თბილისი. საია-ს დახმარებით რადიო „ჰერეთმა" კომუნიკაციების მარეგულირებელ კომისიას სასამრთლო დავა მოუგო. თბილისის საქალაქო სასამართლომ ბათილად ცნო კომუნიკაციების ეროვნული კომისიის ის გადაწყვეტილება, რომლითაც ქ. ბათუმში რადიო სიხშირეზე გამოცხადებული კონკურსი ჩაშლილად გამოცხადდა. სრულად  წყარო: gyla.ge

თბილისი. ტატუნაშვილის საქმესთან დაკავშირებით, საზოგადოებრივი ორგანიზაციები ევროპულ სასამართლოში რუსეთის წინააღმდეგ სახელმწიფოთშორისი განაცხადის შეტანას მოითხოვენ. „ხელმომწერი ორგანიზაციები მოვუწოდებთ საქართველოს სახელმწიფოს, ოკუპირებული აფხაზეთისა და ცხინვალის რეგიონის ტერიტორიებსა და საოკუპაციო ხაზის მიმდებარე სოფლებში ადამიანის უფლებების უხეში დარღვევის ფაქტების აღმოფხვრის მიზნით, გამოიყენოს საერთაშორისო სამართლებრივი მექანიზმები და ამ ტერიტორიებზე სიცოცხლის ხელყოფისა და თავისუფლების შეზღუდვის გავრცელებულ პრაქტიკებთან დაკავშირებით, რუსეთის ფედერაციის წინააღმდეგ სახელმწიფოთშორისი საჩივარი წარადგინოს ადამიანის უფლებათა ევროპულ სასამართლოში", - ნათქვამია მათ მიერ გავრცელებულ განცხადებაში. სრულად  წყარო: emc.org.ge

თბილისი. „ახალგაზრდა ადვოკატების" ინფორმაციით, თბილისის სააპელაციო სასამართლოს ადმინისტრაციულ საქმეთა პალატა ბიზნესმენ რამაზ ახვლედიანის მიმართ, ლისის ტბის წართმევის საქმეზე, გადაწყვეტილებას 2018 წლის 13 მარტს გამოიტანს. „სასამართლომ შემაჯამებელი სხდომა გამართა, სადაც პროცესის მონაწილე მხარეებმა საპაექრო სიტყვა წარმოსთქვეს. რამაზ ახვლედიანის წარმომადგენლების მოთხოვნით, მოხდა მტკიცებულებათა კვლევაც. სასამართლო დაინტერესდა და მოისმინა რამაზ ახვლედიანის დასკვნითი სიტყვაც, რომელმაც ისაუბრა ნების საწინააღმდეგო ქონების დათმობის პროცესზე და ბიზნეს-პარტნიორ მამუკა ხაზარაძესთან ერთად, სააქციო საზოგადოება „ლისის ტბის" მეშვეობით ერთობლივ საქმიანობაზე", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. 15 თებერვალს სახელმწიფო აუდიტის სამსახურმა გამოაქვეყნა შესაბამისობის აუდიტის ანგარიში, რომელმაც 2015-2016 წლებში თბილისის მუნიციპალიტეტის საკუთრებაში არსებული ქონების მართვისა და განკარგვის საკითხები შეაფასა. „ანგარიშში, სხვა საკითხებს შორის, მოხვდა ყოფილი მთავარი პროკურორის ოთარ ფარცხალაძის კომპანიასთან - შპს „ბი ეს არ - სი დი ჯი დეველოპმენტი” - დაკავშირებული ორი შემთხვევა. კერძოდ, აუდიტის დასკვნით, პირველ შემთხვევაში ამ კომპანიას უკონკურენტო აუქციონის გზით გადასცეს დაახლოებით 3 500 მ2 მიწა, რის შედეგადაც მერიამ დაკარგა დამატებითი შემოსავლის მიღების შესაძლებლობა. მეორე შემთხვევაში იგივე კომპანიის საკუთრებაში არსებული მიწის სანაცვლოდ, რომელზეც გზა იქნა გაყვანილი, მუნიციპალიტეტმა „ბი ეს არ - სი დი ჯი დეველოპმენტს” სხვა ტერიტორიაზე გადასცა სამი მიწის ნაკვეთი. პროცესის რამდენიმე წლით გაჭიანურების გამო, კომპანიამ აღნიშნული მიწების ღირებულებებს შორის სხვაობის დასაფარად გაცილებით ნაკლები გადაიხადა, ვიდრე ეს ყველა პროცედურის დროულად დასრულების შემთხვევაში მოხდებოდა. ყოველივე ზემოთქმულიდან გამომდინარე იკვეთება, რომ თბილისის მუნიციპალიტეტის შესაბამისი ორგანოები ქალაქის ქონებას არაგონივრულად განკარგავდნენ, რაც შესაძლოა „ბი ეს არ - სი დი ჯი დეველოპმენტთან” გარკვეული კორუფციული გარიგების შედეგიც ყოფილიყო. ამ გარემოებებს კიდევ უფრო ამძიმებს ის ფაქტი, რომ ოთარ ფარცხალაძემ, სავარაუდოდ სწორედ ამ ანგარიშზე მუშაობის გამო გასულ წელს ფიზიკური შეურაცხყოფა მიაყენა ყოფილ გენერალურ აუდიტორ ლაშა თორდიას, რაზეც დღემდე არ დასრულებულა გამოძიება", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია ორგანიზაციის იურიდიული დახმარების ცენტრის ხელმძღვანელის, ნონა ქურდოვანიძის ბლოგს აქვეყნებს. ბლოგი ეხება საქართველოს სსრ უმაღლესი საბჭოს მიერ 1984 წლის 15 დეკემბერს მიღებულ #161 დადგენილებას, რითაც ძალაში ადმინისტრაციულ სამართალდარღვევათა კოდექსი შევიდა. ბლოგის ავტორი კოდექსს თანამედროვე სამართლებრივი მოთხოვნებისა და რეალიების კონტექსტში მიმოიხილავს. სრულად  წყარო: ორგანიზაციის ვებგვერდი

თბილისი. ცხინვალის იზოლატორში საქართველოს მოქალაქის, არჩილ ტატუნაშვილის გარდაცვალებას საქართველოს სახალხო დამცველი განცხადებით ეხმაურება. „2018 წლის 23 თებერვალს ცხინვალის დე ფაქტო ხელისუფლებამ გაავრცელა ინფორმაცია ცხინვალის იზოლატორში საქართველოს მოქალაქის არჩილ ტატუნაშვილის გარდაცვალების შესახებ. სახალხო დამცველისათვის მიწოდებული ინფორმაციით, არჩილ ტატუნაშვილი ცხინვალის საავადმყოფოში უკვე გარდაცვლილი მიიყვანეს და სამედიცინო პერსონალის შეფასებით, დაზიანებები მიანიშნებდა, რომ იგი ნაცემი იყო. სახალხო დამცველი მოუწოდებს საოკუპაციო ძალებს დაუყოვნებლივ გადმოსცენ ტატუნაშვილის ცხედარი საქართველოს ხელისუფლებას, რათა მას ჩაუტარდეს სამედიცინო ექპერტიზა და დადგინდეს გარდაცვალების გამომწვევი მიზეზები და ხანდაზმულობა; ასევე, ითანამშრომლონ საქართველოსთან საქმის ეფექტური გამოძიების მიზნით", - აცხადებს სახალხო დამცველი. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია და „საქართველოს დემოკრატიული ინიციატივა" საქართველოს იუსტიციის უმაღლეს საბჭოს მიმართავენ, შეწყვიტოს სასამართლოებში თავმჯდომარეების სუბიექტური შეხედულების საფუძველზე დანიშვნა. „დაუშვებელია თავმჯდომარეები თანამდებობაზე ინიშნებოდნენ წინასწარ დადგენილი კრიტერიუმებისა და პროცედურის არარსებობის პირობებში. დაუშვებელია თბილისის სააპელაციო სასამართლოს სისხლის სამართლის საქმეთა პალატის თავმჯდომარედ დაინიშნოს სასამართლო სისტემაში არსებული გავლენიანი გჯუფის წევრი. აღნიშნული კიდევ უფრო გააძლიერებს კლანურ მმართველობას სასამართლო სისტემაში, მნიშვნელოვნად გაზრდის ინდივიდულურ მოსამართლეზე კონტროლის რისკებს და დამღუპველია სასამართლოს დამოუკიდებლობისთვის," - ნათქვამია ორგანიზაციების მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია აქვეყნებს ინფორმაციას, რომლის თანახმადაც სასამართლომ მოძალადის მიმართ გამამტყუნებელი განაჩენი გამოიტანა. „თბილისის საქალაქო სასამართლომ მოძალადის მიმართ გამამტყუნებელი განაჩენი გამოიტანა და მას 6 თვით თავისუფლების აღკვეთა შეუფარდა. ამ საქმეში დაზარალებული ქალის ინტერესებს საია იცავდა. ოჯახში ძალადობის მსხვერპლი ყოფილი ქმრის მხრიდან სისტემატურად განიცდიდა ძალადობას. უკანასკნელი შემთხვევა 2017 წლის დეკემბერში დაფიქსირდა, როდესაც მოძალადემ დაარღვია შემაკავებელი ორდერის პირობები და მსხვერპლს სიცოცხლის მოსპობით დაემუქრა. მოსამართლემ განაჩენის გამოცხადებისას განმარტა, რომ სასჯელის დანიშვნისას, მხედველობაში მიიღო შემაკავებელი ორდერის დარღვევის ფაქტი და ის გარემოება, რომ დანაშაული ჩადენილი იყო ოჯახის ერთი წევრის მიერ მეორის მიმართ, რაც თავისთავად წარმოადგენდა დამამძიმებელ გარემოებას", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. შრომით ურთიერთობებში დამატებითი ანტიდისკრიმინაციული საკანონდებლო გარანტიები ინერგება, - ამ ინფორმაციას ორგანიზაცია „საერთაშორისო გამჭვირვალობა - საქართველო" ავრცელებს. „საქართველოს პარლამენტი განიხილავს საკანონმდებლო ინიციატივას, რომელიც ითვალისწინებს „საქართველოს შრომის კოდექსში" და სამ სხვა ნორმატიულ აქტში ცვლილებებს, მათ შორის „დისკრიმინაციის ყველა ფორმის აღმოფხვრის შესახებ" კანონში. ცვლილებების მიზანი, დისკრიმინაციის აღმოფხვრისკენ მიმართული დამატებითი საკანონმდებლო გარანტიების შექმნაა", - ვკითხულობთ ინფორმაციაში. სრულად  წყარო: ორგანიზაციის ვებგვერდი

თბილისი. საქართველოს დემოკრატიული ინიციატივის დახმარებით, თბილისის საქალაქო სასამართლოს მოძალადე ქმრის (მამისგან) მსხვერპლი ქალისა და მისი სამი შვილის დასაცავად შემაკავებელი ორდერი გამოსცა. „მოძალადე გოჩა ა.-ს აეკრძალა საკუთარ სახლთან (მსხვერპლთა საცხოვრებელთან), სამუშაო, სასწავლო და ყველა იმ ადგილთან მიახლოება, სადაც მაკა და მისი შვილები იქნებიან. ასევე, მოძალადეს აეკრძალა ოჯახში ძალადობის მსხვერპლებთან ნებისმიერი სახის კომუნიკაცია. თბილისის საქალაქო სასამართლომ დამცავი ორდერი გამოსცა მაქსიმალური ვადით, რაც საქართველოს კანონმდებლობის მიხედვით 6 თვეს შეადგენს", ნათქვამია ორგანიზაციის ვებგვერდზე. სრულად... წყარო: gdi.ge

თბილისი. საქართველოს ახალგაზრდა იურისტთა ასოციაციამ საკონსტიტუციო სასამართლოში, მუნიციპალიტეტის საკრებულოს ის უფლებამოსილება გაასაჩივრა, რომლითაც, არჩევნებიდან 6 თვის გასვლის შემდეგ, უნდობლობის გამოცხადებით, შესაძლებელია მერის თანამდებობიდან გადაყენება. „ხალხის მიერ პირდაპირი წესით არჩეული მერის თანამდებობიდან დაუსაბუთებელი გათავისუფლებით საკრებულო არღვევს არა მარტო იმ პირის უფლებას, ვისაც მერის თანამდებობა უკავია, არამედ იმ ამომრჩეველთა უფლებებსაც, რომლებმაც ეს პირი თანამდებობაზე აირჩია. არაკონსტიტუციურია, როდესაც საკრებულოს არ ევალება იმ მიზეზებზე მითითება, რის გამოც ხდება ხალხის მიერ არჩეული მერის თანამდებობიდან გათავისუფლება", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) ზვიად რატიანის ინტერესებს საზოგადოებრივი მაუწყებლის თვითრეგულირების სააპელაციო სასამართლოში დაიცავს. „2018 წლის 7 თებერვალს, საზოგადოებრივი მაუწყებლის სამეურვეო საბჭოში გასაჩივრდა ამავე მაუწყებლის თვითრეგულირების ორგანოს მიერ ზვიად რატიანის საქმეზე მიღებული გადაწყვეტილება, რომელიც წინააღმდეგობაში მოდის „მაუწყებელთა ქცევის კოდექსით" დადგენილ მოთხოვნებთან", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საია მიიჩნევს, რომ ოჯახში ძალადობის მსხვერპლის, დეა გოშხეთელიანის მიმართ პოლიცია და სასამართლო დაუსაბუთებელ, კანონთან შეუსაბამო და ხელახალი „ვიქტიმიზაციის" საფრთხის შემცველ გადაწყვეტილებებს იღებენ. „იმის ნაცვლად, რომ სახელმწიფომ ქალს შესთავაზოს ძალადობისგან დაცვის ეფექტური მექანიზმები, იგი რეპრესიულ ღონისძიებებს იყენებს მსხვერპლის მიმართ. შედეგად, სათანადო ორგანოებისათვის მიმართვა ქალის მდგომარეობას აუარესებს და აიძულებს მას უარი თქვას სახელმწიფოში არსებულ ძალადობისაგან დაცვის მექანიზმების გამოყენებაზე", - აცხადებს საია. სრულად  წყარო: ორგანიზაციის ვებგვერდი

თბილისი. საქართველოს შინაგან საქმეთა და განათლებისა და მეცნიერების სამინისტროებმა წარმოადგინეს საკანონმდებლო ცვლილებების პროექტი „ზოგადი განათლების შესახებ" საქართველოს კანონში. კანონპროექტის ავტორების განმარტებით, სხვა სახის ცვლილებებთან ერთად, აღნიშნული ინიციატივის მიზანია მანდატურის სამსახურის ფუნქციების მოდიფიცირება, გაზრდა, რის შედეგადაც, სკოლების უსაფრთხოება უნდა გაუმჯობესდეს. „კოალიცია ბავშვებისა და ახალგაზრდებისათვის" მიესალმება სახელმწიფო უწყებების მცდელობას, გადადგან ნაბიჯები პრევენციული მექანიზმის გაუმჯობესების მიმართულებით, თუმცა, მიიჩნევს, რომ წარმოდგენილი კანონპროექტი, არსებული რედაქციით, გარკვეულ ხარვეზებს შეიცავს. სრულად  წყარო: https://phrgeorgia.wordpress.com

თბილისი. აფგან მუხთარლის გატაცების საქმესთან დაკავშირებით, საზოგადოებრივი ორგანიზაციები საქართველოს პარლამენტსა და მთავარ პროკურორს მიმართავენ. „აზერბაიჯანიდან დევნილი ჟურნალისტისა და აქტივისტის აფგან მუხთარლის საქართველოს ტერიტორიიდან გატაცების საქმეზე გამოძიების დაწყებიდან თითქმის 9 თვე გავიდა, თუმცა, ამ დრომდე საქმეზე მაღალი საზოგადოებრივი ინტერესის მიუხედავად, გამოძიების პროგრესის შესახებ ინფორმაცია არ გაგვაჩნია. არ გაქარწყლებულა ეჭვები ორგანიზებულ დანაშაულში საქართველოს სამართალდამცავი ორგანოების მონაწილეობასა და ზოგადად, აზერბაიჯანელი დისიდენტების საქმეებში საქართველოს მთავრობის მიერ აზერბაიჯანის ხელისუფლების მიმართ გამოვლენილი პოლიტიკური ლოიალობის თაობაზე. მეტიც, გამოძიების მიმდინარეობის პროცესში იდენტიფიცირებული სერიოზული ხარვეზები საზოგადოების ნდობას და მოლოდინს გამოძიების ეფექტიანობის მიმართ მნიშვნელოვნად ამცირებს", - ნათქვამია განცხადებაში. სრულად  წყარო: https://emc.org.ge

თბილისი. პროკურატურამ სახალხო დამცველის რეკომენდაციის საფუძველზე სავარაუდო არასათანადო მოპყრობის ფაქტზე გამოძიება განაახლა. საქმე ეხება მოქალაქე დ.ფ.-ს მიმართ პოლიციელების მხრიდან სავარაუდოდ განხორცილეებული არასათანადო მოპყრობას. სახალხო დამცველი მიესალმება პროკურატურის გადაწყვეტილებას და პოზიტიურად აფასებს მას, განსაკუთრებით იმ ვითარებაში, როდესაც არასათანადო მოპყრობის ფაქტების არაეფექტური გამოძიება დღესდღეობით სახალხო დამცველის მიერ ადამიანის უფლებათა დაცვის თვალსაზრისით ერთ-ერთ პრობლემურ საკითხად სახელდება. სრულად  წყარო: ორგანიზაციის ვებგვერდი

თბილისი. საია სასჯელაღსრულების მე-8 დაწესებულებაში მომხდარის ეფექტურ გამოძიებას ითხოვს. მედიაში გავრცელებული ინფორმაციის თანახმად, 10 თებერვალს სასჯელაღსრულების მე-8 დაწესებულების მსჯავრდებული ჩ.ნ. თანამესაკნეებმა საპირფარეშოში ყელგამოჭრილი ნახეს. „საქართველოს უახლოეს ისტორიაში პენიტენციარულ სისტემაში გამოვლენილი სისტემური ხასიათის დარღვევების გათვალისწინებით, სრულიად ბუნებრივია მსგავსი შემთხვევების მიმართ საზოგადოების მომეტებული ინტერესი და უნდობლობა. შესაბამისად, მნიშვნელოვანია, რომ გამოძიება წარიმართოს ზედმიწევნით სწრაფად, ეფექტიანად და უზრუნველყოფილი იყოს მომხდარ ფაქტზე ჭეშმარიტების დადგენა", - ვკითხულობთ საია-სგანცხადებაში. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველი ეხმიანება საქართველოს იუსტიციის სამინისტროს მიერ მომზადებულ კანონპროექტს „სახელმწიფო ინსპექტორის სამსახურის შესახებ". სახალხო დამცველი მიიჩნევს, რომ „სახელმწიფო ინსპექტორის სამსახურის შესახებ" საქართველოს კანონის პროექტით წარმოდგენილი მოდელი, შესაძლოა, ეფექტური იყოს გამოძიების ეტაპზე არსებული პრობლემების გადაჭრის კუთხით, თუკი მოხდება კანონპროექტში არსებული რიგი პრინციპული მნიშვნელობის მქონე საკითხების კორექტირება. სწორედ ამ მიზნით, საქართველოს სახალხო დამცველმა საქართველოს იუსტიციის სამინისტროს წარუდგინა მოსაზრებები კანონპროექტთან დაკავშირებით. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის მოსაზრებით, დაგროვებითი საპენსიო სქემა არაკონსტიტუციურია. ამის შესახებ საუბარია ორგანიზაციის ვებგვერდზე განთავსებულ განცხადებაში. „რამდენადაც, საპენსიო შენატანი წარმოადგენს სავალდებულო გადასახდელს, მისი ნაწილი მიემართება საპენსიო სააგენტოს საქმიანობის დასაფინანსებლად, ზრდის ხარჯებს, ამცირებს შემოსავალს, დამსაქმებელთა შემთხვევაში არ ექვემდებარება დაბრუნებას, ხოლო დასაქმებულებთან მიმართებით დამოკიდებულია სააგენტოს გამართულ ფუნქციონირებაზე, საკონსტიტუციო სასამართლოს პრაქტიკის გათვალისწინებით, ის გაიგივებული უნდა იქნეს გადასახადისა და მოსაკრებლის სამართლებრივ ბუნებასთან და უნდა მოექცეს საქართველოს კონსტიტუციის 94-ე მუხლის რეგულირების სფეროში. შესაბამისად, რამდენადაც, სავალდებულო საპენსიო შენატანი ამ დრომდე არ ყოფილა გათვალისწინებული საქართველოს კანონმდებლობით, გამოდის, რომ ხდება გადასახადის ახალი სახის შემოღება, რაც მხოლოდ რეფერენდუმის გზითაა შესაძლებელი", - ვკითხულობთ განცხადებაში. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია საზოგადობრივი მაუწყებლის წინააღმდეგ კომუნიკაციების ეროვნულ კომისიას მიმართავს. სსიპ საზოგადოებრივმა მაუწყებელმა უარი განაცხადა ეთერში განეთავსებინა საქართველოს ახალგაზრდა იურისტთა ასოციაციის მიერ მომზადებული სოციალური რეკლამა, რომელიც მიზნად ისახავს მოსახლეობის ინფორმირებას 1984 წელს მიღებული სამართალდარღვევათა კოდექსის ცვლილების საჭიროების თაობაზე. აღნიშნული ნორმატიული აქტი ვერ აკმაყოფილებს სამართლიანი პროცესის მოთხოვნებს და ყოველდღიურად იწვევს არაერთი პირის ფუნდამენტური უფლებების დარღვევას. საზოგადოებრივი მაუწყებელი ვალდებულია ეთერში განთავსების მიზნით დაინტერესებული პირების მიერ წარმოდგენილ სოციალურ რეკლამას უსასყიდლოდ და არადისკრიმინაციულად დაუთმოს 1 საათში ჯამში არანაკლებ 60 წამი", - ნათქვამია საია-ს განცხადებაში. სრულად  წყარო: ორგანიზაციის ვებგვერდი

თბილისი. „კოალიცია დამოუკიდებელი და გამჭვირვალე მართლმსაჯულებისთვის" ეხმიანება საქართველოს იუსტიციის სამინისტროს მიერ მომზადებულ კანონპროექტს, რომლის მიზანიც სახელმწიფო ინსპექტორის სამსახურის შექმნაა. „კანონპროექტის თანახმად, ახალი სამსახური შეიქმნება პერსონალურ მონაცემთა დაცვის ინსპექტორის ნაცვლად და ამ უკანასკნელის დღევანდელ ფუნქციებთან ერთად, სამსახური შეითავსებს სამართალდამცავი ორგანოს წარმომადგენლის, მოხელის ან მასთან გათანაბრებული პირის მიერ კონკრეტული ტიპის დანაშაულებზე გამოძიების წარმოების უფლებამოსილებას", - ნათქვამია განცხადებაში, -„კოალიცია იმედოვნებს, რომ წარმოდგენილ კანონპროექტთან დაკავშირებით შესაძლებელი იქნება როგორც ტექნიკურ/ფორმალურ საკითხებზე, ისე პრინციპების დონეზე არგუმენტირებული მსჯელობა და დისკუსია, რათა პირველ რიგში, ფუნდამენტურ საკითხებზე იქნეს სწორი და რაციონალური გადაწყვეტილება მიღებული. წარმოდგენილ დოკუმენტში კოალიცია სწორედ იმ საკითხებზე ამახვილებს ყურადღებას, რაც ჩვენი პოზიციით, პრინციპული მნიშვნელობის არის ეფექტიანი და დამოუკიდებელი საგამოძიებო სამსახურის შექმნისთვის, რომელიც იქნება ღირსეული პასუხი დღევანდელ გამოწვევებზე". სრულად  წყარო: https://gyla.ge

13 თებერვალს, 12:00 საათზე, თბილისის საქალაქო სასამართლოს ადმინისტრაციულ საქმეთა კოლეგია მოსამართლე ნანა დარასელიას თავმჯდომარეობით, სსიპ განათლების საერთაშორისო ცენტრის წინააღმდეგ საერთაშორისო სამაგისტრო პროგრამებზე დაფინანსების გამჭვირვალობის სადავოდ მიჩნეულ გადაწყვეტილებებზე, ორგანიზაცია „ახალგაზრდა ადვოკატების" სარჩელს განიხილავს.  მის.: ქ. თბილისი, დავით აღმაშენებლის ხეივანი მე-12 კმ. N6 საკონტაქტო პირი გიორგი ზოიძე - 599 291202.