თბილისი. საქართველოს სტრატეგიის და განვითარების ცენტრი გთავაზობთ Chatham House-ის პუბლიკაციას - “მითები და მცდარი მოსაზრებები რუსეთის შესახებ არსებულ განხილვებში”.  ნაშრომი დასავლურ მთავრობებსა და ინსტიტუტებს მოუწოდებს, გადააფასონ შეხედულებები და ვარაუდები რუსეთის შესახებ, რათა შეძლონ უფრო ეფექტური რეაგირება მზარდ გამოწვევებზე, რომლებსაც ეს ქვეყანა ქმნის. „ეფექტური“, ამ კონტექსტში, ნიშნავს რუსეთის მიერ საკუთარ საზღვრებს გარეთ გამოვლენილი აგრესიის შეკავებას და, საბოლოო ჯამში, რუსეთთან ნაკლებკონფლიქტური ურთიერთობის მიღწევას ისე, რომ არ შეილახოს სუვერენულობისა და უსაფრთხოების პრინციპები და ის ფასეულობები, რომლებიც ამ პრინციპებს უდევს საფუძვლად. სრულად...  წყარო: გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ ინტერვიუს კონფლიქტის თემაზე პოლიტიკური და აკადემიური მუშაობის გამოცდილების მქონე ექსპერტებთან - პაატა ზაქარეიშვილთან, ნათია ჭანკვეტაძესთან და გიორგი კანაშვილთან. „რამდენიმე დღის წინ პრემიერ-მინისტრმა და შერიგებისა და სამოქალაქო თანასწორობის საკითხებში სახელმწიფო მინისტრმა შერიგებისა და ნდობის აღდგენის მიმართულებებით გრძელვადიანი სტრატეგიული ხედვები წარმოადგინეს. ქართული ოცნების ხელისუფლებამ შერიგებისა და ნდობის აღდგენის პოლიტიკის მნიშვნელობა დისკურსულ დონეზე კიდევ უფრო მეტად გააძლიერა, თუმცა, ის ამ მიმართულებით მუშაობას წინა ხელისუფლების პარადიგმებით, ინსტრუმენტებით და მეთოდებით აგრძელებს და ამ მცდელობებს მნიშვნელოვანი პოლიტიკური და სოციალური შედეგები არ მოუტანია“. სრულად... წყარო: socialjustice.org.ge

თბილისი. სოციალური სამართლიანობის ცენტრი აქვეყნებს იურისტის და ილიას სახელმწიფო უნივერსიტეტის პროფესორის, თამარ გურჩიანის ვიდეოს, სადაც ის საქართველოში ეთნიკურ და რელიგიურ კონფლიქტებზე და ხელისუფლების რეაქციაზე საუბრობს. ის დმანისში სულ ახლახან მომხდარი კონფლიქტის მაგალითზე ხელისუფლების მხრიდან გადადგმულ ნაბიჯებსა და პოლიტიკას აანალიზებს.                                                 წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაციის მხარდაჭერით, თემაზე „ჟენევის საერთაშორისო მოლაპარაკებები - ქალები, მშვიდობა და უსაფრთხოება“ საქართველოს საგარეო საქმეთა სამინისტრომ სამოქალაქო სექტორის წარმომადგენლებთან საინფორმაციო შეხვედრა გამართა. „შეხვედრაზე ქალთა სამოქალაქო სექტორის წარმომადგენლებმა დევნილი და კონფლიქტის შედეგად დაზარალებული ქალების გამოწვევებზე ისაუბრეს და ჟენევის საერთაშორისო მოლაპარაკებების ქართველ მონაწილეებს კონკრეტული წინადადებები შესთავაზეს ინკლუზიური სამშვიდობო პროცესის ხელშეწყობასთან დაკავშირებით“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. რიონის ხეობაში განვითარებულ მოვლენებთან დაკავშირებით, საქართველოს სახალახო დამცველი განცხადებას ავრცელებს.  სახალხო დამცველი მოუწოდებს შინაგან საქმეთა სამინისტროს:  დაუყოვნებლივ მიეცეთ აქციის მონაწილეებს მათ მიერ შეთავაზებულ ალტერნატიულ ადგილზე შეკრების გაგრძელების შესაძლებლობა, ხოლო თუ აღნიშნულზე არსებობს დასაბუთებული უარის საფუძველი, აქციის გაგრძელებისთვის გამოეყოთ ალტერნატიული ადგილი სასურველთან ახლომდებარე ლოკაციაზე, რომლის ადგილმდებარეობაც არსს არ დაუკარგავს მოქალაქეთა თავშეყრის მიზანს  საზოგადოებას მიაწოდოს დეტალური ინფორმაცია სოფელ ნამოხვანთან მისასვლელი გზების გადაკეტვის მიზეზებისა და ხანგრძლივობის შესახებ  სახალხო დამცველის აპარატი აგრძელებს ბოლო პერიოდში და დღეს რიონის ხეობაში მიმდინარე მოვლენების და შესაძლო უფლებადარღვევების დეტალურ შესწავლას, რომლის შედეგებსაც დამატებით აცნობებს მოსახლეობას. სრულად...  წყარო: ორგანიზაციის ვებგვერდი

თბილისი. „უფლებები საქართველო“ მიიჩნევს, რომ ნამახვანში, “რიონის ხეობის მცველების” კარვების დაშლა მშვიდობიანი მანიფესტანტების შეკრებისა და გამოხატვის თავისუფლებაში დაუსაბუთებელ ჩარევას წარმოადგენს.  „უფლებები საქართველო“ მოუწოდებს საქართველოს შინაგან საქმეთა სამინისტროს შეწყვიტოს დაუსაბუთებელ გარემოებებზე მითითებით მანიფესტანტთა შეკრებისა და გამოხატვის თავისუფლების გაუმართლებელი შეზღუდვა და ჟურნალისტების საქმიანობასა და გადაადგილების თავისუფლებაში უხეში ჩარევა.  სრულად...   წყარო: ორგანიზაციის ვებგვერდი

თბილისი. სოციალური სამართლიანობის ცენტრი (ყოფილი EMC), საია და მწვანე ალტერნატივა, რიონის ხეობაში 11 აპრილს განვითარებულ მოვლენებთან დაკავშირებით, განცხადებეას ავრცელებენ.  „უხეშად და დაუსაბუთებლად შეიზღუდა ნამახვანჰესის წინააღმდეგ პროტესტის მონაწილეთა შეკრებისა და გამოხატვის თავისუფლება”, - აცხადებენ ორგანიზაციები, - „ამასთან, მივიჩნევთ, რომ უკანასკნელ დღეებში ხელისუფლების მიერ გატარებულმა საპოლიციო მოქმედებმა განსაკუთრებულად მძიმე და უფლებაშემლახავი ფორმები მიიღო, რაც დაუყოვნებლივ და უპირობოდ უნდა შეწყდეს და ხელისუფლების მოქმედებები დაუბრუნდეს ადამიანის უფლებების დაცვის ჩარჩოს“.  სრულად...   წყარო: socialjustice.org

თბილისი. 2021 წლის 7 აპრილს მდინარე ენგურიდან მაშველებმა 4 გარდაცვლილი ადამიანის ცხედარი ამოიტანეს. არსებული ინფორმაციით, ისინი ოკუპირებული გალიდან საქართველოს ხელისუფლების კონტროლირებად ტერიტორიაზე გადმოსვლას ცდილობდნენ.  სახალხო დამცველი ღრმა მწუხარებას გამოთქვამს მომხდარი ფაქტის გამო, უსამძიმრებს გარდაცვლილთა ოჯახებს და მოუწოდებს საქართველოს ხელისუფლებას, საერთაშორისო თანამეგობრობის დახმარებით გააძლიეროს ზეწოლა საოკუპაციო ძალებზე ე.წ. გამშვები პუნქტის მთლიანი მოსახლეობისათვის გასახსნელად; ასევე - კიდევ ერთხელ იმსჯელოს 5 დღიანი სავალდებულო კარანტინის ღონისძიებებზე, რაც ოკუპირებული გალის მოსახლეობას გადაადგილებაზე დამატებით ბარიერს შეუმსუბუქებს.  სრულად...   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) ჰაინრიჰ ბიოლის ფონდის სამხრეთ კავკასიის რეგიონის თბილისის ოფისთან თანამშრომლობით იწყებს ახალ პროექტს „კვლევისა და ადვოკატირების გზით სამშვიდობო პოლიტიკის პოზიტიური ტრანსფორმაციის ხელშეწყობა“. პროექტის მიზანია საზოგადოებრივ და პოლიტიკურ წრეებში შექმნას და წაახალისოს ალტერნატიული ხედვები საქართველოში არსებული კონფლიქტების პოზიტიური ტრანსფორმაციის და ნდობის მშენებლობის მიმართულებით, გააძლიეროს მშვიდობის პერსპექტივები სახელმწიფო პოლიტიკაში და საზოგადოებაში. სრულად... წყარო: emc.org.ge

ადამიანის უფლებათა ევროპული სასამართლოს მიერ 2008 წლის აგვისტოს მოვლენებთან დაკავშირებით მიღებული გადაწყვეტილების თაობაზე, ევროკავშირის საგარეო ქმედებათა სამსახურის პრეს-სპიკერი განცხადებას ავრცელებს... „გადაწყვეტილებაში მოცემულია მკაფიო დასკვნა, რომ 2008 წლის 12 აგვისტოს შემდეგ, რუსეთის ფედერაციამ სამხრეთ ოსეთსა და აფხაზეთზე ეფექტიანი კონტროლის განხორციელებისას, ადამიანის უფლებათა კონვემციის სხვადასხვა მუხლი დაარღვია“, - აღნიშნულია განცხადებაში, - „სამართლიანობის მიღწევა და პასუხისმგებლობა კონფლიქტის მოგვარების მნიშვნელოვანი ნაწილია და ევროკავშირი რუსეთის ფედერაციას ამ გადაწყვეტილების სატანადო შესრულების უზრუნველყოფისკენ მოუწოდებს. ევროკავშირი სრულ მზაობას გამოხატავს, რომ ხელის შეუწყოს საქართველოში არსებული კონფლიქტების მოგვარებას, რისთვისაც, ასევე, საჭიროა ზალისხმევა წარსული კონფლიქტების მემკვიდრეობის აღმოსაფხვრელად“.  სრულად...   წყარო: eeas.europa.eu

თბილისი. ამერიკის შეერთებული შტატების საელჩო საქართველოში, ადამიანის უფლებათა ევროპული სასამართლოს გადაწყვეტილებასთან დაკავშირებით, განცხადებას ავრცელებს.  „საქართველო რუსეთის წინააღმდეგ" სახელმწიფოთაშორის სარჩელში 2008 წლის რუსეთ-საქართველოს ომის შესახებ სასამართლომ გადაწყვეტილება მკაფიოდ საქართველოს სასარგებლოდ მიიღო და რუსეთი ადამიანის უფლებათა ევროპული კონვენციის მრავალი მუხლის დარღვევაში პასუხისმგებლად ცნო, მათ შორის ცალკეული პიროვნებების დაკავებასა და წამებაში და საქართველოს მოქალაქეებისთვის სახლებში დაბრუნების უფლების ჩამორთმევაში“, - აღნიშნულია განცხადებაში, - „სასამართლოს გადაწყვეტილება კიდევ უფრო მეტ მნიშვნელობას ანიჭებს საერთაშორისო საზოგადოების მოთხოვნას, რომ რუსეთმა შეწყვიტოს საქართველოს სუვერენიტეტისა და ტერიტორიული მთლიანობის აშკარა დარღვევები. განსაკუთრებით საგანგაშო და მიუღებელია რუსეთის მცდელობები, გააკონტროლოს და გამოიყენოს საქართველოს აფხაზეთისა და სამხრეთ ოსეთის რეგიონები ბორდერიზაციის გზით, თვითნებური დაკავებებით, ადმინისტრაციული გამყოფი ზოლის გადაკვეთის შეზღუდვითა და სოციალურ-ეკონომიკური და სამხედრო „ხელშეკრულებების" დადებით საქართველოს ორ რეგიონთან.“.  სრულად...   წყარო: გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი, ადამიანის უფლებათა ევროპული სასამართლოს მიერ, 21 იანვარს, 2008 წლის აგვისტოს ომთან დაკავშირებით მიღებული გადაწყვეტილების მიმოხილვას აქვეყნებს.  „21 იანვარს ადამიანის უფლებათა ევროპულმა სასამართლომ გამოაქვეყნა ისტორიული გადაწყვეტილება საქართველო რუსეთის ფედერაციის წინააღმდეგ საქმეზე, რომელიც 2008 წლის აგვისტოს ომის დროს და მის შემდგომ პერიოდში ადამიანის უფლებათა დარღვევების პრაქტიკებზე რუსეთის ფედერაციის პასუხისმგებლობის საკითხებს აფასებს. აღნიშნულ საქმეზე ადამიანის უფლებათა ევროპულა სასამართლომ პირველად იმსჯელა ოკუპირებულ ტერიტორიებზე რუსეთის ფედერაციის სამართლებრივი პასუხისმგებლობის საკითხზე და მიიჩნია, რომ ამ ტერიტორიებზე რუსეთის სამხედრო ძალების განლაგების, de facto ხელისუფლებების პოლიტიკური, სამხედრო, ჰუმანიტარული მხარდაჭერის და მათ შორის გაფორმებული შეთანხმებების და სხვა მხარდამჭერი პრაქტიკების გამო, რუსეთს ფაქტობრივი კონტროლი აქვს, რის გამოც ამ რეგიონებში უფლების დარღვევის ფაქტებზე პასუხისმგებლობა რუსეთის ფედერაციის იურისდიქციის სფეროში ექცევა. ამ საქმეში ევროპულმა სასამართლომ დაადგინა რუსეთის ფედერაციის მიერ არაერთი უფლების, მათ შორის წამების და არაადამიანური მოპყრობის აკრძალვის, სიცოცხლის უფლების, უკანონო დაკავების აკრძალვის, პირადი ცხოვრების, გადაადგილების და საკუთრების უფლებების დარღვევა“, - ნათქვამია მიმოხილვაში.  სრულად...  წყარო: ორგანიზაციის ვებგვერდი

საქართველოს ახალგაზრდა იურისტთა ასოციაცია, ადამიანის უფლებათა ევროპული სასამართლოს დიდი პალატის მიერ, 2008 წლის აგვისტოს ომის დროს, რუსეთის ფედერაციის მხრიდან განხორციელებულ დარღვევებთან დაკავშირებით, 2021 წლის 21 იანვარს მიღებულ გადაწყვეტილებას განმარტავს.  განმარტება მოიცავს ყველა მყხლს, რომელზეც საქართველო რუსეთს ედავებოდა და შედეგებს, რომელიც სტრასბურგის გადაწყვეტილებით დადგა. წარდგენილ საჩივარში საქართველო ამტკიცებდა, რომ რუსეთმა ადმინისტრაციული პრაქტიკის სახით, რუსულ შეიარაღებულ ძალებს და მათ კონტროლქვეშ მოქმედ სეპარატისტულ ძალებს ხელი შეუწყო/ნება დართო, განეხორციელებინათ განურჩეველი და არაპროპორციული თავდასხმები მშვიდობიანი მოსახლეობის და მათი ქონების წინააღმდეგ. მთლიანობაში, საჩივარი ევროპული კონვენციის 8 მუხლის დარღვევას შეეხებოდა.  სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) საქართველოს კონტროლირებად ტერიტორიაზე რუსი სამხედროების გადმოსვლისა და აფხაზეთიდან გამოქცეული მოქალაქეების სოფელ ხურჩასთან დაკავების ფაქტს ეხმიანება. ორგანიზაცია მოუწოდებს ხელისუფლებას გააძლიეროს უსაფრთხოების ზომები საოკუპაციო ხაზთან და უზრუნველყოს მიმდებარე სოფლებში მცხოვრები მოსახლეობის უსაფრთხოების ჯეროვანი დაცვა. „კრიტიკულად მნიშვნელოვანია: საქართველოს ხელისუფლებამ აწარმოოს ინტენსიური მოლაპარაკებები და დიპლომატიური სამუშაოები ოკუპირებულ რეგიონებთან მიმოსვლის რეჟიმის აღდგენისა და გადაადგილების თავისუფლებაზე დაწესებული თვითნებური შეზღუდვების მოსახსნელად; საქართველოს ხელისუფლებამ გასწიოს დამატებითი პოლიტიკური და დიპლომატიური სამუშაოები, რათა გამყოფ ხაზებთან საერთაშორისო აქტორების ჩართულობით შეიქმნას რეგულარული დამოუკიდებელი მონიტორინგის მექანიზმი; სახელმწიფო უსაფრთხოების სამსახურებმა და შინაგან საქმეთა სამინისტრომ უზრუნველყონ მუდმივი პატრულირება გამყოფ ხაზებთან და მიმდებარე სოფლებში მოსახლეობის უსაფრთხოების უზრუნველსაყოფად“, - აღნიშნულია ორგანზიაციის მიერ გავრცელებულ განცხადებაში. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: კონფლიქტის რეგიონები და ადამიანის უფლებები პარტიების წინასაარჩევნო ხედვებში - 2020.  „ტერიტორიული მთლიანობის აღდგენის და კონფლიქტის მოგვარების საკითხი პოლიტიკური პარტიების წინასაარჩევნო კამპანიებში გამოტოვებული არ არის, თუმცა, ისინი ვერ გვთავაზობენ: არსებითად ახალ, ტრანსფორმაციულ მიდგომებს, რომელიც კონფლიქტების მოგვარების ეტაპობრივ და რეალისტურ ხედვებს გააჩენდა. პარტიებს კვლავ უჭირთ კონფლიქტის მოგვარებისთვის გარდამტეხი ინიციატივების შეთავაზება. არ აქვთ სათანადოდ გააზრებული წინა წლებში მსგავსი მექანიზმების წარმატების, თუ წარუმატებლობის მიზეზები, ოკუპირებულ ტერიტორიებზე მუდმივად ცვალებადი პოლიტიკური კონტექსტები და განწყობები. ვერ გვთავაზობენ, თუ რა მექანიზმებით აპირებენ ადამიანის უფლებების დაცვას ოკუპირებულ ტერიტორიებზე და არც შესაბამისი საერთაშორისო მექანიზმების დანერგვაზე არსებობს ხედვა“, ნათქვამია დოკუმენტში.  სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: დეზინფორმაცია ყარაბაღის კონფლიქტთან დაკავშირებით საქართველოს პოზიციის შესახებ სომხურ და აზერბაიჯანულ მედიაში. მიუხედავად იმისა, რომ საქართველო სომხეთ-აზერბაიჯანს შორის მთიან ყარაბაღში მიმდინარე სამხედრო კონფლიქტთან დაკავშირებით ნეიტრალიტეტს ინარჩუნებს, სომხურ და აზერბაიჯანულ მედიაში აქტიურად ვრცელდება დეზინფორმაციები საქართველოს პოზიციასთან დაკავშირებით. გავრცელებულ დეზინფორმაციებს შორისაა საქართველოს მიერ აზერბაიჯანისთვის თურქეთიდან გამოგზავნილი სამხედრო აღჭურვილობისთვის გზის გახსნა. პერიოდულად ჩნდება ქართული და რუსულენოვანი პოსტები, რომლებიც საქართველოს ზემოთხსენებულ ქმედებაში ადანაშაულებს. მსგავსი დეზინფორმაციების გავრცელების შემდეგ, ჯავახეთში რამდენჯერმე დაიძაბა სიტუაცია. „30 სექტემბერს კი სომეხმა პოლიტიკოსმა, „მთიანი ყარაბაღის რესპუბლიკური პარტიის“ ხელმძღვანელმა, კარენ ოჰანჯანიანმა საკუთარ Facebook გვერდზე გაავრცელა იმავე შინაარსის დეზინფორმაცია, რომ თითქოს საქართველო თურქეთიდან აზერბაიჯანის მიმართულებით სამხედრო ტვირთს ატარებს და განაცხადა, რომ ჯავახეთმა საქართველოსგან დამოუკიდებლობა უნდა გამოაცხადოს. ოჰანჯანიანის განცხადება ნათელი მაგალითია იმის, თუ რა მასშტაბებს აღწევს საქართველოსთან დაკავშირებული დეზინფორმაცია სომხურ საინფორმაციო სივრცეში“. ორგანიზაცია საინფორმაცია ომის პირობებში, ხელისუფლებას მოუწოდებს, გააძლიეროს კომუნიკაცია ადგილობრივ მოსახლეობასთან, საერთაშორისო პარტნიორებთან, უზრუნველჰყოს მათი ინფორმირება რეგიონში მიმდინარე მოვლენებთან დაკავშირებით, გააჟღეროს საქართველოს ოფიციალური პოზიცია ნეიტრალიტეტზე და ქვეყნის მიერ გადადგმულ ნაბიჯებზე. სრულად... წყარო: idfi.ge

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ორგანიზაციის მკვლევრის ზურაბ ბატიაშვილის ბლოგპოსტს: ყარაბაღის კონფლიქტის ესკალაცია: საფრთხეები და გამოწვევები საქართველოსთვის. „ყველსათვის ცხადია, რომ ყარაბაღის კონფლიქტი ადვილად ვერ მოგვარდება. უახლოეს ხანში მხარეებმა რომც მიაღწიონ ცეცხლის შეწყვეტის შესახებ შეთანხმებას, ეს მაინც დროებითი ხასიათისა იქნება და ყოველთვის იარსებებს მისი დარღვევის შანსი (რაც გვაჩვენა კიდეც ამ კონფლიქტის ისტორიამ); შესაბამისად, ყარაბაღის კონფლიქტთან დაკავშირებით საქართველოსთვის მოსალოდნელი საფრთხეები და გამოწვევები კიდევ დიდხანს იქნება აქტუალური...“ სრულად... წყარო: www.gfsis.org

თბილისი. საქართველოს საზოგადოებრივი ორგანიზაციები ყარაბაღში მიმდინარე კონფლიქტთან დაკავშირებით სამშვიდობო მანიფესტს ავრცელებენ. „ჩვენ, კავკასიის რეგიონში მცხოვრებ ხალხებს, სასტიკი ომების, კონფლიქტებისა და დევნილობის უმძიმესი გამოცდილება გვაქვს. ყველამ საკუთარი ისტორიული გამოცდილებებით გავიაზრეთ, რომ ომი ადამიანებს აწვებათ ზურგზე, მათი განადგურებისა და გაღარიბების ძალა შესწევს და მხოლოდ ტკივილი, ტანჯვა და იმედგაცრუება მოაქვს. ჩვენს რეგიონში არც ერთ ერსა და ეთნოსს ომის შედეგად გამარჯვება და განვითარება არ მოუპოვებია. სწორედ ამიტომ გვჯერა, რომ ჩვენს რეგიონს მხოლოდ მშვიდობის, მოლაპარაკებებისა და თანამშრომლობის პოლიტიკა მოუტანს სტაბილურობასა და განვითარებას“, ნათქვამია ერთობლივ განცხადებაში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: 27 წელი ომიდან. "27 წლის შემდეგაც ჩვენ არ გვაქვს კრიტიკულად გააზრებული ეთნოპოლიტიკური კონფლიქტის რეალური მიზეზები. ამ ომში რუსული ინტერესის, მხარდაჭერისა და მონაწილეობის აღიარების მიღმა, მნიშვნელოვანია, ჩვენ დავსვათ კითხვები ჩვენი პოლიტიკური ელიტების შეცდომების და ეთნოცენტრული, შოვინისტური პოლიტიკის მიმართ, რომელმაც უბრალო ადამიანები ორივე მხარეს შეიწირა და დაგვაშორა. ისტორიის კრიტიკული გააზრება და მხარეების შეცდომების აღიარება კონფლიქტის ტრანსფორმაციის გზაზე პირველი და არსებითი ნაბიჯია და ის ორივე მხარეს უნდა წარიმართოს. გაუაზრებელი ისტორია და ტრავმა კი კვლავწარმოებისა და მოჯადოებულ წრეში ყოფნის მიზეზი შეიძლება გახდეს". სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აგვისტოს ომის მე-12 წლისთავს ეხმიანება. „ომმა არაერთი ადამიანის სიცოცხლე შეიწირა და დევნის, ჩამორთმევისა და დაუცველობის მძიმე ტრავმა და მეხსიერება დაგვიტოვა. ომმა ერთმანეთს დააშორა ოჯახები, მეზობლები და მოძმე ხალხი. მან ჩვენი ათასობით მოქალაქე დევნილად აქცია, წაართვა საცხოვრებელი სახლი და მშობლიური გარემო. ე.წ. საზღვრისპირა სოფლებში მცხოვრები ადამიანები კი უსაფრთხოების, სიღარიბისა და განუჭვრეტელი მომავლის უმძიმეს რეალობაში ცხოვრობენ. ომის შემდეგ კვლავ არ გაუმჯობესებულა აფხაზეთისა და სამხრეთ ოსეთის რეგიონებში მცხოვრები ადამიანების ყოფა. ეს რეგიონები და de facto პოლიტიკური სისტემები არსებითად არიან ეკონომიკურად და პოლიტიკურად დამოკიდებულნი რუსეთზე და მისი დაქვემდებარების, მოთვინიერებისა და კონტროლის პირობებში უწევთ არსებობა. მათი ეკონომიკები სრულად არის დამოკიდებული რუსეთის საბიუჯეტო სუბსიდიებზე და ადგილობრივი ელიტებისა და საზოგადოებრივი გაერთიანებების მხრიდან, ავტონომიის ნებისმიერი გამოვლინება რეგიონებს მძიმე სოციალურ და ეკონომიკურ ტვირთად და სასჯელად აწვებათ. უფრო მძიმე და უფლებააყრილია ამ რეგიონებში მცხოვრები ეთნიკურად ქართველი ოჯახების მდგომარეობა. კრიმინალი, კორუფცია, დევნა, სიღარიბე, ქართული ენისა და განათლების შევიწროება მათი ცხოვრების ყოველდღიური პრაქტიკაა“, - ნათქვამია EMC-ის მიერ გავრცელებულ განცხდებაში. სრულად...  წყარო: ორგანიზაციის ვებგვერდი

შიდა ქართლი. 8 აგვისტოს გორის სამოქალაქო აქტივიზმის ცენტრის მოხალისეები, რუსეთ-საქართველოს ომის მე-12 წლისთავთან დაკავშირებით, სოფელ შინდისში ჩავიდნენ და რუსული ოკუპაციის, რუსული პროპაგანდის შესახებ ისაუბრეს.  სოფელი შინდისი ერთერთი ცხელი წერტილი იყო 2008 წლის ომის დროს სადაც 15 ჯარისკაცი დაიღუპა და აღნიშნულ ადგილას კი მემორიალი აღიმართა.  სრულად...   წყარო: გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია, აგვსიტოს ომის მე-12 წლისთავთან დაკავშირებით, განცხადებას ავრცელებს.  „2008 წლის აგვისტოს ომს ასეულობით ადამიანი ემსხვერპლა, არაერთი მშვიდობიანი მოქალაქე დაზარალდა და შეილახა მათი ფუნდამენტური უფლებები. ომის დროს ადგილი ჰქონდა ადამიანის უფლებათა და თავისუფლებათა სერიოზულ და მასობრივ დარღვევებს, მათ შორის, ეთნიკურ წმენდას, სამოქალაქო მშვიდობიანი მოსახლეობის განზრახ მკვლელობის, გაუჩინარების, ქონების მასობრივი განადგურების, იძულებითი გადაადგილების, სამოქალაქო მოსახლეობაზე თავდასხმის, თავისუფლების უკანონო აღკვეთის, წამებისა და არაადამიანური მოპყრობის ფაქტებს.  სამწუხაროდ, საქართველოს მოქალაქეთა უფლებების ხელყოფის ფაქტები 2008 წლის აგვისტოს ომის შემდეგაც მასობრივად გაგრძელდა. ომის შემდეგ რუსეთის ხელისუფლების წარმომადგენლებმა სამხრეთოსეთის/ცხინვალის რეგიონის და აფხაზეთის დე ფაქტო წარმომადგენლებთან ერთად აქტიურად დაიწყეს ე.წ. ბორდერიზაციის პროცესი, რასაც შედეგად საქართველოს კონტროლირებად ტერიტორიაზემცხოვრები მოსახლეობის უფლებების ხელყოფა ახლავს.  ბორდერიზაციის პარალელურად საოკუპაციო ზოლის მიმდებარედ ადამიანთა უკანონო და თვითნებური დაკავებების მანკიერი პრაქტიკა დაიწყო. ყოველწლიურად ასობით საქართველოს მოქალაქე ხდება გატაცების მსხვერპლი, მათ შორის ქალები და ბავშვები. შედეგად გამყოფი ხაზის მიმდებარე სოფლებში ადამიანებს ყოველდღიურად შიშში უწევთ ცხოვრება და მათი უსაფრთხოება და კეთილდღეობა საფრთხის ქვეშაა. არსებულ მდგომარეობას ამწვავებს მოსახლეობას შორის ინფორმაციის ნაკლებობა იმის შესახებ, თუ სად გადის ე.წ. ადმინისტრაციული საზღვარი. უმეტეს შემთხვევაში, გატაცებულებს ადმინისტრაციული წესით აკავებენ და გარკვეული თანხის სანაცვლოდ ათავისუფლებენ. თუმცა, ბოლო წლებში გახშირდა სისხლის სამართლებრივი წესით დაკავების შემთხვევებიც, რა დროსაც დაკავებულებიწლების განმავლობაში რჩებიან ტყვეობაში. ე.წ. ადმინისტრაციულ საზღვარზე უკანონო დაკავებების მანკიერი პრაქტიკის პარალელურად ვხვდებით ადამიანის უფლებათა მძიმე დარღვევების შემთხვევებსაც, როგორიცაა სიცოცხლის უფლების ხელყოფა ან/და სხეულის დაზიანებების შემთხვევები“, - ვკითხულობთ განცხადებაში.  სრულად...  წყარო: ორგანიზაციის ვებგვერდი