კახეთი. 1 მარტს, ახალგაზრდულმა ორგანიზაციამ ,,ერთად ვაკეთოთ სიკეთე", გურჯაანის მუნიციპალიტეტის კულტურის სახლში ღონისძიება გაიმართა.  ღონისძიებაში მონაწილეობა  მუნიციპალიტეტის 6 საჯარო სკოლის მოსწავლეებმა მიიღეს. საჯარო სკოლებიდან წარმოდგენილი გუნდები ერთმანეთს მონოლოგებში, სიმღერაში და თეატრალურ დადგმებში ეჯიბრებოდნენ. ღონისძიების ორგანიზატორის, ორგანიზაცია ,,ერთად ვაკეთოთ სიკეთეს’’ ერთ–ერთი ლიდერის ანა მაჩიტაძის თქმით, ფინალური შეხვედრა აპრილში გაიმართება გამარჯვებული სკოლა სიგელსა და საჩუქრებს მიიღებს:,,ეს არის კონკურსი და ამ ღონისძიების გარდა მსგავსი სახის აქტივობა კიდევ გვექნება. ის გუნდები, რომლებიც გაიმარჯვებენ, გურჯაანში მუნიციპალიტეტის მასშტაბით ჩატარებულ ფინალურ ღონისძიებაში მიიღებენ მონაწილეობას".

კახეთი. სიღნაღის რაიონში, არასამთავრობო ორგანიზაციები „სამოქალაქო ინიციატივა" (Civic Initiative" და ნუკრიანის სათემო კავშირი „ნუკრიანი" ახორცილებენ ერთობლივ, კოალიციაურ პროექტს - „ინტერენტ-სამოქალაქო ჩართულობა თვითმმართველობის გადაწყვეტილების პროცესში". პროექტის მიზანია შეიქმნას სოფლის მოსახლეობის თანამონაწილეობისა და სამოქალაქო ჩართულობის კარგი პრაქტიკა და მექანიზმი, რომელიც ხელს შეუწყობს მოქალაქეთა ჩართულობის გაზრდა ადგილზე გადაწყვეტილების მიღების პროცესში და მუნიციპალიტეტის წარმომადგენლების ანგარიშვალდებულების გაზრდას. 26 თებერვალს პროქტის ფარგლებში შედგა  შეხვედრა სიღანღის რაიონის სხვადსხვა სოფლებიდან  შერჩეულ ახალგაზრდებთან და შეიქმნა სამუშაო ჯგუფები სოფლების მიხედვით, ახალგაზრდებმა მიიღეს ინფორმაცია მათი როლის, ჩართულობის მნიშვნელობაზე და პროექტის მოსალოდნელ შედეგებზე. ამასთან, ახალგაზრდებს ჩაუტარდათ ტრეინინგი თემაზე  „სამოქალქო მონიტორინგი და მოქალქეთა ინტერესთა დაცვა" პროექტის ფინანსური მხარდამჭერია ფონდი „ღია საზოგადოება საქართველო".

კახეთი.კახეთის სამოქალაქო ლიგა ანხორციელებს ნიდერლანდების მრავალპარტიული დემოკრატიის ინსტიტუტის მიერ დაფინანსებულ პროექტს „ახმეტის ახალგაზრდა პოლიტიკოს ლიდერთა სკოლა". პროექტი მიზნად ისახავს ახალაგაზრდებში ცნობიერების ამაღლებას დემოკრატიული ღირებულეების შესახებ, სხვადასხვა ეთნიკური წარმოშობის ახალგაზრდის ჩართვას ქვეყანაში მიმდინარე საზოგადებრივ-პოლიტიკურ ცხოვრებაში განათლებისა და სამოქალაქო აქტივობის გზით. პროექტის ფარგლებში 16-დან 26 წლამდე ახალგაზრდებს უტარდებათ ტრენინგები და პრაქტიკული მეცადინეობა პროექტის დიზაინი და მართვაზე, ადგილობრივი თვითმმართველობა და ადვოკატირებასა და ლიდერობა და საჯარო გამოსვლის უნარებზე. თინა ხანაჯალიაშვილი, პროექტის კოორდინატორი: ,,პროექტის ფარგლებში ახალგაზრდებმა ჩამოაყალიბეს ქსელი, შექმნეს საინიცაიტივო ჯგუფი „ახალგაზრდა პოლიტიკოსები ინტეგრაციისთვის", რომელიც გეგმავს სხვადასხვა საინტერესო ინიციატივის განხორციელებას, როგორც ახმეტის, ასევე თელავის მუნიცპალიტეტში ახალგაზრდებთან თანამშრომლობით".

იმერეთი.  26 თებერვალს, ქუთაისის  ახალგაზრდული ცენტრის წევრებისათვის მოეწყო ფილმის ჩვენება–დისკუსია. ნაჩვენები იყო ზაზა რუსაძის დოკუმენტური ფილმი „ბანდიტები – თვითმფრინავის ბიჭები", რომელიც მოგვითხრობს 1983 წლის 18 ნოემბერს თბილისში შვიდი მეგობრის მიერ საბჭოთა სამგზავრო თვითმფრინავის გატაცების შესახებ. გამტაცებლები დასავლეთში გაქცევაზე ოცნებობდნენ. ეს ამბავი ქართული ისტორიის ტრაგიკული ფურცელია და დღემდე საიდუმლოებით არის მოცული.  ფილმის ჩვენების შემდეგ გაიმართა დისკუსია. ფილმის ჩვენება ორგანიზებული იქნა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: kedec.ge

კახეთი. 23 თებერვალს „ნუკრიანმა" გამართა პროექტის – „ჩვენ ვსწავლობთ"–პრეზენტაცია. პროექტის მიზანია სოფელ ნუკრიანის კულტურის სახლის ბაზაზე სათემო განათლების ცენტრის შექმნა და სათემო განათლების ცენტრის მეშვეობით სიღნაღის მუნიციპალიტეტში მცხოვრები ახალგაზრდებისთვის არაფორმალური კულტურულ–საგანმანათლებლო პროგრამების შეთავაზება. 4 თვიან სასწავლო პროგრამაში მონაწილეობას მიიღებს 20 ახალგაზრდა მუნიციპალიტეტის სხვადასხვა სოფლებიდან. პროექტი დაფინანსებულია ფონდი „ღია საზოგადოება საქართველოს" მიერ. წყარო:ორგანიზაციის გვერდი სოციალურ ქსელში

აჭარა.ასოციაცია „ღირსეული სიბერის" ორგანიზებით პროექტის „ხანდაზმულთა სოციალური ცენტრის" ფარგლებში სემინარი „მოხალისეობის არსი და განვითარების პერსპექტივები" გაიმართა. სემინარი ემსახურებოდა ახალგაზრდების ინფორმირულობის დონის ამაღლებას და მოხალისეობრივ საქმიანობაში მათი აქტიური მონაწილეობის ხელშეწყობას. პროექტის ფარგლებში შექმნილია მოხალისეთა ჯგუფები, რომლებიც მარტოხელა მოხუცებს საყოფაცხოვრებო და ფსიქიოლოგიურ დახმარებას უწევენ, ჩართული არიან საქველმოქმედო აქციებში.სემინარში მონაწილეობას ქობულეთის მუნიციპალიტეტის მე 2, 3, 6 საჯარო სკოლების მოსწავლეები იღებდნენ. წყარო:ორგანიზაციის გვერდი სოციალურ ქსელში

იმერეთი. ქუთაისის განათლების განვითარების და დასაქმების ცენტრის პროექტის – „ძლიერი სამოქალაქო საზოგადოება - გზა ევროინტეგრაციისკენ" – ფარგლებში დეპუტატმა ომარ ნიშნიანიძემ ახალგაზრდებს თანამედროვე გამოწვევებზე ესაუბრა. შეხვედრა, 22 თებერვალს,  საქართველოს სახალხო დამცველის ქუთაისის ოფისში გაიმართა. სტუდენტებმა შეხვედრაზე საკუთარი მოსაზრებები დააფიქსირეს, რაც დეპუტატისთვის საინტერესო აღმოჩნდა. როგორც ომარ ნიშნიანიძემ აღნიშნა, სტუდენტების მხრიდან კრიტიკული ხედვები ქვეყნის მომავლისთვის ერთ-ერთი მნიშვნელოვანი მომენტია. შეხვედრაზე  საქართველოს საგარეო პოლიტიკა განიხილეს და ევროინტეგრაციისკენ სვლის აუცილებლობას კიდევ ერთხელ გაუსვეს ხაზი. პროექტის მიზანი „აღმოსავლეთ პარტნიორობის" მიზნების მიღწევის პროცესსა და საქართველოს ეროვნული პლატფორმის მუშაობაში, რეგიონული ორგანიზაციების ჩართულობის გაზრდა და მათი სრულფასოვანი მონაწილეობის ხელშეწყობაა. პროექტის ფინანსურ მხარდაჭერას უზრუნველყოფს ფონდი „ღია საზოგადოება - საქართველო".

იმერეთი. 21 თებერვალს ქუთაისში სამოქალაქო განათლებისა და პედაგოგთა გადამზადების პროგრამის პარტნიორი სკოლის მოსწავლეებისთვის ფოტო სკოლის მორიგი შეხვედრა ჩატარდა. შეხვედრაზე მსმენელებმა მიიღეს ინფორმაცია მხატვრული ფოტოს, პორტრეტის, ახალი ამბის და ფარული გადაღების შესახებ. ფოტო სკოლის მსმენელები მონაწილეობას მიიღებენ ქუთაისის განათლების განვითარების და დასაქმების ცენტრის მიერ პროგრამის ფარგლებში გამოცხადებულ ფოტო –კონკურსში. წყარო: ორგანიზაციის გვერდი სოციალურ ქსელში

თბილისი.  საქართველოს სოციალურ მუშაკთა ასოციაცია იწვევს მოხალისეებს ,რომლებსაც შეუძლიათ დაეხმარნონ ბავშვებს სწავლაში. შემდეგი მიმართულებებით: ქართული ენა, მათემატიკა (IV კლასის პროგრამა), ინგლისური (VI-VIII კლასის პროგრამა), ქიმია-ფიზიკა (VI-VIII კლასის პროგრამა). ასევე, რუსულის ენის მცოდნე მოხალისე, რომელიც დახმარება V კლასელ ბავშვს ქართული სასკოლო პროგრამის დაძლევაში. მოხალისეობრივი საქმიანობა განხორციელდება გლდანი-ნაძალადევის რაიონში და იგი მოიცავს მიმდინარე სემესტრს. წყარო:ორგანიზაციის გვერდი სოციალურ ქსელში

კახეთი. ორგანიზაცია „ლელი" სამოქალაქო ინსტიტუციონალიზმის განვითარების ფონდის ხელშეწყობით ახორციელებს პროექტს „პიროვნული განვითარება ახალგაზრდებისთვის".   პროექტის მიზანია საქართველოში მცხოვრები ქართველი, ოსი და აზერბაიჯანელი ახალგაზრდების პიროვნული განვითარება, დამეგობრება და ჩართვა-ინტეგრაცია საზოგადოებრივ ცხოვრებაში. პროექტის ფარგლებში ახალგაზრდებისთვის ჩატარდება ტრენინგები და კომპიუტერის  ტექნიკური უნარ-ჩვევის შემსწავლელი  სასწავლო კურსები. პროექტში ჩაერთვება  ლაგოდეხის მუნიციპალიტეტში მცხოვრები ორმოცდაათი  ქართველი, ოსი და აზერბაიჯანელი ახალგაზრდა. წყარო:leliblog.weebly.com 

იმერეთი. 20 თებერვალს, ქუთაისის ახალგაზრდული ცენტრის წევრებმა ქუთაისის მე-40 საჯარო სკოლის 9-10-11 კლასის მოსწავლეებისათვის ჩაატარეს თანატოლთა განათლების მორიგი ტრენინგი. იგი გაიმართა დებატებისა და საჯარო გამოსვლების ტექნიკების თემატიკაზე. მონაწილეებმა შეისწავლეს დებატების ტექნიკები. განხილული იქნა ისეთი მნიშვნელოვანი საკითხები, როგორიცაა: სწორი არგუმენტაცია, მტკიცებითი პოზიცია, უარმყოფელი პოზიცია, ჯვარედინი დაკითხვა, მომხსენებელთა მოვალეობები, რეზოლუციის შერჩევა. მოსწავლეებს საშუალება მიეცათ გაეკეთებინათ საჩვენებელი დებატები.  თანატოლთა განათლების ტრენინგები ორგანიზებული იქნა „საქართველოში ეროვნული ინტეგრაციის გაძლიერების" პროექტის (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: kedec.ge

კახეთი.  23 თებერვალს, 12 საათზე სათემო კავშირი ,,ნუკრიანი" პროექტის  –,,ჩვენ ვსწავლობთ" – პრეზენტაციას გამართავს.  პროექტის მიზანია: სოფელ ნუკრიანის კულტურის სახლის/ბიბლიოთეკის ბაზაზე - სათემო განათლების ცენტრის შექმნა და სათემო განათლების ცენტრის მეშვეობით სიღნაღის მუნიციპალიტეტში მცხოვრები ახალგაზრდებისათვის არაფორმალური კულტურულ-საგანმანათლებლო პროგრამების შეთავაზება.  პროექტი დაფინანსებულია ,,ფონდ ღია საზოგადოება საქართველოს" მიერ.  წყარო:ორგანიზაციის გვერდი სოციალურ ქსელში

აჭარა.19 თებერვალს, არასამათვარობო ორგანიზაცია ბორჯღალის ოფისში, პროექტის  „სოციალური საწარმო: ბუღალტრული და ვებ–დიზაინის ცენტრის" ფარგლებში გადამზადებულმა დევნილმა ახალგაზრდებმა თავიანთ თანატოლებს, ასევე დევნილი ახალგაზრდებს ტრენინგი ჩაუტარეს. ტრენინგები ჩატარდა შემდეგ თემაზე – „ბლოგის შექმნა და მართვა".  აღნიშნულ ტრენინგს პროექტის ძირითადიბენეფიციარების გარდა ბორჯღალის ბაზაზე არსებული მოხალისეთა კლუბის „ბათუსის"  წევრებიც ესწრებოდნენ. ახალგაზრდებმა ორდღიანი ტრენინგ–კურსის საფუძველზე ბლოგის შექმნა და მისი მართვა შეისწავლეს.პროექტი – „სოციალური საწარმო: ბუღალტრული და ვებ–დიზაინის ცენტრი" დაფინანსებულია ფონდი ღია საზოგადოება საქართველოს მიერ.

გურია. „ახალგაზრდა პედაგოგთა კავშირის" ოფისში ორგანიზაციის პარტნიორი სკოლების მოსწავლეთა თვითმმართველობების წარმომადგენლებისთვის პროექტების წერის შესახებ ტრენინგი ჩატარდა. ტრენინგზე დეტალურად იქნა განხილული პროექტზე მუშაობის ეტაპები: თუ როგორ უნდა გამოვავლინდეს პრიორიტეტული პრობლემა, როგორ უნდა მოხდეს კონკრეტული იდეების დამუშავება და პროექტის ძირითადი მონახაზის ჩამოყალიბება. მოზარდებმა, ტრენინგის მიმდინარეობის დროს შეიმუშავეს რამდენიმე საპროექტო იდეა, რომელიც პროექტის სახით მომზადდება და „ახალგაზრდა პედაგოგთა კავშირის" მიკროგრანტების კონკურსზე იქნება წარდგენილი. კონკურსი პარტნიორი სკოლების მოსწავლეთა თვითმმართველობებისთვის ორგანიზაციამ მიმდინარე თვეში გამოაცხადა.

სამეგრელო.„არასრულწლოვანი და დანაშაული" – ამ თემაზე ისაუბრეს, 19 თებერვალს შინაგან საქმეთა სამინისტროს სამეგრელო ზემო–სვანეთის მთავარ სამმართველოში პოლიციისა და არასამთავრობო ორგანიზაციების წარმომადგენლებმა. მთავარი სამმართველოს უფროსის მოადგილის კობა ცერცვაძის განცხადებით, არასრულწლოვნებში დანაშაულის პრევენციის მიზნით, პოლიციის თანამშრომლებთან ერთად უნდა გაიზარდოს საზოგადოების ჩართულობა პრევენციულ ღონისძიებებში. ასოციაცია „ათინათის" ფსიქოლოგი მაკა გოგოხია კი მიიჩნევს, რომ უფრო  კომპლექსური მუშაობაა საჭირო არასრულწლოვნებში დანაშაულის შემცირების მიზნით. „მსგავსი შეხვედრების ჩატარება აუცლებელია, თუმცა საჭიროა  ამ მიმართულებით მეტი გააკეთოს ყველამ. მცირედი რამის გაკთებაც კი შეიძლება მნიშვნელოვანი აღმოჩნდეს ამ მოზარდებისთვის", –განაცხადა ფსიქოლოგმა.

თბილისი.  „თავისუფლების კლუბი" აცხადებს მიღებას თავისუფლების ბანაკში, თემაზე : „თავისუფლების იდეა დღეს". ექვსი დღის განმავლობაში მონაწილეები იმუშავებენ ისეთ თემებზე როგორიცაა სამოქალაქო განათლება და მისი საჭიროება, ადამიანის ფუნდემენტური უფლებები, განათლების მნიშვნელობა დღევანდელ საზოგადოებაში. ინფორმაციას მიიღებენ საერთაშორისო ორგანიზაციებისა და მათი მნიშვნელობის შესახებ. გარდა ლექციებისა თავისუფლების კლუბი მონაწილეებს სთავაზობს დისკუსიებს, დებატებს და შემეცნებით–გასართობ თამაშებს. სრულად წყარო:ორგანიზაციის გვერდი სოციალურ ქსელში

ქვემო ქართლი.  სიქა ინგლისური ენის შესწავლის ხელმისაწვდომობის სასტიპენდიო პროგრამას აცხადებს. მონაწილეობის მიღება შეუძლიათ 13–16 წლამდე მოზარდებს სოციალურად დაუცველი და შეჭირვებული ოჯახებიდან. შერჩეული 25 მოსწავლე ენის შესწავლის ინტენსიურ პროგრამას ორი წლის განმავლობაში გაივლის. პროგრამა ხორციელდება ორგანიზაცია PH International-თანაპარტნიორობით.  აპლიკაციის მიღების ბოლო ვადა - 28 თებერვალი. წყარო:ორგანიზაციის გვერდი სოციალურ ქსელში

შიდა ქართლი. თავისუფლების კლუბის წარმომადგენლები 16 თებერვალს გორის რაიონის სოფლებში – დიცსა და მერეთში – სკოლის მოსწავლეებს შეხვდენენ. შეხვედრის მიზანი კონფლიქტის ზონასთან ახლოს მცხოვრები ახალგაზრდებისთვის კლუბის მიზნების გაცნობა და მისი ფასეულობებით მოსწავლეების დაინტერესება იყო. თავისუფლების კლუბის წევრები დიცსა და მერეთში მომავალი ექვსი თვის მანძილზე, კვირაში ერთხელ გამართავენ აქტუალურ თემებზე საჯარო ლექციებს და სხვადასხვა ტიპის შეხვედრებს. სრულად წყარო:clubofliberty.org 

ქვემო ქართლი. სიქა VIII-XII კლასის მოსწავლეებს დებატების კლუბში იწვევს. მონაწილეები ისწავლიან დებატების ხელოვნებას და ინტერნეტის გამოყენებას დებატებისთვის საჭირო ინფორმაციის მოსაძიებლად. სამუშაო პროგრამა დებატების ტურნირებში მონაწილეობას მოიცავს და ახალგაზრდებს საერთაშორისო ბანაკებში მონაწილეობის საშუალებას აძლევს.  განაცხადის შევსების ბოლო ვადაა 1 მარტი, 20:00 საათი. სრულად წყარო:ორგანიზაციის გვერდი სოციალურ ქსელში

იმერეთი. სიკეთის საერთაშორისო დღეს მიუძღვნა სამეცნიერო–ინტელექტუალურმა კლუბმა „თაობათა დიალოგმა" ქუთაისის ცენტრალურ ბაღში გამართული აქცია. „სიკეთის ეპიდემია" – ასეთი სახელწოდებით ჩატარებული ღონისძიების ფარგლებში მოეწყო მსვლელობა, რომლის დროსაც აქციის მონაწილეებმა გამვლელებს ტკბილეული და ფურცლებზე გადატანილი „კეთილი სურვილები" დაურიგეს. აქციის ბოლოს კი სიმობოლურად „სიკეთის ხე" დარგეს. წყარო: ორგანიზაციის გვერდი სოციალურ ქსელში

ქვემო ქართლი. 16 თებერვალს სიქას კლუბის –  „უნარები პროფესიული წარმატებისთვის" – წევრების პირველი შეხვედრა გაიმართა. შეხვედრა გაცნობითი ხასიათის იყო, ერთმანეთის გარდა მათ მიიღეს უფრო მეტი ინფორმაცია სიქას აქტივობებისა და პროექტების შესახებ. კლუბში მონაწილეობას იღებს 20–მდე ახალგაზრდა თბილისიდან და რუსთავიდან. წყარო: ორგანიზაციის გვერდი სოციალურ ქსელში

იმერეთი. 15 თებერვალს, ქუთაისში, დემოკრატიული ჩართულობის ცენტრში „ახალგაზრდა ლიდერთა კლუბის" მიერ ერთი წლის განმავლობაში ჩატარებული ღონისძიებების პრეზენტაცია გაიმართა. კლუბი არასამთავრობო ორგანიზაცია პედაგოგთა კავშირის „განათლება და სამყაროს" ბაზაზეა შექმნილი. პრეზენტაციაზე კლუბის ლიდერებმა იმ ღონისძიებების შედეგები გააცნეს საზოგადოებას, რომლებშიც მონაწილეობას იღებდნენ. საუბარი იყო საქველმოქმედო აქციებზე, ახალგაზრდული მშვიდობის ბანაკებსა და წიგნის დღისადმი მიძღვნილ ღონისძიებებზე. „ახალგაზრდა ლიდერთა კლუბში" რამდენიმე სახის გაცვლითი პროგრამები ხორციელდება და მათი მიზანი სხვადასხვა ღონისძიებებში უფრო მეტი ახალგაზრდების ჩართვაა.