სამცხე-ჯავახეთი. სოციალური სამართლიანობის ცენტრის ინფორმაციით, ჯავახეთში, ისევე როგორც სხვა მაღალმთიან რეგიონებში, 6 ოქტომბერს თოვლი მოვიდა. „ნინოწმინდის და ახალქალაქის მაცხოვრებლების დიდი ნაწილი მკაცრ ზამთარს კვლავ გაზის გარეშე, მძიმე პირობებში ხვდება. ნინოწმინდის 31 სოფლიდან 8 სოფელი, ახალქალაქის 64 სოფლიდან კი 22 სოფელი არ არის გაზიფიცირებული. ამ ბაზისური ინფრასტრუქტურის გარეშე დარჩენილი ოჯახები გასათბობად თხევადი გაზის ბალონებს, უფრო ხშირად კი ე.წ. “ჯავახურ ყალაღს“ (ოთხკუთხედად დაჭრილი გამხმარი ნაკელი) იყენებენ. ეს გამოცდილება კიდევ ერთხელ აჩვენებს ცენტრსა და პერიფერიას შორის ეკონომიკურ და სოციალურ უთანასწორობას და მაღალმთიან რეგიონებში მცხოვრები ადამიანების მძიმე ყოფას, რომელიც წლიდან წლამდე არ იცვლება და არ მსუბუქდება“. სრულად... წყარო: სოციალური სამართლიანობის ცენტრის გვერდი სოციალურ ქსელში

სახალხო დამცველის მოადგილემ ეკატერინე სხილაძემ მონაწილეობა მიიღო გაეროს მსოფლიო მონაცემთა ფორუმში. „ფორუმი მიზნად ისახავდა მონაცემების შეგროვებაზე ცნობიერების ამაღლებას და გენდერულად სეგრეგირებული მონაცემების მნიშვნელობაზე ხაზგასმას. საქართველოს სახალხო დამცველის მოადგილემ ეკატერინე სხილაძემ თავის გამოსვლაში ხაზი გაუსვა გენდერული სტატისტიკის წარმოების მნიშვნელობას და ისაუბრა საქართველოს მაგალითზე სექსუალური შევიწროების კანონმდებლობისა და ფემიციდის მონიტორინგის მექანიზმის დანერგვის მიმართულებით, რამაც ხელი შეუწყო არსებული პრაქტიკების დახვეწას და მონაცემების შეგროვება ბევრად გააუმჯობესა”.  სრულად... წყარო: ომბუდსმენის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, ხმაური, გადატვირთულობა, სერვისებსა და ინფრასტრუქტურასთან შეზღუდული წვდომა - ეს იმ გამოწვევების არასრული ჩამონათვალია, რომელსაც ორხევის სოციალურ საცხოვრისში მცხოვრები ადამიანები ყოველდღიურად აწყდებიან. „საცხოვრისი განსაკუთრებით არასათანადოა შშმ პირებისა და ბავშვებისთვის. თბილისის მერიას დღემდე არ აქვს უსახლკარობასთან ბრძოლის პოლიტიკა და საბინაო ფონდი, რაც ადამიანებს ღირსეული საცხოვრისით უზრუნველყოფდა“. დამატებითი ინფორმაციისთვის, იხ. სოციალური სამართლიანობის ცენტრის დოკუმენტი - “სად არის პრობლემები საცხოვრისის პოლიტიკაში”.  ღია საზოგადოების ფონდის (OSGF) კვლევა - “ცხოვრება სოციალურ საცხოვრისში - მიზეზები, საჭიროებები.  სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტის (IDFI) თანახმად, საქართველო იყო ერთ-ერთი პირველი, ვინც შეუერთდა ღია მმართველობის პარტნიორობას 2011 წელს და ინიციატივის განხორციელების დასაწყისშივე განსაკუთრებული აქტიურობით გამოირჩეოდა. ორგანიზაციის შეფასებით, „უკანასკნელი რამდენიმე წლის განმავლობაში საქართველოს მთავრობის მონაწილეობა ღია მმართველობის პარტნიორობაში შესუსტდა და ამ დროისთვის შეიძლება ითქვას, რომ თითქმის სრულებით გაჩერდა. უმოქმედობის შედეგად - გამოუსწორებლად დაზარალდა საქართველოს იმიჯი, როგორც ღია მმართველობის პარტნიორობის ერთ-ერთი ლიდერი სახელმწიფოსი სამოქმედო გეგმის შემუშავებისა და ვალდებულებების განხორციელების მხრივ“. სრულად... წყარო: idfi.ge

თბილისი. ბიოლის ფონდის სამხრეთ კავკასიის ბიურო გთავაზობთ ნათია ქარჩილაძის კვლევით სტატიას ბავშვთა ხელოვნური კვების პრაქტიკასა და დედების გამოცდილებებზე. „სტატია პასუხობს კითხვებს, თუ რატომ ირჩევენ დედები რძის შემცვლელ ხელოვნურ ფორმულას მაშინაც კი, როცა ამის საჭიროება და სურვილი არაა. ძუძუთი კვება იმიტომაცაა კონტრავერსიული, რომ მას გააჩნია ძალიან დიდი ფასეულობა, რომელიც ოჯახის მიერ ოჯახისთვისაა წარმოებული, სხვა სიტყვებით, დედა შვილისთვის „გამოყოფს“ რძეს, რაც არ/ვერ მიჰყვება კაპიტალიზმის ლოგიკას და არ არის მისი კონტროლოს ქვეშ (თუმცა, აქაც გვხვდება ანომალიები, როცა, მაგალითად, მესამე სამყაროს ქვეყნების ქალები დასაქმებული არიან სპეციალურ დაწესებულებებში, სადაც ისინი თავიანთ რძეს მდიდარი, პირველი სამყაროს ქვეყნებისთვის ყიდიან)“. სრულად... წყარო: feminism-boell.org

თბილისი. საერთაშორისო გამჭვირვალობა - საქართველოს ინფორმაციით, ყოფილი გენერალური პროკურორი და უზენაესი სასამართლოს მოსამართლე, შალვა თადუმაძე მისი დიპლომის თაობაზე, ორგანიზაციის აღმასრულებელ დირექტორს, ეკა გიგაურს, ცილისწამებისთვის უჩივის. „თადუმაძე ცილისწამებად ეკა გიგაურის შეფასებებს მიიჩნევს, სადაც ის ეჭვქვეშ აყენებს შალვა თადუმაძის კვალიფიკაციას და მისი დიპლომის შესაბამისობას მოქმედ კანონმდებლობასთან. „საერთაშორისო გამჭვირვალობა-საქართველომ” ამ საკითხთან დაკავშირებით, საჯარო უწყებებიდან მიღებული არაერთი დოკუმენტი შეისწავლა, რამაც კონკრეტული კითხვები გააჩინა.  მიუხედავად იმისა, რომ სასამართლო სისტემა მძიმე გამოწვევების წინაშეა და მიუკერძოებელი, ობიექტური მართლმსაჯულების მოლოდინი არ გვაქვს, „საერთაშორისო გამჭვირვალობა-საქართველო“ საკუთარ ინტერესებს ყველა ინსტანციის სასამართლოში დაიცავს“. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორის ინფორმაციით, 2 ოქტომბერს ონლაინ გამოცემა „მარშალპრესმა“ გამოაქვეყნა ინფორმაცია, სათაურით „გუშინდელ დღეზე მეტად მნიშვნელოვანია მომავალი და გზა წინისკენ“ – სააკაშვილი ამერიკას აღარ აინტერესებს”. „მასალას ერთვის ამერიკის ელჩის კელი დეგნანის ფოტო, რაც ქმნის შთაბეჭდილებას, ფრაზა “სააკაშვილი ამერიკას აღარ აინტერესებს” ამერიკის ელჩს ეკუთვნის. “მარშალპრესის” სათაური მანიპულაციურია და არა კელი დეგნანის განცხადებას, არამედ ავტორის მოსაზრებას ასახავს. დეგნანის შეფასებით, სააკაშვილის საქმე ქართული მართლმსაჯულების სისტემისთვის გამოცდა იქნება“, ნათქვამია მითების დეტექტორის ბლოგპოსტში. სრულად... წყარო: mythdetector.ge

თბილისი. საქართველოს წითელი ჯვრის ინფორმაციით, საქართველოში 793 503 პენსიონერი გვყავს და აქედან 470 101 მარტოხელა ხანდაზმულია, რომელთა უმეტესობას: არ აქვს წვდომა მედიკამენტებზე; არ აქვს წვდომა ციფრულ სამყაროზე; არავინ ჰყავს დამლაპარაკებელი და მზრუნველი; წარსულზე ფიქრი უფრო მეტ სიხარულს ანიჭებს ვიდრე მომავალზე. „დღეს პირველი ოქტომბერია, ხანდაზმულთა საერთაშორისო დღე, რომელიც შეგვიძლია ყველაზე მოწყვლადი ჯგუფისთვის განსაკუთრებული გავხადოთ“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის თანახმად, მსოფლიო ბანკის შეფასებით, 2020 წელს რეგულირების ხარისხი საქართველოში ექვსი მიმართულებიდან ყველაზე მაღალი ქულით არის შეფასებული. ეს რაც წლების განმავლობაში საქართველოს მიერ ამ მიმართულებაში მიღებული ყველაზე მაღალი შედეგია. თუმცა, ბოლო წლის შეფასებით უკუსვლა შეიმჩნევა თითქმის ყველა სხვა მიმართულებაში. ვრცლად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI) თანახმად, კანონმდებლობის მიხედვით პოლიტიკურ პარტიებს ფინანსურ რესურსებზე წვდომის თანაბარი შესაძლებლობები აქვთ. მიუხედავად ამისა, პრაქტიკაში მმართველი პარტიის შემოწირულობები აღემატება ოპოზიციური პარტიების ფინანსურ რესურსებს. „იმის გათვალისწინებით, რომ ოპოზიციური პარტიებისთვის კერძო წყაროებიდან დაფინანსების მოპოვება გამოწვევას წარმოადგენს და მათი შემოსავლის დიდი ნაწილი სახელმწიფო დაფინანსებაზე მოდის, პრაქტიკაში რეალური კონკურენცია უზრუნველყოფილი არ არის. განხორციელებული პოზიტიური საკანონმდებლო ცვლილებების მიუხედავად პოლიტიკური პარტიების დაფინანსების მოწესრიგების საკითხთან მიმართებით კვლავ არსებობს არაერთი გამოწვევა, რომლებზეც საერთაშორისო ორგანიზაციები წლების განმავლობაში საუბრობდნენ“, ნათქვამია ორგანიზაციის ვებგვერდზე.  სრულად... წყარო: idfi.ge

თბილისი. ასოციაცია „ანიკას“ ახალგაზრდა ლიდერის, სოფო მაზმიშვილის ინიციატივით ასოციაცია „ანიკასა“ და „ლიბერთი ბანკის“ წარმომადგენლებს შორის შეხვედრა გაიმართა. შეხვედრაზე განიხილეს საკითხები, რომლებიც ეტლით მოსარგებლე შეზღუდული შესაძლებლობის და გადაადგილების სირთულის მქონე პირებს ეხებათ ლიბერთი ბანკის სერვისის მიღებისას. ბანკის წარმომადგენლებმა გაიზიარეს არსებული გამოწვევების აქტუალურობა და მზაობა გამოთქვეს წამოჭრილ საკითხებთან დაკავშირებით აქტიურად გააგრძელონ თანამშრომლობა ორგანიზაციასთან.  სრულად... წყარო: ორგანიზაციის გვერდი სოციალურ ქსელში

თბილისი. აფხაზეთის საომარი მოქმედებების დროს დაღუპულთა ხსოვნის პატივსაცემად, აშშ-ს ელჩმა კელი დეგნანმა, თავდაცვის ატაშე პოლკოვნიკმა სტეფანი ბეგლიმ და საქართველოში უოლტერ რიდის არმიის კვლევითი ინსტიტუტის წევრებმა გმირთა მოედანი გვირგვინით შეამკეს. „28 წლის წინ რუსეთის მიერ მხარდაჭერილი ძალების წინააღმდეგ სოხუმი დაეცა. ამ მძიმე ტრაგედიას ათასობით სიცოცხლე შეეწირა და ასობით ათას ადამიანს სახლის იძულებით დატოვება მოუწია. ჩვენ ამ დღეს ვიხსენებთ მწუხარებით და იმედით, რომელიც ამდენი იძულებით გადაადგილებული ადამიანის გულში რჩება,” - ნათქვამია საელჩოს მიერ გავრცელებულ ინფორმაციაში. სრულად...  წყარო: გვერდი სოციალურ ქსელში

თბილისი. ადამიანის უფლებათ სახლი გვიზიარებს ციფრული უსაფრთხოების გზამკვლევს.   როგორც ორგანიზაციის მიერ გავცელებულ ინფორმაციაშია აღნიშნული, მოცემული ინფორმაცია დაგვეხმარება გავიაზროთ, რას უნდა მივაქციოთ ყურადღება ონლაინ კომუნიკაციისას. გზამკვლევი მიგვითითებს, ასევე, თუ რომელი მარტივი და საბაზისო ტექნიკები შეგვიძლია გამოვიყენოთ იმისათვის, რომ მნიშვნელოვნად შევამციროთ ჩვენს პირად ფაილებზე, ინფორმაციასა თუ კომუნიკაციაზე გარეშე პირთა წვდომის რისკები.  სრულად...  წყარო: წყარო: ორგანიზაციის ვებგვერდი

თბილისი. „ინფორმაციის თავისუფლების განვითარების ინსიტიტუტი“ აქვეყნებს ბულგარეთის უახლესი წარსული კვლევის ინსტიტუტის მკვლევრის, მომჩილ მეთოდიევისას სტატიას - „არქივები და კონსპირაციის თეორები: ბულგარეთის მართლმადიდებლური ეკლესიის მაგალითი“. „გასაგებია, რომ კომუნისტური საიდუმლო სამსახურების არქივების გახსნას დიდი მოლოდინი მოჰყვება ხოლმე. საზოგადოება იმედოვნებს, რომ არქივების გახსნა დიდი ხნის ნანატრ პასუხს გასცემს კომუნისტური რეჟიმის საქმიანობას, სისტემის დაშლას და რომ ეს ნაბიჯი გამოიწვევს ინსტიტუტების გამჭვირვალობას, აღადგენს სამართლიანობას და გზას გაუხსნის ახალი ელიტების ჩამოყალიბებასა და მერიტოკრატიულ განვითარებას. ეს იმედები გასაგები და გონივრულია. მთავარ გამოწვევად რჩება არქივში გამოვლენილ ინფორმაციასა და ადრეულ გარდამავალ წლებში ჩამოყალიბებულ საზოგადოებრივ რწმენას შორის შესაძლო შეუსაბამობა. როგორ რეაგირებს საზოგადოება და ინსტიტუტები, როდესაც გამოქვეყნებული საარქივო ინფორმაცია არა მხოლოდ არ ადასტურებს, არამედ ეწინააღმდეგება უკვე დამკვიდრებულ აღქმებს?“ - ვკითხულობთ სტატიაში. სრულად...  წყარო: ორგანიზაციის ვებგვერდი

თბილისი. საქართველოში ამერიკის შეერთებული შტატების საელჩო საქართველოში ტურიზმის ინდუსტრიის გასავითარებლად შეერთებული შტატების მიერ მხარდაჭერილი პროექტების ნაწილს აქვეყნებს... ამ ზაფხულს USAID-მა საქართველოში ინფლუენსერთა ჯგუფი ჩამოიყვანა, რითაც მსოფლიოში 4 მილიონამდე პოტენციურ ტურისტს ქვეყანა გააცნო.  უკვე ნახეთ კერამიკული ფილებით შექმნილი ულამაზესი მოზაიკა გორში? ის ხელოვანმა ირინა შოთაძემ მას მერე შექმნა, რაც USAID-ი კერამიკის ღუმელის შეძენაში დაეხმარა. ახალი ღუმელის დახმარებით, მან 1001 მოხატული ფილა საჯაროდ გამოფინა და ის უკვე პოპულარული ადგილი გახდა გორში.  ასევე, USAID-მა მხარი დაუჭირა ახალ ინფრასტრუქტურას 15 მუზეუმისთვის: შიდა ქართლში, სამცხე-ჯავახეთში, მცხეთა-მთიანეთსა და თუშეთში. ამერიკის მთავრობა განსაკუთრებულ მნიშვნელობას ანიჭებს საქართველოს რეგიონებში უნიკალური კულტურული მემკვიდრეობის შენარჩუნების კვალდაკვალ სამუშაო ადგილების შექმნას, რისი ერთგულიც არის ეს პროექტი.  USAID-ის მხარდაჭერითვე, დაახლოებით სამასმა „ციფრულმა მისიონერმა" გუგლის პლატფორმებზე ტურისტული ბიზნესები და ძეგლები დაიტანა. ეს ხელს შეუწყობს რეგიონებში ტურისტული ინდუსტრიის განვითარებას. ამ დრომდე ქვეყნის მასშტაბით მათ გააციფრულეს 3,000-ზე მეტი ადგილმდებარეობა.  არანაკლებ მნიშვნელოვანია USAID-ის მხარდაჭერით შექმნილი ტურიზმის ინდუსტრიის ალიანსი, რომელიც 15 ბიზნეს ასოციაციას აერთიანებს ტურიზმისა და სტუმარ-მასპინძლობის ინდუსტრიიდან. სრულად...   წყარო: გვერდი სოციალურ ქსელში

თბილისი. საქართველოს მოსახლეობის დიდ ნაწილს მიაჩნია, რომ ქვეყანაში გავრცელებულია მაღალი დონის კორუფცია – კორუფციის ისეთი შემთხვევები, სადაც მაღალი თანამდებობის პირები ფიგურირებენ. ამავე დროს, მოსახლეობა ყოველდღიურ ცხოვრებაში იშვიათად აწყდება წვრილმან კორუფციას. ასეთია საზოგადოებრივი აზრის სატელეფონო გამოკითხვის შედეგები, რომელიც „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა“ (CRRC) 2021 წლის 9-დან 18 ივლისამდე პერიოდში ჩაატარა. კვლევის ფარგლებში მთელი ქვეყნის მასშტაბით 1,228 ადამიანი გამოიკითხა. კვლევის საშუალო ცდომილება 2.67% პუნქტია. სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა მკვლევარ-სოციოლოგთა ასოციაცია • GYRSA, პარტნიორ ენების სახლ „ინჰუასთან“ ერთად, გიწვევთ სხვადასხვა ენის უფასო 1,5 საათიან მასტერკლასზე. მასტერკლასს ონლაინ პლატფორმით, 12-30 სექტემბრის პერიოდში ჩაატარებენ შესაბამისი ენის სპეციალისტები. მონაწილეებს საჩუქრად გადაეცემათ თემატური ელ-წიგნი და, კურსებზე რეგისტრაციის შემთხვევაში, მიიღებენ სპეციალურ ფასდაკლებას. რეგისტრაციის ბმული  სრულად...  წყარო: გვერდი სოციალურ ქსელში

თბილისი. საზოგადოებრივი ორგანიზაციების ნაწილი მიიჩნევს, რომ გარემოს დაცვისა და სოფლის მეურნეობის სამინისტროდან სსიპ გარემოს ეროვნული სააგენტოსთვის გადაწყვეტილების მიღების უფლებამოსილების დელეგირება ისეთ საკითხებზე, რომლებიც უშუალოდ უკავშირდება ქვეყნის განვითარებას, საზოგადოების უსაფრთხოებასა და ადამიანის ძირითადი უფლებებით სათანადო სარგებლობას, სამინისტროს მხრიდან პოლიტიკური პასუხიმგებლობისგან თავის არიდების საშუალებას წარმოადგენს. ამასთან, სსიპ გარემოს ეროვნული სააგენტოსთვის ამ უფლებამოსილების გადაკისრება ზრდის ინტერესთა კონფლიქტისა და კორუფციულ საფრთხეებს, ვინაიდან ამ სააგენტოს გააჩნია თავისი კომერციული ინტერესები. „აღნიშნული კონტექსტის გათვალისწინებით, მოვუწოდებთ საქართველოს პარლამენტს, მხარი არ დაუჭიროს ამგვარ ინსტიტუციურ ცვლილებას, ვინაიდან ის საფრთხეს უქმნის ქვეყანში დღეს არსებულ სამართლებრივ და ინსტიტუციურ წესრიგს და მომავალში უარყოფითად აისახება ქვეყანის განვითარებაზე“. სრულად... წყარო: gyla.ge

თბილისი. მითების დეტექტორი აქვეყნებს სანდრო გიგაურის ბლოგპოსტს: ახლადშექმნილი „ფარღალიტი” იტალიელი ანტივაქსერი ექიმის კოვიდ-დეზინფორმაციებს ავრცელებს. „9 აგვისტოს, ფეისბუქ გვერდმა „ფარღალიტი” გამოაქვეყნა ვიდეო, სადაც იტალიელი ექიმი რობერტო პეტრელა ამბობს, რომ ტერმინი COVID-19 არა დაავადებას, არამედ ხელოვნური ინტელექტის მიერ ვაქცინაციის იდენტიფიკაციის მექანიზმს აღნიშნავს და ის მსოფლიო მოსახლეობის განადგურების მიზნითაა შექმნილი. გავრცელებული ვიდეო რამდენიმე დეზინფორმაციას შეიცავს.  COVID-19 ხელოვნური ინტელექტის მიერ ვაქცინაციის იდენტიფიკაციის მექანიზმს არ აღნიშნავს, რომელიც მოსახლეობის მასობრივ ექსტერმინაციას ისახავს მიზად. აგრეთვე, მცდარია ინფორმაცია იმის შესახებ, თითქოს ტესტებს SARS-CoV-2-ის დადგენა არ შეუძლიათ და უმეტესწილად დადებით პასუხს აჩვენებენ. მცდარია ის მტკიცებაც, რომ კორონავირუსის საწინააღმდეგო ვაქცინები ადამიანის იმუნიტეტს აქვეითებს, ასუსტებს ორგანიზმს და ლეტალურ შედეგებს იწვევს. 1) COVID-19 აბრევიატურაა და კორონავირუსის დასახელებას აღნიშნავს: “CO” - Corona (კორონა), “VI” - Virus (ვირუსი) და “D” - disease (დაავადება), ხოლო მოსახლეობის მასობრივი განადგურება კონსპირაციის თეორიაა; 2) ტესტებს SARS-CoV-2-ის იდენტიფიცირება შეუძლიათ და უმეტესწილად ზუსტ პასუხს აჩვენებენ“. სრულად... წყარო: mythdetector.ge

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს საერთაშორისო ურთიერთობების მაგისტრის, ნინო ჩანადირის ბლოგპოსტს: ბელარუსის გასვლა აღმოსავლეთ პარტნიორობიდან - რა იქნება შემდგომ. მას შემდეგ რაც, მინსკის ბრძანებით, ბელარუსის ავიასივრცის გადაკვეთისას, იძულებით დასვეს თვითმფრინავი და დააკავეს დისიდენტი ჟურნალისტი რომან პრატასევიჩი, ევროკავშირმა ქვეყანას სანქციები დაუწესა. სანქციებზე პასუხად, ბელარუსმა აღმოსავლეთ პარტნიორობის პროგრამაში მონაწილეობა შეაჩერა... ბლოგპოსტში გამოთქმულია აზრი, რომ შექმნილი ვითარება, აღმოსავლეთ პარტნიორობის წევრ სახელმწიფოებს შორის მიღწეული პროგრესის თვალსაზრისით დიფერენცირების საჭიროებას გააჩენს. ეს კი მიღწეული პროგრესის მიხედვით, ქვეყნების განსხვავებულ კატეგორიებში დაჯგუფებას გამოიწვევს. „ეს არ არის პირველი შემთხვევა, როდესაც დიფერენცირების იდეაზეა ლაპარაკი. ფაქტი, რომ საქართველო, უკრაინა და მოლდოვა უკეთეს პოზიციაზე იმყოფებიან პროგრესის თვალსაზრისით, ევროკავშირშიც აღიარებულია და აღმოსავლეთ პარტნიორობის პროგრამაზე საუბრისას ზოგი აღნიშნავს კიდეც, რომ საჭიროა მოქნილი მიდგომა, რომელიც ქვეყნების ამ ჯგუფს წინსვლის სწრაფ საშუალებას მისცემს. ახალმა ვითარებამ შესაძლოა ამ იდეას იმპულსი მისცეს, რაც სამი ქვეყნისთვის კიდევ ერთი წინ გადადგმული ნაბიჯი იქნება ევროკავშირთან თანამშრომლობის გაღრმავებაში“.  სრულად... წყარო: www.gfsis.org

თბილისი. სოციალური სამართლიანობის ცენტრი გთავაზობთ ინტერვიუს კონფლიქტის თემაზე პოლიტიკური და აკადემიური მუშაობის გამოცდილების მქონე ექსპერტებთან - პაატა ზაქარეიშვილთან, ნათია ჭანკვეტაძესთან და გიორგი კანაშვილთან. „რამდენიმე დღის წინ პრემიერ-მინისტრმა და შერიგებისა და სამოქალაქო თანასწორობის საკითხებში სახელმწიფო მინისტრმა შერიგებისა და ნდობის აღდგენის მიმართულებებით გრძელვადიანი სტრატეგიული ხედვები წარმოადგინეს. ქართული ოცნების ხელისუფლებამ შერიგებისა და ნდობის აღდგენის პოლიტიკის მნიშვნელობა დისკურსულ დონეზე კიდევ უფრო მეტად გააძლიერა, თუმცა, ის ამ მიმართულებით მუშაობას წინა ხელისუფლების პარადიგმებით, ინსტრუმენტებით და მეთოდებით აგრძელებს და ამ მცდელობებს მნიშვნელოვანი პოლიტიკური და სოციალური შედეგები არ მოუტანია“. სრულად... წყარო: socialjustice.org.ge

სამცხე-ჯავახეთი. 6 აგვისტოს, „საერთაშორისო გამჭვირვალობა - საქართველომ“, ბორჯომის მუნიციპალიტეტის მერიისა და საკრებულოს წარმომადგენლებისთვის გამართა ტრენინგი შემდეგ საკითხებზე: საქართველოს ადგილი ევროკავშირის პოლიტიკაში - სამეზობლო პოლიტიკა-აღმოსავლეთის პარტნიორობა და ასოცირების ხელშეკრულების შესრულების სავარაუდო შედეგები; დაფინანსების პოლიტიკა და მექანიზმები. სრულად... წყარო: ორგანიზაციის გვერდი სოციალურ ქსელში