თბილისი. „საერთაშორისო გამჭვირვალობა-საქართველო“ ღრმა მწუხარებას გამოხატავს ლექსო ლაშქარავას, ტელეკომპანია „პირველის“ ოპერატორის გარდაცვალების გამო და სამძიმარს უცხადებს გარდაცვლილის ოჯახს, მეგობრებს, კოლეგებს. „მოვუწოდებთ სამართალდამცავ ორგანოებს, სასწრაფოდ გამოიძიონ ლექსო ლაშქარავას გარდაცვალების გარემოებები. ასევე მნიშვნელოვანია, რომ დროულად იყვნენ დადგენილი და პასუხისგებაში მიცემული ყველა ის პირი, ვინც 5-6 ივლისის ძალადობის დროს მედიის წარმომადგენლებზე თავდასხმა დააორგანიზა და აღასრულა“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორის ლაბორატორიის სტუდენტმა, თამარ გიორგობიანმა გადაამოწმა თუ რას წერს ავსტრიული გამოცემა თბილისი პრაიდის მოვლენებზე და როგორ გავრცელდა Zeit im Bild-ის პუბლიკაციის გაყალბებული თარგმანი ქართულ სოციალურ ქსელში. „ტელეკომპანია ახალის“ ფეისბუქ გვერდზე გამოქვეყნებული პოსტი „ავსტრიული მედია ქართულ ჯოჯოხეთზე - ავსტრიელები ითხოვენ, რომ ევროკავშირმა საქართველოს დაფინანსება შეუჩეროს” სიმართლეს არ შეესაბამება. სინამდვილეში ავსტრიული გამოცემა Zeit im Bild (ZIB) 5 ივლისს განვითარებულ ძალადობრივ მოვლენებს აღწერს და აღნიშნავს, რომ „საქართველოში ჰომოფობია ფართოდაა გავრცელებული“. ZIB-ის პოსტში არც ფეისბუქზე და არც ინსტაგრამზე ევროკავშირი მიერ საქართველოსთვის დაფინანსების შეწყვეტის მოთხოვნაზე არაფერია აღნიშნული. ფეისბუქ პოსტის ქვეშ დაწერილი 738 კომენტარიდან მხოლოდ ერთ-ერთი მომხმარებელი წერს ევროკავშირის მიერ საქართველოსთვის დახმარების შეჩერების მოთხოვნაზე. სრულად... წყარო: mythdetector.ge

თბილისი. 1 ივნისიდან 3 ივლისის ჩათვლით, მითების დეტექტორი ტრადიციულ და სოციალურ მედიას აკვირდებოდა და ის ძირითადი გზავნილები და აქტორები გამოავლინა, რომლებიც პრაიდის საწინააღმდეგო კამპანიაში იყვნენ ჩართულნი. ანგარიშის თანახმად, ისინი მედიაში სიძულვილის ენის შემცველ გზავნილებს ავრცელებდნენ და პრაიდის საწინააღმდეგო აქციაზე მოქალაქეების შეკრებას ხელმძღვანელობდნენ. „ყველაზე მეტი კომენტარი ანტიდასავლური შინაარსის იყო (62), რა დროსაც, ერთი მხრივ, ჰომოსექსუალობა დასავლეთის მიერ თავსხმოხვეულად იყო წარმოჩენილი, მეორე მხრივ, ხდებოდა ინდივიდუალური თავდასხმები და მუქარები ევროპარლამენტარებსა და დიპლომატიურ კორპუსზე, მათ შორის ამერიკის ელჩზე, რომლის განცხადებები ადამიანის ფუნდამენტური უფლებების დაცვაზე ქვეყნის საშინაო საქმეებში ჩარევად იყო წარმოჩენილი“. სრულად... წყარო: mythdetector.ge

თბილისი. საქართველოს ახალგაზრდა იურისტთა ასოციაცია (საია) 2021 წლის 5 ივლისს დაზარალებული 11 ჟურნალისტის საქმეში ჩაერთო. მედიის წარმომადგენლებზე განხორციელებული ძალადობის და ჟურნალისტური საქმიანობის ხელშეშლის ფაქტებზე გამოძიება უკვე დაწყებულია. ამ ეტაპზე დაზარალებულის სტატუსი 2 ჟურნალისტს მიენიჭა. ორგანიზაცია გააგრძელებს დაზარალებული ჟურნალისტების საქმეებზე მუშაობას და პერიოდულად მიაწვდის საზოგადოებას განახლებულ ინფორმაციას გამოძიების მიმდინარეობის შესახებ.  სრულად... წყარო: gyla.ge

თბილისი. მედია ჩექერი აქვეყნებს ჟურნალისტების სიას, რომლებსაც 5 ივლისს, თბილისში დაგეგმილი „ღირსების მარშის“ წინააღმდეგ გამართულ აქციაზე ძალადობრივი ჯგუფები თავს დაესხნენ.  „ჩვენი ინფორმაციით, დაშავებულია 40-მდე ჟურნალისტი და ოპერატორი. მათი ნაწილი მძიმე დაზიანებებით საავადმყოფოშია გადაყვანილი. დაზიანებულია ტელევიზიების და ონლაინ გამოცემების ტექნიკა“. სრულად... წყარო: www.mediachecker.ge

თბილისი. ომბუდსმენი უკიდურესად შემაშფოთებლად მიიჩნევს ამ წუთებში რუსთაველის გამზირზე და მოძრაობა „სირცხვილიას“ ოფისთან მიმდინარე ძალადობრივ მოვლენებს. „პასუხისმგებლობის მშვიდობიან დემონსტრანტებზე გადატანით, ისედაც დაძაბული ფონი გაამძაფრა, ასევე, საქართველოს პრემიერ-მინისტრის ირაკლი ღარიბაშვილის განცხადებამ, რომელმაც ღირსების მარში სამოქალაქო დაპირისპირების გამომწვევ მიზეზად შეაფასა და აღნიშნა, რომ პრაიდის უკან „რევანშისტული და რადიკალური“ პოლიტიკური ძალები დგანან.  სახალხო დამცველი კიდევ ერთხელ შეახსენებს მაღალი თანამდებობის პირებს, რომ მშვიდობიანი გამოხატვისა და შეკრების თავისუფლების დაცვა, მათ შორის, კონტრდემონსტრანტების ძალადობრივ ქმედებებზე სამართლებრივი რეაგირების გზით, სახელმწიფოს კონსტიტუციური ვალდებულებაა და მოუწოდებს სამართალდამცავ ორგანოებს, სამართლებრივი მექანიზმების გამოყენებით, სავარაუდო სამართალდამრღვევი პირები საჯარო სივრცეებს დროულად განარიდონ“. სრულად... წყარო: ombudsman.ge

თბილისი. კოალიცია „მედიის ადვოკატირებისთვის“ კიდევ ერთხელ მოუწოდებს საქართველოს შინაგან საქმეთა სამინისტროს მიიღოს ეფექტური ზომები ჟურნალისტების დასაცავად. „დღეს გავრცელებული ინფორმაციით, რუსთაველის გამზირზე ძალადობრივი ჯგუფები ჟურნალისტებს ფიზიკურ და სიტყვიერ შეურაცხყოფას აყენებენ. ძალადობრივი ჯგუფის წევრები ჟურნალისტებს თავს ესხმიან, აგინებენ და ტერიტორიის დატოვებას აიძულებენ. ამ დრომდე უცნობია დააკავეს თუ არა ვინმე ჟურნალისტებზე თავდასხმის გამო. ხელისუფლების წარმომადგენლებს არ გაუკეთებიათ ღია განცხადებები აგრესიის დაგმობისა და შეჩერების მიზნით. მოვუწოდებთ საქართველოს შინაგან საქმეთა სამინისტროს, გამოიყენოს ეფექტური ზომების მედიის უსაფრთხოების და გამოხატვის თავისუფლების საუკეთესო მიზნების გათვალისწინებით“. სრულად... წყარო: ორგანიზაციის გვერდი სოციალურ ქსელში

თბილისი. გავრცელებული ინფორმაციით, რუსთაველის გამზირზე ძალადობრივი ჯგუფები ჟურნალისტებს ფიზიკურ და სიტყვიერ შეურაცხყოფას აყენებენ. „ჟურნალისტური ეთიკის ქარტია მოუწოდებს ხელისუფლებას, დაიცვას ჟურნალისტთა უსაფრთხოება და პროფესიული საქმიანობის შესრულებისას მედიას შეუქმნას შესაბამისი სამუშაო პირობები, რათა მოქალაქეებს ჰქონდეთ შესაძლებლობა, მიიღონ ინფორმაცია მიმდინარე პროცესებთან დაკავშირებით“.  სრულად... წყარო: www.qartia.ge

ყაზბეგი. „უფლებები საქართველოს“ ორგანიზებით, 26-27 ივნისს, გუდაურში, ჩატარდა გასვლითი ტრენინგი, თემაზე - „მედია და ადამიანის უფლებათა ჟურნალისტიკა“, რომელსაც სხვადასხვა მედიაორგანიზაციის წარმომადგენლები და თბილისის ღია უნივერსიტეტის ჟურნალისტიკის ფაკულტეტის სტუდენტები დაესწრნენ. „ტრენინგის ფარგლებში, მონაწილეები გაეცნენ ისეთ საკითხებს, როგორებიცაა: ადამიანის უფლებათა ჟურნალისტიკა, გამოხატვის თავისუფლება სუბიექტების მიხედვით, პირადი ცხოვრების დაცულობის უფლება და ადამიანის უფლებათა ევროპული სასამართლოს სტანდარტები, პირადი ცხოვრების დაცულობის უფლება ჟურნალისტური ეთიკის ქარტიის სტანდარტების ჭრილში, საგანგებო მდგომარეობა და მედიის თავისუფლება“. სრულად... წყარო: rights.ge

მედიის განვითარების ფონდმა (MDF) დაასრულა 3-დღიანი ტრენინგები უმაღლესი სასწავლებლებისა და მედიასკოლების ლექტორებისთვის აკადემიური სწავლების პროცესში ყალბი ინფორმაციის ვერიფიკაციისა და მედიაწიგნიერების კომპონენტის ინტეგრირების თემაზე. „ტრენინგის მონაწილეებმა წარმოდგენილ მაგალითებსა და სასწავლო რესურსზებზე დაყრდნობით ფაქტების გადამოწმების სწავლების სილაბუსები დაგეგმეს“.  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებათა ევროპულმა სასამართლომ საქართველოს ახალგაზრდა იურისტთა ასოციაციის და EHRAC-ის მიერ 2019 წლის 20-21 ივნისს დაზარალებული ჟურნალისტებისა და დემონსტრანტების სახელით შეტანილი საჩივრების არსებითი განხილვა დაიწყო. „კერძოდ, სასამართლომ საქართველოს მთავრობას, როგორც მოპასუხე სახელმწიფოს, საქმეებზე - ბაღაშვილი და სხვები საქართველოს წინააღმდეგ და ქურდოვანიძე და სხვები საქართველოს წინააღმდეგ, შესაბამისი კითხვებით მიმართა.  გარდა უფლებების დარღვევის შესახებ შეკითხვებისა, ევროპულმა სასამართლომ დააკმაყოფილა საიას ადვოკატების მოთხოვნა და დაავალა საქართველოს მთავრობას, წარმოადგინოს 2019 წლის 20-21 ივნისს აქციის დაშლასთან დაკავშირებით პროკურატურის მიერ წარმოებული სისხლის სამართლის საქმის მასალები“, ნათქვამია საია-ს ვებგვერდზე.  სრულად... წყარო: gyla.ge

თბილისი. მითების დეტექტორის მასალაში საუბარია Deepfake მეთოდით გაყალბებულ პოსტზე, რომელშიც ბრიტანეთის დედოფალი ელიზაბეტ II თითქოს „მოსახლეობის პროგრამირებას“ ახდენს. „სამყარო სამყაროს“ მიერ გავრცელებულ პოსტს დართული აქვს კადრი ფილმების სერიიდან Resident Evil და ვიდეო ამერიკელი მწერალი დოლორეს ქენონის შესახებ. გაყალბებულ პოსტში დედოფალს კორონავირუსის აგებულების მსგავსი ბროში აქვს დაბნეული, მის უკან ნაძვის ხეზე კი, ასევე, კორონავირუსის აგებულებასთან მიმსგავსებული სათამაშო კიდია.  „გავრცელებული ინფორმაცია, თითქოს დედამიწის მოსახლეობის 1%-ს დანარჩენი მოსახლეობა დაპროგრამებული ჰყავს და ამ ყველაფერში დედოფალი ელიზაბეტ II-ა ჩართული, კონსპირაციაა. ფოტო, რომელიც პოსტს თან ერთვის, Deepfake ვიდეოს ფრაგმენტია, ხოლო ნამდვილ ვიდეოში დედოფალს SARS-COV-2 ვირუსის აგებულების მსგავსი გულსაბნევი და ნაძვის ხის სათამაშო არ აქვს“. მასალის თანახმად, Deepfake მეთოდით ვიდეოში შესაძლებელია ერთი ადამიანის სხეულს სხვა ადამიანის სახე, მიმიკები (მაგ: თვალის დახამხამება) „მივაბათ“. ამ მეთოდით ნებისმიერი პირის გამოსვლის გაყალბებაა შესაძლებელი და საკმაოდ ოსტატურადაც. სრულად... წყარო: mythdetector.ge

თბილისი. 13 აპრილს მედიასაშუალება „POSTV“-ის ახალ ამბებში ნამახვანი ჰესის საწინააღმდეგო აქციასთან დაკავშირებით გასულ სიუჟეტში „რიონის ხეობის დამცველთა“ ერთ-ერთი აქტივისტის ვინაობის ნაცვლად, სხვა პირის სახელი და გვარი იყო მითითებული. სიუჟეტში ნაჩვენები იყო, რომ ის თანამოაზრეებთან ერთად ქაოსს ქმნის პოლიტიკური ინტერესებისთვის და მიზანი კი დესტრუქცია და არეულობის შექმნაა. სიუჟეტის თანახმად, ისინი აქციის მონაწილეებს ფიზიკურად დაუპირისპირდნენ და მომხდარის დეტალებს შინაგან საქმეთა სამინისტრო სწავლობს. საია-ს დახმარებით, რიონის ხეობის მცველმა განცხადებით მიმართა საქართველოს ჟურნალისტური ეთიკის ქარტიას, რათა შეესწავლა მედიასაშუალების მიერ პროფესიული სტანდარტების დარღვევის საკითხი, კერძოდ ჟურნალისტური ეთიკის ქარტიის პირველი, მესამე, მეხუთე, მეშვიდე და მეთერთმეტე პრინციპების შესაძლო დარღვევა. 2021 წლის 10 ივნისს ამ საქმეზე შედგა მედიაცია. POSTV-მ გამოთქვა ინფორმაციის გასწორებისა და საქმის მედიაციით დასრულების სურვილი. შედეგად, არასწორი ინფორმაციის შემცველი სიუჟეტი მოიხნსა სოციალური ქსელებიდან; სრულად... წყარო: gyla.ge

თბილისი. ადამიანის უფლებათა ცენტრი თბილისის საქალაქო სასამართლოში ჟურნალისტ ვახო სანაიაზე თავდასხმაში ბრალდებული სამი პირის სასამართლო პროცესს დააკვირდება. „ბრალდების თანახმად, 25 თებერვალს, ჟურნალისტ ვახო სანაიას თავს ნასვამ მდგომარეობაში მყოფი სამი პირი დაესხა. ის ოჯახის წევრებთან, მათ შორის მცირეწლოვან შვილთან ერთად იმყოფებოდა და სამაშველო სამსახურის წარმომადგენლებთან ერთად პირადი ავტომანქანის აღმართზე აყვანას ცდილობდა, როდესაც, მისი თქმით, ფიზიკური შეურაცხყოფა მიაყენეს, დაემუქრნენ და მისი ოჯახის წევრებს ფიზიკურად გაუსწორდნენ“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, ბოლო პერიოდში ქვეყანაში მედია გარემო მნიშვნელოვნად გაუარესდა და პროფესიული საქმიანობის განხორციელება საფრთხის შემცველი გახდა ჟურნალისტებისათვის, განსაკუთრებით კი კრიტიკული მედიის წარმომადგენლებისათვის. „მმართველი პარტიის წევრთა აგრესიული რიტორიკა და სოციალურ ქსელებში სავარაუდოდ მათ მიერ მხარდაჭერილი დეზინფორმაციული კამპანია, პოლიტიკურად მოტივირებული საქმეები და სახელმწიფოს მხრიდან ჟურნალისტების პროფესიული საქმიანობის ხელის შეშლასა და ძალადობაზე არასათანადო რეაგირება - ეს არის არასრული ნუსხა იმ პრობლემებისა, რომლის წინაშეც დღეს კრიტიკული მედიის წარმომადგენლები დგანან“. სრულად... წყარო: transparency.ge

თბილისი. მედიის განვითარების ფონდი (MDF) და The Critical Mass (TCM) გიწვევთ ერთობლივ ვებინარზე: „შერყეული ნდობა: დეზინფორმაცია საზოგადოებრივი ჯანდაცვის სფეროში და მისი გავლენა საქართველოს საზოგადოებაზე”, რომელიც 4 ივნისს, 17:00 საათზე ონლაინ გაიმართება. შეხვედრაზე წარმოდგენილი იქნება TCM-ის ახალი ანგარიშის მთავარი მიგნებები რუსული დეზინფორმაციის გავლენაზე საზოგადოებრივი ჯანდაცვის სფეროზე საქართველოში. ასევე ვისაუბრებთ ინფოდემიაზე და კრემლის ინფორმაციულ ოპერაციებზე საქართველოში, Facebook-ის პოლიტიკაზე COVID-19-ის დეზინფორმაციის წინააღმდეგ და საქართველოს მთავრობის სტრატეგიული კომუნიკაციაზე გლობალური პანდემიის პირობებში. ღონისძიებაზე დასასწრებად გთხოვთ გაიაროთ რეგისტრაცია 2 ივნისამდე... სრულად... წყარო: ორგანიზაციის გვერდი სოციალურ ქსელში

თბილისი. მედიის განვითარების ფონდი (MDF) ახალ გზამკვლევს: „როგორ (არ) გავაშუქოთ მრავალფეროვნება“ წარადგენს. „გზამკვლევი ხელს შეუწყობს ჟურნალისტიკის მიმართულების სტუდენტთა შორის მოწყვლადი ჯგუფების თემატიკისადმი მგრძნობელობის განვითარებას და მრავალფეროვნების საკითხების ინკლუზიურ გაშუქებას. სახელმძღვანელო მომზადდა პროექტის „ნარატივების რადიკალიზაციის პრევენცია და მათზე რეაგირება საქართველოში“ ფარგლებში, რომელსაც მედიის განვითარების ფონდი STRIVE Global program-ის ფარგლებში ახორციელებს“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს კომუნიკაციების ეროვნულმა კომისიამ, სახალხო დამცველის აპარატის მიმართვის საფუძველზე, შპს „ალტ ინფოს“ ეთერში გასული გადაცემა შეისწავლა და დაადგინა, რომ პროგრამის ეთერში განთავსებით ძალიან მაღალი ზიანი მიადგა, როგორც არასრუწლოვან, ისე სრულწლოვან მაყურებელს. კომისიის გადაწყვეტილებით შპს „ალტ ინფოს“ მაუწყებლობის შესახებ საქართველოს კანონის დარღვევისთვის ადმინისტრაციული პასუხისმგებლობა დაეკისრა. სრულად... წყარო: ombudsman.ge

თბილისი. მითების დეტექტორის მასლიდან გაიგებთ - ვინ ადარებს ვარლამ გოლეთიანს ქრისტეს, რომელი გვერდები უჭერს და არ უჭერს რეალურად მხარს რიონის მცველებს. „23 მაისს თბილისში ნამახვანჰესის საწინააღმდეგო აქცია გაიმართა, რასაც ფეისბუქზე ცრუ გვერდების მხრიდან მადისკრედიტირებელი პოსტების გავრცელება მოჰყვა. „მითების დეტექტორმა” 4 აქტიური ფეისბუქ გვერდი გამოავლინა, რომელთაგანაც 3 როგორც 23 მაისს, ასევე გასულ თვეებშიც აქციის ორგანიზატორების დისკრედიტაციას და გაშარჟებას ცდილობდა. 4 გვერდიდან ორი 2021 წლის აპრილში არის შექმნილი, ხოლო ორი - 2020 წლის აგვისტოსა და დეკემბერში“. სრულად... წყარო: mythdetector.ge

აჭარა. საქართველოს ახალგაზრდა იურისტთა ასოციაცია (საია) მიერ გამოქვეყნებული განცხადების შემდეგ, ბათუმის საქალაქო სასამართლომ, 2021 წლის 25 მაისს, 10:00 სთ-ზე, „საზოგადოებრივი მაუწყებლის აჭარის ტელევიზიისა და რადიოს“ ყოფილი დირექტორის, ნათია კაპანაძის საქმეზე პროცესი ჩანიშნა. ნათია კაპანაძე ითხოვს უნდობლობის საკითხზე მიღებული გადაწყვეტილების ბათილად ცნობას, თანამდებობაზე აღდგენას, იძულებითი განაცდური ხელფასის ანაზღაურებასა და დირექტორის პოზიციაზე გამოცხადებული კონკურსის ბათილად ცნობას. სრულად... წყარო: gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ბლოგპოსტს: მხარდაჭერით შენიღბული დისკრედიტაციის კამპანია Facebook-ზე. „ცრუ (ყალბი) მხარდამჭერი ანგარიშები სოციალურ მედიაში პოლიტიკური დისკრედიტაციის ერთ-ერთ იარაღად გვევლინება და მიზნად ისახავს მომხმარებლების დაბნევას, შეცდომაში შეყვანასა და დეზორიენტაციას. ამგვარი გვერდები შენიღბულად მოქმედებენ. ისინი სწორედ იმ პარტიის, კანდიდატის ან პირის სახელს არიან ამოფარებული, რომლის რეპუტაციის დაზიანება სურთ. ცრუ (ყალბი) მხარდაჭერა საზოგადოებრივი აზრის ფორმირების ერთ-ერთი პროპაგანდისტული მეთოდია, რომლის დროსაც ნამდვილი წყაროები გასაიდუმლოებული და შეფარულია. შენიღბული პროპაგანდის მიზანი გარკვეული აღქმების ჩამოყალიბება და მანიპულირებაა. ცრუ (ყალბი) მხარდაჭერის ფენომენი, სოციალური მედიის მეშვეობით, საქართველოშიც აქტიურად გამოიყენება არასასურველი პირების ან ჯგუფების წინააღმდეგ. უკანასკნელ პერიოდში, შენიღბული კამპანია განსაკუთრებით გააქტიურდა ნამახვანჰესის მოწინააღმდეგე აქტივისტების დისკრედიტაციის მიზნითაც. შენიღბული მხარდამჭერი კამპანიის მიზანი, სხვადასხვა ყალბი გზავნილით, პროტესტის მხარდამჭერთა დეზორიენტაციაა, მათ შორის, აქტივისტებსა და პრორუსული კურსის პოლიტიკოს ლევან ვასაძეს შორის კავშირის წარმოჩენით“. სრულად... წყარო: isfed.ge

თბილისი. „უფლებები საქართველოს“ ორგანიზებით, პლატფორმა Zoom-ის მეშვეობით, ყალბი ინფორმაციის ამოცნობის საკითხზე ონლაინ ტრენინგი გაიმართა. შეხვედრას სხვადახვა უნივერსიტეტის იურიდიული და ჟურნალისტიკის ფაკულტეტების სტუდენტები, ასევე პრაქტიკოსი სპეციალისტები დაესწრნენ. „ტრენინგს მედიამკვლევარი, ნინო ნარიმანიშვილი, უძღვებოდა. მან ისაუბრა ისეთ საკითხებზე, როგორებიცაა: დეზინფორმაციის სახეები, სათაურების მნიშვნელობა, ფარული ვებგვერდები და მათი დღის წესრიგი, ფოტომანიპულაციები და სხვა. თეორიულ მეცადინეობასთან ერთად, ტრენინგის მონაწილეებმა პრაქტიკული სავარჯიშოებიც შეასრულეს“. სრულად... წყარო: ორგანიზაციის გვერდი სოციალურ ქსელში