თბილისი. ადამიანის უფლებათა ცენტრმა გამოაქვეყნა ანალიტიკური დოკუმენტი: „ადმინისტრაციული შეცდომა ქართული სამართალშემოქმედების ჩრდილქვეშ“. ორგანიზაციის ინფორმაციით, 2021 წლის 29 აპრილს საქართველოს პარლამენტმა მესამე მოსმენით მიიღო საქართველოს ადმინისტრაციულ სამართალდარღვევათა კოდექსში ცვლილებების შეტანის შესახებ ორი კანონპროექტი. კანონპროექტით გათვალისწინებული ცვლილებები წვრილმანი ხულიგნობისა და პოლიციის მოთხოვნისადმი დაუმორჩილებლობისთვის აქამდე არსებული სანქციების გამკაცრებასა და ადმინისტრაციული პატიმრობისთვის გათვალისწინებული ვადების გაზრდას გულისხმობს. „დოკუმენტის მიზანია, მკითხველს მიაწოდოს ინფორმაცია მიღებული ცვლილებების შესახებ და შეაფასოს ამ ცვლილებათა საჭიროება და მიზანშეწონილობა საქართველოს ადამინისტრაციულ სამართალდარღვევათა კოდექსის ზოგადი შეფასებით, საკონსტიტუციო სასამართლოს კონკრეტული გადაწყვეტილების ანალიზითა და ადამიანის უფლებებით შებოჭილი კანონშემოქმედების პროცესის მიმოხილვით. დოკუმენტი, ასევე, მიმოიხილავს მიღებული ცვლილებების შესაძლო მსუსხავ ეფექტს ადამიანის ფუნდამენტური უფლებების რეალიზების პროცესში და მის შესაძლო ნეგატიურ გავლენას ქვეყანაში ადამიანის უფლებათა დაცვის ზოგადი სტანდარტის დაცვაზე“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი „რიონის ხეობის მცველების” მიერ ძალადობრივი აქციის მხარდაჭერას მიუღებლად მიიჩნევს. „ჩვენთვის რიონის ხეობის გადარჩენის მოძრაობა ბოლო წლებში ჩვენი მოქალაქეების დემოკრატიული თვითორგანიზების უნიკალური მცდელობა იყო, რომელიც დამოუკიდებლობის შემდეგ ქვეყნის უთანასწორო და არაადამინური ეკონომიკური და პოლიტიკური განვითარების ლოგიკას და წესრიგს სწორ სახელდებას აძლევდა. თუმცა, მოძრაობის ლიდერების ბოლო დღეების გადაწყვეტილებები, სამწუხაროდ, არ გვიტოვებს შესაძლებლობას, უსამართლო, გაუმჭვირვალე და არადემოკრატიული ენერგოპოლიტიკის წინააღმდეგ ბრძოლაში კვლავ რიონის ხეობის გადარჩენის მოძრაობის მოკავშირეებად დავრჩეთ“. სრულად... წყარო: socialjustice.org

თბილისი. საქართველოს ახალგაზრდა იურისტთა ასოციაცია (საია) 2021 წლის 5 ივლისს დაზარალებული 11 ჟურნალისტის საქმეში ჩაერთო. მედიის წარმომადგენლებზე განხორციელებული ძალადობის და ჟურნალისტური საქმიანობის ხელშეშლის ფაქტებზე გამოძიება უკვე დაწყებულია. ამ ეტაპზე დაზარალებულის სტატუსი 2 ჟურნალისტს მიენიჭა. ორგანიზაცია გააგრძელებს დაზარალებული ჟურნალისტების საქმეებზე მუშაობას და პერიოდულად მიაწვდის საზოგადოებას განახლებულ ინფორმაციას გამოძიების მიმდინარეობის შესახებ.  სრულად... წყარო: gyla.ge

თბილისი. „კოალიცია თანასწორობისთვის“ წევრი ორგანიზაციები ხელისუფლებას ჰომოფობიური ჯგუფების მხრიდან ძალადობის დაუყოვნებლივი აღკვეთისა და სათანადო გამოძიებისაკენ მოუწოდებენ. „სამწუხაროდ, დღეს კიდევ ერთხელ გავხდით აღმასრულებელი ხელისუფლების მხრიდან ძალადობის მიზანმიმართული წახალისების მოწმე. ხელისუფლებამ კვლავ არ უზრუნველყო “ღირსების მარშის“ შეკრების თავისუფლება და არ მიიღო უსაფრთოების ეფექტიანი და დროული ზომები, რითიც წაახალისა ძალადობრივი ჯგუფები, ემოქმედათ კონსტიტუციისა და კანონის მიღმა. მიმდინარე პროცესებზე სრული პასუხისმგებლობა ქვეყნის ხელისუფლებას ეკისრება“. სრულად... წყარო: www.equalitycoalition.ge

თბილისი. 2 ივლისს, კოალიციამ „დამოუკიდებელი და გამჭვირვალე მართლმსაჯულებისთვის“ გამართა მართლმსაჯულების ფორუმი თემაზე: „სასამართლო სისტემის გამოწვევები და რეფორმის პერსპექტივები“. „ფორუმის მსვლელობისას გაანალიზდა სასამართლო რეფორმის ძირითადი მიმართულებები, როგორიცაა: პირველ და სააპელაციო ინსტანციის სასამართლოებში მოსამართლეთა დანიშვნა; უზენაესი სასამართლოს მოსამართლეთა დანიშვნა; იუსტიციის უმაღლესი საბჭოს წევრთა არჩევისა და გადაწყვეტილების მიღების წესი; სასამართლო რეფორმის მე-3 და მე-4 ტალღების ეფექტურობის შეფასება და შემდგომი რეფორმის კონცეფციის შემუშავების საჭიროება“. სრულად... წყარო: socialjustice.org.ge

თბილისი. სოციალური სამართლიანობის ცენტრის (ყოფილი EMC) მიერ მომზადებულ ვიდეოში ორგანიზაციის იურისტი, მარიამ გობრონიძე მიმოიხილავს საქართველოში მართლმსაჯულების სისტემაზე თანაბარი მისაწვდომობის საკითხს, სისტემაში არსებულ ბარიერებს და ა.შ. წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის ინფორმაციით, თბილისის საქალაქო სასამართლომ სააპელაციო სასამართლოს მითითების მიუხედავად „რივიერას საქმეზე” ნებართვის მოქმედება კვლავ არ შეაჩერა. „თბილისის საქალაქო სასამართლოს მიერ მეორედ მიღებულ უკანონო განჩინებას საია სააპელაციო სასამართლოში კვლავ გაასაჩივრებს, თუმცა პირველი ინსტანციის მსგავსი ქმედებები აჭიანურებს სამართალწარმოებას, ზიანს აყენებს ქალაქ ბათუმის ინტერესებს და ხელს უწყობს უკანონოდ გაცემული ნებართვის საფუძველზე მშენებლობის განხორციელებას“, ნათქვამია საიას ვებგვერდზე. სრულად... წყარო: gyla.ge

თბილისი. ომბუდსმენის ინფორმაციით, საქართველოს პარლამენტი გეგმავს დაიწყოს უზენაესი სასამართლოს მოსამართლეობის იმ კანდიდატების განხილვის პროცედურა, რომელიც მას იუსტიციის უმაღლესმა საბჭომ 2021 წლის 17 ივნისს წარუდგინა. „სასამართლო სისტემაში არსებული მოუგვარებელი უმწვავესი ინსტიტუციური პრობლემების გათვალისწინებით, სახალხო დამცველი უარს ამბობს უზენაესი სასამართლოს მოსამართლეობის კანდიდატების მოსმენაში ჩართვაზე მანამ, სანამ არ იქნება უზრუნველყოფილი იუსტიციის უმაღლესი საბჭოს ფუნდამენტური რეფორმა და არ დასრულდება მოსამართლეების გავლენიანი ჯგუფის სასამართლო სისტემის ერთპიროვნული მართვა“, ნათქვამია ომბუდსმენის განცხადებაში.  სრულად... წყარო: ombudsman.ge

თბილისი. საქართველოს ეს-ო-ეს ბავშვთა სოფელი (SOS Children’s Village Georgia) ოფიციალური განცხადებით ეხმაურება მასმედიის საშუალებით გაჟღერებულ ინფორმაციას ორგანიზაციის მცირე საოჯახო სახლის მომსახურებაში წარსულში მომხდარ ორ სავარუდო ძალადობის ფაქტს. „ორგანიზაცია დიდ წუხილს გამოთქვამს იმის გამო, რომ ჩვენი ყოფილი ორი ბენეფიციარისთვის ტრავმული აღმოჩნდა მცირე საოჯახო სახლში ცხოვრება და ჩვენთვის, ძალიან მძიმე იყო მათი ისტორიების მოსმენა. ასოციაცია გამოხატავს მაქსიმალურ მზაობასა და ღიაობას, კანონის ფარგლებში ხელი შეუწყოს ნებისმიერი სახის გამოძიების პროცესს; მეტიც, ორგანიზაციის დადგენილი პრაქტიკით უზრუნველყოს, როგორც ძალადობის სავარაუდო მსხვერპლი, ისე ყოფილი აღსაზრდელების ფსიქო-ემოციური და სამართლებრივი მხარდაჭერა. ყველა გამოვლენილი ფაქტი, მიუხედავად შემთხვევის ხანდაზმულობისა, ყოველთვის ქმნის იმის წინაპირობას, რომ გადაისინჯოს ორგანიზაციაში არსებული მონიტორინგის მოქმედი სისტემები, რათა უზრუნველყოფილ იქნას თითოეული აღსაზრდელის უსაფრთხო და დაცულ გარემოში აღზრდა-განვითარება“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, ორგანიზაციამ ადამიანის უფლებათა ევროპულ სასამართლოში სამართალდამცავების მხრიდან ნარკოტიკების ჩადებასთან დაკავშირებით მეოთხე საქმე მოიგო. „საქმეში „შუბითიძე საქართველოს წინააღმდეგ“ მომჩივანი კაკო შუბითიძე ამტკიცებდა, რომ მას 2011 წელს ნარკოტიკული საშუალება (მარიხუანა) პოლიციელებმა ჩაუდეს შუბითიძის საქმეზე მიღებული გადაწყვეტილებით, მსგავსად, კალანდიას, მეგრელიშვილისა და ტლაშაძე კაკაშვილის საქმეებისა ცხადია, რომ არსებული მართლმსაჯულების სისტემა არ შეიცავს საკმარის პროცედურულ გარანტიებს, რომლებიც პირებს სამართალდამცავების მხრიდან შესაძლო თვითნებობისგან დაიცავდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებათა დაცვის საერთაშორისო ორგანიზაციამ - „თანასწორობა ახლა-მ/Equality Now“, რომელიც მუშაობს მთელს მსოფლიოში ქალების და გოგოების უფლებრივი მდგომარეობის გაუმჯობესებისთვის, საქართველოს ახალგაზრდა იურისტთა ასოციაციის წარმოებაში არსებულ საქმეზე საქართველოს უზენაეს სასამართლოში სასამართლო მეგობრის მოსაზრება წარადგინა. საქმე შეეხება სექსუალური შევიწროების მსხვერპლის უფლებას, საჯაროდ ისაუბროს საკუთარ გამოცდილებაზე. ორგანიზაციის ინფორმაციით, მიმდინარე დავის ფარგლებში, თბილისის საქალაქო და სააპელაციო სასამართლოებმა ადამიანის უფლებების დაცვის თვალსაზრისით სახიფათო სტანდარტი დაადგინეს და მსხვერპლის აღნიშნული უფლება შეზღუდეს. სრულად... წყარო: gyla.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის მიიჩნევს, რომ უზენაესი სასამართლოს მოსამართლეთა კანდიდატების შერჩევა თვითნებურად და უსამართლოდ მიმდინარეობს. „მრავალი წელია, იუსტიციის უმაღლესი საბჭო, ისევე როგორც საერთო სასამართლოების თვითმმართველობის ორგანო, ამგვარი საზოგადოებრივი განწყობებისა და კრიტიკის პირობებში ახორციელებს საქმიანობას. შედეგად, მათ მიერ მიღებული გადაწყვეტილებები მუდმივად წარმოშობს კითხვის ნიშნებს სამართლიანობის, მიუკერძოებლობისა და გავლენებისგან თავისუფლების კუთხით. ამ ფონზე, გასაკვირი არ არის, რომ რეფორმის რამდენიმე ტალღისა და მუდმივი საკანონმდებლო/ინსტიტუციური ცვლილებების მიუხედავად, სასამართლომ ვერ მოახერხა, საზოგადოების მხრიდან აღქმული ყოფილიყო რეალურად დამოუკიდებელ და სამართლიან ინსტიტუციად. უზენაესი სასამართლოს მოსამართლეთა შერჩევის პროცესიც ამგვარ მოცემულობაში წარიმართა. პროცესზე დაკვირვებამ კიდევ ერთხელ აჩვენა, რომ იუსტიციის უმაღლეს საბჭოსა და მთლიანად მართლმსაჯულების სისტემაში ფუნდამენტური ცვლილებებისა და გაჯანსაღების გარეშე, სასამართლოში მიმდინარე ყველა მნიშვნელოვანი პროცესი (განსაკუთრებით კი მოსამართლეთა დანიშვნები) უნდობლობის, კორპორატივიზმისა და კლანური ძალაუფლების განმტკიცების წრეზე სიარულია“, ნათქვამია განცხადებაში.  სრულად... წყარო: www.coalition.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 23 ივნისი მამხილებელთა დაცვის საერთაშორისო დღეა. „მხილების ინსტიტუტს უდიდესი როლი აქვს კორუფციასთან, განსაკუთრებით კი მაღალი დონის კორუფციასთან ბრძოლაში. სამწუხაროდ, საქართველოში მხილების მექანიზმის შესახებ ცნობიერების დონე ძალიან დაბალია და მისი გამოყენება ფაქტობრივად არ ხდება. ვრცლად მხილების მექანიზმთან დაკავშირებულ #IDFI-ს მიერ იდენტიფიცირებულ გამოწვევებსა და რეკომენდაციებს გაეცანით აქ..." წყარო: idfi.ge

აჭარა. საქართველოს ახალგაზრდა იურისტთა ასოციაციის ინფორმაციით, ქუთაისის სააპელაციო სასამართლომ „ბათუმის ბულვარის“ ყოფილი დირექტორის, ირაკლი ჯინჭარაძის შრომით დავაზე მნიშვნელოვანი განჩინება მიიღო. მიღებული განჩინებით, დაკმაყოფილდა ირაკლი ჯინჭარაძის სახელით საია-ს მიერ წარდგენილი საჩივარი და საქმეზე საბოლოო გადაწყვეტილების მიღებამდე აიკრძალა სსიპ „ბათუმის ბულვარის“ თანამდებობაზე დასანიშნი კანდიდატურის შესარჩევად გამარტივებული საჯარო კონკურსის ჩატარება და სსიპ "ბათუმი ბულვარის" ვაკანტურ თანამდებობაზე კანდიდატის დანიშვნა. სრულად... წყარო: gyla.ge

თბილისი. საზოგადოებრივი ორგანიზაციები მოუწოდებს საქართველოს ხელისუფლებას, გააძლიეროს მისი პოლიტიკური და დიპლომატიური ძალისხმევა ცხინვალში დაპატიმრებული ზაზა გახელაძის გასათავისუფლებლად და შეიმუშავოს ოკუპირებულ ტერიტორიებზე ადამიანის უფლებათა დაცვის უფრო ეფექტიანი პოლიტიკა. „სამწუხაროდ, კონფლიქტის რეგიონებში ადამიანის უფლებათა პოლიტიკა ჩვენს ქვეყანაში სათანადოდ ინსტიტუციონალიზებული და გაწერილი არ არის. მათ შორის, კონფლიქტების მრავალწლიანი გამოცდილების მიუხედავად, ამ დრომდე არ გვაქვს კონფლიქტის რეგიონებში მოქმედი საერთაშორისო მექანიზმები, რომელიც ადამიანის უფლებების მდგომარეობის მონიტორინგის, რეაგირებისა და პრევენციის ქმედითი ინსტრუმენტები იქნება. ადამიანის უფლებების დაცვის პოლიტიკაში სათანადოდ არ არის დანახული დე-ფაქტო მთავრობებთან კომუნიკაციისა და მოლაპარაკების რესურსი, რაც ადამიანის უფლებების, უსაფრთხოებისა და ჰუმანიტარული დაცვის საკითხებზე რეგულარული დიალოგისა და მუშაობის ფორმატი იქნებოდა“, ნათქვამია ერთობლივ განცხადებაში. სრულად... წყარო: gyla.ge

თბილისი. ადამიანის უფლებათა ცენტრმა გამართა ანგარიშის პრეზენტაცია - „კორონავირუსის პანდემია - უფასო იურიდიული დახმარება და ადამიანის უფლებების მონიტორინგი“, რომელიც მომზადდა პროექტის „უფასო იურიდიული ადვოკატირება და ადამიანის უფლებების მონიტორინგი კორონავირუსის პანდემიის შემდეგ“ ფარგლებში. ადამიანის უფლებათა ცენტრი პროექტს ახორციელებდა თბილისსა და საქართველოს ხუთ რეგიონში (შიდა ქართლი, კახეთი, ქვემო ქართლი, იმერეთი და სამეგრელო) საქართველოში ნიდერლანდების საელჩოს მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. კოალიცია დამოუკიდებელი და გამჭვირვალე მართლმსაჯულებისთვის აქვეყნებს განცხადებას: სასამართლო რეფორმის ახალი პერსპექტივა. „ახლა, როცა სასამართლო რეფორმის შედეგების მიმართ იმედგაცრუება ნათელია, ეს რეფორმის სტრატეგიის რადიკალური ცვლილების საჭიროებაზეც მიუთითებს. გადასადგმელი ნაბიჯები მიმართული უნდა იყოს სასამართლოს სისტემის მართვის კონსენსუსზე ორიენტირებული რეფორმისკენ და მყარ დაბრკოლებებს უნდა უქმნიდეს ძალაუფლების კონცენტრირებას“. სრულად... წყარო: gyla.ge

თბილისი. ადამიანის უფლებათა ევროპულმა სასამართლომ საქართველოს ახალგაზრდა იურისტთა ასოციაციის და EHRAC-ის მიერ 2019 წლის 20-21 ივნისს დაზარალებული ჟურნალისტებისა და დემონსტრანტების სახელით შეტანილი საჩივრების არსებითი განხილვა დაიწყო. „კერძოდ, სასამართლომ საქართველოს მთავრობას, როგორც მოპასუხე სახელმწიფოს, საქმეებზე - ბაღაშვილი და სხვები საქართველოს წინააღმდეგ და ქურდოვანიძე და სხვები საქართველოს წინააღმდეგ, შესაბამისი კითხვებით მიმართა.  გარდა უფლებების დარღვევის შესახებ შეკითხვებისა, ევროპულმა სასამართლომ დააკმაყოფილა საიას ადვოკატების მოთხოვნა და დაავალა საქართველოს მთავრობას, წარმოადგინოს 2019 წლის 20-21 ივნისს აქციის დაშლასთან დაკავშირებით პროკურატურის მიერ წარმოებული სისხლის სამართლის საქმის მასალები“, ნათქვამია საია-ს ვებგვერდზე.  სრულად... წყარო: gyla.ge

თბილისი. საზოგადოებრივი ორგანიზაციების ნაწილი ავრცელებს განცხადებას: იუსტიციის უმაღლესი საბჭო აგრძელებს მართლმსაჯულებისთვის დამაზიანებელი ნაბიჯების გადადგმას. „17 ივნისს იუსტიციის უმაღლესი საბჭოს სხდომა მიმდინარეობს, სადაც მოსამართლის 100-მდე ვაკანსიის შესახებ მიიღება გადაწყვეტილება, მათ შორის დღესვე, პარლამენტს უზენაესი სასამართლოს მოსამართლეობის 9 კანდიდატი წარედგინება. სასამართლოს სიღრმისეული რეფორმების განხორციელების გარეშე, ამგვარი მნიშვნელობის საკადრო გადაწყვეტილებების დაჩქარებულ ტემპში მიღება, უკიდურესად აზიანებს მართლმსაჯულების ინტერესებს. ვფიქრობთ, რომ საბჭოს ქმედებებმა მომავალში შესაძლებელია ლეგიტიმურობის საკითხი წარმოშვას ამ პირობებში დანიშნული მოსამართლეების მიმართ“, ნათქვამია განცხადებაში. სრულად... წყარო: transparency.ge

თბილისი. 16 ივნისს ინფორმაციის თავისუფლების განვითარების ინსტიტუტმა (IDFI) საქართველოს პარლამენტის იურიდიულ საკითხთა კომიტეტთან ერთად სამუშაო შეხვედრა გამართა. „სამუშაო შეხვედრის მონაწილეებმა განიხილეს საქართველოს საკონსტიტუციო სასამართლოს 2019 წლის 7 ივნისის გადაწყვეტილების აღსრულების მიზნით გასატარებელი საკანონმდებლო ღონისძიებები. შეხვედრის ფარგლებში ჩამოყალიბდა საკონსტიტუციო სასამართლო გადაწყვეტილების იმპლემენტაციის საბაზისო მოდელი, რომლის მიხედვითაც საქართველოს პარლამენტმა შესაბამისი საკანონმდებლო ცვლილებების პაკეტი უნდა შეიმუშაოს“. სრულად... წყარო: idfi.ge

თბილისი. სოციალური სამართლიანობის ცენტრის ინფორმაციით, საქართველოს უზენაესმა სასამართლომ ბიბლუსის საჩივარი ცილისწამებასთან დაკავშირებით არ დააკმაყოფილა და უცვლელი დატოვა ქვემდგომი ინსტანციის სასამართლოს გადაწყვეტილებები. სასამართლომ დაასკვნა, რომ თანამშრომლების მხრიდან გავრცელებული ინფორმაციის ერთი ნაწილი სწორ ფაქტებს წარმოადგენდა, ხოლო მეორე ნაწილი - მათ პირად აზრს, რაც გამოხატვის თავისუფლების უფლებითაა დაცული.  სოციალური სამართლიანობის ცენტრი ბიბლუსში დასაქმებულ მშრომელთა დამცველად 2017 წლიდანვე ჩაერთო. როგორც საზოგადოებისთვის ცნობილია, 2017 წელს „ბიბლუსი გალერიში“ დასაქმებულების ნაწილმა შრომით ექსპლუატაციაზე, დაბალ ანაზღაურებაზე, არანორმირებულ სამუშაო გრაფიკზე და დაჯარიმების უსამართლო, გაუმართლებელ სისტემაზე ისაუბრა. ამ განცხადებების შემდეგ, კომპანიამ 2 თანამშრომელი გაათავისუფლა. სოციალური სამართლიანობის ცენტრის სამართლებრივი დახმარებით, სასამართლომ თანამშრომლების გათავისუფლება უკანონოდ მიიჩნია, თუმცა დავა კვლავაც მიმდინარეობს ზემდგომ ინსტანციებში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) სამართლებრივი დახმარების შედეგად, სიღარიბის გამო ბავშვების ოჯახისგან დაშორება სასამართლომ უკანონოდ ცნო.  „თბილისის საქალაქო სასამართლომ უპრეცედენტო გადაწყვეტილება მიიღო. სიღარიბის გამო მინდობით აღზრდაში ბავშვების გადაყვანა და ოჯახთან დაცილება უკანონოდ ცნო და დაზარალებულ სამ ბავშვს მორალური ზიანის ანაზღაურების მიზნით 35 000 ლარი მიაკუთვნა. ბავშვები, 2 წლის წინ, სოციალურმა სამსახურმა უკანონოდ, ოჯახის გაძლიერების გარეშე, გამოიყვანა სახლიდან და დედას დააცილა. ბავშვებმა ორი წელი მშობლისგან მოშორებით გამოწვეული სტრესის ქვეშ იცხოვრეს. ეს გარემოება სასამართლომ მიიჩნია უკანონოდ და დააკმაყოფილა PHR-ის სარჩელი“. სრულად... წყარო: ორგანიზაციის გვერდი სოციალურ ქსელში