იმერეთი. სამოქალაქო განათლების და პედაგოგთა გადამზადების პროგრამის ფარგლებში, 2013 წლის 26 მარტს თერჯოლის მუნიციპალიტეტის სოფელ ჩხარის საჯარო სკოლაში სამოქალაქო კლუბის ინიციატივით, კლუბის წევრებისათვის, ფოტოგრაფიაში მასტერკლასი ჩატარდა. მსმენელებმა მიიღეს ინფორმაცია მხატვრული ფოტოს, პორტრეტის, ახალი ამბის და ფარული გადაღების შესახებ.ასევე მოეწყო ცნობილი ფრანგი ფოტოგრაფის, რენე მალტეტი (René Maltête)–ს ფოტოების განხილვა და ფოტოების პრაქტიკული გადაღება. წყარო:ორგანიზაციის გვერდი სოციალურ ქსელში

თბილისი. გაეროს ბავშვთა ფონდმა წუხილი გამოთქვა საქართველოში ბავშვებში კვების მძიმე დეფიციტის შედეგად გამოვლენილი გართულებების გამო. იუნისეფი დაუშვებლად მიიჩნევს ფაქტს, რომელიც აჭარის ტელევიზიით გადაიცა და კვების მწვავე დეფიციტის გამო ერთი წლის გოგიტა აბაშიძის ხელვაჩაურის დედათა და ბავშვთა ცენტრში გადაყვანას ეხებოდა.  ორგანიზაციის მიერ გავრცელებულ ინფორმაციაში ნათქვამია, რომ „საქართველოში თითქმის 77 000 ბავშვი ცხოვრობს უკიდურეს სიღარიბეში, ანუ მოიხმარს დღეში დაახლოებით, ორ ლარს. სოციალური დაცვის არსებული მექანიზმები სათანადოდ ვერ მოიცავს ბავშვებს. გოგიტას ამბავი სამწუხარო დასტურია იმისა, რომ სოციალური დაცვის სისტემა არ არის ეფექტიანი სოციალურად დაუცველი ბავშვების დასახმარებლად".        გაეროს ბავშვთა ფონდი მოუწოდებს მთავრობას, შემოიღოს ბავშვთა საყოველთაო შეღავათი ყველაზე დაუცველი ბავშვების და მათი ოჯახების დასახმარებლად.  სრულად http://www.unicef.ge/?m=44&news_id=185 წყარო: unicef.ge

იმერეთი. 26 მარტს, თერჯოლის მუნიციპალიტეტის სოფელ ჩხარის საჯარო სკოლაში სამოქალაქო განათლებისა და პედაგოგთა გადამზადების  პროგრამის ფარგლებში სოციალური მედიის კოორდინატორმა ტრენინგი ჩაატარა. ტრენინგზე მსმენელები გაეცვნენ ბლოგების დარეგისტრირებისა და მისი მართვის საკითხებს, ელექტრონული ფოსტის გამოყენებას, ონლაინ კონფერენციების მოწყობას, სოციალური მედიის აქტიურად გამოყენების, საძიებო სისტემების  მნიშვნელობას და დანიშნულებას. სოციალურ ქსელებში: twitter, facebook, flickr, wordpress რეგისტრაციას და მუშაობას. მსმენელები აქტიურად ჩაერთვნენ ტრენინგის მსვლელობაში.  წყარო:ორგანიზაციის გვერდი სოციალურ ქსელში

თბილისი. 25 მარტს საქართველოს წითელი ჯვრის საზოგადოებამ სკოლებში  – აიბი მთიებსა და ევროპულ სკოლაში სემინარები ჩაატარა. სემინარების თემატიკა ეხებოდა აივ ინფექციის პრევანციას და ასევე კატასტროფების მართვის საკითხებს. აღნიშნულ თემატიკაზე მოსწავლეებმა შეასრულეს ნახატები, რომლებიც 8 მაისს – წითელი ჯვრის საერთაშორისო დღეს საჯარო ბიბლიოთეკის დარბაზში გამოიფინება. წყარო: ორგანიზაციის გვერდი სოციალურ ქსელში

კახეთი. „დარგე შენი მომავალი" ასე ჰქვია გარემოსდაცვით აქციას, რომელიც 24 მარტს, თელავში გერმანიის საერთაშორისო თანამშრომლობის საზოგადოების (GIZ) მხარდაჭერით გაიმართა. თელავის სახელმწიფო უნივერსიტეტის სტუდენტებმა სასწავლებლის ეზოს გამწვანების აქცია მოაწყეს. მას დაესწრო და ხეების დარგვაში მონაწილეობდა გარემოს დაცვის მინისტრი ხათუნა გოგალაძემ. ღონისძიების მიზანია, ბიომრავალფეროვნების მდგრადი განვითარების ხელშეწყობა, გარემოსდაცვითი ცნობიერების ამაღლება, ახალგაზრდა თაობებისათვის ხის დარგვის, მოვლისა და მისი აუცილებლობის სწავლება, გარემოსდაცვითი საკითხების პოპულარიზაცია და საზოგადოების პრაქტიკულ ღონისძიებებში ჩართვა.

გურია. 21 მარტს ოზურგეთის ახალგაზრდული ცენტრის ფარგლებში  ოზურგეთის მუნიციპალიტეტის #4 საჯარო სკოლაში მოძრავი ბიბლიოთეკის პრეზენტაცია გაიმართა. პრეზენტაციაში მონაწილეობა მიიღეს ცენტრის კოორდინატორმა, ახალგაზრდული ცენტრის წევრებმა,სკოლის დირექტორმა,მასწავლებლებმა და მოსწავლეებმა. ახალგაზრდებმა დამსწრეებს თავიანთი შთაბეჭდილებები გააცნეს ბიბლიოთეკის ფარგლებში წაკითხულ წიგნებთან დაკავშირებით. ბიბლიოთეკა მეოთხე საჯარო სკოლაში 11 აპრილამდე დარჩება. წყარო:ორგანიზაციის გვერდი სოციალურ ქსელში

სამეგრელო.23 მარტს ასოციაცია „ათინათის" ახალგაზრდულ ცენტრ ორტუსის წევრებს ჩაუტარდა ტრენინგი თემაზე „პროექტის წერა". ტრენინგი მიზნად ისახავდა პროექტის წერის კომპონენტების განხილვას, პრობლემის იდენტიფიცირებას, მიზნის ჩამოყალიბებას, ინდიკატორების გამოვლენას და პროექტის ბენეფიციარების კველვას.  ტრენინგის შედეგად ბავშვებმა დაწერეს პროექტის მაკეტი და ტრენინგის ბოლოს გააკეთეს მისი წარდგენა. წყარო:ორგანიზაციის გვერდი სოციალურ ქსელში

კახეთი.25 მარტს, თელავის მეოთხე საჯარო სკოლაში, ინტელექტუალური თამაშის „რა? სად? როდის?" ფინალი ჩატარდა. თამაშში მონაწილეობას თელავის მუნიციპალიტეტის სხვადასხვა საჯარო სკოლაში შექმნილი სამოქალაქო კლუბებისა და საინიციატივო ჯგუფების მიერ შექმნილი გუნდები იღებდნენ მონაწილეობას. რამდენიმე საათიანი თამაშის შემდეგ დასახელდა გამარჯვებულიც – მეოთხე საჯარო სკოლის ორი და პირველი საჯარო სკოლის ერთი გუნდი.

თბილისი.23 მარტს საქართველოს სკოლის მოსწავლეთა გაერთიანებების ალიანსმა, აკადემიკოს ილია ვეკუას სახელობის ფიზიკა-მათემატიკის #42 საჯარო სკოლასთან ერთად, UNITED for Intercultural Action-ის საგანმანათლებლო მხარდაჭერით მოაწყო საინფორმაციო შეხვედრა სიძულვილის ენასთან დაკავშირებით. შეხვედრაში მონაწილეობა მიიღო ორმოცი სკოლის მოსწავლემ. მოსწავლეებმა შეიმუშავეს სამოქმედო გეგმა და აქტივობები, რომლებსაც საქართველოს სკოლის მოსწავლეთა გაერთიანებების ალაიანსი განახორციელებს 2013-2014 წელს. წყარო:ორგანიზაციის გვერდი სოციალურ ქსელში

იმერეთი. სამოქალაქო განათლებისა და პედაგოგთა გადამზადების პროგრამის ფარგლებში 23 მარტს, ქუთაისის განათლების განვითარების და დასაქმების  ცენტრის ინიციატივით იმერეთის პროგრამის სამიზნე სკოლების სამოქალაქო კლუბის წევრებისათვის მოეწყო სასწავლო ვიზიტი თბილისში.  ვიზიტის ფარგლებში მოსწავლეებმა დაათვალიერეს პარლამენტის ეროვნული ბიბლიოთეკა და საქართველოს იუსტიციის სამინისტრო. სასწავლო ვიზიტში იმერეთის სხვადასხვა საჯარო სკოლების სამოქალაქო კლუბის წევრები მონაწილეობდნენ.  წყარო:ორგანიზაციის გვერდი სოციალურ ქსელში

იმერეთი. სამეცნიერო-ინტელექტუალურმა კლუბმა „თაობათა დიალოგმა" „RICDOG მოხალისეთა კლუბისთვის” სოციალური მედიის საკითხებზე ორდღიანი ტრენინგი გამართა. ტრენინგის ფარგლებში მონაწილეები გაეცნენ ფოტო გადაღების ტექნიკას, ისაუბრეს ბლოგის მართვისა და კონტეტის განსაზღვრაზე. დასასრულს მონაწილეების მიერ მიერ გადაღებული ფოტოებიდან 3 ყველაზე საინტერესო, აღქმადი და კრეატიული გამოავლინეს. წყარო:ორგანიზაციის გვერდი სოციალურ ქსელში

აჭარა. ასოციაცია „თავისუფალ ჟურნალისტთა სახლმა" ბათუმის შოთა რუსთველის სახელმწიფო უნივერსიტეტში თვითმართველობის არჩევნების შესახებ  დისკუსია გამართა. დისკუსიაზე თვითმართველობის თავმჯდომარის მომავალმა კანდიდატებმა სამოქმედო გეგმაზე ისაუბრეს. ოთხივე კანდიდატი ბათუმის პრესკაფეში მხარდაჭერებთან ერთად შეიკრიბა.  დისკუსიის მსვლელობისას მაყურებელს საშუალება ჰქონდათ პირდაპირი ეთერის დროს დაესვათ კითხვები და ჩართულიყვნენ დისკუსიაში სკაიპის საშუალებით.  წყარო:ორგანიზაციის გვერდი სოციალურ ქსელში

იმერეთი. „ახალგაზრდების ინფორმირებულობა საკუთარი აზრის გამოხატვისა და მოქმედებისათვის" (ART) პროექტის ფარგლებში 20–21 მარტს, ქუთაისის სახალხო დამცველის ოფისში ჩატარდა 2 დღიანი ტრენინგი „მოქალაქე და ადგილობრივი თვითმმართველობა". ტრენინგის თემატიკა იყო: ხელისუფლება და მოქალაქეთა ჩართულობა გადაწყვეტილების მიღების პროცესში, ადგილობრივი თვითმმართველობის საქმიანობის მონიტორინგი, საქართველოს საბიუჯეტო სისტემა, ადგილობრივი ბიუჯეტების საბიუჯეტო ციკლი, მოქალაქეთა ჩართულობა ადგილობრივ დონეზე ბიუჯეტირების პროცესში, ადგილობრივი ბიუჯეტის მონიტორინგის ფორმები და მეთოდები. ტრენინგის მოდული შემუშავებული იყო საქართველოს ახალგაზრდა იურისტთა და ეკონომისტთა ასოციაციების მიერ და შესაბამისად მოიცავდა როგორც იურიდიულ-სამართლებრივ, ასევე ეკონომიკურ საკითხებს. ტრენინგის მიზანი იყო ახალგაზრდული საბჭოს მიერ შემუშავებული „ბიუჯეტის ადვოკატირების" პროექტის ფარგლებში საჭირო უნარ ჩვევების, ინფორმაციისა და ცოდნის მიღება, რათა მოხდეს ახალგაზრდების ჩართულობის გაზრდა ადგილობრივი ბიუჯეტის შემუშავებისა და მონიტორინგის პროცესში. წყარო:ორგანიზაციის გვერდი სოციალურ ქსელში

კახეთი. 3 დღიანი ანიმაციური ფილმების საერთაშორისო ფესტივალი - „თოფუზი ექო" დასრულდა. პროექტის მთავარ მიზანს საქართველოს ყველა რეგიონში ანიმაციური ფილმების პოპულარიზაცია და განვითარება წარმოადგენს.  ღონისძიება ანიმაციის განვითარების კომიტეტისა და თელავის მუნიციპალიტეტის გამგეობის კულტურის სამსახურის ორგანიზებით განხორციელდა. ანიმაციის განვითარების კომიტეტის ხელმზღვანელის, ზურაბ დიასამიძეს თქმით, ფესტივალის ფარგლებში მოსწავლეებმა ისწავლეს ფილმწარმოების ყველა ეტაპი:,,ღონისძიების მიზანი იყო  ის, რომ დავანახოთ ბავშვებს ანიმაციური ფილმის წარმოების პროცესი, ყველა ეტაპი დაწყებული იდეიდან დამთავრებული ბოლო მონტაჟით. ბავშვებს უყვართ ხატვა, უყვართ კომპიუტერები და ანიმაციური ფილმის გაკეთება მათთვის არის ის, რომ თქვან თავისი სათქმელი, თქვან ის პრობლემები, რომლებიც ჩვენ უფროსებს ხშირად გვესმის, მაგრამ ვერ ვხვდებით.’’

იმერეთი. სამოქალაქო განათლებისა და პედაგოგთა გადამზადების პროგრამის ფარგლებში 20 მარტს ქუთაისის განათლების განვითარების და დასაქმების ცენტრის ინიციატივით კონკურსის ,,გაიცანით, ის გმირია’’ შემაჯამებელი ფინალური ეტაპი გაიმართა. კონკურსში პროგრამის იმერეთის რეგიონის პარტნიორი სკოლების  სამოქალაქო კლუბებისა და საინიციატივო ჯგუფების წევრები მონაწილეობდნენ. კონკურსის განმავლობაში მონაწილეებმა სლაიდ შოუები და ვიდეო ფილმები მათ რჩეულ სამოქალაქო გმირებზე წარადგინეს.  გამოვლინდა ხუთი გამარჯვებული, რომლებიც სპეციალური პრიზებითა და სიგელებით დაჯილდოვდნენ. სიგელები და სიმბოლური პრიზები გადაეცა ყველა მონაწილეს. წყარო: kedec.ge

გურია. „ახალგაზრდა პედაგოგთა კავშირის" ოფისში, მოსწავლეთა რეგიონული პარლამენტის წევრებისთვის გაიმართა ვორქშოპი „საჯარო სკოლების ბიუჯეტისა და ოპერაციული გეგმის ფორმირების პროცესში მოსწავლეთა თვითმმართველობის როლის შესახებ". ვორქშოპს უძღვებოდნენ სკოლების დემოკრატიზაციის კომპონენტის მენეჯერი და აპკ განათლების ექსპერტი. ვორქშოპზე, ექსპერტებმა ისაუბრეს ბიუჯეტისა და ოპერაციული გეგმის მნიშვნელობისა და მათ შემუშავებაში მოსწავლეთა თვითმმართველობის წევრების მონაწილეობის აუცილებლობის შესახებ. განიხილეს წარმოდგენილი სკოლების ბიუჯეტებისა და ოპერაციული გეგემების დოკუმენტები.  რეგიონული პარლმენტის წევრები შეთანხმდნენ, რომ უახლოეს მომავალში მოამზადებენ რეკომენდაციებს სამეურვეო საბჭოსა და დირექციების სახელზე, რათა 2013-2014 სასწავლო წლის ბიუჯეტისა და ოპერაციული გეგმების შემუშავების პროცესში გათვალსწინებულ იქნას მოსწავლეთა საჭიროებები, რაც თავის მხრივ გააუმჯობესებს მათ ჩართულობას, გადაწყვეტილებების მიღების დემოკრატიულობას და პირდაპირ აისახება სკოლის განვითარებაზე. წყარო:ორგანიზაციის გვერდი სოციალურ ქსელში

სამცხე–ჯავახეთი. ,,სამოქალაქო განათლებისა და პედაგოგთა გადამზადების პროგრამის" ფარგლებში ახალქალაქის  მე–4 საჯარო სკოლის სამოქალაქო კლუბის წევრებისათვის ინფორმაციის მიწოდების მიზნით ,,საქართველოს კონსტიტუციის" თემაზე ღონისძიება გაიმართა. ამავე სკოლის სამოქალაქო განათლების პედაგოგის ინიციატივით  სამოქალაქო კლუბის წევრები გაეცნენ  საქართველოს კონსტიტუციას.  ღონისძიება  კითხვა-პასუხის რეჟიმით მიმდინარეობდა. შემდეგ, გაკეთდა სავარჯიშოები და ჯგუფური განხილვა, სადაც კლუბის წევრებმა წარმოადგინეს საკუთარი თავი მომავალ იურისტად. 

იმერეთი. სამოქალაქო განათლებისა და პედაგოგთა გადამზადების პროგრამის ფარგლებში 19 მარტს, ქუთაისის № 41 საჯარო საჯარო სკოლის სამოქალაქო კლუბის წევრებისათვის სამოქალაქო კლუბის ერთ–ერთმა ლიდერმა  ტრენინგი ჩაატარა დებატების ტექნიკებთან დაკავშირებით.  ტრენინგს 17 მოსწავლე ესწრებოდა. წყარო:ორგანიზაციის გვერდი სოციალურ ქსელში

კახეთი. 18 მარტს, თელავის მედია კაფეში, მედია ცენტრი კახეთის ორგანიზებით კულტურულ-შემოქმედებითი საღამო გაიმართა. ღონისძიება ახალგაზრდების შემოქმედებას დაეთმო – ახალგაზრდა პოეტმა სალომე გოგიაშვილმა წარადგინა თავისი ლექსები, ჯგუფმა „მედიატორმა" ჰიტები, ხოლო ახალგაზრდა მხარტვარმა საკუთარი ნახატები წარადგინა.

იმერეთი. ქუთაისის ახალგაზრდული ცენტრის წევრმა წყალტუბოს მუნიციპალიტეტის №4 საჯარო სკოლის მოსწავლეებისთვის ჩაატარა ტრენინგ-სემინარი თემაზე: „სამოქალაქო ინტერესების დაცვა’’. ტრენინგი დაეთმო ახალგაზრდების მონაწილეობას სამოქალაქო საზოგადოებაში მიმდინარე პროცესებში და მათ როლს დემოკრატიული მოვლენების განვითარებაში, აგრეთვე იმას თუ როგორი უნდა იყოს აქტიური მოქალაქე და რა არის მოხალისეობა. ტრენინგის მონაწილეებს საშუალება ჰქონდათ ვიდეო რგოლების საშუალებით ეხილათ ქართული და უცხოური ადვოკატირების წარმატებული მაგალითები. თანატოლთა განათლების ტრენინგი ორგანიზებული იქნა „საქართველოში ეროვნული ინტეგრაციის გაძლიერების" პროექტის (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

იმერეთი. ხონის მუნიციპალიტეტის სოფელ კუხის საჯარო სკოლის სამოქალაქო კლუბის, „სამოქალაქო განათლება საზოგადოების” ინიციატივით განხორციელდა აქცია სოფლის ქარსაფარი ზოლის აღდგენის მიზნით. კლუბის წევრებმა 40 ხის ნერგი სოფლის შიდა ცენტრალურ გზაზე დარგეს, რის შემდეგაც აქციის მონაწილეებმა მოსახლეობასთან საინფორმაციო შეხვედრა გამართეს. ინიციატივის განხორციელებაში მონაწილეობა მიიღეს სკოლის პედაგოგებმა, სამოქალაქო კლუბის წევრებმა და თემის წარმომადგენლებმა. წყარო:ორგანიზაციის გვერდი სოციალურ ქსელში

16 მარტს იტალიაში სამუშაო ვიზიტის ფარგლებში ბავშვთა და ახალგაზრდობის განვითარების ფონდსა და რომუალდო დელბიანკოს ფონდს შორის მემორანდუმი გაფორმდა. შედეგად, დაიგეგმება ერთობლივი, საერთაშორისო კულტურულ-საგანმანათლებლო პროექტები, როგორც საქართველოში, ასევე იტალიაში. რომუალდო დელბიანკოს ფონდი პროექტებს მსოფლიოს 77 ქვეყანაში ახორციელებს, თანამშრომლობს 500-ზე მეტ სამეცნიერო და კულტურულ დაწესებულებასთან.  წყარო:ორგანიზაციის გვერდი სოციალურ ქსელში