თბილისი. სოციალური სამართიანობის ცენტრი (ყოფილი EMC) მოუწოდებს ხელისუფლებას გამყოფი ხაზის გარშემო მდებარე სოფლების უსაფრთხოების დაცვა და მათი სოციალური და ეკონომიკური მხარდაჭერა მის გადაუდებელ პრიორიტეტებში მოაქციოს და ომით დაზარალებული სოფლების მაცხოვრებლების ზრუნვაზე, კეთილდღეობაზე და სასიცოცხლო სოციალური ინფრასტრუქტურის განვითარებაზე აქტიური ძალისხმევა მიმართოს. სრულად... წყარო: socialjustice.org.ge

აჭარა. 26 ივლისს, ბათუმში, გაეროს ქალთა ორგანიზაციის მხარდაჭერით, მეწარმე ქალებმა აუდიტორიას საკუთარი გამოცდილება Fuckup Nights-ის პოპულარული ფორმატით გაუზიარეს - როგორია მარცხი, რომელიც სინამდვილეში წარმატებისკენ ნაბიჯის გადადგმასა და მნიშვნელოვან მოტივაციას ნიშნავს. „ღონისძიებაში, რომელიც სტარტაპ ბიუროს მიერ იყო ორგანიზებული, 4 მეწარმე ქალი მონაწილეობდა. ისტორიებით, რომლებიც მათ დამსწრეებს უამბეს, კიდევ ერთხელ წარმოაჩინეს საქმიანობისას გადალახული წინაღობები და შეეცადნენ, ამ მაგალითებით მოტივაცია სხვა ქალებისთვისაც მიეცათ. სპიკერების გამოსვლების შემდეგ კი პანელური დისკუსია გაიმართა, რომლის დროსაც მეწარმე ქალებმა აუდიტორიის შეკითხვებსაც უპასუხეს“. სრულად... წყარო: georgia.unwomen.org

შიდა ქართლი. სოციალური სამართლიანობის ცენტრი აქვეყნებს ვიდეოპოდკასტს ომის მოგონებებზე. ომგამოვლილი ქალი, გორის სოფელ ზარდიაანთკარიდან 2008 წლის აგვისტოს ომის მძიმე დღეებს იხსენებს. „მან სახელის გამხელისგან თავი შეიკავა, თუმცა მისი მონათხრობი კარგად აღწერს ომის უმძიმეს დღეებს, წუხილებს დაკარგულ ადამიანებზე; დღემდე დატოვებულ ტრავმებსა და შიშებს; ოსებთან მეგობრობის აღდგენის ისტორიებს და ბოლოს, ხელისუფლების პასუხს, რომელიც სრულიად უგულებელყოფს ამ ადამიანების არსებობასაც კი“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ორგანიზაციის მკვლევრის, დავით ბატაშვილის ბლოგპოსტს: რატომ არის აუცილებელი ვიცოდეთ რომელ რიცხვში დაიწყო 2008 წლის ომი. „საქართველოში არსებობს ერთგვარი დაბნეულობა 2008 წლის ომის დაწყების თარიღთან დაკავშირებით. ადამიანები ომის დაწყების დღედ ხან 7, ხან 8 აგვისტოს ახსენებენ, თითქოს ამ ორ თარიღს შორის განსხვავება არ იყოს. სინამდვილეში, მათ შორის არის საკვანძო, პრინციპული განსხვავება. 7 აგვისტო არის დღე, როცა რუსული ჯარი რეალურად შემოიჭრა საქართველოში და ამით დაიწყო ომი საქართველოს წინააღმდეგ. 8 აგვისტო კი არის თარიღი, რომელსაც მოსკოვი იტყუება - თითქოს სამხედრო ოპერაცია საქართველოს წინააღმდეგ მან სწორედ ამ დღეს დაიწყო და არა - მანამდე. ამ ტყუილს აქვს ძალიან მნიშვნელოვანი პოლიტიკური მიზანი. მისი მეშვეობით რუსეთი აცხადებს, თითქოს მისი თავდასხმა საქართველოზე დაიწყო მხოლოდ მას მერე, რაც თბილისმა წამოიწყო სამხედრო ოპერაცია ცხინვალის რეგიონში. ქართველთა მხრიდან რუსეთის ამ ტყუილის მხარდაჭერა ომის დაწყების თარიღად 8 აგვისტოს ხსენებით არის გაუგონარი სისულელე და დაუდევრობა. ისტორიასთან და ფაქტებთან ზერელე დამოკიდებულება, რომელიც ხშირად გვახასიათებს, ამ შემთხვევაში არის პირდაპირი მავნებლობა საკუთარი ქვეყნის ინტერესების წინააღმდეგ და რუსული დეზინფორმაციის მხარდაჭერა“, ნათქვამია ორგანიზაციის ვებგვერდზე. სრულად... წყარო: www.gfsis.org

თბილისი. 6 აგვისტოს, თბილისის მუნიციპალიტეტის საკუთრებაში არსებული კომპანია „თბილსერვის ჯგუფის” დასაქმებულთა აქცია გაიმართა. „პროტესტის მონაწილეთა განცხადებაში შრომის უფლებების არაერთი დარღვევა იკვეთება. სოციალური სამართლიანობის ცენტრი სოლიდარობას უცხადებს გაფიცულ მშრომელებს და მოუწოდებს შრომის ინსპექციის სამსახურს საკუთარი ინიციატივით დაუყოვნებლივ შეამოწმოს „თბილსერვისში” დასაქმებულების სამუშაო პირობები, „თბილსერვის ჯგუფს” და ქალაქ თბილისის მუნიციპალიტეტის მერიას კი - შეისწავლოს პროტესტის მონაწილეთა წუხილები და დროულად გადადგას ნაბიჯები დასაქმებულების სამართლიანი მოთხოვნების დასაკმაყოფილებლად“. სრულად... წყარო: socialjustice.org.ge

თბილისი. სოციალური სამართლიანობის ცენტრის მიერ გამოქვეყნებულ ვიდეოში, პაატა ზაქარეიშვილი, კონფლიქტოლოგი, ისტორიულად მიმოიხილავს, რა გზა გაიარა საქართველომ ბოლო ათწლეულების განმავლობაში და რამ მიგვიყვანა ეთნიკური და რელიგიური სენტიმენტების გაძლიერებამდე? ორგანიზაციის ინფორმაციით, პაატა ზაქარეიშვილი, სხვა ექსპერტებთან და საზოგადო მოღვაწეებთან ერთად, მონაწილეობდა ბუკნარსა და დმანისში გამოვლენილი კონფლიქტების შესწავლის პროცესში.                                                        წყარო: socialjustice.org.ge

თბილისი. ფაქტ-მეტრის ცნობით, სოციალურ ქსელში ამირან გამყრელიძის ყალბი ციტატები ვრცელდება, კერძოდ, „დაიცავით დისტანცია ცოლ ქმარმა მესენჯერით ეკონტაქტეთ ერთმანეთს!“ - ამირან გამყრელიძე. პოსტებს Facebook-ზე მომხმარებლების ათასობით რეაქცია და ასობით გაზიარება აქვს. გადამოწმებული ინფორმაციის თანახმად, „საჯაროდ ხელმისაწვდომ/ღია წყაროებში დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორის მსგავსი ციტატა, ან კომენტარი - ცოლ-ქმრის მიერ დისტანციის დაცვის აუცილებლობის შესახებ, არ იძებნება. დგინდება, რომ ამირან გამყრელიძეს ზემოთ ხსენებული განცხადება ცოლ-ქმარს შორის დისტანციის დაცვისა და მესენჯერით კონტაქტის შესახებ, არ გაუკეთებია“. სრულად... წყარო: factcheck.ge

თბილისი. სამოქალაქო საზოგადოების ორგანიზაციები მიიჩნევენ, რომ ხელისუფლება სახელმწიფო უსაფრთხოების სამსახურს ტოტალური კონტროლის მექანიზმად იყენებს. „სახელმწიფო უსაფრთხოების სამსახურის საქმიანობის შესახებ, მთავარი არხის ეთერში გასული მასალა კიდევ ერთხელ მიუთითებს ქვეყანაში არსებულ მასობრივი კონტროლის და ადამიანის უფლებების შელახვის უმძიმეს პრაქტიკაზე. მყიფე დემოკრატიის, მძიმე პოლიტიკური კრიზისების ფონზე, სახელმწიფო უსაფრთოხების სამსახური ჩამოყალიბდა ქვეყანაში მკაცრად პოლიტიზირებულ, გავლენიანი პოლიტიკური ფიგურების ინტერესების სადარაჯოზე მყოფ უწყებად, რომელიც კონკრეტული ჯგუფის პოლიტიკური ძალაუფლების შენარჩუნებას, თვალთვალით, დაშინების და შანტაჟის ინსტრუმენტით ცდილობს“, ნათქვამია ერთობლივ განცხადებაში. სრულად... წყარო: gyla.ge

თბილისი. საზოგადოება და ბანკები აქვეყნებს გიორგი კეპულაძის ბლოგპოსტს: დისტანციური საბანკო სერვისები. ბლოგპოსტიდან გაიგებთ, თუ რა სახის დისტანციური საბანკო მომსახურებებია საქართველოში ხელმისაწვდომი და რატომ არ არის საჭირო სხვადასხვა საბანკო ოპერაციის შესასრულებლად ბანკების ფილიალებში მისვლა. სრულად... წყარო: sab.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) და საერთაშორისო გამჭვირვალობა - საქართველო, 24 ივლისს, დაუდგენელი პირების მიერ პოსტერების გაკვრას ეხმიანებიან. პოსტერებზე მიხეილ სააკაშვილი, გიგა მაქარაშვილი და გიორგი თაბაგარი არიან გამოსახულნი. „პოსტერები, თავისი შინაარსითა და ფორმით ძალადობისაკენ მოწოდებას წარმოადგენს და საფრთხეს უქმნის მასზე გამოსახული ადამიანების უსაფრთხოებასა და სიცოცხლეს“. ორგანიზაციები მოუწოდებენ: „შესაბამის სამსახურებს, შეასრულონ სახელმწიფოს პოზიტიური ვალდებულება და უზრუნველყონ ჟურნალისტებისა და სამოქალაქო აქტივისტების უსაფრთხოების ადეკვატური დაცვა; პოლიტიკურ ლიდერებს, გაემიჯნონ გავრცელებული პოსტერების ძალადობრივ შინაარს და გაავრცელონ მკაფიო გზავნილები ჟურნალისტებისა და სამოქალაქო აქტივისტების უსაფრთხოების მნიშვნელობასთან დაკავშირებით“. სრულად... წყარო: isfed.ge

თბილისი. ტერორიზმის კვლევითი ცენტრი გთავაზობთ #TRCTalks მეექვსე დისკუსიას ქართული სუბტიტრებით. დისკუსიის თემა: „ერაყსა და სირიაში, ექსტრემისტული ჯგუფების მიერ, სექტანტური დანაყოფების გამოყენება“. წყარო: ორგანიზაციის გვერდი სოციალურ ქსელში

თბილისი. 22 ივლისს, რეპრესირებულთა ხსოვნის დღესთან დაკავშირებით, ინფორმაციის თავისუფლების განვითარების ინსტიტუტმა (IDFI), საბჭოური პერიოდის პოლიტიკური რეპრესიების მსხვერპლთა ხსოვნისა და თანადგომის საზოგადოება - „მემორიალთან“ ერთად, დედაენის ბაღში გამართა გამოფენა - „საბჭოთა კავშირში რეპრესირებული ქალები“. „თარიღის ისტორია მომდინარეობს 1937 წლიდან - სწორედ ამ დღეს, დიდმა ქართველმა პოეტმა, პაოლო იაშვილმა დემონსტრაციულად მოიკლა თავი მწერალთა კავშირის შენობაში“. სრულად... წყარო: idfi.ge

საქართველოს პოლიტიკის ინსტიტუტი (GIP) აქვეყნებს ინტერვიუ პროფესორ ჯული ა. ჯორჯთან „ქართული დემოკრატია გზაჯვარედინზე: არსებული ვითარება და განვითარების პერსპექტივები“. ინტერვიუს გაუძღვა ორგანიზაციის ანალიტიკოსი ნინო სამხარაძე.  ორგანიზაციის ინფორმაციით, პროფესორმა უპასუხა შეკითხვებს საქართველოში დემოკრატიის გაუარესების, ქვეყნის წინაშე მდგომი ყველაზე კრიტიკული გამოწვევებისა და აშშ-ის ახალი ადმინისტრაციის კონტექსტში საქართველოს სამომავლო პერსპექტივების შესახებ. „ვფიქრობ, რომ საქართველოს რევოლუციები არ არის კარგი დემოკრატიისთვის. ქვეყანას სჭირდება „მოსაწყენი“ ინსტიტუციური პოლიტიკა. თქვენ არ გჭირდებათ მეტი პარტიები საქართველოში, არამედ გჭირდებათ უკეთესი პარტიები“. სრულად... წყარო: gip.ge

ქვემო ქართლი. რამდენიმე კვირის წინ სოციალური სამართლიანობის ცენტრის (ყოფილი EMC) წარმომადგენლები, პლატფორმა სალამთან ერთად, ბოლნისის მუნიციპალიტეტის სოფელ სავანეთში (ყოფილი იმირასანი) იმყოფებოდნენ.  ადგილობრივების თქმით, მათ წლებია აწუხებთ მძიმე სუნი, ბუზები, რომელიც სოფელში მდებარე ქათმების ფერმას უკავშირდება. სოფლის მაცხოვრებლები აღნიშნავენ, რომ ხშირია სხვადასხვა ინფექციის გავრცელების, ინტოქსიკაციის შემთხვევებიც. ორგანიზაციის და პლატფორმის წარმომადგენლებმა ფერმის დათვალიერების შემდეგ ღია სივრცეში დაყრილი სკინტლი და სხვა ნარჩენები აღმოაჩინეს. „ადგილობრივმა მოსახლეობამ გაგვიზიარა, რომ ფეკალიების მასების გატანა ამ ტერიტორიებიდან იშვიათად ხდება, კომპანია მათ აგროვებს, შემდგომ ასხვისებს და სწორედ ეს პრაქტიკაა მათი მძიმე რეალობის მიზეზი“. სოციალური სამართლიანობის ცენტრის მიმართვის შედეგად, სურსათის ეროვნულმა სააგენტომ და გარემოსდაცვითი ზედამხედველობის დეპარტამენტმა ინსპექტირების შემდეგ ფერმას დაავალა ტერიტორიის გასუფთავება, სადეზინფექციო სამუშაოების ჩატარება, ასევე, კომპანიას „სავანეთი 99“ აეკრძალა ნარჩენების ინსინერაცია (დაწვა, განადგურება). სრულად... წყარო: socialjustice.org.ge

თბილისი. სოციალური სამართლიანობის ცენტრის ინფორმაციით, ყიფშიძის ქუჩაზე 25, 19 და 16-სართულიანი სამი ახალი საცხოვრებელი კორპუსის მშენებლობა იგეგმება. ორგანიზაცია აღნიშნული, დაუსრულებელი მშენებლობების განახლებას ეხმაურება. „პროექტის მასალების შესწავლიდან ირკვევა, რომ მერიას სამშენებლო ნებართვის გაცემისას, არ შეუსწავლია სადაო პროექტის გავლენა მიმდებარე ნაგებობებსა და საჯარო სივრცეებზე, სატრანსპორტო გზებსა და სხვა სოციალურ ინფრასტრუქტურაზე. დაუშვებელია, ქალაქის მერიის უსამართლო მიდგომის, კანონსაწინააღმდეგო ქმედებებითა და გადაწყვეტილების მიღების პროცესიდან მოსახლეობის გამორიცხვით ზიანი ადგებოდეს ერთი მხრივ დაუსრულებელი მშენებლობების განახლების გეგმას და მეორე მხრივ, თბილისის უბნებში მდგრადი განვითარების შესაძლებლობას“. სრულად... წყარო: socialjustice.org.ge

თბილისი. „მითების დეტექტორის“ ბლოგპოსტის თანახმად, „კოგარაში ურიე” და Liberaluri seni ჟურნალისტების ციტატებს აყალბებენ. 10 ივლისს, მაია მამულაშვილს ფეისბუქ გვერდმა Liberaluri seni შემდეგი ციტატა მიაწერა: „„პუტინისტური დაჯგუფებების“ მიერ გამოშვებულმა ჰომოფობებმა ბავშვები დაკბინეს“. 12 ივლისს, ამავე გვერდზე, ვახო სანაიას ციტატა გამოჩნდა, სადაც ჟურნალისტი თითქოს ამბობს, რომ „პანჩური ამოარტყეს და თუ უეცრად გარდაიცვლება ეს ხელისუფლების დაგეგმილი იქნება“. 14 ივლისს, ფეისბუქ მომხმარებელმა „კოგარაში ურიე“ ბაია პატარაიას მოთხოვნა გამოქვეყნა, რომ თითქოს უფლებადამცველი სილვესტერ სტალონესა და შვარცენეგერის მონაწილებით გადაღებული ფილმების ჩვენებას კრძალავს, იმ მიზეზით, რომ ეს ფილმები პოტენციურ მოძალადეებს აყალიბებს. მითების დეტექტორის კვლევით, „Liberastuli Seni-სა და კოგარაში ურიეს გავრცელებული ციტატები ყალბია, რეალურად ჟურნალისტებსა და უფლებადამცველს მსგავსი შინაარსის განცხადებები არ გაუკეთებიათ. არცერთ ღია წყაროში არ იძებნება ინფორმაცია იმის შესახებ, რომ მაია მამულაშვილმა, ვახო სანაიამ ან ბაია პატარაიამ მსგავსი კომენტარი გააკეთეს“. სრულად... წყარო: mythdetector.ge

ქვემო ქართლი. სოციალური სამართლიანობის ცენტრი (ყოფილი EMC) ეხმიანება სარწყავი წყლის რესურსის გარეშე დარჩენილი სოფლების - სავანეთის, ჭაპალასა და სამტრედოს (ბოლნისის მუნიციპალიტეტი) მოსახლეობის რამდენიმე დღიან პროტესტს და გარემოს დაცვისა და სოფლის მეურნეობის სამინისტროს ადგილობრივი გლეხების მწვავე სოციალური საჭიროებების დროული გადაწყვეტისკენ მოუწოდებს. სრულად... წყარო: socialjustice.org.ge

თბილისი. განათლების განვითარების და დასაქმების ცენტრმა (EDEC) განახლებული ვებ–გვერდი www.edec.ge აამოქმედა. საიტზე ინფორმაცია ხელმისაწვდომია ქართულ და ინგლისურ ენებზე. მასზე წარმოდგენილი მასალა ასევე ხელმისაწვდომია მცირე მხედველთათვის.                                                                               წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ფონდის უფროსი მკვლევრის კახა გოგოლაშვილის ბლოგპოსტს: რა სიმბოლოა ევროკავშირის დროშაზე და რატომ არ უნდა ჩამოხიოს და დაწვას ის ჭეშმარიტმა ქრისტიანმა. „ამას ვწერ, რათა მკითხველი დავარწმუნო იმ მსგავსებაში, რაც სრულიად ნათელია და შეუძლებელია იმის არდანახვა, რომ ევროპის საბჭოსა და ევროკავშირის დროშა წმინდა მარიამისა და, ესე იგი, ქრისტიანობის, ქრისტიანული ფასეულობების მქონე რეგიონისა და სამყაროს სიმბოლოა. ამ ისტორიის მოყოლა იმიტომ გადავწყვიტე, რომ 2021 წლის 5 ივლისს საქართველოში, დემოკრატიის განვითარების გზაზე მდგარ უძველესი ქრისტიანობის ქვეყანაში, გარკვეულმა ჯგუფებმა, რომლებიც თავს ქრისტიანობისა და მართლმადიდებლობის დამცველებად წარმოგვიჩენენ, ეს ქრისტიანული სიმბოლო პედესტალიდან ჩამოგლიჯეს, შეურაცხყვეს და დაწვეს“. სრულად... წყარო: www.gfsis.org

თბილისი. მითების დეტექტორი ბლოგერ Natia Colussi-ს მიერ გავრცელებულ მორიგ დეზინფორმაციაზე ბლოგპოსტს აქვეყნებს.  10 ივლისს, Natia Colussi (ნათია ქოლუსი) გამოეხმაურა ორგანიზაცია „პარტნიორობა ადამიანის უფლებებისთვის“ (PHR) მიერ სასწავლო გეგმაში ინკლუზიური სექსუალური და რეპროდუქციული ჯანმრთელობის საკითხების შეტანის შესახებ სარჩელს. Colussi-ს მტკიცებით, სრჯ საკითხების სწავლების შეტანა სკოლებში თაობების განადგურებას უდრის, ხოლო სიტყვა „ინკლუზიური“ სქესის არ არსებობის აღმნიშვნელი ტერმინია. „ნათია ქოლუსის მიერ გავრცელებული ინფორმაცია, თითქოს ინკლუზიური სექსუალური და რეპროდუქციული ჯანმრთელობის საკითხების სასწავლო პროცესში შეტანა მათთვის არაბინარული იდენტობის შესახებ ინფორმაციის მიწოდებას და იმის სწავლებას გულისხმობს, თითქოს სქესი არ არსებობს, მცდარია. PHR-ის სარჩელი ბავშვებზე სექსუალური ძალადობის პრევენციას მიემართება, ხოლო ინკლუზიურობა ნიშნავს იმას, რომ ყველა ადამიანს მიუწვდებოდეს ხელი განათლების უფლებაზე“. სრულად... წყარო: mythdetector.ge

თბილისი. „მითების დეტექტორის“ ინფორმაციით, ფეისბუქ მომხმარებელი Natia Colussi Vision 2050-ის და პარიზის შეთანხმების შესახებ შეთქმულების თეორიას ავრცელებს. Natia Colussi - Vision 2050 მეორედ მოსვლის შემადგენელ ნაწილად მიიჩნევს, ხოლო კლიმატის ცვლილებასთან დაკავშირებულ პარიზის შეთანხმებას მსოფლიო ბატონობის დამყარების მთავარ დოკუმენტად განიხილავს.  „რეალურად Vision 2050 კერძო ბიზნესების განვითარების გეგმაა, ხოლო პარიზის შეთანხმება დოკუმენტია, რომლის მთავარი მიზანი დედამიწაზე „სათბურის ეფექტის” შემცირებაა“, ნათქვამია მარიამ დანგაძის ბლოგპოსტში. სრულად... წყარო: mythdetector.ge

საფრანგეთის ელჩის, ბ-ნი დიეგო კოლასის განცხადება: "გულისტკივილით შევიტყვე ჟურნალისტ ლექსო ლაშქარავას გარდაცვალება, რომელიც მძიმედ დაშავდა ორშაბათს თავისი მოვალეობის შესრულებისას, ინფორმირება მოეხდინა 5 ივლისის ჰომოფობიური ძალადობის დროს. ვუსამძიმრებ მის ოჯახსა და კოლეგებს. თავისუფლება შეკრებასა და პრესას, ბრძოლა დისკრიმინაციისა და სიძულვილის წინააღმდეგ, არა ძალადობას". წყარო: საფრანგეთის საელჩო საქართველოში