თბილისი. „ადამიანის უფლებების სწავლებისა და მონიტორინგის ცენტრმა" (EMC), ფონდ „ღია საზოგადოება - საქართველოს" ფინანსური მხარდაჭერით, თარგმნა რიჩარდ ვოგლერის კვლევა „პროკურორებისა და საგამოძიებო ორგანოების ურთიერთმიმართება ორ ანგლო-ამერიკული სამართლის ქვეყანაში: ამერიკის შეერთებული შტატები, ინგლისი და უელსი". „წინამდებარე მოკლე კვლევის მიზანია, გააანალიზოს საპროკურორო და საგამოძიებო ორგანოების ურთიერთმიმართება საერთო სამართლის ორ ქვეყანაში, იმისთვის, რომ წარმოდგენილ იქნეს შედარებით სამართლებრივი კონტექსტი საქართველოში ამ სფეროში არსებული ბოლოდროინდელი ტენდენციების გასაანალიზებლად. განსაკუთრებული ყურადღება დაეთმობა ამ ორგანოების ავტონომიის და დამოუკიდებლობის დონეს, პირველ რიგში მთავრობისგან, ხოლო შემდგომში ერთმანეთისგან. დოკუმენტში გაანალიზებულია სისხლის სამართლის პროცესის წარმართვის უფლებამოსილებების, საგამოძიებო ორგანოდან საპროკურორო ორგანოებზე გადასვლის ეტაპი და პროცედურები. ამ მიზნით, გასაანალიზებლად შეირჩა ამერიკის შეერთებული შტატების, ინგლისისა და უელსის იურისდიქციები", - ვკითხულობთ თარგმანის წინასიტყვაობაში. სრულად  წყარო: ორგანიზაციის ვებგვერდი

თბილისი. EMC-მ საკონსტიტუციო სასამართლოს წარუდგინა "სასამართლოს მეგობრის” მოსაზრება, მოქალაქის კონსტიტუციურ სარჩელში სადავოდ გამხდარი ელექტროენერგიის, დასუფთავების ან/და წყალმომარაგების მომსახურებების საფასურის გადაუხდელობის მარეგულირებელი წესის კონსტიტუციურობის თაობაზე. კონსტიტუციური სარჩელი სადავოდ ხდის წესს, რომელიც ელექტროენერგიის გამანაწილებელ კომპანიებს (სს „თელასი" და სს „ენერგო-პრო ჯორჯია") ავალდებულებს მომხმარებელს შეუწყვეტოს თავისი მომსახურება, იმ შემთხვევაში თუ პირს დასუფთავების ან/და წყალმომარაგების მომსახურებების საფასური არ გადაუხდია. EMC მიიჩნევს, რომ აღნიშნული წესი წინააღმდეგობაშია კონსტიტუციის მე-17 მუხლით განმტკიცებულ ღირსების დაცვის სტანდარტთან, რადგან სახელმწიფო ზომებს იღებს მომსახურებების მომწოდებელი კომპანიების მიერ „ვალის ამოღებისთვის” ისეთი პირველადი რესურსის შეწყვეტით, როგორიც ელექტროენერგიაა, მაშინ, როდესაც პირს ამ უკანასკნელი მომსახურების საფასური გადახდილი აქვს. ამასთან, გასაჩივრებული წესით ელექტროენერგიის გათიშვა დასუფთავების და წყალმომარაგების საფასურის გადაუხდელობის გამო, ყოველგვარი გამონაკლისისა და დამცავი მექანიზმების გარეშე ხორციელდება. სრულად  წყარო: ორგანიზაციის ვებგვერდი

თბილისი. „საქართველოს დემოკრატიულმა ინიციატივამ” ქუთაისის სააპელაციო სასამართლოს, ირაკლი ჩხვირკიას სისხლის სამართლის საქმეზე, სასამართლოს მეგობრის (Amicus Curiae) მოსაზრებით მიმართა. „ბათუმის საქალაქო სასამართლოს 2018 წლის 10 იანვრის განაჩენით, ირაკლი ჩხვირკია, 2017 წლის 11-12 მარტს ბათუმში განვითარებულ მოვლენებთან დაკავშირებით, დამნაშავედ იქნა ცნობილი ჯგუფური მოქმედების ორგანიზებაში და სასჯელის სახედ და ზომად ერთი წლითა და 6 თვით თავისუფლების აღკვეთა განესაზღვრა. 2018 წლის 06 მარტს ჩხვირკია პატიმრობიდან ვადაზე ადრე გათავისუფლდა, თუმცა, მისი საჩივრის განხილვა ქუთაისის სააპელაციო სასამართლოში დღემდე გრძელდება. GDI-ს მიაჩნია, რომ ქმედების ჯგუფური მოქმედების ორგანიზებად კვალიფიკაცია, ისე რომ, მსჯავრდებულს, ჯგუფის წევრებსა და მათ ქმედებებს შორის რაიმე სახის კავშირი არ იკვეთებოდეს გაუმართლებელია. შესაბამისად, მიგვაჩნია, რომ GDI-ს მოსაზრება დაეხმარება სასამართლოს განსახილველი საკითხის სათანადოდ შეფასებაში”, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. საქართველოს სახალხო დამცველი ეხმიანება სოციალურ ქსელებში გავრცელებულ ვიდეოჩანაწერს, რომელშიც არასრულწლოვნის მიმართ ძალადობისა და ბულინგის ფაქტი იკვეთება. ვიდეო გადაღებულია ბავშვების მიერ და მოიცავს ბავშვის მიმართ სასტიკ დამოკიდებულებას, მუქარას, შეუსაბამო სიტყვებსა და ქმედებებს. „კადრებში ნათლად ჩანს არასრულწლოვნის სახე, შესაბამისად, შესაძლებელია მისი იდენტიფიცირება, რაც არღვევს ბავშვის პირადი ცხოვრების ხელშეუხებლობის უფლებას და საფრთხეს უქმნის მის ფსიქო-ემოციურ მდგომარეობას. ჩვენს ხელთ არსებული მონაცემებით, ვიდეო ფართოდ ვრცელდება სოციალურ ქსელებში, რაც სახალხო დამცველს ყოვლად დაუშვებლად მიაჩნია", - ნათქვამია განცხადებაში. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრმა (EMC), თემირლან მაჩალიკაშვილის მშობლების სახელით, სახელმწიფო უსაფრთხოების სამსახურის წინააღმდეგ თბილისის საქალაქო სასამართლოში სარჩელი შეიტანა. სარჩელი სახელმწიფო უსაფრთხოების სამსახურის მიერ 2017 წლის 26 დეკემბერს ახმეტის რაიონში ჩატარებული სპეცოპერაციის თაობაზე 2017 წლის 26 დეკემბერსა და 2018 წლის 4 იანვარს გაკეთებულ საჯარო განცხადებებს უკავშირდება, რომელშიც სუს-ის ოფიციალური წარმომადგენლები მტკიცებით ფორმაში უთითებდნენ მოსარჩელეების შვილის, თემირლან მაჩალიკაშვილის მიერ სისხლის სამართლის კოდექსის 3311-ე მუხლით (ტერორიზმის მხარდაჭერა) გათვალისწინებული დანაშაულის განხორციელების თაობაზე, რითიც სასამართლოს კანონიერ ძალაში შესული გამამტყუნებელი განაჩენის გარეშე, ავტომატურად დამნაშავედ გამოაცხადეს თემირლან მაჩალიკაშვილი და ამდენად დაარღვიეს უდანაშაულობის პრეზუმფციის დაცვაზე სახელმწიფოს ფუნდამენტური ვალდებულება. სასარჩელო მოთხოვნაში მოსარჩელეები სახელმწიფო უსაფრთხოების სამსახურის მხრიდან თემირლან მაჩალიკაშვილის უდანაშაულობის პრეზუმფციის დარღვევის დადგენასა და მათ მიმართ მორალური ზიანის ანაზღაურებას ითხოვენ. სრულად  წყარო: ორგანიზაციის ვებგვერდი

კახეთი. 18 აპრილს, ადამიანის უფლებების სწავლებისა და მონიტორინგის ცენტრმა (EMC) უმასპინძლა სამუშაო შეხვედრას თემაზე: პანკისში ჩატარებული სპეცოპერაციის სოციალური და ემოციური გავლენები ადგილობრივ ქისტ თემზე. „შეხვედრა ადგილობრივი თემის წარმომადგენლებს, მათ შორის, უხუცესთა საბჭოს, ჯამაათის, ადგილობრივი საზოგადოებრივი ორგანიზაციებისა და ჯგუფების წარმომადგენლებს დაეთმო. მათ აღწერეს და შეაფასეს ხეობაში 2017 წლის 26 დეკემბრის სპეცოპერაციის შემდეგ შექმნილი მდგომარეობა და იმსჯელეს ხეობაში სახელმწიფო პოლიტიკის ძირითად ხარვეზებზე, რომელიც ადგილობრივი ქისტი თემის სოციალური ინკლუზიის და თანასწორი შესაძლებლობების შექმნის ნაცვლად, სახელმწიფო უსაფრთხოების პარადიგმას ეფუძნება შედეგად კი ხეობის იზოლაციას უწყობს ხელს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ (საია) ლაშა კაციას სახელით საჩივრით მიმართა თბილისის პროკურატურას, რომლითაც ითხოვს მისთვის დაზარალებულის სტატუსის მინიჭებას. „საჩივრით მიმართვა საჭირო გახდა მას შემდეგ, რაც საქმის ზედამხედველმა პროკურორმა ლაშა კაციას უარი უთხრა დაზარალებულის სტატუსის მინიჭებაზე. დაზარალებულის სტატუსის გარეშე ლაშა კაცია მოკლებულია შესაძლებლობას გაეცნოს საქმის მასალებს და იყოს საქმის კურსში მის მიმართ განხორციელებული ძალადობის ფაქტზე გამოძიების მიმდინარეობის შესახებ. ის ასევე ვერ სარგებლობს საპროცესო კანონმდებლობით დაზარალებულისთვის მინიჭებული სხვა უფლებებით და საქმეში მონაწილეობს მხოლოდ მოწმის სტატუსით", ნათქვამია განცხადებაში. ორგანიზაცია მოუწოდებს პროკურატურას დააკმაყოფილოს წარდგენილი საჩივარი და ლაშა კაცია დაზარალებულად ცნოს. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ ირაკლი ხოფერიას მიმართ განხორციელებული წამების საქმის გამოძიება უსაფუძვლოდ ჭიანურდება. 2017 წლის 16 თებერვალს, ირაკლი ხოფერია პოლიციის თანამშრომლებმა დააკავეს, აწამეს, შემდეგ კი გაირკვა რომ, ის სხვა პირში შეეშალათ. გათავისუფლების შემდეგ, მოქალაქეს მრავლობითი დაზიანებები აღენიშნებოდა: თავის ტრავმა, გულმკერდის ზედაპირული ტრავმა, სისხლნაჟღენთები... „საია-მ არაერთხელ მოუწოდა შესაბამის ორგანოებს, დროულად ჩაეტარებინათ ყველა საგამოძიებო მოქმედება და პასუხისგებაში მიეცეთ პოლიციის შესაბამისი თანამშრომლები, თუმცა, 2017 წლის თებერვლიდან დღემდე ამ საქმეზე განვითარებული მოვლენები გვაფიქრებინებს, რომ გამოძიება არაეფექტურად და მნიშვნელოვანი შეფერხებებით მიმდინარეობს". ორგანიზაცია მოუწოდებს პროკურატურას, დროულად გამოიძიოს ირაკლი ხოფერიას საქმე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციამ (საია) საქართველოს პარლამენტს წერილობითი მოსაზრებები წარუდგინა პარლამენტის წევრების, ზაზა გაბუნიას, არჩილ თალაკვაძის, მარიამ ჯაშის, ბექა ოდიშარიას და ალექსანდრე ქანთარიას მიერ ინიცირებულ საკანონმდებლო პაკეტზე. „წარმოდგენილი კანონპროექტის თანახმად, კოდექსს ემატება 1502 მუხლი, რომლითაც ხდება ქ. თბილისის მუნიციპალიტეტის იერსახის დამახინჯების 150-ე მუხლიდან ცალკე გამოყოფა და დაწესებულია უფრო მაღალი ჯარიმები, ვიდრე ეს 150-ე მუხლით დღეისათვის არის დადგენილი. 150-ე მუხლის პრაქტიკაში გამოვლენილი განმარტებები პოლიციას აძლევს შესაძლებლობას, ხელისუფლებისთვის არასასურველი შინაარსის გამოხატვის ფორმები „იერსახის დამახინჯებად", და შესაბამისად, სამართალდარღვევად დააკვალიფიციროს[2]. საია-ს მოსაზრებით, აღნიშნული მუხლი ეწინააღმდეგება საქართველოს კონსტიტუციის 24-ე (გამოხატვის თავისუფლება), 25-ე (მშვიდობიანი შეკრების უფლება) და 26-ე (გაერთიანების თავისუფლება) მუხლებს", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სახალხო დამცველი, ნინო ლომჯარია მწუხარებას გამოთქვამს 2018 წლის 13 აპრილს, თბილისში მომხდარი ქალის მკვლელობის გამო და თანაგრძნობას უცხადებს გარდაცვლილის ოჯახსა და ახლობლებს. „მიუხედავად იმისა, რომ ბოლო წლების განმავლობაში გაიზარდა ოჯახში ძალადობის გამოვლენის მაჩვენებელი და ერთი შეხედვით პრობლემამ ჩაკეტილი სოციალური წრიდან საჯარო სფეროში გადაინაცვლა, კვლავ მაღალია ძალადობის სასტიკი ფორმების და მკვლელობების რიცხვი. 2017 წელს მომხდარი ქალის მკვლელობის 26 შემთხვევიდან 14 ოჯახში ძალადობის პირობებში იყო ჩადენილი, ხოლო 15 მკვლელობის მცდელობის ფაქტიდან 12 ოჯახურ დანაშაულს უკავშირდებოდა. სახალხო დამცველი მუდმივად მიუთითებს დამცავი ღონისძიებების არაეფექტურობასა და პრევენციის ღონისძიებების გაძლიერების საჭიროებაზე", ნათქვამია განცხადებაში. სრულად... წყარო: www.ombudsman.ge

10 აპრილს საქართველოს ახალგაზრდა იურისტთა ასოციაციამ, სარჩელით მიმართა საქართველოს საკონსტიტუციო სასამართლოს. ორგანიზაციამ მოითხოვა საგადასახადო კოდექსში არსებული ჩანაწერის იმ ნორმატიული შინაარსის გაუქმება, რომელიც ზღუდავს მაღალმთიან რეგიონებში მცხოვრებ პირებზე საგადასახადო შეღავათების თანაბრად გავრცელებას. „საია იცავს მოქალაქე მელს ბდოიანის ინტერესებს, რომელიც აკმაყოფილებს „მაღალმთიანი რეგიონების განვითარების შესახებ" კანონით გათვალისწინებულ კრიტერიუმებს, თუმცა საგადასახადო შეღავათებით ვერ სარგებლობს საგადასახადო კოდექსში არსებული დისკრიმინაციული ჩანაწერის გამო. მოსარჩელე არის ნინოწმინდის მუნიციპალიტეტში მუდმივად მცხოვრები პირი, თუმცა მასზე საგადასახადო შეღავათი არ გავრცელდა, რადგან იგი ცხოვრობს ნინოწმინდის მუნიციპალიტეტის ერთ ადმინისტრაციულ ერთეულში, ხოლო მისი მიწის ნაკვეთი ამავე მუნიციპალიტეტის სხვა სოფლებში მდებარეობს. საია მიიჩნევს, რომ აღნიშნული მიდგომა ეწინააღმდეგება კონსტიტუციით გარანტირებულ თანასწორობის უფლებას. საგადასახადო შეღავათები თანაბრად უნდა ვრცელდებოდეს მაღალმთიან რეგიონებში მცხოვრებ პირებზე. შესაბამისად, საია ასაჩივრებს საგადასახადო კოდექსის 206-ე მუხლის იმ ნორმატიულ შინაარსს, რომელიც მოითხოვს, რომ საგადასახადო შეღავათებით სარგებლობისთვის პირი იმავე ადმინისტრაციულ ერთეულში ცხოვრობდეს, რომელშიც იგი მიწის ნაკვეთს ფლობს", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. რადიო „თავისუფლება" საერთაშორისო ორგანიზაციის „ფრიდომ ჰაუსის" კვლევის: „ქვეყნები გარდამავალ ეპოქაში 2018" მიმოხილვას აქვეყნებს. „ანგარიშის თანახმად, საქართველოში მდგომარეობა გაუარესებულია ორი მიმართულებით: მედიის დამოუკიდებლობა: 4 (2017) – 4,25 (2018); სასამართლო სისტემის დამოუკიდებლობა: 4,75 (2017) – 5 (2018). არაფორმალური მმართველობა - ეს არის კიდევ ერთი საკვანძო დაბრკოლება საქართველოს, როგორც დემოკრატიული ქვეყნის, ფუნქციონირებისათვის. ანგარიშის მიხედვით, ფართოდაა ცნობილი, რომ საქართველოს ყოფილი პრემიერ-მინისტრი, მილიარდერი ბიძინა ივანიშვილი, გადაწყვეტილების მიღების პროცესში არაფორმალური გავლენით სარგებლობს", ნათქვამია კვლევაში. სრულად... წყარო: www.radiotavisupleba.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის” პარლამენტს მიმართავს და საკანონმდებლო წინადადებებს წარუდგენს. ისინი დამატებით ორ მიმართულებას, იუსტიციის უმაღლესი სკოლის დამოუკიდებლობის გაძლიერებასა და სასამართლოების თავმჯდომარეთა არჩევის წესის და მათი როლის ცვლილებას, მოიცავს. კოალიციამ ასევე შესთავაზა პარლამენტს წინადადებები მოსამართლეთა დისციპლინური პასუხისმგებლობის სისტემასთან დაკავშირებითაც. სრულად... წყარო: www.transparency.ge

თბილისი. სამოქალაქო პლატფორმა „არა-ფობიას!" განცხადებას ავრცელებს შავკანიან სტუდენტებზე თავდასხმის ფაქტთან დაკავშირებით. „უკიდურესად შემაშფოთებელია 8 აპრილის საღამოს დიღმის მასივში შავკანიან სტუდენტებზე თავდასხმის ფაქტი. გავრცელებულ კადრებში ჩანს თავდამსხმელთა რასისტული მოტივები. ეს ინციდენტი ბოლო პერიოდში გამოვლენილ შეუწყნარებლობის საფუძველზე ჩადენილ სხვა ქმედებებთან ერთად, სახელმწიფოს მიერ თანმიმდევრული და სისტემური ანტიდისიკრიმინაციული პოლიტიკის გატარების აუცილებლობაზე მიუთითებს", ნათქვამია ორგანიზაციის ვებგვერდზე. სრულად... წყარო: mdfgeorgia.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) საგამოძიებო სისტემის ანლიზს აქვეყნებს. დოკუმენტში გაანალიზებულია ის საკანონმდებლო ნორმები, რომელიც ადგენს გამოძიების წესებს, გამოძიების პროცესში ჩართულ სუბიექტებს შორის ურთიერთობებს, მათი დამოუკიდებლობის ხარისხს, როგორც ერთმანეთისგან, ისე - გარეშე სუბიექტებისგან. „ამ კუთხით, განსაკუთრებით საინტერესოა პროკურორსა და გამომძიებელს შორის არსებული სუბორდინაცია – კერძოდ, რამდენად მასშტაბურია გამოძიებაზე პროკურორის საპროცესო ხელმძღვანელობა, რა ინტენსივობით შეუძლია პროკურორს, რომელიც ამავდროულად არის პროცესის მხარე, 10 საგამოძიებო მოქმედებებში ჩარევა და რა სივრცე რჩება გამომძიებელს, გამოძიება აწარმოოს ყოველმხრივ და ობიექტურად. კვლევაში ასევე ყურადღება გამახვილებულია საგამოძიებო ორგანოების ინსტიტუციურ მოწყობაზე, გამომძიებლების კვალიფიკაციასა და იმ საკითხებზე, რაც არსებით გავლენას ახდენს გამოძიების ობიექტურობასა და ეფექტიანობაზე", - ვკითხულობთ ანალიზის შესავალში. სრულად  წყარო: ორგანიზაციის ვებგვერდი

თბილისი. 4 აპრილს, „ადამიანის უფლებების სწავლებისა და მონიტორინგის ცენტრმა" (EMC) და „საქართველოს იურიდიული ფირმების ასოციაციამ" (სიფა) ერთობლივი კვლევის პრეზენტაცია გამართეს. „ღონისძიებაზე წარმოდგენილი კვლევა - „საგამოძიებო სისტემის ანალიზი", ეხებოდა საგამოძიებო უწყებების ინსტიტუციურ მოწყობას, გამოძიების პროცესში გამომძიებლის დამოუკიდებლობის ხარისხს, ინდივიდუალური გამომძიებლების კვალიფიკაციისა და მომზადების დონეს, ასევე, პროკურორის როლთან, გამოძიების ობიექტურობასა და მიუკერძოებლობასთან დაკავშირებულ საკითხებს. კვლევა, რომელიც საერთაშორისო და ადგილობრივის დახმარებით, ერთი წლის განმავლობაში მზადდებოდა, მიმოიხილავს სხვა ქვეყნების სამართლებრივ სისტემებსა და გამოცდილებას, აგრეთვე საქართველოში დამკვიდრებული პრაქტიკის კუთხით არსებულ ვითარებას. დოკუმენტში ასევე გაანალიზებულია რელევანტური ნორმატიული აქტები", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ძალადობის მსხვერპლმა მ. რ.-მ და მისმა არასრულწლოვანმა შვილმა დახმარებისათვის „საფარს" მიმართეს. „2017 წლიდან, მ. რ-ისა და მისი არასრულწლოვანი შვილის მიმართ სახელმწიფო უსაფრთხოების სამსახურის თანამშრომელი სექსუალურ, ეკონომიკურ, ფიზიკურ და ფსიქოლოგიურ ძალადობას ახორციელებდა. „საფარის" დახმარებით, მ. რ-მ პოლიციას მიმართა. იგი აცხადებდა, რომ სისტემატურად იყო უკანონო თვალთვალის, არასასურველი კომუნიკაციის მსხვერპლი, აღნიშნული ვითარება იწვევდა მის ფსიქიკურ ტანჯვას და ცხოვრების წესის შეცვლას აიძულებდა. შედეგად, დაიწყო გამოძიება სისხლის სამართლის კოდექსის 126-ე მუხლით, რაც ძალადობას მოიცავს. 21 მარტს, თბილისის საქალაქო სასამართლომ სს კოდექსის 126-ე მუხლით დამნაშავედ ცნო სუს-ის თანამშრომელი, 4 წლით თავისუფლების აღკვეთა და 5000 ლარი ჯარიმა შეუფარდა", ნათქვამია ორგანიზაციის ვებგვერდზე. სრულად... წყარო: sapari.ge

თბილისი. „კონსტიტუციის 42-ე მუხლი" ახორციელებს პროექტს „ქალი მსჯავრდებულებისთვის, რომელთაც განუცდიათ ძალადობა და დისკრიმინაცია, და მათი დაუცველი შვილებისთვის სერვისების მიწოდების გაუმჯობესება". „მისი მიზანია ქალი მსჯავრდებულების გაძლიერება, რომლებიც არიან ძალადობის და დისკრიმინაციის მსხვერპლი და ასევე მათი დაუცველი შვილების თანადგომა, მხარდაჭერის სერვისებზე ხელმისაწვდობის გაუმჯობესება. პროექტის მიმდინარეობისას სამართლებრივი დახმარება უკვე გაეწია: 90 ბენფიციარს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. არბაითერ-სამარიტერ-ბუნდი აქვეყნებს კვლევას: „კანონთან კონფლიქტში მყოფი პირების რესოციალიზაციის საკითხებზე". „წინამდებარე კვლევის მიზანია საქართველოში კანონთან კონფლიქტში მყოფი პირების, კერძოდ, პირობით მსჯავრდებულთა და ყოფილ მსჯავრდებულთა სოციალური ინტეგრაციისა და რეაბილიტაციის ხელისშემშლელი ფაქტორების გამოვლენა და რეკომენდაციების შემუშავება, რომლებიც მიმართული იქნება რესოციალიზაციისა და რეინტეგრაციის პროგრამების გაუმჯობესებისკენ. კვლევაში მიმოხილულია სახელმწიფო და არასამთავრობო ორგანიზაციების მიერ შემოთავაზებული პროგრამები და მათი ცალკეული მიმართულებანი: გათავისუფლებისთვის მზადება, ჯანდაცვა, პროფესიული განათლება, განსახლება, დასაქმება, ფსიქო-სოციალური რეაბილიტაცია, რომელთა მიზანია ყოფილი პატიმრებისა და პირობით მსჯავრდებულთა რესოციალიზაცია და რეაბილიტაცია. ნაშრომში ასევე გაანალიზებულია კანონთან კონფლიქტში მყოფი პირების რესოციალიზაციასა და რეინტეგრაციასთან დაკავშირებული კანონმდებლობა", ნათქვამია დოკუმენტში. სრულად... წყარო: ორგანიზაციის ვებგვერდი სოციალურ ქსელში

თბილისი. იუსტიციის უმაღლესი საბჭოს 26 მარტის სხდომაზე მოსამართლე წევრმა, სერგო მეთოფიშვილმა, განაცხადა, რომ აპირებს დღის წესრიგში დააყენოს საბჭოს სხდომების დახურვის საკითხი. "აღსანიშნავია, რომ საბჭოს მოსამართლე წევრის ეს ინიციატივა ეწინააღმდეგება როგორც კანონს, ისე დემოკრატიული მართვის პრინციპებს. ამგვარი ინიციატივა მხოლოდ დამაზიანებელი შეიძლება იყოს საბჭოს საქმიანობის გამჭვირვალობის, საბჭოში განსხვავებული მოსაზრებების გამოთქმის და სასამართლოს რეპუტაციისთვის. მოვუწოდებთ იუსტიციის უმაღლეს საბჭოს სათანადოდ შეაფასოს მოსამართლე სერგო მეთოფიშვილის ინიციატივის დამაზიანებელი ეფექტი სასამართლოს დამოუკიდებლობის, მის მიმართ ნდობის, სასამართლოს რეპუტაციის და დემოკრატიული მართვის პრინციპებისათვის. საჯაროდ დააფიქსიროს თავისი პატივისცემა სამართლის ძირითადი პრინციპების დაცვისადმი და არ დაუშვას მათი ხელყოფა”, ნათქვამია განცხადებაში. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია (საია) 23 მარტს, მესამე მოსმენით, კონსტიტუციაში განხორციელებულ ცვლილებებს ეხმაურება. „როგორც ცნობილია, საკონსტიტუციო ცვლილებების ინიცირების დროს პარლამენტს განსახილველად კონსტიტუციის ახალი რედაქცია წარედგინა (პრეამბულიდან- გარდამავალი დებულებების ჩათვლით). ამ პროცესის პარალელურად განხორციელდა რიგი რედაქციული, ტექნიკური და შინაარსობრივი სახის ცვლილებები. შინაარსობრივი ცვლილებების თვალსაზრისით განსაკუთრებით პრობლემურია, კონსტიტუციის მე-18 მუხლში - ინფორმაციის თავისუფლების მიმართულებით შეტანილი ცვლილება. აღსანიშნავია, რომ კონსტიტუციაში განხორციელებული ცვლილებების მთავარი მიზანი ვენეციის კომისიის რეკომენდაციების გათვალისწინება იყო, მაგრამ ეს ცვლილებები არა თუ ვენეციის კომისიისთვის წარდგენილ ვერსიაში, არამედ, ინიცირებულ ვარიანტშიც არ ყოფილა. ასევე, ცვლილებაზე საუბარი არ იყო ცვლილებების განმარტებითი ბარათის ტექსტშიც. აღნიშნული ცვლილების გახმაურება მოხდა საყოველთაო სახალხო განხილვის ბოლო შეხვედრაზე, რომელსაც მხოლოდ კონსტიტუციური ორგანოების წარმომადგენლები ესწრებოდნენ", ნათქვამია საიას ვებგვერდზე. სრულად... წყარო: gyla.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის შეშფოთებას გამოთქვამს საქართველოს იუსტიციის უმაღლესი საბჭოს სხდომებზე სქესის ნიშნით დისკრიმინაციის შემცველი გამონათქვამების გახშირებისა და გენდერული უთანასწორობის ატმოსფეროს გაძლიერების გამო. „2018 წლის 26 მარტის სხდომაზე საბჭოს მოსამართლე მამაკაცმა წევრებმა, არამოსამართლე წევრის - ნაზი ჯანეზაშვილის მიმართ განაცხადეს, რომ იგი იტყუებოდა, მასთან საუბარი არ შეიძლებოდა და მისი მოსმენა არ შეიძლებოდა. რაც დასრულდა საბჭოს მოსამართლე წევრის სერგო მეთოფიშვილის მიერ, ნაზი ჯანეზაშვილის მიმართ გაკეთებული მიმართვით, რომ ნაზის შესაძლოა მართავდეს მისი მეუღლე დავით გამისონია. როგორც საბჭოს სხდომებზე, ასევე მედია სივრცეში, იუსტიციის უმაღლესი საბჭოს კაცი წევრების მიერ საბჭოს ქალი წევრების მიმართ კრიტიკის გამოხატვა, არაეთიკური და გენდერული სტერეოტიპებით განპირობებული შინაარსით, პრაქტიკად იქცა, რაც ღირსების შემლახველია და ქმნის მტრულ გარემოს ქალი წევრებისთვის", ნათქვამია განცხადებაში. კოალიცია მოუწოდებს დამოუკიდებელ ინსპექტორს შეისწავლოს გენდერული შევიწროების შემთხვევები. სრულად... წყარო: coalition.ge