თბილისი. არასამთავრობო ორგანიზაციები ერთობლივ განცხადებას ავრცელებენ იუსტიციის უმაღლეს საბჭოში მიმდინარე მოსამართლეთა დაწინაურების პროცესის შესახებ. „განცხადებაზე ხელმომწერი არასამთავრობო ორგანიზაციები უარყოფითად ვაფასებთ იუსტიციის უმაღლეს საბჭოში მიმდინარე პროცესს, რაც სააპელაციო სასამართლოში მოსამართლეთა ფორსირებული წესით, უკონკურსოდ დანიშვნას უკავშირდება. მიგვაჩნია, რომ საბჭოში ბოლო დროს განვითარებული მოვლენები აჩენს კითხვებს საბჭოს წევრთა მიერ მიღებული გადაწყვეტილებების მიზნებთან და მოტივებთან დაკავშირებით და ქმნის საზოგადოების უნდობლობას ამ პროცესის მიმართ", ნათქვამია განცხადებაში. სრულად... წყარო: gyla.ge

თბილისი. არასამთავრობო ორგანიზაციებმა ნაფიც მსაჯულთა ინსტიტუტის რეფორმირებაზე იმსჯელეს. „არასამთავრობოების ნაწილი და ფონდი „ღია საზოგადოება-საქართველოს" მიერ მოწვეული კანადელი ექსპერტი მიესალმებიან რეფორმირების ინიციატივას, თუმცა არ იზიარებენ ცვლილებების ნაწილს იმ ფორმით, რაც იუსტიციის სამინისტროს კანონპროექტით არის შემოთავაზებული", ნათქვამია ორგანიზაციის ვებ-გვერდზე. სრულად... წყარო: www.osgf.ge

თბილისი. საერთაშორისო გამჭვირვალობა საქართველო უკრაინაში გავრცელებულ ვიდეო კადრებს ეხმაურება. „აუცილებელია, რომ ადამიანების წამებაში მონაწილე ყველა პირმა სათანადოდ აგოს პასუხი მართლმსაჯულების წინაშე. ამასთან, პასუხისმგებლობა იმ პირებსაც უნდა დაეკისროთ, ვინც აღნიშნული სისტემის (პატიმრების წამება და უკანონო ფარული მიყურადება) შექმნაში მიიღო მონაწილეობა. მნიშვნელოვანია ასევე სახელმწიფომ შექმნას ამგვარი ქმედებების ეფექტური პრევენციის სისტემა", ნათქვამია ორგანიზაციის განცხადებაში. სრულად... წყარო: www.transparency.ge

თბილისი. 17 ოქტომბერს, საქართველოს ახალგაზრდა იურისტთა ასოციაციამ სისხლის სამართლის იმიტირებული სასამართლო პროცესი გამართა. „ საიაში წლებია იურიდიული დახმარების ცენტრი ფუნქციონირებს, სადაც სტაჟირებას იურიდიული ფაკულტეტის სტუდენტები გადიან. ახალგაზრდა იურისტთა ასოციაცია მადლობას უხდის თბილისის საქალაქო სასამართლოს მხარდაჭერისათვის", ნათქვამია სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა საქართველო ბლოგპოსტსს აქვეყნებს საქართველოს პარლამენტში ინიცირებული კანონპროექტების შესახებ. „კანონპროექტი წარმოდგენილი შინაარსით ვერ უზრუნველყოფს დასახული მიზნის მიღწევას - ქვეყანის მოსახლეობის იმ ნაწილის სანოტარო მომსახურებით უზრუნველყოფას, რომელიც ამჟამად აღნიშნული მომსახურების მიღების შესაძლებლობას მოკლებულია. ხოლო სახელმწიფოს მიერ ნოტარიუსთა საქმიანობაში უხეში ჩარევა ამ დარგის განვითარებისთვის მნიშვნელოვან გრძელვადიან რისკებს წარმოშობს," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ჰააგის სისხლის სამართლის საერთაშორისო სასამართლოს პროკურორი 2008 წელს, შეიარაღებული კონფლიქტის დროს ადამიანურობის წინააღმდეგ ჩადენილი დანაშაულების ფაქტებზე გამოძიებას ითხოვს. გამოძიება ეყრდნობა რამდენიმე წყაროს, მათ შორისაა 2010 წელს, არასამთავრობო ორგანიზაციების მიერ მომზადებული ანგარიში. „ანგარიშში თავმოყრილი და გაანალიზებულია კონფლიქტის დროს საქართველოს ტერიტორიაზე მასობრივად ჩადენილი სასტიკი და არაჰუმანური ქმედების ამსახველი დოკუმენტური მასალა. მოცემულია 1055 დევნილის ჩვენება", ნათქვამია ორგანიზაციის ვებ-გვერდზე. სრულად... წყარო: www.osgf.ge

თბილისი. „ახალგაზრდა ადვოკატების" განცხადების თანახმად, საკონსტიტუციო სასამართლო მარტვილსა და საგარეჯოში, 31 ოქტომბრის შუალედური საპარლამენტო არჩევნების გაუქმებას გეგმავს. „საქართველოს საკონსტიტუციო სასამართლო მორიგ ხმაურიან გადაწყვეტილებას, უახლოეს დღეებში გამოაცხადებს, რომელმაც ქვეყანაში პოლიტიკური ცხოვრება უფრო მეტად დაძაბოს", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. საერთაშორისო გამჭვირვალობა საქართველო მამხილებელთა დაცვის აუცილებლობასთან დაკავშირებით ბლოგპოსტს აქვეყნებს. გიორგი ბაბუნაშვილისა და რუსლან ბაზიაშვილის შემთხვევების გათვალისწინებით ორგანიზაცია აღნიშნავს, რომ „არასრულყოფილი საკანონმდებლო რეგულაციების გამო საჯარო ინტერესის სასარგებლოდ მოქმედი საჯარო მოხელეები ვერ სარგებლობენ მამხილებლისთვის გათვალისწინებული დაცულობის სამართლებრივი გარანტიებით. საქართველოს ხელისუფლებამ დაუყოვნებლივ უნდა უზრუნველყოს შემოთავაზებული ცვლილებების მიღება, რათა გაძლიერდეს მამხილებელთა დაცვის გარანტიები და წაახალისოს მხილების შემთხვევები", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ახალგაზრდა ადვოკატები ვენეციის კომისიას საკონსტიტუციო სასამართლოს მოქმედებების შეფასებაზე ოფიციალური წერილით მიმართავს. „ორგანიზაციის მიერ ვენეციის კომისიის მიმართ გაგზავნილ წერილში, დასმულია კითხვები, რომელიც საქართველოს საკონსტიტუციო სასამართლოს თავმჯდომარე გიორგი პაპუაშვილისა და სხვა მოსამართლეების მხრიდან მოსამართლე მერაბ ტურავას მიმართ დამოკიდებულებასა და გადაწყვეტილების გამოქვეყნების ფორმას ეხება", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. საქართველოს პარლამენტის პირველი რესპუბლიკის დარბაზში, სამოქალაქო ორგანიზაციებთან შეხვედრა გაიმართა. შეხვედრაზე განიხილეს პროექტი ,,ადამიანის უფლებათა დაცვის კომიტეტის ცნობიერების ამაღლება ასოცირების ხელშეკრულებასთან დაკავშირებულ საკითხებზე და მისი საზედამხედველო როლის გაძლიერება ადამიანის უფლებათა დაცვის სამოქმედო გეგმის შესრულებაზე". პროექტში ჩართულობის შესახებ მესამე სექტორის წარმომადგენლებს ინფორმაცია მიაწოდა საბჭოს თავმჯდომარე, „ახალგაზრდა ადვოკატების" ხელმძღვანელმა და პროექტის კოორდინატორმა. შეხვედრას დაესწრო სისხლის სამართლის მართლმსაჯულებაზე მომუშავე ორგანიზაციები. სრულად... წყარო: barristers.ge

თბილისი. საერთაშორისო გამჭვირვალობა - საქართველო სისხლის სამართლის საქმეების მონიტორინგის მესამე ანგარიშს აქვეყნებს. ანგარიში მოიცავს სასამართლო სხდომებზე განვითარებულ მოვლენებს, პროცესის აღწერას. „მესამე ანგარიში მოიცავს 2014 წლის მაისიდან 2015 წლის ივნისამდე პერიოდს. დაკვირვება 11 სისხლის სამართლის საქმეზე მიმდინარეობდა, სადაც ბრალდებულები იყვნენ წინა ხელისუფლების ყოფილი თანამდებობის პირები: მიხეილ სააკაშვილი, გიგი უგულავა, ვანო მერაბიშვილი, ბაჩანა ახალაია და სხვები", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ახალგაზრდა ადვოკატებმა საქართველოში აშშ-ს ელჩს, იან კელის ღია წერილით მიმართეს და საქართველოს საკონსტიტუციო სასამართლოს თავმჯდომარის, გიორგი პაპუაშვილის სადაო ქონებასთან დაკავშირებით, დეტალური ინფორმაცია მიაწოდეს. „ბატონი იან კელის მიმართ წერილში ყურადღება გამახვილდა საქმეზე საქართველოს მთავარ პროკურატურაში მიმდინარე საგამოძიებო მოქმედებების თაობაზეც. ასევე, უშუალოდ გავაცანით ბატონი როლანდ ბლადაძის სურვილი, უშუალოდ შეხვდეს აშშ ელჩს და გაუზიაროს ქონების წართმევის შესახებ კონკრეტული გარემოებები," ნათქვამია ორგანიზაციის განცხადებაში. სრულად... წყარო: www.barristers.ge

თბილისი. „ინფორმაციის თავისუფლების განვითარების ინსტიტუტი" (IDFI) მეორე მოსმენით მიღებული კანონის პროექტის „საჯარო სამსახურის შესახებ" სამართლებრივ ანალიზს აქვეყნებს. „კანონის პროექტის მიღების შედეგად გაძლიერდება საჯარო სამსახურის მართვის ცენტრალიზებული სისტემა და შეიქმნება პროფესიული საჯარო მოხელეების უფლებების დაცვის სამართლიანი მექანიზმი. ამასთან მნიშვნელოვანია აღინიშნოს, რომ საჯარო სამსახურის შესახებ კანონის პროექტი ადგენს საჯარო სამსახურში დასაქმებული პირების უფლებებისა და მოვალეობების მკაფიო ჩარჩოს", ნათქვამია ორგანიზაციის განცხადებაში. სრულად... წყარო: idfi.ge

თბილისი. არასამთავრობო ორგანიზაციები რუსთავი 2-ის მხარდამჭერთა დაკავებას და მათთვის ორთვიანი წინასწარი პატიმრობის შეფარდებას ეხმაურებიან. „მოვუწოდებთ საქართველოს ხელისუფლებას და სამართალდამცავ ორგანოებს, ერთი მხრივ, პატივი სცენ საქართველოს კონსტიტუციით აღიარებულ შეკრებებისა და მანიფესტაციების თავისუფლებას, მეორე მხრივ კი მოახდინონ სათანადო და ერთგვაროვანი რეაგირება ერთმანეთის იდენტურ კანონდარღვევებზე და აღნიშნული დააფუძნონ კანონის წინაშე თანასწორობის ფუნდამენტურ პრინციპს", ნათქვამია ერთობლივ განცხადებაში. სრულად... წყარო: gdi.ge

თბილისი. ახალგაზრდა ადვოკატები ე.წ „ნარუშილოვკების" საქმესთან დაკავშირებით საზოგადოების დისკუსიას ეხმიანება და ყოფილი პრემიერ-მინისტრის განცხადებას აფასებს. „ჩვენ მიგვაჩნია, რომ აღნიშნულ ფაქტთან დაკავშირებით მიმდინარე გამოძიება შესაძლებლად მოკლე დროში უნდა დამთავრდეს. ბუნებრივია, „ნარუშილოვკების" გამოყენება შესაბამის უფლებამოსილ პირებს უნდა ჰქონდეთ, მაგრამ სათანადო ნორმატიულ დოკუმენტში მაქსიმალურად ზუსტად უნდა იყოს გაწერილი, თუ ვის და რა შემთხვევაში შეუძლია ისარგებლოს ამ უფლებით", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. ახალგაზრდა ადვოკატებმა საქართველოს საკონსტიტუციო სასამართლოს ხარჯვითი ნაწილი შეისწავლეს და მონიტორინგის შედეგებზე ისაუბრეს. „მონიტორინგის შედეგების მიხედვით კი, საქართველოს საკონსტიტუციო სასამართლო, საქართველოში ერთ-ერთი ყველაზე მხარჯველ საჯარო დაწესებულებად შეიძლება ჩაითვალოს. საკონსტიტუციო სასამართლოს მიერ ხელფასების, პრემია-დანამატებისა და სამივლინებო ხარჯებისთვის სახელმწიფო ბიუჯეტიდან მოთხოვნილი თანხები კოლოსალურია და არ შეესაბამება ქვეყნის სოციალურ-ეკონომიკურ მდგომარეობას", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. საქართველოს პარლამენტმა 2014 წელს მიიღო კანონი „დისკრიმინაციის ყველა ფორმის აღმოფხვრის შესახებ". კანონით დისკრიმინაციის აღმოფხვრა და ზედამხედველობა სახალხო დამცველს დაევალა. ომბუდსმენი დისკრიმინაციასთან ბრძოლისა და ზედამხედველობის შესახებ 2015 წლის აგვისტოს ჩათვლით განხორციელებულ საქმიანობას ანგარიშში მიმოიხილავს. „ანგარიშში მიმოხილულია სახალხო დამცველის მიერ ცალკეული განცხადებების/საჩივრების მიღების, დასაშვებობის ეტაპის გავლისა და საბოლოო გადაწყვეტილების მიღების პროცედურები. ანგარიში აგრეთვე მოიცავს მტკიცებულებათა მოპოვება/შეგროვებისა და მტკიცების ტვირთის განაწილების თავისებურებებს, სასამართლო მეგობრის მოსაზრების წარდგენისა და მხარეთა მორიგების მიზნით ჩატარებული ზეპირი მოსმენის გამართვის სპეციფიკას", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. საქართველოს ახალგაზრდა იურისტთა ასოციაცია 28 სექტემბერს გამართულ იუსტიციის საბჭოს სხდომას ეხმიანება. სხდომაზე სხვა მნიშვნელოვან საკითხებთან ერთად 68 ვაკანტურ ადგილზე მოსამართლეთა დანიშვნა/გადანიშვნის საკითხი განიხილებოდა. „მიღებული გადაწყვეტილებით, ისევე როგორც მისი წინმსწრები პროცესით, ნათელი გახდა, რომ იუსტიციის საბჭოს მუშაობა არის არაეფექტური; აღნიშნული არაეფექტურობით საბჭო აღრმავებს სასამართლო სისტემაში არსებულ გამოწვევებსა და პრობლემებს, რომელთა მოგვარებასაც საბჭო ფრაგმენტული, დაუსაბუთებელი, სუბიექტური და საეჭვო მოტივების მქონე გადაწყვეტილებებით ცდილობს და არა სისტემური, კარგად გააზრებული და დასაბუთებული მიდგომებით", ნათქვამია გაცხადებაში. სრულად... წყარო: gyla.ge

თბილისი. ორგანიზაცია „ახალგაზრდა ადვოკატები" საქართველოს მთავარ პროკურატურას განცხადებით მიმართავს. ორგანიზაცია საქართველოს საკონსტიტუციო სასამართლოს თავმჯდომარე გიორგი პაპუაშვილთან სადაო ქონებასთან დაკავშირებით, პროკურატურას სწრაფი და ეფექტური საგამოძიებო მოქმედებების განხორციელებისკენ მოუწოდებს. „საჭიროა კანონის წინაშე ყველას თანასწორუფლებიანობის პრინციპის დაცვა, განურჩევლად იმის გათვალისწინებისა, ვინ არის დავის მხარე - რიგითი მოქალაქე თუ საკონსტიტუციო სასამართლოს თავმჯდომარე გიორგი პაპუაშვილი, რომლის ცალკეული მოქმედებები, ღიად შეიცავს სისხლის სამართლის დანაშაულის ნიშნებს", ნათქვამია განცხადებაში. ახალგაზრდა ადვოკატები როლანდ ბლადაძის საქმეზე კანონიერი გადაწყვეტილების მიღებას ითხოვს. სრულად... წყარო: www.barristers.ge

თბილისი. კოალიცია „გამჭვირვალე და დამოუკიდებელი მართლმსაჯულებისთვის" პროკურატურის შესახებ კანონში ცვლილებების პროექტს ეხმაურება. „კანონპროექტის მესამე მოსმენით მიღებულ ვერსიასთან დაკავშირებით კოალიციას სურს კიდევ ერთხელ განაცხადოს, რომ მიუხედავად მასში განხორციელებული რამდენიმე პოზიტიური ცვლილებისა, კანონპროექტით დასახული მიზანი – მოხდეს პროკურატურის სისტემის დეპოლიტიზირება – მიუღწეველია, რადგან ვენეციის კომისიის დასკვნის მიუხედავად წარმოდგენილი ცვლილებები არის ფრაგმენტული ხასიათის და ისინი არ ეხება ისეთ ძირეულ პრინციპებს, რამაც მომავალში უნდა უზრუნველყოს პროკურატურის სისტემის რეალური დამოუკიდებლობა", ნათქვამია კოალიციის განცხადებაში. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) გიორგი კლდიაშვილის საქმესთან დაკავშირებით სასამართლოს გადაწყვეტილებას აქვეყნებს. „2014 წლის 12 დეკემბერს, ოპერატიული ინფორმაციის საფუძველზე, იარაღის მართლსაწინააღმდეგო ტარების ბრალდებით (სისხლის სამართლის კოდექსის 236-ე მუხლი) დააკავეს IDFI-ის დირექტორი გიორგი კლდიაშვილი. მას კუთვნილი და კანონმდებლობის დაცვით გაფორმებული ცეცხლსასროლი იარაღი მაღაზიაში შეკეთების შემდგომ მიჰქონდა სახლში, თუმცა არ ჰქონდა აღებული იარაღის გადატანის ნებართვა. გიორგი კლდიაშვილის ქმედება წარმოადგენდა ადმინისტრაციული სამართალდარღვევას, თუმცა მიუხედავად ამისა, მის წინააღმდეგ დაიწყო სისხლისსამართლებრივი დევნა და დაკითხვის შემდეგ გადაყვანილ იქნა დროებითი მოთავსების იზოლატორში", ნათქვამია განცხადებაში. 14 დეკემბერს, წინა-სასამართლო სხდომაზევე კლდიაშვილი გირაოს სანაცვლოდ გათავისუფლდა. 10 თებერვალს კი კლდიაშვილი უკანონო დაკავებით მიყენებული მატერიალური და მორალური ზიანის ანაზღაურების მოთხოვნით სარჩელით მიმართავს თბილისის საქალაქო სასამართლოს. „სასამართლოს გადაწყვეტილებით, შსს-სა და მთავარ პროკურატურას დაეკისრათ სოლიდარული პასუხისმგებლობა 2000 ლარის ოდენობით მორალური ზიანისა და 1180 ლარის ოდენობით მატერიალური ზიანის ანაზღაურება გიორგი კლდიაშვილის სასარგებლოდ", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. კოალიცია „დამოუკიდებელი და გამჭვირვალე მართლმსაჯულებისათვის" ეხმაურება სასამართლო ხელისუფლების ირგვლივ განვითარებულ მოვლენებს. „შეშფოთებას გამოვთქვამთ უკანასკნელ დღეებში განვითარებული მოვლენების გამო, რომლებიც წარმოაჩენს სასამართლოს დამოუკიდებლობისა და კანონის უზენაესობის პრინციპებისადმი პოლიტიკური ძალებისა და საზოგადოების სხვადასხვა ჯგუფის მხრიდან აშკარა უპატივცემლობას და საფრთხეს უქმნის ქვეყანაში უმნიშვნელოვანესი კონსტიტუციური ინსტიტუტების დამოუკიდებელ ფუნქციონირებას", ნათქვამია განცხადებაში. კოალიცია მოუწოდებს ყველა პოლიტიკურ ძალას, თავი შეიკავონ განცხადებებისგან, რომელიც სასამართლო ხელისუფლების დისკრედიტაციას იწვევს. სრულად... წყარო: www.transparency.ge