თბილისი. დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩი საქართველოში მარკ კლეიტონი საქართველოს სახალხო დამცველს ნინო ლომჯარიას შეხვდა. ელჩმა მხარდაჭერა გამოხატა სახალხო დამცველისა და სახალხო დამცველის აპარატის მიმართ და აღნიშნა, რომ იგი ყურადღებით ადევნებს თვალს სახალხო დამცველის შეფასებებს და ენდობა მის განცხადებებს, როგორც ობიექტურ საინფორმაციო წყაროს. სრულად... წყარო: ombudsman.ge

თბილისი. 30 ნოემბერს - 1 დეკემბერს გაიმართა საქართველოს ინტერნეტ მმართველობის მე-7 ფორუმი #GeoIGF2021. საქართველოს დემოკრატიული ინიციატივას თავმჯდომარემ, ედუარდ მარიკაშვილმა მოდერაცია გაუწია ფორუმის პანელს თემაზე - „ინტერნეტ კონტენტის თვითრეგულირების ფარგლები”. სრულად... წყარო: ორგანიზაციის გვერდი სოციალურ ქსელში

თბილისი. საქართველოს დემოკრატიულმა ინიციატივამ (GDI) საქართველოს საერთო სასამართლოების მიერ მიღებულ გადაწყვეტილებებზე ესეების კონკურსის გამარჯვებულები დააჯილდოვა. I ადგილი - ზეინაბ შავაძე, ბათუმის შოთა რუსთაველის სახელმწიფო უნივერსიტეტის მე-4 კურსის სტუდენტი; II ადგილი - მარიამ ურიგაშვილი, ივანე ჯავახიშვილის სახელობის თბილისის სახელმწიფო უნივერსიტეტის მაგისტრატურის სტუდენტი; III ადგილი - ანა ჩიქოვანი, ილიას სახელმწიფო უნივერსიტეტის მე-4 კურსის სტუდენტი. წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ეხმიანება ირაკლი ღარიბაშვილის განცხადებას ნარკოპოლიტიკის გამკაცრების შესახებ. „მივიჩნევთ, რომ უკიდურესად პრობლემურია პრემიერ-მინისტრის მხრიდან რეპრესიასა და დასჯაზე ორიენტირებულ რიტორიკის გამოყენება. პრემიერ-მინისტრის განცხადება, ზრუნვაზე ორიენტირებული პოლიტიკის წახალისების ნაცვლად, ნარკომომხმარებლების სტიგმატიზებას და საზოგადოებისგან კიდევ უფრო გარიყვას იწვევს, ხოლო ე.წ. სააფთიაქო ნარკომანიის ჭრილში გამოთქმული მოსაზრებები პრობლემის საფუძვლების აღმოფხვრისკენ არ არის მიმართული“, ნათქვამია განცხადებაში. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტმა (IDFI) ბენეფიციარ მესაკუთრეებზე სახელმძღვანელოსა და რეგიონული კვლევის პრეზენტაცია გამართა. „კვლევა IDFI-სა და ვიშეგრადის ქვეყნებში პარტნიორი ორგანიზაციების მიერ მომზადდა და მიმოიხილავს საქართველოში, ჩეხეთში, უნგრეთში, პოლონეთსა და სლოვაკეთში ბენეფიციარი მესაკუთრეების გამჭვირვალობის კუთხით არსებულ კანონმდებლობას, პრაქტიკასა და გამოწვევებს. პრეზენტაციის დასასრულს გაიმართა ანალიტიკური სტატიების კონკურსის - „მონაცემები ცვლილებებისთვის“ - გამარჯვებულების დაჯილდოება“. სრულად... წყარო: idfi.ge

თბილისი. კოალიციის საერთო კრებაზე სოციალური სამართლიანობის ცენტრი თავმჯდომარე ორგანიზაციად აირჩიეს, ადამიანის უფლებათა ცენტრი კი თავმჯდომარის მოადგილე ორგანიზაციად.  მმართველ კომიტეტში იქნებიან: სოციალური სამართლიანობის ცენტრი, საქართველოს დემოკრატიული ინიციატივა, საქართველოს ახალგაზრდა იურისტთა ასოციაცია, საერთაშორისო გამჭვირვალობა - საქართველო, ფონდი ღია საზოგადოება საქართველო, სამართლიანი არჩევნებისა და დემოკრატიის საერთაშორისო საზოგადოება, უფლებები საქართველო, ადამიანის უფლებათა ცენტრი და ინფორმაციის თავისუფლების განვითარების ინსტიტუტი. სრულად... წყარო: coalition.ge

თბილისი. საერთაშორისო გამჭვირვალობა - საქართველოს ინფორმაციით, საქართველოს პარლამენტი დაჩქარებული წესით განიხილავს საკანონმდებლო ინიციატივას „ადგილობრივი თვითმმართველობის კოდექსში“ ცვლილებების შეტანის თაობაზე, რომლის თანახმადაც საკრებულოებში თანამდებობის პირთა რაოდენობა იზრდება. „გაუგებარია, თანამდებობის პირთა რაოდენობის გაზრდა როგორ გააუმჯობესებს და გახდის უფრო ეფექტურს საკრებულოს საქმიანობას, როგორც ეს კანონპროექტის განმარტებით ბარათშია მითითებული. საკრებულოს თავმჯდომარის მოადგილეთა რაოდენობის გაზრდა, პირველ რიგში, გაზრდის საბიუჯეტო დანახარჯებს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. სამოქალაქო საზოგადოების ორგანიზაციების ნაწილი ეხმაურება მმართველი პარტია „ქართული ოცნების” თავმჯდომარის განცხადებას, რომელიც ორგანიზაციების აზრით, ცალსახად ემსახურება საქართველოს დასავლელი პარტნიორებისა და მეგობრების დისკრედიტაციას. „საქართველოს მოსახლეობის ურყევი ნება იყო და არის ევროპულ და ევროატლანტიკურ სტრუქტურებში ჩვენი ქვეყნის ინტეგრაცია. ვფიქრობთ, საქართველოს ხელისუფლება მსგავსი ქმედებებით და განცხადებებით სულ უფრო გვაშორებს ჩვენს ისტორიულ არჩევანს“, ნათქვამია ერთობლივ განცხადებაში. სრულად... წყარო: idfi.ge

თბილისი. ღია საზოგადოების ფონდის ფინანსური მხარდაჭერით, მარიამ ნატროშვილმა შეაგროვა უსახლკაროდ დარჩენილი ადამიანების ზეპირი ისტორიები და წიგნად გამოსცა. „საქართველოში თავზე ჭერიდან უსახლკარობამდე ერთი ნაბიჯი, ერთი ამბავია. აქ თავმოყრილი ამბების გმირების ნაწილს ერთ დროს სახლი ჰქონდათ, დღეს კი თავშესაფარში ცხოვრობენ. ეს ამბები იქ შევაგროვეთ. ქალაქის ნაპირებზე გაფანტული თავშესაფრები ბევრ ერთმანეთისგან განსხვავებულ და თან ერთნაირ ამბავს იტევს“. წიგნი... წყარო: ღია საზოგადოების ფონდი გვერდი სოციალურ ქსელში

კახეთი. 13-14 ნოემბერს, სოლიდარობის პლატფორმა პანკისს ეწვია. „ღონისძიების ფარგლებში მიმდინარე დისკუსიები სოლიდარობის პლატფორმის მომავალ გეგმებს, საქმიანობას და ახალი წევრების მიღების საკითხს ეხებოდა“. სრულად... წყარო: socialjustice.org.ge

კახეთი. სოლიდარობის პლატფორმის წევრები ყვარლის მუნიციპალიტეტის სოფელ ზინობიანში იმყოფებოდნენ, სადაც საქართველოს უდიური თემი ცხოვრობს. „უდიები კავკასიის ალბანელების შთამომავლები არიან და მრავალსაუკუნოვან ისტორიას და კულტურას ატარებენ. საქართველოს უდიური თემი ზინობიანში 1920-იანი წლებიდან ცხოვრობს.  მოსახლეობის თქმით, სოფელში ბაზისური ინფრასტრუქტურა სუსტად არის განვითარებული. სოფელში მოშლილია სასმელი წყლის სისტემა და მოსახლეობას მხოლოდ ტექნიკური წყალი და ისიც გრაფიკით მიეწოდება. პრობლემურია სოფლის შიდა გზებიც. სოფლის საძოვრები და ზინობიანის ტბის მიმდებარე ტერიტორია გასხვისებულია კერძო პირზე, რაც სოფლის მეურნეობაში ჩართულ ადგილობრივებს დიდ სირთულეებს უქმნის“.  სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდის ორგანიზებით, ორდღიანი სამუშაო შეხვედრა გაიმართა შეზღუდული შესაძლებლობის შეფასების და სტატუსის მინიჭების სისტემის ტრანსფორმაციასთან დაკავშირებით. „შეხვედრის მიზანი იყო სისტემის გაძლიერებაში ჩართული სამთავრობო სტრუქტურებისთვის ინფორმაციის მიწოდება, არსებული სიტუაციის, მიღწევებისა და სამომავლო გეგმების განხილვა“.  სრულად... წყარო: ორგანიზაციის გვერდი სოციალურ ქსელში

თბილისი. CENN, ევროკავშირის მხარდაჭერითა და არასამთავრობო ორგანიზაცია Green Lane-თან პარტნიორობით, ნოემბრის თვეში არსებული სამეწარმეო დღეების აღნიშვნასთან დაკავშირებით, 24 ნოემბერს უმასპინძლებს რეგიონულ შეხვედრას თემაზე - სოციალური გავლენის გაზომვის მნიშვნელობა და მეთოდოლოგია.  რეგისტრაცია... სრულად... წყარო: ორგანიზაციის გვერდი სოციალურ ქსელში

2021 წლის 11 ნოემბერს, სოციალური მეწარმეობის საერთაშორისო დღეს, ონლაინ ფორმატში გაიმართა მულტიაქტორული შეხვედრა „სოციალური მეწარმეობის საარსებო გარემო საქართველოში - არსებული მდგომარეობა და პერსპექტივები“...  შეხვედრა ორგანიზებული იყო სამოქალაქო საზოგადოების ინსტიტუტის (CSI) მიერ, პარტნიორ ორგანიზაციებთან და საქართველოს პარლამენტის საგარეო ურთიერთობათა კომიტეტის თავმჯდომარის მოადგილე, მარიამ ლაშხთან თანამშრომლობით. ღონისძიების ძირითადი მიზანი იყო სოციალური მეწარმეობის ხელსაყრელი საარსებო გარემოს ხელშეწყობისთვის, სფეროს აქტორებს შორის თანამშრომლობის პლატფორმის ჩამოყალიბება. ამ საკითხებზე მსჯელობისთვის შეხვედრაზე საჯარო, სამოქალაქო და კერძო სექტორების 50-მდე წარმომადგენელი იყო მიწვეული. სრულად... პროექტს „სოციალური მეწარმეობის განვითარება მდგრადი და ინკლუზიური საზოგადოებისთვის“ ახორციელებს საქართველოს სტრატეგიული კვლევებისა და განვითარების ცენტრი (CSRDG) ევროკავშირისა და „პური მსოფლიოსთვის“ მხარდაჭერით. პროექტის პარტნიორები არიან: სოციალურ საწარმოთა ალიანსი (SEA), სამოქალაქო საზოგადოების ინსტიტუტი (CSI), საქართველოს სამოქალაქო განვითარების ასოციაცია (GCDA), საქართველოს დემოკრატიული განვითარების კავშირი (DDUG), ევროპული ვენჩურული ფილანტროპიის ასოციაცია (EVPA) და სსიპ ახალგაზრდობის სააგენტო.

თბილისი. სოციალური სამართლიანობის ცენტრი ეხმიანება ჭყონდიდის ეპარქიაში ბოლო დღეებში მიმდინარე მოვლენებს და შინაგან საქმეთა სამინისტროს კანონის უზენაესობისა და სოციალური მშვიდობის განუხრელი დაცვისკენ მოუწოდებს. „პროცესებზე ჩვენმა დაკვირვებამ აჩვენა, რომ განკვეთილი სასულიერო პირები სალხინოს მონასტერში მათი საცხოვრებელი სივრცეებიდან საპატრიარქომ, ძალადობრივი ჯგუფების გამოყენებით, სათანადო პროცედურების გარეშე გამოასახლა და ამ პროცესში პოლიციამ დემონსტრაციულად უგულებელყო კანონისა და უსაფრთხოების დაცვის მაღალი ინტერესები. პოლიციამ ნაცვლად იმისა, რომ გამოსახლების პროცესის კანონიერება შეემოწმებინა და იძულების ქვეშ მყოფი სასულიერო პირების უსაფრთხოება და იურიდიული ინტერესები დაეცვა, მათი ნაწილი თვითნებურად დააკავა და რამდენიმე საათის განმავლობაში ამის განმარტებებიც კი არ მისცა“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. ბიოლის ფონდი აქვეყნებს თათა ვერულაშვილის სტატიას: მარტოხელა დედობის საფასური. „მარტოხელა დედებისთვის მთავარი საკითხი უსახსრობა და ფინანსური სირთულეებია. ეს დაკავშირებულია დაბალ შემოსავალთან, შრომის გაუზიარებლობასთან - არ არსებობს ის, ვინც ბავშვს დაიტოვებს და დედისთვის თავისუფალ დროს გამოათავისუფლებს. მუდმივი დაკავებულობის პირობებში მათ არ აქვთ გადამზადების ან კვალიფიკაციის ამაღლების შესაძლებლობა. ამასთან, როგორც ზემოთ ვნახეთ, შრომის ბაზარი მარტოხელა დედის საჭიროებაზე მორგებული არ არის - ნახევარ განაკვეთზე დასაქმების შესაძლებლობა მათ არ აქვთ, ბაღის და სკოლის განრიგის შეთავსება შრომის ბაზართან შეუძლებელია - ჩატარებული ინტერვიუების საფუძველზე, ქალებისთვის მომავალი მხოლოდ ემიგრაციაზე საუბრის დროსაა იმედიანი. საქართველოში მათი მდგომარეობა ყოველდღიურად უარესდება, ყოველ მომდევნო დღეს მეტია საჭიროება და ნაკლებია შესაძლებლობა“. სრულად... წყარო: feminism-boell.org

თბილისი. საქართველოს სტრატეგიისა და განვითარების ცენტრის (GCSD) ორგანიზებით, ძალადობრივ ექსტრემიზმთან გამკლავების და მისი პრევენციის შესახებ, სიმულაციური სწავლება ჩატარდა.  „ტრენინგის შედეგად, მონაწილეებმა უფრო ნათლად დაინახეს თავიანთი სამსახურების როლი ძალადობრივი ექსტრემიზმის პრევენციისა და მასთან გამკლავების პროცესში. სწავლება ჩატარდა პროგრამის „ძალადობრივი ექსტრემიზმისა და რადიკალიზაციის პრევენციისთვის საქართველოს შესაძლებლობების გაძლიერება” ფარგლებში, რომელიც GCSD-ის მიერ, საქართველოში ნორვეგიის სამეფოს საელჩოს ფინანსური მხარდაჭერით ხორციელდება”. სრულად... წყარო: www.gcsd.org.ge

თბილისი. ღია საზოგადოების ფონდი აქვეყნებს ანანო ცინცაბაძის ბლოგპოსტს: საჯილდაო ლისის ტბა. „თუ ლისის ტბის ტყიან ნაწილზე ასულხართ და ფერდობზე შემდგარს მთელი სივრცისთვის ერთიანად მოგივლიათ თვალი, უსათუოდ ჩემსავით გაიფიქრებდით, „რა კარგი იქნებოდა აქ ტყე-პარკის გაშენება“-ო. ხომ ასეა?- ყველასთვის არა! ლისი, ძველი დროიდანვე, სატყეო, სასფლო-სამეურნეო და სარეკრეაციო დანიშნულებით გამოიყენებოდა, მაგრამ დღეს ეს მიდგომა რადიკალურადაა შეცვლილი. განსაკუთრებით ბოლო წლების განმავლობაში ლისი კორპუსების, ინდივიდუალური საცხოვრებელი სახლების, ოფისებისა და კერძო სკოლების სამშენებლო არენად იქცა. ამას წინ ტერიტორიის დანაწევრებისა და გასხვისების პროცესი უძღოდა“. სრულად... წყარო: osgf.ge

თბილისი. ფრიდრიხ ებერტის ფონდი აქვეყნებს კვლევას: საქართველოს პოლიტიკური ლანდშაფტი: მრავალფეროვნება, პოზიციების თანაკვეთა და თავისუფალი სივრცეები. კვლევის მიგნებები იხილეთ ბმულზე... „კვლევის მიხედვით, უმრავლესობას მკვეთრად გამოხატული სიმპათიები აქვს დასავლეთისა და ევროკავშირისადმი, მხარს უჭერს მინიმალური ხელფასის კანონით განსაზღვრას, დაგროვებითი პენსიის სქემაში ნებაყოფლობით ჩართვას და გადასახადის გაზრდას ბიზნესებისთვის, რომლებიც გარემოს აბინძურებენ“. წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი განცხადებას ავრცელებს: სუს-ის განცხადება პოლიტიკური მუქარის განცდას აჩენს. „სახელმწიფო უსაფრთხოების სამსახურის 3 ნოემბრის განცხადება, რომლითაც უწყებამ დააანონსა გამოძიება სახელმწიფო ხელისუფლების დასამხობად შეთქმულების ფაქტზე, წარმოადგენს მცდელობას, ქვეყანაში მიმდინარე პოლიტიკური პროცესები არსებითად უსაფრთხოების ლოგიკას დაუქვემდებაროს და არსებული პოლიტიკური უკმაყოფილების და მათი გამოხატვის კრიმინალიზება დაუშვას. განცხადება ამავდროულად აძლიერებს ეჭვებს უსაფრთხოების სისტემის პოლიტიკური და პარტიული ინტერესით ინსტრუმენტალიზების თაობაზე“, ნათქვამია განცხადებაში. სრულად... წყარო: socialjustice.org.ge

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ნინო ჩანადირის ბლოგპოსტს: ევროკავშირი-პოლონეთის გაუარესებული ურთიერთობები და მისი მნიშვნელობა აღმოსავლეთ პარტნიორობის პროგრამისთვის. „პოლონეთსა და ევროკავშირს შორის ურთიერთობები მას შემდეგ დაიძაბა, რაც 7 ოქტომბერს პოლონეთის საკონსტიტუციო სასამართლომ დაადგინა, რომ პოლონეთის კანონი უპირატესია ევროკავშირის კანონზე, თუ ეს უკანასკნელი წინააღმდეგობაში მოდის პოლონეთის კონსტიტუციასთან. სასამართლოს გადაწყვეტილება არსებითად ნიშნავს ევროკავშირის ძირეული პრინციპის - მისი კანონის პრიმატის - უარყოფას. ეს მოცემულობა კი უდავოდ ქმნის კრიზისს ევროკავშირისთვის“. სრულად... წყარო: www.gfsis.org

თბილისი. სოციალური სამართლიანობის ცენტრი აქვეყნებს ვიდეოს, რომელშიც სოციალური პროგრამის დირექტორი, თათული ჭუბაბრია, აანალიზებს, თუ რატომ ცხოვრობენ ფსიქოსოციალური საჭიროების მქონე ადამიანები, მასიურად, დახურული ინსტიტუციების სტაციონარულ სერვისებში და რატომ იხურება 10 წლის წინ დეინსტიტუციონალიზაციის მიზნით შექმნილი სტაციონარული სერვისები მულტიპროფილურ კლინიკებში. წყარო: socialjustice.org.ge