შს მინისტრი ირაკლი ღარიბაშვილი, იუსტიციის მინისტრის მოადგილე ალექსანდრე ბარამიძე, სახალხო დამცველი უჩა ნანუაშვილი და მედიის წარმომადგენლები. შეხვედრა ფონდი „ღია საზოგადოება-საქართველოს" მხარდაჭერით ჩატარდა. წყარო: osgf.ge კონფერენციის ვიდეო ჩანაწერი (წყარო: livestream.com/nakadi)

აჭარა. 24-25 აპრილს,  ქობულეთში,  სასტუმრო „ჯორჯია პალასში", ასოციაცია „ანიკასა" და „ინვალიდთა ლიგის" ორგანიზებით  ტრენინგი  - „ლიდერობა შშმ პირების უფლებების დასაცავდ". ტრენინგის მიზანი,  შშმ პირების საზოგადოებაში სრულფასოვნად ინტეგრირებისათვის თვითონ,  შშმ პირების გააქტიურება გახლდათ. საკუთარი უფლებისა და შესაძლებლობების  გაცნობა აღნიშნული ტრენინგის საფუძველზე 30-მდე  ახალგაზრდა შშმ პირმა შეძლო. პროქტი - „შშმ პირთა უფლენბების ადვოკატირება"  ხორციელდება  USAID-ის ფინანსური მხარდაჭერით.

თბილისი. ორგანიზაცია „იდენტობამ" განცხადება გაავრცელა, სადაც საუბარია კონკრეტული პირის მიმართ „ერთი კვირის წინ თბილისში სიძულვილით მოტივირებული მორიგი დანაშულის ფაქტზე". ორგანიზაცია განცხადებაში აღნიშნავს, რომ ბოლო ორი კვირის განმავლობაში, ეს უკვე მეორე სიძულვილით მოტივირებული დანაშაულია, რომლის მსხვერპლებმაც „იდენტობას" მიმართეს. „იდენტობა" მოუწოდებს საგამოძიებო ორგანოებს აღნიშნულ ფაქტზე დროულად ჩაატარონ გამოძიება. გამოავლინონ და სისხლის სამართლებრივი პასუხისმგებლობა დააკისრონ დამნაშავეებს. სრულად წყარო: identoba.com