თბილისი. საქართველოს ახალგაზრდა იურისტთა ასოციაცია (საია)თბილისის სააპელაციო სასამართლოში გუდაურში, სათხილამურო ტრასაზე გარდაცვლილი 12 წლის სალომე ტატიშვილის საქმეზე პირველი სხდომა იმართება. „2016 წლის 10 იანვარს 12 წლის სალომე, დებთან, სპორტ-სკოლის მწვრთნელთან და სხვა მოსწავლეებთან ერთად სრიალებდა, რა დროსაც ზურგიდან შეეჯახა გიორგი ლიპარტელიანი. შეჯახების შედეგად სალომე ადგილზე გარდაიცვალა. როგორც საზოგადოებისათვის ცნობილია, თბილისის საქალაქო სასამართლომ 2017 წლის 29 დეკემბერს მიღებული განაჩენით ბრალდებული გაამართლა. გაუგებარია, რა საფუძვლით ვარაუდობს მოსამართლე, რომ სწორედ სალომეს სრიალმა შეუწყო ხელი შედეგის დადგომას, თანაც იმგვარად, რომ ბრალდებულისთვის შედეგის თავიდან არიდება შეუძლებელი გამხდარიყო. გასათვალისწინებელია, რომ თხილამურებით სრიალი მოთხილამურისგან სწორედ ისეთი სიჩქარის და სტილის შერჩევას მოითხოვს, რომელიც უსაფრთხო იქნება წინ მიმავალი მოთხილამურეებისთვის. ასევე მოწმეთა ჩვენებებით ცალსახად დასტურდება, რომ შემთხვევის დღეს იყო კარგი ხილვადობა, ტრასაზე დიდი მანძილიდანაც ადვილად იყო შესაძლებელი მოთხილამურეების ტრაექტორიის გარჩევა, შემთხვევის ადგილას ტრასა იყო სკამადო განიერი", ნათქვამია ორგანიზაციის განცხადებაში. სრულად... წყარო: gyla.ge

სამეგრელო. 18 მარტს, ასოციაცია „ათანათის” ახალგაზრდული ცენტრის ორგანიზებით, ზუგდიდის რაიონულ სასამართლოში ჩატარდა სისხლის სამართლის იმიტირებული პროცესი. განსახილველი ქეისის მთავარი თემა იყო ქალის უფლებების დარღვევა და მკვლელობა გაუფრთხილებლობით. „სასამართლო წარიმართა ნაფიცმსაჯულთა მონაწილეობით, რომლებმაც პროცესის ბოლოს გამოიტანეს შესაბამი ვერდიქტი. პროცესს ასევე ესწრებოდნენ „საია"-ს წარმომადგენლები, რომლებმაც პროცესის ბოლოს გამოავლინეს რჩეული მონაწილეები და დააჯილდოვეს”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. თბილისის საქალაქო სასამართლომ მიიღო გადაწყვეტილება, რომლითაც დადგინდა ასაკის ნიშნით დისკრიმინაცია და მოსარჩელე სამსახურში აღდგა. მის ინტერესებს სასამართლოში საქართველოს ახალგაზრდა იურისტთა ასოციაცია იცავს. „მოსარჩელე მუშაობდა კერძო კომპანიაში, საიდანაც რამდენიმე თვის წინ გათავისუფლდა. გათავისუფლების ბრძანებაში ოფიციალურ მიზეზად დამსაქმებელი მიუთითებდა შემდეგ ფაქტებზე: სამუშაო ადგილის თვითნებურად დატოვება; დიდი დროით მოსასვენებელ ოთახში ყოფნა და ცალკეულ შემთხვევებში - ჯანმრთელობის პრობლემები. პროცესზე კომპანიის წარმომადგენლებმა დამატებით განმარტა, რომ დასაქმებული სამსახურეობრივ მოვალეობას არაჯეროვანად და არაკეთილსინდისიერად ასრულებდა. საია-ს ადვოკატი სასამართლოში ასაბუთებდა, რომ დამსაქმებელმა აღნიშნული არგუმენტებით ასაკის ნიშნით დისკრიმინაცია შენიღბა და რეალურად სახეზე არ იყო შრომითი ურთიერთობის შეწყვეტის სამართლებრივი საფუძველი. თბილისის საქალაქო სასმართლომ გაიზიარა აღნიშნული არგუმენტი, დაადგინა დასაქმებულის დისკრიმინაციული საფუძვლით გათავისუფლების ფაქტი და დამსაქმებელს მოსარჩელის სამსახურში აღდგენა და იძულებითი განაცდურის ანაზღაურება დაავალა. სასამართლო გადაწყვეტილება ამ დროისათვის კანონიერ ძალაში არ არის შესული და შესაძლებელია მისი გასაჩივრება სააპელაციო სასამართლოში", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „თემირლან მაჩალიკაშვილის სიცოცხლის ხელყოფის საქმეზე მიმდინარე გამოძიების პროცესში შესაბამისი ექსპერტიზა ხარვეზებით ჩატარდა", - აცხადებს ადამიანის უფლებების სწავლებისა და მონიტორინგის ცენტრი (EMC). ცენტრი ამ დროისთვის ჩატარებული, მათ შორის, 2018 ლის 13 მარტს დასრულებული სასასამართლო-სამედიცინო ექსპერტიზის შედეგების მიმოხილვას წარმოადგენს. ორგანიზაციაში მიიჩნევენ, რომ სპეცოპერაციის დროს სახელმწიფო უსაფრთხოების სამსახურის (სუს) თანამშრომლების მიერ შესაძლო სამსახურებრივი უფლებამოსილების გადამეტების ფაქტზე თბილისის პროკურატურის საგამოძიებო ნაწილში დაწყებული გამოძიების ფარგლებში დანიშნული ექსპერტიზის (მათ შორის, კომპლექსური-გენეტიკური, ტრასოლოგიური, ბალისტიკური და სასამართლო-სამედიცინო ექსპერტიზების) შედეგებმა გამოძიებისა და მტკიცებულებების ამოღების, დოკუმენტირებისა და შენახვის პროცესში არაერთი ხარვეზი გამოაშკარავა, რაც გამოძიების ეფექტიანობასა და დამოუკიდებლობის მიმართ ნდობას ასუსტებს. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია (საია) ადმინისტრაციულ სამართალდარღვევათა კოდექსის არაკონსტიტუციური გამოყენების შესაცვლელად საკონსტიტუციო სასამართლოში სტრატეგიულ სამართალწარმოებას ახორციელებს. ამ დროისთვის, საიას საკონსტიტუციო სასამართლოში წარდგენილი აქვს ხუთი სარჩელი. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია მიიჩნევს, რომ „ქურდული სამყაროს" წინააღმდეგ კანონპროექტის განხილვის დახურვა გამჭირვალობის პრინციპებს არღვევს. „კანონშემოქმედებითი პროცესი უნდა იყოს გამჭვირვალე და ინკლუზიური", - აცხადებენ საია-ში, - „მნიშვნელოვანია, საზოგადოებას ჰქონდეს ინფორმაცია იმ მოტივაციისა და არგუმენტების შესახებ, რომელზე დაყრდნობითაც საკანონმდებლო ორგანო იღებს გადაწყვეტილებას. ისევე, როგორც ყველა დაინტერესებულ პირს უნდა გააჩნდეს შესაძლებლობა უშუალოდ გახდეს კანონშემოქმედებითი პროცესის მონაწილე და ასეთი შესაძლებლობის არსებობისას დააფიქსიროს საკუთარი აზრი". სრულად  წყარო: ორგანიზაციის ვებვგერდი

თბილისი. 2017 წლის 25 ოქტომბერს PHR-მა სახალხო დამცველს სახელმწიფოს მხრიდან, არასრულწლოვნის მიმართ, ასაკის ნიშნით, დისკრიმინაციის დადგენის მიზნით მიმართა, ორგანიზაციამ მიუთითა, რომ არსებული რეგულაცია, რომელიც არასრულწლოვანს სასამართლოსთვის მიმართვის უფლებას უზღუდავს დისკრიმინაციულია და წინააღმდეგობაში მოდის საერთაშორისო და შიდასამართლებრივ ნორმებთან. „ორგანიზაციას „პარტნიორობა ადამიანის უფლებებისთვის" სამართლებრივი დახმარების მიღების მიზნით 17 წლის ოჯახში ძალადობის მსხვერპლმა არასრულწლოვანმა მიმართა, რომელიც ირიცხებოდა ოჯახში ძალადობის მსხვერპლთა თავშესაფარში. ვინაიდან არასრულწლოვნის დაცვის მიზნით გამოცემულ შემაკავებელ ორდერს ჰქონდა ერთთვიანი ვადა, ბავშვი საჭიროებდა დაუყოვნებლივ იურისტის დახმარებას, სასამართლოსთვის დამცავი ორდერის გამოცემაზე მიმართვის მიზნით. ბავშვსა და ორგანიზაციის იურისტებს შორის მინდობილობის გაფორმებისთვის აუცილებელი იყო არასრულწლოვნის კანონიერი წარმომადგენლის თანხმობა. ორგანიზაციის იურისტებმა ბავშვის მოთხოვნით დაუყოვნებლივ მიმართეს სსიპ „სოციალური მომსახურების სააგენტოს" და სსიპ „ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების ფონდს" , რათა მათ მიეცათ ორგანიზაციისთვის თანხმობა ბავშვისთვის იურიდიული დახმარების გაწევის თაობაზე. სახელმწიფო უწყებების მხრიდან ამ მიმართვაზე დროული რეაგირება არ განხორციელებულა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. „საქართველოს დემოკრატიულმა ინიციატივამ" (GDI) „ბირჟა მაფიის" საქმესთან დაკავშირებით, საქართველოს მთავარი პროკურატურის წინააღმდეგ, თბილისის საქალაქო სასამართლოს სარჩელით მიმართა. ორგანიზაცია გიორგი ქებურიასთვის სახელმწიფოს მიერ უკანონო ქმედებებით მიყენებული მატერიალური და მორალური ზიანის ანაზღაურებას ითხოვს. გიორგი ქებურია 2017 წლის 7 ივნისს ნარკოტიკული დანაშაულის ბრალდებით დააკავეს. „ბირჟა მაფიის" წევრების დაკავება საეჭვოდ დაემთხვა მათი ახალი მუსიკალური კლიპის გასაჯაროებას, სადაც ავტორები პოლიციას აშარჟებდნენ. სრულად  წყარო: ორგანიზაციის ვებგვერდი

თბილისი. პაციენტმა, რომლის ინტერესებსაც სასამართლოში საია იცავს, სამედიცინო დაწესებულებას სასამართლო დავა მოუგო. დღეს მიღებული გადაწყვეტილებით, თბილისის საქალაქო სასამართლომ სამედიცინო დაწესებულებას პაციენტის სასარგებლოდ 5000 ლარის ოდენობით მორალური ზიანის ანაზღაურება დააკისრა. მოსარჩელე დაობდა, რომ სამედიცინო დაწესებულებამ, კატარაქტის ოპერაციის მსვლელობისას, მასთან და მისი ოჯახის წევრებთან შეუთანხმებლად შეცვალა დაგეგმილი ოპერაციის მეთოდი და გამოიყენა ისეთი ტიპის ლინზა, რომელიც მასთან წინასწარ არ ყოფილა შეთანხმებული. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება თემირლან მაჩალიკაშვილის სიცოცხლის ხელყოფის ფაქტზე მიმდინარე გამოძიების პროცესს და პროკურატურას მოუწოდებს საქმის მასალებთან გარდაცვლილი თემირლან მაჩალიკაშვილის ოჯახის წევრებისა და ადვოკატების სრული დაშვება უზრუნველყოს. „პროკურატურამ, საქმეზე მაღალი საზოგადოებრივი ინტერესის გათვალისწინებით, დაუშვა ოჯახის წევრებისა და მათი ადვოკატების წვდომა მიმდინარე გამოძიების საქმის მასალების ნაწილზე. პროკურატურის ეს ნაბიჯი პოზიტიურად უნდა შეფადეს, თუმცა, ამ დრომდე საქმეზე მომუშავე ადვოკატებს არ გააჩნიათ წვდომა სუს-ის მიერ სისხლის სამართლის კოდექსის 331 1 (ტერორიზმის დაფინანსება, ტერორისტული საქმიანობის სხვაგვარი მატერიალური მხარდაჭერა ან რესურსებით უზრუნველყოფა) მუხლის ქვეშ მიმდინარე გამოძიების საქმის ცალკეულ მასალებზე, და ასევე პროკურატურის მიერ სუს-ის საქმიანობასთან დაკავშირებით მოპოვებულ მტკიცებულებებზე, რომელსაც არსებითი მნიშნელობა აქვს სპეცოპერაციის დაგეგმვისა და ჩატარების დროს სამსახურეობრივი უფლებამოსილების გადამეტების საკითხების შეფასებისთვის", - ნათქვამია EMC-ის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. ადმინისტრაციულ სამართალდარღვევათა კოდექსის არაკონსტიტუციური გამოყენების შესაცვლელა,დ საქართველოს ახალგაზრდა იურისტთა ასოციაციამ საკონსტიტუციო სასამართლოში კიდევ ერთი სარჩელი წარადგინა. საია, კონსტანტინე ჩაჩანიძის სახელით, საკონსტიტუციო სასამართლოში ასაჩივრებს ადმინისტრაციულ სამართალდარღვევათა კოდექსის 166-ე მუხლს (წვრილმანი ხულიგნობა) და „სიტყვისა და გამოხატვის თავისუფლების შესახებ" საქართველოს კანონში ,,უხამსობის" განმარტებასთან დაკავშირებული მუხლების ნორმატიულ შინაარსს. სრულად  წყარო: ორგანიზაციის ვებგვერდი

თბილისი. ქუთაისის სააპელაციო სასამართლოს გადაწყვეტილებით, ზესტაფონის საგანმანათლებლო რესურსცენტრს დაევალა 2017 წელს გამოცხადებულ მთავარი სპეციალისტის შესარჩევ კონკურსში მონაწილე ნონა ბაბუაძის ამ თანამდებობაზე დანიშვნა. " ნონა ბაბუაძემ კონკურსის ყველა ეტაპი წარმატებით გაიარა, მათ შორის გასაუბრების ეტაპზეც საკონკურსო კომისიის წევრთა უმრავლესობამ მხარი მას დაუჭირა, თუმცა რესურსცენტრის უფროსმა, ერთპიროვნული გადაწყვეტილებით, მთავარ სპეციალისტად სხვა პირი დანიშნა. ქუთაისის სააპელაციო სასამართლოს გადაწყვეტილებით, ზესტაფონის საგანმანათლებლო რესურსცენტრს, ასევე, დაევალა ნონა ბაბუაძისთვის თანამდებობრივი სარგოს ანაზღაურება, რაც დაახლოებით 8000 ლარს შეადგენს", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი აქვეყნებს დოკუმენტს, რომელშიც საერთო სასამართლოების რეფორმის ე.წ. „მესამე ტალღას" აფასებს. დოკუმენტი ეხება საერთო სასამართლოებში საქმის განაწილებას, იუსტიციის უმაღლესი საბჭოს მიერ მიღებულ გადაწყვეტილებას, მასში შესულ ცვლილებებსა და საქმეთა გადანაწილების წესის პილოტურ რეჟიმში მუშაობას. მიმოხილვა ასევე აფასებს 2017 წლის 31 დეკემბრიდან, მთელი ქვეყნის მასშტაბით, სასამართლოებში საქმის განაწილების ახალი სისტემის ფუნქციონირებას. სრულად  წყარო: ორგანიზაციის ვებგვერდი

თბილისი. საქართველოს დემოკრატიული ინიციატივამ (GDI) საქართველოს შსს-ს მაღალჩინოსნის მხრიდან სისტემატიური ძალადობის მსხვერპლი ქალის სახელით ადამიანის უფლებათა ევროპულ სასამართლოს საჩივრით მიმართა. მიმართვა GDI-ის პარტნიორ ორგანიზაცია „ადამიანის უფლებათა დაცვის ევროპულ ცენტრთან" (EHRAC) თანამშრომლობით მომზადდა და თ.ტ.-ს მიმართ შსს-ს მაღალჩინოსნის მხრიდან სისტემატიური ძალადობას ეხება. „საქართველოს დემოკრატიული ინიციატივა" თ.ტ.-ს ინტერესებს იცავს პროექტის „სამართალწარმოება თანასწორობისთვის" ფარგლებში, რომელიც ხორციელდება East-West Management Institute, PROLoG, USAID-ის ფინანსური მხარდაჭერით და მიზნად ისახავს საქართველოში მცხოვრები რელიგიური და ეთნიკური უმცირესობების სამართლებრივი სტატუსის გაუმჯობესებას. სრულად წყარო: ორგანიზაციის ვებგვერდი

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: „საკონსტიტუციო სასამართლომ მოსამართლის დისციპლინურ სამართალწარმოებასთან დაკავშირებული ინფორმაცია არ გასცა". „31 ივლისს, IDFI-მ საკონსტიტუციო სასამართლოს საჯარო ინფორმაციის გაცემის მოთხოვნით მიმართა. კერძოდ, IDFI-მ საკონსტიტუციო სასამართლოს მოსამართლე მერაბ ტურავას მიმართ 2015 წლის 6 სექტემბერს დაწყებული დისციპლინური სამართალწარმოების საქმეზე მიღებული საკონსტიტუციო სასამართლოს ეთიკისა და დისციპლინურ საქმეთა კომისიის დასკვნის ასლის გადაცემა მოითხოვა. 2017 წლის 25 სექტემბერს, ჩვენმა ორგანიზაციამ, ასევე მიმართა საკონსტიტუციო სასამართლოს და მოითხოვა ინფორმაცია, არსებობდა თუ არა მოსამართლეების მიმართ მიმდინარე დისციპლინური საქმეები, რომლებზეც ჯერ საბოლოო შედეგი არ დამდგარა", ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია, იუსტიციის საბჭოს წევრის, ანა დოლიძის სახელით, თბილისის საქალაქო სასამართლოში ასაჩივრებს საბჭოს იმ გადაწყვეტილებებს, რომლითაც იგი ააცილეს კონკრეტული მოსამართლეების გასაუბრებისა და კენჭისყრის პროცესს. აღნიშნული გადაწყვეტილებები საბჭომ 2018 წლის თებერვალში, მოსამართლეთა უვადოდ გამწესების განხილვის პროცესში მიიღო. წარდგენილი სარჩელით ანა დოლიძე, როგორც მოსარჩელე, მოითხოვს იუსტიციის უმაღლესი საბჭოს მიერ მიღებული გადაწყვეტილებების ბათილად ცნობას, რომლითაც შეიზღუდა მისთვის კონსტიტუციის მინიჭებული უფლებით სარგებლობა. სრულად  წყარო: ორგანიზაციის ვებგვერდი

თბილისი. 1 მარტს, განხილულ პროცესზე თბილისის საქალაქო სასამართლომ არ დააკმაყოფილა მოძალადის მიერ გასაჩივრებული შემაკავებელი ორდერი და ძალაში დატოვა. ძალადობაგამოვლილი ქალის ინტერესებს სასამართლოში ორგანიზაციის „პარტნიორობა ადამიანის უფლებებისთვის” იურისტი იცავდა. „ძალადობაგამოვლილი ქალის დაცვის მიზნით გამოცემული შემაკავებელი ორდერი ითვალისწინებდა მოძალადის მსხვერპლთან მიახლოების აკრძალვას მის საცხოვრებელ ადგილას, სამსახურთან და სხვა იმ ადგილებთან, სადაც მსხვერპლი იმყოფება. სამართალდამცავი ორგანოს მხრიდან შემაკავებელი ორდერის გამოცემას საფუძვლად დაედო მოძალადის მხრიდან მსხვერპლის მიმართ გამოვლენილი ფსიქოლოგიური ძალადობის ფაქტი", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. შინაგან საქმეთა სამინისტროს ავტორობით მომზადებულ და საქართველოს მთავრობის მიერ ინიცირებულ საკანონმდებლო პაკეტთან დაკავშირებით, საია-მ პარლამენტს წერილობითი მოსაზრებები წარუდგინა. საია მიიჩნევს, რომ სანქციების გამკაცრება იმ ვითარებაში, როდესაც ადმინისტარციულ სამართალდარღვევათა კანონმდებლობით დადგენილი საქმის განხილვის პროცედურული ნაწილი შესაბამისობაში არ არის მოყვანილი საქართველოს კონსტიტუციასა და საერთაშორისო ხელშეკრულებებით ნაკისრ ვალდებულებებთან, არის გაუმართლებელი და ზრდის ადამიანის უფლებებში არამართლზომიერი ჩარევის რისკს. ამასთან, საია-ს აზრით, სანქციის გამკაცრება იქონიებს მსუსხავ ეფექტს მშვიდობიანი შეკრებისა და გამოხატვის თავისუფლების რეალიზებაზე, მით უფრო იმ პირობებში, როდესაც აღნიშნული მუხლების ნორმატიული შინაარსი არაკონსტიტუციურია. სრულად  წყარო: ორგანიზაციის ვებგვერდი

თბილისი. EMC-ს განცხადების საფუძველზე, ზვიად რატიანის საქმესთან დაკავშირებით, პერსონალურ მონაცემთა დაცვის ინსპექტორმა შინაგან საქმეთა სამინისტრო სამართალდამრღვევად სცნო. 2018 წლის 11 იანვარს, EMC-იმ განცხადებით მიმართა ინსპექტორს და მოითხოვა ზვიად რატიანის საქმესთან დაკავშირებით შემდეგი გარემოებების კანონიერების შესწავლა: პოლიციელების მიერ ზვიად რატიანთან კომუნიკაციის პირადი მობილური ტელეფონით გადაღება; ზვიად რატიანის შესახებ მობილურით გაკეთებული ჩანაწერის საზოგადოებრივი მაუწყებლისთვის გადაცემა; 2018 წლის 23 თებერვლის გადაწყვეტილებით, ინსპექტორმა ორივე საკითხთან დაკავშირებით შსს სამართალდამრღვევად ცნო და 2000 ლარით დააჯარიმა. სრულად  წყარო: ორგანიზაციის ვებგვერდი

თბილისი. კოალიცია დამოუკიდებელი და გამჭვირვალე მართლმსაჯულებისთვის უარყოფითად აფასებს შინაგან საქმეთა სამინისტროს ავტორობით მომზადებულ საკანონმდებლო პაკეტს, რომლითაც ადმინისტრაციულ სამართალდარღვევათა კოდექსში ცვლილებები იგეგმება. „ინიცირებული პროექტის თანახმად, საგრძნობლად იზრდება ჯარიმების ოდენობა წვრილმანი ხულიგნობის შემთხვევაში - 100 ლარიდან 500-დან 1000 ლარამდე, ხოლო პოლიციის კანონიერი მოთხოვნისადმი დაუმორჩილებლობის ან მის მიმართ სხვა კანონსაწინააღმდეგო ქმედებისათვის - 250-2000 ლარიდან - 1000-დან 4000 ლარამდე. კანონპროექტის განმარტებითი ბარათის თანახმად, ცვლილებების მიზანს მოსახლეობაში კანონმორჩილების ხარისხის გაზრდა წარმოადგენს. მნიშვნელოვანია იმის გათვალისწინება, რომ საზოგადოებრივი წესრიგის და კანონმორჩილების მიღწევა მხოლოდ კანონმდებლობის გამკაცრების და რეპრესიის გაძლიერების გზით თავშივე არასწორ მიდგომაა და ხანგრძლივ პერსპექტივაშიც არაეფექტურია. კანონდარღვევების პრევენციისთვის მნიშვნელოვანია არა სასჯელის გამკაცრება, არამედ კანონის ერთგვაროვანი და სამართლიანი აღსრულება ყველა შეთხვევაში", - ვკითხულობთ კოალიციის მიერ გავრცელებულ განცხადებაში. სრულად  წყარო: www.gdi.ge

სამეგრელო. „საერთაშორისო გამჭვირვალობა - საქართველოს" ზუგდიდის ოფისის იურისტი, გული ქარცხია იძულებით გადაადგილებულ პირთა ზუგდიდის პოლიკლინიკიდან 2018 წლის იანვარში გათავისუფლებული ექვსი ექიმის ინტერესებს იცავდა. პოლიკლინიკამ ისინი სასამართლო სხდომის გამართვამდე დააბრუნა თანამდებობებზე. „ექვსივე ექიმთან გაფორმდა უვადო ხელშეკრულება, მათ აუნაზღაურდებათ იძულებითი განაცდური და შეუნარჩუნდებათ გათავისუფლებამდე არსებული თანამდებობრივი სარგოც", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. კოალიცია "დამოუკიდებელი და გამჭვირვალე მართლმსაჯულებისთვის" სასამართლოში განვითარებულ მოვლენებს ეხმაურება და იწყებს კამპანიას „მინდა, ვენდო სასამართლოს”. „სასამართლოში ბოლო პერიოდში განვითარებულმა მოვლენებმა კიდევ ერთხელ სრული სიმწვავით აჩვენა ის სისტემური პრობლემები, რომლის წინაშეც მართლმსაჯულება დგას. ნათლად გამოჩნდა, რომ ბოლო წლებში სასამართლოში გატარებული რეფორმები ვერ აღწევს მთავარ მიზანს - მართლმსაჯულება ხორციელდებოდეს დამოუკიდებელი და მიუკერძოებელი მოსამართლეების მიერ, რომელთა კეთილსინდისიერება და კომპეტენცია ეჭვებს არ იწვევს", - ნათქვამია კოალიციის მიერ გავრცელებულ განცხადებაში, - „კოალიცია იწყებს კამპანიას „მინდა ვენდო სასამართლოს” და მოითხოვს: პოლიტიკურმა ხელისუფლებამ აიღოს თავისი წილი პასუხისმგებლობა სასამართლო სისტემაში არსებულ კრიზისზე; სასამართლო სისტემა გათავისუფლდეს კლანური მმართველობისგან; პროკურატურა დაინტერესდეს და სრულფასოვნად გამოიძიოს მართლმსაჯულების სისტემასთან დაკავშირებული ყველა შესაძლო დანაშაულის შემთხვევა; პარლამენტმა დაუყოვნებლივ გაატაროს რეალური რეფორმები, რის საფუძველზეც სასამართლოში არსებული გავლენიანი ჯგუფი ვეღარ შეძლებს კანონმდებლობა არაჯანსაღი მიზნებისთვის გამოიყენოს". სრულად  წყარო: http://www.transparency.ge