თბილისი. ქალთა საინფორმაციო ცენტრი განცხადებას ავრცელებს აფხაზეთის საოკუპაციო რეჟიმის მიერ გზის ჩაკეტვასთან დაკავშირებით. „ქალთა საინფორმაციო ცენტრს სურს გამოეხმაუროს აფხაზეთის საოკუპაციო რეჟიმის მიერ გალიდან ზუგდიდის მიმართულებით გზის გადაკეტვის გადაწყვეტილებას. უკიდურესად ვგმობთ ამ ნაბიჯს, რაც ადგილობრივ მოსახლეობას სერიოზულ ჰუმანიტარულ პრობლემას შეუქმნის. საკონტროლო-გამშვები პუნქტები კიდევ უფრო გაურთულებს სასწავლო პროცესს მოსწავლეებს, რომლებიც ვეღარ მოახერხებენ სკოლებამდე მისვლას და მათ მხოლოდ შემოვლითი გზა დარჩებათ. ასევე ენგურის ხიდზე ე.წ საბაჟო გამშვები პუნქტის ამოქმედება მძიმე ეკონომიკურ ტვირთად დააწვება მოსახლეობას. გართულდება ჯანდაცვის სერვისებზე წვდომაც. მოვითხოვთ, ხელისუფლებამ გააკეთოს ყველაფერი რათა შეწყდეს საოკუპაციო რეჟიმის ამგვარი ქმედება. მნიშვნელოვანია რომ, ეს საკითხი წამოიჭრას ჟენევის მოლაპარაკებების დღის წესრიგში, რომელიც 28-29 მარტს არის დაგეგმილი", ნათქვამია ქალთა საინფორმაციო ცენტრის ვებ-გვერდზე. სრულად... წყარო: ქალთა საინფორმაციო ცენტრის ვებ-გვერდი

ევროპის ფონდმა, პროექტის „ახალგაზრდების ჩართულობის გაზრდა საქართველოში” ფარგლებში 25-28 ივლისს ორგანიზება გაუწია კულტურათშორისი დიალოგის ტრენინგს. ტრენინგი წარმოადგენდა ბოსნია და ჰერცოგოვინაში დაგეგმილი „ლიდერების კონფერენციის" წინასმოსამზადებელ შეხვედრას. გარდა იმისა, რომ მოანწილეებს მიეცათ შესაძლებლობა გაეღრმავებინათ ცოდნა ისეთ საკითხებზე, როგორიცაა სტერეოტიპები, ცრურწმენა, დისკრიმინაცია, მათ ასევე განიხილეს ეთნიკური მრავალფეროვნების საფუძველზე განვითარებული კონფლიქტური სიტუაციები და მათი გადაჭრის გზები, რომელიც ბოსნიაში ვიზიტის დროს შესაძლოა აღმოცენდეს. ტრენინგზე მიღებული ცოდნა-გამოცდილება ახალგაზრდებს დაეხმარება აწარმოონ ეფექტური კომუნიკაცია სხვადასხვა კულტურის წარმომადგენელ ახალგაზრდებთან. ‪

თბილისი. ფონდ „ღია საზოგადოება საქართველოს" ოფისში მიმდინარეობს სკოლებში ბულინგის წინააღმდეგ პროგრამის პრეზენტაცია. „არაძალადობრივი კომუნიკაციის ინსტიტუტის" და ფონდი „ღია საზოგადოება-საქართველოს" პროექტის მიზანია კონკრეტულ სკოლებში ბულინგის პრევენცია და ასევე ეფექტური მექანიზმის შემუშავება. შემუშავებული მეთოდოლოგია მიმართული იქნება თანატოლებს შორის ჩაგვრის სხვადასხვა ფორმის შემცირებასა და სასწავლო გარემოს გაუმჯობესებისკენ. პროექტის პირველ ეტაპზე სამუშაო ჯგუფი შეისწავლის სკოლის შიდა კულტურას, ურთიერთობებს მოსწავლეებს, მოსწავლეებსა და მასწავლებლებს, მასწავლებლებსა და მშობლებს შორის, რისი გათვალისწინებითაც შემუშავდება ბულინგის დაძლევის მექანიზმი: შემუშავდება სატრენინგო მასალა და მეთოდოლოგია, ბოლო ეტაპზე კი განხორციელდება ტრენინგები სკოლის თემის წარმომადგენლებისათვის", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. 16 ოქტომბერს, სახალხო დამცველმა, ოსური თემის როლის გააქტიურების, ნდობის აღდგენისა და კონფლიქტის ტრანსფორმაციის საკითხებზე მრგვალ მაგიდა გამართა. „პრობლემები ძალიან ბევრია, დროა ხელისუფლებამ ინტენსიურად დაიწოს მუშაობა ოსური თემის განათლების, კულტურისა და თვითმყოფადობის შენარჩუნების ხელშეწყობისთვის. მნიშვნელოვანია მათი ჩართულობა პოლიტიკურ და საზოგადოებრივ ცხოვრებაში", განაცხადა სახალხო დამცველმა. სრულად... წყარო: www.ombudsman.ge

თბილისი. ჰაინრიჰ ბიოლის ფონდმა გამართა დისკუსია „ჟენევის მოლაპარაკებების მომავალი: დიპლომატიის როლი კონფლიქტის ტრანსფორმაციისთვის". მათ, ვინც ვერ შეძლო დისკუსიაზე დასწრება, ფონდი საშუალებას აძლევს იხილოს მისი ვიდეოჩანაწერი. სრულად... წყარო: ბიოლის ფონდის ვებგვერდი

აჭარა. 15 ნოემბერს, აფხაზ ქალთა კავშირ „ამრას" ორგანიზებით, ბათუმის მხარეთმცოდნეობის მუზეუმში ეთნიკური აფხაზების მიერ შექმნილი ნამუშევრების გამოფენა მოეწყო. გამოფენის მიზანი, აჭარაში მცხოვრები მოსახლეობისთვის, განსაკუთრებით ახალგაზრდებისთვის, აფხაზური კულტურის გაცნობა იყო. გაყინული კონფლიქტის ფარგლებში საქართველოს სხვადასხვა კუთხეებში კონფლიქტის შემდეგ  დაბადებულებულ თაობას ნაკლები ინფორმაცია და შესაბამისად ინტერესი, აქვს აფხაზური კულტურის შესახებ, რაც ხელს უშლის კონფლიქტის მოსაგვარებლად  სახალხო დიპლომატიის გამართულად მუშაობას. ორგანიზატორთა და დამსწრე საზოგადოების აზრით, აფხაზ და ქართველ ხალხთა დასაახლოვებლად, მნიშვნელოვანია მსგავსი ღონისძიებების მოწყობა.

იმერეთი. ქუთაისის დემოკრატიული ჩართულობის ცენტრში, 26 სექტემბერს, გაიმართა დისკუსია: 20 წლის შემდეგ შეფასებული კონფლიქტი აფხაზეთში და დღევანდელი რეალობა. სადაც სადაც კონფლიქტის შედეგად მიღებული ცვლილებებზე ისაუბრეს. დისკუსიაზე სიტყვით გამოვიდნენ არასამთავრობო ორგანიზაციების წარმომადგენლები, ჟურნალისტები. ღონისძიება მიეძღვნა სოხუმის დაცემის დღეს, რის გამოც ქუთაისში, 27 სექტემბერს არასამთავრობო ორგანიზაციების სხვადასხვა ღონისძიებებს გეგმავენ.

თბილისი.ინტერნიუს საქართველო, ინტერნიუს სომხეთი და ინტერნიუს აზერბაიჯანი ბრიტანეთის საელჩოს ფინანსური მხარდაჭერით იწყებენ 2 წლიან პროექტს „კონფლიქტსენსიტიური გაშუქების ხელშეწყობა სამხრეთ კავკასიაში", მასში მონაწილეობას მიიღებენ კოლეგები სოხუმიდან, ცხინვალიდან და ყარაბაღიდან. პროექტის ერთერთი მიზანი სამხრეთ კავკასიის მედიაში კონფლიქტების გაშუქებასთან დაკავშირებული სიტუაციის შეფასებაა, რა მიზნითაც საწყის ეტაპზე ჩატარდება საექსპერტო გამოკითხვების ანალიზი. კვლევის ფარგლებში გამოიკითხება 30 ექსპერტი პროექტის მიზნობრივი რეგიონიდან. საბოლოო ანგარიში და შემუშავებული რეკომენდაციები გაეცნობა სამხრეთ კავკასიის მედიის წარმომადგენლებს, რედაქტორებს, ჟურნალისტებსა და მედია მენეჯრებს. ჩატარდება ტრენინგები მედია ინდუსტრიის წარმომადგენელი სხვადასხვა ჯგუფებისთვის, მათ შორის ახალგაზრდა ჟურნალისტებისთვის. 2013 წლის ოქტომბრიდან პროექტის გუნდი მოამზადებს სატელევიზიო გადაცემებს რეგიონში არსებულ კონფლიქტებთან მიმართებაში აქტუალურ საკითხებზე, რომლებიც გადაიცემა წამყვანი ტელეკომპანიების მიერ. განმახორციელებელი პარტნიორების ვებ-გვერდებზე პერიოდულად განთავსდება კონფლიქტებთან დაკავშირებული სტატიები და სათანადო ვიდეომასალა. წყარო: media.ge

თბილისი. კავკასიური სახლის ინტერნეტ დღიურის 27 მარტის გამოშვების თემაა საქართველოს პოლიტიკა კონფლიქტებთან მიმართებაში, რეგიონული პოლიტიკის არსებული ფორმები. თემაზე კი კავკასიური სახლის აღმასრულებელი დირექტორი საუბრობს. წყარო:ორგანიზაციის გვერდი სოციალურ ქსელში

სამეგრელო. საპარლამენტო უმრავლესობის წევრი გიორგი ვოლსკი 27 მარტს, სამეგრელოს რეგიონში კონფლიქტის თემებზე მომუშავე არასამთავრობო სექტორის წარმომადგენლებს შეხვდა და ქართულ-აფხაზური ურთიერთობების სახალხო დიპლომატიის გზით აღდგენაზე ისაუბრა. ვოლსკის განცხადებით, სახალხო დიპლომატიაზე ადრეც ხშირად საუბრობდნენ, მაგრამ დღეს მოისმინა იმ ადამიანების მოსაზრებები, რომლებსაც რეალურად საქმის კეთება შეუძლიათ.  ასოციაციის „მშვიდობიანი და საქმიანი კავკასია" ხელმძღვანელის, ალუ გამახარიას თქმით, სამეგრელო ყოველთვის განსაკუთრებულად მჭიდრო კავშირში იყო აფხაზეთთან და სწორედ აქედან უნდა დაიწყოს სახალხო დიპლომატიის განვითარება ქართველებსა და აფხაზებს შორის.  კონფლიქტების საკითხების განხილვა ასოციაცია „მშვიდობიანი და საქმიანი კავკასიის", „ახალგაზრდა იურისტთა ასოციაციის" ქუთაისის წარმომადგენლობისა და საზოგადოება „ზუგდიდელის" ინიციატივით მოეწყო.

სამეგრელო. 9 თებერვალს, სამოქალაქო სექტორის წარმომადგენლებს საქართველოს სახელმწიფო მინისტრი რეინტეგრაციის საკითხებში პაატა ზაქარეიშვილი შეხვდა. მან ახალი ხელისუფლების პირობებში ქართულ-აფხაზური და ქართულ-ოსური ურთიერთობის პერსპექტივასა და კონფლიქტების მიმართ სახელმწიფოს ახალ სტრატეგიაზე ისაუბრა. მინისტრმა კონფლიქტების დარეგულირების კუთხით არსებული ვითარების შესახებ მოხსენებით გამოსვლის შემდეგ სამოქალაქო სექტორის წარმომადგენელთა შეკითხვებსაც უპასუხა. დემოკრატიული ჩართულობის ცენტრის ზუგდიდის ოფისში გამართული შეხვედრა რეინტეგრაციის მინისტრთან სახელმწიფო საკითხებში, არასამთავრობო ორგანიზაცია „ახალგაზრდები სამოქალაქო ინტერესებისთვის" ინიციატივით შედგა.

სამეგრელო. „ქართულ – აფხაზური დიალოგის" საინიციატივო ჯგუფმა, 11 აგვისტოს,  დემოკრატიული ჩართულობის ზუგდიდის ცენტრში, გალის რაიონში არსებულ მდგომარეობასა და ადგილობრივ მედიაში აფხაზეთის თემატიკის გაშუქებაზე დისკუსია მოაწყო.  ფონდ „ტასოს" წარმომადგენელმა ხატია ძანძუამ, გალში არსებულ მდგომარეობაზე ისაუბრა. მან გალში მცხოვრებთათვის ყველაზე მნიშვნელოვან პრობლემად უსაფრთხო გადაადგილება მიიჩნია. „ქართულ – აფხაზური დიალოგის" საინიციატივო ჯგუფი, რომელიც სხვადასხვა საზოგადოებრივი ორგანიზაციის წარმომადგენლებისაგან შედგება, 2004 წელს შეიქმნა და ის აფხაზეთის თემაზე საინფორმაციო შეხვედრებს საერთაშორისო ორგანიზაცია „შერიგების რესურსების მხარდაჭერით" მართავს.