თბილისი. საზოგადოებრივი ორგანიზაციები მოუწოდებს საქართველოს ხელისუფლებას, გააძლიეროს მისი პოლიტიკური და დიპლომატიური ძალისხმევა ცხინვალში დაპატიმრებული ზაზა გახელაძის გასათავისუფლებლად და შეიმუშავოს ოკუპირებულ ტერიტორიებზე ადამიანის უფლებათა დაცვის უფრო ეფექტიანი პოლიტიკა. „სამწუხაროდ, კონფლიქტის რეგიონებში ადამიანის უფლებათა პოლიტიკა ჩვენს ქვეყანაში სათანადოდ ინსტიტუციონალიზებული და გაწერილი არ არის. მათ შორის, კონფლიქტების მრავალწლიანი გამოცდილების მიუხედავად, ამ დრომდე არ გვაქვს კონფლიქტის რეგიონებში მოქმედი საერთაშორისო მექანიზმები, რომელიც ადამიანის უფლებების მდგომარეობის მონიტორინგის, რეაგირებისა და პრევენციის ქმედითი ინსტრუმენტები იქნება. ადამიანის უფლებების დაცვის პოლიტიკაში სათანადოდ არ არის დანახული დე-ფაქტო მთავრობებთან კომუნიკაციისა და მოლაპარაკების რესურსი, რაც ადამიანის უფლებების, უსაფრთხოებისა და ჰუმანიტარული დაცვის საკითხებზე რეგულარული დიალოგისა და მუშაობის ფორმატი იქნებოდა“, ნათქვამია ერთობლივ განცხადებაში. სრულად... წყარო: gyla.ge

თბილისი. ადამიანის უფლებათა ცენტრმა გამართა ანგარიშის პრეზენტაცია - „კორონავირუსის პანდემია - უფასო იურიდიული დახმარება და ადამიანის უფლებების მონიტორინგი“, რომელიც მომზადდა პროექტის „უფასო იურიდიული ადვოკატირება და ადამიანის უფლებების მონიტორინგი კორონავირუსის პანდემიის შემდეგ“ ფარგლებში. ადამიანის უფლებათა ცენტრი პროექტს ახორციელებდა თბილისსა და საქართველოს ხუთ რეგიონში (შიდა ქართლი, კახეთი, ქვემო ქართლი, იმერეთი და სამეგრელო) საქართველოში ნიდერლანდების საელჩოს მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. კოალიცია დამოუკიდებელი და გამჭვირვალე მართლმსაჯულებისთვის აქვეყნებს განცხადებას: სასამართლო რეფორმის ახალი პერსპექტივა. „ახლა, როცა სასამართლო რეფორმის შედეგების მიმართ იმედგაცრუება ნათელია, ეს რეფორმის სტრატეგიის რადიკალური ცვლილების საჭიროებაზეც მიუთითებს. გადასადგმელი ნაბიჯები მიმართული უნდა იყოს სასამართლოს სისტემის მართვის კონსენსუსზე ორიენტირებული რეფორმისკენ და მყარ დაბრკოლებებს უნდა უქმნიდეს ძალაუფლების კონცენტრირებას“. სრულად... წყარო: gyla.ge

თბილისი. ადამიანის უფლებათა ევროპულმა სასამართლომ საქართველოს ახალგაზრდა იურისტთა ასოციაციის და EHRAC-ის მიერ 2019 წლის 20-21 ივნისს დაზარალებული ჟურნალისტებისა და დემონსტრანტების სახელით შეტანილი საჩივრების არსებითი განხილვა დაიწყო. „კერძოდ, სასამართლომ საქართველოს მთავრობას, როგორც მოპასუხე სახელმწიფოს, საქმეებზე - ბაღაშვილი და სხვები საქართველოს წინააღმდეგ და ქურდოვანიძე და სხვები საქართველოს წინააღმდეგ, შესაბამისი კითხვებით მიმართა.  გარდა უფლებების დარღვევის შესახებ შეკითხვებისა, ევროპულმა სასამართლომ დააკმაყოფილა საიას ადვოკატების მოთხოვნა და დაავალა საქართველოს მთავრობას, წარმოადგინოს 2019 წლის 20-21 ივნისს აქციის დაშლასთან დაკავშირებით პროკურატურის მიერ წარმოებული სისხლის სამართლის საქმის მასალები“, ნათქვამია საია-ს ვებგვერდზე.  სრულად... წყარო: gyla.ge

თბილისი. საზოგადოებრივი ორგანიზაციების ნაწილი ავრცელებს განცხადებას: იუსტიციის უმაღლესი საბჭო აგრძელებს მართლმსაჯულებისთვის დამაზიანებელი ნაბიჯების გადადგმას. „17 ივნისს იუსტიციის უმაღლესი საბჭოს სხდომა მიმდინარეობს, სადაც მოსამართლის 100-მდე ვაკანსიის შესახებ მიიღება გადაწყვეტილება, მათ შორის დღესვე, პარლამენტს უზენაესი სასამართლოს მოსამართლეობის 9 კანდიდატი წარედგინება. სასამართლოს სიღრმისეული რეფორმების განხორციელების გარეშე, ამგვარი მნიშვნელობის საკადრო გადაწყვეტილებების დაჩქარებულ ტემპში მიღება, უკიდურესად აზიანებს მართლმსაჯულების ინტერესებს. ვფიქრობთ, რომ საბჭოს ქმედებებმა მომავალში შესაძლებელია ლეგიტიმურობის საკითხი წარმოშვას ამ პირობებში დანიშნული მოსამართლეების მიმართ“, ნათქვამია განცხადებაში. სრულად... წყარო: transparency.ge

თბილისი. 16 ივნისს ინფორმაციის თავისუფლების განვითარების ინსტიტუტმა (IDFI) საქართველოს პარლამენტის იურიდიულ საკითხთა კომიტეტთან ერთად სამუშაო შეხვედრა გამართა. „სამუშაო შეხვედრის მონაწილეებმა განიხილეს საქართველოს საკონსტიტუციო სასამართლოს 2019 წლის 7 ივნისის გადაწყვეტილების აღსრულების მიზნით გასატარებელი საკანონმდებლო ღონისძიებები. შეხვედრის ფარგლებში ჩამოყალიბდა საკონსტიტუციო სასამართლო გადაწყვეტილების იმპლემენტაციის საბაზისო მოდელი, რომლის მიხედვითაც საქართველოს პარლამენტმა შესაბამისი საკანონმდებლო ცვლილებების პაკეტი უნდა შეიმუშაოს“. სრულად... წყარო: idfi.ge

თბილისი. სოციალური სამართლიანობის ცენტრის ინფორმაციით, საქართველოს უზენაესმა სასამართლომ ბიბლუსის საჩივარი ცილისწამებასთან დაკავშირებით არ დააკმაყოფილა და უცვლელი დატოვა ქვემდგომი ინსტანციის სასამართლოს გადაწყვეტილებები. სასამართლომ დაასკვნა, რომ თანამშრომლების მხრიდან გავრცელებული ინფორმაციის ერთი ნაწილი სწორ ფაქტებს წარმოადგენდა, ხოლო მეორე ნაწილი - მათ პირად აზრს, რაც გამოხატვის თავისუფლების უფლებითაა დაცული.  სოციალური სამართლიანობის ცენტრი ბიბლუსში დასაქმებულ მშრომელთა დამცველად 2017 წლიდანვე ჩაერთო. როგორც საზოგადოებისთვის ცნობილია, 2017 წელს „ბიბლუსი გალერიში“ დასაქმებულების ნაწილმა შრომით ექსპლუატაციაზე, დაბალ ანაზღაურებაზე, არანორმირებულ სამუშაო გრაფიკზე და დაჯარიმების უსამართლო, გაუმართლებელ სისტემაზე ისაუბრა. ამ განცხადებების შემდეგ, კომპანიამ 2 თანამშრომელი გაათავისუფლა. სოციალური სამართლიანობის ცენტრის სამართლებრივი დახმარებით, სასამართლომ თანამშრომლების გათავისუფლება უკანონოდ მიიჩნია, თუმცა დავა კვლავაც მიმდინარეობს ზემდგომ ინსტანციებში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) სამართლებრივი დახმარების შედეგად, სიღარიბის გამო ბავშვების ოჯახისგან დაშორება სასამართლომ უკანონოდ ცნო.  „თბილისის საქალაქო სასამართლომ უპრეცედენტო გადაწყვეტილება მიიღო. სიღარიბის გამო მინდობით აღზრდაში ბავშვების გადაყვანა და ოჯახთან დაცილება უკანონოდ ცნო და დაზარალებულ სამ ბავშვს მორალური ზიანის ანაზღაურების მიზნით 35 000 ლარი მიაკუთვნა. ბავშვები, 2 წლის წინ, სოციალურმა სამსახურმა უკანონოდ, ოჯახის გაძლიერების გარეშე, გამოიყვანა სახლიდან და დედას დააცილა. ბავშვებმა ორი წელი მშობლისგან მოშორებით გამოწვეული სტრესის ქვეშ იცხოვრეს. ეს გარემოება სასამართლომ მიიჩნია უკანონოდ და დააკმაყოფილა PHR-ის სარჩელი“. სრულად... წყარო: ორგანიზაციის გვერდი სოციალურ ქსელში

თბილისი. 26 ივნისი წამების მსხვერპლთა დაცვის საერთაშორისო დღეა. ომბუდსმენის განცხადებით, პატიმრების დიდი რაოდენობით და პენიტენციური დაწესებულების თანამშრომლების მცირე რაოდენობის თანაფარდობით გამოწვეული დისბალანსი ვერ უზრუნველყოფს დაწესებულებებში უსაფრთხო, დაცულ, მოწესრიგებულ და პატიმართა რეაბილიტაცია-რესოციალიზაციისთვის აუცილებელ გარემოს. უფრო ვრცლად იხილეთ: პრევენციის ეროვნული მექანიზმის 2020 წლის ანგარიში... წყარო: ombudsman.ge

თბილისი. სოციალური სამართლიანობის ცენტრის იურისტი, თამარ გვასალია ვიდეოში საუბრობს იმაზე, თუ რატომ გვჭირდება საგამოძიებო სისტემის რეფორმა და როგორი რეფორმა იქნება შედეგის მომტანი. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) იცავდა დევნილ ოჯახს, რომელსაც სსიპ - დევნილთა, ეკომიგრანტთა და საარსებო წყაროების უზრუნველყოფის სააგენტო უარს ეუბნებოდა ალტერნატიული საცხოვრებლით დაკმაყოფილებაზე. „უარის თქმის საფუძველად სააგენტო მიუთითებდა იმ გარემოებაზე, რომ ოჯახი ახლო ნათესავის საკუთრებაში არსებულ ბინაში ცხოვრობდა და არ სჭირდებოდა საცხოვრებლით უზრუნველყოფა. საია სასამართლო პროცესებზე ამტკიცებდა, რომ სააგენტოს უარი ეფუძნებოდა კანონმდებლობის არასწორ განმარტებას და ახლო ნათესავის საკუთრებაში არსებულ ბინაში ცხოვრება არ ართმევდა დევნილ ოჯახს უფლებას, მოეთხოვა ალტერნატიული საცხოვრებლით დაკმაყოფილება. სამივე ინსტანციის სასამართლომ გაიზიარა საია-ს პოზიცია და სასამართლო დავა დევნილი ოჯახის სასარგებლოდ დასრულდა. შედეგად, დევნილი ქალი და მისი არასრულწლოვანი შვილები საცხოვრებელ ბინას მიიღებენ“. სრულად... წყარო: gyla.ge

იმერეთი. საქართველოს ახალგაზრდა იურისტთა ასოციაცია (საია) იცავდა 2021 წლის 27 მაისს სოფელ გუმათში, „რიონის ხეობის დამცველთა“ ოთხ დაკავებულ აქტივისტს. „ქუთაისის საქალაქო სასამართლომ დაასრულა დაკავებულთა ადმინისტრაციული სამართალდარღვევის საქმეების განხილვა. სასამართლომ არ დაადგინა პოლიციის კანონიერი მოთხოვნისადმი დაუმორჩილებლობის ფაქტი. შესაბამისად, ან ნაწილში შეწყვიტა საქმის წარმოება. რაც შეეხება წვრილმანი ხულიგნობის მუხლს, სასამართლომ გადაცდომა მცირე მნიშვნელობის დარღვევად შეაფასა, აქციის მონაწილეები პასუხისმგებლობისაგან გაათავისუფლა და მხოლოდ სიტყვიერი შენიშვნით შემოიფარგლა“. სრულად... წყარო: gyla.ge

თბილისი. სოციალური სამართლიანობის ცენტრის მიერ საჯარო ინფორმაციის სახით მიღებული დოკუმენტაციით დგინდება, რომ ეკონომიკის სამინისტრომ კომპანია “ენკას” ქვემო ნამახვანი ჰესის სამშენებლო დოკუმენტაციის წარდგენის ვადა კიდევ ერთი წლით გაუხანგრძლივა. „მიგვაჩნია, რომ სამინისტროს ეს გადაწყვეტილება “ენკა-სთვის” მინიჭებული კიდევ ერთი დაუსაბუთებელი შეღავათია, რომელიც ადასტურებს, რომ განცხადებები პროექტის სათანადოდ შესწავლის შესახებ, მცდარი და საფუძველს მოკლებულია. ამასთან, ეს პროცესი ხსნის კაშხლის მშენებლობაზე 9-12 თვიანი “მორატორიუმის” გამოცხადების რეალურ მოტივს. კაშხლის ნაგებობის მშენებლობის გადავადება სინამდვილეში უკავშირდება არა მთავრობისა და კომპანიის კომპრომისს, არამედ იმ ფაქტს, რომ კომპანიამ სრულყოფილი საპროექტო დოკუმენტაციის ჩაბარება თავად დააგვიანა და ამავე პერიოდით მოითხოვა სახელმწიფოსგან ვადის გახანგრძლივება“. სრულად... წყარო: socialjustice.org.ge

თბილისი. საქართველოს სახალხო დამცველის მიმართვის საფუძველზე, სამედიცინო და ფარმაცევტული საქმიანობის რეგულირების სააგენტომ შეისწავლა მცირეწლოვანი ბავშვების თვითნებური ე.წ. „მაუგლის მეთოდით“ მკურნალობის საკითხი და უკანონო საექიმო საქმიანობის განხორციელების ფაქტი დაადგინა. შესწავლის შედეგად გამოიკვეთა, რომ აღნიშნული მეთოდი წარმოადგენს ბავშვების სიცოცხლის და ჯანმრთელობისთვის რისკის შემცველ ჩარევას, რასაც განსაკუთრებით მათ ადრეულ ასაკში, მძიმე და შეუქცევადი გართულებების განვითარება შეიძლება მოჰყვეს. აღნიშნული მეთოდის განმახორციელებელ პირს ადმინისტრაციული პასუხისმგებლობა დაეკისრა. სრულად... წყარო: ombudsman.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის” უზენაესი სასამართლოს მოსამართლეთა კონკურსს ეხმიანება. კოალიცია მოუწოდებს ხელისუფლებას, უზენაესი სასამართლოს მოსამართლეების არჩევის პროცესი წარმართოს საპარლამენტო უმრავლესობასა და ოპოზიციას შორის პოლიტიკური კონსენსუსის საფუძველზე. წინააღმდეგ შემთხვევაში არ მიიღოს ამ საკითხზე გადაწყვეტილება მართლმსაჯულების ფუნდამენტური რეფორმის გატარებამდე. სრულად... წყარო: socialjustice.org.ge

თბილისი. სახალხო დამცველი ეხმიანება თბილისის საქალაქო სასამართლოს განჩინებას სსო „პარტნიორობა ადამიანის უფლებებისთვის“ სარჩელზე ნინოწმინდის პანსიონიდან არასრულწლოვნების გამოყვანის თაობაზე. სახალხო დამცველი აუცილებლად მიიჩნევს სასამართლოს განჩინების დაუყოვნებლივ აღსრულებას. „სასამართლოს განჩინება კიდევ ერთხელ, ცალსახად მიუთითებს იმ რეალურ რისკსა და საფრთხეზე, რომელიც დაწესებულებაში ბავშვის უფლებათა დაცვის კუთხით არსებობს და საჭიროებს სახელმწიფო უწყებების მხრიდან დროულ და კოორდინირებულ მოქმედებას. სახალხო დამცველი აღნიშნავს, რომ პანსიონში არსებული მდგომარეობა არათუ არ შეესაბამება არასრულწლოვანთა ინტერესებს და არსებულ სტანდარტებს, საფრთხის შემცველია ბავშვებისთვის ძალადობისგან დაცვის, სრულფასოვანი განვითარების, სოციალიზაციისა და დამოუკიდებელი ცხოვრებისთვის მომზადების კუთხით. არსებითად მნიშვნელოვანია ის ფაქტი, რომ სასამართლო განჩინებაში საფრთხის შემცველად აფასებს პანსიონში არსებულ ზოგად მდგომარეობას და მისი გადაწყვეტილება არ შეიძლება აღქმულ იქნეს, რომ თითქოს საფრთხე მხოლოდ შეზღუდული შესაძლებლობის მქონე ბავშვებისთვის არსებობს“. სრულად... წყარო: ombudsman.ge

იმერეთი. სოციალური სამართლიანობის ცენტრმა შეისწავლა ერთი მხრივ, შუქრუთის პროტესტის მონაწილეთა მთავარი მოთხოვნები და კომპანიასთან მათი შეუთანხმებლობის მიზეზები, ხოლო მეორე მხრივ, ამ ფართე სოციალური და ეკოლოგიური კრიზისის განმაპირობებელი გარემოებები, რომელიც წინ უძღოდა ამ პროტესტს ჭიათურის მუნიციპალიტეტში. „მოსახლეობა და კომპანიის წარმომადგენლები ზიანს განსხვავებულად აფასებდნენ - როგორც მეთოდოლოგიის, ისე სხვადასხვა ტიპის ზიანის დაფარვის კუთხით, მნიშვნელოვანია, რომ სახელმწიფო უწყებები და იქ თავმოყრილი დარგობრივი ცოდნა მიიმართოს წიაღისეულის მოპოვებასთან დაკავშირებული ზიანის შეფასებისთვის, როგორც კონკრეტულ მესაკუთრეთა შეთხვევაში, ისე მთლიანად მუნიციპალიტეტის ბუნებრივ გარემოსთან მიმართებაში. ეს ინტერვენცია უნდა განხორციელდეს ზიანის შეფასების საერთო სტანდარტის შემუშავების სახით, რაც სამთო-მოპოვებითი სექტორის შესაძლო ნეგატიურ ზეგავლენას უფრო მდგრადად, სამართლიანად და მეთოდურად მოაქცევდა რეგულირების სივრცეში“. სრულად... წყარო: socialjustice.org.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის მიიჩნევს, რომ საკონსტიტუციო სასამართლოს ახალი მოსამართლე ინკლუზიური პროცესით უნდა შეირჩეს.  კოალიცია დამოუკიდებელი და გამჭვირვალე მართლმსაჯულებისთვის მოუწოდებს საქართველოს პრეზიდენტს, გაითვალისწინოს სასამართლო ხელისუფლების წინაშე არსებული გამოწვევები, საკონსტიტუციო სასამართლოს განსაკუთრებული როლი და იმოქმედოს საქართველოს კონსტიტუციის სულისკვეთებით. „26 ივლისს საქართველოს საკონსტიტუციო სასამართლოს მოსამართლეს, თამაზ ცაბუტაშვილს, უფლებამოსილების ვადა ეწურება. სასამართლოს ახალი წევრი საქართველოს პრეზიდენტმა უნდა დანიშნოს და კანონმდებლობის თანახმად, ახალი წევრი თანამდებობაზე 26 ივნისიდან 16 ივლისამდე შუალედში უნდა გამწესდეს. მნიშვნელოვანია, პრეზიდენტმა უზრუნველყოს საკონსტიტუციო სასამართლოს წევრის შერჩევის გამჭვირვალე და ინკლუზიური პროცესი, რათა საზოგადოებას ჰქონდეს ნდობა როგორც პროცესის, ისე მის შედეგად შერჩეული კანდიდატის მიმართ“. სრულად... წყარო: www.coalition.ge

თბილისი. სოციალური სამართლიანობის ცენტრი (ყოფილი EMC) ეხმაურება საქართველოს ეკონომიკისა და მდგრადი განვითარების სამინისტროს განცხადებას ნამახვანი ჰესის ეკონომიკური სარგებლიანობის საკითხზე ჩატარებული კვლევების შესახებ, რომელიც სამინისტრომ პროექტზე ხარჯთსარგებლიანობის ანალიზის არსებობის დადასტურების მიზნით გაავრცელა. „თავად სამინისტროს განცხადების შინაარსი ადასტურებს, რომ პროექტის მომზადების ეტაპზე კონკრეტულად ნამახვანი ჰესის პროექტის ხარჯთსარგებლიანობის ანალიზი არ ჩატარებულა, რითიც უხეშად დაირღვა საქართველოს კანონმდებლობის მოთხოვნები. ორგანიზაცია უკვე მერამდენედ მოუწოდებს მთავრობას და შესაბამის უწყებებს, დაუყოვნებლივ გაასაჯაროოს ნამახვანი ჰესის პროექტზე საქართველოს ფინანსთა სამინისტროს დასკვნა და პროექტის ხარჯთარგებლიანობის ანალიზი“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, 19 მაისს საქართველოს პარლამენტში დაინიცირდა კანონპროექტი, რომელიც მიზნად ისახავს საქართველოს საკონსტიტუციო სასამართლოს გადაწყვეტილების - საქმეზე „გიორგი ქებურია საქართველოს პარლამენტის წინააღმდეგ“ აღსრულებას და აქედან გამომდინარე სისხლის სამართლის საპროცესო კანონმდებლობის საქართველოს კონსტიტუციასთან შესაბამისობაში მოყვანას. „კანონპროექტით შემოთავაზებული ცვლილება არ არის ბოლომდე განმსჭვალული საკონსტიტუციო სასამართლოს მიერ მოწოდებული სულისკვეთებით და იგი უმეტესწილად ტექნიკურად ასრულებს სასამართლოს გადაწყვეტილებას. მნიშვნელოვანია, რომ არსებული სტრუქტურული და სისტემური ხარვეზების აღმოსაფხვრელად წარმოდგენილი კანონის პროექტი გახდეს უფრო მეტად კონკრეტული, შექმნას ბრალდებულთათვის მეტი უფლებრივი გარანტიები, აღჭურვოს სამართალდამცავი უწყებები „ნეიტრალური მტკიცებულების“ მოპოვების, მათ შორის ვიდეო-გადაღების რეალური შესაძლებლობებით“. სრულად... წყარო: gyla.ge

თბილისი. „კოალიცია თანასწორობისთვის” შემავალი ორგანიზაციები მიიჩნევენ, რომ ნინოწმინდის პანსიონატთან დაკავშირებით მიმდინარე მოვლენები საგანგაშოა და სახელმწიფოსგან დაუყოვნებელ, მკაცრ რეაგირებას საჭიროებს. „ამ დრომდე სახელმწიფოს არცერთ უწყებას მკაფიო პოზიცია არ გამოუხატავს პანსიონატში არასრულწლოვნების მიმართ ჩადენილი სავარაუდო ძალადობისა და ბავშვთა უფლებების დარღვევის განგრძობად შემთხვევებზე. ამასთან, სახელმწიფოს არ შეუქმნია დემოკრატიული სამუშაო პროცესი, რომელიც სახალხო დამცველის მიერ პანსიონატში ბავშვთა უფლებების მდგომარეობის მონიტორინგს უზრუნველყოფდა. უფრო მეტიც, ამ დრომდე ხელისუფლების წარმომადგენლების მხრიდან არ კეთდება განცხადება დიდი პანსიონატების დეინსტიტუციონალიზებისა და აუცილებელი რეფორმის შესახებ, რაც ამ დაწესებულებებში მცხოვრები ბავშვებისთვის ღირსეული და სათანადო საცხოვრებელი გარემოს და უფლებების დაცვის აუცილებელი წინაპირობაა“. სრულად... წყარო: www.equalitycoalition.ge

თბილისი. სოციალური სამართლიანობის ცენტრის (ყოფილი EMC) ინფორმაციით, 19 მაისს საქართველოს პარლამენტის წევრთა ჯგუფის მიერ დაინიცირდა კანონპროექტი, რომელიც მიზნად ისახავს სისხლის სამართლის საპროცესო კანონმდებლობის მტკიცებულებათა უტყუარობის კონსტიტუციურ სტანდარტთან შესაბამისობაში მოყვანას. „სოციალური სამართლიანობის ცენტრის (ყოფილი EMC) შეფასებით, კანონპროექტით შემოთავაზებული მოწესრიგება ფრაგმენტულია და სრულად უგულებელყოფს საკონსტიტუციო სასამართლოს გადაწყვეტილების სამოტივაციო ნაწილში განვითარებულ მსჯელობას ჩხრეკის შედეგად მტკიცებულებათა მოპოვების სისტემის დახვეწის საჭიროებასთან დაკავშირებით“. სრულად... წყარო: socialjustice.org.ge