თბილისი. „საერთაშორისო გამჭვირვალობა - საქართველოს“ ინფორმაციით, 9 მარტს, ნიკა გვარამიას წინააღმდეგ თბილისის საქალაქო სასამართლოში თითქმის სამი წლის განმავლობაში მიმდინარე სისხლის სამართლის საქმეზე ერთ-ერთი ბოლო სასამართლო განხილვაა ჩანიშნული. შესაძლებელია, რომ სასამართლომ იმავე სხდომაზე განაჩენი გამოიტანოს.  ორგანიზაციის დასკვნით, დასკვნით არ დასტურდება ნიკა გვარამიას მიერ ქონებრივი უფლების გაფლანგვის, კომერციული მოსყიდვის, ყალბი ოფიციალური დოკუმენტის დამზადებისა და გამოყენების, ასევე უკანონო შემოსავლის ლეგალიზაციის ბრალდებები. სახალხო დამცველის შეფასებით, გვარამიასთვის წარდგენილი ბრალდება არ შეიცავს სისხლისსამართლებრივი პასუხისმგებლობის დაკისრებისთვის საკმარის მკაფიო ნიშნებს. „იმედს ვიტოვებთ, რომ სასამართლო პოლიტიკური ჩარევისგან დამოუკიდებელ, კანონიერ და დასაბუთებულ გადაწყვეტილებას მიიღებს.“ სრულად... წყარო: transparency.ge

თბილისი. გავრცელებული ინფორმაციის თანახმად, 2022 წლის 5 მარტს, საქართველოში არ შემოუშვეს რუსული დამოუკიდებელი არხის, „დოჟდის“ ჟურნალისტი მიხეილ ფიშმანი. 2022 წლის 06 მარტს ცნობილი გახდა, რომ მიხეილ ფიშმანის ოჯახი საქართველოშია, ჟურნალისტს კი არ ეძლევა შესაძლებლობა გადმოკვეთოს საზღვარი და ისევ ელოდება პასუხს საქართველოს სახელმწიფოსგან.  „საზოგადოებას შევახსენებთ, რომ „დოჟდი“ კრიტიკული სარედაქციო პოლიტიკის მქონე მაუწყებელი იყო რუსეთში. უკრაინაში მიმდინარე საომარი მოქმედებების ფონზე, ტელეკომპანიამ მაუწყებლობა 3 მარტს შეაჩერა. მიგვაჩნია, რომ ჟურნალისტის შეზღუდვის ფაქტი შესაძლოა დისკრიმინაციული იყოს იმ ფონზე, როცა მსგავსს დაბრკოლებებს რუსეთიდან ერევნის გავლით შემოსული სხვა პირები არ აწყდებიან. შესაბამისად, სახელმწიფომ უნდა განმარტოს თუ რა გახდა მიხეილ ფიშმანის არ შემოშვების მიზეზი. კოალიცია მოუწოდებს საქართველოს ხელისუფლებას საზღვრის კვეთისას არ შეუქმნას ხელოვნური დაბრკოლებები პროფესიული საქმიანობის გამო შევიწროებულ რუს ჟურნალისტებს. განუხრელად შეასრულოს „საერთაშორისო დაცვის შესახებ“ საქართველოს კანონის მოთხოვნები და არ შელახოს კრიტიკული ჟურნალისტების და მათთან ერთად მყოფი პირების უფლებები“. სრულად... წყარო: mediacoalition.ge

თბილისი. მედიის განვითარების ფონდმა (MDF) სომხეთიდან, ჩეხეთიდან, გერმანიიდან, თურქეთიდან და საქართველოდან ჟურნალისტებსა და ტრენერებს უმასპინძლა. ორგანიზაციამ მათ ფაქტების გადამოწმების პლატფორმა „მითების დეტექტორის“ საქმიანობა გააცნო და ინფოდემიასთან ბრძოლაში ინფორმაციის ვერიფიკაციის როლზე და ხერხებზე ესაუბრა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს დემოკრატიული ინიციატივის (GDI) თავმჯდომარემ, ედუარდ მარიკაშვილმა, საქართველოს კომუნიკაციების ეროვნულ კომისიას ტელეკომპანია „ალტ-ინფოს“ სამართალდამარღვევად ცნობისა და ადმინისტრაციული პასუხისმგებლობის დაკისრების მოთხოვნით მიმართა. „მიგვაჩნია, რომ ტელეკომპანია „ალტ-ინფოს“ მიერ გაკეთებული განცხადებები ემსახურება რუსეთის ფედერაციის მიერ ჩადენილი დანაშაულებრივი ქმედებებისა და საერთაშორისო ჰუმანიტარული სამართლის ნორმების დარღვევის ფაქტების გამართლებას და კრიმინალის გაიდეალებას, რაც აკრძალულია „მაუწყებლობის შესახებ“ საქართველოს კანონით“. სრულად... წყარო: gdi.ge

ვებგვერდზე EUvsDisinfo გამოქვეყნდა ბლოგპოსტი: კრემლის სცენარი: უკრაინაში შეჭრის საბაბის გამოგონება - კიდევ უფრო მეტი მითი... EUvsDisinfo 2015 წელს შეიქმნა იმ მიზნით, რომ უფრო ეფექტურად ეპასუხა რუსეთის ფედერაციის მხრიდან მომდინარე სადეზინფორმაციო კამპანიებზე, რომლებიც გავლენას ახდენს ევროკავშირზე, მის წევრ და მეზობელ ქვეყნებზე. ბლოგპოსტში საუბარია შვიდ ყველაზე გავრცელებულ და საშიშ მითზე უკრაინის შესახებ. სრულად... წყარო: euvsdisinfo.eu

თბილისი. კოალიცია „მედიის ადვოკატირებისთვის“ თბილისის საქალაქო სასამართლოს ეზოში ჟურნალისტებზე თავდასხმის ფაქტებზე დაუყოვნებლივ რეაგირებას ითხოვს. „2 მარტს 5-6 ივლისის მოვლენებთან დაკავშირებულ სასამართლო პროცესზე გამოკითხვის შემდეგ, „ფორმულას“ ჟურნალისტს, რატი წვერავას სასამართლოსთან, სავარაუდოდ, ძალადობრივ ჯგუფებთან დაკავშირებული პირები დახვდნენ. ისინი ჟურნალისტს აყენებდნენ სიტყვიერ შეურაცხყოფას და ცდილობდნენ ძალადობრივ ანგარიშსწორებას. ამასთანავე, შეურაცხყოფა მიაყენეს „რუსთავი 2” -ის თანამშრომლებს არჩილ ჭიჭიბოშვილს და ხათუნა გაგნიძეს. მიგვაჩნია, რომ ჟურნალისტების წინააღმდეგ მომხდარ ძალადობრივ ქმედებებზე დროული სამართლებრივი რეაგირება აუცილებელია მედიისა და გამოხატვის თავისუფლების დასაცავად და მედიის წარმომადგენლებისთვის უსაფრთხო სამუშაო გარემოს უზრუნველსაყოფად“. სრულად... წყარო: mediacoalition.ge

თბილისი. საინფორმაციო პლატფორმა EUNEIGHBOURS east აქვეყნებს ბლოგპოსტს: გააცნობიერე დეზინფორმაცია: დაფიქრდი, სანამ გააზიარებ. „დღევანდელ დღეს, კიდევ უფრო მეტი სიფრთხილის გამოჩენა გვმართებს ონლაინ სივრცეში გავრცელებულ დეზინფორმაციასთან დაკავშირებით. ბლოგპოსტი გთავაზობთ რჩევებს, როგორ შეამოწმოთ ინფორმაცია ონლაინ სივრცეში“. სრულად... წყარო: euneighbourseast.eu

თბილისი. კოალიცია „მედიის ადვოკატირებისთვის“ მოუწოდებს საქართველოს პარლამენტს, კომუნიკაციების კომისიას და ელექტრონული საკომუნიკაციო ქსელის ოპერატორებს მიიღონ ეფექტიანი ზომები საქართველოში რუსეთის სახელმწიფოს მიერ კონტროლირებადი და კრემლის სხვა პროპაგანდისტული მედიების შეჩერებისთვის. სრულად... წყარო: transparency.ge ფოტო: Euronews Georgia

ჯავახეთი-ქვემო ქართლი. სამართლიანმა არჩევნებმა (ISFED) 2020 წლის საპარლამენტო და 2021 წლის ადგილობრივი თვითმმართველობის არჩევნებისთვის ეთნიკური უმცირესობებით დასახლებულ ორ რეგიონში, სამცხე ჯავახეთსა და ქვემო ქართლში სოციალური მედიის ექსპერიმენტული კვლევა ჩაატარა. მონიტორინგის მიზანი იყო გამოევლინა სოციალური მედიის პლატფორმების პოლიტიკური მიზნებით გამოყენების ტენდენციები და გამოეკვეთა მთავარი გზავნილები, რომლებიც არჩევნების პერიოდში იყო აქტუალური და ამომრჩეველთა ქცევასა და განწყობებზე გავლენას ისახავდა მიზნად. სრულად... წყარო: isfed.ge

თბილისი. მითების დეტექტორმა გადაამოწმა ვიზუალური მანიპულაცია, რომელზეც წალენჯიხის მერი ჩასარიცხ აპარატთან ერთადაა გამოსახული. მანიპულაციას მერის გაყალბებული ციტატაც აქვს დართული. ის „ქართული ოცნების“ მხარდამჭერი ფეისბუქ გვერდის „ლიდერი 41” ადმინისტრატორმა დავით თორდიამ პირად ფეისბუქ-პროფილზე გააზიარა. „დავით თორდიას პოსტი დამუშავებულ ფოტოს და გაყალბებულ ციტატას შეიცავს. გიორგი ხარჩილავას ავთენტურ ფოტოზე წალენჯიხის გერბია და არა ჩარიცხვის აპარატი, მისი ციტატა კი აპარატის კაბინეტში დადგმასთან დაკავშირებით – გამოგონილია“, ნათქვამია მითების დეტექტორის ვებგვერდზე. სრულად... წყარო: mythdetector.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, „ფეისბუქის“ მიერ რამდენჯერმე წაშლის, სხვა პლატფორმებზე გადასვლისა და ტელეარხის შექმნის შემდეგ „ალტ-ინფო“ ფეისბუქზე კვლავ გააქტიურდა. „ამჯერად პრორუსული ჯგუფისთვის ფეისბუქაუდიტორიამდე მისვლა გაცილებით მარტივი და სტაბილურია, რადგან ორგანიზაციის ძირითად გვერდზე, „ალტ-სიახლეზე“ გაშვებულ პირდაპირ ეთერებს ახლა უკვე პარტია „კონსერვატიულ მოძრაობასთან“ დაკავშირებულ გვერდებზე, ჯგუფებსა და ფეისბუქპროფილებზე ავრცელებენ“. სრულად... წყარო: isfed.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს 26 იანვარი - 2 თებერვლის მონაცემებით, Facebook-ზე გავრცელებულ მთავარ მადისკრედიტირებელ გზავნილებს. „გზავნილები შეგროვებულია იმ გვერდებიდან, რომლებიც Facebook-ზე როგორც მმართველი პარტიისა და მთავრობის, ასევე ოპოზიციური პარტიების პოლიტიკურ დისკრედიტაციას ეწევიან. მსგავსი Facebook გვერდების შესახებ ინფორმაცია ხელმისაწვდომია ჩვენს ვებგვერდზე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) და საქართველოს უნივერსიტეტის საერთო პროგრამის: „დეზინფორმაციისა და პროპაგანდის კვლევის“ სტუდენტებისა და საქართველოს უნივერსიტეტის, სოციალურ მეცნიერებათა სკოლის სტუდენტებისთვის სემინარი ჩატარდა.  „სემინარზე ყურადღება გამახვილდა მთავრობებისა და სამხედროების მიერ საბრძოლო მოქმედებების ხაზზე გავრცელებული დეზინფორმაციული ნარატივების შინაარსსა და მათი გაბათილების მექანიზმებზე. ამასთანავე, სემინარის მონაწილეებს მიეწოდათ ინფორმაცია მეინსტრიმული და რუსული მარიონეტული მედიის მიერ გავრცელებული ინფორმაციის შემოწმებაზე, განსაკუთრებით კონფლიქტურ ზონებში (განხილული იყო აფხაზეთისა და ყირიმის მაგალითები)“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. UNESCO-ს წიგნში „ჟურნალისტიკა, „ყალბი ამბები“ და დეზინფორმაცია”, რომლის ქართული ვერსია თარგმნილია და გამოცემულია მედიის განვითარების ფონდი, MDF-ის მიერ წაიკითხავთ თუ როგორ უნდა ამოვიცნოთ ვიზუალური მანიპულაციები. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორის ინფორმაციით, რუსთავი 2-ის გადაცემის ნაწყვეტი კონსპირაციებისა და დეზინფორმაციების გასავრცელებლად გამოიყენეს. „ეკა კვალიაშვილმა თქვა, რომ მას სჯერა, რომ Covid-19-ს ახალ შტამს, ომიკრონს თვითმფრინავებიდან ტომრებით გვაყრიან, ხოლო თემურ წიკლაური კორონავირუსით არ გარდაცვლილა. Tsotne Kveselava-ს აღწერის მიხედვით, კი იმუნოლოგი თენგიზ ცერცვაძე რეპტილიაა“. სრულად... წყარო: mythdetector.ge

თბილისი. საქართველოს ახალგაზრდა იურისტთა ასოციაციის ინფორმაციით, ჟურნალისტური ეთიკის ქარტიამ ორგანიზაციის საჩივარი დააკმაყოფილა და დაადგინა, რომ ტელეკომპანია „იმედის" ჟურნალისტებმა ნათია სონღულაშვილმა, ლევან კვატაშიძემ, ლევან ჯავახიშვილმა, ხატია ქვათაძემ და ნინო თოლორდავამ დაარღვიეს ქარტიის 1-ლი და მე-11 პრინციპი. სრულად... წყარო: www.qartia.ge

თბილისი. სამართლიანი არჩევნებისა და დემოკრატიის საერთშორისო საზოგადოების (ISFED) ინფორმაციით, ის გახდა პირველი ორგანიზაცია საქართველოში, რომელმაც ტიკტოკის პლატფორმაზე წინასაარჩევნოდ მიმდინარე ტენდენციები და საინფორმაციო მანიპულაციები შეისწავლა. „ძირითადი მიგნებების მიხედვით, ფეისბუქის მიერ გაუქმებული არაერთი ცნობილი ანონიმური და პროპაგანდისტული გვერდი წარმატებით გადაერთო ტიკტოკის პლატფორმაზე, მათ შორის „ალტ-ინფოს“ ქსელი“. სრულად... წყარო: isfed.ge

გურია. 25 იანვარს, ინოვაციებისა და სამოქალაქო განვითარების ცენტრში - პროგრესის სახლი (გურიის ჰაბი) გაიმართა მედია კონკურსის გამარჯვებულების დაჯილდოება. კონკურსის მიზანი იყო სამოქალაქო საზოგადოების ორგანიზაციებისა და სამოქალაქო აქტივისტების საქმიანობის წარმოჩენა და მათი ფართო საზოგადოებისთვის გაცნობა. კონკურსის გამარჯვებულები გახდნენ: ტელეკომპანია „გურია“-ს ჟურნალისტი - თამთა დოლიძე და გაზეთ „გურია ნიუსი“-ს ჟურნალისტები - გიორგი გირკელიძე და მარინა ჩიხლაძე.  მედია კონკურსი ჩატარდა ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივის“ ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. EWMI-Access აქვეყნებს Movement-ის მიერ მომზადებულ ვიდეოს, რომელშიც საუბარია იმ პროექტებზე და ინოვაციურ მეთოდებზე, რომელსაც ორგანიზაციის პარტნიორები ინფოდემიის და დეზინფორმაციის გაქარწყლებისა და მოქალაქეების გასაძლიერებლად იყენებენ. „დეზინფორმაციისა და პროპაგანდის საფრთხეების აღიარებასა და მათ წინააღმდეგ ბრძოლაში მთავარი როლი სამოქალაქო საზოგადოებასა და მედიას ეკუთვნის. ბოლო ორი წელი ამ მხრივ განსაკუთრებით რთული იყო, როდესაც პანდემიისა და საპარლამენტო და თვითმმართველობის არჩევნების პერიოდში მოქალაქეების ინფორმაციული მანიპულაცია სერიოზულ საფრთხეებს უქმნიდა ქვეყნის უსაფრთხოებასა და დემოკრატიულ განვითარებას. დეზინფორმაციასთან ბრძოლის თვალსაზრისით სამოქალაქო სექტორში დიდი და მრავალფეროვანი გამოცდილება დაგროვდა, რასაც USAID/Georgia-ს დაფინანსებით ACCESS-ის პროგრამამაც შეუწყო ხელი“. წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს კვლევის მიხედვით, მუნიციპალიტეტების მიერ 2020 წელს განხორციელებული სახელმწიფო შესყიდვების კვლევის შედეგად, დგინდება, რომ:  „სახელმწიფო შესყიდვების შედეგად 15-მა ადგილობრივმა ტელევიზიამ ჯამში 686 ათას ლარზე მეტი მიიღო. 63 მუნიციპალიტეტიდან სამაუწყებლო მომსახურების შესყიდვა 18-მა განახორციელა, კერძოდ, ჩატარდა 14 ტენდერი და 4 გამარტივებული შესყიდვა. ყველაზე მსხვილი შესყიდვები რუსთავის, მარნეულის, გურჯაანის, ქუთაისის და ნინოწმინდის მუნიციპალიტეტებმა განახორციელეს“... სრულად... წყარო: transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: პოლიტიკური რეკლამები Facebook-სა და Instagram-ზე 2021 წლის არჩევნების პერიოდში. „Facebook-ის რეკლამების ბიბლიოთეკის მიხედვით, 2021 წლის ადგილობრივი თვითმმართველობის არჩევნებისთვის 9 აგვისტოდან 6 ნოემბრის ჩათვლით პერიოდში ფეისბუქსა და ინსტაგრამზე არჩევნებში მონაწილე პოლიტიკური პარტიებისა და მათი წარმომადგენლების/კანდიდატების მიერ 8 126 პოლიტიკური რეკლამა განთავსდა, რაზეც არანაკლებ 524 602 და არაუმეტეს 536 086 აშშ დოლარი დაიხარჯა“. სრულად... წყარო: isfed.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ ლექსო ლაშქარავას საქმეზე ექსპერტიზის პროცესში საერთაშორისო ექსპერტების ჩაურთველობა, ასევე, არაპროპორციული მოცულობით ექსპერტიზის დასკვნის გავრცელება, ამცირებს გამოძიების პროცესის მიმართ ნდობას. „საია ლექსო ლაშქარავას ოჯახთან შეთანხმებით, გააგრძელებს მიმდინარე გამოძიებების პროცესში ოჯახის უფლებების დაცვას. ორგანიზაციის ადვოკატი მიმართავს საგამოძიებო უწყებას ექსპერტიზის დასკვნის გადმოცემის თაობაზე, ხოლო დამატებით ინფორმაციას საზოგადოებას სწორედ აღნიშნული დოკუმენტის სრულყოფილად გაცნობის შედეგად გავაცნობთ“, ნათქვამია ორგანიზაციის განცხადებაში. სრულად... წყარო: gyla.ge