თბილისი. ბოშათა ქობულეთის ანსაბმლმა, სხვა მონაწილეებთან ერთად, 2012 წლის არტ–გენის ფესტივალზე, საკუთარი პროგრამა წარუდგინა მაყურებლებს. 2011 წლიდან ფონდი „ღია საზოგადოება - საქართველო" მხარს უჭერს საქართველოში მცხოვრებ ბოშათა თემების პიროვნულ, სოციალურ, კულტურულ განვითარებას და მათ ეკონომიკურ და სამოქალაქო ინტეგრაციას. ბოშათა უნიკალური კულტურის შენარჩუნებას.. 2011 წელს უმცირესობათა საკითხების ევროპულმა ცენტრმა, ფონდის ფინანსური მხარდაჭერით განახორციელა პროექტი „ბოშათა თემების მხარდაჭერა და განვითარება საქართველოში", რომელიც მათ ეკონომიკურ და სამოქალაქო ინტეგრაციას, პროფესიული უნარ–ჩვევებით აღჭურვასა და მათი უნიკალური კულტურის შენარჩუნებას ისახავდა მიზნად. პროექტის ფარგლებში 2011 წლის გაზაფხულზე გაიმართა ბოშათა ფესტივალი. ასევე დაახლოებით პროექტის 60–მდე მონაწილემ გაიღრმავა მათემატიკისა და ქართულ ენის ცოდნა და ა.შ. ფონდის „ღია საზოგადოება – საქართველოს" ფინანსური მხარდაჭერით კიდევ ერთი პროექტი – „ჩვენ ერთი ქალაქის შვილები ვართ" განხორციელდა. პროექტის ფარგლებში ქუთაისში მცხოვრები ბოშათა თემის ბავშვთა საჭიროებებს მოიცავდა, რომელსაც საქართველოს ახალგაზრდა იურისტები ახორციელებდნენ. პროექტის ფარგლებში მათ გაეწიათ უფასო იურიდიული კონსულტაციები, ქუთაისის საიას ოფისის ბაზაზე ფუნქციონირებდა საკვირაო სკოლა. წყარო: osgf.ge სრულად

თბილისი. ორგანიზაცია „იდენტობამ" საკონსტიტუციო სასამართლოში სარჩელი შეიტანა. სარჩელს ხელს ხუთი ადამიანი აწერს, მოპასუხე მხარე კი საქართველოს ჯანმრთელობის, შრომისა და სოციალური დაცვის სამინისტროა. სრულად წყარო: idenotba.ge

თბილისი. 18 ივლისს სოციალურ მუშაკთა ასოციაციასა და საქართველოს სახალხო დამცველს შორის ურთიერთთანამშრომლობის მემორანდუმი გაფორმდა. თანამშრომლობის მიზანია ადამიანის უფლებების და თავისუფლებების დაცვის მიზნით სოციალური მუშაობის პროფესიის განვითარების მხარდაჭერა. ამ მიზნის მისაღწევად მხარეები ერთად დაგეგმავენ გარკვეულ აქტივობებს, ასევე მემორანდუმის ფარგლებში განხორციელდება ინტერსექტორული სემინარები, ტრენინგები და სხვა აქტივობები, რომლებიც ხელს შეუწყობს სოციალური მუშაობის, როგორც უფლებადამცავი პროფესიის პოპულარიზაციას. სოციალურ მუშაკთა ასოციაცია მეთოდოლოგიურ კონსულტაციის გაწევასაც უზრუნველყოფს ადამიანის უფლებათა და თავისუფლებათა დაცვის მონიტორინგის პროცესში წყარო: www.ombudsman.ge 

სამცხე–ჯავახეთი. 14 ივლისს,  სახალხო დამცველის სამსახურთან არსებული ტოლერანტობის ცენტრის ხელმძღვანელმა ბექა მინდიაშვილმა ახალციხეში  ვებ-გვერდის - tolerantoba.ge პრეზენტაცია გამართა. შეხვედრა  ორგანიზაცია ,,დემოკრატ მესხთა კავშირის” საკონფერენციო დარბაზში  შედგა  და  მასში მონაწილეობას იღებდნენ ახალციხელი ახალგაზრდები, ადგილობრივი საზოგადოებრივი ორგანიზაციების, პრესისა და ტელევიზიის წარმომადგენლები. ვებ-გვერდის  მიზანია საქართველოში ტოლერანტობის კულტურის საინფორმაციო, შემეცნებით–საგანმანათლებლო და სამართლებრივი მხარდაჭერა;  საიტზე, რომელიც გაეროს განვითარების პროგრამის მხარდაჭერით შეიქმნა, წარმოდგენილია,  როგორც რელიგიურ  და ეთნიკურ  უმცირესობებთან, ასევე რასობრივ საკითხებთან დაკავშირებული  ინფორმაცია. უმცირესობათა  ყოფის  ამსახველი  ფოტო,  აუდიო,  ვიდეო  და  ტექსტური მასალები.  დასასრულს ტოლერანტობის  ცენტრის  ხელმძღვანელი  დემოკრატ  მესხთა  კავშირის ახალგაზრდული  ორგანიზაციის  წევრებს  შეხვდა.

სამცხე–ჯავახეთი. საერთაშორისო ორგანიზაციების (USAID, UNAG, ANI, ECMI, UNDP) ხელშეწყობით საქართველოს სახალხო დამცველის ახალქალაქის ოფისში ჩატარდა  მრგვალი მაგიდა  თემაზე: ,,ქვეყანაში მიმდინარე მოვლენების შესახებ სამცხე-ჯავახეთში მცხოვრები ეროვნული უმცირესობებისთვის ინფორმაციის მიწოდების სისტემა და ქართულ მედიაში ეროვნული უმცირესობების საკითხების გაშუქება”.  შეხვედრა-დისკუსიაში ცენტრალური და რეგიონული მედიის, არასამთავრობო და უფლებების დამცველი ორგანიზაციების წარმომადგენლები მონაწილეობდნენ. მრგვალი მაგიდის მიწურულს ეროვნული უმცირესობების ინფორმირების პროცესის გაუმჯობესების რეკომენდაციები შემუშავდა. გამოიკვეთა აზრი - ცენტრალური და ადგილობრივი მედიის თანამშრომლობის აუცილებლობის შესახებ.

იმერეთი. ქუთაისის სახალხო დამცველის ოფისში ადამიანის უფლებებისა და მათი დაცვის შიდა სახელმწიფოებრივი მექანიზმების შესახებ ტრენინგი ტარდება. ტრენინგს სახალხო დამცველის აპარატი, ევროკავშირის დაფინანსებით ატარებს. ტრენერები არიან გიორგი მშვენიერაძე და ბესარიონ ბოხაშვილი. ძირითადი აუდიტორია აკაკი წერეთლის სახელმწიფო უნივერსიტეტის სამართალმცოდნეობის სტუდენტები არიან. დღის მეორე ნახევრიდან ტრენინგს სახალხო დამცველი გიორგი ტუღუშიც შეუერთდება.

აჭარა. 10 ივლისს, ბათუმის პრესკაფეში,  ჰაინრიხ ბიოლის ფონდის ორგანიზებით  გაიმართა დისკუსია თემაზე _ „შეზღუდული შესაძლებლობების მქონე პირები სოციალური და პოლიტიკური მოღვაწეობის გზაზე: რესურსები და პრობლემები".  არასამთავრობო ორგანიზაციების წარმომადგენლებმა, ჟურნალისტებმა და სტუდებტებმა განიხილეს  შშმ პირების სოციალური მდგომარეობა, დასაქმების საკითხი და მათი საზოგადოებაში ინტეგრაციის ხელშემშლელი მიზეზები. აღნიშნული დებატები ხორციელდება ევროკავშირის მიერ დაფინანსებული პროექტის – „სიძულვილის ენის წინააღმდეგ ბრძოლა საქართველოში: ლაკმუსის ტესტი სოციალური ტოლერანტობისა და ადამიანის უფლებებისათვის" – ფარგლებში.

სამცხე–ჯავახეთი.  6 ივლისს, დემოკრატ მესხთა კავშირის იურისტებმა, გასვლითი საკონსულტაციო შეხვედრა  ახალციხის მუნიციპალიტეტის სოფელ წყრუთის მოსახლეობასთან გამართეს. შეხვედრა შედგა ,, უფლება- დაიცვა შენი უფლება" - პროექტის ფარგლებში. დემოკრატ მესხთა კავშირის იურისტები, პერიოდულ შეხვედრებს მართავენ ახალციხის, ახალქალაქისა და ნინოწმინდის მუნიციპალიტეტის მოსახლეობასთან და ადგილზე უწევენ მათ იურიდიულ კონსულტაციას.

გურია. გურიის აგრობიზნეს ცენტრი ოზურგეთის, ჩოხატაურისა და ლანჩხუთის სამიზნე თემებში მოსაზლეობისთვის მართავს საინფორმაციო სესიებს თემებზე: საქართველოს კანონის „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ". ასევე აწვდის ინფორმაციას მოსახლეობას ქართული ტრადიციული სამართლისა და საკანონმდებლო აქტების თავისებურებებისა და ევროპულ სამართალთან შედარებით სურათს. სესიები ხორციელდება ევროკავშირის მიერ დაფინანსებული პროექტის – „მოდი, დავარღვიოთ სიჩუმე". სესიებზე მონაწილეებს ურიგეყდება პროექტის ფარგლებში გამოცემული საინფორმაციო მასალები. ყოველი სესიის შემდეგ იმართება დისკუსია.

მცხეთა–მთიანეთი. 2 ივლისს, „სამოქალაქო სოლიდარობის კამპანიამ" ქსნის საპყრობილესთან აქცია გამართა. აქციის მონაწილეებმა სოლიდარობა გამოუცხადეს იმ 700 პატიმარს, რომლებმაც განცხადებით სახალხო დამცველს მიმართეს და მათზე განხორციელებული ფიზიკური თუ სიტყვიერი შეურაცხყოფის ფაქტებზე გაამახვილეს ყურადღება. სამოქალაქო სოლიდარობის კამპანია უერთდება საქართველოს ახალგაზრდა იურისტთა ასოციაციის მოთხოვნებს.  ვრცლად იხილეთ ამ ბმულზე წყარო – www.gyla.ge

იმერეთი. 3 ივლისს,  საქართველოს სახალხო დამცველის ქუთაისის ოფისში, შეზღუდული შესაძლებლობების მქონე პირთა საკითხებზე ორიენტირებული, დასავლეთ საქართველოში მოქმედი ორგანიზაციების ქსელის პირველი შეხვედრა გაიმართა. ქსელი შეიქმნა ქუთაისის განათლების, განვითარების და დასაქმების ფილიალის მიერ ინიცირებული პროექტის „თანაბარი შესაძლებლობები შეზღუდული შესაძლებლობების მქონდე პირებისათვის" ფარგლებში. შეხვედრა მონაწილე ორგანიზაციების წარდგენით დაიწყო, რის შემდეგაც გაიმართა მათ მიერ განხორციელებული საქმიანობების ანგარიში, გამოვლენილი საადვოკატო ქეისების განხილვა და ასევე ქსელის შექმნის მიზნის მიმოხილვა.პროექტის მიზანია შეზღუდული შესაძლებლობების მქონე პირების უზრუნველყოფა, უფლებების დაცვა, პროპაგანდა და მონიტორინგი.

თბილისი.„არ აწამო, იწამე ადამიანი" – ამ ლოზუნგით ჩატარდა 26 ივნისს აქცია ვერის პარკში. აქცია წამების მსხვერპლთა ფსიქო–სოციალური და სამედიცინო რეაბილიტაციის ცენტრის, ადამიანის უფლებათა ცენტრისა და თბილისის ადამიანის უფლებათა სახლის ინიციატივით ჩატარდა. ორგანიზატორების თქმით, ამ აქციით მათ სურთ საზოგადოების ყურადღების გამახვილება წამების თემაზე. ისინი ასევე მოუწოდებენ ხელისუფლებას, რომ აღკვეთონ წამების ფაქტები საპატიმროებში. მათი ინფორმაციით, საქართველოს საპატიმროებში ღირსების შემლახველი და წამების ფაქტები იზრდება და ხშირ შემთხვევაში მათი გამოძიება არ ხდება. ადამიანის უფლება – არ დაექვამდებაროს წამებას – აბსოლუტური უფლებაა და გამყარებული სხვადასხვა საკანონმდებლო აქტებით. საქართველოს კონსტიტუციის მე–17 მუხლის მიხედვით, „დაუშვებელია ადამიანის წამება, არაჰუმანური, სასტიკი ან პატივისა და ღირსების შემლახველი მოპყრობა და სასჯელის გამოყენება". საქართველოს პარლამენტის მიერ რატიფიცირებულია ადამიანის უფლებათა ევროპული კონვენცია, რომლის მიხედვითაც „არავინ შეიძლება დაექვემდებაროს წამებას, არაადამიანურ ან ღირსების შემლახველ მოპყრობას ან დასჯას".

თბილისი. 21 ივნისს, სამოქალაქო განვითარების ინსტიტუტმა კვლევის და ფილმის პრეზენტაცია გამართა. სტუდია მონიტორის მიერ გადაღებული ფილმი ეხებოდა საქართველოს სხვადასხვა რეგიონში სკოლიდან გათავისუფლებულ პედაგოგებს. მასწავლებლები მათი გათავისფულების მიზეზს მათი ოჯახის წევრების ოპოზიციურ პოლიტიკურ შეხედულებებს უკავშირებენ. სტუდია მონიტორმა რამდენიმე ასეთი შემთხვევა შეისწავლა და გაარკვია, რომ მათი გათავისუფლების ბრძანებაში საფუძველი დაკონკრეტებული არ არის. ფილმში ასევე აღწერილია თუ როგორ ხორციელდება ცვლილებები და რეფორმები განათლების სამინისტროში 2005 წლიდან დღემდე. შეხვედრაზე ასევე გაიმართა სამოქალაქი განვითარების ინსტიტუტის მიერ ჩატარებული კვლევის პრეზენტაცია, რომელიც იკვლევდა სასკოლო თემის დამოკიდებულებას სკოლის უსაფრთხოების პოლიტიკისადმი. კველვა ორ ნაწილად მიმდინარეობდა, რაოდენობრივი და თვისებრივი მეთოდოლოგიის გამოყენებით. იგი თბილისის სკოლებს მოიცავს და მე–6–დან მე 12 კლასამდე მოსწავლეების და მათი მშობლების დამოკიდებულებას იკლევს, კვლევის ფარგლებში ჩატარდა ფოკუს ჯგუფებიც. გამოიკვლიეს შემდეგი საკითხები: სკოლის კლიმატი, ძალადობის შემთხვევები სკოლაში და გარეთ, დამოკიდებულებები და წარმოდგენები და განსხვავებები  ამ დამოკიდებულებებში.  დღევანდელი ღონისძიება პროექტის  – „ბავშვზე ორიენტირებული სკოლის ადვოკატირების” –ფარგლებში ხორციელდება აღმოსავლეთ-დასავლეთის მართვის ინსტიტუტის (EWMI) პროგრამის – „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

გურია.„ახალგაზრდა პედაგოგთა კავშირის"  ოფისში, პროექტის  –  „ბავშვთა უფლებები ანიმაციაში" – ფარგლებში (დაფინანსებულია G-PAC მიერ), მომზადებული 4 ანიმაციური ფილმის პრეზენტაცია გაიმართა. ანიმაციური ფილმები ლიდერთა სკოლისა და ანიმაციის განვითარების ფონდის ექსპერტების ერთობლივი ნამუშევარია და ეხება ბავშვის უფლებათა კონვენციის მუხლებს. ფილმი „თამაში" (ბავშვის უფლებათა კონვენცია მუხლი 2 –  „ყველა ბავშვი თანასწორია და ერთნაირი უფლებები აქვთ"); ფილმი „მე, ჩიტი და მასწავლებელი" (ბავშვის უფლებათა კონვენცია მუხლი 13 – „ყველა ბავშვს უფლება აქვს გამოხატოს თავისი შეხედულება ყველა საკითხზე, რომელიც მას ეხება. მის შეხედულებებს სათანადო ყურადღება უნდა მიექცეს"); ფილმი „საფეხური" (ბავშვის უფლებათა კონვენცია მუხლი 23 – „სახელმწიფო ვალდებულია განსაკუთრებული მზრუნველობა გამოიჩინოს ინვალიდი ბავშვების მიმართ»); ფილმი „ცივი სახლი" (ბავშვის უფლებათა კონვენცია მუხლი 19 –  „ყველა ბავშვი დაცული უნდა იყოს ნებისმიერი სახის ძალადობისაგან"). პრეზენტაციას ესწრებოდა ოზურგეთის საზოგადოების წარმომადგენლები.

აჭარა.14 ივნისს, „დემოკრატიის ინსტიტუტმა", ბათუმის დემოკრატიული ჩართულობის ცენტრში, გამართა პრესკონფერენცია თემაზე:  „გოდერძის უღელტეხილლის მიმდებარედ  სამთო (ზამთრის) კურორტის მშენებლობასთან დაკავშირებით წარმოქმნილი საკუთრების პრობლემა". გოდერძის ურელტეხილზე მიმდინარეობს სამთო კურორტის მშენებლობა. როგორც ორგანიზაციის პრესრელიზშია ნათქვამი, ამ ტერიტორიაზე მცხოვრებ ოჯახებს აღნიშნული ქონება საკუთრების უფლებით ოფიციალურად 1998 წელს გადაეცათ, მაგრამ მათი გამოუცდელობისა და საჭირო ფინანსების არქონის გამო ქონება ვერ დაარეგისტრირეს (იმ პერიოდში ქონება საჯარო რეესტრში რეგისტრაციას არც საჭიროებდა). 2011 წლის 21 ოქტომრის საქართველოს მთავრობის განკარგულებით კი, ეს ტერიტორიია მთლიანად სახელმწიფო საკუთრებად გამოცხადდა. „დემოკრატიის ინსტიტუტი" ითხოვს, რომ გოდერძის უღელტეხილზე, მიმდინარე სამთო კურორტის მშენებლობის არეალში მცხოვრებ ოჯახებს  საკუთრებაში გადაეცეთ მათ მფლობელობაში არსებული სახლები, ან სახელმწიფომ კერძო მესაკუთრეებისგან გამოისყიდოს არსებული ქონება.

სამცხე–ჯავახეთი.5 ივნისს, ადიგენის მუნიციპალიტეტის სოფელ დიდი სმარდის სამოქალაქო კლუბის წევრებმა სოფელ ზანავის საჯარო სკოლის მოსწავლეებს ბავშვთა უფლებების კონვენცია გააცნეს. შეხვედრაზე განიხილეს ბავშვთა უფლებების კონვენციის სხვადასხვა მუხლები, ხოლო 27-ე მუხლის გარშემო, რომელიც ბავშვის განვითარებისა და ცხოვრების  ხელშემწყობი გარემოს შექმნაში მშობლისა და სახელმწიფოს ვალდებულებებს შეეხება, გაიმართა დისკუსია.  მოსწავლეებმა ისაუბრეს სკოლაში ბავშვებს შორის არსებულ სოციალურ თანასწორობაზე, სტერეოტიპებზე და ინკლუზიურ სწავლებაზე. მსგავსი ტრენინგები, მოსწავლეთა ცნობიერების ამაღლების მიზნით, სხვა სკოლებშიც იგეგმება.

იმერეთი. დღეს, ქუთაისის განათლების, განვითარების და დასაქმების ცენტრმა, საქართველოს სახალხო დამცველის ოფისში, საქართველოს იუსტიციის სამინისტროს მხარდაჭერით ინიცირებული პროექტის – „სამოქალაქო განათლება ტრეფიკინგის პრევენციისთვის" – შემაჯამებელი პრეზენტაცია გამართა. შეხვედრაზე წარადგინეს პროექტის ფარგლებში განხორციელებული ღონისძიებების ანგარიში და გამოვლენილი  ვიდეო რგოლების, ესეების, ბლოგების  კონკურსში გამარჯვებული პირების დაჯილდოვება. პროექტს 2012 წლის მარტის თვიდან ქუთაისის განათლების განვითარების და დასაქმების ცენტრი საქართველოს იუსტიციის სამინისტროს  ფინანსური მხარდაჭერით ახორციელებდა. პროგრამის მიზანს წარმოადგენდა იმერეთის რეგიონის მოსახლეობის ინფორმირება ადამიანებით ვაჭრობის საფრთხეებისა და ლეგალური მიგრაციის შესაძლებლობების შესახებ, როგორც ქვეყნის შიგნით, ასევე მის ფარგლებს გარეთ.

აჭარა. 1 ივნისს 16:00 სთ–ზე, ბათუმის დემოკრატიული ჩართულობის ცენტრში გაიმართა საჯარო დისკუსია თემაზე „ბავშვზე ზრუნვის ალტერნატიული მომსახურებები – მინდობით აღზრდა, მცირე საოჯახო ტიპის სახლები და დღის ცენტრები". შეხვედრაზე, ასევე საერთაშორისო არასამთავრობო ორგანიზაცია „ევრი ჩაილდიმა" და მისმა პარტნიორმა ორგანიზაციებმა წარადგინეს ამავე თემაზე ჩატარებული კვლევა, რომელიც ევროკავშირის მიერაა დაფინანსებული. შეფასებამ აჩვენა, რომ მომსახურების მიმწოდებლები და მომხმარებლები, ზოგადად, კმაყოფილნი არიან არსებული მომსახურებით და მხარს უჭერენ ქვეყანაში მათ არსებობას. თუმცა დაასახელეს მთელი რიგი საჭიროებები, რომელთა გათვალისწინებაც აუცილებელია, რათა მიწოდებული მომსახურება უფრო ხარისხიანი გახდეს. კვლევის ფარგლებში შემუშავებული 70 რეკომენდაციიდან 49 აუცილებელ ყურადღებას საჭიროებს. ამ საკითხების გარშემო ისაუბრეს საერთაშორისო უფლებათა დაცვის არასამთავრობო ორგანიზაცია „ევრი ჩაილდის" დირექტორმა ანდრო დადიანმა და ბათუმის სოციალური მომსახურების სააგენტოს სოც–მუშაკმა ნინო ცეცხლაძემ. დისკუსიაზე მოწვეულნი იყვნენ ბათუმის ბავშვთა ზრუნვის სამსახურის სოციალური მუშაკები, ბათუმის სოციალური მომსახურების სააგენტოს თანამშრომლები, არასამთავრობო ორგანიზაციები, სტუდენტები და მედიის წარმომადგენლები.

თბილისი. გენდერული თანასწორობისა და ლგბტ ადამიანის უფლებადამცველმა საზოგადოებრივმა ორგანიზაცია „იდენტობამ" საქართველოს პრეზიდენტს ღია წერილით მიმართა.  წერილი სრულად წყარო – http://identoba.ge/

თბილისი. საზოგადოებრივი ორგანიზაცია ,,კონსტიტუციის 42-ე მუხლი” და ,,ქალთა ინიციატივების მხარდამჭერი ჯგუფი”  „ქრისტიან-დემოკრატიული მოძრაობის” ლიდერის, გიორგი თარგამაძის საპარლამენტო გამოსვლას ეხმიანებიან. განცხადება სრულად წყარო – www.article42.ge

თბილისი. ასოციაცია "ლგბტ საქართველო" გამოეხმაურა „ქრისტიან-დემოკრატიული მოძრაობის” ლიდერის, გიორგი თარგამაძის საპარლამენტო გამოსვლას და საქართველოს პარლამენტის წევრებს მიმართა. მიმართვა სრულად წყარო – http://www.facebook.com/LGBTGeorgia

შიდა ქართლი. გორის დემოკრატიული ჩართულობის ცენტრში ორგანიზაციებმა – უსაფრთხო მსოფლიო და კავკასიის კვლევითი რესურსების ცენტრმა გამართეს კვლევის შედეგების პრეზენტაცია. კვლევა ჩატარდა ცხინვალის რეგიონის გამყოფი ხაზის მოსაზღვრე ოთხ არეალში: ატოც-დირბში, ნიქოზი-მერეთში, ფლავისმან-ბერშუეთსა და წითელუბან-ლამისყანაში. პრეზენტაციას ესწრებოდნენ: ევროკავშირის მონიტორინგის მისიის, საერთაშორისო და ადგილობრივი საზოგადოებრივი ორგანიზაციების, საკრებულოს და სამხარეო ადმინისტრაციის წარმომადგენლები. შეხვედრის დროს ორგანიზატორმა ორგანიზაციებმა ისაუბრეს კვლევის მეთოდებსა და შედეგების შესახებ. ასევე, შედარდა წინა კვლევისა და ამჟამინდელი კვლევის შედეგები, რამაც გამოკვეთა ცვლილებები აღნიშნულ ზონაში მცხოვრები მოსახლეობის უსაფრთხოების კუთხით.