თბილისი. ინფორმაციის თავისუფლების განვითარების ინსტიტუტი (IDFI) აგრძელებს პარლამენტის დღეს უნივერსიტეტში. ამჯერად, ორგანიზაცია სამცხე-ჯავახეთის სახელმწიფო უნივერსიტეტს ეწვია. „საქართველოს პარლამენტის წევრმა ირინა ფრუიძემ სტუდენტებს პარლამენტის სტრუქტურის/ფუნქციის და ასევე საპარლამენტო ღიაობის, გამჭვირვალობის და ანგარიშვალდებულების კუთხით მიღწეულ შედეგებზე ესაუბრა. IDFI-ის პროგრამების დირექტორმა, ლევან ავალიშვილმა კი, ახალგაზრდებს გააცნო ის ახალი სერვისები რაც საშუალებას მისცემს მათ უფრო აქტიურად ჩაერთონ ქვეყნის საკანონმდებლო საქმიანობაში", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 22-24 აპრილს, „საერთაშორისო გამჭვირვალობა - საქართველოს” და საქართველოს პარლამენტის აპარატის ორგანიზებით, ჩატარდა ტრენინგები დასავლეთ საქართველოს მაჟორიტარი პარლამენტის წევრების ბიუროს თანამშრომლებისთვის. შეხვედრა შეეხო შემდეგ საკითხებს: კორუფციის კვლევა და პრევენცია: თანამედროვე მიდგომები, ცენტრალური და ადგილობრივი ხელისუფლების ფუნქციები და უფლება-მოვალეობები, საზოგადოებასთან ურთიერთობა და მედიაკომუნიკაცია. სრულად... წყარო: ორგანიზაციის გვერდი სოციალურ ქსელში

თბილისი. თბილისის ევროპის დღეებთან დაკავშირებით, ევროკავშირი საქართველოში გთავაზობთ კონკურსს პატარებისთვის. ევროკავშირის წევრი 28 ქვეყნიდან აარჩიეთ რომელია თქვენი პატარებისთვის ნაცნობი და ყველაზე საყვარელი. დაახატინეთ პატარებს არჩეული ქვეყნის: რუკის კონტური ან ქვეყნის დამახასიათებელი სიმბოლო (ნაციონალური სამოსი, კულინარიული შედევრი, დროშა და ა.შ). კონკურსის პირობები ასეთია: შემოსული ნახატებიდან შემთხვევითობის პრინციპით აირჩევა 10 ნახატი, რომლებიც შეიკერება ფულმფულა სათამაშოდ და 4 მაისს, ევროპის დღეს, რიყის პარკში თქვენს პატარებს საკუთარი ნახატის გაცოცხლებული ვერსია საჩუქრად გადაეცემათ”, ნათქვამია ევროკავშირის სოციალური ქსელის გვერდზე. სრულად... წყარო: ევროკავშირის გვერდი სოციალურ ქსელში

თბილისი. „ღია საზოგადოების ფონდის", „საერთაშორისო გამჭვირვალობა - საქართველოს", „სამართლიანი არჩევნებისა და დემოკრატიის საერთაშორისო საზოგადოებისა" და „ატლანტიკური საბჭოს" წარმომადგენლები ვაშინგტონს სტუმრობენ.  ოთხდღიანი ვიზიტის ფარგლებში 20-მდე შეხვედრაა დაგეგმილი. საზოგადოებრივი ორგანიზაციები შეხვედრებს გამართავენ: აშშ-ს მთავრობის წარმომადგენლებთან, საქართველოს საკითხებზე მომუშავე სენატორებსა და კონგრესმენებთან. საუბრების თემა იქნება: საქართველოსა და ამერიკის შეერთებულ შტატებს შორის გაფორმებული სტრატეგიული პარტნიორობის ქარტიით განსაზღვრულ სფეროებში განხორციელებული რეფორმები, მათი მონიტორინგი, შეფასებები და რეკომენდაციები; კორუფციის წინააღმდეგ ბრძოლა, უსაფრთხოების სექტორის რეფორმები, საარჩევნო გარემო, მედიის თავისუფლებისა და მართლმსაჯულების საკითხები.  სრულად... წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო" (TI) ზუგდიდის მუნიციპალურ იურიდიულ პირებში რეორგანიზაციის პროცესს ეხმაურება.  „ზუგდიდის მუნიციპალურ იურიდიულ პირებში რეორგანიზაციის პროცესი, რომელიც მიმდინარე წლის იანვარში დაიწყო, ამ დრომდე არ დასრულებულა. იურიდიული პირების მუშაობის შემსწავლელ ჯგუფს საბოლოო წინადადებები რეორგანიზაციასთან დაკავშირებით ზუგდიდის მერიისთვის არ გადაუგზავნია. „საერთაშორისო გამჭვირვალობა - საქართველო” სამუშაო ჯგუფს და საკითხით დაინტერესებულ პირებს წარუდგენს რეკომენდაციებს პროცესის ოპტიმალურად და ეფექტიანად დასრულებისთვის", - აღნიშნულია TI-ის მიერ გავრცელებულ ინფორმაციაში.  სრულად... წყარო: ორგანიზაციის ვებგვერდი

თბილისი. „ღია საზოგადოების ფონდი" მორიგ საკონსულტაციო დღეს 2019 წლის 25 აპრილს, ხუთშაბათს, ფონდის ოფისში გამართავს. გრანტის მაძიებლებს შეხვდებიან შემდეგი პროგრამების წარმომადგენლები: ეროვნული ინტეგრაცია (11:00 სთ); საზოგადოებრივი ჯანმრთელობა (12:00 სთ); მონაწილეობითი დემოკრატიის პროგრამა (14:00); მედია (15:00 სთ); ადამიანის უფლებები (16:00 სთ); ევროინტეგრაცია (17:00 სთ); სხვა.  სრულად... წყარო: ორგანიზაციის ვებგვერდი

თბილისი. პროექტის „სამთო-მოპოვებითი ინდუსტრიები და მათი სოციო-ეკოლოგიური ასპექტები" ფარგლებში, რომლის მიზანია შეისწავლოს და გააანალიზოს ბუნებრივი რესურსების თუ წიაღის მოპოვებასთან დაკავშირებული სოციალური, ეკონომიკური და ეკოლოგიური საკითხები, გთავაზობთ თარგმანების სერიას. „იმისთვის, რომ თარგმანების მნიშვნელობა და მათი კავშირი ქართულ რეალობასთან უფრო ცხადი გამხდარიყო, პროექტში ჩართულმა მკვლევარებმა მოამზადეს თარგმანების სინთეზური შესავლები. გთავაზობთ სონია კილორან-მაკკიბინისა და ანა ზალიკის სტატიას „მომპოვებლურ/მწარმოებლური დიქოტომიის გადააზრება ნეოლიბერალიზმის პირობებში". სტატიისთვის სინთეზური შესავალი მოამზადა ანა დიაკონიძემ", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს ანა რეხვიაშვილის სტატიას - „სექს-ომებში დაკარგული სექს-მუშაკთა შრომა: სექს-სამუშაო ფემინისტური პარადიგმების მიღმა”.  „ამ სტატიის მიზანი სექს-სამუშაოს ირგვლივ არსებული ფემინისტური დებატის კრიტიკაა. სექს-სამუშაო ჯერ კიდევ 80-იანი წლებიდან გახდა ფემინისტთა დაპირისპირების ერთ-ერთი საფუძველი. ამ დაპირისპირებას, ხშირად, ფემინისტურ სექს-ომებსაც უწოდებენ, რადგან სექსუალობა და მისი, ერთი მხრივ, პატრიარქალურ წესრიგთან კავშირი და, მეორე მხრივ, მისი ტრანსფორმაციული და განმათავისუფლებელი პოტენციალი სექს-სამუშაოს ფემინისტური ანალიზის ცენტრალურ საკითხად იქცა. სექს-ომებმა ერთგვარი პოლარული თეორიული ჩარჩო შექმნა სექს-სამუშაოს კონცეპტუალიზებითვის, სადაც სექს-სამუშაო ან ქალთა ჩაგვრის ყველაზე თვალსაჩინო ფორმად მიიჩნევა, ან კიდევ, ქალთა მიერ საკუთარი სხეულისა და სექსუალობის კონტროლისა და პატრიარქალური ნორმების წინააღმდეგობის მაგალითად (Beran, 2017)" - აღნიშნულია სტატიაში.  სრულად... წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს შოთა პაპავას თვალსაზრისს - „ბერლინის წინააღმდეგ: ევროცენტრიზმი და პროგრესული რასიზმი".  „რას ვამბობთ, როდესაც ვამბობთ, რომ „საქართველო ევროპაა"? - სვამს შეკითხვას ავტორი, - „ქართულ ლიბერალურ დისკურსში „ევროპა", როგორც შეძახილი, თითქოს მხოლოდ ანტირუსული პოლიტიკური პოზიციის აღმნიშვნელია, მაგრამ მას სხვა, არანაკლებ მნიშვნელოვანი სოციალურ-კულტურული განზომილებებიც აქვს. საქართველოში „ევროპა" ორი მთავარი კომპონენტისგან შედგება: აღმატებულობა და ანტიაღმოსავლურობა. „საქართველო ევროპაა" არის რიტორიკული/იდეოლოგიური პოზიცია, რომელშიც აუცილებლად იგულისხმება, რომ საქართველო არ არის აღმოსავლეთი. აღმოსავლეთისა და დასავლეთის დიქოტომიურ დაპირისპირებაში კი, ევროპა აღიქმება, როგორც აღმატებული, უპირატესი, ის, რაც ცხადად უკეთესია მის საპირისპირო ცნებაზე აღმოსავლეთზე. გეოგრაფია, ისტორია, კულტურული მემკვიდრეობა, და რეალობა, ზოგადად, ასეთ ხედვაში ნაკლებად რელევანტურია, წარმოსახვით, სიმბოლურ სფეროსთან შედარებით, თუმცა, პრობლემური ის არის, რომ სიმბოლოებიც ითარგმნება (პოლიტიკურ) ქმედებაში".  სრულად... წყარო: ორგანიზაციის ვებგვერდი

აჭარა. 18 აპრილს, ბათუმის ახალგაზრდული ცენტრის მოხალისეებმა, ლაშა ბერიძემ და მარიამ ნაკაშიძემ ჩაატარეს ტრეინინგი მახინჯაურის საჯარო სკოლაში, თემებზე: ოჯახში ძალადობა და არასრულწლოვნების ქორწინება. „შეხვედრაზე ისაუბრეს არსებული პრობლემების გამომწვევ მიზეზებსა და შედეგებზე, სახელმწიფოსა და მოქალაქეების როლზე მსგავს სიტუაციებში. განიხილეს მოძალადისა და მსხვერპლის დამახასიათებელი თვისებები, მათი გავლენა არასრულწლოვანზე და ის მავნე შედეგები რაც შეიძლება მოჰყვეს ძალადობას", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ფონდი აქვეყნებს ანდრია გოცირიძის ბლოგპოსტს: ფაქტორები, რომელთა გათვალისწინებითაც უნდა მოხდეს კიბერუსაფრთხოების ახალი ეროვნული სტრატეგიის შემუშავება. „კიბერდომეინი, დაპირისპირების მეხუთე სივრცე, პერმანენტულად გამოიყენება პოლიტიკური, ეკონომიკური თუ სამხედრო მიზნების მისაღწევად. განვითარებული კიბერშეტევითი პოტენციალი საშუალებას აძლევს ბევრ სახელმწიფოს, უპირველეს ყოვლისა კი რუსეთს, წარმატებით გამოიყენოს კიბერსივრცე ომის, კონფლიქტის მიმდინარეობისას თუ მშვიდობიან დროს გეოპოლიტიკური უპირატესობის მოსაპოვებლად", ნათქვამია ორგანიზაციის ვებგვერდზე. სრულად... წყარო: www.gfsis.org

თბილისი. „საერთაშორისო გამჭვირვალობა - საქართველო" (TI) ორგანიზაციის მიერ გაწეული სამუშაოების წლიურ ანგარიშს აქვეყნებს. „ჩვენი ძირითადი მოტივაციაა მივაღწიოთ ისეთ გარემოს, სადაც გამჭვირვალობა და ღიაობა საჯარო და კერძო სექტორების მთავარი ამოსავალი პრინციპები იქნება. ჩვენ გვამოძრავებს ქვეყნის დემოკრატიული განვითარების ხელშეწყობის სურვილი და ამ პროცესის შეუქცევადობაში გარკვეული წვლილიც შეგვაქვს. კორუფციისგან თავისუფალი სახელმწიფო ინსტიტუტების განვითარება და გაძლიერება, კარგი მმართველობის პრინციპების და გამჭვირვალობის სტანდარტების დანერგვა, სამართლიანი საარჩევნო გარემოს ხელშეწყობა, მართლმსაჯულების სისტემის დამოუკიდებლობა და გაჯანსაღება, თავისუფალი და პლურალისტური მედიის მხარდაჭერა, მოქალაქეთა ჩართულობის ხელშეწყობა და მათ წინაშე ცენტრალური თუ ადგილობრივი ხელისუფლების ანგარიშვალდებულება - ეს იმ მიმართულებების არასრული ჩამონათვალია, რომლებზეც ჩვენი ორგანიზაცია წლების განმავლობაში აქტიურად მუშაობს", - ვკითხულობთ ანგარიშის წინასიტყვაობაში.  სრულად... წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) თალალ ასადის ნაშრომის თარგმანს თორნიკე ჭუმბურიძისა და გიორგი ვაჩნაძის ავტორობით. „მკლევარებს შორის შეინიშნება რელიგისაა და პოლიტიკას შორის კავშირების გამოაშკარავებით დაინტერესების გამოღვიძება. ეს დაინტერესება დაკავშირებულია ფართოდ გავრცელებულ აღქმასთან, რომ საჭიროა გადაიხედოს თანამედროვე ცხოვრებაში რელიგიის ადგილზე განმანათლებლობისეული შეხედულება. მესამე სამყაროს სხვადასხვა ნაწილში რელიგიური მოძრაობების გამოჩენამ, და, კერძოდ, პოლიტიკური ისლამის ფენომენმა, დააბნია და შეაშფოთა განმანათლებლობის მხარდამჭერები. ამის ერთი შედეგი ისაა, რომ უფრო თავდაჯერებულად აკრიტიკებენ სეკულარიზაციის თეორიის წინასწარმეტყველურ მტკიცებას, რომ მოდერნულობის აღმასვლასთან ერთად, რელიგია სულ უფრო მარგინალიზებული და პრივატული ხდება. მე რელიგიისა და ნაციონალიზმის საკითხს ირიბად -ამ თეორიის განხილვის გზით, მივუდგები", ნათქვამია დოკუმენტში. სრულად... წყარო: emc.org.ge

თბილისი. საქართველოს სტრატეგიის და საერთაშორისო ურთიერთობების კვლევის ფონდი აქვეყნებს თეონა ლავრელაშვილის ნაშრომს: ევროკავშირი გაურკვევლობის დროებაში - როგორ აღიქმება ეს საქართველოში?. „ნაშრომში ყურადღება გამახვილებულია ევროპაში მიმდინარე ძირითად პოლიტიკურ პროცესებზე, რომლმებიც ფართოდ გავრცელებული გაურკვევლობითა და საყოველთაო კრიზისით გამოირჩევა, და შეფასებულია მათი პოტენციური გავლენა საქართველოზე", ნათქვამია ფონდის გვერდზე სოციალურ ქსელში.  სრულად... წყარო: www.gfsis.org

თბილისი. საქართველოს სტრატეგიის და საერთაშორისო ურთიერთობების კვლევის ფონდი აქვეყნებს ფონდის მკვლევრის, დავით ბატიაშვილის ბლოგპოსტს: ნატოს, რუსეთის და პატ ბუჩანანის შესახებ. „ჩვენ რთულ მდგომარეობაში ვართ. ჩვენი სუვერენიტეტის საწინააღმდეგო რუსული აქტივობები შეუჩერებლად გრძელდება, ისევე, როგორც პროპაგანდისა და დეზინფორმაციის რუსული კამპანია. დასავლეთის ყურადღების დიდ ნაწილს იპყრობს სხვა პრობლემები და სხვა რეგიონები. მოკლედ, ბატონ ბუჩანანს შეუძლია დარწმუნებული იყოს, რომ ვითარება აღმოსავლეთ ევროპაში საკმარისად რთული და სახიფათოა, მის მიერ მოსკოვის ტყუილების გამეორებისა და მხარდაჭერის გარეშეც", ნათქვამია ბლოგპოსტში. სრულად... წყარო: www.gfsis.org

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თამთა თათარაშვილის სტატიას: დედობის პოლიტიზირება. „წინამდებარე სტატიის მიზანია, გავიხედოთ სენტიმენტებს მიღმა, განვიხილოთ დედობა, როგორც სოციალური ფენომენი და როგორც ეკონომიკურ-პოლიტიკური შედეგების მქონე პრაქტიკა, ორი ფემინისტი ავტორის, სარა რუდიკისა და ნენსი ფრეიზერის თეორიებზე დაყრდნობით. ეს ავტორები, ერთი შეხედვით, ერთმანეთისგან სავსებით განსხვავებულ საკითხებს უღრმავდებიან. სარა რუდიკი დედობის ყოველდღიური პრაქტიკის ანალიზს გვთავაზობს და მის თეორეტიზირებას ახდენს, რაც მანამდე, შესაძლოა, მხოლოდ დედებს შორის პირადი განხილვების საგანი ყოფილიყო. ნენსი ფრეიზერი (ესეებში, რომლებსაც მე უნდა შევეხო) კი გვიანდელი კაპიტალისტური კეთილდღეობის სახელმწიფოს პოლიტეკონომიასა თუ მის კრიტიკაში გამოტოვებული გენდერული მიდგომის პრობლემატიზებას ახდენს, აქცენტით საშინაო ზრუნვის შრომაზე, რომელსაც, ძირითადად, ქალები/დედები ასრულებენ და რომელიც აუნაზღაურებელი შრომის სახელითაა ცნობილი", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს პოლიტიკის ინსტიტუტი (GIP) აქვეყნებს ბიძინა ლებანიძის პოლიტიკის დოკუმენტს, სადაც გაანალიზებულია, თუ რამდენად ახდენს გავლენას პოპულისტური ნაციონალიზმის მზარდი ტენდენცია საქართველოს ევროკავშირთან დაახლოების პროცესზე. სრულად... წყარო: gip.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს გიორგი ხასაიასა და გიორგი წურწუმიას მიერ ნათარგმნ პუბლიკაციას პროექტის „სოციალური სამართლიანობა კრიზისის დროს" ფარგლებში, რომელიც Open Society Foundations-ის მხარდაჭერით ხორციელდება. „ყველაზე მდიდრებს, რომლებიც „ფორბსისა" და „ფორტუნას" პორნოფინანსურ გვერდებზე ჩანან და ყველაზე ღარიბებს, რომლებიც ქუჩებსა და მინდვრებში არიან, შორის უფსკრული კიდევ უფრო დიდია. აფრიკელი ორსული ქალის გარდაცვალების საფრთხე ევროპელი ორსული ქალის გარდაცვალებაზე 100-ჯერ დიდია. შეერთებულ შტატებში ყოველწლიურად გაყიდული ცხოველების საკვების ღირებულება ეთიოპიის მთლიან ეროვნულ პროდუქტს 4-ჯერ აღემატება. ორი გიგანტის, „ჯენერალ მოტორსისა" და „ფორდის" გაყიდვის მაჩვენებელი კი მთელი შავი აფრიკის ეკონომიკას ადვილად ჯობნის". სრულად... წყარო: emc.org.ge

თბილისი. საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო ლელა კურდღელაშვილის განცხადება ტელეკომპანია „რუსთავი 2-ის" ჟურნალისტის, მარიამ გაფრინდაშვილისა და საინფორმაციო სამსახურის უფროსის და გადაცემის წამყვანის, ნოდარ მელაძის წინააღმდეგ. „სადავო გადაცემა „შაბათის კურიერის" ეთერში 16 მარტს გავიდა სახელწოდებით „ტროლები ოპონენტებისთვის" და ეძღვნებოდა ხელისუფლების მიერ ინტერნეტში სხვადასხვა პირთა დისკრედიტაციისთვის შექმნილ ანგარიშებს. სიუჟეტში ნახსენები იყო განმცხადებელი ლელა კურდღელაშვილიც. ის მიიჩნევს, რომ სიუჟეტით არასწორი ინფორმაცია გავრცელდა, ვინაიდან მას არანაირი შეხება „ქართულ ოცნებასთან" არ ჰქონია. შესაბამისად, მისი აზრით, დარღვეულია ქარტიის შემდეგი პრინციპები: პირველი (სიზუსტე), მესამე (მიჩმქალვა), მეოთხე (ინფორმაციის მოპოვების კეთილსინდისიერება), მეხუთე (შესწორება) და მეთერთმეტე (ფაქტის განზრახ დამახინჯება)", ნათქვამია ორგანიზაციის ვებგვერდზე. სრულად... წყარო: www.qartia.ge

თბილისი. „საერთაშორისო გამჭვირვალობა - საქართველო" კანონმდებლობაში რეგულირების ზეგავლენის შეფასების (RIA) ინსტიტუციონალიზაციას აფასებს. „RIA-ს ინსტიტუციონალიზაცია პოზიტიურად უნდა შეფასდეს, თუმცა ინიციატივა წარმოდგენილი სახით ვერ პასუხობს საკანონმდებლო პროცესის გამოწვევებს, ვრცელი გამონაკლისი შემთხვევები იძლევა RIA-ს გარეშე მნიშვნელოვანი კანონების მიღების შესაძლებლობას. პროექტის მიხედვით, RIA შეიძლება იყოს ფორმალურად სავალდებულო მოთხოვნა, თუმცა კანონპროექტი იძლევა შესაძლებლობას მნიშვნელოვანი ინიციატივები რეგულაციის ზეგავლენის შეფასების გარეშე იყოს მიღებული", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) პროექტის „სამთო-მოპოვებითი ინდუსტრიები და მათი სოციო-ეკოლოგიური ასპექტები" ფარგლებში, რომლის მიზანია შეისწავლოს და გააანალიზოს ბუნებრივი რესურსების თუ წიაღის მოპოვებასთან დაკავშირებული სოციალური, ეკონომიკური და ეკოლოგიური საკითხები, გთავაზობთ თარგმანების სერიას. იმისთვის, რომ თარგმანების მნიშვნელობა და მათი კავშირი ქართულ რეალობასთან უფრო ცხადი გამხდარიყო, პროექტში ჩართულმა მკვლევარებმა მოამზადეს თარგმანების სინთეზური შესავლები. სრულად... წყარო: emc.org.ge

თბილისი. კავშირი „საფარი" აქვეყნებს ბლოგპოსტს: ლამაზად ყოფნის წნეხის ქვეშ – სილამაზე სახის გარეშე. „ჰაბიბას პორტრეტებში ქალები შთამბეჭდავად გამოიყურებიან, თუმცა, მათი სახეები მთლიანად დაფარულია. პორტრეტების სერია თვალნათლივ გვიჩვენებს, თუ როგორ კარგავს ქალი თავის "მეს”. ყველა ეს ქალი მთელი ძალით ცდილობს, ლამაზად და მიმზიდველად გამოიყურებოდეს, თუმცა, მათი ერთმანეთისგან გარჩევა უკვე შეუძლებელია". სრულად... წყარო: sapari.ge