თბილისი. 25 აპრილს გაიმართა საქართველოს ზრუნვის პლატფორმის პრეზენტაცია. პლატფორმა აპრილის დასაწყისში დააფუძნა ოთხმა თემატურმა ქსელმა ზიანის შემცირების საქართველოს ქსელმა, საქართველოს კარიტასმა, საქართველოს ფსიქიკური ჯანმრთელობის კოალიციამ, საქართველოს შინ მოვლის კოალიციამ დააფუძნა.საქართველოს ზრუნვის პლატფორმის მიზანია ხელი შეუწყოს საქართველოს ჯანმრთელობისა და სოციალური დაცვის სექტორში ადამიანის უფლებებზე დაფუძნებული ზრუნვის მიდგომის დამკვიდრებასა და განვითარებას. წყარო: შინ მოვლის გვერდი სოციალურ ქსელში

თბილისი. ეთნოსთაშორისი თანამშრომლობისა და კონსულტაციების ანალიტიკური ცენტრის ორგანიზებით, 20 აპრილს, გაიმართა პროექტ „აღმოსავლეთ პარტნიორობის უმცირესობათა ქსელის" პრეზენტაცია.  პროექტის პრეზენტაციას წინ უძღოდა სემინარი პარტნიორი ორგანიზაციების, სახალხო დამცველთან არსებული ტოლერანტობის ცენტრისა და სახალხო დამცველთან არსებული ეთნიკურ უმცირესობათა საბჭოს წარმომადგენელთა მონაწილეობით. სემინარის მიზანი იყო უმცირესობათა უფლებების დაცვის ეფექტურ მოდელებზე მსჯელობა სახალხო დამცველთან არსებული ეთნიკური უმცირესობისა და რელიგიათა საბჭოების მაგალითზე და ამ მიმართულებით პარტნიორ ქვეყნებს შორის გამოცდილების გაზიარება. პროექტ  „აღმოსავლეთ პარტნიორობის უმცირესობათა ქსელს" ახორციელებს  ევროპის უმცირესობათა უფლებების საერთაშორისო ჯგუფი (ევროპის განყოფილება),  ეთნოსთაშორისი თანამშრომლობისა და კონსულტაციების ანალიტიკური ცენტრი (საქართველო), უმცირესობის საკითხთა ევროპული ცენტრი – კავკასია, გლობალური და რეგიონული კვლევების ანალიტიკური ცენტრი (სომხეთი) და სოციალური სამოქმედო ცენტრის პროექტი „საზღვრების გარეშე (უკრაინა), ევროკომისიის ფინანსური მხარდაჭერით. წყარო:tolerantoba.ge

ქვემო ქართლი. 20–21 აპრილს „სიდას" ორგანიზებით, განხორციელდა ტრენინგის პირველი ეტაპი ქვემო ქართლის პრობაციის ბიუროს თანამშრომლებისათვის. ტრენინგი მიზნად ისახავდა პრობაციის ბიუროს შესაძლებლობებისა და საჭიროებების ანალიზის ფარგლებში გამოვლენილი საკითხების შესახებ მონაწილეთა ინფორმირებას. ტრენინგი გაიმართა პროექტის – „არასრულწლოვანთა მართლმსაჯულების რეფორმის მხარდაჭერა ქვემო ქართლისა და სამხცხე–ჯავახეთის ეროვნული უმცირესოებების თემებში" – ფარგლებში, რომელიც ხორციელდება ევროკავშირის მხარდაჭერით. წყარო:ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ 16 აპრილს ციხისძირში მომხდარ ინციდენტთან დაკავშირებით განცხადება გაავრცელა. „მიგვაჩნია, რომ გავრცელებულ მასალებზე დაყრდნობით, 14 აპრილის ინციდენტში იკვეთება მოქალაქეებისათვის რელიგიური ნიშნით შეურაცხყოფის მიყენება, რაც ადამიანის ფუნდამენტური უფლების დარღვევაა. ამ სახის დანაშაულების პრევენციისთვის აუცილებელია დამნაშავე პირების სათანადო დასჯა", ნათქვამია განცხადებაში. სრულად  წყარო: gyla.ge 

შიდა ქართლი. 13 აპრილს ასოციაცია „გორის ინვალიდთა კლუბის"  გორის ახალგაზრდული ცენტრი მოინახულა USAID -ის ევროპისა და ევრაზიის ბიუროს ადმინისტრატორის ასისტენტმა პეიჯ ალექსანდერმა და აშშ-ის სახელმწიფო მდივნის თანაშემწემ დემოკრატიის, ადამიანის უფლებებისა და შრომის საკითხებში ტომას მელიამ. სტუმრები ორგანიზაციას ეწვივნენ საქართველოს დემოკრატიისა და სამართლიანი მმართველობის სამუშაო ჯგუფის ფარგლებში.

სამეგრელო. სახალხო დამცველმა უჩა ნანუაშვილმა  არასამთავრობო ორგანიზაციებს ზუგდიდში, 17 აპრილს,  2012 წლის ანგარიში წარუდგინა. მისი შეფასებით, პენიტენციალურ სისტემაში არსებული ვითარება, 1 ოქტომბრის არჩევნების შემდეგ მნიშვნელოვნად გაუმჯობესდა. მის ანგარიშში საუბარი იყო ასევე,  თვითმმართველობებში არსებულ მდგომარეობაზე, საჯარო მოხელეთა უკანონო გათავისუფლებებზე, მაღალჩინოსანთა დაკავებებზე და ლოპოტას ხეობაში განვითარებული მოვლენები. ამ უკანასკნელზე საუბრისას ომბუდსმენმა აღნიშნა, რომ მათ შეისწავლეს გარემოებები და ოფიციალური ვერსიისგან განსხვავებული ინფორმაცია მიიღეს. უჩა ნანუაშვილის ცნობით, საქართველოს სახალხო დამცველის ზუგდიდის ოფისს ახალი თანამშრომელი, ადამიანის უფლებათა ოფიცერი შეემატება, რომელიც  სამეგრელო-ზემო სვანეთში მოქალაქეთა უფლებების მხრივ არსებულ ვითარებაზე საგანგებო რეგიონულ ანგარიშს მოამზადებს. გარდა ამისა,  სამეგრელოს მუნიციპალიტეტებში, მესტიაში, წალენჯიხაში, სენაკსა და მარტვილში, ასევე თვითმმართველ ქალაქ ფოთში სახალხო დამცველს წარმომადგენლები ეყოლება, რომლებიც ადამიანის უფლებების დარღვევის ფაქტების და კონკრეტული პრობლემების შესახებ ინფორმაციას ცენტრალურ ოფისს მიაწვდიან. ანგარიშის წარდგენამდე, სახალხო დამცველმა ზუგდიდის #4 სასჯელაღსრულების დაწესებულება მოინახულა და აღნიშნა, რომ პატიმართა მიმართ ადმინისტრაციის მოპყრობა შეცვლილია, თუმცა შენობა რემონტს არ ექვემდებარება და ის დაუყონებლივ უნდა დაიხუროს.

თბილისი. ადამიანის უფლებების სწავლებისა და მონიტორინგის ცენტრმა (EMC) ციხისძირის ინციდენტთან დაკავშირებით განცხადება გაავრცელა.„EMC გამოხატავს შეშფოთებას აღნიშნული  შემთხვევის გამო და ამ  ფაქტს მიიჩნევს ბუნებრივ გაგრძელებად იმ ანტიმუსლიმური განწყობისა, რომელიც ბოლო დროს საზოგადოების ცალკეულ ჯგუფებში შეინიშნება. რელიგიური ჯგუფების მიმართ გახშირებული დაპირისპირების გამო, ნათელია, რომ ეს არ წარმოადგენს მხოლოდ ერთ კონკრეტულ გადაცდომას.  სახეზეა საზოგადოების სისტემური პრობლემა. ეს კი მიუთითებს სახელმწიფოს ვალდებულებაზე განახორციელოს პოზიტიური ქმედებები საზოგადოებაში ტოლერანტობისა და სოლიდარობის დამკვიდრების თვალსაზრისით", ნათქვამია განცხადებაში. განცხადება  

თბილისი. 16 აპრილს, გაიმართა მრგვალი მაგიდის ფორმატის შეხვედრა პროექტის -„ტრეფიკინგის საფრთხეების შესახებ ცოდნის გაღრმავება განათლების ხელშეწყობის გზით" - ფარგლებში. პროექტს ახორციელებს მიგრაციის საერთაშორისო ორგანიზაცია (IOM) შვეიცარიის განვითარებისა და თანამშრომლობის სააგენტოს (SDC) მხარდაჭერით. შეხვედრა მიზანად ისახავდა ტრეფიკინგის პრევენციაში მონაწილე პარტნიორების მიმდინარე საქმიანობებისა და მომავალი გეგმების ურთიერთგაცნობას. მიგრაციის საერთაშორისო ორგანიზაციის (IOM) და სხვადასხვა არასამთავრობო ორგანიზაციების წარმომადგენლებმა იმსჯელეს ტრეფიკინგის პრევენციის გრძელვადიანი მდგრადობის უზრუნველყოფაზე, ტრეფიკინგთან ბრძოლის ორწლიანი სამოქმედო გეგმის განხორციელებასა და განსაკუთრებით, ამ პროცესში მრავალდისციპლინარული ორგანიზაციების ჩართულობასა და კოორდინირებაზე. წყარო: პორტალი GINSC

თბილისი. „კონსტიტუციის 42-ე მუხლმა" გამართა კვლევის – „საქართველოში საერთო სასამართლოების მიერ იძულებით გადაადგილებულ პირთა საქმეებზე ადამიანის უფლებათა საერთაშორისო სტანდარტების გამოყენების შეფასება"–  პრეზენტაცია. ღონისძიებას ესწრებოდნენ სახალხო დამცველის აპარატის, ასევე ახალგაზრდა იურისტთა, თბილისის საქალაქო და სააპელაციო სასამართლოს წარმომადგენლები და დამოუკიდებელი იურისტები. ორგანიზაციის იურისტებმა  სტუმრებთან ერთად იმსჯელეს იძულებით გადაადგილებულ პირთა საქმეების შესწავლის და წარმოების შედეგად შემუშავებული რეკომენდაციების შესახებ. კონსტიტუციის 42-ე მუხლის წარმომადგენელებმა, პროექტის ფარგლებში შეისწავლეს სამივე ინსტანციის სასამართლოს მიერ გამოტანილი 270 გადაწყვეტილება.  კვლევა ასახავდა  გამოსახლების, კომპენსაციისა და სტატუსის მინიჭების პრობლემებს, პროექტი განხორციელდა გაეროს ადამიანის უფლებათა უმაღლესი კომისრის ოფისის მხარდაჭერით.  წყარო:article42.ge

თბილისი. საერთაშორისო გამჭვირვალობა–საქართველომ გამოაქვეყნა 7 შენიშვნა შრომის კოდექსში დაგეგმილ ცვლილებებთან დაკავშირებით. „რჩება საკითხები რომლებიც კვლავაც დახვეწას საჭიროებს, იმისათვის, რომ მიღწეულ იქნას შრომის კოდექსის მთავარი მიზანი –მაქსიმალურად დააბალანსოს დამსაქმებელსა და დასაქმებულს შორის ურთიერთობა", ნათქვამია ორგანიზაციის გვერდზე. შენიშვნები მოიცავს შემდეგ საკითხებს: ვადიანი ხელშეკრულებები,  კოლექტიური და ინდივიდუალური შრომითი ხელშეკრულებები, ზეგანაკვეთური სამუშაოს  ანაზღაურება,  უქმე  დღეები, მტკიცების ტვირთი, კოლექტიური შრომითი ხელშეკრულება, გაფიცვა/ლოკაუტის უფლების წარმოშობა. სრულად   წყარო: transparency.ge 

თბილისი. არასამთავრობო ორგანიზაციამ „ტრენერთა საკვალიფიკაციო ცენტრმა" შეზღუდული შესაძლებლობის მქონე ადამიანთა საკითხებზე მომზადა ახალი სოციალური რგოლი. მასში ყურადღება გამახვილებულია ისეთ საკითხებზე, როგორიცაა ინფორმაციის, მოძრაობის, განათლების თანაბარ უფლებებზე. საქართველოში ორგანიზაციის მონაცემით 127 ათასზე მეტი შეზღუდული შესაძლებლობის მქონე პირი ცხოვრობს.   წყარო: დამოუკიდებელი ცხოვრების ახალგაზრდული ცენტრის გვერდი სოციალურ ქსელში

კახეთი. გურჯაანსა და თელავში დოკუმენტური ფილმების ფესტივალი  ჩატარდა. ფესტივალი გურჯაანში მუსიკალურ სკოლაში, ხოლო თელავში, მედია კაფე თელავში 11, 12 და 13 აპრილს გაიმართა.  ფესტივალის ფარგლებში ორივე მუნიციპალიტეტში პარალელურად „ძველი თელავის ფოტოებისა" და „ძველი გურჯაანის სახეების" ფოტოგამოფენაც გაიმართა. კინოფესტივალების ორგანიზატორია ჩეხური არასამთავრობო ორგანიზაცია „ადამიანი გაჭირვებაში".  რეგიონული პარტნიორი კი „მედია ცენტრი კახეთი’’, და  „საქდოკ ფილმი" საქართველო". ფესტივალის ფარგლებში გარდა ფილმების ჩვენებისა, მოეწყო დისკუსია. პროექტის კოორდინატორის, შორენა კუჭუხიძეს თქმით, ფესტივალის მიზანია, არა მხოლოდ კარგი ფილმების ჩვენება, არამედ მოქალაქეების აქტუალურ და მნიშვნელოვან საკითხებზე დისკუსიის პროცესში ჩართვა –  „ფილმები გადაღებულია მსოფლიოს სხვადასხვა კუთხეში და თითოეული მათგანი წარმოდგენილია ადამიანის უფლებათა ყოველწლიურ საერთაშორისო დოკუმენტურ კინოფესტივალზე "ერთი მსოფლიო”. ფესტივალის რეგიონალური პარტნიორი ორგანიზაცის ,,მედია ცენტრი კახეთის’’ დამფუძნებელის, მაია მამულაშვილის თქმით, ფესტივალზე წარმოდგენილი ფილმები განსხვავებული თემატიკისა იყო, მათ შორის ადამიანის უფლებებზე, პოლიტიკურ რეჟიმებზე, რასიზმზე, მიგრაციაზე და სხვა.

თბილისი. კონსტიტუციის 42-ე მუხლი პატიმრის ზაზა ჩხიკვაძის გადასარჩენად სასჯელაღსრულების, პრობაციისა და იურიდიული დახმარების სამინისტროს და სახალხო დამცველის აპარატს მიმართავს. ორგანიზაცია მოუწოდებს უწყებებს მიიღონ სათანადო ზომები და გამოინახონ გზა პრობლემის მოსაგვარებლად. „სახელმწიფოს უპირველესი მოვალეობაა იზრუნოს ქვეყნის თვითოეული მოქალაქის სიცოცხლესა და ჯანმრთელობაზე, მიუხედავად მისი სოციალური სტატუსისა. განსაკუთრებით მაღალია სახელმწიფოს პასუხისმგებლობა, როდესაც საქმე ეხება თავისუფლებაშეზღუდულ პირს",  ნათქვამია ორგანიზაციის მიერ გავრცელებულ განცხადებაში. წყარო:ორგანიზაციის გვერდი სოციალურ ქსელში

გურია. ჯანმრთელობის დაცვის საერთაშორისო დღის აღსანიშნავად,  „ახალგაზრდა პედაგოგთა კავშირის" ბაზაზე არსებული ახალგაზრდული ცენტრის წევრებმა აქცია მოაწყვეს. აქციის მიზანი იყო, გაემახვილებინათ საზოგადოების ყურადღება ქვეყანაში ბავშვთა ჯანმრთელობის დაცვის კუთხით არსებულ პრობლემებზე. სახელმწიფოს პასუხისმგებლობაზე ბავშვთა უფლებების დაცვის მიმართულებით.

თბილისი. „საერთაშორისო გამჭვირვალობა–საქართველოს" განცხადებით ზესტაფონის მუნიციპალიტეტის გამგეობამ თანამშრომლის გათავისუფლების მიზეზის შესახებ ორგანიზაციას მცდარი ინფორმაცია მიაწოდა. „საერთაშორისო გამჭვირვალობა–საქართველო" მოუწოდებს ზესტაფონის მუნიციპალიტეტის გამგეობას, დაიცვას დასაქმებულ პირთა უფლებები, საკადრო ცვლილებები მოაქციოს საკანონმდებლო ჩარჩოებში და ახალი კადრების აყვანა შესაბამის თანადებობაზე განახორციელოს მხოლოდ საკონკურსო–საატესტაციო კომისიის მეშვეობით – ღია, გამჭვირვალე კონკურსის წესის დაცვით. სრულად  წყარო:ორგანიზაციის გვერდი სოციალურ ქსელში

თბილისი. სამართლიანი არჩევნებმა ადგილობრივი თვითმმართველობებიდან თანამშრომელთა გათავისუფლების შესახებ მორიგი ინფორმაცია გამოაქვეყნა. ორგანიზაციისთვის ცნობილი გახდა, რომ საგარეჯოს მუნიციპალიტეტიდან რეორგანიზაციის შედეგად 30 თანამშრომელი გათავისუფლდა. ამ საკითხზე ორგანიზაციამ ინფორმაციის გამოთხოვნის მიზნით უკვე მიმართა საგარეჯოს მუნიციპალიტეტის გამგეობას. „სამწუხაროა, რომ ადგილობრივი თვითმმართველობის სამსახურებიდან კვლავ გრძელდება თანამშრომელთა სავარაუდოდ პოლიტიკური ნიშნით დათხოვნისა და ახალი კადრების კონკურსის წესის გარეშე, ე.წ. „მოვალეობის შემსრულებლად" აყვანის ტენდენცია. მიგვაჩნია, რომ ხელისუფლებამ დროულად უნდა უზრუნველყოს მსგავსი სახის გაუმართლებელი პრაქტიკის პრევენცია", ნათქვამია ორგანიზაციის მიერ გამოქვეყნებულ ინფორმაციაში. სრულად წყარო: ორგანიზაციის გვერდი სოციალურ ქსელში

თბილისი. სახალხო დამცველმა პარლამენტს წარუდგინა ანგარიში საქართველოში 2012 წელს ადამიანის უფლებათა და თავისუფლებათა დაცვის მდგომარეობის შესახებ. ანგარიში ეხება უფლებათა და თავისუფლებათა ფართო სპექტრს და მიმოიხილავს სამოქალაქო–პოლიტიკურ, ეკონომიკურ, სოციალურ და კულტურულ უფლებათა დაცვის მდგომარეობას საქართველოში. „ანგარიში ასახავს ადამიანის უღფლებათა დაცვის კუთხით სახელმწიფოში არსებულ ზოგად ტენდენციებსა და მოქალაქეთა უფლებებისა და თავისუფლების დარღვევის კონკრეტულ ფაქტებს", ნათქვამია ანგარიშში. ანგარიში წყარო: ombudsman.ge

თბილისი. არასამთავრობო ორგანიზაციები შეშფოთებას გამოთქვამენ ბათუმში, აჭარის შს სამმართველოს  უფროსის ვალერიან თელიას მიერ საიას თანამშრომლების მიმართ განხორციელებული სიტყვიერი და ფიზიკური შეურაცხყოფის ფაქტის გამო, რომლის შესახებ ინფორმაცია გუშინ გავრცელდა. „მიგვაჩნია, რომ შინაგან საქმეთა სამინისტროს აჭარის სამხარეო პოლიციის უფროსის ქმედება შეიცავს დანაშაულის ნიშნებს. ჩვენს ხელთ არსებული ინფორმაციის საფუძველზე, აღნიშნული ფაქტის დროულად და ობექტურად გამოძიების ნაცვლად, სამწუხაროდ, ადგილი აქვს დანაშაულის დაფარვისა და გამოძიების არასრულყოფილად წარმართვის მცდელობას", ნათქვამია განცხადებაში. არასამთავრობო ორგანიზაციები მოუწოდებენ შს სამინისტროს დროულად, სრულყოფილად და მიუკერძოებლად გამოიძიოს აღნიშნული საქმე. სრულად წყარო: facebook.com/IDFI.official

თბილისი. ფემინისტების დამოუკიდებელმა ჯგუფმა 20 მარტს მომხდარ მკვლელობასთან დაკავშირებით ღია წერილი გაავრცელა, რომლითაც მთავარ პროკურორს, იუსტიციისა და  შინაგან საქმეთა მინისტრებს მიმართავს. წერილში ნათქვამია, რომ ეკა მეტრეველი ოჯახში ძალადობის ერთადერთი მსხვერპლი არ არის და საქართველოში ძალადობის სხვადასხვა ფორმა კრიტიკულ ნიშნულს აღწევს. „ფემინისტების დამოუკიდებელი ჯგუფი მოგიწოდებთ ქალბატონ თეა წულუკიანს, ბატონ ირაკლი ღარიბაშვილს და ბატონ არჩილ კბილაშვილს პირადი კონტროლის ქვეშ აიყვანოთ ამ კონკრეტული დანაშაულის გამოძიება და საჯაროდ დააფიქსიროთ სახელმწიფოს უმკაცრესი დამოკიდებულება ოჯახური დანაშაულის მიმართ. საქართველოში უნდა შეწყდეს ძალადობა ქალებზე. ამისათვის კი საჭიროა მსგავსი დანაშაულების მიმართ ნულოვანი ტოლერანტობის გამოყენება. აუცილებელია საქართველოს ხელისუფლებამ მკაფიოდ და ცალსახად ისაუბრობს აღნიშნულ სოციალურ პრობლემაზე და გაატაროს ქმედითი ღონისძიებები ოჯახური დანაშაულის პრევენციაზე, გამოვლენაზე, გამოძიებასა და დასჯაზე", ნათქვამია ღია წერილში.  სრულად  წყარო:ორგანიზაციის გვერდი სოციალურ ქსელში

თბილისი. ბათუმში მომხდარ ინციდენტთან დაკავშირებით საქართველოს იურისტთა ასოციაციამ მორიგი განცხადება გაავრცელა. საია შეშფოთებას გამოთქვამს გავრცელებულ ინფორმაციასთან დაკავშირებით, რომლის თანახმადაც, განადგურდა ინციდენტის ამსახველი უტყუარი მტკიცეულება – ვიდეო მასალა.  „მივიჩნევთ, რომ აღნიშნული შემთხვევა  არის ტესტი, რომელიც წარმოაჩენს თუ რა მიდგომა აქვს შსს-ს საკუთარი თანამშრომლების მიერ ჩადენილ სამართალდარღვევათა ფაქტებზე. ჯერ-ჯერობით სამწუხარო ფაქტია, რომ არათუ არ ხორციელდება სათანადო საგამოძიებო მოქმედებები, არამედ ყველაფერი კეთდება იმისთვის, რომ სიმართლე არ დადგინდეს და პოლიციის მაღალჩინოსნის მიერ ჩადენილი სავარაუდო დანაშაულის კვალი წაიშალოს. აღნიშნული შემთხვევა შესაძლოა  მიუთითებდეს უწყებაში არსებულ სისტემურ პრობლემებზე", ნათქვამია განცხადებაში. ზემოაღნიშნული გარემოებების მნიშვნელობიდან გამომდინარე საია შს მინისტრთან შეხვედრას მოითხოვს. სრულად  წყარო:gyla.ge 

თბილისი. საქართველოს ახალგაზრდა იურისტთა ასოციაცია ეხმაურება ბათუმში მომხდარ ინციდენტს და შეშფოთებას გამოთქვამს „აჭარის შს სამმართველოს უფროსის, ვალერიან თელიას ქმედების გამო, რომელიც საიას თანამშრომლების ფიზიკურ და სიტყვიერ შეურაცხყოფაში გამოიხატა". ორგანიზაციის ვებგვერდზე აღნიშნულია, რომ  შს სამინისტრო და მისი ნებისმიერი თანამშრომელი მოქალაქეთას ღირსებისა და უფლებების უპირველესი დამცველი უნდა იყოს და სწორედ ამ მიზნების მისაღწევადაა შექმნილი აღნიშნული უწყება. „პოლიციის მაღალჩინოსნის ზემოაღნიშნული ქმედება წინააღმდეგობაშია საქართველოს კანონმდებლობასთან და მის მაღალ პასუხისმგებლობასთან ამ ვითარებაში, სრულიად მიუღებელი და აღმაშფოთებელია აჭარის შს სამმართველოს უფროსის მიერ მოქალაქეებისათვის, ამ შემთხვევაში კი, საიას თანამშრომლებისათვის სიტყვიერი და ფიზიკური შეურაცხყოფის მიყენება. აღნიშნულს თან ახლდა ვალერიან თელიას მიერ საკუთარი თანამდებობრივი მდგომარეობის ხაზგასმა და საკუთარი ძალაუფლების მოქალაქეების საწინააღმდეგოდ გამოყენების მუქარა, რაც აბსოლუტურად შეუსაბამოა მის თანამდებობრივ ვალდებულებებთან", – ნათქვამია საიას განცხადებაში. საია მოითხოვს, გამოძიება ჩატარდეს დროულად, მიუკერძოებლად და ეფექტურად, ამასთან, ვალერიან თელიას მიმართ უნდა დადგეს შესაბამისი თანამდებობრივი პასუხისმგებლობის საკითხი. სრულად წყარო: gyla.ge 

თბილისი. შეზღუდული შესაძლებლობის მქონე პირთა საკითხებზე მომუშავე საზოგადოებრივი ორგანიზაციების საერთო კრება 21 მარტს გაიმართა. კრებაზე, რომელსაც 84 არასამთავრობო ორგანიზაციის წარმომადგენელი ესწრებოდა, პრემიერ-მინისტრთან არსებულ საკოორდინაციო საბჭოში სამოქალაქო სექტორის წარმოამდგენლების არჩევის წესი განიხილებოდა. საერთო კრებაზე საბჭოში შშმ პირთა უფლებების დამცველების არჩევის კრიტერიუმზე მოხდა შეთანხმება. შშმ პირთა საკოორდინაციო საბჭო თავისი არსით  არის პრემიერ მინისტრის მრჩეველი სათათბირო ორგანო, რომელიც ხელს უწყობს საქართველოს სამთავრობო და არასამთავრობო სექტორის  ჩართულობით სახელმწიფოში ერთიანი სახელმწიფო პოლიტიკის შემუშავებას, მის ეფექტურად განხორციელებასა და კოორდინაციას. საბჭოს მიზანია - მხარი დაუჭიროს იმ პოლიტიკის შემუშავებასა და პროგრამების განხორციელებას, რომელიც ხელს შეუწყობს შშმ პირთა თანაბარი უფლებებისა და ინტერესების დაცვას. წყარო:disability.ge