თბილისი. სახალხო დამცველი მიიჩნევს, რომ 11 ნოემბერს, იუსტიციის სამინისტრომ/სპეციალურმა პენიტენციურმა სამსახურმა N18 სამედიცინო დაწესებულებაში მიხეილ სააკაშვილის ნების საწინააღმდეგოდ, ძალის გამოყენებით შესახლების ამსახველი კადრების გავრცელებით პატიმრის პატივის, ღირსებისა და პირადი ცხოვრების ხელშეუხებლობის უფლება დაარღვია. ომბუდსმენი მოითხოვს - იუსტიციის მინისტრმა და სპეციალურმა პენიტენციურმა სამსახურმა პატივი სცენ პატიმართა უფლებებს და შეწყვიტონ მიხეილ სააკაშვილის პერსონალურ მონაცემთა, პატივისა და ღირსების დარღვევა. სრულად... წყარო: ombudsman.ge

თბილისი. ორგანიზაციია „საფარი“ ინფორმაციით, ხანუმ ჯეირანოვას საქმის შესახებ გაეროს ქალთა კომიტეტმა გადაწყვეტილება გამოაქვეყნა. ჯეირანოვას ნათესავები ქმრის ღალატში ადანაშაულებდნენ. 2014 წლის 16 სექტემბერს მას თავს დაესხა ქმრის სამი ნათესავი, რომლებმაც იგი მთელ სოფელში ათრიეს და სასტიკად სცემეს. ქალს ოჯახის წევრებიც აიძულებდნენ ვირთხის საწამლავით მოეკლა თავი. დედამ ჯეირანოვა მეორე დღეს, ფარდულში გარდაცვლილი იპოვა: ცხედარი თოკზე ეკიდა. მოლებმა, რომლებმაც ქალის ცხედარი მოამზადეს აღნიშნეს, რომ ტანისამოსი სისხლით იყო გაჟღენთილი, მოწმის ჩვენებით, ის „სიკვდილამდე ნაცემი“ იყო. „გაეროს ქალთა უფლებების კომიტეტმა დაადგინა, რომ საქართველომ ვერ უზრუნველყო გამოძიება და სამართლებრივი დევნა ქალის მიმართ გენდერული ნიშნით და ღირსების სახელით ჩადენილ ძალადობასთან დაკავშირებით, რომელიც სასტიკად სცემეს ოჯახის წევრებმა მცირეწლოვანი შვილების თვალწინ, რამაც მისი სიკვდილი გამოიწვია. კანონდარღვევის შესახებ დღეს გამოქვეყნებულ მოსაზრებებში, ქალთა დისკრიმინაციის აღმოფხვრის კომიტეტი (CEDAW) გამოხატავს წუხილს იმ ფაქტის გამო, რომ საქართველოს ხელისუფლებამ ვერ უზრუნველყო მსხვერპლი ხანუმ ჯეირანოვას ოჯახის წევრების დაკავება და პასუხისგებაში მიცემა, რომლებმაც იგი უგონო მდგომარეობამდე სცემეს და ასევე მისი ნათესავებთან დაბრუნების გადაწყვეტილების გამო, რის შემდეგაც ქალი გარდაცვლილი იპოვეს“. კომიტეტმა სახელმწიფოს დამოუკიდებელი გამოძიების დაწყება და დამნაშავეთა დასჯა დაავალა. სრულად... წყარო: sapari.ge

თბილისი. „უფლებები საქართველო“ აქვეყნებს საერთაშორისო სამართლის ექსპერტის, ნანა მჭედლიძის ბლოგპოსტს იმის შესახებ თუ რას ამბობს ევროსასამართლო სააკაშვილის საქმეზე 10 ნოემბერს გამოტანილი დროებითი ღონისძიების განჩინებაში. „ამ ეტაპზე, საქართველოს ხელისუფლებას მოეთხოვა, რომ მიაწოდოს ევროპულ სასამართლოს ინფორმაცია „განმცხადებლის ამჟამინდელ ჯანმრთელობის მდგომარეობაზე (აგრეთვე ციხის საავადმყოფოში გაწეული სამედიცინო მკურნალობის შესახებ)“. აგრეთვე, სახელმწიფოს მოეთხოვა, რომ უზრუნველყოს ზოგადად განმცხადებლის უსაფრთხოება და მისთვის შიმშილობის შემდგომი შესატყვისი სამედიცინო მკურნალობა“. სრულად... წყარო: rights.ge

თბილისი. სამოქალაქო საზოგადოების ორგანიზაციების ნაწილი ეხმაურება მიმდინარე წლის 10 ნოემბერს თბილისში გამართული აქციების მონაწილეების დაკავების ფაქტებს და მიიჩნევს, რომ სამართალდამცავი ორგანოების მიერ გამოყენებული მასობრივი დაკავების პრაქტიკა არღვევს მშვიდობიანი შეკრებისა და გამოხატვის უფლებებს. აგრეთვე, პრობლემურია დაკავებული პირების ხანგრძლივი ვადით დაყოვნება პოლიციის ავტომობილებში, მათი დაკავების იზოლატორებში დაგვიანებით გადაყვანა და ამ პროცესში დაკავებულების ადვოკატთან წვდომის შეზღუდვა. სრულად... წყარო: gyla.ge

თბილისი. 10 ნოემბერს, ინფორმაციის თავისუფლების განვითარების ინსტიტუტმა (IDFI) და საქართველოს ახალგაზრდა იურისტთა ასოციაციამ (GYLA), ევროკავშირის მხარდაჭერით, კვლევის „საჯარო მმართველობის საუკეთესო ევროპული პრაქტიკა და საქართველო“ პრეზენტაცია გამართა. „კვლევა ფარავს პოლიტიკის დაგეგმვისა და კოორდინაციის, ანგარიშვალდებულების, სახელმწიფო სერვისების მიწოდებისა და საჯარო ფინანსების მართვის მიმართულებებს. კვლევის მიზანი იყო აღნიშნული მიმართულებებით წარმატებული ევროპული ქვეყნების მოდელების შესწავლა და მათი საჯარო მმართველობის სისტემების ანალიზის საფუძველზე რეკომენდაციების შემუშავება საქართველოს საჯარო მმართველობის რეფორმის ეფექტიანად განხორციელების ხელშეწყობის მიზნით“. სრულად... წყარო: idfi.ge

თბილისი. სოციალური სამართლიანობის ცენტრი წარმოგიდგენთ სტატიას, რომლის მიზანია, მიმოიხილოს ჩრდილოვანი ეკონომიკის ფორმალიზების პროცესი და მასთან დაკავშირებული შეზღუდვები, ჩრდილოვანი ეკონომიკის მიდგომები და აგრეთვე ის გამოწვევები, რომელთა წინაშეც ჩრდილოვანი ეკონომიკის მაღალი მაჩვენებლების მქონე განვითარებადი ქვეყნები დგანან. სრულად... წყარო: socialjustice.org.ge

თბილისი. ომბუდსმენმა 10 ნოემბერს დაკავებული 46 პირიდან 23 მათგანი მოინახულა. „დაკავებულები მიუთითებენ დაკავების უსაფუძვლობაზე, თუმცა არაფერი უთქვამთ პოლიციის მხრიდან ფიზიკური ძალადობის/ძალის გადამეტების ფაქტებზე. დაკავებულთაგან მხოლოდ ერთ პირს ჰქონდა გარკვეული დაზიანებები, რის შესახებაც უკვე ინფორმირებულია სახელმწიფო ინსპექტორის სამსახური. ომბუდსმენი მოუწოდებს შინაგან საქმეთა სამინისტროს, დაუყოვნებლივ მიაწოდოს ინფორმაცია თითოეული პირის ოჯახის წევრსა თუ ადვოკატს დაკავებულების ადგილსამყოფელის შესახებ და მისცეს ადვოკატებს დაცვის ქვეშ მყოფ პირებთან შეუფერხებელი შეხვედრის შესაძლებლობა“. სრულად... წყარო: ომბუდსმენის გვერდი სოციალურ ქსელში

თბილისი. საქართველოს სახალხო დამცველი ეხმიანება 2021 წლის 9 ნოემბერს აქციის მიმდინარეობისას გიგი უგულავას მიერ გაკეთებულ განცხადებას. ომბუდსმენი მიიჩნევს, რომ პოლიტიკოსის მოწოდება საფრთხის შემცველია ბავშვის ფსიქო-ემოციური მდგომარეობისთვის და არღვევს მის საუკეთესო ინტერესს - დაცული იყოს ნებისმიერი ფორმით ძალადობისგან. „სახალხო დამცველი ხაზგასმით აღნიშნავს, რომ დაუშვებელია პოლიტიკური ოპონირების იარაღად ბავშვების, მათი პირადი ცხოვრებისა და ოჯახური სტატუსის გამოყენება“. სრულად... წყარო: ombudsman.ge

თბილისი. სოციალური სამართლიანობის ცენტრი ეხმიანება ჭყონდიდის ეპარქიაში ბოლო დღეებში მიმდინარე მოვლენებს და შინაგან საქმეთა სამინისტროს კანონის უზენაესობისა და სოციალური მშვიდობის განუხრელი დაცვისკენ მოუწოდებს. „პროცესებზე ჩვენმა დაკვირვებამ აჩვენა, რომ განკვეთილი სასულიერო პირები სალხინოს მონასტერში მათი საცხოვრებელი სივრცეებიდან საპატრიარქომ, ძალადობრივი ჯგუფების გამოყენებით, სათანადო პროცედურების გარეშე გამოასახლა და ამ პროცესში პოლიციამ დემონსტრაციულად უგულებელყო კანონისა და უსაფრთხოების დაცვის მაღალი ინტერესები. პოლიციამ ნაცვლად იმისა, რომ გამოსახლების პროცესის კანონიერება შეემოწმებინა და იძულების ქვეშ მყოფი სასულიერო პირების უსაფრთხოება და იურიდიული ინტერესები დაეცვა, მათი ნაწილი თვითნებურად დააკავა და რამდენიმე საათის განმავლობაში ამის განმარტებებიც კი არ მისცა“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. ტოლერანტობისა და მრავალფეროვნების ინსტიტუტი (TDI) ქვეყნის მესამე პრეზიდენტის, მიხეილ სააკაშვილის გარშემო განვითარებულ მოვლენებს ეხმაურება. „ხელისუფლების მხრიდან ვითარების მიზანმიმართული გამწვავება, მიხეილ სააკაშვილისთვის სამოქალაქო საავადმყოფოში გადაყვანაზე უარის თქმა, იუსტიციის მინისტრის მიერ გაჟღერებული ინიციატივა, რომლის თანახმად მესამე პრეზიდენტის სასამართლო პროცესი საპატიმროშივე უნდა გაიმართოს, მის წინააღმდეგ სასჯელაღსრულების დაწესებულებაში ჩადენილი მძიმე უფლებადარღვევები: შემზარავი ფსიქოლოგიური ზემოქმედება და სავარაუდო ძალადობა, დიდ ბარიერს აღმართავს ყველა მცდელობის წინაშე, დავუბრუნდეთ მშვიდ პოლიტიკურ გარემოს, ძირს უთხრის ხელისუფლებასა და ოპოზიციას შორის დიალოგის წარმართვის შესაძლებლობას და საზოგადოებას სამოქალაქო დაპირისპირებისკენ უბიძგებს. ამ ვითარებაში, საფრთხე ექმნება თითოეული ადამიანის თავისუფლებას, სიცოცხლესა და ჯანმრთელობას. დღეს კრიტიკულად აუცილებელია, როგორც მიხეილ სააკაშვილის სიცოცხლისა და ჯანმრთელობის დაცვა, მისი პოლიტიკურად მოტივირებული დევნის შეწყვეტა, ასევე სახელმწიფოს გადარჩენა დემოკრატიის დასამარებისა და ავტორიტარიზმისგან“, ნათქვამია ორგანიზაციის განცხადებაში. სრულად... წყარო: tdi.ge

თბილისი. საქართველოს სამოქალაქო საზოგადოების ორგანიზაციების ნაწილი მოითხოვს, რომ ხელისუფლებამ მესამე პრეზიდენტი ალტერნატიულ სამედიცინო დაწესებულებაში გადაიყვანოს.  „მიგვაჩნია, რომ მიმდინარე მოვლენებზე სრული პასუხისმგებლობა ხელისუფლებას ეკისრება. მიხეილ სააკაშვილის მკურნალობის თაობაზე მათი გადაწყვეტილებები მიმართული არ არის ქვეყანაში არსებული მძიმე პოლიტიკური კრიზისის განმუხტვისკენ და არც პატიმრის ჯანმრთელობის ინტერესებით არის ნაკარნახევი. არსებული პოლიტიკური ვითარების გათვალისწინებით, ხელისუფლების გაუმართლებელი ნაბიჯების შედეგად ქვეყანა შესაძლოა სამოქალაქო დაპირისპირების წინაშე აღმოჩნდეს. მოვუწოდებთ ხელისუფლებას გადადგას კონკრეტული ნაბიჯები ვითარების დეესკალაციის მიმართულებით. მათ შორის, საქართველოს მესამე პრეზიდენტი დაუყოვნებლივ გადაიყვანოს იმ ალტერნატიულ სამედიცინო დაწესებულებაში, სადაც დაცული იქნება მისი ღირსება, სიცოცხლე, ჯანმრთელობა და უსაფრთხოება“. სრულად... წყარო: transparency.ge

თბილისი. სოციალური სამართლიანობის ცენტრი და საქართველოს ახალგაზრდა იურისტთა ასოციაცია ეხმიანებიან საქართველოს მესამე პრეზიდენტის, მიხეილ სააკაშვილის გლდანის N18 სამკურნალო დაწესებულებაში გადაყვანისას განვითარებულ მოვლენებს. ორგანიზაციები მიიჩნევენ, რომ პროცესი წინააღმდეგობაში მოდის ადამიანის ძირითადი უფლებების - სიცოცხლის, ჯანმრთელობისა და პირადი უსაფრთხოების დაცვის პრინციპებთან და არსებულ პოლიტიკურ კრიზისში ვითარების ესკალაციისა და პოლიტიკური პოლარიზაციის დამატებით საფრთხეებს აჩენს. სრულად... წყარო: socialjustice.org.ge

თბილისი. 8 ნოემბერს სახალხო დამცველმა პენიტენციური სამსახურის N18 სამკურნალო დაწესებულებაში გადაყვანილი საქართველოს მესამე პრეზიდენტი, მიხეილ სააკაშვილი მოინახულა.  „შეხვედრისას მიხეილ სააკაშვილმა სახალხო დამცველს განუცხადა, რომ მას არ ჰქონდა ინფორმაცია N18 დაწესებულებაში გადაყვანის შესახებ, ვინაიდან N12 დაწესებულებაში შეატყობინეს, რომ კონსილიუმის გადაწყვეტილებით მულტიფუნქციურ, სამოქალაქო კლინიკაში გადაყავდათ, რასაც იგი დათანხმდა. სახალხო დამცველთან საუბრისას მიხეილ სააკაშვილმა განმარტა, რომ იგი, მისი უარის მიუხედავად, ძალის გამოყენებით შეასახლეს N18 დაწესებულებაში. განსაკუთრებული ყურადღება უნდა მიექცეს გარემოს, რომელშიც მიხეილ სააკაშვილი მოათავსეს და რომელიც უხეშად არღვევს ადამიანის ღირსების უფლებას. კერძოდ, N8 დაწესებულებიდან პატიმართა მხრიდან მიხეილ სააკაშვილის მიმართ ისმის შეურაცხმყოფელი და მუქარის შემცველი შეძახილები, რაც სააკაშვილის საკანშიც ისმის და ცალსახად ფსიქოლოგიურ ზეწოლას წარმოადგენს.  სახალხო დამცველი მოუწოდებს იუსტიციის მინისტრს/პენიტენციურ სამსახურს, - რომ საქართველოს მესამე პრეზიდენტი მიხეილ სააკაშვილი დაუყოვნებლივ იქნეს გადაყვანილი ალტერნატიულ სამედიცინო დაწესებულებაში“, ნათქვამია განცხადებაში. სრულად... წყარო: ombudsman.ge

თბილისი. სოციალური სამართლიანობის ცენტრი წარმოგიდგენთ ჯანა ჯავახიშვილის ბლოგსპოსტს: „ქრონიკული ფსიქიკური აშლილობის მქონე ადამიანებზე ზრუნვა: წარსული, აწმყო, მომავალი“.  „ქვეყანაში ჯერ კიდევ განსავითარებელია ფსიქიატრიული და სოციალური ზრუნვის ინფრასტრუქტურა, აღმოსაფხვრელია ძალადობის პრაქტიკა სპეციალიზებულ ფსიქიატრიულ დაწესებულებებში, შესამუშავებელია ზრუნვის შესაბამისი სტანდარტები, სათანადოდ მოსამზადებელი და გადასამზადებელია მედპერსონალი, დასანერგია უწყვეტი სამედიცინო განათლების მექანიზმები, გასაშლელია სათემო სერვისების ქსელი, უზრუნველსაყოფია მათი სრულფასოვანი დაფინანსება და დასახვეწია დაფინანსების სისტემა, დასაბრუნებელია მწვავე ფსიქიატრიული განყოფილებები მრავალპროფილურ საავადმყოფოებში, დასანერგია დასაქმების პროგრამები/სისტემა ფსიქიკური აშლილობების მქონე ადამიანებისთვის და შესაბამისად შესაცვლელია საკანონმდებლო გარემო. ამ ყველაფრის ცენტრში უნდა იყოს ადამიანი და მის საჭიროებების დაკმაყოფილებაზე ზრუნვა, უფლებების დაცვა და ღირსეულად ცხოვრების შესაძლებლობების შექმნა“. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტი 2021 წლის 3 და 6 ნოემბერს, სახელმწიფო უსაფრთხოების სამსახურის მიერ გავრცელებული განცხადებების შინაარსს ეხმაურება. „ეს განცხადებები აზიანებს გამოხატვის თავისუფლებას და ტოვებს შთაბეჭდილებას, რომ სუს-ის მიზანია მოქალაქეთა დაშინება და ოპოზიციის მანიფესტაციის მონაწილეთა რიცხვის შემცირება“. სრულად... წყარო: idfi.ge

თბილისი. მაკ ჯორჯიას ინფორმაციით, შეზღუდული შესაძლებლობის საკითხებზე მრჩეველთა კომიტეტის რიგით პირველი შეხვედრა გაიმართა. შეზღუდული შესაძლებლობის საკითხებზე მრჩეველთა კომიტეტი შშმ პირთა თემის და მათი ოჯახის წევრების წარმომადგენლობითი ერთეულია, რომელიც ორგანიზაცია მაკ ჯორჯიას მიერ გაეროს ბავშვთა ფონდის მხარდაჭერით ჩამოყალიბდა. შეხვედრისას შეთანხმდა კომიტეტის სამოქმედო გეგმა და განისაზღვრა ის ძირითადი თემები და საკითხები, რომლებზეც იმუშავებენ კომიტეტის წევრები და წარმოადგენენ საკუთარ რეკომენდაციებს. სრულად... წყარო: ორგანიზაციის გვერდი სოციალურ ქსელში

თბილისი. გაეცანით საქართველოს ახალგაზრდა იურისტთა ასოციაციის (საია) ახალ დოკუმენეტს: „გარემოს დაცვა და ადამიანის უფლებები“. „ბროშურა დეტალურად მიმოიხილავს იმ უფლებებს, რომლებზეც უშუალო გავლენას ახდენს გარემოსდაცვითი პრობლემები, განმარტავს, თუ რა ვალდებულებებს აკისრებს სახელმწიფოებს ადამიანის უფლებათა სამართალი გარემოსდაცვით ჭრილში და აღწერს, თუ როგორია სასამართლო პრაქტიკა ამ კუთხით. ადამიანის უფლებები და გარემოსდაცვითი საკითხები დღესდღეობით მჭიდროდ არის ერთმანეთთან დაკავშირებული. კლიმატის ცვლილება, ბიომრავალფეროვნების განადგურება, დაბინძურებული ჰაერი, მიწა და წყალი და სხვა გარემოსდაცვითი პრობლემები ხშირად უშუალო საფრთხეს უქმნის ადამიანის სიცოცხლეს, ჯანმრთელობას, მის ღირსეულად ცხოვრებისა და სხვა ძირითად უფლებებს“, ნათქვამია ორგანიზაციის ვებგვერდზე. სრულად... წყარო: gyla.ge

3 ნოემბერს, ორგანიზაცია „ცვლილებები თანაბარი უფლებებისათვის“ თავმჯდომარემ, თომა კაკაბაძემ თბილისის შეზღუდული შესაძლებლობის მქონე პირთა უფლებების ადვოკატირების ჯგუფთან ერთად ავტობუსის მძღოლებთან შეზღუდული შესაძლებლობის თემაზე ტრენინგი ჩაატარა. ტრენინგები ტარდება ორწლიანი პროექტის „სამოქალაქო საზოგადოება შეზღუდული შესაძლებლობის მქონე პირთა უფლებებისთვის საქართველოში“ ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს დემოკრატიული ინიციატივა (GDI) ეხმაურება ბოლო დროს სამართალდამცავთა მიერ აქტივისტების დაკავების ფაქტებს. ორგანიზაცია თვლის, რომ ქვეყანაში ძლიერდება აქტივისტთა უფლებების შელახვის და მათი პოლიტიკური მოტივებით დასჯის ტენდენცია. „მოვუწოდებთ სასამართლოს, უარი თქვას დაკავებული აქტივისტების საქმეების განხილვისას ადმინისტრაციულ სამართალდარღვევათა კოდექსის რეპრესიულ იარაღად გამოყენებაზე და დაკავებულთა ქმედებები შეაფასოს გამოხატვის თავისუფლებისა და მიმდინარე პოლიტიკური კონტექსტის გათვალისწინებით. ასევე, მოვუწოდებთ შინაგან საქმეთა სამინისტროს, შეწყვიტოს კრიტიკის ჩასახშობად იმავე კოდექსის ბოროტად გამოყენება, რაც სამართალდამცავი ორგანოების პოლიტიზირების ნათელი მაგალითია და ამცირებს მათ მიმართ საზოგადოების ნდობას“. სრულად... წყარო: gdi.ge

თბილისი. ინფორმაციის თავისუფლების განვითარების ინსტიტუტი (IDFI) მოუწოდებს შინაგან საქმეთა სამინისტროს დაუყოვნებლივ გააკეთოს განმარტება იმედა კლდიაშვილის დაკავების თაობაზე.  „ამ დრომდე უცნობია, იმედა კლდიაშვილის თავისუფლების აღკვეთის მიზეზები. მოვუწოდებთ საქართველოს შინაგან საქმეთა სამინისტროს, დაუყოვნებლივ გააკეთოს სათანადო განმარტება იმედა კლდიაშვილის დაკავების თაობაზე“. სრულად... წყარო: idfi.ge

თბილისი. 2021 წლის 11-12 ნოემბერს, სოციალური სამართლიანობის ცენტრი რიგით მესამე ქვიარ ფორუმს გამართავს. ქვიარ ფორუმის მთავარი თემაა „კრიზისი, პოსტ-კრიზისი და ქვიარ ემანსიპაციის პერსპექტივები საქართველოში“. ფორუმი 11 ნოემბერს ფიზიკურ სივრცეში ჩატარდება, 12 ნოემბერს კი ონლაინ სივრცეში ZOOM-ის საშუალებით. გთხოვთ, ქვიარ ფორუმზე ფიზიკურად და ონლაინ დამსწრეთა მსურველებმა შეავსოთ სარეგისტრაციო ფორმა შემდეგ მისამართზე... სრულად... წყარო: socialjustice.org.ge

აჭარა. 27-28-29 ოქტომბერს, ბათუმში, ევროკავშირის პროექტის „სამოქალაქო საზოგადოება შეზღუდული შესაძლებლობის მქონე პირთა უფლებებისთვის საქართველოში“ ფარგლებში, არასამთავრობო ორგანიზაციების წარმომადგენლებს ჩაუტარდათ ტრენინგები თემებზე: რესურსების მოძიება (ფანდრაიზინგი)/პროექტების მართვა და გაეროს შეზღუდული შესაძლებლობის მქონე პირთა უფლებების კონვენცია და გადაწყვეტილების მიღების პროცესში ჩართულობა. სრულად... წყარო: ორგანიზაციის გვერდი სოციალურ ქსელში