თბილისი. 2021 წლის მარტიდან საქართველოს ახალგაზრდა იურისტთა ასოციაციამ (საია) საქართველოს სახალხო დამცველის აპარატთან თანამშრომლობით და USAID/PROLoG-ის მხარდაჭერით, დაიწყო საპილოტე პროექტის განხორციელება, რომლის მიზანიც პატიმრებისათვის სამართლებრივი დახმარების გაწევა იყო. „წინასწარ შემუშავებული კრიტერიუმების შესაბამისად, ჯამში შეირჩა 10 პატიმრის საქმე, რომელთა მიმართაც გამოყენებული იყო დისციპლინური პასუხისმგებლობის სხვადასხვა ზომა. სასამართლოში წარმომადგენლობას საია ახორციელებდა. ამ დროისთვის რუსთავისა და თბილისის საქალაქო სასამართლოებში უკვე დასრულდა 5 საქმის განხილვა. ხუთივე საქმეზე სასამართლოებმა დააკმაყოფილეს სასარჩელო მოთხოვნები და შესაბამისად, უკანონოდ იქნა ცნობილი კონკრეტული პენიტენციური დაწესებულებების მიერ პატიმრებისთვის დისციპლინური პასუხისმგებლობის დაკისრება. დანარჩენ ხუთ საქმეზე სასამართლო განხილვა ჯერჯერობით გრძელდება. სახალხო დამცველის აპარატი და საია იმედოვნებენ, რომ ეს საპილოტე პროექტი და მიღწეული დადებითი შედეგები, სასამართლოს მიერ დადგენილი სტანდარტები პოზიტიურ გავლენას მოახდენს პენიტენციურ დაწესებულებებში პატიმართა მიმართ დისციპლინური პასუხისმგებლობის გამოყენების არსებულ პრაქტიკაზე“. სრულად... წყარო: ombudsman.ge

საქართველოს ახალგაზრდა იურისტთა ასოციაციის საერთაშორისო სამართალწარმოების გუნდის ხელმძღვანელმა, თამარ ონიანმა, მონაწილეობა მიიღო ევროპის საბჭოს მინისტრთა კომიტეტისა და მომჩივანთა წარმომადგენლებისა თუ არასამათავრობო ორგანიზაციების ერთობლივ შეხვედრაში. შეხვედრაზე ორგანიზაციის წარმომადგენელმა მინისტრთა კომიტეტს გააცნო იდენტობის ჯგუფის საქმეების აღსრულების მდგომარეობა, და, დამატებით, ასევე, მიმოიხილა 2021 წლის 05 ივლისს განვითარებული ძალადობრივი მოვლენები. სრულად... წყარო: gyla.ge

თბილისი. ომბუდსმენი „ქართული ოცნების“ თავმჯდომარის, ირაკლი კობახიძის „მუქარის შემცველ განცხადებებს“ ეხმაურება. „კობახიძე საუბრობს სახალხო დამცველის და მის მიერ მოწვეული ექიმების შესაძლო პასუხისმგებლობასთან დაკავშირებით. აღნიშნული რიტორიკა სცილდება სამართლებრივ ჩარჩოს, წარმოადგენს დამოუკიდებელ კონსტიტუციურ ორგანოზე და მის ექსპერტებზე თავდასხმისა და დაშინების მცდელობას და ეწინააღმდეგება ადამიანის უფლებების ეროვნულ და საერთაშორისო ვალდებულებებს.  მოვუწოდებთ გაერთიანებული ერების ორგანიზაციის, ევროპის საბჭოს, ეუთო/ოდირის, საქართველოში აკრედიტებულ დიპლომატიურ მისიებსა და ომბუდს გაერთიანებებს, შეისწავლონ აღნიშნული ფაქტი და თავიანთი მანდატის ფარგლებში შესაბამისი შეფასება მისცენ მას“, ნათქვამია სახალხო დამცველის განცხადებაში. სრულად... წყარო: ombudsman.ge

თბილისი. სოციალური სამართლიანობის ცენტრი ინფორმაციით, 18 ნოემბერს ეკონომიკისა და მდგრადი განვითარების სამინისტრომ რელიგიურ ორგანიზაციას - არარეგისტრირებული კავშირი „იმამ ალის მეჩეთი“, უარი უთხრა მარნეულში მდებარე მეჩეთის სარგებლობაში გადაცემაზე. „სამინისტრომ ეს გადაწყვეტილება კვლავ იმ უსამართლო და დისკრიმინაციულ არგუმენტაციას დააფუძნა, რომ მუსლიმ თემში მხოლოდ სსიპ „სრულიად საქართველოს მუსლიმთა სამმართველოა“ (შემდგომში სამმართველო) სახელმწიფოს მიერ აღიარებული ის რელიგიური ორგანიზაცია, რომელსაც ისტორიულ რელიგიურ ნაგებობებზე უფლებების მოპოვებისა და სახელმწიფოსთან სამართლებრივ ურთიერთობებში შესვლის ლეგიტიმაცია აქვს. იმ პირობებში, როდესაც სამმართველოს იმამ ალის მეჩეთთან არც სამართლებრივი და არც ფაქტობრივი კავშირი არ აქვს, ეს გადაწყვეტილება რელიგიის თავისუფლების სფეროში სახელმწიფოს თვითნებური და დისკრიმინაციული ჩარევის კიდევ ერთ მაგალითს წარმოადგენს“. სრულად... წყარო: socialjustice.org.ge

კახეთი. ორგანიზაციები „ცვლილებები თანაბარი უფლებებისათვის” და „კოალიცია დამოუკიდებელი ცხოვრებისათვის” „ლაგოდეხის დამოუკიდებელი ცხოვრების ცენტრთან“ ერთად, ლაგოდეხის კაბალის თემის შეზღუდული შესაძლებლობის მქონე წევრებს შეხვდნენ. „შეხვედრაზე თემის წევრებმა არსებულ ბარიერებსა და პრობლემებზე ისაუბრეს და მათი მოგვარების გზები განიხილეს“.  სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, ორგანიზაციამ საცხოვრისის სფეროში უზენაეს სასამართლოში მნიშვნელოვანი დავა მოიგო. „სასამართლომ გაიზიარა წინა ინსტანციის სასამართლოების გადაწყვეტილებები, არ დააკმაყოფილა თბილისის მუნიციპალიტეტის მერიის საჩივარი და განაცხადა, რომ ერთ ადამიანზე მხოლოდ 6.4 კვ.მ საცხოვრებელი ფართის გამოყოფა სათანადო საცხოვრებლის უფლების დარღვევაა“. სრულად... წყარო: socialjustice.org.ge

თბილისი. სახალხო დამცველმა ნინო ლომჯარიამ გამოაქვეყნა მიეს მიერ შექმნილი სპეციალისტთა/ექსპერტთა ჯგუფის დასკვნა მიხეილ სააკაშვილის სამედიცინო მდგომარეობის მონიტორინგის შედეგებზე. დასკვნის თანახმად, მესამე პრეზიდენტის ჯანმრთელობის მდგომარეობა კრიტიკულია. „პაციენტის მდგომარეობის კრიტიკულობიდან გამომდინარე, მისი მკურნალობის გაგრძელება დაუყოვნებლივ რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, კერძოდ, ინტენსიური თერაპიის განყოფილებაში, რის პირობებსაც მე-18 დაწესებულების კლინიკა არ აკმაყოფილებს“. სრულად... წყარო: ომბუდსმენის გვერდი სოციალურ ქსელში

თბილისი. ღია საზოგადოების ფონდის ფინანსური მხარდაჭერით, მარიამ ნატროშვილმა შეაგროვა უსახლკაროდ დარჩენილი ადამიანების ზეპირი ისტორიები და წიგნად გამოსცა. „საქართველოში თავზე ჭერიდან უსახლკარობამდე ერთი ნაბიჯი, ერთი ამბავია. აქ თავმოყრილი ამბების გმირების ნაწილს ერთ დროს სახლი ჰქონდათ, დღეს კი თავშესაფარში ცხოვრობენ. ეს ამბები იქ შევაგროვეთ. ქალაქის ნაპირებზე გაფანტული თავშესაფრები ბევრ ერთმანეთისგან განსხვავებულ და თან ერთნაირ ამბავს იტევს“. წიგნი... წყარო: ღია საზოგადოების ფონდი გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) მიიჩნევს, რომ მიხეილ სააკაშვილის საქმეთა განხილვა ამ დრომდე ბრალდებულის სამართლიანი სასამართლოს უფლების უგულებელყოფით მიმდინარეობს. „აღნიშნული აზიანებს, როგორც ბრალდებულის უფლებრივ მდგომარეობას, ისე სასამართლოს რეპუტაციასა და სასამართლო სხდომის საქვეყნოობის პრინციპს, ასევე ამკვიდრებს საფრთხის შემცველ პრეცედენტს“. სრულად... წყარო: idfi.ge

თბილისი. სახალხო დამცველი თვლის, რომ საქართველოს მესამე პრეზიდენტის მიხეილ სააკაშვილის შეზღუდვა, მიიღოს მონაწილეობა საკუთარ სასამართლო განხილვებში, უხეშად არღვევს კონსტიტუციითა და ევროპული კონვენციით დაცული სამართლიანი სასამართლოს უფლებას. „ომბუდსმენი მიმართავს სპეციალურ პენიტენციურ სამსახურს ჯეროვნად და კეთილსინდისიერად შეასრულოს მასზე დაკისრებული უფლება-მოვალეობები და უზრუნველყოს პატიმარ მიხეილ სააკაშვილის სასამართლოს წინაშე წარდგენა, მისი ჯანმრთელობისა და უსაფრთხოების დაცვის შესაბამისი გარანტიებით. ასევე, მიმართავს სასამართლოს, სამივე მიმდინარე საქმის განხილვის ფარგლებში მისცეს ბრალდებულს პოზიციის დაფიქსირების, მტკიცებულებათა გამოკვლევაში მონაწილეობისა და საკუთარი უფლებების დაცვის შესაძლებლობა“, ნათქვამია განცხადებაში. სრულად... წყარო: ombudsman.ge

თბილისი. „საფარმა“ რამდენიმე დღის წინ გაავრცელა ინფორმაცია, რომ CEDAW-ს კომიტეტი მოუწოდებს საქართველოს ხელისუფლებას, ჩაატაროს დამოუკიდებელი გამოძიება ხანუმ ჯეირანოვას გარდაცვალების საქმესთან დაკავშირებით და დასაჯოს დამნაშავე პირები. ამასთან, კომიტეტის გადაწყვეტილებით, ხელისუფლება ვალდებულია, მსხვერპლის შვილებს მოუხადოს ოფიციალური ბოდიში და გადაუხადოს კომპენსაცია. „ხანუმ ჯეირანოვას ახლობლები სასტიკად გაუსწორდნენ, რასაც ქალის სიკვდილი მოჰყვა. გამოძიების ვერსიით, ჯეირანოვამ თავი მოიკლა, მაგრამ გამოძიება არ დაინტერესებულა, ადგილი ხომ არ ჰქონია თვითმკვლელობის ინსცენირებას, არ გამოკვეთილა არც გენდერული დისკრიმინაციის მოტივი, რომელიც რეალურად საფუძვლად ედო ქალის მიმართ გამოყენებულ ძალადობას“. ორგანიზაცია „საფარი“ და ადამიანის უფლებათა ცენტრი დააკვირდებიან საქართველოს ხელისუფლების მიერ კომიტეტის მოსაზრებებისა და რეკომენდაციების შესრულებას და, აღნიშნულთან დაკავშირებით, უზრუნველყოფენ საზოგადოების ინფორმირებულობას. სრულად... წყარო: sapari.ge

თბილისი. „ალტე უნივერსიტეტის“ პროფესორმა და ორგანიზაცია „უფლებები საქართველოს“ აღმასრულებელმა დირექტორმა, ლადო მკერვალიშვილმა თანასწორობის კვირეულის ფარგლებში, სტუდენტებისთვის წაიკითხვა ლექცია „თანასწორობა და კანონი დისკრიმინაციის ყველა ფორმის აღმოფხვრის შესახებ“. „ლექციის მიზანი იყო თანასწორობისა და მრავალფეროვნების მნიშვნელობის შესახებ ცნობიერების ამაღლება, ასევე სტუდენტთა ინფორმირება დისკრიმინაციის წინააღმდეგ ბრძოლის სამართლებრივი მექანიზმების თაობაზე“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2021 წლის 25 ნოემბერს რუსეთის უზენაესი სასამართლო განიხილავს საზოგადოება „მემორიალის“ ლიკვიდაციის მოთხოვნის სარჩელს, რომელიც რუსეთის ფედერაციის გენერალურმა პროკურატურამ წარადგინა.  ორგანიზაცია ტოტალიტარიზმს იკვლევს არა მხოლოდ რუსეთში, არამედ მთელი მსოფლიოს მასშტაბით და საზოგადოების ცნობიერების ამაღლებაზე მუშაობს. IDFI-სა და საზოგადოება „მემორიალს“ თანამშრომლობის მრავალწლიანი ისტორია აქვთ. „საზოგადოება „მემორიალის” წინააღმდეგ მიმართული შეტევა აშკარა შურისძიების აქტია ადამიანის უფლებათა დაცვის წამყვანი ორგანიზაციის მიმართ და მიზნად ისახავს იმ მძლავრი ხმის ჩახშობას, რომელიც 30 წელზე მეტია, დოკუმენტურ წყაროებზე დაყრდნობით და უმაღლესი ხარისხის კვლევის მეშვეობით ამხელს საბჭოთა კავშირის დანაშაულებრივ სისტემას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. სახალხო დამცველმა მიხეილ სააკაშვილის სამედიცინო მომსახურების მონიტორინგის მიზნით მულტიპროფილურ ექსპერტთა ჯგუფი შექმნა. „2021 წლის 16 ნოემბერს სახალხო დამცველმა საქართველოს მესამე პრეზიდენტის, ბრალდებულ/მსჯავრდებულ მიხეილ სააკაშვილისთვის იუსტიციის სამინისტროს/სპეციალური პენიტენციური სამსახურის მიერ მიწოდებული სამედიცინო მომსახურების ადეკვატურობისა და დროულობის მონიტორინგის მიზნით მულტიპროფილური სამედიცინო ექსპერტთა ჯგუფი მოიწვია. ჯგუფის მიზანია ასევე შეაფასოს რამდენად შეესაბამება მიხეილ სააკაშვილის ჯანმრთელობის უფლების დაცვას N18 სამკურნალო დაწესებულება ამჟამად და იქნება თუ არა ამ დაწესებულებაში ადეკვატური სამედიცინო სერვისის მიწოდება შესაძლებელი პატიმრის მიერ ხანგრძლივი შიმშილობის შეწყვეტის შემდეგ, როგორც ამას ადამიანის უფლებათა ევროპული სასამართლო 10 ნოემბრის გადაწყვეტილებით ითხოვს“. სრულად... წყარო: ombudsman.ge

თბილისი. 2021 წლის 11-12 ნოემბერს, სოციალური სამართლიანობის ცენტრმა რიგით მესამე ქვიარ ფორუმი გამართა. ქვიარ ფორუმის მთავარი თემა იყო - „კრიზისი, პოსტ-კრიზისი და ქვიარ ემანსიპაციის პერსპექტივები საქართველოში“. „ქვიარ ფორუმის საჯარო ლექციათა 2 დღიან ციკლში მონაწილეობდნენ ფილოსოფიის, სოციალური მეცნიერებების და გენდერის კვლევების სფეროში მოღვაწე მომხსენებლები საქართველოდან და აღმოსავლეთ ევროპის ქვეყნებიდან“. ვრცლად ფორუმის შესახებ... წყარო: socialjustice.org.ge

თბილისი. ევროპის პარლამენტის 2019-2024 წლის მოწვევის პარლამენტარებმა, სამხრეთ კავკასიასთან ურთიერთობის დელეგაციის თავმჯდომარემ მარინა კალიურანდმა და საქართველოს საკითხებში მუდმივმა მომხსენებელმა სვენ მიქსერმა ერთობლივი განცხადება გააკეთეს, სადაც საქართველოს სახალხო დამცველის როლის მნიშვნელობას გაუსვეს ხაზი. „ჩვენ მტკიცედ ვუჭერთ მხარს სახალხო დამცველის აპარატის მუშაობას, რომელიც უმნიშვნელოვანეს როლს ასრულებს ქართულ საზოგადოებაში. ქალბატონი ნინო ლომჯარია და მისი აპარატის მუშაობა ქებას იმსახურებს, ხოლო მათი დამოუკიდებლობის წინააღმდეგ მიმართული თავდასხმები, ვისგანაც არ უნდა მოდიოდეს, ყოველთვის შემაშფოთებელია“, ნათქვამია განცხადებაში. სრულად... წყარო: ombudsman.ge

თბილისი. სახალხო დამცველი ეხმიანება იუსტიციის სამინისტროს მიერ შექმნილი მულტიფუნქციური კონსილიუმის გარშემო გამოთქმულ სხვადასხვა პოზიციებს და მიიჩნევს, რომ იუსტიციის სამინისტრომ/სპეციალურმა პენიტენციურმა სამსახურმა მიხეილ სააკაშვილის ჯანმრთელობის დაცვა სრულფასოვნად უნდა უზრუნველყოს, ამ მიზნით კი მულტიფუნქციური კონსილიუმის მუშაობა უფრო სისტემატიური და ეფექტიანი გახადოს. სრულად... წყარო: ombudsman.ge

თბილისი. სოციალური სამართლიანობის ცენტრის ინფორმაციით, სოციალური მომსახურების სააგენტოსა და თანამშრომლებს შორის შრომითი მედიაციით გათვალისწინებული ვადა დღეს იწურება.  „სოციალური მომსახურების სააგენტოს თანამშრომლები ელოდებიან შემოთავაზებებს შრომის გაუმჯობესებული პირობების შესახებ, წინააღმდეგ შემთხვევაში, დასაქმებულები საკუთარი შრომითი უფლებების დასაცავად იძულებულნი იქნებიან, დაიწყონ გაფიცვა“. ორგანიზაცია სოლიდარობას უცხადებს სოციალური მომსახურების სააგენტოს თანამშრომლებს და იზიარებს მათი მინიმალური მოთხოვნების დაკმაყოფილების აუცილებლობას. წყარო: socialjustice.org.ge

თბილისი. 14 ნოემბერს, ინფორმაციის თავისუფლების განვითარების ინსტიტუტმა (IDFI) მონიტორინგის, მონაცემების მოძიების მეთოდებისა და მონაცემთა ვიზუალიზაციის შესახებ კორუფციასთან ბრძოლის სასერტიფიკატო პროგრამის მონაწილეებისთვის ტრენინგი გამართა. სრულად... წყარო: idfi.ge

თბილისი. სახალხო დამცველი განცხადებას ავრცელებს პენიტენციური დაწესებულების თანამშრომლის მიმართ მიმდინარე შეურაცხმყოფელ კამპანიაზე. „სახალხო დამცველი მიუღებლად მიიჩნევს გამოძიების დასრულებამდე, მოხელის პირადი ცხოვრების უფლებით დაცულ სფეროში მასობრივ და უხეშ ჩარევას, მით უფრო, იმ პირობებში, როდესაც მედიასივრცეში გავრცელებული ინფორმაციის უტყუარობა დადასტურებული არ არის. ამასთან, სახალხო დამცველი კიდევ ერთხელ უსვამს ხაზს გამოხატვის ადრესატის ოჯახში მცხოვრები არასრულწლოვანის ფსიქო-ემოციური მდგომარეობის დაცვის საჭიროებას და მისი საუკეთესო ინტერესის გათვალისწინებით, მოუწოდებს საზოგადოებას, თავი შეიკავონ საჯარო სივრცეში პენიტენციური სამსახურის წარმომადგენლის მიმართ შეურაცხმყოფელი წარწერებისა და პოსტერების განთავსებისგან, რაც, შესაძლოა, ახალისებდეს, მათ შორის, ბავშვის მიმართ ძალადობას, ბულინგს თუ სხვაგვარ ქმედებას“. სრულად... წყარო: ombudsman.ge

თბილისი. საქართველოში მოქმედი სამოქალაქო საზოგადოების ორგანიზაციები ევროპის საბჭოს წამების პრევენციის კომიტეტს თხოვნით მიმართავენ, გამოიყენონ თავიანთი მანდატით განსაზღვრული შესაძლებლობა საქართველოს პენიტენციურ სისტემაში ად ჰოკ ვიზიტისა და პრეზიდენტ სააკაშვილის უფლებრივი მდგომარეობის მონიტორინგის მიზნით. „ჩვენს ღრმა შეშფოთებას იწვევს ის გარემოება, რომ პატიმარ სააკაშვილის მიმართ მსგავსი მოპყრობა, მაშინ, როდესაც საზოგადოების სრული ყურადღება მიპყრობილია მისი ჯანმრთელობისა და უფლებრივი მდგომარეობის მიმართ, სერიოზულ კითხვებს აჩენს სხვა პატიმრების მიმართ მოპყრობასა და მათი უფლებრივი მდგომარეობის თვალსაზრისითაც. ვფიქრობთ, საერთაშორისო ავტორიტეტული მონიტორინგის ორგანოს მიერ საქართველოს პენიტენციურ სისტემაში ამჟამად არსებული მდგომარეობის, მათ შორის, პატიმრობაში მყოფი საქართველოს მესამე პრეზიდენტის მიმართ მოპყრობის შეფასება მნიშვნელოვანია საქართველოში ადამიანის უფლებების დაცვის გაუმჯობესების თვალსაზრისით“. სრულად... წყარო: tdi.ge

თბილისი. ინფორმაციის თავისუფლების განვითარების ინსტიტუტი (IDFI) განცხადებას ავრცელებს მიხეილ სააკაშვილის მე-18 დაწესებულებაში იძულებით შეყვანის კადრების გავრცელებასთან დაკავშირებით. „აღნიშნული კადრების გავრცელება არ ემსახურება სახელმწიფოს მიერ დასახელებულ მიზანს. მეტიც, იქმნება შთაბეჭდილება, რომ კადრების გავრცელების რეალური მიზანი იყო პატიმრის მიმართ ძალის გამოყენების დემონსტრირება და ამ გზით საქართველოს მესამე პრეზიდენტის პატივისა და ღირსების შელახვა. ხელისუფლებამ პატივი უნდა სცეს ეროვნულ და საერთაშორისო კანონმდებლობას, საქართველოს სახელმწიფოებრიობას და შეწყვიტოს საქართველოს მესამე პრეზიდენტის ღირსების შემლახველი ქმედებების განხორციელება“. სრულად... წყარო: idfi.ge