31 მაისს, 12:00 საათზე, არასამთავრობო ორგანიზაციების _ „საზოგადოებრივი დამცველისა" და „ახალგაზრდები სამართლიანობისთვის - საქართველოს" წარმომადგენლები კონფლიქტისპირა სოფლების მოსახლეობას შეხვდებიან.

თბილისი. საქართველოს ახალგაზრდა იურისტთა ასოციაციამ პროკურატურის რეფორმირების საკითხზე განცხადება გაავრცელა. „უმნიშვნელოვანესი საკითხი, რომელიც რეფორმის ფარგლებში უნდა იქნეს მიღწეული, პროკურატურის პოლიტიკური ნეიტრალურობის უზრუნველყოფაა. ამ თვალსაზრისით, იუსტიციის მინისტრისათვის სისხლისსამართლებრივი დევნისა და საპროკურორო ზედამხედველობის ფუნქციის ჩამოშორება მნიშვნელოვანი ნაბიჯია", ნათქვამია განცხადებაში. ორგანიზაცია მიუკერძოებელი საქმიანობის მნიშვნელოვან გარანტად მიიჩნევს ისეთი საკითხების მოგვარებას როგორიცაა: მთავარი პროკურორის დანიშვნა/გათავისუფლების წესის დახვეწას... მთავარი პროკურორის მიუკერძოებლობის უზრუნველმყოფი მექანიზმის შექმნას... მთავარი პროკურორის სისხლისსამართლებრივი პასუხისმგებლობის საკითხის მოწესრიგებას. რაც შეეხება პროცედურულ საკითხებს საია აღნიშნავს, რომ „ასეთი მნიშვნელოვანი პროექტების განხილვისას სამოქალაქო სექტორის მონაწილეობის მნიშვნელობა სათანადოდ უნდა იქნეს გააზრებული. შესაბამისად, მივმართავთ საქართველოს პარლამენტს, არ მიიღოს კანონი მესამე მოსმენით, დააბრუნოს ის მეორე მოსმენაზე განსახილველად და უზრუნველყოს სამოქალაქო სექტორის დაინტერესებული წარმომადგენლების კანონპროექტის განხილვის პროცესში ჩართვა". სრულად წყარო: gyla.ge

30 მაისს, 20:00 საათზე „ლიბერალიზმის სასწავლო ცენტრში" გაიმართება საჯარო ლექცია თემაზე: „იდენტობა და სახელმწიფოებრიობა". ლექციას წაიკითხავს ფილოსოფოსი ლევან ღამბაშიძე. მისამართი, თბილისი, კალისტრატე ცინცაძის 6–7, საქართველოს ჟურნალისტური ეთიკის ქარტია ლექცია გადაიცემა ონლაინ რეჟიმში ცენტრის Facebook გვერდზე და ბლოგზე

თბილისი. საერთაშორისო გამჭვირვალობა საქართველომ მაყურებლებს ტელეკრიტიკის საშუალებით სადისკუსიოდ ახალ თემას სთავაზობს: დაზიანებული ტრავერტინები ყაზბეგში. სრულად  წყარო: telekritika.ge

თბილისი. ადამიანის უფლებების სწავლებისა და მონიტორინგის ცენტრმა სოციალურ ქსელში გაავრცელა ინფორმაცია, რომ გაეროს შეზღუდული შესაძლებლობის მქონე პირთა უფლებების კონვენცია (UN CRPD) საქართველოს პარლამენტის ბიუროზე გავიდა. წამყვან კომიტეტად განისაზღვრა ჯანმრთელობის დაცვისა და სოციალურ საკითხთა კომიტეტი.  როგორც პარლამენტიდან EMC-ს აცნობეს წამყვანმა და სხვა კომიტეტებმა (რომლებასაც სავალდებულო დასკვნის წარდგენა მოეთხოვებათ) „კონვენცია ივინისს პირველ ორ კვირაში უნდა განიხილონ. თუ დოკუმენტი საკანონმდებლო ორგანოში წინააღმდეგობას არ წააწყდა რატიფიცირება თვის ბოლომდე უნდა მოხდეს". სრულად წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა მწვანეებმა ყაზბეგში მიმდინარე სამუშაოებზე განცხადება გაავრცელეს. ორგანიზაციის გვერდზე სოციალურ ქსელში ნათქვამია – „ყაზბეგში, თრუსოს ხეობაში მდებარე ტრავერტინები წარმოადგენს ბუნების ძეგლს, რომლის ნაწილიც განადგურებულია. მომხდარზე პასუხისმგებლობა სრულიად ეკისრება საქართველოს ინფრასტრუქტურის სამინისტროს, საავტომობილო გზების დაპარტამენტს, გარემოს დაცვის სამინისტროს და ყველა იმ სახელმწიფო ორგანოს, რომლებმაც საკონტრაქტო კომპანიის მიერ ჩადენილ ვანდალიზმზე თვალი დახუჭა. სასწრაფოდ უნდა შეჩერდეს ყველა სახის სამუშაო, რომელსაც მომუშავე კომპანია ახორციელებს. ამასთან, მომხდარზე დაიწყოს სამართლებრივი ძიება". წყარო: ორგანიზაციის გვერდი სოციალურ ქსელში

გურია. 31 მაისს ბავშვთა საერთაშორისო დღეის აღსანიშნავად გურიის ახალგაზრდული რესურსცენტრი და სამოქალაქო განათლებისა და პედაგოგთა გადამზადების პროგრამის 33 მიზნობრივი სკოლის მოხალისე ახალგაზრდები გამართავენ აქციას – „გურია პოლიეთილენის გერეშე". ისინი მოუწოდებენ ყველა მსურველს შეუერთდნენ მათ აქციას.  წყარო: გურიის ახალგაზრდული რესურსცენტრი

თბილისი. ინფორმაციის თავისუფლების განვითარების ინსტიტუტი ახალ ვიდეო–რგოლს აქვეყნებს,  რომლის მიზანია საზოგადოებას მიაწოდს ინფორმაცია ინიციატივის – „ღია მმართველობის პარტნიორობა" – შესახებ. ღია მმართველობის ინიციატივა თანამედროვე ტექნოლოგიების გამოყენებით ხელს უწყობს მთავრობების ღიაობასა და პოლიტიკურ პროცესებში მოქალაქეების ჩართულობის გაზრდა. იუსტიციის სამინისტროს ვებ-გვერდზე სპეციალურად ამ ინიციატივისთვის შექმნილია განყოფილება, სადაც მოქალაქეებს შეუძლიათ მთავრობას გაუგზავნონ საკუთარი იდეები მთავრობის მეტი გამჭვირვალობის მისაღწევად.  ვიდეო-რგოლი შექმნილია ინფორმაციის თავისუფლების განვითარების ინსტიტუტის მიერ პროექტის „ელექტრონული ჩართულობის განვითარება საქართველოში" ფარგლებში.  ვიდეო-რგოლი მომზადდა აღმოსავლეთ-დასავლეთის მართვის ინსტიტუტის (EWMI) პროგრამის „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარება" (G-PAC) ფარგლებში, რომელსაც აფინანსებს ამერიკის შეერთებული შტატების საერთაშორისო განვითარების სააგენტო (USAID). ვიდეო–რგოლი  წყარო: ორგანიზაციის გვერდი სოციალურ ქსელში

სამეგრელო. საერთაშორისო გამჭვირვალობა საქართველომ ზუგდიდის მუნიციპალიტეტის გამგეობის მიერ სოციალურად დაუცველი მოსახლეობისთვის „უფასო სასადილოს" სერვისის შესახებ პუბლიკაცია გამოაქვეყნა. ზუგდიდის მუნიციპალიტეტიდან მიღებულ ინფორმაციაზე დაყრდნობით ორგანიზაცია თავის ვებგვერდზე აღნიშნავს, რომ „...ზუგდიდის მუნიციპალიტეტის გამგეობა არღვევს ბენეფიციართა შერჩევის მის მიერვე დადგენილ კრიტერიუმებს.." სრულად  წყარო: transparency.ge

თბილისი. 1 ივნისს, ბავშვთა დაცვის საერთაშორისო დღეს, საქართველოს წითელი ჯვრის საზოგადოება უერთდება „მზის ფესტივალს", რომელიც „მზიურში" გაიმართება. „მზის ფესტივალის" იდეის ავტორი და ორგანიზატორია საინიციატივო ჯგუფი. აღნიშნული ღონისძიება წელს უკვე მერვედ ტარდება და განკუთვნილია ყველა ბავშვისთვის, მიუხედავად მათი ფიზიკური შესაძლებლობებისა და სოციალური სტატუსისა. ფესტივალზე დასწრება თავისუფალია. ღონისძიებების პროგრამა: 12:00 ზაალ სულაკაურის სამხატვრო სტუდიის, შეზღუდული შესაძლებლობის მქონე ბავშვების ხელნაკეთი ნივთების და მხატვარ ნინო ჩაკვეტაძის ილუსტრაციების გამოფენა. 13:00 - ფესტივალის გახსნა (Neverland -ის თოჯინების მსვლელობა ჭავჭავაძეზე) 14:00 - Neverland -ის სპექტაკლი, „დაკარგული სხივი”, სადაც მონაწილეობას მიიღებენ შეზღუდული შესაძლებლობის მქონე ბავშვები. 16:30 – „ბასტი-ბუბუს" კონცერტი მთელი დღის განმავლობაში მზიურის ტერიტორიაზე ბავშვებს გაართობს მხიარული თოჯინა – „მზე" და სხვა ზღაპრის გმირები. წყარო:ორგანიზაციის გვერდი სოციალურ ქსელში

ქვემო ქართლი. სიქას ორგანიზებით „ნიჭიერების ფესტივალის" ფარგლებში რუსთავში სამდღიანი ღონისძიება გაიმართება. 30 და 31 მაისს სურათებისა და ხელნაკეთი ნივთების გამოფენა და ლიდერატურული საღამო მოეწყობა. 1 ივნისი კი მუსიკას დაეთმობა, მონაწილეობას სოლო შემსრულებლები და ბენდები მიიღებენ. ფესტივალის მიზანია რუსთავში მცხოვრები ახალგაზრდებს მიეცეს თავიანთი ნიჭის რეალიზების შანსი. ასევე ჰქონდეთ თავისუფალი დროის პროდუქტიულად გატარების შესაძლებლობა. პროექტი დაიწერა „სამოქალაქო განათლებისა და პედაგოგთა გადამზადების პროგრამაში" ორგანიზებული „ახალგაზრდული ფორუმის" ფარგლებში.  ფორუმი ორგანიზებულია სამოქალაქო განათლებისა და პედაგოგთა გადამზადების პროგრამის ფარგლებში, რომელსაც ახორციელებს ამერიკული ორგანიზაცია PH International, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით და საქართველოს განათლებისა და მეცნიერების სამინისტროს მხარდაჭერით. სრულად წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა ბავშვთა და ახალგაზრდობის ეროვნული ცენტრიდან მიღებული ინფორომაცია გამოაქვეყნა. ვებგვერდზე განთავსდა ინფორმაცია პრემიების, ორგანიზაციის ბალანსის, განთავისუფლებული თანამშრომლების, საშტატო ნუსხისა და თანამდებობრივი სარგოების, ავტოპარკზე გაწეული ხარჯების, დაფინანსებული ღონისძიებების, საჯარო ინფორმაციის გაცემის ანგარიშების, თანამშრომლების, თანამდებობის პირების ბიოგრაფიული მონაცემების, 10 დეკემბრის ანგარიშების შესახებ.  სრულად წყარო:ორგანიზაციის გვერდი სოციალურ ქსელში

თბილისი. 1 და 2 ივნისს ტფილისის ჰამქარი აწყობს საგანმანათლებლო ტურებს. 1 ივნისს, შაბათს მოეწყობა ტური „ფეხით შემოვლილი კალა, კლდისუბანი, აბანოთუბანი, ხარფუხი. ხოლო 2 ივნისს, კვირას, ჩატარდება ტური „ფეხით შემოვლილი მეტეხისუბანი და ავლაბარ–ჩუღურეთი. 1 ივნისის ტურის შესახებ დამატებითი ინფორმაცია 2 ივნისის ტურის შესახებ დამატებითი ინფორმაცია წყარო: ორგანიზაციის გვერდი სოციალურ ქსელში

თბილისი. არასამთავრობო ორგანიზაცია „მერცესი"  პროექტის – „ურთიერთდახმარების გზით კრიზისის დაძლევისა და ეტლის მომხმარებელთა სამოქალაქო აქტივობის მხარდაჭერის"  – ფარგლებში სასწავლო კურსს ატარებს. თბილისის წამყვანი კლინიკებიდან შეირჩა ექთნები, რომლებსაც უტარდებათ სწავლება, სალექციო კურსის მთავარი მიზანია ზურგის ტვინის დაზიანების მქონე პაციენტების სწორი მოვლის, საერთაშორისო სტანდარტების შესაბამისი გამოცდილების გაზიარებისა და ასეთი პაციენტების მდგომარეობის მართვის თანამედროვე მიდგომების გაცნობა და შესწავლა.  წყარო:ორგანიზაციის გვერდი სოციალურ ქსელში

კახეთი. სათემო განვითარების ცენტრი სოფელ ერის იმედის სკოლისთვის წიგნების შეგროვებას იწყებს. სკოლის ბიბლიოთეკისა და წიგნის ფონდის შექმნისთვის წიგნებით დახმარება ნებისმიერ მსურველს შეუძლია. სრულად  წყარო:ორგანიზაციის გვერდი სოციალურ ქსელში

თბილისი. 28 მაისს, არასამთავრობო ორგანიზაციების – „იდენტობა", „ქალთა ინიციატივების მხარდამჭერი ჯგუფი", „საქართველოს ახალგაზრდა იურისტთა ასოციაცია" ინიციატივითა და საქართველოს სახალხო დამცველის მხარდაჭერით, გაიმართა სამუშაო შეხვედრა  საქართველოს შს სამინისტროს თბილისის მთავარი სამმართველოს უფროსსა და ამავე სამმართველოს უფროსის მოადგილესთან.  სამუშაო შეხვედრაზე მსჯელობა წარიმართა 17 მაისის შემდგომ, ლგბტ თემის წევრთა მიმართ გახშირებული შეურაცხყოფისა და ძალადობის ფაქტების შესახებ. შეხვედრის მონაწილეებმა ისაუბრეს სამართალდამცავთა მუშაობის ეფექტურობის გაძლიერებაზე და ინტერვენციის ეფექტური სტრატეგიების შემუშავებაზე. ყურადღება დაეთმო სიძულვილით მოტივირებული დანაშაულების იდენტიფიცირების აუცილებლობას და პოლიციის მიმართ ლგბტ თემის წარმომადგენელთა მიმართვიანობის გაზრდის საჭიროებას. თბილისის შს მთავარი სამმართველოს წარმომადგენლებმა აღნიშნეს, რომ მზად არიან თანამშრომლობისთვის. დაიგეგმა ერთობლივი სამუშაო ჯგუფის ჩამოყალიბება, რომელიც იზრუნებს სამართალდამცავთა ცნობიერების ამაღლებასა და პროფესიული ღონისძიებების გაძლიერებაზე ლგბტ თემის წევრთა უფლებების დაცვის მიზნით. სრულად წყარო: ombudsman.ge

თბილისი. საერთაშორისო გამჭვირვალობა–საქართველომ Telekritika.ge–ზე დისკუსიის მორიგი თემები – „ვანო მერაბიშვილს ბრალი დაუმძიმდა" და „სოფელ დიცთან საზღვრის გადმოწევის შედეგები" – გამოაქვეყნა. კომენტარის დატოვება და დისკუსიის დაწყება ნებისმიერ მსურველს შეუძლია.  ტელეკრიტიკა – „ვანო მერაბიშვილს ბრალი დაუმძიმდა" ტელეკრიტიკა  „სოფელ დიცთან საზღვრის გადმოწევის შედეგები"  წყარო: telekritika.ge

თბილისი. ასოციაცია „ანიკაში" 28 მაისს პროექტის პრეზენტაცია გაიმართა, რომლის ფარგლებში ასოციაციამ ადაპტირებული მიკროავტობუსი შეიძინა. ღონისძიებას გრემანიის ელჩი საქართველოში დაესწრო. პროექტი დაფინანსებულია გერმანიის საელჩოს მიერ. წყარო:ორგანიზაციის გვერდი სოციალურ ქსელში

გურია. „ახალგაზრდა პედაგოგთა კავშირმა" ბავშვთა უფლებების დაცვის დღისადმი მიძღვნილი კვირეულის განრიგი გაავრცელა. ღონისძიებები ოზურგეთში 30, 31 მაისსა და 1 ივნისს გაიმართება.  განრიგი  წყარო:ორგანიზაციის გვერდი სოციალურ ქსელში

გერმანიის ქართულმა სათვისტომომ კონკურსის – „წლის საუკეთესო სტუდენტი" – გამარჯვებული გამოავლინა. ხელოვნებისა და სოციალურ მეცნიერებათა ალანუს უნივერსიტეტის სახვითი ხელოვნების ფაკულტეტის სტუდენტ ლევან სვანიშვილს, საქართველოს დამოუკიდებლობისადმი მიძღვნილ ზეიმზე, ფულადი პრემია და სათვისტომოს საპატიო სიგელი გადაეცა. 2013 წლის კონკურსში მონაწილეობისათვის კონკურსზე განაცხადი 8 სტუდენტმა შეიტანა, ყველა მათგანი საპატიო სიგელით დაჯილდოვდა.  წყარო:ორგანიზაციის გვერდი სოციალურ ქსელში

თბილისი. 29 მაისს, ინფორმაციის თავისუფლების განვითარების ინსტიტუტმა საჯარო დისკუსია გამართა და დამსწრე საზოგადოებას მოქალაქეების პოლიტიკური ჩართულობის პლატფორმის www.ichange.ge -ს საკუთარი კონცეფცია გააცნო. დისკუსიაში მონაწილეობა მიიღეს როგორც არასამთავრობო ორგანიზაციების, ასევე სამთავრობო სექტორის წარმომადგენლებმა და სხვა დაინტერესებულმა პირებმა.  შეხვედრის დასაწყისში პრეზეტაცია წარმოადგინა IDFI-ს თავმჯდომარემ და  ისაუბრა საერთაშორისო პრაქტიკის მაგალითებზე, იმის შესახებ რა ფუნქციონალი და მექანიზმები უნდა არსებობდეს მოქალაქეთა მონაწილეობის პლატფორმის. დისკუსიის მონაწილეებმა დასვეს კითხვები წარმოდგენილი კონცეფციის ირგვლივ და გამოხატეს საკუთარი მოსაზრებები. მსჯელობა გაიმართა პეტიციის ხელმომწერთა საჭირო რაოდენობის, ასევე პლატფორმის სახელწოდებისა და სხვა დეტალების შესახებ.  წყარო:ორგანიზაციის გვერდი სოციალურ ქსელში

აჭარა. 29 მაისს, ბათუმის დემოკრატიული ჩართულობის ცენტრში, ევრაზიის თანამშრომლობის ფონდმა გამართა ანგარიშის პრეზენტაცია, რომლის სახელწოდებაცაა – „სურსათის უვნებლობის სახელმწიფო რეგულირება: საქართველოს ხელისუფლების მიერ 2012 წელს გაწეული საქმიანობის შეფასება". პრეზენტაციაზე გამომსვლელებმა შეაფასენ 2012 წელს საქართველოს ხელისუფლების მიერ გაწეული საქმიანობა და გამოყვეს ის პრობლემები, რომლებიც ხელს უშლიდა რეფორმების განხორციელებას. ასევე, წაროადგინეს ის რეკომენდაციები, რომლებისც ორიენტირებული იყო პრობლემების გადაჭრაზე. პრეზენტაციაზე წარმოდგენილი ანგარიში წინასწარია, ევრაზიის თანამშრომლობის ფონდი ანგარიშის  ავტორებთან ერთად აგროვებს შენიშვნებს აღნიშნული მიმართულებით მომუშავე ორგანიზაციებისგან და მზად არის ყველა რელევანტური შენიშვნა გაითვალისწინოს, რის შემდეგაც ანგარიშის საბოლოო ვერსია გამოიცემა.