თბილისი. საქართველოს ჟურნალისტური ეთიკის ქარტია გმობს 20 ივლისს, თბილისის მერის მიერ გაკეთებულ განცხადებას, რომლის თანახმადაც, მერმა მედიის საქმიანობა ძალადობრივი ჯგუფების ქმედებებს შეადარა. „ქარტია მოუწოდებს ხელისუფლების წარმომადგენლებს საკუთარი აგრესიული დამოკიდებულებით არ წაახალისონ მედიის წარმომადგენლებზე თავდასხმა და შეწყვიტონ საუბარი აზრის, სიტყვისა და გამოხატვის თავისუფლების შემზღუდავ ნორმებზე, მხარი დაუჭირონ მედიის თავისუფლებას და გადავიდნენ საქმიანი ურთიერთობის რეჟიმზე“. სრულად... წყარო: www.qartia.ge

თბილისი. „მედიის ადვოკატირებისთვის” შეშფოთებულია პრემიერის მიერ „მთავარი არხის“, „ტვ პირველის“ და „ფორმულას“ დისკრედიტაციისა და ნიკა გვარამიას მიმართ გავრცელებული მუქარის გამო. 17 ივლისს ღარიბაშვილის მონაწილეობით გამართულ საჯარო ღონისძიებაზე მხოლოდ მედიის ნაწილი მიიწვიეს, „პრემიერის პრესსამსახურის განმარტებით, „პრემიერ-მინისტრი ირაკლი ღარიბაშვილი თვლის, რომ „მთავარმა არხმა“, „ტვ პირველმა“ და „ფორმულამ“ გადაკვეთეს ყველანაირი წითელი ხაზი, ისინი წარმოადგენენ კონკრეტულ პოლიტიკურ პარტიას, ფინანსდებიან და პირდაპირ მართულები არიან მიხეილ სააკაშვილის და მისი რადიკალური ძალების მიერ და ჩართული არიან პოლიტიკურ კამპანიაში პრემიერ-მინისტრის წინააღმდეგ.” შესაბამისად, ამ მიზეზით არ მიიწვიეს აღნიშნული ტელეკომპანიები ღონისძიებაზე.  ასევე, ცნობილი გახდა, რომ ნიკა გვარამიას ძალადობრივ ჯგუფის წევრები ალტ - ინფოს ფეისბუკ არხის დაბლოკვისთვის სიცოცხლის მოსპობით ემუქრებიან. „მოვუწოდებთ; საქართველოს პრემიერ მინისტრს მაღალი საჯარო პასუხისმგებლობის ფარგლებში შეწყვიტოს მედიის დისკრედიტაცია; საქართველოს შინაგან საქმეთა სამინისტროს დაიწყოს გამოძიება ნიკა გვარამიას მიმართ მუქარის შემცველი განცხადების თაობაზე“. სრულად... წყარო: isfed.ge

თბილისი. საქართველოს რეფორმების ასოციაციის ინფორმაციის გადამოწმების ვებგვერდი ფაქტ-მეტრი დეზინფორმაციულ მასალაზე წერს, რომ თითქოს ტელეკომპანია „ფორმულამ“ გარდაცვლილი ლექსო ლაშქარავას ფოტო სპეციალური პროგრამით დაამუშავა და დაზიანებები დაუმატა. „აღნიშნული დეზინფორმაცია იმ Facebook-გვერდებმა კოორდინირებულად გამოაქვეყნეს, რომლებიც ხელისუფლების მხარდამჭერ და ოპოზიციის მადისკრედიტირებელ მასალებს კამპანიურად ავრცელებენ“. ფაქტ-მეტრის ინფორმაციით, მათ მოიძიეს ფოტოები და ვიდეო მასალა, სადაც ლექსო ლაშქარავას ნამდვილად აღენიშნება სისხლის კვალი სახის მარჯვენა ნაწილში. გარკვეულ ფოტო-ინტერიუებში, ვიზუალური დაზიანება არ ჩანს, რაც იმაზე მიუთითებს, რომ სისხლი ლაშქარავას დასვრილი ნაჭრიდან ან ხელებიდან მოეცხო. ასევე, აღსანიშნავია, რომ თვითონ ტელეკომპანია „ფორმულასაც“ Facebook-გვერდზე გამოქვეყნებული აქვს, როგორც სისხლის კვალიანი ფოტო, ასევე, ისეთი ფოტოც, სადაც სისხლი არ აღინიშნება. ეს კი კიდევ ერთი არგუმენტია, რომ ტელევიზიას ფოტო ნამდვილად არ დაუმუშავებია. სრულად... წყარო: factcheck.ge

თბილისი. USAID-ის დირექტორი პიტერ ვიბლერი შეხვდა ჟურნალისტებს და მედიის მხარდამჭერებს რადიო თავისუფლებიდან, საერთაშორისო გამჭვირვალობა - საქართველოდან, მედიის განვითარების ფონდიდან, ფონდიდან „ღია საზოგადოება - საქართველო“ და IREX-იდან. „შეხვედრაზე ისაუბრეს იმ გამოწვევებზე, რომელთა წინაშეც დღეს საქართველოს მედია სექტორი დგას; იმაზე, თუ როგორ შეიძლება ამ გამოწვევებს უპასუხოს პროგრამებმა და ინიციატივებმა ადვოკატირების მიმართულებით, და რა გზით შეუძლია USAID-ს, რომ მედიას მომავალშიც დაეხმაროს“.                                                                       წყარო: ორგანიზაციის გვერდი სოციალურ ქსელში

თბილისი. „საქართველოს რეფორმების ასოციაციის“ ინფორმაციის გადამოწმების ვებგვერდი „ფაქტ-მეტრი“ (FactCheck.ge)  აქვეყნებს ბლოგპოსტს: რა თქვა შარლ მიშელმა სინამდვილეში, როდესაც ერთი თაობა ახსენა. „სოციალური ქსელის მრავალმა გვერდმა გაავრცელა ცნობა, რომ თითქოს მიშელმა განაცხადა: „ერთი თაობაა ის მანძილი, რომელიც აშორებს თქვენს საზოგადოებას ევროკავშირის კარებს“. ვებგვერდის მიერ გავრცელებული თარგმანის თანახმად, სინამდვილეში ევროპული საბჭოს პრეზედენტმა თქვა: „მიმაჩნია, რომ ჩვენი აღმოსავლეთ პარტნიორობა არის ლოკომოტივი ტრანსფორმაციის, კეთილდღეობისა და ზრდისთვის. ეს არის ასევე ძლიერი სიმბოლო ღიაობის, ურთიერთნდობისა და ჩვენი თანამშრომლობის. თქვენთვის დამოუკიდებლობის ერთი თაობა არსებობს და ამ ერთ თაობაში მანძილი თქვენს საზოგადოებებსა და ევროკავშირს შორის უპრეცედენტოდ შემცირდა. ევროკავშირი თქვენი ყველაზე ერთგული პარტნიორია მეტი დემოკრატიისთვის, მეტი სტაბილურობისთვის, მეტი კეთილდღეობისთვის და რაც მთავარია, თქვენი ქვეყნების მოსახლეობის სასარგებლოდ”. სრულად... წყარო: factcheck.ge

თბილისი. „უფლებები საქართველო“ 5 ივლისს დაზარალებულ ტელეკომპანია „მთავარი არხის“ ოპერატორებს იცავს. „ვაჟა ჩხაიძე და დავით ახალაძე 5 ივლისს თავიანთ პროფესიულ საქმიანობას ასრულებდნენ, როდესაც მათ თავს დაესხნენ რადიკალური ჯგუფის წევრები და ფიზიკური და სიტყვიერი შეურაცხყოფა მიაყენეს. პროკურატურის დადგენილებით, 5 ივლისს, რადიკალური ჯგუფების მიერ ორგანიზებული ძალადობრივი აქტის შედეგად, ვაჟა ჩხაიძეს და დათა ახალაძეს მიადგა ფიზიკური და მორალური ზიანი“.  სრულად... წყარო: ორგანიზაციის გვერდი სოციალურ ქსელში

თბილისი. „მითების დეტექტორი“ აქვეყნებს მარიამ დანგაძის ბლოგპოსტს: ვინ არის ნათია ქოლუსი და რა კავშირი აქვს მას Cancel Cancel Mafia საქართველოსთან. ნაშრომიდან გაიგებთ თუ რა კონსპირაციულ თეორიებზე საუბრობს ქოლუსი, რა გზავნილებს, შეცდომაში შემყვან ვლოგპოსტებს ავრცელებს და რა კავშირი აქვს მას ჯგუფთან “Cancel Cancel Mafia საქართველო”, რომელიც ქოლუსის ინფორმაციით, ფეისბუქმა პოსტების ორგანიზებული დარეპორტებისთვის დაბლოკა და რომელიც ამ ეტაპზე, ნამდვილად აღარ ფუნქციონირებს. სრულად... წყარო: mythdetector.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, ორგანიზაციას Facebook-მა ოფიციალურად დაუდასტურა, რომ ალტ-ინფოს Facebook გვერდი „სამართლიანი არჩევნების“ შეტყობინების საფუძველზე წაიშალა. ISFED-მა Facebook-ს მიმართა და ალტ-ინფოს მიერ მის პლატფორმაზე გაკეთებული სიძულვილის ენის შემცველი განცხადებებისა და ძალადობრივი ჯგუფების მობილიზების შესახებ აცნობა. „Facebook-ის შესაბამისი განყოფილების გადაწყვეტილებით, ალტ-ინფომ Facebook-ის გამოყენების წესები და პოლიტიკა დაარღვია“. სრულად... წყარო: ორგანიზაციის გვერდი სოციალურ ქსელში

თბილისი. „მითების დეტექტორის“ ბლოგპოსტის თანახმად, „კოგარაში ურიე” და Liberaluri seni ჟურნალისტების ციტატებს აყალბებენ. 10 ივლისს, მაია მამულაშვილს ფეისბუქ გვერდმა Liberaluri seni შემდეგი ციტატა მიაწერა: „„პუტინისტური დაჯგუფებების“ მიერ გამოშვებულმა ჰომოფობებმა ბავშვები დაკბინეს“. 12 ივლისს, ამავე გვერდზე, ვახო სანაიას ციტატა გამოჩნდა, სადაც ჟურნალისტი თითქოს ამბობს, რომ „პანჩური ამოარტყეს და თუ უეცრად გარდაიცვლება ეს ხელისუფლების დაგეგმილი იქნება“. 14 ივლისს, ფეისბუქ მომხმარებელმა „კოგარაში ურიე“ ბაია პატარაიას მოთხოვნა გამოქვეყნა, რომ თითქოს უფლებადამცველი სილვესტერ სტალონესა და შვარცენეგერის მონაწილებით გადაღებული ფილმების ჩვენებას კრძალავს, იმ მიზეზით, რომ ეს ფილმები პოტენციურ მოძალადეებს აყალიბებს. მითების დეტექტორის კვლევით, „Liberastuli Seni-სა და კოგარაში ურიეს გავრცელებული ციტატები ყალბია, რეალურად ჟურნალისტებსა და უფლებადამცველს მსგავსი შინაარსის განცხადებები არ გაუკეთებიათ. არცერთ ღია წყაროში არ იძებნება ინფორმაცია იმის შესახებ, რომ მაია მამულაშვილმა, ვახო სანაიამ ან ბაია პატარაიამ მსგავსი კომენტარი გააკეთეს“. სრულად... წყარო: mythdetector.ge

თბილისი. მითების დეტექტორი აქვეყნებს თამარ კინწურაშვილის და ქეთი ხუციშვილის მიერ მომზადებულ ბლოგპოსტს: კრემლის ძალადობრივი ჯგუფების სტრატეგია: დასავლეთის სიმბოლოების დაწვა ნორმად უნდა იქცეს. „ძალადობრივი ჯგუფების მიერ Tbilisi Pride-ის ღირსების მარშის ჩაშლას და ჟურნალისტებზე ორგანიზებულ ძალადობას, აგრესიული და მუქარის შემცველი განცხადებებით ლევან ვასაძის პარტიასთან „ერთობა, რაობა, იმედი“ დაკავშირებული ტელეკომპანა „ალტ-ინფო“ ასაზრდოებდა, რომლის წამყვანები 5 ივლისს შეკრებილი ძალადობრივი კონტრაქციის ორგანიზატორებს შორისაც იყვნენ“. სრულად... წყარო: mythdetector.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, სანამ სამინისტრო, პირველ ბრიფინგზე მიგვანიშნებდა ლაშქარავას ზედოზირებით გარდაცვალების შესახებ, ინფორმაცია დაახლოებით ერთი საათით ადრე, „მარშალპრესის“ Facebook გვერდზე გავრცელდა. „მასალაში წყაროდ მოხმობილია ვინმე პოლიტიკოსი იოსებ ხიმშიაშვილი. მალევე სიახლე ონლაინგამოცემამ ორგანიზებულად გაავრცელა ღია ჯგუფებში. გამზიარებლებს შორის იყოს „მარშალპრესის” დამფუძნებელი ოთარ სტეფანიშვილი“.                                                                           წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი 5-6 ივლისის მოვლენების ორგანიზატორთა ქმედებების გამოძიების პროცესს განცხადებით ეხმაურება. „12 ივლისის მდგომარეობით შინაგან საქმეთა სამინისტროს და საქართველოს გენერალურ პროკურატურას არც ერთი პირი არ მიუცია სისხლის სამართლის პასუხისგებაში 5 და 6 ივლისს თბილისში განვითარებული ძალადობრივი, სიძულვილით მოტივირებული დანაშაულების ორგანიზებისთვის. ... მოვუწოდებთ შინაგან საქმეთა სამინისტროსა და პროკურატურას, უმოკლეს ვადებში, პრიორიტეტულად, გამოავლინონ სავარაუდო ძალადობრივი ჯგუფების მოქმედებებზე მთავარი პასუხისმგებელი პირები და დაიწყონ მათ მიმართ სისხლისსამართლებრივი დევნა“. ომბუდსმენი მოუწოდებს შინაგან საქმეთა სამინისტროს ჩაატაროს ეფექტიანი გამოძიება ტელეკომპანია „ტვ პირველის“ ოპერატორის ალექსანდრე ლაშქარავას გარდაცვალების ფაქტზე. სრულად... წყარო: ombudsman.ge

თბილისი. საზოგადოებრივი ორგანიზაციების ნაწილი მწუხარებას და გულისტკივილს გამოხატავს ტელეკომპანია „პირველის“ ოპერატორ ლექსო ლაშქარავას გარდაცვალების გამო და უსამძიმრებენ მის ოჯახსა და ახლობლებს. „5 ივლისის მასშტაბურ ძალადობაზე, რასაც შედეგად ათობით ჟურნალისტის და მშვიდობიანი მოქალაქის ჯანმრთელობის დაზიანება მოჰყვა ხოლო, ტვ პირველის ოპერატორი, ჯანმრთელობის უმძიმესი დაზიანებების შემდგომ გარდაიცვალა, პასუხი უნდა აგოს ძალადობის ყველა ორგანიზატორმა, მონაწილემ და ძალადობისკენ მომწოდებელმა, განურჩევლად საერო თუ სასულიერო სტატუსისა. ხელმომწერი ორგანიზაციები მოვითხოვთ, სულ მცირე: საქართველოს პრემიერ მინისტრმა ირაკლი ღარიბაშვილმა და საქართველოს შსს მინისტრმა ვახტანგ გომელაურმა დაუყოვნებლივ დატოვონ დაკავებული თანამდებობა; ძალადობის ყველა ორგანიზატორი, მონაწილე და წამქეზებელი, მიუხედავად მათი სტატუსისა, დაისაჯოს კანონის სრული სიმკაცრით“, ნათქვამია ერთობლივ განცხადებაში. სრულად... წყარო: transparency.ge

თბილისი. სოციალური სამართლიანობის ცენტრი მწუხარებას გამოთქვამს „5 ივლისს საპატრიარქოს და სხვა ძალადობრივი ჯგუფების მიერ ორგანიზებულ აქციაზე სასტიკად ნაცემი და დღეს გარდაცვლილი ოპერატორის ლექსო ლაშქარავას ოჯახისა და კოლეგების მისამართით და მათ სრულ მხარდაჭერას და თანადგომას უცხადებს“. ორგანიზაცია მიიჩნევს, რომ „5-6 ივლისს განვითარებული ძალადობრივი მოვლენები და დღეს უკვე ახალგაზრდა კაცის გარდაცვალების ეს უმძიმესი და ტრაგიკული გამოცდილება ერთმნიშვნელოვნად პრემიერ-მინისტრისა და შინაგან საქმეთა მინისტრის პოლიტიკური პასუხისმგებლობის საკითხს აყენებს. სამწუხაროა, რომ ჩვენს რეალობაში, მართლმადიდებელი ეკლესიის საპატრიარქო, რომელიც ჰუმანიზმის და სოციალური მსახურების იდეით უნდა მუშაობდეს და ღვაწლს სწევდეს, მოძალადე ჯგუფების მხარეს დგას და 2013 წლის 17 მაისის ტრაგედიის შემდეგ, კვლავ ძალადობრივი აქციების ორგანიზატორად მოგვევლინა“. სრულად... წყარო: socialjustice.org.ge

თბილისი. საქართველოს ჟურნალისტური ეთიკის ქარტია ტელეკომპანია „პირველის“ ოპერატორის ლექსო ლაშქარავას გარდაცვალებსათან დაკავშირებით განცხადებას ავრცელებს. ქარტია მიიჩნევს, რომ „ხელისუფლებამ არ მიიღო სათანადო ზომები ძალადობის აღსაკვეთად და რიგ შემთხვევებში მაღალი რანგის სახელმწიფო მოხელეების განცხადებებმა წაახალისა კიდეც ძალადობრივი ჯგუფების ქმედებები“.  ქარტია ითხოვს ძალადობრივი აქციის მონაწილეების და ორგანიზატორების დასჯას, ჟურნალისტებზე თავდასხმის 50-მდე ფაქტის ადეკვატურად გამოძიებას, შინაგან საქმეთა მინისტრის და პრემიერ-მინისტრის პოლიტიკური პასუხისმგებლობის დაყენებას... სრულად... წყარო: www.qartia.ge

თბილისი. „ეკონომიკური პოლიტიკის კვლევის ცენტრი“ (EPRC) სამძიმარს უცხადებს TV პირველის ოპერატორის, ლექსო ლაშქარავას ოჯახსა და კოლეგებს. „ჩვენ მოვუწოდებთ შესაბამის უწყებებს - დაუყონებლივ მოახდინონ აღნიშნულ ტრაგიკულ ფაქტზე ადეკვატური რეაგირება. მოვითხოვთ გამოძიება და ექსპერტიზა ჩატარდეს გამჭვირვალედ და ეფექტურად და დაისაჯოს დანაშაულის უკლებლივ ყველა ორგანიზატორი, მონაწილე და ხელშემწყობი“. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა-საქართველო“ ღრმა მწუხარებას გამოხატავს ლექსო ლაშქარავას, ტელეკომპანია „პირველის“ ოპერატორის გარდაცვალების გამო და სამძიმარს უცხადებს გარდაცვლილის ოჯახს, მეგობრებს, კოლეგებს. „მოვუწოდებთ სამართალდამცავ ორგანოებს, სასწრაფოდ გამოიძიონ ლექსო ლაშქარავას გარდაცვალების გარემოებები. ასევე მნიშვნელოვანია, რომ დროულად იყვნენ დადგენილი და პასუხისგებაში მიცემული ყველა ის პირი, ვინც 5-6 ივლისის ძალადობის დროს მედიის წარმომადგენლებზე თავდასხმა დააორგანიზა და აღასრულა“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორის ლაბორატორიის სტუდენტმა, თამარ გიორგობიანმა გადაამოწმა თუ რას წერს ავსტრიული გამოცემა თბილისი პრაიდის მოვლენებზე და როგორ გავრცელდა Zeit im Bild-ის პუბლიკაციის გაყალბებული თარგმანი ქართულ სოციალურ ქსელში. „ტელეკომპანია ახალის“ ფეისბუქ გვერდზე გამოქვეყნებული პოსტი „ავსტრიული მედია ქართულ ჯოჯოხეთზე - ავსტრიელები ითხოვენ, რომ ევროკავშირმა საქართველოს დაფინანსება შეუჩეროს” სიმართლეს არ შეესაბამება. სინამდვილეში ავსტრიული გამოცემა Zeit im Bild (ZIB) 5 ივლისს განვითარებულ ძალადობრივ მოვლენებს აღწერს და აღნიშნავს, რომ „საქართველოში ჰომოფობია ფართოდაა გავრცელებული“. ZIB-ის პოსტში არც ფეისბუქზე და არც ინსტაგრამზე ევროკავშირი მიერ საქართველოსთვის დაფინანსების შეწყვეტის მოთხოვნაზე არაფერია აღნიშნული. ფეისბუქ პოსტის ქვეშ დაწერილი 738 კომენტარიდან მხოლოდ ერთ-ერთი მომხმარებელი წერს ევროკავშირის მიერ საქართველოსთვის დახმარების შეჩერების მოთხოვნაზე. სრულად... წყარო: mythdetector.ge

თბილისი. 1 ივნისიდან 3 ივლისის ჩათვლით, მითების დეტექტორი ტრადიციულ და სოციალურ მედიას აკვირდებოდა და ის ძირითადი გზავნილები და აქტორები გამოავლინა, რომლებიც პრაიდის საწინააღმდეგო კამპანიაში იყვნენ ჩართულნი. ანგარიშის თანახმად, ისინი მედიაში სიძულვილის ენის შემცველ გზავნილებს ავრცელებდნენ და პრაიდის საწინააღმდეგო აქციაზე მოქალაქეების შეკრებას ხელმძღვანელობდნენ. „ყველაზე მეტი კომენტარი ანტიდასავლური შინაარსის იყო (62), რა დროსაც, ერთი მხრივ, ჰომოსექსუალობა დასავლეთის მიერ თავსხმოხვეულად იყო წარმოჩენილი, მეორე მხრივ, ხდებოდა ინდივიდუალური თავდასხმები და მუქარები ევროპარლამენტარებსა და დიპლომატიურ კორპუსზე, მათ შორის ამერიკის ელჩზე, რომლის განცხადებები ადამიანის ფუნდამენტური უფლებების დაცვაზე ქვეყნის საშინაო საქმეებში ჩარევად იყო წარმოჩენილი“. სრულად... წყარო: mythdetector.ge

თბილისი. საქართველოს ახალგაზრდა იურისტთა ასოციაცია (საია) 2021 წლის 5 ივლისს დაზარალებული 11 ჟურნალისტის საქმეში ჩაერთო. მედიის წარმომადგენლებზე განხორციელებული ძალადობის და ჟურნალისტური საქმიანობის ხელშეშლის ფაქტებზე გამოძიება უკვე დაწყებულია. ამ ეტაპზე დაზარალებულის სტატუსი 2 ჟურნალისტს მიენიჭა. ორგანიზაცია გააგრძელებს დაზარალებული ჟურნალისტების საქმეებზე მუშაობას და პერიოდულად მიაწვდის საზოგადოებას განახლებულ ინფორმაციას გამოძიების მიმდინარეობის შესახებ.  სრულად... წყარო: gyla.ge

თბილისი. მედია ჩექერი აქვეყნებს ჟურნალისტების სიას, რომლებსაც 5 ივლისს, თბილისში დაგეგმილი „ღირსების მარშის“ წინააღმდეგ გამართულ აქციაზე ძალადობრივი ჯგუფები თავს დაესხნენ.  „ჩვენი ინფორმაციით, დაშავებულია 40-მდე ჟურნალისტი და ოპერატორი. მათი ნაწილი მძიმე დაზიანებებით საავადმყოფოშია გადაყვანილი. დაზიანებულია ტელევიზიების და ონლაინ გამოცემების ტექნიკა“. სრულად... წყარო: www.mediachecker.ge

თბილისი. ომბუდსმენი უკიდურესად შემაშფოთებლად მიიჩნევს ამ წუთებში რუსთაველის გამზირზე და მოძრაობა „სირცხვილიას“ ოფისთან მიმდინარე ძალადობრივ მოვლენებს. „პასუხისმგებლობის მშვიდობიან დემონსტრანტებზე გადატანით, ისედაც დაძაბული ფონი გაამძაფრა, ასევე, საქართველოს პრემიერ-მინისტრის ირაკლი ღარიბაშვილის განცხადებამ, რომელმაც ღირსების მარში სამოქალაქო დაპირისპირების გამომწვევ მიზეზად შეაფასა და აღნიშნა, რომ პრაიდის უკან „რევანშისტული და რადიკალური“ პოლიტიკური ძალები დგანან.  სახალხო დამცველი კიდევ ერთხელ შეახსენებს მაღალი თანამდებობის პირებს, რომ მშვიდობიანი გამოხატვისა და შეკრების თავისუფლების დაცვა, მათ შორის, კონტრდემონსტრანტების ძალადობრივ ქმედებებზე სამართლებრივი რეაგირების გზით, სახელმწიფოს კონსტიტუციური ვალდებულებაა და მოუწოდებს სამართალდამცავ ორგანოებს, სამართლებრივი მექანიზმების გამოყენებით, სავარაუდო სამართალდამრღვევი პირები საჯარო სივრცეებს დროულად განარიდონ“. სრულად... წყარო: ombudsman.ge