თბილისი. 23 იანვარს, საქართველოს ახალგაზრდა იურისტთა ასოციაციამ (საია) ევროპულ სასამართლოში საჩივარი წარადგინა, რომელიც საიას წარმოებაში არსებულ 4 საქმეზე ამავე სასამართლოს მიერ გამოტანილი განჩინებების აღუსრულებლობას შეეხება. „საია ევროპულ სასამართლოში წარდგენილ საჩივარში ასაბუთებს, რომ სახელმწიფომ არ შეასრულა ცალმხრივი დეკლარაციით აღებული ვალდებულება - ეწარმოებინა სამართალდამცავი ორგანოების წარმომადგენელთა მხრიდან მომჩივანთა მიმართ განხორციელებული დარღვევების სრულყოფილი და ეფექტური გამოძიება - და შესაბამისად, საჩივრების აღდგენას და მათ არსებით განხილვას ითხოვს”, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. არასამთავრობო ორგანიზაციები ეხმაურებიან კლუბ „ბასიანის" მიმდებარე ტერიტორიაზე მომხდარი ინციდენტის ირგვლივ განვითარებულ მოვლენებს. ისინი მიიჩნევენ, რომ საქმე სასამართლოს მიმართ გარკვეულ კითხვებს წარმოშობს. „განვითარებულმა მოვლენებმა კიდევ ერთხელ აჩვენა, რომ მართლმსაჯულების სისტემა მიუკერძოებლობისა და დამოუკიდებლობის კუთხით სერიოზული გამოწვევების წინაშე დგას. იმისათვის, რომ გაქარწყლდეს საზოგადოებაში გაჩენილი კითხვები შერჩევითი მართლმსაჯულების თაობაზე და მართლმსაჯულების სისტემაში პოლიტიკური თანამდებობის პირების ჩარევასთან დაკავშირებით, აუცილებელია უზრუნველყოფილ იქნას საქმის სრულყოფილი, ობიექტური და სწრაფი გამოძიება", ნათქვამია ერთობლივ განცხადებაში. სრულად... წყარო: gyla.ge

თბილისი. 18 იანვარს საქართველოს სახალხო დამცველმა ნინო ლომჯარიამ გ.ო.-ს საქმეზე სასამართლოს მეგობრის მოსაზრებით მიმართა თბილისის სააპელაციო სასამართლოს. ომბუდსმენი მიიჩნევს, რომ „სააპელაციო სასამართლომ საჩივრის განხილვის ფარგლებში უნდა იმსჯელოს ზემოაღნიშნულ გარემოებებზე და წარმოადგინოს დასაბუთებული პოზიცია განსახილველ საკითხებზე, ვინაიდან გ.ო.-ს სააპელაციო საჩივარში მითითებული გარემოებების გადაწყვეტა უშუალო გავლენას ახდენს როგორც ამ კონკრეტულ საქმეში ინდივიდის უფლებებისა და თავისუფლებების უზრუნველყოფაზე, ასევე, სასამართლოს შემდგომი პრაქტიკის განვითარებაზე". სრულად... წყარო: ombudsman.ge

თბილისი. „ახალგაზრდა ადვოკატების" მიერ გავრცელებული ინფორმაციის თანახმად, ამერიკის საელჩო საქათველოში ბიზნესმენ რამაზ ახვლედიანის მიმართ ლისის ტბის დათმობის საქმეზე მიმდინარე სამართალწარმოების პროცესს ეხმაურება. საელჩო საქმის შედეგების მიმართ ინტერესს გამოთქვამს. ორგანიზაცია მადლობას უხდის აშშ-ის საელჩოს საქართველოში სისტემური დანაშაულის საქმეზე საპასუხისმგებლო გამოხმაურებისთვის. ის ლისის ტბის დათმობის საქმეზე სამართალწარმოების მიმდინარეობის შესახებ ინფორმაციას მიაწვდის, როგორც აშშ-ის საელჩოს, ასევე თანამშრომლობას გააგრძელებს იმ საერთაშორისო ინსტიტუტებთან, რომლებიც გამოთქვამენ მზადყოფნას ქონებების დათმობის საქმეზე ალტერნატიული დასკვნები მოისმინონ. სრულად... წყარო: barristers.ge

თბილისი. არასამთავრობო ორგანიზაციები მოსამართლეთა კონკურსს აფასებენ. იუსტიციის უმაღლესმა საბჭომ დაასრულა 2017 წლის 16 ოქტომბერს მოსამართლეთა შესარჩევად გამოცხადებული კონკურსი. „კონკურსის მიმდინარეობაზე დაკვირვებამ გამოავლინა, რომ მიუხედავად დღემდე განხორციელებული რამდენიმე საკანონმდებლო რეფორმისა მოსამართლეთა დანიშვნის პრაქტიკა არ გაუმჯობესებულა და კვლავაც მნიშვნელოვანი ხარვეზებით მიმდინარეობს", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია მიიჩნევს, რომ ადმინისტრაციულ სამართალდარღვევათა კანონმდებლობის არსებული ფორმით შენარჩუნება ყოველდღიურად იწვევს არაერთი პირის ფუნდამენტური უფლებების დარღვევას. „დღეისათვის საქართველოში მოქმედი ადმინისტრაციულ სამართალდარღვევათა კოდექსი შემორჩენილია საბჭოთა პერიოდიდან, რომელიც ვერ აკმაყოფილებს სამართლიანი პროცესის მოთხოვნებს. მოქმედი ადმინისტრაციული სამართალდარღვევათა კოდექსი ცალკეული სამართალდარღვევის ჩადენისათვის ითვალისწინებს მძიმე სახდელებს, მათ შორის, ადმინისტრაციულ პატიმრობას, თუმცა, აწესებს გაცილებით ნაკლებ პროცედურულ გარანტიებს, ვიდრე სისხლის სამართლის დანაშაულის ჩადენაში ბრალდებულ პირს გააჩნია. ადმინისტრაციულ სამართალდარღვევათა კანონმდებლობის რეფორმის გატარების უზრუნველსაყოფად საია იწყებს აქტიურ საქმიანობას და გამოიყენეს მის ხელთ არსებულ ყველა შესაძლებლობას უფლებების შემზღუდველი კანონმდებლობის შესაცვლელად”, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. თბილისის საქალაქო სასამართლომ ლტოლვილთა სამინისტროს დაავალა, ლტოლვილის სტატუსი მიანიჭოს ერაყის მოქალაქე ა.ა.ჰ.ჰ.-სა და მისი ოჯახის ხუთ წევრს, რომლებიც საკუთარი რელიგიის გამო იდევნებიან. ერაყის მოქალაქეთა ინტერესებს სასამართლოსა და ადმინისტრაციულ ორგანოში საქართველოში გაეროს ასოციაცია და ტოლერანტობისა და მრავალფეროვნების ინსტიტუტი (TDI) წარმოადგენენ. სრულად... წყარო: tdi.ge

თბილისი. 29 დეკემბერს თბილისის საქალაქო სასამართლომ ზვიად რატიანი წვრილმანი ხულიგნობისა და პოლიციის შეურაცხყოფისთვის 2000 ლარით დააჯარიმა. აღნიშნულ საქმეზე თბილისის საქალაქო სასამართლოს დადგენილება EMC-იმ, 2018 წლის 6 იანვარს, სააპელაციო სასამართლოში გაასაჩივრა. 16 იანვარს, საქართველოს სახალხო დამცველმა ამ საქმეზე „სასამართლოს მეგობრის" მოსაზრება წარუდგინა სააპელაციო სასამართლოს. „მნიშვნელოვანია, რომ თბილისის სააპელაციო სასამართლომ აღმოფხვრას ის სამართლებრივი ხარვეზები და შეცდომები, რაც თბილისის საქალაქო სასამართლოს 29 დეკემბრის დაუსაბუთებელი დადგენილებით იკვეთება და საქმეზე დართული მტკიცებულებების შესაბამისად, მიიღოს სამართლიანი გადაწყვეტილება. ამასთან, EMC მნიშვნელოვნად მიიჩნევს, რომ სააპელაციო სასამართლომ საქმე განიხილოს ზეპირი მოსმენით და მხარეებს მისცეს შესაძლებლობა იმსჯელონ, პირველი ინსტანციის მიერ, არასრულფასოვნად გამოკვლეული და დადგენილი ფაქტობრივი გარემოებების შესახებ. რაც შეეხება, ზვიად რატიანის საქმეში არსებული ფრაგმენტული ვიდეო ჩანაწერების კანონიერებას, ამ საკითხის შესწავლის მიზნით, EMC-იმ უკვე მიმართა შინაგან საქმეთა სამინისტროს გენერალურ ინსპექციას და პერსონალურ მონაცემთა დაცვის ინსპექტორს", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 15 იანვარს, საქართველოს შინაგან საქმეთა სამინისტროს ოფიციალურ ვებგვერდზე გამოქვეყნდა განცხადება, რომლითაც უწყება აღიარებს, რომ მის მიერ 2014 წლის 17 დეკემბერს გავრცელებული ინფორმაცია გიორგი კლდიაშვილის დაკავების შესახებ იყო შეცდომაში შემყვანი და არასწორად აღწერდა ფაქტობრივ გარემოებებს. „შსს-ს მიერ 2014 წლის 17 დეკემბერს გავრცელებული განცხადება გიორგი კლდიაშვილს საზოგადოების თვალში წარმოაჩენდა სისხლის სამართლის დამნაშავედ. სწორედ აღნიშნულიდან გამოდინარე, საკუთარი რეპუტაციის შელახვის გამო გიორგი კლდიაშვილმა 2015 წლის 5 ივნისს სარჩელით მიმართა თბილისის საქალაქო სასამართლოს სამოქალაქო საქმეთა კოლეგიას მოპასუხე საქართველოს შინაგან საქმეთა სამინისტროს მიმართ გავრცელებული ცილისმწამებლური ინფორმაციის უარყოფის მოთხოვნით. IDFI მოხარულია და ყველანაირად მიესალმება საქართველოს შინაგან საქმეთა სამინსიტროს მხრიდან ნაბიჯს, რომ უწყებამ, სასამართლო პროცესების გაჭიანურების გარეშე, მის დასრულებამდე, თავად აღიარა არასწორი და ცილისმწამებლური ინფორმაციის გავრცელება გიორგი კლდიაშვილის მიმართ და შესაბამისი განცხადება თავისი ინიციატივით გამოაქვეყნა საკუთარ ვებგვერდზე. აღნიშნული ფაქტი კიდევ ერთხელ ადასტურებს შსს-ის ახალი ხელმძღვანელობის მიერ უწყებაში დაწყებულ რეფორმის სწორ მიმართულებას და უწყების მხრიდან სამოქალაქო სექტორთან თანამშრომლობის მზაობას და სურვილს", ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი აქვეყნებს ბლოგპოსტს: „აფგან მუხთარლის საქმე საქართველოს დემოკრატიის ტესტი გახდა". „საქმეზე მაღალი საზოგადოებრივი ინტერესის მიუხედავად, ამ დრომდე პროკურატურას მუხთარლის საქმეზე გამოძიების პროგრესის შესახებ ინფორმაცია არ გაუსაჯაროებია. სახელმწიფო უსაფრთხოების სამსახურის კონტდაზვერვის დეპარტამენტისა და შინაგან საქმეთა სამინისტროს საზღვრის დაცვის პოლიციის ხელმძღვანელების თანამდებობიდან გათავისუფლება, ცხადია, არ არის ადეკვატური სამართლებრივი და პოლიტიკური რეაგირება აღნიშნულ საქმეზე. მით უფრო, რომ სხვა დისიდენტების საქმეები დისიდენტების მიმართ უფლებების შეზღუდვის ტენდენციაზე უთითებს. აფგან მუხთარლის საქმე საქართველოს დემოკრატიის ტესტი გახდა. აზერბაიჯანელი დისიდენტების მიმართ თვითნებური პოლიტიკა აზერბაიჯანის მთავრობასთან საქართველოს სტრატეგიული თანამშრომლობის ინტერესით შეიძლება აიხსნას", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საერთაშორისო გამჭვირვალობა - საქართველო ეხმაურება იუსტიციის უმაღლესი საბჭოს მიერ მიღებულ გადაწყვეტილებას შრომითი ანაზღაურების შემცირებაზე. „შრომითი ანაზღაურება შეუმცირდათ რაიონული (საქალაქო) და სააპელაციო სასამართლოების აპარატების მოხელეების ნაწილს. მათ შორის, გასულ წლის ანაზღაურებასთან შედარებით, ხელფასის ოდენობა შეუმცირდათ თბილისის საქალაქო სასამართლოს მანდატურებს, სხდომის მდივნებსა და თანაშემწეებს. ამავე დროს, გაიზარდა სასამართლოების მენეჯერებისა და ბიუროს უფროსების შემოსავალი. ასევე, ყოველთვიური დანამატის ოდენობა 700 ლარიდან 1200 ლარამდე გაეზარდათ საბჭოს მოსამართლე წევრებს, რომელთაც თავიანთი დამატებითი ფუნქციის გათვალისწინებით სასამართლოში საქმეების განხილვის დაბალი მაჩვენებელი აქვთ❗ ცნობილია, რომ სასამართლოს საქმიანობასა და მართლმსაჯულების სწრაფ და ეფექტიან განხორციელებაში უმნიშვნელოვანეს როლს ასრულებენ თანაშემწეები და სხდომის მდივნები, რომელთა არსებული ანაზღაურებაც მათ ყოველდღიურ დატვირთვასთან შედარებით შეუსაბამოდ დაბალია! მიგვაჩნია, რომ ასეთ პირობებში, სასამართლოების აპარატის თანამშრომლებისათვის ანაზღაურების კიდევ უფრო შემცირება, განსაკუთრებით საბჭოს წევრებისა და აპარატის ხელმძღვანელი პირების ანაზღაურების ზრდის ფონზე, უსამართლოა და წარმოადგენს საბიუჯეტო თანხების არასათანადო ხარჯვას, რაც უარყოფითად აისახება აპარატის თანამშრომლების სამუშაო მოტივაციაზე და სასამართლოების გადატვირთულობის პრობლემაზე", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია საქართველოს პარლამენტს საკანონმდებლო წინადადებით მიმართავს, რომლის მიზანია მეუღლეთა ქონებრივი უფლებების დაცვის სამართლებრივი გარანტიების გაზრდა. ინციატივა გულისხმობს ქორწინებაში მყოფი პირის მიერ ქორწინების განმავლობაში შეძენილ უძრავ ქონებაზე თანასაკუთრების რეგისტრაციის შესაძლებლობას, მეორე მეუღლის თანხმობის გარეშე. როგორც საია-ში განმარტავენ, საკანონმდებლო წინადადება განსაკუთრებით ხელს შეუწყობს ქორწინებაში მყოფ ქალთა ქონებრივი უფლებების დაცვას, რადგან საქართველოში არსებული პრაქტიკის გათვალისწინებით, ქალების სახელზე ძირითადად არ არის დარეგისტრირებული თანასაკუთრებაში არსებული ქონება და მათ, უმეტეს შემთხვევაში, უწევთ სასამართლოს გზით თანასაკუთრებაზე უფლების აღიარება. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველმა თბილისის სააპელაციო სასამართლოს ზ.რ.-ს საქმესთან დაკავშირებით სასამართლოს მეგობრის მოსაზრებით (Amicus Curiae) მიმართა. მოსაზრებაში მიმოხილულია ნეიტრალური მტკიცებულებების მნიშვნელობა სამართლიანი სასამართლოს უფლების კონტექსტში და მასთან დაკავშირებით ადამიანის უფლებათა ევროპული სასამართლოს მიერ დადგენილი ერთგვაროვანი პრაქტიკა. სრულად წყარო: ორგანიზაციის ვებგვერდი

თბილისი. „ახალგაზრდა ადვოკატებმა" თბილისის მიწათსარგებლობის გენერალური გეგმის განახლებული დოკუმენტის შექმნაზე თბილისის მუნიციპალიტეტის მერიასა და „სითი ინსტიტუტი საქართველოს" შორის სახელმწიფო შესყიდვის შესახებ გაფორმებული 2015 წლის 15 ოქტომბრის ხელშეკრულების შეწყვეტის მოთხოვნით, სამართალწარმოების პროცესი დაიწყო. „ორგანიზაციის ადმინისტრაციული საჩივარი თბილისის მუნიციპალიტეტის მერიაში უკვე დარეგისტრირდა, რომლითაც მოთხოვნილია, ქალაქ თბილისის მუნიციპალიტეტის არქიტექტურის სამსახურს დაევალოს სადავო ხელშეკრულების შეწყვეტაზე ახალი ინდივიდუალურ-ადმინისტრაციულ სამართლებრივი აქტის გამოცემა და ყველა დაინტერესებული მხარის მონაწილეობით, ადმინისტრაციული საჩივრის განხილვის დაჩაქრებული წესით უზრუნველყოფა", ნათქვამია განცხადებაში. სრულად... წყარო: www.barristers.ge

თბილისი. ადამიანის უფლებათ სახლი ავრცელებ ინფორმაციას იმის შესახებ, რომ აფგან მუხტარლის 6 წლით თავისუფლების აღკვეთა მიუსაჯეს. „ქალაქ ბელაქანის რაიონულ სასამართლოში აფგან მუხთარლის სასამართლო პროცესი დასრულდა. სასამართლო გადაწყვეტილებით, აფგანს 6 წლით თავისუფლების აღკვეთა მიესაჯა: საზღვრის უკანონო გადაკვეთის, კონტრაბანდისა და პოლიციელისთვის წინააღმდეგობის გაწევის ბრალდებებით. თბილისის ადამიანის უფლებათა სახლი უსამართლოდ მიიჩნევს აღნიშნულ გადაწყვეტილებას და განაგრძობს აფგანისა და მისი ოჯახის მხარდაჭერას", - ნათქვამია განცხადებაში. სრულად  წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ, პარტნიორ ორგანიზაციას „ადამიანის უფლებათა დაცვის ევროპული ცენტრთან" (EHRAC) თანამშრომლობით, გიგა ოთხოზორიას საქმესთან დაკავშირებით, 2018 წლის 11 იანვარს, ადამიანის უფლებათა ევროპულ სასამართლოს, რუსეთის ფედერაციის წინააღმდეგ საჩივრით მიმართა. ევროპულ სასამართლოში წარდგენილ საჩივარში მომჩივანთა მიმართ რუსეთის ფედერაციის მხრიდან ევროპული კონვენციის მე-2 (სიცოცხლის უფლება) და მე-13 (სამართლებრივი დაცვის ქმედითი საშუალების უფლება) მუხლების დარღვევაა დასაბუთებული და აღნიშნულია, რომ ოკუპირებული აფხაზეთის ტერიტორიაზე ევროპული კონვენციით გათვალისწინებული ადამიანის უფლებების დარღვევისთვის, ასევე, აფხაზეთის დე-ფაქტო ხელისუფლების წარმომადგენლების ქმედებებზე პასუხისმგებლობა ეკისრება რუსეთის ფედერაციას, როგორც ამ ტერიტორიაზე ეფექტური კონტროლის განმახორციელებელ სახელმწიფოს. სრულად  წყარო: საია-ს ვებგვერდი

თბილისი. კოალიცია "დამოუკიდებელი და გამჭვირვალე მართლმსაჯულებისთვის” აქვეყნებს მოსაზრებებს საქართველოს პარლამენტისთვის, სასამართლო რეფორმის მეოთხე ტალღის კანონპროექტებთან დაკავშირებით. „საქართველოს პარლამენტი პირველი მოსმენით განიხილავს „საერთო სასამართლოების შესახებ" საქართველოს ორგანულ კანონში, საქართველოს სამოქალაქო საპროცესო და ადმინისტრაციულ საპროცესო კოდექსებში ცვლილებების შეტანის შესახებ კანონპროექტების პაკეტს, რომელიც სასამართლო სისტემის რეფორმის მეოთხე ეტაპის შემადგენელი ინიციატივაა", - აღნიშნულია განცხადებაში, - ინიციატორების განცხადებით, საკანონმდებლო ცვლილებები მიზნად ისახავს სასამართლოში საქმეთა განხილვის გაჭიანურების და მოსამართლეთა გადატვირთულობის პრობლემის მოგვარებას. როგორც კოალიციისთვის არის ცნობილი, მოგვიანებით სასამართლო რეფორმის მეოთხე ტალღის ფარგლებში ასევე დაგეგმილია ცვლილებები მოსამართლეთა დისციპლინური სამართალწარმოების, იუსტიციის უმაღლესი საბჭოს საქმიანობის, იუსტიციის უმაღლესი სკოლის მიმართულებით. ხაზგასმით აღვნიშნავთ, რომ კოალიცია მხარს უჭერს სისტემური რეფორმების გაგრძელებას სასამართლოში და ვიმედოვნებთ, რომ მეოთხე ტალღის ცვლილებები უპასუხებს იმ გამოწვევებს, რაც სასამართლოში არაფორმალური და არაჯანსაღი მმართველობის, ინდივიდუალური მოსამართლის გაძლიერების და ანგარიშვალდებულების გაზრდის მიმართულებით არსებობს. აქვე, კოალიცია უარყოფითად აფასებს "მეოთხე ტალღის” რეფორმაზე მუშაობის პროცესს, რომელიც იზოლირებულად, პროფესიული ჯგუფების და საზოგადოებრივი ორგანიზაციების მონაწილეობის გარეშე მიმდინარეობს. სასამართლო რეფორმებზე მუშაობის წინა გამოცდილებების გათვალისწინებით, ჩვენთვის გაუგებარია, რა გახდა ამ პროცესიდან იმ ორგანიზაციების გამოთიშვის მიზეზი, რომელსაც სასამართლოს და საბჭოს მონიტორინგის მრავალწლიანი გამოცდილება, ასევე რეფორმებსა და სასამართლო სტრატეგიაზე მუშაობის გამოცდილება აქვს. კოალიცია იმედოვნებს, რომ მეოთხე ტალღის სხვა კანონპროექტების მომზადება უფრო ღია და მონაწილეობით ფორმატში გაგრძელდება". სრულად  წყარო: კოალიციის ვებგვერდი

თბილისი. საქართველოს სახალხო დამცველმა, პოლიციის თანამშრომლის მხრიდან ეთიკის ნორმების დარღვევის ფაქტზე არასათანადო რეაგირების შესახებ, საქართველოს შინაგან საქმეთა მინისტრს რეკომენდაციით მიმართა. როგორც დოკუმენტში აღნიშნული, ლგბტ თემის წარმომადგენელის ოჯახში ძალადობის ფაქტთან დაკავშირებით, საქართველოს სახალხო დამცველის რწმუნებული იმყოფებოდა პოლიციის ერთ-ერთ განყოფილებაში, სადაც შეესწრო საქართველოს შინაგან საქმეთა სამინისტროს თანამშრომლის მხრიდან სამსახურეობრივი გადაცდომის ფაქტს. კერძოდ, პოლიციის თანამშრომელი საქართველოს სახალხო დამცველის წარმომადგენელს, რწმუნების წარდგენის მიუხედავად არ რთავდა შენობაში ყოფნის ნებას. ამასთან, ჰომოფობიურად იყო განწყობილი და აგრესიას გამოხატავდა ლგბტ თემის მიმართ. სრულად  წყარო: ორგანიზაციის ვებგევრდი

თბილისი. პარტნიორობა ადამიანის უფლებებისთვის (PHR) საჩივრის საფუძველზე, არასრულწლოვანზე ძალადობა განმეორებით, გენდერული ასპექტის გათვალისწინებით შეისწავლა და ორგანიზაციის მიერ მითითებული შენიშვნები გაითვალისწინა. „ჩვენი საჩივრის პასუხად, ორგანიზაციას სოციალური მომსახურების სააგენტომ 26 დეკემბერს აცნობა, რომ განმეორებით შეისწავლეს საქმე და სოციალური მუშაკის ჩარევის შედეგად, მოძალადე მშობელმა ნებაყოფლობით გადასცა მინდობილობა მეორე მშობელს. შედეგად კი, არასრულწლოვნის მიმართ აღარ ხორციელდება ძალადობა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. პარტნიორობა ადამიანის უფლებებისთვის (PHR) სასამართლოში ითხოვდა იმ რეგულაციების გაუქმებას, რომელიც დისკრიმინაციულად ზღუდავდა შეზღუდული შესაძლებლობის მქონე პირების მიერ ქ. თბილისის ტერიტორიაზე სპეციალური პარკირების ადგილებით სარგებლობის უფლებას. „PHR-ის სტრატეგიული სამართალწარმოების შედეგად, 2016 წლის 20 დეკემბერს სააპელაციო სასამართლომ ძალაში დატოვა თბილისის საქალაქო სასამართლოს გადაწყვეტილება და ბათილად ცნო თბილისის საკრებულოს გადაწყვეტილების ის პუნქტები, რომლებიც შეზღუდული შესაძლებლობის მქონე პირებს არ აძლევდა სპეციალური პარკირების ადგილების გამოყენების უფლებას თუ საკუთრებაში არ ჰყავდა რეგისტრირებული ავტოსატრანსპორტო საშუალება. საკრებულოს დაევალა, პარკირების რეგულაციების გაეროს შეზღუდული შესაძლებლობის მქონე პირთა უფლებების კონვენციის მოთხოვნებთან შესაბამისობაში მოყვანა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. ადამიანის უფლებების სწავლებისა და მონიტორინგის ცენტრი (EMC) მაჩალიკაშვილის ოჯახს და პანკისის თემს სოლიდარობას უცხადებს. ორანიზაცია მზად არის, ყველა სამართლებრივი საშუალებით დაადგინოს სიმართლე და დაიცვას დაზარალებული ოჯახის უფლებები. წყარო: ორგანიზაციის ვებგვერდი სოციალურ ქსელში

თბილისი. 9 იანვარს სახალხო დამცველმა ნინო ლომჯარიამ ოჯახში ძალადობის მსხვერპლ დ.გ-ს მიმართ დაცვის ეფექტური ღონისძიებების გატარების მიზნით, შინაგან საქმეთა მინისტრსა და საქართველოს მთავარ პროკურორს მიმართა. „სახალხო დამცველი სამართალდამცავ უწყებებს მოუწოდებს გათვალისწინებულ იქნეს ქალთა მიმართ და ოჯახში ძალადობის კუთხით ქვეყანაში არსებული მძიმე მდგომარეობა, საფუძვლიანად იქნეს გაანალიზებული ის საფრთხეები, რაც შესაძლოა მსხვერპლს და მის ოჯახის წევრებს ემუქრებოდეს და უზრუნველყოფილ იქნეს დაცვის ეფექტიანი ღონისძიებების გატარება", ნათქვამია განცხადებაში. სრულად... წყარო: ombudsman.ge