1 ივნისს, 12:00 საათზე ბავშვთა დაცვის საერთაშორისო დღისადმი მიძღვნილი ტრადიციული „მზის ფესტივალი" გაიმართება. მისამართი: თბილისი, ბავშვთა ქალაქი „მზიური დეტალური ინფორმაცია

თბილისი. ინფორმაციის თავისუფლების განვითარების ინსტიტუტმა საქართველოს შოთა რუსთაველის თეატრისა და კინოს სახელმწიფო უნივერსიტეტიდან, თბილისის სახელმწიფო სამხატვრო აკადემიიდან მიღებული ინფორმაცია გამოაქვეყნა. ვებგვერდზე განთავსდა ინფრომაცია უნივერსიტეტების პრემიების, მოქმედი საშტატო ნუსხისა და თანამდებობრივი სარგოს, ორგანიზაციის ბალანსის, ავტოპარკზე გაწეული ხარჯებისა და 20 ოქტომბრიდან განთავისუფლებული თანამშრომლების შესახებ. ინფორმაცია საქართველოს შოთა რუსთაველის თეატრისა და კინოს სახელმწიფო უნივერსიტეტიდან ინფორმაცია თბილისის სახელმწიფო სამხატვრო აკადემიიდან წყარო: opendata.ge

თბილისი. ახალგაზრდა იურისტთა ასოციაციასთან არსებული მედიის სამართლებრივი დაცვის ცენტრის ხელმძღვანელი ნათია კაპანაძე თანამდებობას 1 ივნისიდან დატოვებს. მოვალეობას ამავე ცენტრის იურისტი მარიამ გოგოსაშვილი შეასრულებს. კაპანაძე აცხადებს რომ იგი საზღვარგარეთ სწავლის გაგრძელებას აპირებს. „რაღა თქმა უნდა, დავრჩები მედია სფეროში და გავაგრძელებ მუშაობას ამ სფეროს განვითარებისათვის. ამ მიზნით ვაპირებ სწავლის გაგრძელებას საზღვარგარეთ. გამგზავრებამდე კი აქტიურად ვიქნები ჩართული მედიაში მიმდინარე პროცესებში და კვლავაც გავაგრძელებ მედიის ინტერესებზე ზრუნვას", - განაცხადა ნათია კაპანაძემ, თუმცა აღნიშნა, რომ კონკრეტული გადაწყვეტილება არ მიუღია თუ სად გააგრძელებს მუშაობას სასწავლებლად წასვლამდე. სრულად წყარო: media.ge

სამეგრელო. საერთაშორისო გამჭვირვალობა – საქართველომ ბლოგპოსტი – „ზუგდიდის საკრებულო და მაჟორიტარი დეპუტატის ბიურო – გამჭვირვალობის პრობლემები" – გამოაქვეყნა. ორგანიზაცია არსებულ პრობლემებზე საუბრობს: სხდომების შესახებ ინფომაციის გავრცელება, განსახილველი საკითხების შესახებ ინფორმაციის მომზადება, შეხვედრები ადგილობრივ მოსახლეობასთან. სრულად წყარო: transparency.ge

თბილისი. გოუ ჯგუფი ახალი პროგრამის ფარგლებში იწვევს იმ პირებს, ვისაც სურს გახდეს მოქალაქე რეპორტიორი. ახალი კურსის ფარგლებში, რომელიც მთელ სამხრეთ კავკასიას მოიცავს, გოუ ჯგუფის წარმომადგენლები ასწავლიან, როგორ გახდნენ მსურველები წარმატებული ბლოგერი, როგორ გადაიღონ საინტერესო დოკუმენტური ფილმი და როგორ გახდნენ აქტიური მოქალაქეები. კონკურსი ღიაა ნებისმიერი მსურველისთვის, უპირატესობა ეძლევა რეგიონში მცხოვრებ კანდიდატებს. კანდიდატი უნდა ფლობდეს რუსულ ენას; კომპიუტერთან ზოგადი მუშაობის უნარიც უპირატესობად ჩაითვლება. კონკურსში მონაწილეობის მისაღებად გააგზავნეთ წერილი თქვენს შესახებ მისამართზე: maka.tsnobiladze@gogroupmedia.net წყარო: გოუ ჯგუფის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა ღვინის ეროვნული სააგენტოდან მიღებული საჯარო ინფორმაცია გამოაქვეყნა. გამოქვეყნებული მასალები მოიცავს  პრემიების, ორგანიზაციის ბალანსის, გათავისუფლებული თანამშრომლების, საშტატო ნუსხისა და თანამდებობრივი სარგოების, ავტოპარკის, დაფინანსებული ღონისძიებების შესახებ ინფორმაციას. სრულად წყარო: opendata.ge

სამოქალაქო აქტივიზმის ახალგაზრდული ქსელის წევრები  ქუთაისის, თელავის, ახალციხის, მარნეულის, ზუგდიდის და დმანისის ახალგაზრდული ცენტრები ერთვებიან კამპანიაში და ერთდროულად აღნიშნავენ თამბაქოსთან ბრძოლის მსოფლიო დღეს. გაიმართება როგორც საინფორმაციო ხასიათის პრეზენტაციები, ასევე დარიგდება ბეჭდური მასალები. ჯანდაცვის მსოფლიო ორგანიზაცია, 1987 წლიდან მოყოლებული ყოველი წლის 31 მაისს აღნიშნავს ამ დღეს და ამით შეახსენებს ადამიანის ჯანმრთელობაზე თამბაქოს მავნე ზეგავლენას. წყარო: დემოკრატ მესხთა კავშირის გვერდი სოციალურ ქსელში

თბილისი. 30 მაისს სასტუმრო „ქორთიარდ მერიოტში" სისხლის სამართლის რეფორმის უწყებათაშორისი საკოორდინაციო საბჭოს რესოციალიზაცია–რეაბილიტაციის გაერთიანებული ჯგუფის შეხვედრა გაიმართა. შეხვედრის მიზანს წარმოადგენდა მსჯავრდებულების რესოციალიზაცია-რეაბილიტაციის საკითხის განხილვა, როგორც სასჯელაღსრულების სისტემის შიგნით, ასევე, დაწესებულებიდან გათავისუფლების შემდგომ პერიოდში, ძირითადი მიმართულებებისა და პრიორიტებების განსაზღვრა ეფექტური სარეაბილიტაციო პროგრამების შესამუშავებლად და სახელმწიფო უწყების კოორდინირებული მოქმედების გეგმის განსაზღვრა. შეხვედრის ფარგლებში შემუშავდა მსჯავრდებულთა და ყოფილ მსჯავრდებულთა რესოციალიზაცია-რეაბილიტაციის სტრატეგია და სამოქმედო გეგმა და შეიქმნა სტრატეგიის განხორციელების ჯგუფი. ცენტრი „აფხაზეთი" ფსიქო-რეაბილიტაციისა და განათლებისა და დასაქმების სამუშაო ჯგუფების წევრი გახდა. სამუშაო ჯგუფების საქმიანობას კოორდინაციას გაუწევენ - საქართველოს იუსტიციის სამინისტროს დანაშაულის პრევენციის ცენტრი და სასჯელაღსრულების, პრობაციისა და იურიდიულ დახმარების საკითხთა სამინისტროს სასჯელაღსრულების დეპარტამენტი და პრობაციის ეროვნული სააგენტო. წყარო: ფონდ „აფხაზეთის" გვერდი სოციალურ ქსელში

თბილისი. ახალგაზრდული ხმები საქართველოს იუსტიციის სამინისტროსთან თანამშრომლობით ახორციელებს პროექტს „ახალი ცხოვრება – ახალი შესაძლებლობები". პროექტი მიზნად ისახავს ყოფილი პატიმრების რესოციალიზაციისა და რეაბილიტაციის ხელშეწყობას. იგი სამი ეტაპისგან შედგება: დიდი თამაში, რომელიც უკვე გაიმართა და რომლის შედეგადაცც პროექტის მონაწილეებმა და ორგანიზატორებმა გაიცნეს ერთმანეთი, ცხოვრების ჯანსაღ წესთან ერთად თანამშრომლობას ჩაუყარეს საფუძველი. პროექტის მონაწილეებს ასევე ჩაუტარდათ ტრენინგები კონფლიქტის მენეჯმენტსა და პიროვნული განვითარების მიმართულებით. პროექტის მესამე ეტაპი წარმოადგენს თანასწორ განმანათლებელთა მეთოდით ახალგაზრდული ხმების წევრების მიერ ტრენინგების ჩატარებას ყოფილი პატიმრებისთვის. წყარო: ორგანიზაციის გვერდი სოციალურ ქსელში

31 მაისს, 18:00 საათზე საჯარო ლექცია ბავშვთა ძირითადი უფლებები საქართველოში აღსაზრდელთა მცირე რიცხვის მქონე ბავშვთა სახლებში და მინდობით აღსაზრდელების მიმღებ ოჯახებში - მიღწევები და საჭიროებები. მომხსენებელი: ტომაშ პოლკოვსკი, ასოციაცია „ჩვენისახლის" პრეზიდენტი, პოლონეთი მისამართი:  თბილისი, თავისუფლების მოედანი 1, ევროპის სახლი

31 მაისს, 18:30 საათზე არასამთავრობო ორგანიზაცია "Welfare Foundation” აწყობს "მსოფლიო თამბაქოს გარეშე” დღისადმი მიძღვნილი მსვლელობას, რომლის მიზანია თამბაქოს მოხმარების აკრძალვის მხარდაჭერა საზოგადოებრივი თავშეყრის ადგილებში. ღონისძიება ხორციელდება EWMI G-PAC-ის "პარტნიორობა ცვლილებებისათვის” საგრანტო პროექტის ფარგლებში. პროგრამის საშუალებით. მისამართი:თბილისი, თავისუფლების მოედანი

თბილისი. საქართველოს სოციალურ მუშაკთა ასოციაციამ სოციალური მუშაკების მიერ სიძულვილის ენის გამოყენების შესახებ განცხადება გაავრცელა. „ასოციაცია მიიჩნევს, რომ სოციალური მუშაკების მიერ სიძულვილის ენის გამოყენება დაუშვებელი და პროფესიულ ღირებულებებთან შეუსაბამო ქმედებაა. იგი წარმოადგენს პროფესიის ღირებულებებისა და პრინციპების უხეშ დარღვევას, რაც ეწინააღმდეგება სოციალური მუშაობის პროფესიული მანდატს და ეჭვქვეშ აყენებს სოციალური მუშაკის, როგორც უსამართლობასთან მებრძოლისა და ადამიანის უფლებების დამცველის როლს", ნათქვამია განცხადებაში. სრულად წყარო:ორგანიზაციის გვერდი სოციალურ ქსელში

თბილისი. საქართველოს წითელი ჯვრის საზოგადოების პროექტის –„ვიმოქმედოთ ერთად" –თანამშრომლები და მოხალისეები ასურელი თემის წარმომადგენლებს ასურელთა კულტურის ცენტრში შეხვდნენ. წითელი ჯვრის წარმომადგენლებმა წარმოადგინეს პრეზენტაცია წითელი ჯვრისა და პროექტის „ვიმოქმედოთ ერთად" შესახებ. შეხვედრის მიზანი იყო ასურული თემისთვის წითელი ჯვრის პრინციპებისა და სტრატეგიული მიმართულებების შესახებ ინფორმაციის მიწოდება და პროექტის საქმიანობების გაცნობა.  წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუმა ბლოგპოსტი – „სამართლიანია თუ არა 112–ის ტარიფები" – გამოაქვეყნა. „112-ის მომსახურებისთვის დადგენილი მოსაკრებლით ხდება გაცილებით დიდი ოდენობის თანხის მობილიზება, ვიდრე ეს ცენტრის ფუნქციონირებისათვისაა საჭირო. ცენტრის მიერ აუთვისებელი თანხები განთავსებულია საბანკო ანგარიშზე და შესაბამისად გაურკვეველია მათი მიზნობრიობა. ინსტიტუტი გამოთქვამს სურვილს, რომ "112″ ის ფუნქციონირებასთან დაკავშირებით დღეს არსებული ტარიფი დადგენილი იყოს რეალურ ეკონომიკურ გათვლებზე დაყრდნობით", ნათვამია ორგანიზაციის ვებგვერდზე. სრულად წყარო: opendatablog.wordpress.com

თბილისი. 30 მაისს სამოქალაქო განათლებისა და პედაგოგთა გადამზადების პროგრამის მხარდაჭერით და სამოქალაქო განათლების პედაგოგთა ფორუმის ინიციტივით დაფუძნდა  ა(ა)იპ „სამოქალაქო განათლების პედაგოგთა ფორუმი". დამფუძნებელთა კრება კონსულტაციისა და ტრენინგის ცენტრში გაიმართა. კრებამ ახლადდაფუძნებული ორგანიზაციის მთავარ ამოცანებად განსაზღვრა: პედაგოგთა პროფესიული განვითარების ხელშეწყობა და მათ შორის გამოცდილების გაზიარების გარემოს შექმნა სფეროში  სიახლეებისა და ინოვაციების დანერგვის გზით. ფორუმი თავის უმთავრეს მიზნად ისახავს საზოგადოებაში და საგანმანათლებლო სისტემაში სამოქალაქო განათლების მნიშვნელობის წარმოჩენასა და სამოქალაქო განათლების პედაგოგის პრესტიჟის ზრდას. გამგეობის წევრებმა გამგეობის თავმჯდომარის პოზიციაზე კენჭი ნინო ბესელიას უყარეს. წყარო:civics.ge

თბილისი. ასოციაცია „გენეზისმა" გამოაცხადა სოციალურ საკითხებზე მომუშავე ჟურნალისტთა კონკურსში გამარჯვებულები. პირველი საპრიზო ჯილდო არცერთ სტატიას არ მიენიჭა, მეორე ადგილი და ფულადი ჯილდო მიენიჭა ჟურნალისტ მედაა გოგსაძეს (სტატია „ზრუნვიდან გამოსული ახალგაზრდა ცხოვრებასთან პირისპირ მარტო არ უნდა დავტოვოთ"), მესამე ადგილი და ფულადი პრიზი გადაეცემა ნათია ლოხიშვილსა და გიორგი სიხარულიძეს (სტატია – „პრობლემები, რომლებსაც ახალგაზრდები სააღმზრდელო დაწესებულებების დატოვების შემდგომ აწყდებიან, გადაუჭრელი რჩება"). ასოციაცია გენეზისმა აღნიშნული კონკურსი პროექტის – „ეკონომიური დამოუკიდებლობის და სოციალური ჩართულობის გაუმჯობესება მზრუნველობამოკლებულ ბავშვთა დაწესებულებებში მყოფი და ინსტიტუციონალური ზრუნვიდან გამოსული მოზარდებისა და ახალგაზრდების" – ფარგლებში გამართა. კონკურსში გამარჯვებულებმა უნდა მიმართონ ასოციაცია „გენეზისს" შემდეგ მისამართზე: თბილისი, ზუგდიდის ქუჩა 3, ტელეფონი 2 911 922/ 2 348 951.   ელექტრონული მისამართი: sandro@genesis.ge, საკონტაქტო პირი სანდრო მათეშვილი

თბილისი. 29 მაისს ჰაინრიჰ ბიოლის ფონდი გაიმართა დისკუსი თემაზე „ვის ეშინია სეკულარული დემოკრატიის?". მათ ვინც ვერ შეძლო საჯარო დისკუსიაზე დასწრება შეუძლია იხილოთ დისკუსიის ჩანაწერი. „ვის ეშინია სეკულარული დემოკრატიის"? წყარო: ნაკადი – სამოქალაქო ინტერნეტ მაუწყებლობა

თბილისი. 31 მაისს ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდსა და „მაკლეინის ასოციაცია ბავშვებისათვის" შორის გაფორმდა ურთიერთანამშრომლობის მემორანდუმი. იგი ითვალისწინებს „თბილისის ბავშვთა კრიზისულ ცენტრში" დასაქმებული პერსონალის გადამზადებას, ბენეფიციართა ქცევის მართვის თემაზე.  მემორანდუმს ხელი მოაწერეს ფონდის დირექტორმა მარინა მესხმა და ასოციაციის დირექტორმა რევაზ ჩინჩალაძემ. წყარო: ახალგაზრდების დამოუკიდებელი ცხოვრების ცენტრის გვერდი სოციალურ ქსელში

იმერეთი.  1 ივნისს, ორგანიზაცია „რადარამი" ფრანკლინ ფოერის ახლადგამოცემული წიგნის – „როგორც აგვიხსნა ფეხბურთმა მსოფლიო" – პრეზენტაციას გამართავს ქუთაისში. წიგნის ავტორმა 8 თვის განმავლობაში იმოგზაურა მსოფლიოს სხვადასხვა ქვეყანაში, შეხვდა ფეხბურთთან დაკავშირებულ უამრავ საინტერესო ადამიანს, და წიგნის საშუალებით ავტორი ცდილობს აჩვენს თუ როგორ არის დაკავშირებული მეოცე საუკუნის ფეხბურთი გლობალურ პოლიტიკურ–ეკონომიკურ პროცესებთან. წყარო: ორგანიზაციის გვერდი სოციალურ ქსელში

კახეთი. 29 მაისს პროექტის – „ინტერაქცია თვითმმართველობასა და მოსახლეობას შორის ინტერნეტ სამოქალაქო ჩართულობის გზით" ფარგლებში, სათემო კავშირმა „ნუკრიანმა" და „სამოქალაქო ინიციატივამ" გამართეს შეხვედრების სერია სიღნაღის მუნიციპალიტეტის სოფლებში, ბოდბეში, მაღაროსა და ილიაწმინდაში. წყარო: ორგანიზაციის გვერდი სოციალურ ქსელში

31 მაისს, 11:00 საათზე, საქართველოს ახალგაზრდა იურისტთა ასოციაციის ქუთაისის ფილიალის ოფისში გაიმართება არასამთავრობოების  ყოველთვიური საინფორმაციო, საკოორდინაციო შეხვედრა. მისამართი:ქუთაისი, კოსტავას ქუჩა 11

31 მაისს, 12:00 საათზე ახალგაზრდული პარლამენტის წევრები მთავრობას და საერთაშორისო საზოგადოებას საგანგებო განცხადებით მიმართავენ. მისამართი:თბილისი, პრაიმტაიმის პრესკლუბი