თბილისი. ინფორმაციის თავისუფლების განვითარების ინსტიტუტი აქვეყნებს მოკლე შეფასებას: „31 მაისის პოლიტიკური ვანდალიზმი თბილისში". მასში ნათქვამია, რომ „31 მაისს განვითარებული მოვლენები არ წარმოადგენს იზოლირებულ შემთხვევას. რუსული კანონის ხელახალი ინიცირების შემდგომ, კრიტიკული მოსაზრებების მქონე პირებზე თავდასხმის, სიტყვიერი თუ ფიზიკური შეურაცხყოფის ორგანიზებული არაერთი ფაქტი გამოვლინდა სრულად... წყარო: ინფორმაციის თავისუფლების განვითარების ინსტიტუტი

საპარლამენტო უმრავლესობამ, 28 მაისს, გადალახა პრეზიდენტის ვეტო „უცხოური გავლენის გამჭვირვალობის“ შესახებ კანონზე – 66 ხმით, წინააღმდეგი 0. აღნიშნული პროცედურის შემდგომ კი, მხარი დაუჭირა მანამდე, სამი მოსმენით მიღებულ ვერსიას – მომხრე 84 დეპუტატი, წინააღმდეგი 4. მმართველმა პარტიამ ეს ნაბიჯი, საზოგადოების მხრიდან კანონის მიმართ ხანგრძლივი პროტესტისა და პარტნიორი ქვეყნების რეკომენდაციისა და რჩევის გაუთვალისწინებლად გადადგა. ისევე როგორც მეგობარი ქვეყნები, საქართველოს საზოგადოებაც მიიჩნევს, რომ კანონი ეწინააღმდეგება დემოკრატიულ ღირებულებებს და ხელს უშლის ქვეყნის ევროინტეგრაციას. ევროკავშირის კანდიდატის სტატუსის მიღებიდან რამდენიმე თვეში, მმართველმა პარტიამ დაარღვია, გასულ წელს დადებული პირობა, რომ „აგენტების კანონს“ აღარ დაუბრუნდებოდა, და პარლამენტში განსახილველად „უცხოური გამჭვირვალობის შესახებ“ კანონი შემოიტანა. რასაც საზოგადოების, განსაკუთრებით კი ახალგაზრდების მხრიდან პროტესტი და ხანგრძლივი აქციები, ხოლო მეგობარი ქვეყნების მხრიდან ჯერ მწვავე განცხადებები მოჰყვა, ცოტა მოგვიანებით კი , კონკრეტულ ნაბიჯებზე მინიშნება. მაგალითად აშშ–ის სახელმწიფო მდივანმა ენტონი ბლინკენმა ინდივიდუალური სანქციების შესახებ ისაუბრა, ხოლო ევროკავშირის სხვადასხვა წარმომადგენლების მხრიდან აქტიურად გაკეთდა განცხადებები, რომ კანონი სერიოზულად შეზღუდავს საქართველოს სამოქალაქო საზოგადოებას და ეს საფრთხეს შეუქმნის ევროკავშირში ქვეყნის დიდი ხნის სწრაფვას. ჯერ კიდევ 18 მაისს, ვეტოს დადების შემდგომ, საქართველოს პრეზიდენტმა სალომე ზურაბიშვილმა განაცხადა, რომ „ამ კანონის გაუმჯობესება და გაფორმება შეუძლებელია (...). ეს კანონი უნდა გაუქმდეს“. 21 მაისს ვენეციის კომისიამ გამოაქვეყნა „უცხოური გავლენის გამჭვირვალობის კანონის“ შესახებ დასკვნა, სადაც მკაფიოდ ხაზგასმულია, რომ „ამჟამინდელი ფორმით კანონი უნდა გაუქმდეს“. კომისიამ დოკუმენტში აღნიშნა, რომ ფუნდამენტური ხარვეზები გამოიწვევს მნიშვნელოვან უარყოფით შედეგებს გაერთიანებისა და გამოხატვის თავისუფლების, კონფიდენციალური, საზოგადოებრივ საქმეებში მონაწილეობის უფლებების მიმართულებით. ვენეციის კომისიამ ხაზი გაუსვა, რომ კანონი გავლენას მოახდენს „საჯარო დებატებზე. პლურალიზმსა და დემოკრატიის ხარისხზე“. 23 მაისს, აშშ–ის სახელმწიფო მდივანმა ენტონი ბლინკენმა თავის განცხადებაში, სავიზო შეზღუდვის დაწესება დააანონსა. შეზღუდვები შეეხება იმ პირებს, რომლებიც პასუხისმგებელნი არიან საქართველოში სამოქალაქო საზოგადოებისა და მშვიდობიანი შეკრების თავისუფლების ჩახშობაზე ძალადობის ან დაშინების გზით. სახელმწიფო მდივანმა შეერთებულ შტატებსა და საქართველოს შორის ორმხრივი თანამშრომლობის „ზედმიწევნით გადახედვის“ დაწყების შესახებაც გააკეთა განცხადება. კანონის მიმართ მეგობარი ქვეყნების მწვავე განცხადებებისა და დამოკიდებულების მიუხედავად, საპარლამენტო უმრავლესობამ ვეტო გადალახა. ევროკავშირის უმაღლესმა წარმომადგენელმა ჯოზეფ ბორელმა „უცხოური გავლენის გამჭვირვალობის“ შესახებ კანონის საბოლოო მიღებასთან და ვენეციის კომისიის რეკომენდაციის უგულებელყოფასთან დაკავშირებით „ღრმა მწუხარება“ გამოთქვა. განცხადებაში ხაზგასმულია, რომ ევროკავშირი და მისი წევრი ქვეყნები განიხილავენ ყველა ვერსიას ამ მოვლენებზე რეაგირებისთვის. იგი მოუწოდებს საქართველოს ხელისუფლებას შეცვალოს ეს ტენდენცია და მტკიცედ დაბრუნდეს ევროკავშირის გზაზე, ხაზგასმით აღნიშნა, რომ ჯერ კიდევ არის დრო დინამიკის შესაცვლელად, მაგრამ ეს მოითხოვს მთავრობისგან ძალისხმევას. განცხადებაში ხაზგასმულია, რომ ევროკავშირმა არაერთხელ გაუსვა ხაზი, რომ საქართველოს პარლამენტის მიერ მიღებული კანონი ეწინააღმდეგება ევროკავშირის ძირითად პრინციპებსა და ღირებულებებს. მასში აღნიშნულია, რომ კანონის მიღება წარმოადგენს რეგრესს „ცხრა ნაბიჯიდან სულ მცირე სამზე“, რომელიც ევროკომისიის მიერ დაადგინა საქართველოსთვის მას შემდეგ, რაც ქვეყანას მიენიჭა ევროკავშირის კანდიდატის სტატუსი. კერძოდ, ნახსენებია დეზინფორმაციის, პოლარიზაციის, ფუნდამენტური უფლებებისა და სამოქალაქო ორგანიზაციების ჩართულობის ნაბიჯები. ამრიგად, განცხადებაში ნათქვამია, რომ კანონის მიღება უარყოფითად აისახება საქართველოს ევროკავშირისკენ მიმავალ გზაზე. საერთაშორისო დონეზე მიმდინარე პროცესების პარალელურად, ქართული არასამთავრობო ორგანიზაციები, ვეტოს დაძლევის შემდგომ, ერთობლივ განცხადებაში აღნიშნავენ, რომ „(ხელისუფლებას) უნდოდა ამ კანონის მიღებით გაეტეხა სამოქალაქო სექტორი, მაგრამ მიიღო უპრეცედენტო ერთიანობა და დაუღალავი წინააღმდეგობა. ქართველი ხალხი მტკიცედ იცავს და დაიცავს საკუთარ ევროპულ მომავალს და არასოდეს შეეგუება რუსული ჩექმის ქვეშ ცხოვრებას. რუსული კანონი ჩვენ ქვეყანაში არ იმუშავებს! ის დარჩება ფარატინა ქაღალდად, რომელსაც არავინ დავემორჩილებით!“ ქართული არასამთავრობო ორგანიზაციები აცხადებენ, რომ გამოიყენებენ „ყველა შიდა და საერთაშორისო მექანიზმს მისი (კანონის) მოქმედების შესაფერხებლად კანონის უპირობო გაუქმებამდე“. ამისთვის, ამ ეტაპზე მიმდინარეობს მუშაობა საქართველოს საკონსტიტუციო სასამართლოში სარჩელის წარსადგენად. „იმ შემთხვევაში, თუ საკონსტიტუციო სასამართლო არ იმოქმედებს დროულად და კონსტიტუციურ ჩარჩოებში, ჩვენ გამოვიყენებთ ალტერნატიულ სამართლებრივ მექანიზმს. პარალელურად ვემზადებით ადამიანის უფლებათა ევროპულ სასამართლოში საჩივრის წარსადგენად, რომელსაც მივმართავთ შესაბამის დროს“, ამბობენ ქართული არასამთავრობო ორგანიზაციები.

თბილისი. ადამიანის უფლებათა ცენტრი აქვეყნებს ჟურნალისტის უფლებების გზამკვლევს. წინამდებარე მასალა მომზადდა ევროკავშირის ფინანსური მხარდაჭერით და ეკონომიკური განვითარებისა და თანამშრომლობის ფედერალური სამინისტროს თანადაფინანსებით. ამ მასალის შინაარსი ადამიანის უფლებათა ცენტრის პასუხისმგებლობაა და არ გამოხატავს ევროკავშირის და გერმანიის ფედერალური სამინისტროს შეხედულებებს. სრულად... წყარო: ადამიანის უფლებათა ცენტრი

სამცხე–ჯავახეთი. დემოკრატიული ჩართულობის ცენტრების ქსელის ახალციხის ოფისში „ადამიანის უფლებებისა და დემოკრატიული მოქალაქეობის შესახებ“ ტრენინგი გაიმართა. ახალგაზრდებმა იმსჯელეს და მიიღეს ინფორმაცია ადამიანის საყოველთაო უფლებებზე და განიხილეს ამ კუთხით არსებული გამოწვევები, დადგეს სიმულაციები საზოგადოების სხვადასხვა ტიპების შესახებ, განიხილეს თუ რას ნიშნავს დემოკრატია, დემოკრატიული მოქალაქეობა და რატომაა მნიშვნელოვანი თოთოეული ადამიანის უფლებების დაცვა ქვეყნის განვითარებისთვის.  სრულად... წყარო: დემოკრატიულიჩართულობის ცენტრების ქსელი

ქართული არასამთავრობო ორგანიზაციები, აქციების დროს დაკავებული მოქალაქეების უფლებების დაცვას აგრძელებენ. სრულად...  წყარო: სოციალური სამართლიანობის ცენტრი

თბილისი. სსო–ები 30 აპრილი–1 მაისის აქციის დარბევის სამართლებრივ ერთობლივ შეფასებას აქვეყნებენ. „30 აპრილს და 1 მაისის გამთენიისას შინაგან საქმეთა სამინისტროს მიერ რუსული კანონის წინააღმდეგ მშვიდობიანი აქციის დარბევა არალეგიტიმური და არაპროპორციული იყო, გამოყენებული ფიზიკური ძალა გაუტოლდა წამებას, არაადამიანურ დამამცირებელ მოპყრობას, ხოლო, ადმინისტრაციული დაკავების პრაქტიკა კვლავ შეკრების თავისუფლების მომეტებული შეზღუდვის ინსტრუმენტად იქცა“. სრულად...  წყარო: isfed.ge

თბილისი. საქართველოს დაუნის სინდრომის ასოციაციამ ახალი პროექტი "თანაბარი უფლებებით მოქმედება" დაიწყო. პროექტის მიზანია დაუნის სინდრომის მქონე ახალგაზრდების გაძლიერება, თვითადვოკატებად ჩამოყალიბება და მათი მონაწილეობის გაზრდა სამოქალაქო აქტივიზმში. პროექტის ფარგლებში განხორციელებული აქტივობების შედეგად ქვეყანაში გვეყოლება დაუნის სინდრომის მქონე თვითადვოკატები, რომლებსაც ექნებათ უნარები ჩაერთონ შშმ პირთა სხვადასხვა საკონსულტაციო საბჭოების მუშაობაში, ისაუბრონ საკუთარი უფლებების შესახებ და გავლენა მოახდინონ ინტელექტუალური შშმ პირების ცხოვრების ხარისხის გაუმჯობესებაზე. პროექტის ფინანსური მხარდამჭერია NDI-ის სათაო ოფისი, პროგრამის, Equal Rights in Action Fund -ის ფარგლებში სრულად... წყარო: საქართველოს დაუნის სინდრომის ასოციაცია

თბილისი. გაეროს განვითარების პროგრამა სტატიათა კრებულს „ადამიანის უფლებათა დაცვა: ევროპული გამოცდილება და ეროვნული გამოწვევები“ აქვეყნებს.  კრებულში თავმოყრილია ევროპული ქვეყნების გამოცდილება ადამიანის უფლებათა დაცვის სფეროში, როგორც საკანონმდებლო, ისე პრაქტიკული კუთხით.  კრებული გამოცემულია ივ. ჯავახიშვილის სახელობის თბილისის სახელმწიფო უნივერსიტეტის იურიდიულ ფაკულტეტთან არსებული საერთაშორისო სამართლის ინსტიტუტის მიერ, ევროკავშირის, გაეროს განვითარების პროგრამისა და გაეროს ადამიანის უფლებათა უმაღლესი კომისრის ოფისის მხარდაჭერით.  სრულად...   წყარო: გაეროს განვითარების პროგრამა

სამცხე-ჯავახეთი.დემოკრატ მესხთა კავშირმა, ახალი პროგრამის „ახალგაზრდები ყველას უფლებებისთვის“ განხორციელება დაიწყო. პროგრამის ფარგლებში შერჩეულ ახალგაზრდებს პირველ ეტაპზე ჩაუტარდათ ტრენინგების ციკლი თემაზე: ადამიანის უფლებები, გენდერული და ეთნიკური ნიშნით დისკრიმინაციის ფორმების იდენტიფიცირება და მათთან ბრძოლა, რომელსაც მოწვეული ექსპერტები თეონა მაჭარაშვილი და ირმა პავლიაშვილი უძღვებოდნენ. პროექტი ხორციელდება Netherlands Helsinki Committee ის, Hertie School, ადამიანის უფლებათა ცენტრი / Human Rights Centerისა და საქართველოს დემოკრატიული ინიციატივა / Georgian Democracy Initiativeს მიერ.  სრულად...  წყარო: დემოკრატ მესხთა კავშირი

თბილისი. საიას ინფორმაციის „რუსული კანონის“ გაპროტესტების დროს უკანონოდ დაკავებული აქციის მონაწილის საქმე ევროპულ სასამართლოში არსებითი განხილვის ეტაპზე გადავიდა. 14 მარტს ადამიანის უფლებათა ევროპულმა სასამართლომ საიას მიერ წარდგენილი საჩივრის არსებითი განხილვა დაიწყო. სრულად...  წყარო: საქართველოს ახალგაზრდა იურისტთა ასოციაცია

კახეთი.უფლებები საქართველომ თელავის უნივერსიტეტში ქალთა უფლებებთან დაკავშირებით შეხვედრა გამართა. შეხვედრაზე განიხილეს გენდერული თანასწორობის მნიშვნელობა, ოჯახში და გენდერული ნიშნით მოტივირებული ძალადობა და მისი ფორმები, ქალების თანაბარი უფლება მემკვიდრეობაზე, ძალადობის პრევენციისა და აღკვეთის მექანიზმები. შეხვედრა გაიმართა პროექტის „ძალადობის მსხვერპლი ქალების გაძლიერება სტრატეგიული სამართალწარმოების გზით”, რომელსაც „უფლებები საქართველო” USAID სამართლის უზენაესობის პროგრამის მხარდაჭერით ახორციელებს. სრულად... წყარო: უფლებები საქართველო 

თბილისი. ახალგაზრდა იურისტთა ასოციაციას არაერთმა პირმა მიმართა სახელმწიფო სამსახურში საქმიანობის საფუძვლით ასაკობრივი პენსიის შეწყვეტის გამო, სამართლებრივი დახმარების მიღების მიზნით. საიას მხოლოდ გორისა და ქუთაისის ოფისების ადვოკატებმა 2023 წელს სასამართლოში აწარმოეს 10 პენსიონერის საქმე, რომლებსაც სახელმწიფო პენსია უკანონოდ შეუწყდათ.  ორგანიზაცია მოუწოდებს სააგენტოს „ადახედოს თავის პოლიტიკას ამ მიმართულებით. სააგენტომ სასამართლოს მიერ მიღებული გადაწყვეტილებების საფუძველზე უნდა შეიმუშავოს ახალი მიდგომა, რომლის მიხედვითაც ყოველი კონკრეტული პენსიონერისთვის პენსიის შეწყვეტისას ჯეროვნად მოიკვლევს რიგ საკითხებს და იხელმძღვანელებს სასამართლოების მიერ უკვე მყარად დადგენილი სამართლებრივი სტანდარტებით. სრულად...  წყარო: საია

თბილისი. ინფორმაციის თავისუფლების განვითარების ინსტიტუტმა უფლებადამცველების შესახებ გაეროს სპეციალური მომხსენებლების ანგარიშის მიმოხილვა გამოაქვეყნა. ორგანიზაციის ინფორმაციით საქართველოში უფლებადამცველთა უფლებრივი მდგომარეობის შესახებ მომზადებული ანგარიში არაერთ გამოწვევაზე ამახვილებს ყურადღებას.  ამავე დროს სპეციალური მომხსენებლის ანგარიშში საუბარია გამოწვევებზეც, რომელიც უნდა შესრულდეს და კონკრეტულ რეკომენდაციებსაც სთავაზობს შესაბამის უწყებებს. სრულად...  წყარო: idfi.ge

თბილისი.სოციალური სამართლიანობის ცენტრი აქვეყნებს პუბლიკაციას „საარსებო შემწეობის როლი სამსახურის გარეშე დარჩენილი ადამიანების დაცვაში...“. „უმუშევრობის დაზღვევის არარსებობის პირობებში, სამსახურის გარეშე დარჩენილი ადამიანები ვერ იღებენ მყისიერ დახმარებას და დღითიდღე უფრო ღარიბდებიან. უკიდურეს სიღარიბეში აღმოჩენის შემდეგ კი მათი ერთადერთი იმედი სოციალური შემწეობის მიღების შესაძლებლობაა, რომლის არაქმედითი დიზაინის, ოჯახის კეთილდღეობის ირიბი შეფასებისა და მოუქნელი სისტემის გამო, მისი მიღების შანსი დაბალია. სისტემაში მოხვედრა, თავის მხრივ, ხანგრძლივად სიღარიბეში ყოფნას გულისხმობს იმდენად, რამდენადაც შემწეობის მიმღებები დამოკიდებულები ხდებიან სოციალურ დახმარებაზე და თავს არიდებენ ფორმალურ სამუშაო ბაზარზე დაბრუნებას. ამ რისკებისაგან დაცვის მნიშვნელოვანი ინსტრუმენტია უმუშევრობის დაზღვევა. ამ მექანიზმის ამოქმედება ადამიანების კეთილდღეობის დაცვის ხარისხს მნიშვნელოვნად გააუმჯობესებს და საარსებო შემწეობის სისტემასაც განტვირთავს“, ნათქვამია პუბლიკაციაში.  სრულად... წყარო: სოციალური სამართლიანობის ცენტრი

16-17 მარტს ბრიუსელში „ევროპის შეზღუდული შესაძლებლობის მქონე პირთა ფორუმის” საბჭოს შეხვედრა გაიმართა, რომელსაც ორგანიზაციის “კოალიცია დამოუკიდებელი ცხოვრებისათვის" თავმჯდომარე, გიორგი ძნელაძე და პროექტების დირექტორი, ანა ციცაგი დაესწრნენ. სიტყვით გამოსვლისას, გიორგი ძნელაძემ ისაუბრა „ევროპის შეზღუდული შესაძლებლობის მქონე პირთა ფორუმის" გამოცდილების გაზიარების მნიშვნელობაზე. „არ შეიძლება ევროკავშირში ადამიანი ან ორგანიზაცია იყო თვითკმაყოფილი და ბედნიერი მაშინ, როდესაც სხვა ქვეყნებში კონვენციის პრინციპები არ არის გატარებული. კონვენცია და შეზღუდული შესაძლებლობის მქონე პირთა უფლებები არ არის მხოლოდ ევროპისთვის და ევროპული ქვეყნებისთვის, ის მთელი მსოფლიოსთვისაა. სწორედ ამიტომ, ყველამ ერთად უნდა ვიბრძოლოთ, რომ ეს პრინციპები თითოეულ ქვეყნაში იყოს გატარებული“.  სრულად...  წყარო: კოალიციის გვერდი სოციალურ ქსელში

თბილისი. საქართველოში საყოველთაო ჯანდაცვის პროგრამის ამოქმედების შემდეგ, სერვისებზე გეოგრაფიული ხელმისაწვდომობა გაიზარდა. თუმცა, როგორც პლატფორმა "კომენტარი" თავის პუბლიკაციში აღნიშნავს – ეთნიკური უმცირესობებით დასახლებულ რეგიონებში სამედიცინო დაწესებულებებზე ფიზიკურ წვდომას მაინც აფერხებს გაუმართავი სატრანსპორტო სისტემა. ადგილზე მისულ მოქალაქეებს კი ენის ბარიერის, ექიმების შეზღუდული სამუშაო გრაფიკის, არასაკმარისი რესურსებისა და ინფრასტრუქტურული პრობლემების გამო სრულყოფილი სერვისის მიღება მაინც უჭირთ.  „2009 წლიდან სოფლებში ოჯახის ექიმის ფუნქციას სოფლის ექიმები/ექთნები ასრულებენ. სოფლის ექიმის პროგრამის ფარგლებში შესაძლებელია ექიმთან ვიზიტი, კონსულტაცია, სამედიცინო დახმარების უზრუნველყოფა გადაუდებელი მდგომარეობების დროს და სხვ.  თუმცა, რეგიონებში სამედიცინო პუნქტების ინფრასტრუქტურული პრობლემები ხელს უშლის ამბულატორიული მომსახურებების მიღებას. პრობლემაა ისიც, რომ სოფლის მოსახლეობას ხშირად ყველა ამ სერვისზე წვდომა არ აქვს. ექიმები, ძირითადად, სხვაგანაც მუშაობენ და სოფლებში ქალაქიდან ჩადიან, შესაბამისად, ადგილზე მუდმივად არ იმყოფებიან და ვერ გასცემენ მიმართვებს ექიმ-სპეციალისტებთან ვიზიტსა თუ სადიაგნოსტიკო კვლევებზე“, ასე აფასებს პლატფორმა „კომენტარი“ არსებულ სიტუაციას.  სრულად...  წყარო: პლატფორმა „კომენტარი“

თბილისი. აშშ–ის საერთაშორისო განვითარების სააგენტოს სამოქალაქო საზოგადოების ჩართულობის პროგრამის მხარდაჭერით, 14–15 მარტს, დაუნის სინდრომის ასოციაცია მართავს კონფერენციას დაუნის სინდრომის მქონე პირების სამედიცინო მეთვალყურეობის საჭიროებების შესახებ. კონფერენციას ესწრებიან საერთაშორისო, არასამთავრობო ორგანიზაციების, საქართველოს მთავრობის, პარლამენტის, წარმომადგენლები, ექიმები. 21 მარტი დაუნის სინდრომის მსოფლიო დღეა. ამ თარიღთან დაკავშირებით საქართველოში წელს მეცამეტედ იმართება საინფორმაციო კამპანია, რომლის მიზანია დაუნის სინდრომის მქონე პირთა უფლებების შესახებ საზოგადოების ინფორმირება. წყარო: აშშ–ის საერთაშორისო განვითარების სააგენტოს სამოქალაქო საზოგადოების ჩართულობის პროგრამა

თბილისი. ადამიანის უფლებათა ცენტრი აქვეყნებს ანალიტიკურ დოკუმენტს „სამოქალაქო აქტივისტების წინააღმდეგ მიმდინარე ადმინისტრაციული სამართალდარღვევის საქმეები – სასამართლო მონიტორინგის შედეგები“. „მონიტორინგის მიგნებების თანახმად, მთავარი პრობლემებია, მათ შორის, პოლიციის მიერ დაკავების საფუძვლისა და უფლებების შესახებ განმარტების მიუწოდებლობა, დაკავებისა და მისი ვადის გაგრძელების საფუძვლების დაუსაბუთებლობა, ადმინისტრაციული ორგანოს მხრიდან მტკიცებულებების მოპოვებისა და სასამართლოში წარდგენის დაბალი სტანდარტი, მოწმეების სახით დაკითხულ პოლიციელთა ჩვენებების სანდოობა და სხვ“, ნათქვამია დოკუმენტში სრულად... წყარო: ადამიანის უფლებათა ცენტრი.

თბილისი. სამოქალაქო პლატფორმა „არა-ფობიას!“ ეხმიანება 2024 წლის 8 მარტს ადიგენის მუნიციპალიტეტში განვითარებულ მოვლენებს და მოუწოდებს სამართალდამცავ უწყებებს, დროულად გამოიძიონ მუსლიმი მორწმუნეების რელიგიის თავისუფლების ხელყოფის ფაქტი.  „ადიგენში მაცხოვრებელი მუსლიმები მათ კერძო საკუთრებაში იკრიბებოდნენ სალოცავად. რელიგიური გამოხატვის ამგვარი ფორმა, შეუძლებელია, წინააღმდეგობაში მოდიოდეს რომელიმე საჯარო ინტერესთან ან სხვათა უფლებებთან. შესაბამისად, ადიგენის მუნიციპალიტეტში განვითარებული მოვლენები ცხადჰყოფს რელიგიის თავისუფლებაში უხეში ჩარევის ფაქტს, რომელსაც არ აქვს გამართლება“, ნათქვამია განცხადებაში.  სრულად...  წყარო: gdi.ge

თბილისი. დაუნის სინდრომის მსოფლიო დღესთან დაკავშირებული კამპანიის ფარგლებში ინტეგრირებული თეატრი „აზდაკის ბაღი“ მაყურებელს წარუდგენს სპექტაკლს „ჰელადოსი“. თეატრის ჯადოსნურ გარემოს კიდევ უფრო მიმზიდველს მისი ინკლუზიურობა ხდის, მრავალფეროვანი დასი პოულობს თავის თავში ძალას გადალახოს დაბრკოლებები და შეებრძოლოს საზოგადოებაში დამკვიდრებულ სტერეოტიპებს.  სრულად... წყარო: საქართველოს დაუნის სინდრომის ასოციაცია

თბილისი. ილია ჭავჭავაძის ლიტერატურულ-მემორიალურ მუზეუმში, ტოლერანტობის და მრავალფეროვნების ინსტიტუტმა (TDI) გამართა დისკუსია “რელიგიის და რწმენის თავისუფლება და ქალთა უფლებები”.  შეხვედრაზე ისაუბრეს რელიგიისა და რწმენის თავისუფლებისა და ქალთა უფლებების ურთიერთმიმართებაზე, გლობალურ კონტექსტსა და საერთაშორისო სტანდარტებზე, გავრცელებულ სტერეოტიპებსა და წარმოდგენებზე, რომლებიც თან ახლავს რელიგიისა და რწმენის თავისუფლებით სარგებლობასა და გენდერულ თანასწორობაზე მსჯელობას; რელიგიური გაერთიანებების შიგნით არსებულ დამოკიდებულებებზე, რელიგიური გაერთიანებების ავტონომიისა და ქალთა ემანსიპაციის, საქართველოში ეთნიკური აზერბაიჯანელი და მუსლიმი ქალების დისკრიმინაციის, უთანასწორობის საკითხებზე, დასაქმებასა და განათლებაზე ხელმისაწვდომობის სირთულეებზე.  ღონისძიებას ესწრებოდნენ და მონაწილეობას იღებდნენ არასამთავრობო ორგანიზაციებისა და დიპლომატიური კორპუსის წარმომადგენლები, უფლებადამცველები, რელიგიური ორგანიზაციების, აკადემიის წარმომადგენლები და სტუდენტები.  ღონისძიება გაიმართა გაეროს განვითარების პროგრამისა (UNDP) და ნორვეგიის მხარდაჭერით, ინიციატივის „ლიდერობა, თანასწორობა, ადვოკატირება და დემოკრატია“ (LEAD) ფარგლებში.  სრულად... წყარო: tdi.ge

სამცხე–ჯავახეთი. სოციალური სამართლიანობის ცენტრი და სოლიდარობის თემი ეხმიანებიან დაბა ადიგენში განვითარებულ მოვლენებს და სახელმწიფოს რელიგიის თავისუფლების და რელიგიული თანასწორობის უზრუნველსაყოფად ქმედითი ნაბიჯების გადადგმისკენ მოუწოდებენ.  „აღსანიშნავია, რომ ეს არ არის ადიგენის მუნიციპალიტეტში ქართველი მუსლიმი თემის უფლებების შეზღუდვის პირველი შემთხვევა. ქართველი მუსლიმი თემი უკვე 10 წელზე მეტია ფიზიკური, სოციალური და სიმბოლური ძალადობის, დისკრიმინაციისა და შევიწროების გამოცდილებებს აწყდება“, ნათქვმია განცხადებაში.  ორგანიზაციები მიმართავენ სამართალდამცავ ორგანოებს, პროკურატურას, საქართველოს მთავრობას გამოძიების დაწყების და აუცილებელი ინკლუზიური პოლიტიკის წარმართვის საკითხებზე. სრულად...  წყარო: სოციალური სამართლიანობის ცენტრი