თბილისი. არასამთავრობო ორგანიზაციები ეხმაურებიან სასამართლოს ირგვლივ განვითარებულ ბოლოდროინდელ მოვლენებს. „ხელმომწერი არასამთავრობო ორგანიზაციები მკაცრად უარყოფითად ვაფასებთ საქართველოს საკონსტიტუციო სასამართლოს მიმართ ბოლო პერიოდში პოლიტიკური თანამდებობის პირების მიერ გაკეთებულ განცხადებებსა და მოსამართლეების და მათი ოჯახის წევრების მიმართ განხორციელებულ მუქარაზე სახელმწიფო ორგანოთა არასათანადო რეაგირებას, რაც შესაძლებელია აღქმულ იქნას, როგორც სასამართლოზე ზეწოლის მცდელობა", ნათქვამია ერთობლივ განცხადებაში. სრულად... წყარო: gdi.ge

თბილისი. 14 სექტემბერს, ადამიანის უფლებათა ცენტრმა, ეროვნული ბიბლიოთეკის საკონფერენციო დარბაზში პროექტის „ქალი და არასრულწლოვანი პატიმრების მდგომარეობა საქართველოში" ანგარიშის პრეზენტაცია გამართა. პროექტი განხორციელდა ბულგარეთის საელჩოს მხარდაჭერითა და სახალხო დამცველთან პარტნიორობით. კვლევა მიზნად ისახავდა ქალი და არასრულწლოვანი პატიმრების მდგომარეობის წარმოჩენას. გეგმიურ და არაგეგმიური ვიზიტები ხორციელდებოდა რუსთავის #5 ქალთა სასჯელაღსრულების დაწესებულებაში, თბილისის #11 არასრულწლოვანთა სარეაბილიტაციო დაწესებულებაში და გლდანის #8 სასჯელაღსრულების დაწესებულების არასრულწლოვანთა განყოფილებაში. „ანგარიშის მიხედვით, საპატიმროში ქალები სრული შემოწმებისას დამამცირებელ პროცედურებს გადიან. მსჯავრდებულ ქალებს საპატიმროდან დროებით გაყვანისას და შემოყვანისას სრულიად აშიშვლებენ და ბუქნების გაკეთებას აიძულებენ. ასევე პრობლემას წარმოადგენს ჰიგიენური საშუალებების არასაკმარისი მიწოდება, ხანგრძლივი პაემნების არარსებობა და არასათანადო მკურნალობა. რაც შეეხება არასრულწლოვანთა დაწესებულებას, აქ გამოვლენილ პრობლემათა შორისაა პრივილგიები არასრულწლოვან პატიმრებს შორის, განმეორებითი დანაშაულის ხშირი შემთხვევები, არასაკმარისი ფსიქოლოგები და სხვა", ნათქვამია ანგარიშში. სრულად... წყარო: humanrights.ge

თბილისი. 15 სექტემბერს, საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტი „ახალგაზრდა ადვოკატების" საკანონმდებლო წინადადებას განიხილავს. ინიციატივის თანახმად, სასამართლო გადაწყვეტილების ბათილად ცნობისა და ახლად აღმოჩენილ გარემოებათა გამო, საქმის წარმოების განახლების შესახებ განცხადების შეტანის დასაშვები 5 წლიანი ვადა უნდა გაიზარდოს 15 წლის ვადით. ორგანიზაციის შეფასებით, „კანონპროექტის მიღების შედეგად, დადგენილი 5 წლიანი ხანდაზმულობის ვადა გაიზრდება 15 წლის ვადით. შესაბამისად, ადამიანებს, რომლებსაც უკანონოდ ჩამოართვეს ქონებები, საშუალება ექნებათ მიმართონ სასამართლოს და იბრძოლონ საკუთარი დარღვეული უფლებების აღდგენის მიზნით. ვადის გაზრდა წინგადადგმული ნაბიჯი იქნება კანონიერების და სამართლიანობის დადგენის მხრივ, საქმეების განხილვა მოხდება თავიდან, სასამართლოს მიერ და საქმის განხილვის შედეგად მიღებული იქნება ახალი გადაწყვეტილება მათი გამართლების ან გაუმართლებლობის შესახებ", ნათქვამია განცხადებაში. სრულად... წყარო: barristers.ge

ქვემო ქართლი. თეთრიწყაროს რაიონულმა სასამართლომ ბათილად ცნო საკონკურსო-საატესტაციო კომისიის გადაწყვეტილება, რომლითაც, „სამართლიან არჩევნებს" შეეზღუდა თვითმმართველობაში მიმდინარე კონკურსის მონიტორინგის უფლებამოსილება. რაიონულმა სასამართლომ, „სამართლიანი არჩევნების" სარჩელის საფუძველზე მნიშვნელოვანი გადაწყევტილება მიიღო და განმარტა საკონკურსო-საატესტაციო კომისიის საქმიანობის საჯაროობის საკითხი. „სარჩელის შეტანის საფუძველი გახდა კომისიის გადაწყვეტილება, რომლითაც ორგანიზაციას უარი ეთქვა გასაუბრებაზე დასწრება იმ მოტივით, რომ კომისიის შემადგენლობაში უკვე იყვნენ ჩართული პროფესიული კავშირების წევრები, დამოუკიდებელი სპეციალისტები და დამატებით არასამთავრობო ორგანიზაციის წარმომადგენლის დასწრება მიზანშეუწონლად მიიჩნიეს", ნათქვამია განცხადებაში. სრულად... წყარო: www.isfed.ge

თბილისი. ორგანიზაცია „ახალგაზრდა ადვოკატები" სამოქალაქო კანონმდებლობაში დაგეგმილ ცვლილებებს ეხმაურება, რომლის მიხედვითაც, ე.წ. საპოლიციო გამოსახლების ინსტიტუტი უნდა გაუქმდეს. ორგანიზაციის განცხადებით, სახელმწიფომ უნდა შეცვალოს საპოლიციო გამოსახლების მეთოდები და დაუქვემდებაროს ისინი სასამართლო გადაწყვეტილებებს. „ერთი მხრივ, ახალი რეგულაციები ქვეყანაში ადამიანის უფლებების დაცვის ხარისხს აამაღლებს, მეორე მხრივ კი, მხარეებს შესაძლებლობას მისცემს, სადაო საკითხთან დაკავშირებით, არა ქუჩაში, არამედ სასამართლო დარბაზში წარადგინონ არგუმენტაცია. ამასთან, ყურადღებას იმსახურებს ნამდვილი მესაკუთრისა და ქონების კეთილსინდისიერი შემძენის უფლებრივი ინტერესების დაცვის საკითხიც, თუმცა სახელმწიფოს პოზიტიური ვალდებულებაა, შექმნას სამართლიანი გარემო და სადაოდ გამხდარ საკითხთან დაკავშირებით, ყველა მხარეს მისცეს თანაბარი დაცვის შესაძლებლობა", ნათქვამია განცხადებაში. სრულად... წყარო: barristers.ge

თბილისი. ადამიანის უფლებების სწავლებისა და მონიტორინგის ცენტრი განცხადებას ავრცელებს. ორგანიზაცია მიიჩნევს, რომ „საჯარო ინფორმაციის გაცემის ვალდებულებისგან სსიპ რელიგიური გაერთიანებების გათავისუფლება არაკონსტიტუციურია". 4 სექტემბერს, „ადამიანის უფლებების სწავლებისა და მონიტორინგის ცენტრმა (EMC)” საქართველოს საკონსტიტუციო სასამართლოში წარადგინა სასამართლოს მეგობრის (amicus curiae) მოსაზრება გიორგი კეკენაძე, ნინო კვეტენაძე და ბესიკ გვენეტაძე საქართველოს პარლამენტის წინააღმდეგ საკონსტიტუციო სარჩელთან (#618) დაკავშირებით. აღნიშნულ საქმეში, მოსარჩელეები დაობენ საქართველოს კონსტიტუციის 41-ე მუხლთან ზოგადი ადმინისტრაციული კოდექსის იმ ნორმატიული ჩანაწერების კონსტიტუციურობაზე, რომელიც საჯარო სამართლის იურიდიული პირის სტატუსის მქონე რელიგიურ გაერთიანებებს, საბიუჯეტო დაფინანსების ფარგლებში, საჯარო ინფორმაციის გაცემის ვალდებულებისგან ათავისუფლებს. სრულად... წყარო: emc.org.ge

თბილისი. თბილისის საქალაქო სასამართლომ ნაწილობრივ დააკმაყოფილა ინფორმაციის თავისუფლების განვითარების ინსტიტუტის (IDFI) სარჩელი ფინანსთა სამინისტროს ადმინისტრაციული ხარჯების შესახებ ინფორმაციასთან დაკავშირებით. ორგანიზაციამ განცხადებით გამოითხოვა ფინანსთა სამინისტროს ადმინისტრაციული ხარჯების შესახებ სხვადასხვა ინფორმაცია, თუმცა, „ის არ შეიცავდა ჩვენს მიერ მოთხოვნილ ინფორმაციას სრულყოფილი სახით. კერძოდ, ფინანსთა სამინისტრომ პასუხების უმრავლესობა იყო ჯამური შინაარსის და არ შეესაბამებოდა ჩვენს მიერ გაგზავნილი მოთხოვნებს". სასამართლოს გადაწყვეტილებით „ფინანსთა სამინისტროს დაევალა გაეცა ინფორმაცია რვა სასარჩელო მოთხოვნიდან შვიდზე (სასარჩელო მოთხოვნა არ დაკმაყოფილდა მხოლოდ იმ ნაწილში, რომლთაც მინისტრის სამუშაო ელექტრონული ფოსტიდან სამსახურეობრივ საქმიანობასთან დაკავშირებით გაგზავნილი და მიღებული წერილების ასლების მიღებას ეხებოდა)", ნათქვამია განცხადებაში. სრულად... წყარო: idfi.ge

კახეთი. 29 აგვისტოს პარტნიორობამ ადამიანის უფლებებისთვის (PHR) სამართლებრივი დახმარების ფარგლებში, გურჯაანში, სოციალური ინკლუზიის მხარდამჭერი ორგანიზაციის ,,ხელი ხელს" სათემო ცენტრებში ვიზიტი განახორციელა. შეხვედრის ძირითადი მიზანი იყო ქმედუუნაროდ აღიარებული პირებისათვის მხარდამჭერის დანიშვნისათვის საჭირო პროცედურების განსაზღვრა და ცენტრში მცხოვრები იმ ოჯახებისათვის სამართლებრივი დახმარების აღმოჩენის დაწყება, რომლებიც დღემდე ვერ ახერხებენ შვილების თავად აღზრდას. სრულად… წყარო: ორგანიზაციის ვებ-გვერდი სოციალურ ქსელში

თბილისი. მაღალი საჯარო ინტერესის გათვალისწინებით, სახალხო დამცველმა შეისწავლა თბილისის საქალაქო სასამართლოს სამოქალაქო საქმეთა კოლეგიის მიერ 2015 წლის 5 აგვისტოს მიღებული განჩინება რუსთავი 2-თან დაკავშირებით. განჩინების მიხედვით, სასამართლომ ყადაღა დაადო შპს „სამაუწყებლო კომპანია რუსთავი 2"-ის პარტნიორების წილებს. სახალხო დამცველი თვლის, რომ „სასამართლოს განჩინება სარჩელის უზრუნველყოფის ღონისძიების გამოყენების შესახებ, არღვევს უფლებათა შეზღუდვის თანაზომიერების პრინციპს. სასამართლომ საკუთრების უფლება შეზღუდა იმაზე მეტად, ვიდრე ამას მოითხოვს მოსარჩელის ლეგიტიმური მიზანი, რამაც, თავის მხრივ, შესაძლოა რეალური საფრთხე შეუქმნას დამოუკიდებელი ტელეკომპანიის მიერ გამოხატვის თავისუფლების რეალიზებას". სახალხო დამცველი გააგრძელებს დაკვირვებას და მისი მანდატის ფარგლებში საქმის შესწავლას. სრულად... წყარო: www.ombudsman.ge

თბილისი. კოალიცია „დამოუკიდებელი და გამჭვირვალე მართლმსაჯულებისათვის" ეხმაურება მიმდინარე წლის ივლისში მოსამართლეთა შერჩევა-დანიშვნის პროცესს. რომელიც, როგორც კოალიციის მიერ გავრცელებულ განცხადებაშია ნათქვამი, „გამჭვირვალობისა და ღიაობის განსაკუთრებით დაბალი ხარისხით ხასიათდებოდა. ...მიგვაჩნია, რომ მოსამართლეთა შერჩევა-დანიშვნის პროცესის გამჭვირვალობა უმნიშვნელოვანესია მოსამართლეთა დამოუკიდებლობისა და სასამართლო სისტემისადმი საზოგადოების ნდობის უზრუნველსაყოფად. ამ პროცესის დახურვა კი ვერ შეუწყობს ხელს სასამართლო სისტემის გაჯანსაღებასა და მისი ავტორიტეტის ამაღლებას პროფესიულ წრეებსა თუ ფართო საზოგადოების თვალში". სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია რუსთავი 2-თან დაკავშირებულ მოვლენებს ეხმაურება. საია თვლის, რომ სამაუწყებლო კომპანიასთან დაკავშირებული სამართლებრივი დავა გამჭვირვალობისა და საჯაროობის მაღალი სტანდარტით უნდა წარიმართოს, პოლიტიკოსებმა კი თავი უნდა შეიკავონ შეფასებებისგან, რომლებიც სასამართლოს გადაწყვეტილებების დამოუკიდებლობაზე გავლენას მოახდენს. „საია მიიჩნევს, რომ სასამართლოს განჩინება არ შეესაბამება დასაბუთების იმ მაღალ სტანდარტს, რომელიც გამოყენებულ უნდა იქნეს ყველა შემთხვევაში, როდესაც ერთმანეთის პირისპირ დგას არამხოლოდ ორი კერძო სუბიექტის ინტერესი, არამედ ასევე მაღალი საზოგადოებრივი ინტერესი და მისთვის შეუქცევადი ზიანის მიყენების საფრთხე", ნათქვამია განცხადებაში. სრულად... წყარო: gyla.ge

თბილისი. თბილისის სააპელაციო სასამართლოს 2015 წლის 29 მაისის განჩინებით არ დაკმაყოფილდა შსს-ს სააპელაციო საჩივარი IDFI-ის წინააღმდეგ, ნათქვამია ორგანიზაციის ვებგვერდზე. „სააპელაციო სასამართლომ უცვლელად დატოვა პირველი ინსტანციის სასამართლოს გადაწყვეტილება და შინაგან საქმეთა სამინისტროს დაეკისრა ვალდებულება სრულყოფილი სახით გაეცა ინფორმაცია 2013 წელს მინისტრის, მინისტრის მოადგილეებსა და დეპარტამენტის უფროსებზე დარიცხული პრემიებისა და დანამატების შესახებ თვეების მიხედვით, ცალ–ცალკე სახელებისა და გვარების მითითებით. ... მოსამართლემ განმარტა, რომ მონაცემთა დაცვის უფლება არ არის აბსოლუტური უფლება და კონვენციის საფუძველზე სახელმწიფოს ეძლევა შესაძლებლობა საჯარო ინტერესის გათვალიწინებით დაადგინოს ბალანსი აღნიშნულ უფლებასა და ინფორმაციის თავისუფლებას შორის", ნათქვამია ორგანიზაციის ვებ-გვერდზე. სრულად... წყარო: idfi.ge

აჭარა. 31 ივლისს საქართველოს საკონსტიტუციო სასამართლომ დააკმაყოფილა საქართველოს სახალხო დამცველის კონსტიტუციური სარჩელი. სასამართლომ დაადგინა, რომ „საჯარო სამსახურის შესახებ" საქართველოს კანონის მე–17 მუხლის „ბ" ქვეპუნქტი არ შეესაბამება თანაზომიერების პრინციპის მოთხოვნებს და არღვევს საქართველოს კონსტიტუციის 29_ე მუხლის პირველ და მეორე პუნქტს"... სრულად... წყარო: ombudsman.ge

თბილისი. არასამთავრობო ორგანიზაციები მშვიდობიანი აქციის - ,,არა პანორამას" დროს დაკავებული და დაჯარიმებული პირების საქმეზე განცხადებას ავრცელებენ. „ჩვენს შეშფოთებას იწვევს ის ფაქტი, რომ სასამართლომ ვერ შეძლო დაკავებული პირების შეკრებისა და გამოხატვის თავისუფლებაში პოლიციელთა მხრიდან განხორციელებული გაუმართლებელი ჩარევის სათანადოდ შეფასება. ... მოვუწოდებთ ხელისუფლების სამივე შტოს და მის თითოეულ წარმომადგენელს, შეასრულონ კონსტიტუციით დაკისრებული ვალდებულებები და არამხოლოდ პატივი სცენ კონსტიტუციით გარანტირებულ უფლებებსა და თავისუფლებებს, არამედ გააკეთონ ყველაფერი მათი კომპეტენციის ფარგლებში, რათა ხელი შეუწყონ აღნიშნული უფლებების პრაქტიკაში რეალიზაციასა და მათ დაცვას არასათანადო ჩარევებისაგან," ნათქვამია ერთობლივ განცხადებაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 28 ივლისს, საქართველოს იურიდიული ფირმების ასოციაციამ (სიფა), ფონდ „ღია საზოგადოება საქართველოს" მხარდაჭერით გამართა შეხვედრა თემაზე „საქართველოს საკონსტიტუციო სასამართლოს გადაწყვეტილება ირიბი მტკიცებულებების თაობაზე". საქართველოს საკონსტიტუციო სასამართლომ 2015 წლის 22 იანვრის გადაწყვეტილებით არაკონსტიტუციურად ცნო საქართველოს სისხლის სამართლის საპროცესო ის ნორმები, რომლებიც ირიბი ჩვენების საფუძველზე გამამტყუნებელი განაჩენის გამოტანისა და პირის ბრალდებულად ცნობის შესაძლებლობას ითვალისწინებს. „შეხვედრის მონაწილეებმა ისაუბრეს ირიბი მტკიცებულების თაობაზე საკონსტიტუციო სასამართლოს 22 იანვრის გადაწყვეტილების მნიშვნელობაზე სისხლის სამართლის პროცესში. განსაკუთრებული ყურადღება გამახვილდა მის აღსრულებასთან დაკავშირებულ პრობლემებზე, აგრეთვე ისეთი საკითხზე როგორიცაა, საკანონმდებლო და სასამართლო ხელისუფლების როლი ირიბი მტკიცებულების თაობაზე არსებული სამართლებრივი პრობლემის გადაჭრაში", ნათქვამია ვებ-გვერდზე. სრულად... წყარო: www.osgf.ge

თბილისი. 29 ივლისს, ფონდი „ღია საზოგადოება-საქართველოს" ოფისში პერსონალურ მონაცემთა დაცვის საჭიროებაზე და ხარვეზების აღმოფხვრაზე იმსჯელეს სახალხო დამცველის ოფისის, გაეროს ბავშვთა ფონდის, პერსონალურ მონაცემთა დაცვის ინსპექტორის აპარატის და სხვა სახელმწიფო უწყებების და არასამთავრობო ორგანიზაციების წარმომადგენლებმა. 6 თვის მანძილზე, არასამთავრობო ორგანიზაცია "ინიციატივა მოწყვლადი ჯგუფების რეაბილიტაციისთვის" ფონდის მხარდაჭერით, პენიტენციურ სისტემაში ბავშვთა პერსონალური მონაცემების დაცვასთან დაკავშირებულ სამართლებრივ ანალიზს ახორციელებდა. აღნიშნული არასამთავრობო ორგანიზაცია აგრძელებს პენიტენციურ სისტემაში ბავშვთა მონაცემების დაცვასთან დაკავშირებულ საკითხებზე მუშაობას. "ჩვენ დღეს განვიხილავთ როგორც კანონქვემდებარე აქტების მიღების და მათთან დაკავშირებით ორგანიზაციასა და სამინისტროსთან თანამშრომლობის პროცესს, ასევე, არასრულწლოვანთა სარეაბილიტაციო დაწესებულების დებულების პროექტს, ახლადდამტკიცებული ანალიტიკური დეპარტამენტის დებულებას და სხვა მნიშვნელოვან დოკუმენტებს. ვსაუბრობთ ადვოკატირების შედეგებზე, ასევე იმ გამოწვევებზე, რაც დგას ნორმატიული აქტების დახვეწის თვალსაზრისით", აცხადებს ტატო ქელბაქიანი, ორგანიზაციის ხელმძღვანელი. სრულად... წყარო: www.osgf.ge

თბილისი. არასამთავრობო ორგანიზაციები ლევან ბობოხიძის შეწყალებასთან დაკავშირებით პრემიერ მინისტრის შეფასებებს ეხმაურებიან და ერთობლივ განცხადებას ავრცელებენ: „პრემიერ-მინისტრის მიერ გამოთქმული კრიტიკა სხვა არაფერია თუ არა მოწოდება პოლიტიკური ოპონენტების მიმართ მართლმსაჯულების შერჩევითად და შესაბამისად მკაცრად გამოყენების შესახებ, რომელიც საგამოძიებო ორგანოებისა და სასამართლო ხელისუფლებისთვისაც შესაძლოა იქცეს აღმასრულებელი ხელისუფლების მეთაურის გზავნილად. მიგვაჩნია, რომ ამ ტიპის განცხადებები უარყოფითად აისახება სამართალდამცავი ორგანოების საქმიანობაზე, განსაკუთრებით იმის გათვალისწინებით, რომ ბოლო წლებში საქართველოს ხელისუფლების მისამართით მნიშვნელოვანი კრიტიკა ისმის როგორც საერთაშორისო პარტნიორების, ასევე საერთაშორისო და ადგილობრივი არასამთავრობო ორგანიზაციების მიერ ქვეყანაში პოლიტიკური მოტივებით განხორციელებულ მართლმსაჯულებასთან დაკავშირებით", ნათქვამია განცხადებაში. სრულად... წყარო: gdi.ge

თბილისი. ადამიანის უფლებათა ცენტრი მოუწოდებს ხელისუფლებას, დროულად შექმნას სამართალდამცველთა დანაშაულების ეფექტური საგამოძიებო მექანიზმი. ცენტრი კიდევ ერთხელ გამოხატავს „შეშფოთებას პოლიციის განყოფილებებში ადამიანის უფლებების დარღვევების მზარდი ტენდენციის თაობაზე"... სრულად... წყარო: humanrights.ge

თბილისი. ადამიანის უფლებების სწავლებისა და მონიტორინგის ცენტრი საკონსტიტუციო სასამართლოში ასაჩივრებს 2013 წლის პირველ ივნისს საქართველოს მთავრობის დადგენილებაში შესულ ცვლილებებს. „აღნიშნული დადგენილების თანახმად, სახელმწიფო სოციალურად დაუცველთა ბაზაში რეგისტრაციის მიზნით, აღარ განიხილავს იმ უსახლკარო ოჯახების განაცხადებს, რომელთაც უკანონოდ აქვთ დაკავებული სახელმწიფო ობიექტები; შედეგად, უკიდურეს სიღატაკეში მცხოვრებ ოჯახებს ერთმევათ საარსებო შემწეობის მიღების შესაძლებლობა, რაც უმეტეს შემთხვევაში, მათი შემოსავლის ერთადერთი წყაროა. ...", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „ახალგაზრდა ადვოკატებმა" სამართლებრივ საკითხებზე მომზადებული სამეცნიერო ჟურნალის მესამე ნომერი გამოსცა. სამეცნიერო ჟურნალი სამართლის სფეროში მოღვაწე ახალგაზრდა სპეციალისტებს, ახალგაზრდა ადვოკატებს, დამწყებ თუ მოქმედ იურისტებს შესაძლებლობას აძლევს მნიშვნელოვან სამართლებრივ თემებზე, საკუთარი პუბლიკაციები და სტატიები, ჟურნალის მეშვეობით, ფართო მკითხველამდე მიიტანოს. ჟურნალის 6 თვეში ერთხელ გამოიცემა და სამართლის აქტუალურ საკითხებს ეხება. სრულად... წყარო: barristers.ge

თბილისი. 2014 წლის 15 დეკემბერს საქართველოს სახალხო დამცველმა წინადადებით მიმართა საქართველოს პარლამენტს ადმინისტრაციულ საპროცესო კოდექსში ცვლილების შეტანის შესახებ, რომელიც ეხებოდა ადმინისტრაციულ სამართალწარმოებაში „სასამართლოს მეგობრის" (Amicus Curiae) ინსტიტუტის შემოღებას. საქართველოს პარლამენტმა გაითვალისწინა სახალხო დამცველის წინადადება და 2015 წლის 3 ივლისს განხორციელებული საკანონმდებლო ცვლილებით საქართველოს ადმინისტრაციულ საპროცესო კოდექსს დაემატა 161 მუხლი. აღსანიშნავია რომ, „სასამართლოს მეგობრის" ინსტიტუტს, რომელიც ამერიკის შეერთებულ შტატებში დაინერგა და კონტინენტური ევროპის სამართლებრივ სისტემაში წარმატებით მოქმედებს, აქტიურად იყენებს ადამიანის უფლებათა ევროპული სასამართლოც. სრულად... წყარო: www.ombudsman.ge

თბილისი. ორგანიზაცია "ახალგაზრდა ადვოკატები" საქართველოს სამართალდამცავი უწყებების რეფორმას ეხმაურება და საზოგადოებრივი კონტროლის გაზრდის მხრივ დაგეგმილ ცვლილებებს წინგადადგმულ ნაბიჯად აფასებს. „ცვლილებები შინაგან საქმეთა სამინისტროსა და მთავარ პროკურატურაში, ხელისუფლებას მაღალ პოლიტიკურ პასუხისმგებლობას აკისრებს და სახელმწიფოს ანგარიშვალდებულებას მოქალაქეების წინაშე, კიდევ უფრო მეტად ზრდის. წინა ხელისუფლების მმართველობის პერიოდში, პროკურატურა და შინაგან საქმეთა სამინისტრო, სისტემური დანაშაულებების განმახორციელებელი უწყებებად ჩამოყალიბდნენ, სადაც ჭარბი ძალაუფლება პოლიტიკურ მიზნებს ემსახურებოდა. მოცემულ ეტაპზე, აღსანიშნავია მთავრობის პოლიტიკური ნება და წინასაარჩევნო პროგრამის მიხედვით დაგეგმილი ცვლილებები, როდესაც იზრდება საპარლამენტო კონტროლი და მთავარი პროკურორი და სახელმწიფო უსაფრთხოების სამსახურის ხელმძღვანელი, ანგარიშვალდებული იქნება ხალხის მიერ არჩეული ორგანოს - პარლამენტის წინაშე. შესაბამისად, ქვეყანაში ზემოაღნიშნული სახელმწიფო ორგანოების მიმართ, უნდა გაიზარდოს საზოგადოებრივი ნდობა და ინსტიტუციური დამოუკიდებლობა"..., ნათქვამია ორგანიზაციის ვებგვერდზე. სრულად... წყარო: ორგანიზაციის ვებ-გვერდი სოციალურ ქსელში