კახეთი. USAID-ის ახალგაზრდული პროექტის განხორციელება – ,,ბუნებრივი რესურსების ინტეგრირებული მართვა საქართველოს წყალშემკრებ აუზებში’’ – ახმეტის მუნიციპალიტეტში გუშინ, 27 ივნისს, დაიწყო. პროექტის ფარგლებში იგეგმება მოსწავლეებთან ინტენსიური შეხვედრა და საუბარი თუ როგორია ეკოლოგიურად სუფთა გარემოში ცხოვრება. ორგანიზაციის საზოგადოებასთან ურთიერთობის მენეჯერის, ეკატერინე შალუტაშვილის თქმით, პროექტის მიზანია მოსახლეობის სოციალური მდგომარეობის გაუმჯობესება ბუნებრივი რესურსების მართვის კუთხით, როგორიც არის ბიო მრავალფეროვნება, წყლის რესურსები, ენერგო რესურსები: „პროექტის ფარგლებში შექმნილია საქართველოს სხვადასხვა ადგილას 35 ეკო–კლუბი, რომლებშიც ძირითადად მოსწავლეები არიან გაწევრიანებულები. ამ პროექტის ფარგლებში ხდება ახალგაზრდებში ცნობიერების ამაღლება ბუნებასთან დაკავშირებულ საკითხებზე. ახალგაზრდები სწავლობენ ბუნების გაფრთხილებას, როგორ იცხოვრონ ეკოლოგიურად სუფთა გარემოში. გარდა ამისა, ვიგებთ ასევე მათგან რა პრობლემებია ამ კუთხით  და ვცდილობთ მისი მოგვარების გზების პოვნას". პროგრამა აშშ-ს საერთაშორისო განვითარების სააგენტოს მიერ საქართველოში სხვადასხვა რეგიონში 2010 წლიდან ხორციელდება.

აჭარა. 25 ივნისს, განვითარებისა და თანამშრომლობის ხელშეწყობის კავშირა „პროგრესმა", ბათუმის მერიის ახალგაზრდულ დეპარტამენტთან ერთად გამართა პრესკონფერენცია. ღონისძიება, რომელიც ბათუმის დემოკრატიული ჩართულობის ცენტრში ჩატარდა, ეხებოდა ადგილობრივი ახალგაზრდების ინტერესებისა და საჭიროებების შესახებ კვლევის ჩატარებას. მისი მიზანია ახალგაზრდების ინტერესებისა და პრიორიტეტული საკითხების იდენტიფიკაცია და ანალიზი. აღნიშნული კვლევა შედგება ორი  –  თვისობრივი და რაოდებობრივი ნაწილისაგან. კვლევაში მონაწილეობას მიიღებენ აქტიური და ნაკლებად აქტიური ახალგაზრდები, სტუდენტები და სკოლის მოსწავლეები 15–დან 29 წლამდე.   კვლევა აგვისტოს ბოლოს დასრულდება. კვლევის შედეგები კი სექტემბერში გახდება ცნობილი.

თბილისი. 21 ივნისს, სამოქალაქო განვითარების ინსტიტუტმა კვლევის და ფილმის პრეზენტაცია გამართა. სტუდია მონიტორის მიერ გადაღებული ფილმი ეხებოდა საქართველოს სხვადასხვა რეგიონში სკოლიდან გათავისუფლებულ პედაგოგებს. მასწავლებლები მათი გათავისფულების მიზეზს მათი ოჯახის წევრების ოპოზიციურ პოლიტიკურ შეხედულებებს უკავშირებენ. სტუდია მონიტორმა რამდენიმე ასეთი შემთხვევა შეისწავლა და გაარკვია, რომ მათი გათავისუფლების ბრძანებაში საფუძველი დაკონკრეტებული არ არის. ფილმში ასევე აღწერილია თუ როგორ ხორციელდება ცვლილებები და რეფორმები განათლების სამინისტროში 2005 წლიდან დღემდე. შეხვედრაზე ასევე გაიმართა სამოქალაქი განვითარების ინსტიტუტის მიერ ჩატარებული კვლევის პრეზენტაცია, რომელიც იკვლევდა სასკოლო თემის დამოკიდებულებას სკოლის უსაფრთხოების პოლიტიკისადმი. კველვა ორ ნაწილად მიმდინარეობდა, რაოდენობრივი და თვისებრივი მეთოდოლოგიის გამოყენებით. იგი თბილისის სკოლებს მოიცავს და მე–6–დან მე 12 კლასამდე მოსწავლეების და მათი მშობლების დამოკიდებულებას იკლევს, კვლევის ფარგლებში ჩატარდა ფოკუს ჯგუფებიც. გამოიკვლიეს შემდეგი საკითხები: სკოლის კლიმატი, ძალადობის შემთხვევები სკოლაში და გარეთ, დამოკიდებულებები და წარმოდგენები და განსხვავებები  ამ დამოკიდებულებებში.  დღევანდელი ღონისძიება პროექტის  – „ბავშვზე ორიენტირებული სკოლის ადვოკატირების” –ფარგლებში ხორციელდება აღმოსავლეთ-დასავლეთის მართვის ინსტიტუტის (EWMI) პროგრამის – „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

გურია.„ახალგაზრდა პედაგოგთა კავშირის"  ოფისში, პროექტის  –  „ბავშვთა უფლებები ანიმაციაში" – ფარგლებში (დაფინანსებულია G-PAC მიერ), მომზადებული 4 ანიმაციური ფილმის პრეზენტაცია გაიმართა. ანიმაციური ფილმები ლიდერთა სკოლისა და ანიმაციის განვითარების ფონდის ექსპერტების ერთობლივი ნამუშევარია და ეხება ბავშვის უფლებათა კონვენციის მუხლებს. ფილმი „თამაში" (ბავშვის უფლებათა კონვენცია მუხლი 2 –  „ყველა ბავშვი თანასწორია და ერთნაირი უფლებები აქვთ"); ფილმი „მე, ჩიტი და მასწავლებელი" (ბავშვის უფლებათა კონვენცია მუხლი 13 – „ყველა ბავშვს უფლება აქვს გამოხატოს თავისი შეხედულება ყველა საკითხზე, რომელიც მას ეხება. მის შეხედულებებს სათანადო ყურადღება უნდა მიექცეს"); ფილმი „საფეხური" (ბავშვის უფლებათა კონვენცია მუხლი 23 – „სახელმწიფო ვალდებულია განსაკუთრებული მზრუნველობა გამოიჩინოს ინვალიდი ბავშვების მიმართ»); ფილმი „ცივი სახლი" (ბავშვის უფლებათა კონვენცია მუხლი 19 –  „ყველა ბავშვი დაცული უნდა იყოს ნებისმიერი სახის ძალადობისაგან"). პრეზენტაციას ესწრებოდა ოზურგეთის საზოგადოების წარმომადგენლები.

კახეთი.20 ივნისს, საღამოს 7 საათზე, გურჯაანში, საზოგადოებრივი ორგანიზაციის მედია ცენტრ კახეთის მოხალისეებმა ,,პაპას ბაღში" მორიგი აქცია გამართეს. მედია ცენტრ კახეთის მოხალისეებმა სლოგანით ,,დაიწყე ცხოვრება ღიმილით" საზოგადოებას გაერთიანებისკენ და გახალისებისკენ მოუწოდეს. ახალგაზრდბემა საზოგადოებას სხვადასხვა სახის „ღიმილები"დაურიგეს, რომელიც საინტერესო და პოზიტიური სლოგანებით იყო გაფორმებული. აქციის მიზანი საზოგადოების სამოქალაქო პროცესებში ჩათვა და გააქტიურება იყო. მაკა ხაზიური, აქციის ორგანიზატორი: ,,მედია ცენტრ კახეთის მოხალისეებმა გამართეს კიდევ ერთი საინტერესო აქცია. ღონისძიების მონაწილეებმა მოაწყეს ასფალტზე სმაილების ხატვა, გამართეს ფლეშმობი, ხოლო საღამოს მოეწყო ნაყინების დაგემოვნება და დისკოთეკა".

თბილისი. 20 ივნისს, „მშვიდობის დემოკრატიის და განვითარების კავკასიური  ინსტიტუტის" ორგანიზებით, ილიას სახელმწიფო უნივერსიტეტში, ახალგაზრდებთან შეხვედრა გაიმართა თემაზე „მე და არჩევნები". პროექტი ევროპის საბჭოს დაფინანსებით ხორციელდება და მისი მისი მიზანია საარჩევნო თემატიკაზე გაიმართოს შეხვედრები და დისკუსიები იმ ადამიანებთან, რომლებიც პირველად მიდიან არჩევნებზე. შეხვედრას უძღვებოდა „მშვიდობის დემოკრატიის და განვითარების კავკასიური  ინსტიტუტის"  თავმჯდომარე, გია ნოდია და „სამოქალაქო კულტურის საერთაშორისო ცენტრის" გამგეობის თავმჯდომარე, კოტე კანდელაკი. შეხვედრაზე  ისაუბრეს იმაზე, თუ რატომაა არჩევნები მნიშვნელოვანი პროცესი დემოკრატიულ განვთარებისთვის,  საარჩევნო სისტემის თავისებურებებზე, საარჩევნო  პროცედურებსა და არჩევნებთან დაკავშირებულ სხვა საკანონმდებლო ინიციატივებსა თუ ცვლილებებებზე. „ის რომ ხალხის მიერ არჩეული ხელისუფალი არსებობს, არასაკმარისი პირობაა დემოკრატიისთვის. ძალიან მნიშვნელოვანია, მაგრამ არასაკმარისი" – აღნიშნა შეხვედრაზე გია ნოდიამ. შეხვედრის ბოლოს მონაწილეებს დაურიგდათ ბროშურა „მე და არჩევნები".

თბილისი. 14 ივნისს საზოგადოებრივმა ორგანიზაციამ „ახალგაზრდა ადვოკატებმა" პრესკონფერენცია გამართა. ორგანიზაციის წარმომადგენლები 2012 წლის ზაფხულის არდადეგებზე სტუდენტური დასაქმების "Summer Job” ერთთვიან პროგრამაში მონაწილე სტუდენტებთან გაფორმებული ხელშეკრულების განსაჯაროებას ითხოვენ. ორგანიზაციაში ეჭვობენ, რომ პროგრამაში მონაწილე სტუდენტებისთვის სავალდებულო იქნება იმ საზოგადოებრივ ღონისძიებებში მონაწილეობა, რომელსაც ორგანიზებას პოლიტიკური პარტიები გაუწევენ. პრესკონფერენციაზე ასევე, ყურადღება გამახვილდა ბიუჯეტიდან დედაქალაქის რამდენიმე სკოლისთვის გადარიცხულ თანხებზე, რომლებიც პედაგოგების ხელფასის დანამატში აისახა. ორგანიზაცია გეგმავს მიმართოს აღნიშნული სკოლების დირექციას.  მიუხედავად იმისა, რომ არც ერთი ზემოთხსენებული ფაქტი დადასტურებული არ არის, ორგანიზაციის მესვეურები თვლიან, რომ ეს საკმარისი ინფორმაციაა იმისთვის, რომ მათ მოითხოვონ ოფიციალური უწყებებიდან პასუხი და რეაგირება. ამიტომაც, „ახალგაზრდა ადვოკატები" წერილობით მიმართავს საქართველოს ეროვნული უშიშროების საბჭოს, საქართელოს კონტროლის პალატას და საქართელოს განათლებისა და მეცნიერების სამინისტროს. 

შიდა ქართლი. 14 ივნისს, გორის დემოკრატიული ჩართულობის ცენტრში საერთაშორისო ორგანიზაციამ „ევრიჩაილდმა" და მისმა პარტნიორმა ორგანიზაციებმა: საზოგადოება „ბილიკმა" და „მიმღებ მშობელთა ორგანიზაციამ" წარადგენეს ბავშვზე სახელმწიფო ზრუნვის ალტერნატიული მომსახურებების - მინდობით აღზრდის, მცირე საოჯახო ტიპის სახლებისა და დღის ცენტრების საჭიროებათა კვლევის შედეგები. საჭიროებათა კვლევა „ბავშვთა უფლებების დაცვის საკითხებში ჩართულობის ხელშეწყობის" პროექტის  ფარგლებში ჩატარდა, რომელსაც ევროკავშირი აფინანსებს და „ევრიჩაილდი" ახორციელებს. ეს პირველი შეფასებაა, რომელმაც დეინსტიტუციონალიზაციის რეფორმის ფარგლებში მოქმედ ბავშვზე ზრუნვის სამივე სახის ალტერნატიულ მომსახურება მოიცვა. კვლევის შედეგების საფუძველზე პროექტის 11-მა პარტნიორმა ორგანიზაციამ ერთობლივად შეიმუშავა რიგი რეკომენდაციები, რომლებიც სისტემურ/სტრუქტურულ, ადმინისტრაციულ, ჯანდაცვის, განათლების, დაფინანსებისა და შესაძლებლობების განვითარების სფეროებს ეხება. შეხვედრას ესწრებოდნენ: ადგილობრივი მუნიციპალიტეტის თვითმმართველობის, ბავშვთა კეთილდღეობის სფეროში მომუშავე საზოგადოებრივი ორგანიზაციების, ევროკავშირის სადამკვირვებლო მისიის და მასმედიის წარმომადგენლები. კვლევის შედეგების და შეთავაზებული რეკომენდაციების წარდგენის შემდეგ გაიმართება დისკუსია.

სამცხე–ჯავახეთი.5 ივნისს, ადიგენის მუნიციპალიტეტის სოფელ დიდი სმარდის სამოქალაქო კლუბის წევრებმა სოფელ ზანავის საჯარო სკოლის მოსწავლეებს ბავშვთა უფლებების კონვენცია გააცნეს. შეხვედრაზე განიხილეს ბავშვთა უფლებების კონვენციის სხვადასხვა მუხლები, ხოლო 27-ე მუხლის გარშემო, რომელიც ბავშვის განვითარებისა და ცხოვრების  ხელშემწყობი გარემოს შექმნაში მშობლისა და სახელმწიფოს ვალდებულებებს შეეხება, გაიმართა დისკუსია.  მოსწავლეებმა ისაუბრეს სკოლაში ბავშვებს შორის არსებულ სოციალურ თანასწორობაზე, სტერეოტიპებზე და ინკლუზიურ სწავლებაზე. მსგავსი ტრენინგები, მოსწავლეთა ცნობიერების ამაღლების მიზნით, სხვა სკოლებშიც იგეგმება.

გურია. 6 ივნისს გაიმართა  ახალგაზრდული ცენტრების მორიგი საანგარიშო შეხვედრა, რომლის მიზანიც იყო განხორციელებული საქმიანობის ურთიერთგაზიარება. შეხვედრას ესწრებოდნენ ჯუმათის, კოხნარის, ბაილეთის და ხევის ახალგაზრდული ცენტრები და ასევე თხინვალის სათემო კავშირის წარმომადგენელი. შეხვედრის პირველი ნაწილი დაეთმო ახალგაზრდული ცენტრების მიერ განხორციელებული საქმიანობის პრეზენტაციებს, ხოლო მეორე ნახევარში ისაუბრეს ახალგაზრდული ცენტრების წინაშე მდგარი პრობლემებისა და პერსპექტივების შესახებ. საუბარი შეეხო ცენტრების სხვა ორგანიზაციებთან თანამშრომლობის საკითხებსაც.  შეხვედრის ორგანიზატორები იყვნენ საქართველოს დემოკრატიული განვითარების კავშირი და საქართველოს სტრატეგიული კვლევებისა და განვითარების ცენტრი.

კახეთი. მშვიდობის კორპუსი 26 ივნისიდან 29 ივნისამდე, აცხადებს 13 წლიდან 16 წლამდე გოგონათა რეგისტრაციას საზაფხულო ბანაკისათვის. ბანაკში მონაწილეები გაეცნობიან ლიდერობისთვის საჭირო უნარ–ჩვევებს. მონაწილების მსურველებმა უნდა გააგზავნონ შემდეგი მონაცემები: სახელი, გვარი, ასაკი, საჯარო სკოლა, საცხოვრებელი ადგილი შემდეგ ელექტრონულ ფოსტაზე: email - selfcamptelavi@gmail.com

სამეგრელო. 1 ივნისს ზუგდიდში, ცოტნე დადიანის ქუჩაზე მდებარე მინი საფეხბურთო მოედანზე მოეწყო ბავშვთა დაცვის საერთაშორისო დღისადმი მიძღვნილი ახალგაზრდული აქცია – სპორტულ- გასართობი შეჯიბრი მუნიციპალიტეტში მცხოვრები მოზარდებისა და ახალგაზრდების ჯგუფებს შორის.  აქცია ორგანიზებულია ასოციაცია - დეას მიერ პროექტის "ჩემი უფლებები, ჩემი ხმის" ფარგლებში. პროექტის მიზანია ბავშვებისა და ახალგაზრდების ჯანმრთელობის მდგომარეობის გაუმჯობესების ხელშეწყობა ბავშვთა და ახალგაზრდების ჯანდაცვის უფლებებთან დაკავშირებულ სახელმწიფო პოლიტიკაში, პრაქტიკასა და მიდგომებში მდგრადი ცვლილებების შეტანის გზით. პროექტი ხორციელდება შვედეთის განვითარების სააგენტოს (SIDA) ფინანსური მხარდაჭერით. მას ახორციელებს ოქსფამ დიდი ბრიტანეთის საქართველოს წარმომადგენლობა, პროექტში მისი პარტნიორი ორგანიზაციები არიან : ასოციაცია დეა (სამეგრელო ზემო-სვანეთი), ველფეარ ფაუნდეიშენი (შიდა ქართლი), საქართველოს სახალხო დამცველის აპარატი.

სამეგრელო. 28 მაისს გაიმართა, ასოციაცია დეასთან არსებული ინტეგრირებული ახალგუზრდული კლუბის პროექტის – „ახალგაზრდობა და თვითმმართველობის" – ფინალური პრეზენტაცია. ღონისძიებაზე წარმოადგინეს პროექტის ფარგლებში განხორციელებული საქმიანობის შედეგები. ასევე განიხილეს ადგილობრივ თვითმმართველობაში ახალგაზრდების თანამონაწილეობის, ხელისუფლებასთან დიალოგის, ინკლუზიური საზოგადოების პრინციპების, დემოკრატიული ფასეულობების გარშემო ახალგაზრდების შეკავშირების სტიმულირების საკითხები, რომელთა გადაჭრის ხელშეწყობაზეც იყო მიმართული პროექტი. პრეზენტაციას ესწრებოდნენ რეგიონის სამხარეო ადმინისტრაციის, ადგილობრივი თვითმმართველობის, საერთაშორისო და საზოგადოებრივი ორგანიზაციების, ახალგაზრდული გაერთიანებისა და მედიის წარმომადგენლები. პროექტი ხორციელდებოდა ფონდ „ღია საზოგადოება – საქართველოს" ფინანსური მხარდაჭერით.

თბილისი. 1 ივნისს სათემო განვითარების ცენტრის ორგანიზებით კავკასიური სახლის ეზოში მოეწყო გამოფენა–გაყიდვა. გამოფენაზე წარმოგენილი იყო სათემო კავშირების „ნუკრიანისა" და „ნაფარეულის" სახელოსნოების (სოციალური საწარმოების) ხელნაკეთი თოჯინები, სათამაშოები და ქართული ანბანის მოტივებზე შექმნილი ნაკეთობები. ბავშვთა დაცვის დღესთან დაკავშირებით გამოფენის თემა თოჯინები და ქართული ანბანი იყი. გამოფენა ტრადიციულ ხასიათს ატარებს და წელიწადში ორჯერ ტარდება – საზაფხულოდ და საშობაოდ. გამოფენა–გაყიდვა 2 ივნისსაც გარძელდა. შემოსული თანხის 10% გადაერიცხება საქართველოს SOS ბავშვთა სოფელს.

სამცხე–ჯავახეთი. 1 ივნისს, 11 საათზე, ქალაქ ახალციხის კულტურისა და დასვენების პარკში ბავშვთა საერთაშორისო დღისადმი მიძღვნილი საზეიმო ღონისძიება გაიმართა. ღონისძიების ინიციატორები ადგილობრივი მუნიციპალიტეტის გამგეობა და საზოგადოებრივი ორგანიზაცია world vission იყვნენ. ღონისზიებაზე მისულ სხვადასხვა ასაკის ბავშვებს დაურიგდათ საინფორმაციო ბუკლეტები, ტკბილეული, გამაგრილებელი სასმელები და სათამაშოები. ხატვაში გამოცხადებულ კონკურსში გამარჯვებული ოთხი არასრულწლოვანი სპეციალური პრიზებით დააჯილდოვეს.

აჭარა. 1 ივნისს 16:00 სთ–ზე, ბათუმის დემოკრატიული ჩართულობის ცენტრში გაიმართა საჯარო დისკუსია თემაზე „ბავშვზე ზრუნვის ალტერნატიული მომსახურებები – მინდობით აღზრდა, მცირე საოჯახო ტიპის სახლები და დღის ცენტრები". შეხვედრაზე, ასევე საერთაშორისო არასამთავრობო ორგანიზაცია „ევრი ჩაილდიმა" და მისმა პარტნიორმა ორგანიზაციებმა წარადგინეს ამავე თემაზე ჩატარებული კვლევა, რომელიც ევროკავშირის მიერაა დაფინანსებული. შეფასებამ აჩვენა, რომ მომსახურების მიმწოდებლები და მომხმარებლები, ზოგადად, კმაყოფილნი არიან არსებული მომსახურებით და მხარს უჭერენ ქვეყანაში მათ არსებობას. თუმცა დაასახელეს მთელი რიგი საჭიროებები, რომელთა გათვალისწინებაც აუცილებელია, რათა მიწოდებული მომსახურება უფრო ხარისხიანი გახდეს. კვლევის ფარგლებში შემუშავებული 70 რეკომენდაციიდან 49 აუცილებელ ყურადღებას საჭიროებს. ამ საკითხების გარშემო ისაუბრეს საერთაშორისო უფლებათა დაცვის არასამთავრობო ორგანიზაცია „ევრი ჩაილდის" დირექტორმა ანდრო დადიანმა და ბათუმის სოციალური მომსახურების სააგენტოს სოც–მუშაკმა ნინო ცეცხლაძემ. დისკუსიაზე მოწვეულნი იყვნენ ბათუმის ბავშვთა ზრუნვის სამსახურის სოციალური მუშაკები, ბათუმის სოციალური მომსახურების სააგენტოს თანამშრომლები, არასამთავრობო ორგანიზაციები, სტუდენტები და მედიის წარმომადგენლები.

სამცხე–ჯავახეთი. 1 ივნისს ახალციხეში, საზოგადოებრივი ორგანიზაცია ,,დემოკრატ მესხთა კავშირის” ოფისში გაიმარტა ტრენინგი თემაზე - ფასილიტაცია. ტრენინგი ახალგაზრდა მსმენელებისთვის  ფსიქოლოგიის მეცნიერებათა დოქტორმა გულიკო ბექაურმა ჩაატარა.

გურია. „ახალგაზრდა პედაგოგთა კავშირის" ბაზაზე  არსებულმა ლიდერთა სკოლის  დებატ-კლუბმა ნაფიც მსაჯულთა სისტემის შესახებ საჩვენებელი დებატები წარმოადგინა. მტკიცებითი გუნდის არგუმენტები ქვეყანაში დემოკრატიის კიდევ უფრო განმტკიცებასა და სასამართლოს მიმართ ნდობის ხარისხის ამაღლებას შეეხებოდა, რაზედაც უარმყოფელმა გუნდმა საწინააღმდეგო შეხედულებები წარმოადგინა. ისინი ამტკიცებდნენ, რომ  მსაჯულთა ინსტიტუტი სასამართლოს ნდობასა და ხარისხს ვერ აამაღლებს, არაკვალიფიციური პირები ვერ შეძლებენ იურიდიული იმპერატივებით მსჯელობას და მათი ვერდიქტი  ემოციური უფრო იქნება, ვიდრე სამართლიანი. თითქმის თანაბარი თამაში უარმყოფელი გუნდის წარმატებით დასრულდა. თუმცა, უნდა აღინიშნოს, რომ არანაკლებ საინტერესო გახლდათ ის დისკუსია, რომელიც მოდებატეებსა და საზოგადოებას შორის სადებატო რეზოლუციას მოჰყვა. დამსწრე აუდიტორია, სადაც მოზარდებთან და მშობლებთან ერთად პროკურორები, მოსამართლეები და ადვოკატები იმყოფებოდნენ გამოთქვამდნენ შეხედულებებს, სასამართლოს მიმართ საზოგადოების დამოკიდებულების, ნაფიცმსაჯულთა უპირატესობისა და ზოგადად სამართლიანობის შესახებ.

აჭარა. 29 მაისს ბათუმის დემოკრატიული ჩართულობის ცენტრის ორგანიზებით გაიმართა საჯარო დისკუსია თემაზე: ,,ახალგაზრდები და პოლიტიკა". რომლის მიზანი იყო ახალგაზრდების როლის და მნიშვნელობის განსაზღვრა ქვეყნის პოლიტიკის ფორმირებაში. შეხვედრას მომხსენებლის სტატუსით ესწრებოდნენ: ქალაქ ბათუმის საკრებულოს თავმჯდომარე გიორგი კირთაძე და ორგანიზაცია „სამოქალაქო საზოგადოება ადამიანის უფლებებისათვის და თავისუფლებებისათვის" ხელმძღვანელი ლადო მგალობლიშვილი.   სტუმრის სტატუსით კი წარმოდგენილი იყვნენ ბათუმის შოთა რუსთაველის სახელმწიფო უნივერსიტეტის,  საქართველოს უნივერსიტეტის, ბათუმის დამოუკიდებელი უნივერსიტეტის, ბათუმის საზღვაო აკადემიის სტუდენტები და აქტიური ახალგაზრდები.  მომხსენებლებმა ისაუბრეს  აქტიური მოქალაქის როლზე და მნიშვნელობაზე, ახალგაზრდების/სტუდენტების პოლიტიკურ მოძრაობაში ჩართვის მექანიზმებზე და აქტუალურობაზე, ასევე რატომ არის ახალგაზრდა/სტუდენტი ანგარიშგასაწევი ძალა და რა რეალური ბერკეტები გააჩნიათ მათ. სტუდენტებმა ბევრი საინტერესო მოსაზრება და კითხვა დასვეს, განსაკუთრებით ყურადღება გამახვილდა საკანონმდებლო ცვლილებაზე, რომელიც დაკავშირებულია 21 წლიდან პარლამენტის წევრად არჩევის უფლებასთან და პოლიტიკური პარტიაში ახალგაზრდების გაწევრიანების საკითხთან.

კახეთი. დღეს, თელავში, დემოკრატიული ჩართულობის ცენტრში საზოგადოებრივი ორგანიზაციების მიერ ბავშვზე ზრუნვის ალტერნატიული მომსახურებების საჭიროებათა კვლევის პრეზენტაცია გაიმართა. საერთაშორისო ორგანიზაციამ „ევრიჩაილდმაЭ და მისმა პარტნიორმა ორგანიზაციებმა მინდობით აღზრდის, მცირე საოჯახო ტიპის სახლებისა და დღის ცენტრების საჭიროებათა კვლევის შედეგები წარადგინეს. საჭიროებათა კვლევა „ბავშვთა უფლებების დაცვის საკითხებში ჩართულობის ხელშეწყობის" პროექტის ფარგლებში ჩატარდა, რომელსაც ევროკავშირი აფინანსებს და „ევრიჩაილდი" ახორციელებს. ეს პირველი შეფასებაა, რომელმაც დეინსტიტუციონალიზაციის რეფორმის ფარგლებში მოქმედი ბავშვზე ზრუნვის სამივე სახის ალტერნატიული მომსახურება მოიცვა. კვლევის შედეგების საფუძველზე პროექტის 11-მა პარტნიორმა ორგანიზაციამ ერთობლივად შეიმუშავა რიგი რეკომენდაციები, რომლებიც სისტემურ-სტრუქტურულ, ადმინისტრაციულ, ჯანდაცვის, განათლების, დაფინანსებისა და შესაძლებლობების განვითარების სფეროებს ეხება. შეხვედრას ადგილობრივი მუნიციპალიტეტების, ხელისუფლების, შესაბამისი სამთავრობო უწყებების, ბავშვთა კეთილდღეობის სფეროში მომუშავე არასამთავრობო, სათემო ორგანიზაციებისა და მასმედიის წარმომადგენლები დაესწრებიან.

სამცხე–ჯავახეთი. ბაკურიანში 23 მაისს დაიწყო და 28 მაისამდე ახალგაზრდები დებატების ხელოვნებას გაეცნობიან. დებატების ბანაკში, ისინი შეიძენენ დებატებში მონაწილეობისა და მისი გამართვის უნარ–ჩვევებს. აღნიშნული ღონისძიება საზოგადოებრივი ორგანიზაციის ტრენინგებისა და კონსულტაციების ცენტრის მიერ არის ორგანიზებული.

სამცხე–ჯავახეთი. ასპინძის რაიონის სოფელ რუსთავის საჯარო სკოლის მოსწავლეების ინიციატივას, რომ დაესუფთავებინათ და გაემწვანებინათ სკოლის მიმდებარე ტერიტორია, მხარი ადგილობრივმა თვითმმართველობამ და ახალციხის ახალგაზრდულმა ცენტრმა აუბეს. აქცია 18 მაისს გაიმართა. ახალგაზრდებმა დაასუფთავეს სკოლის მიმდებარე ტერიტორია, ასევე შეიმუშავეს სოფლიდან ნარჩენების გატანის გრაფიკი. დაიდგა ნაგვის ბუნკერები და ნარჩენების გასატანად გამოიყო მანქანა. მსგავსი პროექტი ადიგენის რაიონის სოფელ ლელოვანშიც ხორციელდება. სადაც სკოლის მოსწავლეების, ახალციხის ახალგაზრდული ცენტრისა და ადგილობრივი თვითმართველობის თანანამშრომლობით, შემოიღობა სკოლის ეზო.