სამცხე-ჯავახეთი. ახალგაზრდა ევროპელი ელჩები მარინე ანანიან და გოჰარ პოღოსიანი თანატოლებს შეხვდნენ და საქართველოს ევროატლანტიკურ ინტეგრაციაზე არსებულ შესაძლებლობებსა და გამოწვევებზე ესაუბრნენ. სრულად... წყარო: დემოკრატ მესხთა კავშირის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია, საჯაროდ გავრცელებულ წყაროებზე დაყრდნობით, ეხმიანება ლაზარე გრიგორიადისის საქმეს და მიიჩნევს, რომ შესაძლოა იკვეთებოდეს ბრალდებულის უფლებების დარღვევის შემთხვევები, რის გამოც მოუწოდებს სპეციალურ საგამოძიებო სამსახურს და სახალხო დამცველს, იმოქმედონ თავიანთი მანდატის შესაბამისად. კერძოდ, სასამართლომ საჯაროდ არ დაასაბუთა აღკვეთი ღონისძიების სახით გამოყენებული პატიმრობა; მაღალი თანამდებობის პირების მიერ გავრცელებულმა განცხადებებმა შესაძლოა ლაზარე გრიგორიადისის სამართლიანი სასამართლოს უფლებაზე უარყოფითად იმოქმედოს. ეს, რიგ შემთხვევაში, ამავდროულად, არღვევს ლაზარე გრიგორიადისის უდანაშაულობის პრეზუმპციას; თვითინკრიმინაციის პრივილეგიის შესაძლო დარღვევა; არასათანადო მოპყრობის აკრძალვის შესაძლო დარღვევა. მიგვაჩნია, რომ ლაზარე გრიგორიადისის მიმართ განვითარებული მოვლენები, მის მიერ სამართლიანი სასამართლოს უფლებით სარგებლობას მნიშვნელოვნად შეზღუდავს, ამასთან დაკავშირებით, საია მოუწოდებს: - ხელისუფლების წარმომადგენლებს - თავი შეიკავონ დისკრიმინაციული განცხადებებისგან და ლაზარე გრიგორიადისის ბრალდების საქმეზე არ გასცდნენ უდანაშაულობის პრეზუმციის ფარგლებს. - სპეციალურ პენიტენციურ სამსახურს - ეროვნული კანონმდებლობისა და სახელმწიფოს საერთაშორისო ვალდებულებებთან სრული შესაბამისობით დაიცვას პატიმრის უფლებები. - სპეციალურ საგამოძიებო სამსახურს - ლაზარე გრიგორიადისის ადვოკატის მიერ გაჟღერებული ინფორმაციის საფუძველზე დაიწყოს გამოძიება. - საქართველოს სახალხო დამცველს - როგორც საქართველოს ტერიტორიაზე ადამიანის უფლებების დაცვაზე ზედამხედველობის განმახორციელებელს, იმოქმედოს მისი მანდატით გათვალისწინებული მექანიზმებით და, მათ შორის, განახორციელოს ხშირი მონიტორინგი პატიმარ ლაზარე გრიგორიადისის უფლებრივ მდგომარეობაზე. სრულად... წყარო: www.gyla.ge

სამეგრელო. საერთაშორისო გამჭვირვალობა - საქართველოს ინფორმაციით, სენაკის მერის, ვახტანგ გადელიას ბიძის, დემურ გადელიას კომპანია სენაკის მერიის ტენდერებს უკონკურენტოდ იგებს.  „სს „არქეოპოლისმა” 2023 წელს ორ ტენდერში უკონკურენტოდ გაიმარჯვა. ხელშეკრულებების ჯამურმა ღირებულებამ კი 5 251 682 ლარი შეადგინა. ვახტანგ გადელია სენაკის მერად 2021 წელს აირჩიეს. ამის შემდეგ მისი ბიძის  კომპანიამ სენაკის მერიის 9 ტენდერი მოიგო, ჯამური ღირებულებით -  10 349 587 ლარი. ამ ტენდერებში „არქეოპოლისს” კონკურენტი მხოლოდ 3 შემთხვევაში ჰყავდა, მათ შორის ორჯერ - სენაკის მერის ბიძაშვილის, იოსებ გადელიას კომპანია შპს „ინდიკო”“, ნათქვამია ორგანიზაციის ბლოგპოსტში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, გაეროს შშმ პირთა უფლებების კომიტეტმა საქართველოში შშმ პირთა უფლებრივი მდგომარეობა და გაეროს შშმ პირთა უფლებების კონვენციის შესრულების პროგრესი პირველად შეაფასა, ამ ჯგუფის წინაშე არსებული გამოწვევები შეაჯამა და მთავრობის მიმართ დასკვნითი მოსაზრებები გამოსცა. „თავისი 19-გვერდიანი შეფასებისა და რეკომენდაციების შემუშავებისას, მთავრობის მიერ წარდგენილ ანგარიშთან ერთად, კომიტეტი საქართველოს სახალხო დამცველისა და სამოქალაქო საზოგადოების, მათ შორის, შშმ პირთა ორგანიზაციების მიერ მომზადებულ ანგარიშებს დაეყრდნო. აღსანიშნავია, რომ სოციალური სამართლიანობის ცენტრმა, თავის პარტნიორ ორგანიზაციებთან ერთად, კომიტეტს შშმ პირთა უფლებრივი მდგომარეობის შესახებ 2017, 2018, 2020 და 2023 წლებში, 5 ანგარიში წარუდგინა“. სრულად... წყარო: socialjustice.org.ge

4 აპრილს, 14:00 საათზე, IBSU-ს ახალგაზრდა ლიდერთა კლუბი იწყებს პროექტს Youth Talk, რომლის ფარგლებში სტუდენტები ისაუბრებენ სხვადასხვა აქტუალურ თემებზე, რაც ხელს შეუწყობს მათი ლიდერული უნარების განვითარებას. Youth Talk-ის სადებიუტო თემა იქნება - The Power of Youth - ახალგაზრდების ძალა. სრულად...

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: ქართული საპენსიო რეფორმის მომავალი. „საპენსიო რეფორმა ვერ იქნება შედეგიანი თუ საპენსიო სააგენტოს არ ექნება საინვესტიციო დამოუკიდებლობა, ხოლო საპენსიო აქტივების განთავსების რისკიანობა არ გაიზრდება. დაარსებიდან დღემდე რეალური ამონაგები 3.56%-ია. საჭიროა ამონაგების ხელშესახები ზრდა იმისთვის, რომ ინფლაციას დავეწიოთ. ამისთვის კი შეუცვლელია განთავსების რისკიანობის ზრდა“. სრულად... წყარო: idfi.ge

სამეგრელო. „ათინათის“ ახალგაზრდული ცენტრის ევროპელმა ელჩებმა, თამარ ქორთუამ და მართა ჭანიამ, სოფელ შამგონას საჯარო სკოლაში ჩაატარეს ტრენინგი თემაზე: „ნატო და ევროკავშირი“. ტრენინგზე განიხილეს შემდეგი საკითხები: რა არის ევროკავშირი და რა ღირებულებები გააჩნია; საქართველოსა და ევროკავშირის ურთიერთობა; საქართველოში არსებული მითები და რეალობა ევროკავშირის შესახებ; რა არის ნატო? საქართველოსა და ნატოს თანამშრომლობა; შეხვედრა ჩატარდა USAID-ის პროგრამა „ერთიანობა მრავალფეროვნებაშია“ ფარგლებში, რომელსაც საქართველოს გაეროს ასოციაცია, აშშ-ის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით ახორციელებს. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრმა საქართველოს შინაგან საქმეთა სამინისტროს მიმართა და მოითხოვა გამოძიების დაწყება, თათია სამხარაძის მიმართ ტელეკომპანია „პოსტვ“-ის დამფუძნებლის შალვა რამიშვილისა და მისი თანამშრომლის მხრიდან ჩადენილ სავარაუდო ადევნების დანაშაულთან დაკავშირებით. სრულად... წყარო: socialjustice.org.ge

აჭარა. 27 მარტს, აჭარის ჰაბის წარმომადგენელმა ქეთი ადეიშვილმა დანდალოს საჯარო სკოლაში მოსწავლეებსა და პედაგოგებთან შეხვედრა გამართა.  შეხვედრაზე, აუდიტორიას მიეწოდა ინფორმაცია შემდეგ საკითხებზე: სამოქალაქო საზოგადოების მნიშვნელობა, ფუნქცია და როლი დემოკრატიული ქვეყნის მშენებლობის პროცესში; აჭარის რეგიონში მოქმედი ორგანიზაციების  საქმიანობის ცალკეული მიმართულებები  და სფეროები; მონაწილეებს გადაეცათ აჭარის რეგიონში მოქმედი სამოქალაქო საზოგადოების ორგანიზაციების შესახებ საინფორმაციო ცნობარი, რომელიც დაინტერესებულ მხარეებს მარტივად აწვდის ინფორმაციას ორგანიზაციების საქმიანობის შესახებ. აჭარის რეგიონული ჰაბი საქმიანობას ახორციელებს ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. „პარტნიორობა ადამიანის უფლებებისთვის“ (PHR) მადლობას გიხდით მხარდაჭერისთვის. ორგანიზაციას თქვენი დახმარებით 9,017.42 ლარი შეუგროვდა. „შემოსული თანხა სრულიად საკმარისია რომ რამდენიმე კრიზისული თვის განმავლობაში, სრულიად დაიფაროს ადმინისტრაციული და კომუნალური ხარჯი და ორგანიზაციამ შეძლოს  შეუფერხებლად გააგრძელოს ადამიანების სამართლებრივი დაცვა“. სრულად... წყარო: ორგანიზაციის გვერდი სოციალურ ქსელში

3 აპრილს 12:00 საათზე, სახალხო დამცველი ლევან იოსელიანი საზოგადოებას საქართველოში ადამიანის უფლებათა და თავისუფლებათა დაცვის მდგომარეობის შესახებ 2022 წლის ანგარიშს გააცნობს. მისამართი: თბილისი, დავით აღმაშენებლის გამზ. #80 (სახალხო დამცველოს აპარატის ოფისი)

თბილისი. საერთაშორისო გამჭვირვალობა - საქართველო რეფერენდუმის დღესთან დაკავშირებით ბლოგპოსტს ავრცელებს. “1991 წლის 31 მარტის რეფერენდუმზე სრულიად საქართველოს მოსახლეობამ, აფხაზეთსა და ცხინვალის რეგიონში მცხოვრები თანამემამულეების ჩათვლით, სულ 3 295 493 ადამიანმა ერთსულოვნად თქვა უარი საბჭოთა კავშირზე და უთხრა “დიახ” დამოუკიდებლობის აღდგენას. არავინ დაუშვებს 32 წლის თავზე ამ სულისკვეთების შეცვლას და ეს ქართველმა ხალხმა არაერთხელ დაამტკიცა”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, Wolt-ის კურიერებმა გადაწყვიტეს, პროტესტი უწყვეტად გააგრძელონ და სანამ მათი მოთხოვნები არ დაკმაყოფილდება, აპლიკაცია გათიშონ. ისინი ღირსეული შრომითი პირობების მოთხოვნით, უკვე ორ თვეზე მეტია საპროტესტო აქციებს მართავენ. „ბოლო პერიოდში ე.წ „გიგ“/პლატფორმულ  სექტორში დასაქმებულების შრომითი პირობები ახალ გამოწვევად იქცია. მოქნილი გრაფიკისა და შრომის ბაზარზე შედარებით კონკურენტული ანაზღაურების გამო, პლატფორმულ ეკონომიკაში დასაქმება ბევრისთვის მისაღები აღმოჩნდა, თუმცა, როგორც ბოლო მოვლენები აჩვენებს, კურიერების უმძიმესი შრომა სათანადოდ არ კომპენსირდება. მათ რუტინულად უწევთ აუნაზღაურებელი დავალებების შესრულება - მაგალითად, ლოდინის დრო, შეკვეთის გაუქმებისას გაწეული სამუშაო. ეს ამ სექტორში ნორმალიზებულ პრაქტიკად იქცა“. სოციალური სამართლიანობის ცენტრი მხარს უჭერს კურიერების სამართლიან მოთხოვნებს. ამ ბმულზე შეგიძლიათ გაეცნოთ ორგანიზაციის მიერ თებერვალში გავრცელებულ განცხადებას, რომელშიც დეტალურადაა აღწერილი ის პრობლემები, რასაც კურიერები აწყდებიან... კვლევა - რა ტიპის ხელშეკრულებები იდება კურიერებთან და რა სამართლებრივ პრობლემებს შეიცავს ამგვარი კონტრაქტები... წყარო: socialjustice.org.ge

თბილისი. სამოქალაქო საზოგადოება და საერთაშორისო ორგანიზაციები ლგბტქი+ უფლებების შესახებ იმსჯელეს.  საკოორდინაციო შეხვედრაზე სათემო ორგანიზაციების წარმომადგენლებმა 2022 წელს მიღწეული შედეგები შეაჯამეს, არსებულ გამოწვევებზე იმსჯელეს და სამომავლო გეგმები დასახეს.   შეხვედრა გაიმართა ნორვეგიისა შვედეთის და დიდი ბრიტანეთის მხარდაჭერით, UNDP-ის და ეროვნული დემოკრატიული ინსტიტუტის (NDI) ორგანიზებით. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. „საერთაშორისო გამჭვირვალობა - საქართველოს“ ახალციხის ოფისის სამოქალაქო საბჭოს ორგანიზებით, მოქალაქეებმა ვალეში, მანველიშვილის ქუჩაზე, ე.წ. ყორიანის ტერიტორიაზე, გზის და სანიაღვრე არხების მოწყობა მოითხოვეს. „გარდა იმისა, რომ უამინდობის დროს გზა პრაქტიკულად გაუვალია და მისი კეთილმოწყობა ადგილობრივებისთვის ძალიან მნიშვნელოვანი ინფრასტრუქტურული საჭიროებაა, ამ მონაკვეთის გავლა უწევთ ვალეში სხვა მცხოვრებლებსაც საკუთარ სახნავ-სათეს ფართობებამდე“. ორგანიზაცია მოუწოდებს ახალციხის მუნიციპალიტეტის მერიას, დროულად განიხილოს მიმართვა და დააკმაყოფილოს ადგილობრივების მოთხოვნა. სრულად... წყარო: ორგანიზაციის გვერდი სოციალურ ქსელში

კახეთი. თელავის ახალგაზრდული საბჭოს აქტიური წევრებისათვის ჩატარდა ვორქშოფი თემაზე „საქართველო-ევროკავშირის ურთიერთობები“. შეხვედრაზე ტრენერმა განიხილა ისეთი საკითხები როგორიცაა: რა არის ევროკავშირი, ევროკავშირის ღირებულებები, საქართველო-ევროკავშირის თანამშრომლობა, უვიზო მიმოსვლა, ერასმუს+ და სხვა მნიშვნელოვანი თემები. შეხვედრა ჩატარდა „მედია ცენტრი კახეთის“ (MCK) ორგანიზებით, ევროკავშირისა და კონრად ადენაუერის ფონდის  დაფინანსებული პროექტის „სამოქალაქო საზოგადოების ინიციატივა“ (2021-2025) ფარგლებში. სრულად... წყარო: ორგანიზაციის გვერდი სოციალურ ქსელში

31 მარტს, 14:00 საათზე, შსს-ში (გულუას ქ. 10) სოციალური სამართლიანობის ცენტრი თათია სამხარაძის საქმეზე განცხადებას შეიტანს და მოითხოვს გამოძიების დაწყებას საქართველოს სისხლის სამართლის კოდექსის 151-ე პრიმა მუხლით (ადევნება) გათვალისწინებული დანაშაულის ჩადენის ფაქტზე. სრულად...

31 მარტს, 19:00 საათზე, უახლესი ისტორიის ცენტრი გიწვევთ გიორგი არქანიას ლექციაზე: რა იყო ზვიად გამსახურდიას პოლიტიკა? სრულად... მისამართი: თბილისი, თსუ, 317-ე აუდიტორია

31 მარტს, 15:00 საათზე, „საზოგადოების კვლევის ცენტრი“ წარმოგიდგენთ სტატიათა კრებულის, „რატომ ევროპა - როგორ ცხოვრობს ხალხი ევროპაში“ პრეზენტაციას. კრებულში შესულია გია ჟორჟოლიანის, ბაქარ ბერეკაშვილის, ალექსანდრე ცაგარელის და თორნიკე ჩივაძის სტატიები. პუბლიკაცია გამოიცა ფრიდრიხ ებერტის ფონდის მხარდაჭერით. სრულად...

ამ წუთებში, სასტუმრო „რედისონ ბლუ ივერიაში“, ინფორმაციის თავისუფლების განვითარების ინსტიტუტი (IDFI) კვლევის „ქართული საპენსიო რეფორმის მომავალი“ პრეზენტაციას მართავს და კვლევის ძირითად მიგნებებს და რეკომენდაციებს წარადგენს. მისამართი: თბილისი, ვარდების რევოლუციის მოედანი #1

ამ წუთებში, „შერატონ გრანდ მეტეხი პალასში“, ევროკავშირი და CENN ახალგაზრდა სოციალური და მწვანე მეწარმეების შესახებ პროექტის დახურვით კონფერენციას მართავენ. მისამართი: თბილისი, თელავის #20

აჭარა. საერთაშორისო გამჭვირვალობა - საქართველოს ინფორმაციით, ვახტანგ ბერიძის - ა(ა)იპ „შუახევის კულტურის ცენტრის“ დირექტორის უკანონოდ გათავისუფლების საქმეზე ორგანიზაციის იურისტებმა სამივე ინსტანციის სასამართლოში წარმატებით იდავეს. ვახტანგ ბერიძეს შუახევის მუნიციპალიტეტი 5 506 ლარის ოდენობით ანაზღაურებას გადაუხდის. სრულად... წყარო: ორგანიზაციის გვერდი სოციალურ ქსელში