თბილისი. გაეცანით ტოლერანტობისა და მრავალფეროვნების ცენტრის (TDI) ანგარიშს: უცხოელთა უფლებრივი მდგომარეობა საქართველოში პანდემიის პირობებში და მის მიღმა. ანგარიში მიმოიხილავს 2020 წლისა და 2021 წლის ივნისამდე პერიოდს და ეხმაურება შემდეგ საკითხებს: უცხოელთა უფლებები და გამოწვევები კოვიდ 19-ის პანდემიის პირობებში; საქართველოში ბინადრობის ნებართვის მიღების საკითხები, კანონმდებლობა და პრაქტიკა; სახელმწიფო პოლიტიკა საქართველოში თავშესაფრის მაძიებლების მიმართ; რასობრივი დისკრიმინაციის დანაშაულის გამოძიების სუს-ის დაქვემდებარების პრობლემა; ბინადრობის ნებართვაზე უარის სტატისტუკრი მონაცემები; რასობირვი შეუწყნარებლობით ჩადენილი დანაშაულების გამოძიების სტატისტიკა; ანგარიში ქართულად... ანგარიში მომზადდა TDI-ს პროექტის ფარგლებში, რომელიც მხარდაჭერილია USAID-PROLoG - Promoting Rule of Law in Georgia Activity-ს მიერ. წყარო: ორგანიზაციის გვერდი სოციალურ ქსელში

თბილისი. თუ ხართ უცხოელი და გჭირდებათ სამართლებრივი დახმარება გაძევებისა და არგაძევების პროცედურებში, ჩამოტვირთეთ ბროშურა და გაეცანით თქვენთვის ხელმისაწვდომ სამართლებრივ სერვისებს... წყარო: ორგანიზაციის გვერდი სოციალურ ქსელში

თბილისი. ომბუდსმენის მიიჩნევს, რომ „საგანგაშოა ბოლო პერიოდში ჟურნალისტური საქმიანობის ხელშეშლისა, ჟურნალისტების ფიზიკური და სიტყვიერი შეურაცხყოფის შემთხვევების ზრდა, რამაც 5 ივლისის ძალადობრივი მოვლენების შემდგომ, ფაქტობრივად ყოველდღიური ხასიათი მიიღო“. სახალხო დამცველი მოუწოდებს სამართალდამცავ ორგანოებს და პოლიტიკური თანამდებობის პირებს დროულად მოახდინონ რეაგირება 5-6 ივლისს და შემდგომ პერიოდში გამოვლენილ დანაშაულებრივ ქმედებებზე და არ დაუშვან ჟურნალისტებზე ძალადობა... სრულად... წყარო: ombudsman.ge

თბილისი. 9 ივლისს ომბუდსმენმა დამსაქმებლის მხრიდან დასაქმებულთა სავარაუდო ვიქტიმიზაციის ფაქტთან დაკავშირებით სასამართლოს მეგობრის მოსაზრებით (Amicus Curiae) მიმართა თბილისის საქალაქო სასამართლოს. „თელასში“ დასაქმებული მოსარჩელე, კომპანიის სხვა თანამშრომლებისგან განსხვავებით, დანამატით ვერ სარგებლობს, რადგან „თელასის“ შიდა რეგულაციით განსაზღვრულია, რომ თანამშრომელს კომპანიის წინააღმდეგ შრომის დავების წარმოების შემთხვევაში დანამატი არ ერიცხება. „მოსაზრებაში სახალხო დამცველმა ხაზი გაუსვა, რომ, მნიშვნელოვანია, სასამართლომ შეაფასოს, წარმოადგენს თუ არა სს „თელასის“ მიერ დაწესებული შეზღუდვა, შრომითი უფლების დაცვის სამართლებრივი საშუალების გამოყენების შემზღუდავ გარემოებას, რამდენადაც, დასაქმებულს უწევს არჩევანი გააკეთოს ორ უფლებას შორის - ისარგებლოს შრომითი უფლებების სასამართლოს გზით დაცვის უფლებით თუ მიიღოს დანამატი“. სრულად... წყარო: ombudsman.ge

სამეგრელო. „საერთაშორისო გამჭვირვალობა-საქართველოს“ დახმარებით, ვიდიკო მიქაიამ ზუგდიდის სოფელ ერგეტაში 2 502 კვ.მ სასოფლო-სამეურნეო მიწის ნაკვეთი დაირეგისტრირა. 2020 წელს ორგანიზაციის ინფორმაციით, უფასო იურიდიული დახმარების ფარგლებში TI Georgia-მ 29 საქმე მოიგო. „თუ გჭირდებათ სამართლებრივი დახმარება, მოგვწერეთ ონლაინ ან ტელეფონის/ელექტრონული ფოსტის მეშვეობით მიმართეთ ჩვენს იურისტებს: ელ-ფოსტა: alac@transparency.ge“.                                                                 წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციას (საია) დახმარების თხოვნით მომართა მოქალაქემ, რომელიც სისხლის დონორთა ერთიან ელექტრონულ ბაზაში აივ ინფიცირებულად იყო რეგისტრირებული. მოქალაქეს ამის გამო სისხლის დონორად ყოფნის უფლება შეეზღუდა. განმცხადებელმა წარმოადგინა 2015, 2016, 2017 და 2020 წლებში ჩატარებული კვლევის შედეგები, რომლის მიხედვითაც მას აივ ინფიცირების ფაქტი არ დაუდასტურდა. ამის მიუხედავად, ცენტრმა განმცხადებელს აივ ინფიცირებულთა ბაზიდან ამოღებაზე უარი განუცხადა.  „განმცხადებელმა საიას დახმარებით მიმართა სახელმწიფო ინსპექტორის აპარატს. ინსპექტორის განმარტებით, მოცემულ შემთხვევაში პირის უფლება, იყოს დონორი, არის სამედიცინო კატეგორიის საკითხი და იგი უნდა გადაწყდეს შესაბამისი სპეციალისტების მიერ, თუმცა ამ კონკრეტულ შემთხვევაში განმცხადებლისთვის შექმნილი ხელოვნური ბარიერი არღვევდა ამ პირის კონსტიტუციით გარანტირებულ უფლებებს. საია მიესალმება სახელმწიფო ინსპექტორის ამ გადაწყვეტილებას და დააკვირდება გადაწყვეტილების აღსრულების პროცესს“.  სრულად... წყარო: gyla.ge

თბილისი. დღეს „სოციალური სამართლიანობის ცენტრმა“ (ყოფილი EMC) ქუთაისის საქალაქო სასამართლოს ადმინისტრაციული სარჩელით მიმართა, რომლითაც ასაჩივრებს შინაგან საქმეთა სამინისტროს მიერ სოფელ ნამოხვანის მიმართულებით გადაადგილების უკანონოდ და დაუსაბუთებლად შეზღუდვას. ორგანიზაცია მოითხოვს ნამოხვანისკენ მიმავალ გზებზე ჩაყენებული პოლიციის ადგილიდან გაყვანას და მოქალაქეთა თავისუფალი გადაადგილების დაუყოვნებლივ უზრუნველყოფას. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) ეროვნული არქივიდან საჯარო ინფორმაციის გაცემის წესსა და ინფორმაციის მიღებაზე დაწესებულ საფასურებს საკონსტიტუციო სასამართლოში ასაჩივრებს. „ეროვნულ ფონდს მიკუთვნებული საჯარო ინფორმაციის გამოთხოვისას დოკუმენტის ასლის საფასური ზოგიერთ შემთხვევაში 100-ჯერ უფრო ძვირია ვიდრე სხვა ადმინისტრაციული ორგანოდან საჯარო ინფორმაციის გამოთხოვის შემთხვევაში გადასახდელი საფასური. საია მიიჩნევს, რომ არაგონივრულად მაღალი მოსაკრებელი წარმოადგენს საჯარო ინფორმაციის ხელმისაწვდომობაზე დაწესებულ გაუმართლებელ ბარიერს და ზოგიერთ შემთხვევაში შეუძლებელს ხდის საჯარო დაწესებულებაში დაცული ინფორმაციის მიღების კონსტიტუციური უფლებით სარგებლობას“. სრულად... წყარო: gyla.ge

თბილისი. სოციალური სამართლიანობის ცენტრი ეხმიანება მარნეულის მუნიციპალიტეტის სოფელ ზემო სარალში ყოფილი ქმრის მიერ ცოლისა და სიმამრის მკვლელობის ფაქტს და შინაგან საქმეთა სამინისტროს მოუწოდებს, გამოძიების მიმდინარეობასთან ერთად მიიღოს სათანადო ზომები გარდაცვლილებისა და ბრალდებულის ნათესავებს შორის შესაძლო კონფლიქტის პრევენციის მიზნით.  „ბრალდებულის დაკავების მიუხედავად პოლიციამ ვერ შეძლო შემდგომი კონფლიქტის პრევენცია და როგორც მედიაში გავრცელებული ინფორმაციით ირკვევა, მკვლელობის შემდგომ, გარდაცვლილების ორი ნათესავი ბრალდებულის მამას ფიზიკურად გაუსწორდა და დააზიანეს ოჯახის კუთვნილი ავტომობილი“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია (საია) 2021 წლის 5-6 ივლისს განვითარებული ძალადობრივი მოვლენების შედეგად დაზარალებული პირების უფლებების დაცვას განაგრძობს. ამ დროისთვის 20 პირიდან, რომელთა ინტერესებსაც საია იცავს, 15 პირია დაზარალებულად ცნობილი. „აღსანიშნავია, რომ საგამოძიებო ორგანოს ამ დრომდე არ მოუხდენია ძალადობრივ ქმედებებში ჩართული ყველა პირის იდენტიფიცირება, ასევე, სისხლისსამართლებრივი დევნა არ არის დაწყებული ორგანიზატორთან მიმართებით“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „უფლებები საქართველო“ 5 ივლისს დაზარალებულ ტელეკომპანია „მთავარი არხის“ ოპერატორებს იცავს. „ვაჟა ჩხაიძე და დავით ახალაძე 5 ივლისს თავიანთ პროფესიულ საქმიანობას ასრულებდნენ, როდესაც მათ თავს დაესხნენ რადიკალური ჯგუფის წევრები და ფიზიკური და სიტყვიერი შეურაცხყოფა მიაყენეს. პროკურატურის დადგენილებით, 5 ივლისს, რადიკალური ჯგუფების მიერ ორგანიზებული ძალადობრივი აქტის შედეგად, ვაჟა ჩხაიძეს და დათა ახალაძეს მიადგა ფიზიკური და მორალური ზიანი“.  სრულად... წყარო: ორგანიზაციის გვერდი სოციალურ ქსელში

თბილისი. 21 ივლისს, 15:00 საათზე, „უფლებები საქართველო“ იწვევს ადვოკატებს ონლაინ სამუშაო შეხვედრაზე, რომელზეც წარმოდგენილი იქნება ორგანიზაციის მიერ საქართველოში გამოხატვის თავისუფლების დაცვის მიმართულებით შემუშავებული საკანონმდებლო წინადადებები. საკანონმდებლო წინადადებების გაცნობა ადვოკატებისათვის...                                      წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის განცხადებით, უზენაეს სასამართლოში მოსამართლეები კლანისა და ხელისუფლების გარიგების შედეგად დაინიშნენ. „მიუხედავად კანდიდატების კომპეტენციასთან და კეთილსინდისიერებასთან დაკავშირებული კითხვებისა, იურიდიულ საკითხთა კომიტეტმა კონკურსის მონაწილეთა ნაწილს რეკომენდაცია გაუწია. თავის მხრივ პლენარულმა სესიამ სრულად გაიზიარა რეკომენდაციები და თანამდებობაზე 6 მოსამართლე დანიშნა. აუცილებლად უნდა აღინიშნოს, ისიც რომ თანამდებობაზე გამწესდნენ მოსამართლეთა გავლენიანი ჯგუფის - კლანისადმი ლოიალური პირები და მათი ლიდერები. გადაწყვეტილება არ დაეფუძნა პარტიათა შორის ფართო კონსენსუსს, რაც მომავალში უარყოფითად აისახება სასამართლოს მიმართ ნდობაზე“, ნათქვამია განცხადებაში. სრულად... წყარო: gyla.ge

თბილისი. USAID/PROLoG-ის მხარდაჭერით განხორციელდა კვლევა სამართლის ახალი დარგობრივი მახასიათებლის დანერგვის შესახებ საგანამანათლებლო პროგრამების აკრედიტაციის პროცესში.  „კვლევის შედეგად გამოვლინდა გამოწვევები სხვადასხვა კუთხით, მათ შორის დარგობრივი მახასიათებლის პრაქტიკაში გამოყენების ერთგვაროვანი პრაქტიკისა და საგანმანათლებლო პროგრამების აკრედიტაციის საბჭოს დაკომპლექტების მიმართულებით“. კვლევა...                                                                            წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, სანამ სამინისტრო, პირველ ბრიფინგზე მიგვანიშნებდა ლაშქარავას ზედოზირებით გარდაცვალების შესახებ, ინფორმაცია დაახლოებით ერთი საათით ადრე, „მარშალპრესის“ Facebook გვერდზე გავრცელდა. „მასალაში წყაროდ მოხმობილია ვინმე პოლიტიკოსი იოსებ ხიმშიაშვილი. მალევე სიახლე ონლაინგამოცემამ ორგანიზებულად გაავრცელა ღია ჯგუფებში. გამზიარებლებს შორის იყოს „მარშალპრესის” დამფუძნებელი ოთარ სტეფანიშვილი“.                                                                           წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) კიდევ ერთხელ გამოხატავს მწუხარებას ტელეკომოანია „პირველის“ ოპერატორის ალექსანდრე ლაშქარავას გარდაცვალების გამო. „5 ივლისს მომხდარი ძალადობის თითოეულ შემთხვევაზე პოლიტიკური პასუხისმგებლობა ეკისრება მოქმედ პრემიერ-მინისტრს და მოქმედ შინაგან საქმეთა მინისტრს. საპარლამენტო რესპუბლიკაში, მხოლოდ ეს ფაქტი სრულად საკმარისი უნდა იყოს აღნიშნული პირების თანამდებობის გადასაყენებლად. IDFI მიიჩნევს, რომ სახეზეა ყველა კონსტიტუციური წინაპირობა საქართველოს პრემიერ მინისტრისა და საქართველოს შინაგან საქმეთა მინისტრისთვის პოლიტიკური პასუხისმგებლობის დასაკისრებლად. ამავე დროს, ამ პირთა თანამდებობიდან გადაყენება აუცილებელია ალექსანდრე ლაშქარავას გარდაცვალებისა და 5-6 ივლისს მომხდარი ძალადობის ფაქტებზე მიმდინარე გამოძიების ლეგიტიმაციის უზრუნველსაყოფად“, ნათქვამია განცხადებაში. სრულად... წყარო: idfi.ge

თბილისი. „უფლებები საქართველო“ აქვეყნებს საერთაშორისო სამართლის ექსპერტის, ორგანიზაციის გამგეობის წევრის ნანა მჭედლიძის ბლოგპოსტს: სიძულვილის ენა და მისგან მომდინარე საფრთხეები. ბლოგპოსტში განხილულია „სიძულვილის ენა, მისი გამოხატვის ფორმები, ვის წინააღმდეგ არის მიმართული სიძულვილის ენა და მასთან ბრძოლის საუკეთესო გამოცდილება ადამიანის უფლებათა ევროპული სტანდარტების მიხედვით, აგრეთვე ის საფრთხე, რაც შეიძლება გამოიწვიოს სიძულვილის ენაზე რეაგირების არქონამ“. სრულად... წყარო: rights.ge

თბილისი. საქართველოს სახალხო დამცველი 5-6 ივლისის მოვლენების ორგანიზატორთა ქმედებების გამოძიების პროცესს განცხადებით ეხმაურება. „12 ივლისის მდგომარეობით შინაგან საქმეთა სამინისტროს და საქართველოს გენერალურ პროკურატურას არც ერთი პირი არ მიუცია სისხლის სამართლის პასუხისგებაში 5 და 6 ივლისს თბილისში განვითარებული ძალადობრივი, სიძულვილით მოტივირებული დანაშაულების ორგანიზებისთვის. ... მოვუწოდებთ შინაგან საქმეთა სამინისტროსა და პროკურატურას, უმოკლეს ვადებში, პრიორიტეტულად, გამოავლინონ სავარაუდო ძალადობრივი ჯგუფების მოქმედებებზე მთავარი პასუხისმგებელი პირები და დაიწყონ მათ მიმართ სისხლისსამართლებრივი დევნა“. ომბუდსმენი მოუწოდებს შინაგან საქმეთა სამინისტროს ჩაატაროს ეფექტიანი გამოძიება ტელეკომპანია „ტვ პირველის“ ოპერატორის ალექსანდრე ლაშქარავას გარდაცვალების ფაქტზე. სრულად... წყარო: ombudsman.ge

თბილისი. მედიის საკითხებზე მომუშავე არასამთავრობო ორგანიზაციები მწუხარებას გამოქვავენ ლექსო ლაშქარავას გარდაცვალების გამო და უსამძიმრებენ მის ოჯახს, ტვ პირველის გუნდს და საქართველოს ჟურნალისტთა კორპუსს. „მოვუწოდებთ საქართველოს პარლამენტს, დაუყოვნებლივ დაიწყოს აღმასრულებელი ხელისუფლების მიმართ საქართველოს კონსტიტუციით გათვალისწინებული პოლიტიკური და სამართლებრივი პასუხისმგებლობის მექანიზმების გამოყენება“, ნათქვამია განცხადებაში. სრულად...  წყარო: უფლებები საქართველო

ამერიკის შეერთებული შტატების საელჩო თბილისში ღრმა მწუხარებით უსამძიმრებს ლექსო ლაშქარავას ოჯახს, უპირველეს ყოვლისა ლექსოს დედას, მის კოლეგებს ტვ პირველში და ყველას, ვინც შეძრულია და დამწუხრებულია მისი გარდაცვალებით." ლექსო, როგორც მედია პროფესიონალი, მრავალი წელი კამერის უკან მუშაობდა და შეიძლება ზოგს ის ვერც კი ეცნო, სანამ მას სასტიკად არ გაუსწორდნენ ის პირები, რომლებმაც ადამიანის სიცოცხლისადმი პატივისცემის სრული უგულვებელყოფა აჩვენეს. ლექსოს მიერ კოლეგის დაცვისას გამოვლენილი სიმამაცე და მისი ერთგულება ფუნდამენტური თავისუფლებების მიმართ, რასაც ოდითგანვე აფასებდნენ ამ ქვეყანაში, წარმოადგენს ქართველი ხალხის საუკეთესო თვისებებსა და ტრადიციებს. ლექსოს თავდასხმასთან დაკავშირებით რამდენიმე პირის დაკავება პირველი დადებითი ნაბიჯია სამართლის აღსრულებისკენ. თითოეული ქართველი ჟურნალისტის უსაფრთხოება და დემოკრატიისადმი რწმენა საქართველოში მოითხოვს, რომ ყველა, ვინც თავს დაესხა მშვიდობიან მოქალაქეებსა და ჟურნალისტებს 5 და 6 ივლისს, ან ვინც წააქეზა ძალადობა, უნდა გამოვლინდეს, იქნას დაპატიმრებული და უნდა წარსდგეს სასამართლოს წინაშე კანონის სრული სიმკაცრით. ჩვენ მოვუწოდებთ სიმშვიდისკენ და იმ ძალადობის დასრულებისკენ, რომელმაც უკვე გამოიწვია ერთი ადამიანის ტრაგიკული სიკვდილი", ნათქვამია განცხადებაში. სრულად... წყარო: აშშ–ს საელჩო საქართველოში

ევროკავშირის ელჩის კარლ ჰარცელის კომენტარი ბ-ნ ლექსო ლაშქარავას გარდაცვალებასთან დაკავშირებით: "დღეს გულისტკივილით შევიტყვე ტელეკომპანია პირველის ოპერატორის ლექსო ლაშქარავას ტრაგიკული გარდაცვალების შესახებ. ვიზიარებ მისი ოჯახის, მეგობრებისა და კოლეგების ღრმა მწუხარებას.  ბ-ნი ლექსო ლაშქარავა სასტიკად იყო ნაცემი, რადგან ის აშუქებდა ძალადობას, რომელიც თბილისში 5 ივლისს, პრაიდის მოვლენების გარშემო ხდებოდა.  მიუხედავად იმისა, რომ ჯერ კიდევ ველოდებით მისი გარდაცვალების მიზეზების გამოძიების შედეგებს, ნება მომეცით კიდევ ერთხელ გავიმეორო, რომ ევროკავშირი მკაცრად გმობს ძალადობას და მტკიცედ და ურყევად მხარს უჭერს მედიისა და შეკრების თავისუფლებას", ნათქვამია ევროკავშირის გვერდზე სოციალურ ქსელში. სრულად...  წყარო: ევროკავშირის გვერდი სოციალურ ქსელში

თბილისი. საზოგადოებრივი ორგანიზაციების ნაწილი მწუხარებას და გულისტკივილს გამოხატავს ტელეკომპანია „პირველის“ ოპერატორ ლექსო ლაშქარავას გარდაცვალების გამო და უსამძიმრებენ მის ოჯახსა და ახლობლებს. „5 ივლისის მასშტაბურ ძალადობაზე, რასაც შედეგად ათობით ჟურნალისტის და მშვიდობიანი მოქალაქის ჯანმრთელობის დაზიანება მოჰყვა ხოლო, ტვ პირველის ოპერატორი, ჯანმრთელობის უმძიმესი დაზიანებების შემდგომ გარდაიცვალა, პასუხი უნდა აგოს ძალადობის ყველა ორგანიზატორმა, მონაწილემ და ძალადობისკენ მომწოდებელმა, განურჩევლად საერო თუ სასულიერო სტატუსისა. ხელმომწერი ორგანიზაციები მოვითხოვთ, სულ მცირე: საქართველოს პრემიერ მინისტრმა ირაკლი ღარიბაშვილმა და საქართველოს შსს მინისტრმა ვახტანგ გომელაურმა დაუყოვნებლივ დატოვონ დაკავებული თანამდებობა; ძალადობის ყველა ორგანიზატორი, მონაწილე და წამქეზებელი, მიუხედავად მათი სტატუსისა, დაისაჯოს კანონის სრული სიმკაცრით“, ნათქვამია ერთობლივ განცხადებაში. სრულად... წყარო: transparency.ge