თბილისი. PHR-მა რეგიონალური მედიის წარმომადგენლებისთვის შეზღუდული შესაძლებლობის მქონე ქალთა უფლებებზე და მათი საჭიროებების გაშუქების ფორმებზე სამუშაო შეხვედრები ჩაატარა.  „შეხვედრაზე ჟურნალისტები გაეცნენ შეზღუდული შესაძლებლობის მქონე ქალთა უფლებებზე საერთაშორისო პრაქტიკებს, ასევე ადგილობრივ მიმდინარე და დასრულებულ საქმეებს, დეტალურად განიხილეს მედიაში გასული სიუჟეტები შშმ პირთა უფლებებზე და შემოგვთავაზეს საკუთარი ხედვა ამ საკითხების გაშუქებასთან დაკავშირებით“. სრულად... წყარო: phr.ge

თბილისი. ინფორმაციის თავისუფლების განვითარების ინსტიტუტიs (IDFI) მიერ 2022 წლის ბიუჯეტის პროექტში გათვალისწინებული ადმინისტრაციული ხარჯების ანალიზი აჩვენებს, რომ 2022 წელს ბიუროკრატიული ხარჯების კუთხით მნიშვნელოვანი ცვლილებები არ იგეგმება. „აღსანიშნავია ის ფაქტი, რომ მიუხედავად შრომის ანაზღაურების ხარჯების ყოველწლიური ზრდისა, კვლავ მნიშვნელოვან პრობლემად რჩება საჯარო მოსამსახურეთა სამართლიანი და კონკურენტუნარიანი ანაზღაურების სისტემის უზრუნველყოფა“. სრულად... წყარო: idfi.ge

თბილისი. საქართველოს დემოკრატიული ინიციატივა (GDI) მიიჩნევს, რომ გიორგი თაბაგარის სამართალდამრღვევად ცნობა საშიში პრეცედენტის შემქმნელია. „თბილისის საქალაქო სასამართლოს მოსამართლე ლელა ცაგარეიშვილმა განიხილა ადმინისტრაციული სამართალდარღვევის საქმე გიორგი თაბაგარის წინააღმდეგ. სასამართლომ გიორგი სამართალდამრღვევად ცნო, თუმცა პასუხისმგებლობისგან გაათავისუფლა და სიტყვიერი შენიშვნით შემოიფარგლა. მიგვაჩნია, რომ სასამართლოს მიერ მიღებული გადაწყვეტილება ეწინააღმდეგება გამოხატვის თავისუფლების კონსტიტუციურ სტანდარტებს და ქმნის მომავალში აქტივისტების წინააღმდეგ კიდევ უფრო რეპრესიული პოლიტიკის გატარების საშიშ პრეცედენტს“, ნათქვამია განცხადებაში. სრულად... წყარო: gdi.ge

თბილისი. სოციალური სამართლიანობის ცენტრი მოუწოდებს სახელმწიფო უწყებებს საკანონმდებლო, ადმინისტრაციული და სოციალური ღონისძიებების გატარებისკენ საქართველოდან გადასახლებული მესხებისთვის საქართველოს მოქალაქეობის მინიჭების მხარდაჭერისა და მათი უფლებებისა და სოციალური დაცვის ხელშეწყობისთვის. სრულად... წყარო: socialjustice.org.ge

თბილისი. პარტნიორობა ადამიანის უფლებებისთვის (PHR) 12 წლის ბავშვის ინტერესებს იცავს, რომელმაც ორგანიზაციის ინფორმაციით, 2021 წლის მაისში ხილი უნებართვოდ მოკრიფა. „ხილის ერთერთმა მეპატრონემ ბავშვს პლასტმასის მილით ფიზიკური დაზიანება მიაყენა ფეხზე, ხოლო მეორემ ბავშვი ძალის გამოყენებით ჩამოიყვანა ხიდან, რამდენჯერმე გაარტყა სახეში ხელი, დაარტყა ფეხი, მიაყენა სიტყვიერი შეურაცხყოფა, ძალის გამოყენებით წელსზემოთ გააშიშვლა, აიძულა შარვლის გახდა და ამ მდგომარეობაში ბავშვი ქუჩაში გაუშვა. მოზარდს სხეულზე ფიზიკური დაზიანების კვალი აღენიშნებოდა“. სრულად... წყარო: phr.ge

ქვემო ქართლი. სახალხო დამცველის რწმუნებულებმა საქართველოს მესამე პრეზიდენტის მიხეილ სააკაშვილის შესაძლო მიღებისთვის N18 დაწესებულების მზადყოფნის ხარისხი შეამოწმეს.  „შემოწმების შედეგად დადგინდა, რომ დაწესებულებაში არსებული ვითარება, სამედიცინო უზრუნველყოფის კუთხით, სრულფასოვნად არ შეესაბამება ექიმთა მულტიფუნქციური ჯგუფის მიერ გაცემულ 2021 წლის 23 ოქტომბრის დასკვნასა და რეკომენდაციებს, ასევე არსებობს გარკვეული რისკები უსაფრთხოების თვალსაზრისით“. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია და სოციალური სამართლიანობის ცენტრი მიიჩნევენ, რომ „პოლიციის შესახებ“ საქართველოს კანონში დაგეგმილი ცვლილებები გაუმართლებელია. ცვლილებები ზრდის პოლიციელების უფლებამოსილებას პირის იდენტიფიცირების დროს და აჩენს ადამიანის პირად ცხოვრებაში უსაფუძვლო, არაპროპორციული ჩარევის რისკებს. ორგანიზაციები მოუწოდებენ საქართველოს პარლამენტს, არ დაუშვას აღნიშნული კანონპროექტის ამ სახით მიღება და მანკიერი საპოლიციო პრაქტიკების კანონის ფარგლებში მოქცევა. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის ინფორმაციით, თბილისის საქალაქო და სააპელაციო სასამართლოების გადაწყვეტილებით, განათლებისა და მეცნიერების სამინისტროს შშმ პირის სასარგებლოდ მატერიალური ზიანის ანაზღაურება დაევალა. ეს კი გულისხმობს სამედიცინო სარეაბილიტაციო კურსის საფასურის, შეზღუდული შესაძლებლობების სტატუსის არსებობამდე ადაპტირებული ტრანსპორტით მომსახურების საფასურის და ღამის მომვლელის მომსახურების ხარჯის ანაზღაურებას. სრულად... წყარო: gyla.ge

თბილისი. გაეცანით საქართველოს ახალგაზრდა იურისტთა ასოციაციის (საია) მიერ მომზადებულ დოკუმენტს „გარემოსდაცვითი პროცედურული უფლებები“. ორგანიზაცია წლებია აქტიურად მუშაობს გარემოსდაცვით საკითხებზე. ბროშურაში დეტალურადაა მიმოიხილული სამი ძირითადი პროცედურული უფლება და აღწერილია, როგორ შეიძლება მათი პრაქტიკაში გამოყენება. სრულად... წყარო: gyla.ge

თბილისი. ღირსეული შრომის პლატფორმა ეხმიანება სოციალური მომსახურების სააგენტოს თანამშრომლების კოლექტიური შრომითი დავის პროცესს. პლატფორმა საქართველოს ჯანდაცვის სამინისტროს მოუწოდებს, მაქსიმალურად სწრაფად და ეფექტიანად უზრუნველყოს მედიაციის პროცესის წარმოება და სოციალური სააგენტოს თანამშრომლებისთვის ღირსეული შრომითი პირობების შესაქმნელად საჭირო, მათ მიერ დაყენებული მინიმალური მოთხოვნების დაკმაყოფილება. სრულად... წყარო: socialjustice.org.ge

თბილისი. პარტნიორობა ადამიანის უფლებებისთვის (PHR) ადვოკატები ქალაქ თბილისის მუნიციპალიტეტის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის თანამშრომლებს შეხვდნენ და საინფორმაციო შეხვედრა გამართეს თემაზე: „ქალთა მიმართ სექსუალური ძალადობა სპორტში“. „შეხვედრის მსვლელობისას ორგანიზაციის წარმომადგენლებმა მონაწილეებს გააცნეს პროექტ „ქალთა მიმართ სექსუალური ძალადობა სპორტში“ ფარგლებში ჩატარებული ორი კვლევის რეკომენდაციები და მიგნებები. ასევე, ცნობიერების ამაღლების მიზნით ისაუბრეს სექსუალური შევიწროების სხვადასხვა ფორმებზე“. სრულად... წყარო: phr.ge

თბილისი. ფსიქოსოციალიური მომსახურების ცენტრი კვალიფიციურ ფსიქო-სოციალურ მომსახურებას სთავაზობს ქცევითი და ემოციური პრობლემების მქონე ბავშვებს, მოზარდებსა და მათ ოჯახებს.  სრულად... წყარო: „მშობლის სკივრის“ გვერდი სოციალურ ქსელში

თბილისი. ადამიანის უფლებათა ევროპული სასამართლოს 2021 წლის 13 ოქტომბრის ოფიციალური წერილით სოციალური სამართლიანობის ცენტრს (ყოფილი EMC) ეცნობა, რომ ევროპულმა სასამართლომ 6 ოქტომბერს მიიღო გადაწყვეტილება მაია ბაქრაძის საქმის არსებითი განხილვის შესახებ და მთავრობასთან კომუნიკაცია დაიწყო. „მაია ბაქრაძე არის თბილისის სააპელაციო სასამართლოს ყოფილი მოსამართლე და მოსამართლეთა ნებაყოფლობითი გაერთიანება - „მოსამართლეთა ერთობის“ დამფუძნებელი წევრი, რომელსაც, იუსტიციის უმაღლესი საბჭოს მიმართ გამოთქმული კრიტიკული მოსაზრებების გამო, უარი ეთქვა მოსამართლედ ხელახალ დანიშვნაზე. მაია ბაქრაძის საქმის გადაწყვეტა განსაკუთრებით მნიშვნელოვანია მართლმსაჯულების სისტემაში არსებული სტრუქტურული პრობლემების ფონზე“. სრულად... წყარო: socialjustice.org.ge

თბილისი. „უფლებები საქართველოს“ ინფორმაციით, „საქსეს ბართან“ დაკავებული აქტივისტების ინტერესებს ორგანიზაციის იურისტი, გიორგი მახარაძე დაიცავს. „ბარის მიმდებარე ტერიტორიაზე პოლიციამ 3 აქტივისტი ადმინისტრაციულ სამართალდარღვევათა კოდექსის 166-ე და 173-ე მუხლების სავარაუდო დარღვევისთვის დააკავა (წვრილმანი ხულიგნობა და სამართალდამცავის კანონიერი მოთხოვნის დაუმორჩილებლობა). ადმინისტრაციული წესით დაკავებულები შსს-ს შენობიდან ხელწერილის საფუძველზე გათავისუფლდნენ“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის შეფასებით, სამოქალაქო თანასწორობისა და ინტეგრაციის სახელმწიფო სტრატეგიის ათწლიანი დოკუმენტი არ ითვალისწინებს არსებითად ახალ და გადამწყვეტი შინაარსის საკანონმდებლო, ინსტიტუციურ და პოლიტიკურ ცვლილებებს, რომელიც არადომინანტური ეთნიკური ჯგუფებისთვის უფრო თანასწორი და სამართლიანი პოლიტიკური და სოციალური გარემოს შექმნას შეუწყობდა ხელს. სრულად... წყარო: ორგანიზაციის გვერდი სოციალურ ქსელში

თბილისი. 2021 წლის 7-8 ოქტომბერს, ინფორმაციის თავისუფლების განვითარების ინსტიტუტისა (IDFI) და სახელმწიფო ინსპექტორის სამსახურის ერთობლივი პროექტის „პერსონალური მონაცემების დაცვის მხარდაჭერა საქართველოში“ ფარგლებში, ადმინისტრაციული სამართალდარღვევის საქმისწარმოების თემატიკაზე სახელმწიფო ინსპექტორის სამსახურის თანამშრომლებისათვის ორდღიანი ტრენინგი გაიმართა. პროექტის მთავარი მიზანია საქართველოში პერსონალური მონაცემების დაცვის რეჟიმის გაძლიერება. სრულად... წყარო: idfi.ge

თბილისი. ღია საზოგადოების ფონდის მხარდაჭერით, უფლებები საქართველო, საქართველოს ახალგაზრდა იურისტთა ასოციაცია, სოციალური სამართლიანობის ცენტრი, დემოკრატიული ინიციატივა და ადამიანის უფლებათა ცენტრი ახორციელებენ ერთობლივ პროექტს „იურიდიული დახმარების ქსელი აქტივისტებისათვის“. პროექტის მიზანია სამოქალაქო აქტივისტების დაცვა სახელმწიფოს რეპრესიული ღონისძიებებისა და უკანონო დევნისგან და მათი სამართლებრივი მხარდაჭერა. სრულად... წყარო: ორგანიზაციის გვერდი სოციალურ ქსელში

თბილისი. სახალხო დამცველის აპარატი დეტალურად აკვირდება მიხეილ სააკაშვილის ჯანმრთელობის მდგომარეობასა და პენიტენციურ დაწესებულებაში არსებულ პირობებს. ომბუდსმენის შეფასებით, პენიტენციური სამსახურისა თუ მაღალი პოლიტიკური თანამდებობის პირების მხრიდან მიხეილ სააკაშვილის ჯანმრთელობის მდგომარეობის შესახებ პირადი ინფორმაციის გაჟღერება ქმნის დამატებითი საფრთხეს, რომ მოშიმშილე პატიმარმა უარი თქვას სამედიცინო მომსახურების მიღებაზეც. სახალხო დამცველი უარყოფითად აფასებს ნებისმიერი სახის განცხადებას, რომელიც უბიძგებს პატიმარს უფრო მძიმე შიმშილობის ფორმაზე გადასვლას და კიდევ უფრო ამძიმებს ბრალდებულის/მსჯავრდებულის ჯანმრთელობის მდგომარეობას. სრულად... წყარო: ombudsman.ge

თბილისი. „უფლებები საქართველოს“ ინფორმაციით, ორგანიზაციის დახმარებით ყაზახეთის მოქალაქემ ბინადრობის ნებართვასთან დაკავშირებული სასამართლო დავა მოიგო. „ყაზახეთის მოქალაქეს სამართლებრივი დახმარება გაეწია IOM-ის მხარდაჭერით მიმდინარე პროექტის - „სამოქალაქო საზოგადოების ორგანიზაციის ქსელის შექმნა მიგრაციის საკითხების გადასაჭრელად და საქართველოში მცხოვრები მიგრანტების სამართლებრივი დახმარება“ ფარგლებში“. სრულად... წყარო: rights.ge

თბილისი. საქართველოს სამოქალაქო საზოგადოების ორგანიზაციების ნაწილი ეხმაურება საქართველოს მესამე პრეზიდენტის, მიხეილ სააკაშვილის დაპატიმრების ფაქტს. „იმის ფონზე, რომ სასამართლო ხელისუფლება კლანური მმართველობით, ხელისუფლებისადმი ლოიალობით და დეფექტური მმართლმსაჯულების განხორციელებით ხასიათდება, ისევე როგორც, აღნიშნული ინსტიტუციის მიმართ ნდობა კატასტროფულ ნიშნულზეა, ამ პირობებში, ეჭვქეშ დგება შესაძლებლობა, დაცული იყოს მიხეილ სააკაშვილის სამართლიანი სასამართლოს უფლება. თავის მხრივ, აღნიშნულზე პასუხისმგებლობა ეკისრება მოქმედ ხელისუფლებას, რომელიც საკუთარი პოლიტიკური გადაწყვეტილებებითა და სამართლებრივი მექანიზმებით, ახალისებს მსგავსს პრაქტიკას.  მოვუწოდებთ ხელისუფლებას და საქართველოს პრეზიდენტს, გამოიყენონ მათ ხელთ არსებული საკანონმდებლო მექანიზმები, რათა თავიდან იქნას აცილებული მიხეილ სააკაშვილის მიმართ პოლიტიკური მართლმსაჯულების განხორციელება“, ნათქვამია ერთობლივ განცხადებაში. სრულად... წყარო: www.gdi.ge ფოტო: civil.ge (სააკაშვილის Facebook-ის ოფიციალური გვერდის ვიდეოდან)

თბილისი. 2015 წლის 2 იანვარს აბაშის მუნიციპალიტეტის სოფელ მარანთან უბედური შემთხვევა მოხდა - სამგზავრო მატარებელი რკინიგზის დაუცველ გადასასვლელზე მოძრავ მიკროავტობუსს დაეჯახა. შემთხვევას 3 ადამიანი ემსხვერპლა, დანარჩენებმა კი სხვადასხვა სახის დაზიანებები მიიღეს. „თბილისის საქალაქო სასამართლომ ძირითადად გაიზიარა მოსარჩელეთა არგუმენტები და 2021 წლის 07 ოქტომბრის გადაწყვეტილებით მოპასუხეებს სს „საქართველოს რკინიგზას“, საქართველოს შინაგან საქმეთა სამინისტროსა და აბაშის მუნიციპალიტეტის მერიას მოსარჩელეების სასარგებლოდ მატერიალური (სარჩოს გადახდა, მკურნალობის ხარჯები, დაკრძალვის ხარჯები) და მორალური ზიანის ანაზღაურება დააკისრა“. დაზარალებულების ინტერესებს სასამართლოში საქართველოს ახალგაზრდა იურისტთა ასოციაცია იცავდა. სრულად... წყარო: gyla.ge

თბილისი. ადამიანის უფლებათა ცენტრმა გამოაქვეყნა შუალედური ანგარიში: „სავარაუდოდ პოლიტიკურად მოტივირებული საქმეების სასამართლო პროცესების მონიტორინგი“. „შუალედური ანგარიში ასახავს 2021 წლის 1 თებერვლიდან 10 აგვისტომდე სავარაუდო პოლიტიკური მოტივით მიმდინარე სისხლის სამართლისა და ადმინისტრაციული საქმეების სასამართლო პროცესების მონიტორინგის შედეგებს. ანგარიშში, აგრეთვე, ასახულია მედიის წარმომადგენელზე, მისი პროფესიული საქმიანობიდან გამომდინარე (სავარაუდოდ - პოლიტიკური მოტივით), თავდასხმის ფაქტზე მიმდინარე სასამართლო სხდომების მონიტორინგის შედეგები“. სრულად... წყარო: www.hrc.ge