გურია. 24-28 ივნისს გურიის ახალგაზრდულმა რესურსცენტრმა  ინგლისური ენის საზაფხულო სკოლას უმასპინძლა. სკოლაში ინგლისური ენის შესწავლის ხელმისაწვდომობის სასტიპენდიო პროგრამის მეორე ნაკადის 25 მოსწავლე მონაწილეობდა. მოსწავლეები ამერიკელი მოხალისეების დახმარებით გაეცნენ ამერიკულ კულტურას, ისტორიას, ტრადიციებს, გაიღრმავეს ინგლისური ენის ცოდნა და პრაქტიკული უნარები. მონაწილეები სამ ჯგუფად დაიყვნენ, თითოეულმა ჯგუფმა საზაფხულო სკოლის განმავლობაში შეძენილი ცოდნის გამოყენებით მოამზადა კედლის გაზეთი, ბავშვებმა გამოავლინეს წარმატებული სტატიების ავტორები და ისინი დაჯილდოვდნენ ინგლისური წიგნებით.  ინგლისური ენის შესწავლის ხელმისაწვდომობის სასტიპენდიო პროგრამა (ACCESS) არის ამერიკული ორგანიზაცია PH International-ისა და ამერიკის საელჩოს ერთობლივი ინიციატივა. იგი მიზნად ისახავს ხელმისაწვდომი გახადოს ინგლისური ენის შესწავლა მოზარდებისთვის სოციალურად დაუცველი და ეკონომიკურად შეჭირვებული ოჯახებიდან. პროგრამა საქართველოს რამდენიმე რეგიონში ხორციელდება, მათ შორისაა გურია. გურიის ახალგაზრდული რესურსცენტრი პროგრამის განმახორციელებელი პარტნიორია რეგიონში.  წყარო:ორგანიზაციის გვერდი სოციალურ ქსელში

კახეთი. 27 ივნისს საქართველოს ახალგაზრდულმა პარლამენტმა გამართა კიდევ ერთი ვიზიტი კახეთის რეგიონში, ქალაქ გურჯაანში, რომელსაც 50-მდე ახალგაზრდა ესწრებოდა. შეხვედრის ფარგლებში მოხდა საუბარი ყველა იმ პრობლემაზე, რომელიც ადგილობრივ ახალგაზრდებს მნიშვნელოვნად მიაჩნიათ. აღსანიშნავია, რომ ახალგაზრდული პარლამენტის წარმომადგენელი ქალაქ გურჯაანში აქტიურად გააგრძელებს თანამშრომლობას ახალგაზრდებთან იმ ინიციატივების ფარგლებში, რომელიც შეხვედრაზე გამოითქვა. შემდეგ შეხვედრას საქართველოს ახალგაზრდული პარლამენტი სამცხე-ჯავახეთის რეგიონში გამართავს. წყარო: ორგანიზაციის გვერდი სოციალურ ქსელში

გურია. 27 ივნისს ფორუმ თეატრის დასი ლანჩხუთის მუნიციპალიტეტის სოფლებს სუფსასა და ნიგვზიანს ესტუმრა. გუშინ კი სპექტაკლები ლანჩხუთის მუნიციპალიტეტის საჯარო სკოლასა და სოფელ ხაჟალიაში გაიმართა. სპექტაკლი "ნუ შეაქცევთ ზუგრს" ეხება პირობითმსჯავრდებულებისა და ყოფილი პატიმრების რესოციალიზაციას და მომზადდა პროექტის  –„პირობითმსჯავრდებული ახალგაზრდების რესოციალიზაციის ხელშეწყობა გურიის რეგიონში" - ფარგლებში რომელსაც ახორციელებს გურიის ახალგაზრდული რესურსცენტრი ევროკავშირის ფინანსური მხარდაჭერით. პროექტის პარტნიორია საქართველოს დემოკრატიული განვითარების კავშირი.

თბილისი. 26 ივნისს "საქართველოს ახალგაზრდულმა პარლამენტმა" ოფიციალურად მიმართა საქართველოს პარლამენტს საკანონმდებლო წინადადებით საქართველოს სამოქალაქო კოდექსში ცვლილების შეტანის თაობაზე.  საკანონმდებლო წინადადება შეეხება ლუდომანისათვის (აზარტულ თამაშებზე დამოკიდებული პირი) ქმედუნარიანობის შეზღუდვას, რაც გულისხმობს მისთვის უფლების შეზღუდვას განკარგოს შემოსავლები თუ ქონება, სასამართლოს მიერ დანიშნული მზრუნველის გარეშე. წყარო:ორგანიზაციის გვერდი სოციალურ ქსელში

კახეთი. თელავის ახალგაზრდული ცენტრის წევრებმა და სოფელ ყარაჯლის სკოლის მოსწავლეებმა, ერთობლივად დაგეგმეს და განახორციელეს ცხოვრების ჯანსაღი წესის აქცია. აქციის ფარგლებში გაიმართა ფეხბურთის თამაში. თამაში გაიმართა 2 ეტაპად. პირველ თამაშში მონაწილეობა მიიღეს ბიჭებმა, ხოლო მეორე თამაშში ერთმანეთს შეეჯიბრნენ თელავის ახალგაზრდული ცენტრის გოგონები და ყარაჯალის სკოლის მოსწავლე ბიჭები. შეხვედრაზევე დაიგეგმა მომდევნო ერთობლივი ღონისძიება, რომელიც აზერბაიჯანულ მოსახლეობაში ნაადრევი ქორწინების პრობლემის დაძლევას მიეძღვნება. წყარო: ეროვნული ინტეგრაციის გაძლიერება საქართველოში-თელავის ცენტრის გვერდი სოციალურ ქსელში

შიდა ქართლი. საზოგადოება ,,ბილიკი" ახორციელებს პროექტს  – ,,ქართველი,ოსი და დევნილი ახალგაზრდების ინტეგრაცია და მხარდაჭერა სამოქალაქო გააქტიურებისათვის" პროექტის მიზანია ხელი შეუწყოს შიდა ქართლში მცხოვრები ქართველი,ოსი და დევნილი ახალგაზრდების სამოქალაქო ცნობიერების ამაღლებას,საზოგადოებაში ინტეგრაციას და სამოქალაქო ინიციატივებს. პროექტი ხორციელდება სოფელ ხურვალეთის,შავშვების,წითელუბნის საჯ.სკოლების ბაზაზე.ბ სწორედ,მოსწავლეთა მიერ გამოვლენილი პრობლემების მოგვარებისა და მხარდაჭერის მიზნით,შედგა სამუშაო შეხვედრა გორის მუნიციპალიტეტის სხდომათა დარბაზში,სადაც სამოქალაქო კლუბების მოსწავლეებმა გააკეთეს,მათ მიერ გამოვლენილი პრობლემების პრეზენტაცია და წარმოადგინეს ადვოკაციის გეგმები-თუ როგორ ხედავენ ამ პრობლემების გადაწყვეტას და რა მხარდაჭერა სჭირდებათ მათ. წყარო:ორგანიზაციის გვერდი სოციალურ ქსელში

თბილისი. თავისუფალი დებატების ლიგა იწყებს ახალ პროექტ – „თავისუფლების სკოლას". პროექტი მოიცავს კურსს, რომელიც მოსწავლეს უვითარებს თავისუფალ და კრიტიკულ აზროვნებას არაფორმალური განათლების გზით. კურსი შედგება ისეთი ლექციებისა და სემინარებისგან, რომლებიც არ არის გათვალისწინებული სასკოლო პროგრამაში. „თავისუფლები სკოლის" კურსის ხანგრძლივობაა 2 თვე. სალექციო თემებია: ეკონომიკა, მენეჯმენტი, სამართალი, პოლიტოლოგია, კრიტიკული აზროვნება. პირველი კურსი სტარტს აიღებს სექტემბერში. 2, 8 და 13 ივლისს კი თავისუფალი დებატების ლიგა დაინტერესებული მოსწავლეებისთვის საპილოტო ლექცია–სემინარებს სკოლის კონცეფციის გასაცნობად ატარებს.  ლექცია–სემინარებზე დასწრების მსურველებმა უნდა შეავსონ სარეგისტრაციო ფორმა  წყარო:ორგანიზაციის გვერდი სოციალურ ქსელში 

სამეგრელო. 22-25 ივნისს ზუგდიდის ახალგაზრდულმა ცენტრმა "მოხალისეთა გაცვლითი პროგრამის" ფარგლებში დმანისის ახალგაზრდული ცენტრის წევრებს უმასპინძლა. გაცვლითი პროგრამის მიზანს წარმოადგენდა დმანისის და ზუგდიდის ახალგაზრდული ცენტრების დაახლოება, გამოცდილების გაზიარება, ერთობლივი სათემო და მოხალისეობრივი ღონისძიებების და საგანმანათლებლო პროგრამების ორგანიზება, სამომავლო ურთიერთთანამშრომლობის გზების დასახვა, კულტურათშორისი დიალოგის დამკვიდრება და რეგიონების ტრადიციების და კულტურული მემკვიდრეობის ძეგლების გაცნობა. წყარო:ორგანიზაციის გვერდი სოციალურ ქსელში

მცხეთა–მთიანეთი.საქართველოს ახალგაზრდული პარლამენტი აგრძელებს რეგიონულ ვიზიტებს. შეხვედრა, 24 ივნისს, დუშეთის გამგეობის შენობაში გაიმართა, რომელიც დისკუსია-მსჯელობის რეჟიმში წარიმართა. დისკუსიაში მონაწილეობას დუშეთსა და ჟინვალში მცხოვრები ახალგაზრდები იღებდნენ, რომელბმაც ქალაქთან დაკავშირებული არაერთი პრობლემა წამოჭრეს. ახალგაზრდული პარლამენტის დეპუტატები ითანამშრომლებენ ქალაქში მცხოვრებ ახალგაზრდებთან და მათ ყველა იმ პროექტის განხორციელებასა და პრობლემის გადაჭრაში დაეხმარებიან, რომლებიც მათ შეხვერდაზე წარმოადგინეს. მსგავს შეხვედრებს 2013 წლის მოწვევის ახალგაზრდული პარლამენტი ეტაპობრივად ყველა რეგიონში გამართავს. წყარო:ორგანიზაციის გვერდი სოციალურ ქსელში

თბილისი. იუსტიციის სამინისტროს სსიპ დანაშაულის პრევენციის და ინოვაციური პროგრამების ცენტრი, საერთაშორისო განათლების ამერიკულ საბჭოებთან თანამშრომლობით ახორციელებს პროექტს „იურიდიული განათლების სემინარები 2013". ეს არის ოთხდღიანი პროექტი, რომლის ფარგლებშიც მონაწილეები დაესწრებიან სემინარებს, ჩაერთვებიან დისკუსიებში, მონაწილეობას მიიღებენ იმიტირებულ სასამართლო პროცესსა და დებატებში. პროექტში მონაწილეობის მიღება შეუძლიათ მე–9–დან მე–12 კლასის მოსწავლეებს. სრულად  წყარო: სოციალურ ქსელში გვერდი Speak Up in Georgia

თბილისი. არასამთავრობო ორგანიზაცია „თავისუფლების კლუბი" იწყებს ახალი წევრების მიღებას. მოტივირებულ ახალგაზრდებს, რომლებიც დაინტერესებულნი არიან როგორც საქართველოში, ისე საზღვარგარეთ მიმდინარე ეკონომიკური, პოლიტიკური, სოციალური და სხვა სახის პროცესებით, ემხრობიან თავისუფლები იდეას და ზრუნავენ ადამიანის უფლებების დაცვაზე, ეძლევა საშუალება, უკეთ გამოიყენონ საკუთარი პოტენციალი. სრულად  წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდულმა პარლამენტმა საინფორმაციო ბიულეტენი გამოაქვეყნა. პირველი ბიულეტენი ახალგაზრდული პარლამენტის მიერ მაისის თვეში ჩატარებული ღონისძიებების შესახებ მოიცავს ინფორმაციას. ბიულეტენი  წყარო:ორგანიზაციის გვერდი სოციალურ ქსელში

მცხეთა–მთიანეთი. სამოქალაქო განათლების საზაფხულო ბანაკის მონაწილეები სამოქალაქო განათლების ექსპერტებსა და ორგანიზაცია „საქართველოს ალიანსი უსაფრთხო გზებისთვის" ხელმძღვანელს მშეხვდნენ. ბანაკის 92 მონაწილემ სტუმრებთან ერთად აქტიურ მოქალაქეობრივ პოზიციაზე, სამოქალაქო ჩართულობაზე, ასევე გზებზე უსაფრთხო მოძრაობასა და ალკოჰოლის მოხმარების გავლენაზე ისაუბრეს.  ბანაკს ახორციელებს სიქა PH – International-ის პროგრამა – „სამოქალაქო განათლებისა და პედაგოგთა გადამზადების პროგრამის" – ფარგლებში.  წყარო: ორგანიზაციის გვერდი სოციალურ ქსელში

მცხეთა–მთიანეთი. 20 ივნისს ბაზალეთში , „სამოქალაქო განათლების საზაფხულო ბანაკი - 2013" -ის პირველი ნაკადი დაიწყო. ბანაკი „სამოქალაქო განათლებისა და პედაგოგთა გადამზადების პროგრამის" ფარგლებში ხორციელდება, რომელსაც აფინანსებს USAID - აშშ საერთაშორისო განვითარების სააგენტო, ხოლო პროგრამას საქართველოში ახორციელებს PH-International. ბანაკის ორგანიზატორია სიქა - საგანმანათლებლო ინიციატივების ქართული ასოციაცია, რომელიც ამავდროულად პროგრამის პარტნიორი ორგანიზაციაა ქვემო ქართლის რეგიონში. „სამოქალაქო განათლების საზაფხულო ბანაკი 2013-ში" მონაწილეობას იღებენ მოსწავლეები და პედაგოგები საქართველოს 11 რეგიონიდან. ბანაკის სამ ნაკადად წარიმართება და სულ მონაწილეობას მიიღებს 276 მონაწილე - სასკოლო სამოქალაქო კლუბების აქტიური წევრები, რომლებიც წლის განმავლობაში ინიცირებას უკეთებენ და ახორციელებენ სხვადასხვა სახის სამოქალაქო აქტივობებს. ბანაკის განმავლობაში მონაწილეებს უტარდებათ ტრენინგები სამოქალაქო აქტივობების დაგეგმვისა და განხორციელების კუთხით, წერენ პროექტებს, რომლებსაც განახორციელებენ თავიანთ სამოქალაქო კლუბებში სასწავლო წლის განმავლობაში. ბანაკის ყოველი დღე დატვირთულია სახალისო - შემეცნებითი საბანაკე აქტივობებით, რაც ხელს უწყობს სხვადასხვა რეგიონის მოსწავლეების დაახლოებას. წყარო: ორგანიზაციის გვერდი სოციალურ ქსელში

სამეგრელო. 19 ივნისს, ასოციაცია ათინათის ახალგაზრდული ცენტრი „ორტუსის" წევრებმა ჩაატარეს პრეზენტაცია ახალგაზრდული ცენტრის მუშაობის შესახებ. პრეზენტაციაზე ყურადღება გამახვილდა პროექტის მიზნებზე. პრეზენტაციის  მიზანი იყო  დაინტერესება ცენტრის საქმიანობით და მუშაობით. პრეზენტაციას ესწრებოდა ზუგდიდის რაიონის სხვადასხვა სკოლის 30-მდე ახალგაზრდა. წყარო:ორგანიზაციის გვერდი სოციალურ ქსელში

ქვემო ქართლი. 18 და 19 ივნისს „სიდას" ინიციატივით ბოლნისში გაიმართა „პიროვნული განვითარების" ტრენინგი. ტრენინგში მონაწილეობა მიიღეს პირობითი მსჯავრის მქონე, განრიდებისა და მედიაციის პროგრამაში ჩართულმა არასრულწლოვნებმა და ადგილობრივი არასამთავრობო ორგანიზაციების წარმომადგენელმა ახალგაზრდებმა. ტრენინგი განხორციელდა პროექტის „არასრულწლოვანთა მართლმსაჯულების რეფორმის მხარდაჭერა ქვემო ქართლისა და სამცხე-ჯავახეთის ეროვნული უმცირესობების თემებში" ფარგლებში, რომელიც დაფინანსებულია ევროკავშირის მიერ. წყარო:ორგანიზაციის გვერდი სოციალურ ქსელში

იმერეთი. 16 ივნისს ქუთაისის ახალგაზრდული ცენტრი გარემოსა და ბუნებრივი რესურსების დაცვის სამინისტროს მიერ ინიცირებულ კამპანიას ”მწვანე თვე” შეურთდა და დასუფთავების აქცია მოაწყო მუხრანის ტყე-პარკში.  აქცია მიზნად ისახავდა ადამიანთა პასუხისმგებლობის გაცნობიერებას ბუნების მიმართ, გარემოს მდგრადი განვითარებისათვის ხელშეწყობას, გარემოს შენარჩუნებისა და გაუმჯობესებისათვის ბრძოლაში საზოგადოების აქტიურ ჩართვას. კამპანიაში ახალგაზრდული ცენტრის 15 წევრი ღებულობდა მონაწილეობას. მათ ნარჩენებისგან დაასუფთავეს ტყე-პარკის მიმდებარე ტერიტორია.  ღონისძიება ორგანიზებული იქნა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოიცალურ ქსელში

სამეგრელო. ასოციაცია ათინათის „ახალგაზრდულმა კლუბმა „ორტუსი" ქუჩის ფესტივალ „არტ აქტივში" მიიღო მონაწილეობა. ფესტივალში 5 მადრიდელ მხატვართან ერთად თბილისის 203-ე სკოლის სმენა და მეტყველება შეზღუდული ბავშვები მონაწილეობდნენ და ზუგდიდელ მოსწავლეებთან ერთად პირველი სკოლის კედელი მოხატეს. ღონსძიებაზე „ორტუსის" ორგანიზებით ბავშვებს შესაძლებლობა ქონდათ მოეხატათ ლამაზი ფიგურებით თავიანთი სახე თუ ხელი, ასევე თიხისგან გამოეძერწათ მათთვის საინტერესო ნივთები. ღონისძიება, პროექტ „ინტერნიუსი-საქართველო" ევროკავშირის პატრონაჟით ხორციელდება და ითვალისწინებს ხელოვნების გამოყენებით შეზღუდული შესაძლებლობის ბავშვების ინტეგრირებას საზოგადოებაში. წყარო:ორგანიზაციის გვერდი სოციალურ ქსელში

კახეთი. სიქამ, EMT–მ და CISV-საქართველომ  15-16 ივნისს გამართეს ეკო-დასუფთავების აქცია-ლაშქრობა საქართველოს ბუნებისმოყვარულთა ასოციაციასთან ერთად. პროექტი ითავლისწინებდა 2 დღიან დასუფთავების აქცია-ექსკურისას ბაწარა-ბაბანეულის ნაკრძალში. გასვლითი მცირე სალექციო კურსი გაიმართა შემდეგ საკითხებზე : დაცული ტერიტორიის გაცნობა, ნაკრძალში მოქცევის წესები,საველე სემინარი ეკოტურისმის შესახებ, ბაწარა ბაბანეურის დაც. ტერიტორიების ბიომტავალფეროვნება და მნიშვნელოვნება. აქციაში მონაწილეობა მიიღო 35 ახალგაზრდამ, მათ გაასუფთავეს ნაკრძალის გარკვეული ტერიტორია და უფრო ახლოს გაეცნენ ნაკრძალის ბიომრავალფეროვნებას. წყარო:სიქას გვერდი სოციალურ ქსელში

თბილისი. 25 ივნისიდან პროექტის „არჩევანი შენზეა–2013" ფარგლებში იწყება კონკურსების ახალი სერია, რომელშიც მონაწილეობის მიღება შეუძლიათ 14–დან 18 წლამდე ახალგაზრდებს მთელი საქართველოს მასშტაბით. Geoyouth მიერ გამოცხადებული კონკურსების მიზანია ახალგაზრდებში ჯანსაღი წესის წახალისება. სრულად წყარო: geoyouth.ge

ქვემო ქართლი. 14 ივნისს, სისხლის დონორთა საერთაშორისო დღეს, მარნეულის ახალგაზრდულმა ცენტრმა „ჩაის სახლში" სისხლის ჩაბარების აქცია გამართა დევიზით – „ჩემი სიცოცხლისათვის სისხლს გაიღებ?". აქციის დროს ჩაბარებული სისხლი მოხმარდება იმ ბავშვებს, რომლებსაც სისხლის გენეტიკური დაავადებები აწუხებთ. მარნეულის ახალგაზრდულმა ცენტრმა აქცია „ცენტრალურ სისხლის ბანკთან" და კომპანია „სოკართან" პარტნიორობით ჩაატარა, პროექტის - „ეროვნული ინტეგრაციის გაძლიერება საქართველოში" ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების სააგენტოს ფინანსური მხარდაჭერით.  წყარო:ორგანიზაციის გვერდი სოციალურ ქსელში

თბილისი. 14–15 ივნისს 2013 წლის მოწვევის „საქართველოს ახალგაზრდული პარლამენტის" დეპუტატებისთვის რიგით მეორე ორდღიანი ტრენინგი გაიმართა. ტრენინგის მთავარი თემები იყო „პოლიტიკის ანალიზის ძირითადი პრინციპები", „მოლაპარაკებების ხელოვნება" და „საგარეო პოლიტიკა".  ტრენინგის ფარგლებში ახალგაზრდა დეპუტატები თეორიულ ნაწილთან ერთად, პრაქტიკულ დავალებებსაც შეასრულეს. წყარო:ორგანიზაციის გვერდი სოციალურ ქსელში