თბილისი. აღმოსავლეთ–დასავლეთის მართვის ინსტიტუტის G-PAC–ის ანაზღაურებადი სტაჟირების პროგრამა 15 თებერვალს 13:00 საათიდან 17:00 საათამდე ონლაინ კონსულტაციას გამართავს. კონსულტაციის მისაღებად კითხვების გაგზავნა შეუძლიათ  მაგისტრატურის სტუდენტებს ან ახალ კურსდამთავრებულებს, რომლებსაც სურთ შეიძინონ პრაქტიკული გამოცდილება პოლიტიკის ანალიზისა და ადვოკატირების კამპანიის წარმოებაში. Facebook–ის გვერდზე ან Skype–ით კონსულტაციის მიღება ასევე შეუძლიათ არასამთავრობო ორგანიზაციის ან საჯარო სტრუქტურის წარმომადგენლებს, რომლებსაც სურთ აიყვანონ EWMI G-PAC–ის მიერ დაფინანსებული სტაჟიორი. სრულად წყარო:ორგანიზაციის გვერდი სოციალურ ქსელში

სამცხე–ჯავახეთი.14თებერვალს არასამთავრობო ორგანიზაციის დემოკრატ მესხთა კავშირის ახალგაზრდულმა ჯგუფმა ახალციხის ცენტრალურ პარკში ვალენტინობის დღისადმი მიძღვნილი ღონისძიება მოაწყო. ახალგაზრდები ქალაქის ცენტრალურ პარკში დილიდან შეიკრიბნენ. მათ ფერადი გულებითა და საჰაერო ბურთებით მორთეს ქალაქის ცენტრალური პარკი. კედლებზე გააკრეს პლაკატები და გააკეთეს სიყვარულისადმი მიძღვნილი წარწერები. მსგავსი აქსესუარები ახალგაზრდებმა პარკში გამვლელებსაც უსახსოვრეს.

სამცხე–ჯავახეთი. სამოქალაქო განათლებისა და პედაგოდთა გადამზადების პროგრამის ფარგლებში, ადიგენის მუნიციპალიტეტის სოფელ დიდი სმადის საჯარო სკოლაში  შიდა სასკოლო დისკუსია ჩატარდა თემაზე: „ქართული ხალხური ფოლკლორი თუ თანამედროვე მუსიკა". დისკუსიის დაწყებამდე მოსწავლეებს გააცნეს დებატების წარმართვის და მასში მონაწილეობის ძირითადი პრინციპები, რაც მოზარდებმა გამოიყენეს კიდეც მსჯელობისას. დებატებში მონაწილეობა უფროსკლასელებმა მიიღეს. მოსწავლეებმა გამოთქვეს აზრი ფოლკლორისა და თანამედროვე მუსიკის შესახებ.  ასევე შეეხნენ თემას,   რამდენადაა დაცული  ქართული სიმღერების საავტორო უფლებები. ბოლოს თავადვე შეაჯამეს დისკუსიის შედეგები.

სამეგრელო. ასოციაცია „ათინათში" სამოქალაქო განათლებისა და პედაგოგთა გადამზადების პროგრამის ფარგლებში გაიმართა ვიდეორგოლის ჩვენება: „უსაფრთხო ინტერნეტი – სასარგებლო ინფორმაციის კიდობანია". კლუბის წევრებმა ზუგდიდში ცნობილ ადამიანებთან ჩაწერეს მოკლე ინტერვიუები, სადაც ისინი ინტერნეტის უსარფხოების შესახებ მსჯელობენ. ვიდეორგოლის ჩვენების შემდეგ გაიმართა დისკუსია ინტერნეტის უსარფრთხოების შესახებ. დისკუსიისა და ვიდეორგოლის მომზადების მიზანი იყო საზოგადოებაში უსაფრთხო ინტერნეტის პოპულარიზაცია და ინტერნეტის მომხმარებლის ვალდებულების და პასუხისმგებლობის შესახებ ინფორმაციის გავრცელება. წყარო: civics.ge ვიდეორგოლი – უსაფრთხო ინტერნეტი – სასარგებლო ინფორმაციის კიდობანია

თბილისი. თავისუფალი დებატების ლიგა სტუდენტებს იწვევს საქართველოს ჩემპიონატზე პოლიტიკური ფორმატის დებატებში. მონაწილეობის მსურველებს შეუძლიათ როგორც გუნდური, ასევე ინდივიდუალური აპლიკაციის გაგზავნა.  აპლიკაციების მიღების ბოლო ვადაა 25 თებერვალი სრულად წყარო: ორგანიზაციის გვერდი სოციალურ ქსელში

სამცხე–ჯავახეთი.სამოქალაქო განთლებისა და პედაგოგთა გადამზადების პროგრამის ფარგლებში ქალაქ ბორჯომის N 3 საჯარო სკოლაში  გაიმართა კონფერენცია თემაზე: „დავითიდან თამარამდე". კონფერენციის ინიციატორები ადიგენის მუნიციპალიტეტის სოფელ არალის საჯარო სკოლის მოსწავლეები იყვნენ. კონფერენციაში საჯარო 8 სკოლის სამოქალაქო კლუბის წევრებმა მიიღეს მონაწილეობა. მოეწყო მოსწავლეთა ნამუშევრების პრეზენტაცია, რომლიდანაც სამი საუკეთესო ნამუშევარი გამოვლინდა. გამარჯვებული  სკოლების სამოქალაქო კლუბებს  წიგნიერების დონის ამაღლების მიზნით, სამახსოვროდ  საკითხავი ლიტერეტურა, ხოლო  კონფერენციაში მონაწილეობისათვის ყველა პრეზენტატორს  სერთიფიკატი გადაეცა. კონფერენცია მიზნად ისახავდა საკლუბო ინიციატივების ხელშეწყობას და პროგრამაში ჩართული სხვადასხვა სამოქალაქო კლუბების ურთიერთგაცნობასა და  დამეგობრებას.

თბილისი.  სიქას ახალგაზრდა ტრენერებმა თსუ–ს სტუდენტებისთვის კარლ–პოპერის ფორმატის დებატების შესახებ სემინარი 9 თებერვალს გამართეს. 25 მონაწილე ფორმალური დებატების სხვადასხვა სახეობას გაეცნო და კარლ–პოპერის ფორმატი დეტალურად განიხილა. ღონისძიების ფარგლებში საჩვენებელი დემო–დებატი მოეწყო. სემინარი  „ელსას - ევროპის იურისტ სტუდენტთა ასოციაცია თბილისის" პროექტის ფარგლებში მოეწყო, რომელიც თბილისის უნივერსიტეტებს შორის დებატების ტურნირის მოწყობას ითვალისწინებს. 

იმერეთი. 8 თებერვალს, სამოქალაქო განათლებისა და პედაგოგთა გადამზადების პროგრამის პარტნიორი სკოლების მოსწავლებისათვის ფოტო სკოლის მორიგი შეხვედრა ჩატარდა.  ფოტო სკოლა ქუთაისის განათლების განვითარების და დასაქმების ცენტრტში №7 საჯარო სკოლის სამოქალაქო კლუბის ინიციატივით დაარსდა, რომელშიც გაერთიანდა ქუთაისის პროგრამის სამიზნე სკოლების ფოტოგრაფიით დაინტერესებული მოსწავლეები. შეხვედრაზე მსმენელებმა მიიღეს ინფორმაცია მხატვრული ფოტოს, პორტრეტის, ახალი ამბის და ფარული გადაღების შესახებ. ასევე გაეცვნენ ფოტოგრაფიის ისტორიას და ცნობილი ფოტოგრაფების ცხოვრებას.ფოტო სკოლის მსმენელები მონაწილეობას მიიღებენ ქუთაისის განათლების განვითარების და დასაქმების ცენტრის მიერ პროგრამის ფარგლებში გამოცხადებულ ფოტო კონკურსში. წყარო: kedec.ge

იმერეთი.ქუთაისის ახალგაზრდული ცენტრის წევრებისათვის დისკუსია „ათასწლეულის განვითარების მიზნები საქართველოში" 8 თებერვალს ჩატარდა. დისკუსიაზე მსმენელებს მიეწოდათ ინფორმაცია თუ რა უნდა იქნას მიღწეული 2015 წლისათვის და განხილული იქნა ათასწლეულის 8 მიზანი, რომელთა განხორციელების ვალდებულება საქართველომ ათასწლეულის დეკლარაციაზე ხელის მოწერით აიღო. დისკუსია „საქართველოში ეროვნული ინტეგრაციის გაძლიერების პროექტის" ფარგლებში ჩატარდა. წყარო: ორგანიზაციის გვერდი სოციალურ ქსელში

ქვემო ქართლი. სიქა 17–დან 25 წლამდე ნებისმიერ ლიდერობით და დებატებით დაინტერესებულ ახალგაზრდას კლუბში „უნარები პროფესიული წარმატებისთვის"  იწვევს.  კლუბის პროგრამის ფარგლებში მონაწილეები დებატების ხელოვნებას, ანალიტიკურ და შემოქმედებით აზროვნებას, აქტივობების დაგეგმვასა და განხორციელებას ისწავლიან.  განაცხადის მიღების ბოლო ვადაა 12 თებერვალი.  სრულად

იმერეთი. 6 თებერვალს, პროექტის – „აქტიური სამოქალაქო კლუბი დემოკრატიული საზოგადოების საწინდარია" – ფარგლებში ვანის მუნიციპალიტეტის სოფელ ქვედა გორას სკოლაში პლაკატები და ფლაერები დაამზადეს. დამაზდებული მასალები თვითმმართველობების უფლებებსა და მოვალეობებს ასახავდა. მოსწავლეებმა ფლაერები და პლაკატები სკოლის მოსწავლეებს და თანამშრომლებს, ასევე თემის მაცხოვრებლებს დაურიგეს. აქტივობა სამოქალაქო განათლებისა და პედაგოგთა გადამზადების მცირე გრანტების კონკურსის ფარგლებში განხორციელდა. წყარო: kedec.ge

იმერეთი. 7 თებერვალს ქუთაისის მე–40 საჯარო სკოლის სამოქალაქო კლუბის ინიციატივით მოეწყო მოკლემეტრაჟიანი ფილმების ჩვენება. ნაჩვენები იყო კრის ნოლანის „მფრინავი ხოჭო" და გადაცემის „ლიტერატურული უწონადობის" მიერ მომზადებული ფილმი. ჩვენების შემდეგ მოეწყო ფილმების განხილვა და დისკუსია.ღონისძიება მცირე საგრანტო პროექტის „ახალგაზრდები პასიურობის წინააღმდეგ" – ფარგლებში განხორციელდა. წყარო: kedec.ge

თბილისი.  ახალგაზრდა დიპლომატთა კლუბი 8–10 თებერვალს პარლამენტის მოდელირების  ზამთრის სესიას გამართავს. პროექტში მონაწილე 16–დან 22 წლამდე ახალგაზრდები ღონისძიების ფარგლებში საქართველოს პარლამენტის მუშაობის სპეციფიკას გაეცნობიან. ახალგაზრდებს საშუალება ექნებათ გახდნენ მოვლენათა მონაწილენი და თავად გადაწყვიტონ ქვეყნის წინაშე არსებული პრობლემები. წყარო: ორგანიზაციის გვერდი სოციალურ ქსელში

კახეთი. გურჯაანში, ,,მედია ცენტრი კახეთის’’ ოფისში, ფილმის - ,,ცხოვრება გრძელდება’’ ჩვენება გაიმართა. ფილმის ჩვენებას მოსწავლეები, დაინტერესებული მოქალაქეები და არასამთავარობო სექტორის წარმომადგენლები ესწრებოდნენ. მედია ცენტრის ახალგაზრდული პროექტის კოორდინატორის, ილია საყვარლიშვილის თქმით, მსგავსი სახის ღონისძიებები ხელს უწყობს ახალგაზრდების გააქტიურებას: ,,ორგანიზაცია დიდ ყურადღებას უთმობს  კულტურულ–საგანმანათლებლო ღონისძიებებს, მათ შორის ფილმების ჩვენებას." ფილმის ჩვენების შემდეგ გაიმართა დისკუსია. არასამთავრობო ორგანიზაცია – დღის ცენტრის ხელმძღვანელის, გულიკო როსტოშვილის თქმით  მსგავსი ტიპის ფილმების ჩვენება და დისკუსიები უფრო ხშირად უნდა იმართებოდეს: ,,შეზღუდული შესაძლებლოებების მქონე მოზარდები და სხვა ბავშვები უფრო ხშირად უნდა ხვდებოდნენ ერთმანეთს და თუნდაც ერთად ნახულობდნენ ასეთი სახის ფილმებს და შემდეგ იმსჯელონ რა პრობლემებია ამ კუთხით მათ ქალაქში. ეს, მათ საზოგადოებასთან ინტეგრაციაში დაეხმარება".

თბილისი. საქართველოს ახალგაზრდა დიპლომატთა კლუბი და თსუ სოციალურ და პოლიტიკურ მეცნიერებათა ფაკულტეტის საერთაშორისო ურთიერთობების მიმართულება აცხადებს ნაშრომების მიღებას სტუდენტური კონფერენციისთვის. მონაწილეებს საშუალება აქვთ გააგზავნონ ნაშრომი მათთვის საინტერესო საკითხზე საერთაშორისო ურთიერთობების დისციპლინის ფარგლებში.  ნაშრომის მიღების ბოლო ვადაა 24 თებერვალი 23:59 საათი. სრულად: http://www.facebook.com/events/464304523623207/?ref=22 წყარო: ორგანიზაციის გვერდი სოციალურ ქსელში

ქვემო ქართლი. საგანმანათლებლო ინციიატივების ქართული ასოციაციის – სიქას მიერ შექმნილი კლუბი „უნარები პროფესიული წარმატებისთვის" იწვევს ლიდერობით და დებატებით დაინტერესებულ 17–25 წლის ახალგაზრდებს. კლუბში ტრენინგები თებერვალში დაიწყება და სამი თვის მანძილზე მსმენელები დაეუფლებიან დებატების უნარ–ჩვევების, არგუმენტირებულ მსჯელობას, წერის კულტურას, ანალიტიკურ აზროვნებას, კონფლიქტების მართვის ხელოვნებას და ა.შ. დაინტერესებულ ახალგაზრდებს დეტალური ინფორმაციის გაცნობა შეუძლიათ სოციალურ ქსელში ორგანიზაციის გვერდზე. წყარო: ორგანიზაციის გვერდი სოციალურ ქსელში

კახეთი.საზოგადოებრივი ორგანიზაციების „სამოქალაქო ინიციატივისა" და „ლელის" ერთობლივი ინიციატივით, სოფელ ლელიანში მცხოვრებ აბიტურიენტებს შესაძლებლობა მიეცათ ერთი დღე სტუდენტური ცხოვრებით ეცხოვრათ. 2 თებერვალს სამოქალაქო ინიციატივამ აბიტურიენტებს თბილისში უმასპინძლა და დღის პირველ ნახევარში ისინი ილიას უნივერსიტეტში ლექციებს დაესწრნენ, რათა უკეთ გარკვეულიყვნენ სწავლების ხარისხსა და სპეციალობების სპეციფიკაში. დღის მეორე ნახევარში აბიტურიენტები სამოქალაქო ინიციატივებისა და ფონდ „მომავლის ღიმილის" შეხვედრას დაესწრნენ, სადაც მონაწილეობა მიიღეს აქტივობების დაგეგმვაში. ინიციატივის ავტორები მიიიჩნევენ, რომ ასეთი ღონისძიებები ხელს შეუწყობს აბიტურიენტების მოტივაციის ზრდას და საზოგადოებრივ ცხოვრებაში მათ აქტიურ ჩართვას. წყარო: facebook.com/samokalakoiniciativa

სამცხე–ჯავახეთი. 28 იანვარს, ,,სამოქალაქო განათლებისა და პედაგოგთა გადამზადების პროგრამის” ფარგლებში ახალციხის მუნიციპალიტეტის სოფელ კლდის საჯარო სკოლაში, ამავე სკოლის სამოქალაქო კლუბის წევრებმა ტრენინგი ჩაატარეს. ტრენინგის თემა იყო  ,,ჯანსაღი ცხოვრების წესი".  ტრენინგი სამ ეტაპად ჩატარდა. თანატოლგანმანათლებლებმა განიხილეს ახალგაზრდებში ალკოჰოლის, ნარკოტიკებისა და სიგარეტის გამოყენების  შემთხვევები და მისი სავალალო შედეგები.  გაიმართა დისკუსიაც, მოსწავლეებმა იმსჯელეს,  რა არის ცხოვრების ჯანსაღი ცხოვრების წესი, რა მავნე ჩვევები უყალიბდებათ ახალგაზრდებს,  რა პრობლემები ახლავს ამ ჩვევებს და რა უნდა გაკეთდეს იმისთვის, რომ მოზარდი არ მიეჯაჭვოს ალკოჰოლს, ნარკოტიკს და ნიკოტინს.

ქვემო ქართლი.  სიქა–ს ორგანიზებით სამოქალქო განათლებისა და პედაგოგთა გადამზადების პროგრამის შუალედური შემაჯამებელი ღონისძიება 30 იანვარს მარნეულის საკრებულოში გაიმართა.  ღონისძიებაზე, რომელსაც 120–ზე მეტი აქტიური კლუბის წევრი და მეურვე ესწრებოდა, რეგიონის ხუთმა კლუბმა  საკლუბო მუშაობის პრეზენტაცია გააკეთა. პროგრამის კოორდინატორმა ქვემო ქართლის რეგიონში მიმდინარე წლის განმავლობაში მიღწეული შედეგები განიხილა. წყარო: ორგანიზაციის გვერდი სოციალურ ქსელში

სამცხე–ჯავახეთი. 30 იანვარს, ახალციხის დემოკრატიული ჩართულობის ცენტრში, ზრდასრულთა განათლების ასოციაციის ორგანიზებით, ,,ინგლისური ენის შესწავლის ხელმისაწვდომობის (Accss)  სასტიპენდიო პროგრამის" კურსდამთავრებულებს სერთიფიკატები გადაეცათ და პროგრამის შედეგები შეჯამდა. აღნიშნული პროგრამა საქართველოს ოთხ ქალაქში ხორციელდება და მას  ამერიკის საელჩო აფინანსებს. პროგრამის სრული კურსი ახალციხეში 26 მოზარდმა გაიარა. პირველ კურსდამთავრებულებს სერთიფიკატები და საჩუქრები ამერიკის საელჩოს საზოგადოებასთან ურთიერთობის განყოფილების უფროსმა მაიკლ ტერნერმა გადასცა. ინგლისური ენის შესწავლის ხელმისაწვდომობის სასტიპენდიო პროგრამა მიზნად ისახავს ხელმისაწვდომი გახადოს ინგლისური ენის შესწავლა მოზარდებისთვის ეკონომიურად შეჭირვებული ოჯახებიდან. გარდა იმისა, რომ ბავშვები შეისწავლიან ინგლისურ ენას, ისინი ასევე ეზიარებიან ამერიკულ კულტურასა და წეს–ჩვეულებებს და განივითარებენ ლიდერის თვისებებს.

გურია. სამოქალაქო განათლებისა და პედაგოგთა გადამზადების პროგრამის ფარგლებში გურიის ახალგაზრდული რესურს ცენტრის ორგანიზებით, 29 იანვარს ოზურგეთის დემოკრატიული ჩართულობის ცენტრში, გაიმართა შუალედური კონფერენცია. მისი  მიზანი იყო 2012 წლის ივლის-დეკემბრის თვეებში პროგრამის ფარგლებში განხორციელებული ღონისძიებების გაცნობა ადგილობრივი საზოგადოებისათვის. ღონისძიებას ესწრებოდნენ პროგრამის მიზნობრივ სკოლებში მოქმედი სამოქალაქო კლუბებისა და საინიციატივო ჯგუფების წევრები, მხარდამჭერი პედაგოგები, საგანმანათლებლო რესურს ცენტრის წარმომადგენლები და მასმედია. ღონისძიებაზე დააჯილდოვეს პროგრამის სტაჟირების კომპონენტის მონაწილე 5 მოზარდის და მასპინძელი ორგანიზაციები.

სამცხე–ჯავახეთი. 26 იანვარს, სამოქალაქო განათლებისა და პედაგოგთა გადამზადების პროგრამის ფარგლებში, ახალციხის მუნიციპალიტეტის სხდომათა დარბაზში, მოეწყო შეხვედრა ახალციხის მუნიციპალიტეტის საკრებულოს თავმჯდომარესა და პროგრამაში ჩართული პარტნიორი სკოლების სამოქალაქო კლუბების ლიდერებს შორის. შეხვედრის მიზანს წარმოადგენდა  სამომავლო თანამშრომლობის გზების დასახვა. პროგრამისა და ჩატარებული საქმიანობების  შესახებ  ინფორმაცია საკრებულოს თავმჯდომარეს  ახალციხის ახალგაზრდული ცენტრის დირექტორმა გააცნო. მან ასევე სამოქალაქო კლუბის წევრებს მიაწოდა ინფორმაცია, ახალციხის მუნიციპალიტეტის საკრებულოს  ბიუჯეტში მცირე გრანტების თანადაფინანსებისათვის გათვალისწინებული თანხის  მიზნობრივ გამოყენებაზე. სამოქალაქო კლუბის ლიდერებმა საკრებულოს თავმჯდომარეს მუნიციპალიტეტში არსებული პრობლემები და  მათი გადაჭრის  საკუთარი ხედვა გაუზიარეს. ქალაქში პანდუსების არარსებობა, მაწანწალა ძაღლები,  დასუფთავება, სურსათის სანიტარიული ნორმების დაუცველობა, უმუშევრობა, არასრულწლოვნებზე სიგარეტისა და სასმელის თავისუფლად გაყიდვა,  ტოტალიზატორებსა და პოკერ კლუბებში არასრულწლოვნების შეშვებაზე კონტროლის არარსებობა – სწორედ ეს პრობლემები წამოიჭრა შეხვედრაზე. საკრებულოს თავმჯდომარემ  შესთავაზა ახალგაზრდებს  ამ პრობლემების გადასაჭრელად შეემუშავებინათ პროექტები  იმ თანხების ფარგლებში, რომელიც მუნიციპალიტეტის ბიუჯეტში გათვალისწინებულია ახალგაზრდული ინიციატივების თანადაფინანსების  მხარდასაჭერად.