თბილისი. თავისუფლების ინსტიტუტი მიესალმება მთავრობის ინიციატივას ნაფიც მსაჯულთა სასამართლოს უფლება გავრცელდეს თანამდებობის პირთა საქმეებზე. „ეს ინიციატივა წარმოადგენს წინ გადადგმულ ნაბიჯს საქართველოში სამართლებრივი სახელმწიფოს მშენებლობის გზაზე, თუმცა, იმისათვის რომ რეფორმის მიზანი – მიუკერძოებელი და სამართლიანი სასამართლოს უფლების რეალიზება, მართლმსაჯულების პროცესის მიმართ საზოგადოების ნდობის გაზრდა – მიღწეული იყოს, საჭიროა პროექტის დახვეწა", აღნიშნულია თავისუფლების ინსტიტუტის განცხადებაში. თავისუფლების ინსტიტუტი განცხადებაში ამ მიმართულებით კონკრეტულ ინიციატივებზე საუბრობს. სრულად წყარო: liberty.ge

თბილისი. საქართველოს ახალგაზრდა იურისტთა ასოციაცია 19 დეკემბერს გავრცელებულ ინფორმაციას ეხმაურება და სამართალდამცავ ორგანოებს მიმართავს დაუყოვნებლივ დაიწყონ გამოძიება მოსამართლის თანაშემწის მოხსენებით ბარათში აღნიშნულ გარემოებებთან დაკავშირებით. შეგახსენებთ, რომ 19 დეკემბერს გავრცელდა ინფორმაცია, რომლის თანახმად, სპეცსამსახურის წარმომადგენლის მხრიდან ადგილი ჰქონდა ზეწოლას მოსამართლის თანაშემწის მიმართ, სასამართლოდან სხვადასხვა სახის ინფორმაციის მოპოვებისა და სპეცსამსახურებთან თანამშრომლობაზე დაყოლიების მიზნით.  საქართველოს ახალგაზრდა იურისტთა ასოციაცია მიიჩნევს, რომ „ამ შემთხვევაში, შესაძლოა, ადგილი ჰქონდეს სისხლის სამართლის კოდექსით გათვალისწინებული დანაშაულის ნიშნებს და მოუწოდებს სამართალდამცავ ორგანოებს, დაუყოვნებლივ დაიწყონ  გამოძიება მოსამართლის თანაშემწის მოხსენებით ბარათში აღნიშნულ გარემოებებთან დაკავშირებით. საია აქვე აღნიშნავს, რომ სასამართლოს დამოუკიდებლობა გარანტირებულია საქართველოს უზენაესი კანონით - კონსტიტუციით და დაუშვებელია ამდაგვარი მეთოდებით მართლმსაჯულების დამოუკიდებლობაზე რაიმე სახის ზემოქმედების განხორციელება".  წყარო: gyla.ge

თბილისი. საქართველოს ახალგაზრდა იურისტთა ასოციაციის მიერ დაფუძნებულმა იურიდიული განათლების ხელშეწყობის ფონდმა ტრადიციულად,  საქართველოს საკონსტიტუციო სასამართლოში, გამართა ოლიმპიადა  სახელწოდებით: „ახალგაზრდა იურისტები კონსტიტუციური  უფლებებისათვის". ოლიმპიადა ბოლო 6 წლის განმავლობაში ყოველწლიურად იმართება. წელს მასში მონაწილეობა მიიღო– თბილისის სახელმწიფო უნივერსიტეტისა და საქართველოს უნივერსიტეტის   საბაკალავრო პროგრამის მე-2, მე-3 და მე- 4 კურსისი სტუდენტების 8 გუნდმა. ოლიმპიადას ხელმძღვანელობდა ჟიური, რომლის  შემადგენლობაშიც შედიოდნენ: საკონსტიტუციო სასამართლოს წევრები, დარგის სპეციალისტები, პროფესორ-მასწავლებლები და მოსამართლე გერმანიიდან. დახურვის ღონისძიებაზე გამოცხადდა გამარჯვებული გუნდი, საუკეთესო მოსარჩელე, საუკეთესო მოპასუხე ,  საკონსტიტუციო სასამართლოს რჩეული, იურიდიული განათლების ხელშეწყობის ფონდის  რჩეული და ჟიურის სიმპათია  .ფინანსურმა მხარდამჭერმა ორგანიზაციამ "IRZ” დაასახელა საუკეთესო მოთამაშე, რომელსაც გადაეცა მათ მიერ დაწესებული მთავარი პრიზი. წყარო: gyla.ge

გურია. 28 ნოემბერს, გურიის ახალგაზრდული რესურცენტრმა, ადგილობრივი არასამთავრობო და მედია ორგანიზაციების წარმომადგენლებისათვის ახალი პროექტის პრეზენტაცია გამართა. პროექტი რომლის სახელწოდება „პირობით მსჯავრდებული არასრულწლოვნებისა და ახალგაზრდების რეინტეგრაციისა და განვითარების ხელშეწყობა" ევროკავშირმა დააფინანსა. პროექტი მიზნად ისახავს დემოკრატიული პროცესების ხელშეწყობას და მისი ამოცანებია პირობით მსჯავრდებული არასრულწლოვნებისა და ახალგაზრდების რეინტეგრაციისა და რესოციალიზაციის ხელშეწყობა; ეფექტური ინსტიტუციონალური მექანიზმებისა და სახელმძღვანელო მითითებების შექმნა პირობით მსჯავრდებული არასრულწლოვნებისა და ახალგაზრდების მდგომარეობის გასაუმჯობესებლად. პროექტს „გურიის ახალგაზრდული რესურსცენტრი", „საქართველოს დემოკრატიული განვითარების კავშირთან" პარტნიორობით განახორციელებს.

თბილისი. 12 ნოემბერს „საქართველოს ახალგაზრდა იურისტთა ასოციაციამ" გამართა კვლევის – „სისხლის სამართლის მართლმსაჯულებაში არსებული ხარვეზები და რეკომენდაციები"  – პრეზენტაცია. 2010 წელს სისხლის სამართლის ახალი საპროცესო კოდექსი ამოქმედდა, საიამ კვლევაში შეაფასა, როგორც საკანონმდებლო გარემო, ისე განვითარებული პრაქტიკა, რის შედეგადაც დაასკვნა, რომ კვლავ არსებობს ისეთი ხარვეზები, როგორიცაა მაგალითად დანაშაულის გამოვლენისა და გამოძიების მარეგულირებელი ნორმების შესაბამისობა ადამიანის უფლებათა ევროპულ სტანდარტებთან, ნაფიც მსაჯულთა სასამართლოს ინსტიტუტის მიუკერძოებლობის დაცვის არასაკმარისი მექანიზმები და ა.შ საია, ადამიანის უფლებათა ევროპულ სტანდარტებზე დაყრდნობით,  სთავაზოებს შესაბამის ორგანოებს კონკრეტული რეკომენდაციებს ამ პრობლემათა აღმოფხვრის მიზნით. სრულად  წყარო: gyla.ge

თბილისი. საქართველოს ახალგაზრდა იურისტთა ასოციაცია და ,,კონსტიტუციის 42-ე მუხლი” პოლიტიკური ნიშნით დაპატიმრებულ და დევნილ პირთა საკითხების შემსწავლელი სამუშაო ჯგუფში საქმიანობას წყვეტს. სამუშაო ჯგუფი 1 ნოემბერს საქართველოს პარლამენტის ადამიანის უფლებათა დაცვის და სამოქალაქო ინტეგრაციის კომიტეტთან შეიქმნა. ორგანიზაციები „საია" და „კონსტიტუციის 42–ე მუხლი" მიესალმებიმიან ამ ინიციატივას, თუმცა განცხადებაში ნათქვამია, რომ სამუშაო ჯგუფის მუშაობისას გამოვლინდა არაერთი პრობლემა, რომლებიც ხელის შემშლელი ფაქტორი აღმოჩნდა ჯგუფის ეფექტური მუშაობისათვის: სამუშაო ფორმატი და ვადები არ იძლევა საკითხის საფუძვლიანად შესწავლის შესაძლებლობას.  „მიგვაჩნია, რომ დადგენილი ორკვირიანი ვადის ფარგლებში და ჯგუფის მიერ განსაზღვრული ფორმატით შეუძლებელია 185 პოლიტიკური პატიმრისა და 13 პოლიტიკური დევნილი პირის საქმეებზე სრულყოფილი დასკვნების მომზადება. ჩვენთვის ცნობილია, რომ სამუშაო ჯგუფის მანდატის ვადის გაგრძელება არ იგეგმება, რაც საკითხის სიღრმისეულად შესწავლის შესაძლებლობას არ იძლევა. მიუხედავად ჩვენი არაერთი მცდელობისა, ჯგუფის მუშაობის ფორმატის შეცვლა ვერ მოხერხდა და ჯგუფში აღნიშნულის თაობაზე შეთანხმება ვერ იქნა მიღწეული." – ნათქვამია განცხადებაში მიუხედავად იმისა, რომ ორგანიზაციები სამუშაო ჯგუფის ფორმატში წყვეტენ საქმიანობას, ისინი გამოხატავენ მზადყოფნას მათ  მიერ წარმოებული საქმეები და მომზადებული დასკვნები წარადგინონ ჯგუფში და ამ მხრივ დაეხმარონ მას მუშაობაში. სრულად  წყარო: gyla.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება", საქართველოს ახალგაზრდა იურისტთა ასოციაცია და „საერთაშორიო გაჭვირვალობა - საქართველო" საქართველოს მთავრობას პოლიტიკური ნიშნით გათავისუფლებული პირების საქმის გარემოებების შესწავლას სთხოვენ.   „სამართლიანი არჩევნებისა და დემოკრატიის საერთაშორისო საზოგადოებამ", საქართველოს ახალგაზრდა იურისტთა ასოციაციამ და „საერთაშორიო გაჭვირვალობა - საქართველომ" 2012 წლის წინასაარჩევნო გარემოს მონიტორინგის ფარგლებში მოქალაქეთა მიმართ პოლიტიკური ნიშნით ზეწოლის მრავალი ფაქტი შეისწავლა და გამოაქვეყნა.  მათ შორის ერთ-ერთი ყველაზე გავრცელებული - საჯარო სექტორიდან პოლიტიკური მოტივით სამსახურიდან გათავისუფლების შემთხვევები იყო"– აღნიშნულია განცხადებაში. განცხადება წყარო: gyla.ge

თბილისი. „საერთაშორისო გამჭვირვალობა – საქართველო" ეხმაურება ტელეკომუნიკაციის სფეროში სამართალდამცავი ორგანოების მიერ მოქალაქეების უკანონო „მოსმენების" თემას. ორგანიზაცია მოუწოდებს ახალ ხელისუფლებას, გამოიძიოს ქვეყანაში მოქალაქეთა უკანონო „მოსმენების" ფაქტები. ასევე მნიშვნელოვნად მიიჩნევს, რომ საქართველოში მოქმედმა ყველა ოპერატორმა საჯარო გახადოს მათ ხელთ არსებული ინფორმაცია უკანონო ქმედებებთან დაკავშირებით.  სრულად წყარო: transparency.ge

იმერეთი. 25 ოქტომბერს ქუთაისის ახალგაზრდული ცენტრის წევრები ესტუმრნენ ქუთაისის სააპელაციო სასამართლოს.  ისინი გაეცნენ სასამართლოში მიმდინარე რეფორმებს, შეხვდნენ და გამართეს დისკუსია სპიკერ-მოსამართლეებთან და განიხილეს ისეთი საკითხები, როგორიცაა  ნაფიც მსაჯულთა ინსტიტუტი, სასამართლო პროცესის გაშუქების წესები, არასრულწლოვანთა მართლმსაჯულება და ა.შ.  სასწავლო ტური შედგა „საქართველოში ეროვნული ინტეგრაციის გაძლიერების" პროექტის  (ANI)  ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. სრულად წყარო: kedec.ge

თბილისი. საზოგადოებრივი ორგანიზაცია ,,კონსტიტუციის 42-ე მუხლი” ეხმიანება საქართველოს უზენაესი სასამართლოს თავმჯდომარის განცხადებას, რომელიც მან დიპლომატურ კორპუსთან შეხვედრისას გააკეთა. სრულად წყარო: article42.ge

აჭარა. საზოგადოებრივი ორგანიზაცია ,,კონსტიტუციის 42-ე მუხლის’’ ორგანიზებით ბათუმში 7-8 სექტემბერს ადგილობრივი ადვოკატებისთვის ორდღიანი ტრენინგი გაიმართა. ტრენინგია თემა იყო „სასამართლოს მეგობრის ინსტიტუტი სამართალწარმოებაში", რომლის ფარგლებშიც ადვოკატებმა ორგანიზაციის ექსპერტების შეფასებები მოისმინეს და პრაქტიკული რჩევები მიიღეს. ტრენინგი პროექტის "სისხლის სამართლის საპროცესო კოდექსის დანერგვის ხელშეწყობა"  ფარგლებში ჩატარდა. პროექტის მხარდამჭერია"ეროვნული წვლილი დემოკრატიაში” (NED).  სრულად წყარო: article42.ge

თბილისი. დიდ ბრიტანეთში არსებული დავების ეფექტურად მოგვარების ცენტრმა (CEDR) 18 ქართველ დელეგატს ჩაუტარა ტრენინგი მედიაციაში. ტრენინგის მონაწილეთა უმრავლესობა მიიღებს დავების ეფექტურად მოგვარების ცენტრის (CEDR) საერთაშორისო აკრედიტაციას, რათა იმუშაონ როგორც მედიატორებმა და ასევე მონაწილეობა მიიღონ JILEP-ის დაფინანსებულ სასამართლოსთან არსებული მედიაციის საპილოტე პროექტში. პროექტი 2012 წლის შემოდგომაზე დაიწყება.  სასამართლოსთან არსებული მედიაციის საპილოტე პროექტი გულისხმობს თანამშრომლობას USAIS/JILEP–ის, თბილისის საქალაქო სასამართლოს, საქართველოს იუსტიციის უმაღლესი საბჭოს, თბილისის სახელწმიფო უნივერსიტეტის დავების ალტერნატიული მოგვარების ეროვნული ცენტრის (TSU NCADR) და გერმანული საზოგადოება საერთაშორისო თანამეგობრობისთვის (GIZ) შორის. პროექტის მიზანია სამართლიანობისადმი ხელმისწავდომობის გაზრდა და სასამართლოს ეფექტურობის გაძლიერება საქართველოში.  სრულად წყარო: ewmi-jilep.org 

იმერეთი. სასამართლო სისტემის დამოუკიდებლობა, გამჭირვალობის გაზრდა, მოსამართლეთა მიუკერძოებლობა და პრობლემები სისხლის სამართლის საქმეებში -  ამ საკითხებთან დაკავშირებით, 25 ივლისს, ახალგაზრდა იურისტთა ასოციაციის ქუთაისის ფილიალში საინფორმაციო შეხვედრა გაიმართა. საიას მიერ წარმოდგენილი რეკომენდაციები აღნიშნული საკითხების გადაჭრის გზებს ასახავდა. შეხვედრაზე საზოგადოებრივი ორგანიზაციების მიერ მომზადებული ანგარიში და თბილისის საქალაქო სასამართლოს სისხლის სამართლის საქმეების მონიტორინგის 6 თვის შედეგები იყო წარმოდგენილი. შეხვედარაში მონაწილეობა საზოგადოებრივმა ორგანიზაციებმა და მედიის წარმომადგენლებმა მიიღეს. მსგავსი ტიპის კვლევებს საია ყოველწლიურად ატარებს და აცნობს საზოგადოებას. ახალგაზრდა იურისტთა ასოციაციის თავმჯდომარის თამარ ჩუგოშვილის განცხადებით, მსგავსი ტიპის შეხვედრების მიზანია სასამართლო სისტემაში არსებული პრობლემების მოგვარება. საიას მიერ წამოდგენილი კვლევები ასახავს სტატისტიკურ მონაცემებს, რომლებშიც წამოდგენილია სასამართლო სისტემის დღევანდელი ვითარება.

თბილისი.6 ივლისს, კოალიციამ დამოუკიდებელი და გამჭვირვალე მართლმსაჯულებისთვის ფორუმი მოაწყო, რომელიც დემოკრატიული და გამჭვირვალე სასამართლოს ადმინისტრირების ხელშეწყობის საკითხებს დაეთმო. ფორუმი აშშ–ს საერთაშორისო განვითარების სააგენტოს (USAID) საქართველოს მისიის დირექტორმა, სტივენ ჰეიკინმა გახსნა. საქართველოს ახალგაზრდა იურისტთა ასოციაციის თავმჯდომარემ, თამარ ჩუგოშვილმა კი აუდიტორიას მოსამართლეთა თვითმმართველობის და ინდივიდუალური მოსამართლის გაძლიერებასთან დაკავშირებული რეკომენდაციები წარუდგინდა.   ფორუმზე ასევე წარადგინეს კოალიციის მიერ მომზადებულ ანგარიში, სადაც განხილულია ის საკითხები, რომელიც გავლენას ახდენს სასამართლოს მიმდინარე რეფორმებზე. განსაკუთრებულ მწვავე პრობლემადაა მიჩნეული სასამართლო სისტემის გამჭვირვალობა, სხდომებზე ფოტო, ვიდეო–გადაღების და აუდიოჩანაწერების არსებული წესი, რომელიც ანგარიშის ავტორების აზრით, გამჭვირვალობის მოთხოვნებს ვერ პასუხობს. ანგარიშში ასევე ხაზგასმულია მოსამართლეთა თვითმმართველობის როლის გაზრდის მნიშვნელობა სასამართლო ხელისუფლების ადმინისტრირების პროცესში, ინდივიდუალური მოსამართლეების გაძლიერება და ა.შ. ფორუმს ესწრებოდნენ, საქართველოს უზენაესი სასამართლოს თავმჯდომარე, კონსტანტინე კუბლაშვილი, საქართველოს იუსიტიციის საბჭოს მდივანი, თბილისის სააპელაციო სასამართლოს თავმჯდომარე, ვალერი ცერცვაძე, ასევე ამ სფეროში მომუშავე არასამთავრობო ორგანიზაციები და ექსპერტები.  ფორუმის მიზანია ხელი შეუწყოს დიალოგის გაღრმავებას ხელისულფებასა და სამოქალაქო საზოგადოებას შორის. დღევანელი შეხვედრა მუხეთე ღონისძიებაა კოალიციის მიერ ორგანიზებულ ფორუმთა შორის.

აჭარა. 28 ივნისს, ბათუმის დემოკრატიული ჩართულობის ცენტრში, „საერთაშორისო გამჭვირვალობა - საქართველომ" სასამართლოს ოთხთვიანი ადმინისტრაციულ საქმეთა მონიტორინგის შედეგები გამოაქვეყნა. ორგანიზაციამ 252 სასამართლოს სხდომის მონიტორინგის შედეგად გამოავლინა სასამართლოს როგორც ძლიერი, ისე სუსტი მხარეები. მონაცემებზე დაყრდნობით, შეიძლება მივიჩნიოთ შემდეგი: ცალკეული გამონაკლისების მიუხედავად სასამართლოში საქმის განხილვის საქვეყნოობის პრინციპი არ ირღვევა. შეჯიბრითობის პრინციპი კი საქმეთა დიდ უმრავლესობაში დაცულია. მონაცემების მიხედვით, დავების 92,6%-ის შემთხვევაში დავა სრულად ან ნაწილობრივ სახელმწიფო მხარის სასარგებლოდ დასრულდა. დაგვიანების კუთხით თუ განვიხილავთ ბათუმში პროცესების 70% დაგვიანებით დაიწყო. პრობლემებს შორის უნდა გამოვყოთ აგრეთვე ის ფაქტიც, რომ სასამართლო პროცესები ძალიან ბევრ შემთხვევაში წინასწარ არ იყო გამოცხადებული. „საერთაშორისო გამჭვირვალობა – საქართველო" მონიტორინგს G-PAC-ის ფინანსური მხარდაჭერით ახორციელებდა.

იმერეთი. დღეს, ქუთაისის დემოკრატიული ჩართულობის ცენტრში საქართველოს საავტორო უფლებათა დაცვის ასოციაციამ შეხვედრა გამართა, რეგიონებში მოქმედი რადიოკომპანიების, თეატრების, გამომცემლობების, სავაჭრო დაწესებულებების, რესტორნების, კაფეების, სასტუმროების ხელმძღვანელებსა და სხვა საავტორო უფლებით მოსარგებლეებთან. შეხვედრაზე  საქართველოს საავტორო უფლებათა დაცვის ასოციაციამ დაინტერესებულ პირებს საავტორო უფლებათა შესახებ ინფორმაცია მიაწოდა და მონაწილეთა აზრიც მოისმინა.

კახეთი. თელავის დემოკრატიული ჩართულობის ცენტრში შეხვედრა სახელწოდებით ,,ციხის საერთაშორისო რეფორმა”, ევროკავშირის მიერ დაფინანსებული პროექტის ,,სამოქალაქო საზოგადოების ჩართულობა სისხლის სამართლის სისტემის ჰუმანიზაციის პროცესში" ფარგლებში გაიმართა. ღონისძიების მიზანს სისხლის სამართლის სისტემაში მიმდინარე რეფორმების განხილვა და დისკუსია წარმოადგენდა. პროექტის ფარგლებში მომხსენებლებმა საზოგადოებას სისხლის სამართლის კოდექსში არსებული დადებითი და უარყოფითი მხარეები წარუდგინეს. ,,2009 წლიდან საქართველოს ხელისუფლებამ გამოაცხადა შერბილებული მიდგომა სისხლის სამართლის სისტემაში. ჩვენთვის საინტერესოა, მოვისმინოთ სამოქალაქო საზოგადოების წარმომადგენლების აზრი იმის თაობაზე თუ როგორ მიმდინარეობს ეს პროცესი: რა სიახლეები დაინერგა, რა წარმატებები იქნა მიღწეული და რა პრობლემები არსებობს ამ მიმართულებით’’, აცხადებს ცისანა ჭანტურია, საზოგადოებრივი ორგანიზაციის ,,ციხის საერთაშორისო რეფორმის” დირექტორი.

თბილისი. საზოგადოებრივი ორგანიზაციების წინაშე მდგარ სამართლებრივ პრობლემებზე ისაუბრეს 31 მაისს „სამოქალაქო საზოგადოების ინსტიტუტში". ორგანიზაციის ექსპერტებმა  და მოწვეულმა სტუმრებმა შეხვედრაზე მიმოიხილეს კანონმდებლობასთან დაკავშირებული ის საკითხები, რომლებიც ხელს უშლის საზოგადოებრივი ორგანიზაციების ეფექტურ მუშაობას: მოხალესეობის მარეგულირებელი საკანონმდებლო ბაზის არარსებობა (არ არის  განსაზღვრული  ტერმინ „მოხალისეობის" დეფინიცია, მოხალისის, მასპინძელი ორგანიზაციისა და მესამე პირების უფლება–მოვალეობები და ა.შ), რის გამოც ქვეყანაში მოხალისეობის ინსტიტუტი არ არის განვითარებული და მესამე  სექტორიც თითქმის არ იყენებს მოხალისეთა შრომას. სახელწმიფოს გრანტებთან დაკავშირებული პრობლემები  –  2011 წლის ოქტომბრიდან, საქართველოს სამინისტროები უფლებამოსილნი არიან  გასცენ გრანტი საზოგადოებრივი ორგანიზაციებისათვის, თუმცა არ არის ნათელი და მკაფიო თუ რა კრიტერიმით რეგულირდება სახელმწიფო გრანტის გაცემის პროცედურა, როგორ ტარდება საგრანტო კონკურსი, როგორ ხდება გამარჯვებულთა გამოვლენა და ა.შ, სახელმწიფოს მიერ გრანტის გაცემის წესები ჩამოყალიბებას საჭიროებს. კიდევ ერთი გარემოება – მიუხედავად საკანონმდებლო ცვლილებებისა, თვითმმართველობის ორგანოებს სამინისტროებისგან განსხვავებით არ აქვთ უფლება, გასცენ გრანტი „ეს დაბრკოლებებს უქმნის, როგორც თვითმმართველობებს, ასევე იმ საზოგადოებრივ ორგანიზაციებს, რომლებიც ადგილობრივი პრობლემების გადაწყვეტაზე მუშაობენ" – ნათქვამია პოლიტიკის ნარკვევში, რომელიც „სამოქალაქო საზოგადოების ინსტიტუტმა" შეხვდრაზე წარადგინა. შეხვედრაზე ასევე ყურადღება გაამახვილეს ტერმინ ,,შემოწირულობის’’ განმარტებასთან დაკავშირებულ სამართლებრივ პრობლემებზე. თუმცა ტერმინების განმარტებასთან დაკავშირებული პრობლემები ამით არ ამოწურულა.  კერძოდ,  შეხვედრისას აღინიშნა, რომ მნიშვნელობა ტერმინებისა „დამხმარე სამეწარმეო საქმიანობა" და „სამეწარმეო საქმიანობაზე გადასვლა" ასევე ბუნდოვანია და ექვემდებარება დისკრეციას.  უფრო ვრცლად საზოგადოებრივი ორგანიზაციების წინაშე მდგარ სამართლებრივ პრობლემებს შეგიძლიათ გაეცნოთ პოლიტიკის ნარკვევში, რომელიც „სამოქალაქო საზოგადოების ინსტიტუტმა" მოამზადა.    პოლიტიკის ნარკვევი  

აჭარა. 29 მაისს, ეროვნულ–დემოკრატიული ინსტიტუტის (NDI) ორგანიზებით,ბათუმის დემოკრატიული ჩართულობის ცენტრში, გაიმართა პირველი საჯარო განხილვა საკონსტიტუციო ცვლილების პროექტის, რომლის მიზანია საქართველოს კონსტიტუციაში აისახოს ქალაქ ლაზიკას სტატუსის ამსახველი დებულება. საჯარო განხილვას ესწრებოდნენ რიგითი მოქალაქეები, საზოგადოებრივი ორგანიზაციების, ბათუმის საკრებულოს, საპარლამენტო უმრავლესობისა და უმცირესობის წარმომადგენლები. საქართველოს პარლამენტის წევრებმა დამსწრე საზოგადოებას ლაზიკას განვითარების გეგმა გააცნეს. კონკრეტულად, როგორი იქნება ქალაქის სამართლებრივი სტატუსი, მისი ეკონომიკური და ინფრასტრუქტურის განვითარების სტრატეგია. უმცირესობისა და უმრავლესობის წევრებს შორის აზრთა სხვადასხვაობა გამოიწვია ქალაქის მშენებლობის აუცილებლობამ. ცვლილებების პროექტის საყოველთაო–სახალხო განხილვის პროცესი ეროვნულ-დემოკრატიული ინსტიტუტის (NDI) ორგანიზებით ხორციელდება. საჯარო განხილვები გაიმართება ასევე ოზურგეთში, ზუგდიდში, ფოთში, ქუთაისსა და თელავში.

 აჭარა. 23 მაისს, ბათუმის დემოკრატიული ჩართულობის ცენტრში, ორგანიზაციამ „ ციხის საერთაშორისო რეფორმა" გამართა შეხვედრა თემაზე: „სამოქალაქო საზოგადების ჩართულობა სისხლის სამართლის სისტემის ჰუმანიზაციის პროცესში”. სასჯელის შეფარდების პოლიტიკა, არასრულწლოვანთა მართლმსაჯულება და პატიმართა ვადამდე გათავისუფლება - დისკუსიის მონაწილეებმა ამ საკითხებზე იმსჯელეს. ისაუბრეს სისხლის სამართლის კანონმდებლობის და პრობაციის სისტემაში მიმდინარე რეფორმების შესახებ. შეხვედრის მიზანი იყო სამოქალაქო საზოგადოების ჩართულობის გაზრდა სისხლის სამართლის რეფორმის პროცესში, ასევე ლობირება სისხლის სამართლის სისტემაში ჰუმანური მიდგომების ხელშეწყობის თვალსაზრისით.

თბილისი. სამოქალაქო განვითარების სააგენტოს (CIDA) ორგანიზებით, სასტუმრო „ქორთიარდ მარიოტში" გაიმართა კონფერენცია – „სახელმწიფო იურიდიული დახმარება: რეალობა და გამოწვევები". კონფერენციის ფარგლებში იურიდიული დახმარების სამსახურსა და საზოგადოებრივ ორგანიზაციებს შორის თანამშრომლობის მემორანდუმს მოეწერა ხელი. მემორანდუმზე ხელმოწერით მხარეები შეთანმხდნენ თანამშრომლობაზე იურიდიული დახმარების საკითხებში.   სსიპ „იურიდიული დახმარების სამსახური" უზრუნველყოფს საჯარო და იურიდიული დახმარების ამსახველი ინფორმაციის მიწოდებას საზოგადოებრივი ორგანიზაციებისთვის. იგი ასევე გაითვალისწინებს საზოგადოებრივი ორგანიზაციების მიერ მიწოდებულ რეკომენდაციებს. საზოგადოებრივი ორგანიზაციები თავის მხრივ, ხელს შეუწყობენ საზოგადოების ინფორმირებას, მიაწვდიან სამსახურს რეკომენდაციებს და ა.შ.მემორანდუმი ასევე ითვალისწინებს იმას, რომ არასამთავრობო ორგანიზაციები "ხელს შეუწყობენ სსიპ "იურიდიული დახმარების სამსახურს" სოციალურად დაუცველი მოსახლეობის იმ ნაწილისთვის იურიდიული დახმარების მიწოდებაში, რომელსაც ესაჭიროება წარმომადგენლობა სამოქალაქო და ადმინასტრაციული სამართლის საკითხებზე".   კონფერენციაზე, ასევე, გამოყენებითი კვლევების კომპანიის (ARC) მიერ ჩატარებული კვლევის პრეზენტაცია შედგა, რომელმაც გამოიკვლია იურიდიული დახმარების სამსახურის შესაძლებლობები და საჭიროებები. კვლევის მიხედვით, გამოკითხულთა 73,6 % სრულიად კმაყოფილია მათი მომსახურებით. მიუხედავად ნდობის („სრულიად ვენდობი" – 73,7 %) და კმაყოფილების მაღალი ხარისხისა, ბენეფიციარების თითქმის მესამედი თვლის, რომ მოსახლეობას მეტი ინფორმაცია უნდა ჰქონდეს სამსახურის საქმიანობის შესახებ. მომსახურების სარგებლობამდე ბენეფიციართა 43,1 %–მა არ იცოდა ამ ორგანიზაციის არსებობის შესახებ. მათ შორის ვისაც ჰქონდა ინფორმაცია, უმეტესობა აღნიშნავს, რომ ინფორმაციის წყაროს ის ნაცნობები წარმოადგენენ, რომელთაც უკვე მიიღეს მომსახურება იურიდიული დახმარების სამსახურისგან. მხოლოდ 15 %–ს აქვს მიღებული ინფორმაცია სატელევიზო გადაცემიდან ან რეკლამიდან.   პრეზენტაციის შემდგომ გაიმართა დისკუსია, სადაც კონფერენციის მონაწილეებმა სახელმწიფო იურიდიული დახმარების საქმიანობის, მონიტორინგის და ევალუაციის ეფექტურობის გაზრდის შესახებ იმსჯელეს.