CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

23 მარტს, 12:15 საათზე, „პულმან თბილისში“ ავსტრიის განვითარების თანამშრომლობის (ADC) დაფინანსებით მიმდინარე პროექტის „ახალგაზრდული მეწარმეობა სოფლის განვითარებისთვის“ (RDYE) საგრანტო კონკურსის გამარჯვებულთა დაჯილდოების ცერემონია გაიმართება. მისამართი: თბილისი, ჭავჭავაძის გამზ. 37მ

ყირგიზეთი. 17-19 მარტს, ინფორმაციის თავისუფლების განვითარების ინსტიტუტის მეხსიერებისა და დეზინფორმაციის კვლევების მიმართულების ხელმძღვანელმა, ანტონ ვაჭარაძემ, ყირგიზეთში, ქალაქ ბიშკეკში მონაწილეობა მიიღო მეხსიერების კვლევების საერთაშორისო ორგანიზაცია ესიმდეს (Эсимде) ორგანიზებით გამართულ კონფერენციაში - “მეხსიერების ხიდზე”. კონფერენცია შეეხებოდა ორ ცენტრალურ კონცეფციას: მეხსიერებასა და დეკოლონიზაციას. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაციის ინფორმაციით, 2023 წლის 20 მარტს აშშ-ის სახელმწიფო დეპარტამენტმა ადამიანის უფლებების მდგომარეობის შესახებ ყოველწლიური ანგარიში გამოაქვეყნა. დოკუმენტში, მათ შორის, მიმოხილულია საქართველოში არსებული საკვანძო საკითხები ადამიანის უფლებების დაცვასთან მიმართებით, როგორც, საკანონმდებლო ბაზისა და პრაქტიკის კუთხით, ასევე, კონკრეტული საქმეების მაგალითზე.  „აშშ-ის სახელმწიფო დეპარტამენტის შეფასებაში იკვეთება, რომ 2022 წელს საქართველოში ადამიანის უფლებების დაცვის მდგომარეობა გაუარესდა“. სრულად... წყარო: www.gyla.ge

თბილისი. პარტნიორობა ადამიანის უფლებებისთვის (PHR) ინფორმაციით, 12 წლის მოზარდზე ძალადობის გამო დაკავებული კაცი, რომელსაც რამდენიმეწლიანი პატიმრობა ჰქონდა მისჯილი, 21 მარტს, თბილისის სააპელაციო სასამართლომ დარბაზიდან გაათავისუფლა. “საქმე ეხება 2021 წლის მაისში მომხდარ ფაქტს, როდესაც ხეხილის ერთ-ერთმა მეპატრონემ ბავშვს პლასტმასის მილი დაარტყა ფეხზე, ხოლო მისმა მეუღლემ ძალით ჩამოიყვანა ხიდან, რამდენჯერმე გაარტყა სახეში ხელი, ამოარტყა პანღური და მიაყენა სიტყვიერი შეურაცხყოფა. შემდეგ მოზარდი იძულებით გააშიშვლა წელს ზემოთ, გახადა შარვალი და ასე გაუშვა ქუჩაში”. სრულად... წყარო: ორგანიზაციის გვერდი სოციალურ ქსელში ფოტო: მზია საგანელიძე/RFE/RL

თბილისი. სოციალური სამართლიანობის ცენტრი გიზიარებთ ანალიტიკურ დოკუმენტს - „სიძულვილით მოტივირებული დანაშაულების გამოძიებისა და სისხლისსამართლებრივი დევნის პრაქტიკული გამოწვევები“. „სიძულვილით მოტივირებულ დანაშაულებთან ბრძოლის პოლიტიკაში მნიშვნელოვანი ინსტიტუციური რეფორმების მიუხედავად, ამგვარი საქმეების გამოძიების პროცესში პრაქტიკულად არა ერთი გამოწვევა რჩება, რომელიც დაზარალებულ პირებს დამოუკიდებელი, ეფექტიანი და ჯეროვანი გამოძიების გზით უფლებების რეალური აღდგენის შესაძლებლობას უსპობს“. სრულად... წყარო: socialjustice.org.ge

თბილისი. ასოციაცია HERA XXI-მა ანიმაციური ვიდეორგოლების გავრცელება დაიწყო, რომლებიც მარტივად პასუხობენ მოზარდებისთვის საინტერესო კითხვებს. ვიდეორგოლები ხელმისაწვდომია ქართულ, სომხურ, აზერბაიჯანულ და ჟესტურ ენებზე. JAMnews-ი სტატიაში საუბარია არასრულწლოვნებისთვის სექსუალური განათლების მიღების აუცილებლობაზე და სტატიისთვის, ამ თემებზე HERA XXI-ის მიერ მომზადებული ვიდეორგოლებია დართული. სრულად... წყარო: jam-news.net

თბილისი. წარმატებით დასრულდა ორთვიანი, ონლაინ სასწავლო კურსი „საზოგადოებრივი მონაწილეობა ადგილობრივი განვითარებისთვის“. სამოქალაქო საზოგადოების ინსტიტუტის (CSI) შექმნილი კურსის მიზანია ადგილობრივი თვითმმართველობის ფუნქციის, როლისა და პრინციპების შესახებ ცოდნის ამაღლება და გავრცელება საზოგადოებაში. კურსის ფარგლებში, მონაწილეები გაეცნენ სამოქალაქო მონაწილეობის ინსტიტუციურ მექანიზმებს, გაანალიზეს მისი სუსტი და ძლიერი მხარეები, ასევე გაეცნენ ადგილობრივ ხელისუფლებასთან და სხვადასხვა დაინტერესებულ მხარეებთან ეფექტური თანამშრომლობის და კომუნიკაციის საკითხებს, მონაწილეობის პროცესების უკეთ დასაგეგმად და განსახორციელებლად.  სწავლებაში მონაწილეობას იღებდა 89 აპლიკანტი: საზოგადოებრივი ორგანიზაციების წარმომადგენლები, საჯარო მოხელეები და სტუდენტები.  კურსი წარმატებით დაასრულა 38 მონაწილემ. სამოქალაქო საზოგადოების ინსტიტუტი ულოცავს მათ კურსის წარმატებით დასრულებას.

თბილისი. ახალგაზრდულ მუშაკთა ასოციაცია გიზიარებთ ევროპის საბჭოს ახალგაზრდული პარტნიორობის ფარგლებში შექმნილ პოდკასტების სერიას UNDER 30’. პოდკასტებში განვითარებულია მსჯელობა ახალგაზრდების ცხოვრების ტენდენციების, ახალგაზრდული პოლიტიკისა და ამ საკითხებთან დაკავშირებული საინტერესო პრაქტიკების შესახებ. პოდკასტების ბმული... კამპანია ხორციელდება პროექტის “Skills4Success - უნარები წარმატებისთვის” ფარგლებში.  პროექტს ევროკავშირის დაფინანსებით ახორციელებს Save the Children International-ი პარტნიორ ორგანიზაციებთან: საქართველოს ახალგაზრდულ მუშაკთა ასოციაციასთან, ახალგაზრდობის სააგენტოსა და კონრად ადენაუერის ფონდთან ერთად. წყარო: ახალგაზრდულ მუშაკთა ასოციაციის გვერდი სოციალურ ქსელში

22 მარტს, 19:00 სთ-ზე, საქართველოს უნივერსიტეტში, აინ რენდის ცენტრი გიწვევთ ლევან ბერძენიშვილის საჯარო ლექციაზე ამერიკელი მწერლისა და ფილოსოფოსის აინ რენდის შესახებ. სრულად... მისამართ: თბილისი, მ. კოსტავას ქუჩა 77ა, საქართველოს უნივერსიტეტი, აუდიტორია #519

22 მარტს, 14:00 საათზე, გაიმართება სტუდენტური საპროტესტო აქცია: სტუდენტები საპოლიციო რეჟიმის წინააღმდეგ. სტუდენტები მოითხოვენ, რომ თბილისის სახელმწიფო უნივერსიტეტმა საჯარო განცხადება გააკეთოს ბაგების საერთო საცხოვრებელში პოლიციის შესვლასთან დაკავშირებით. უნივერსიტეტმა მხოლოდ პოსტფაქტუმ გადაწყვიტა, მიემართა შსს-თვის, „მაისის სტუდენტური მოძრაობის“ საჯარო განცხადების შემდეგ. სტუდენტებისთვის მიუღებელია აკადემიურ სივრცეში, უნივერსიტეტის გვერდის ავლით, სამართალდამცავების მიერ თვითნებური ქმედებების განხორციელება. სწორედ ამგვარი ქმედება იყო ბაგების საერთო საცხოვრებელში პოლიციის შესვლა უნივერსიტეტის და სტუდენტების ინფორმირების გარეშე. სწორედ ამ გარემოებებმა გამოიწვია სტუდენტების სამართლიანი მღელვარება, რასაც წინ უძღვოდა თბილისში 7-9 მარტის მასშტაბური საპროტესტო აქციები. სრულად...

22 მარტს, 13:30 საათზე, ოზურგეთის ტექნოპარკში ევროკავშირის მიერ მხარდაჭერილი ახალი პროექტის - „მწვანე გურია - ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის“ - გახსნითი ღონისძიება გაიმართება, რომელსაც CENN, პარტნიორ ორგანიზაციებთან ერთად უმასპინძლებს. მისამართი: ოზურგეთი, ეგნატე ნინოშვილის ქუჩა N5

თბილისი. სამოქალაქო საზოგადოების ორგანიზაციები განცხადებას ავრცელებენ 2023 წლის 2-3 და 7-9 მარტს დაკავებული პირების საქმეების შესახებ. „მიუხედავად, რომ შინაგან საქმეთა სამინისტრომ მიიღო დაკავებულების ადმინისტრაციული პატიმრობიდან გათავისუფლების გადაწყვეტილება, მათთვის ადმინისტრაციული პასუხისმგებლობის დაკისრების საკითხი კვლავ დგას დღის წესრიგში. ამ დროისთვის არ დასრულებულა საქმეთა განხილვა. გარდა იმისა, რომ კრიტიკას იმსახურებს სასამართლოს მიერ ამ დრომდე დაუსაბუთებლად მიღებული დადგენილებები და შეუსაბამოდ მაღალი ოდენობის ჯარიმების შეფარდება, პროცედურულად სრულიად არაორგანიზებულად მიმდინარეობს ერთი მხრივ, სამინისტროს მიერ საქმეების სასამართლოში შეტანა და მეორე მხრივ, სასამართლოს მიერ საქმეთა განხილვა. უმეტესად, სამინისტროს წარმომადგენლები მოქალაქეებს გვიან ღამით უკავშირდებიან და ატყობინებენ, რომ მომდევნო დილას უნდა გამოცხადდნენ სასამართლოში ან მხოლოდ 1-2 საათით ადრე აწვდიან ამ ინფორმაციას. ამ საქმეებს სასამართლოში ადმინისტრაციულ საქმეთა კოლეგიის მორიგე მოსამართლე განიხილავს, რომლის ვინაობაც ხშირად უცნობია და მისი ვინაობის გაგების შემდეგაც კი შეუძლებელია სასამართლოს შემადგენლობისგან პროცესის გამართვის დროსთან დაკავშირებით ინფორმაციის მიღება. ამ პირობებში, ორგანიზაციების ადვოკატებს, რომლებიც ჩართულები არიან დაკავებული პირების უფლებების დაცვაში, დილიდან გვიან ღამემდე, სამუშაო პირობებისა და სივრცის არარსებობის ფონზე, უწევთ სასამართლოში უშედეგოდ ლოდინი ზოგჯერ რამდენიმე საათი, ზოგჯერ კი მთელი დღის განმავლობაში, რაც სრულიად გაუმართლებელია. ამ პირობებში შეუძლებელია მარწმუნებლის ეფექტიანი დაცვა, ასევე მოწმეთა და სხვა ტიპის მტკიცებულებების დროულად მოძიება და სასამართლოში წარდგენა“. სრულად... წყარო: gyla.ge

თბილისი. სოციალური სამართლიანობის ცენტრი საქართველოს აზერბაიჯანელ თემს ნოვრუზ ბაირამს ულოცავს და უფრო სამართლიან, თანასწორ და ღირსეულ გარემოში ცხოვრებას უსურვებს. ორგანიზაციის პოლიტიკის თანახმად, სოციალური სამართლიანობის ცენტრისთვის ეს დღეც უქმეა. „ნოვრუზი ტრადიციული დღესასწაულია და სხვადასხვა ხალხების რწმენით ძველი წლის დასრულებასა და ახლის დადგომას აღნიშვნას. ნოვრუზი განახლების დღესასწაულია და მის აღნიშვნამდე ტრადიციულად ბუნების გამოღვიძების აღსანიშნად ზამთრის ოთხი სტიქიის (ჩერშენბე) დღესასწაულს აღნიშნავენ. სანთელსა და შეღებილ კვერცხს. ყველა ამ საგანს სიმბოლური დატვირთვა აქვს და განახლებისა და ბოროტი ძალებისგან ადამიანის დაცვას ისახავს ნიშნად. უკვე რამდენიმე წელია საქართველოს აზერბაიჯანელები ნოვრუზ ბაირამს ეროვნულ დღესასწაულად და უქმე დღედ გამოცხადებას ითხოვენ. ადგილობრივი თემისთვის ეს მოთხოვნა საკუთარი კულტურის, იდენტობის და ზოგადად საქართველოს ეთნიკური და კულტურული მრავალფეროვნების აღიარების მნიშვნელობას ატარებს და რა თქმა უნდა პოლიტიკური შინაარსი აქვს. სამწუხაროდ, თემის ეს მოთხოვნა ხელისუფლების მიერ ამ დრომდე არ არის გაზიარებული“, ნათქვამია ორგანიზაციის ბლოგპოსტში. სრულად... წყარო: ორგანიზაციის გვერდი სოციალურ ქსელში

თბილისი. მედია ადვოკატირების კოალიცია ქართული ჟურნალისტიკის დღეს გილოცავთ. „დამოუკიდებელი მედია შეუფასებელ როლს თამაშობს ქვეყნის დემოკრატიული  განვითარებისა და მოქალაქეების ინფორმირების პროცესში. კოალიცია მედიის წარმომადგენლებს უსურვებს განაგრძონ  პროფესიული საქმიანობა შეუფერხებლად, არსებული რთული ფონის მიუხედავად“. სრულად... წყარო: კოალიციის გვერდი სოციალურ ქსელში

თბილისი. ორგანიზაცია „საფარის“ ინფორმაციით, ბოლო 24 საათში, შალვა რამიშვილის მხრიდან სექსუალური შევიწროების გამოცდილებაზე უკვე სამმა ქალმა ისაუბრა.  „ეს სექსუალური შევიწროების ისტორიები ჰგავს თათია სამხარაძის საქმეს, რომელზეც მუშაობდა “საფარი” 2016 წლიდან და რომელშიც დისკრიმინაცია ორი ინსტანციის სასამართლომ დაადგინა. დასაქმებისა და კარიერული წინსვლის სანაცვლოდ, შალვა რამიშვილი სექსუალური შინაარსის არასასურველ კომუნიკაციას აწარმოებს ქალებთან და რიგ შემთხვევებში, შესაძლოა, ადევნების დანაშაულსაც ჰქონდა ადგილი. „საფარის” გუნდი სრულ მხარდაჭერას ვუცხადებთ ქალებს, რომლებმაც მოსალოდნელი წნეხის მიუხედავად ამხილეს მოძალადე. საჯაროდ საუბარი ქალებისგან უდიდეს გამბედაობას მოითხოვს. გვესმის იმ ქალებისაც, რომლებიც, მსგავსი გამოცდილების მიუხედავად, ამას ჯერჯერობით ვერ ახერხებენ“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

სამეგრელო-ზემო სვანეთი. სამეგრელო-ზემო სვანეთის რეგიონული ჰაბ-ორგანიზაცია „ათინათი“ იწყებს კამპანიის „სამოქალაქო საზოგადოების ორგანიზაციები - საზოგადოების სამსახურში“ მორიგ ეტაპს. კამპანიის მიზანია სამოქალაქო საზოგადოების ორგანიზაციების ცნობადობის გაზრდა და მათ მიმართ ნდობის ხარისხის ამაღლება.  მნიშვნელოვანია კიდე ერთხელ ვაგრძნობინოთ საზოგადოებას, რომ ჩვენი საქმიანობა მთლიანობაში მიმართულია საზოგადოების კეთილდღეობაზე. დეტალებზე მოგვწერეთ მაილზე: rodonaiaivetta@gmail.com, ან დააკომენტარეთ. კამპანია ხორციელდება სამეგრელო-ზემო სვანეთის რეგიონული ჰაბის ინიციატივით პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში, ევროკავშირისა და კონრად ადენაუერის ფონდის მხარდაჭერით. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად - საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) შუალედურ/რიგგარეშე არჩევნებს დააკვირდება. ორგანიზაციის ცნობით, 2023 წლის 29 აპრილს საქართველოს პარლამენტისა და მუნიციპალიტეტის საკრებულოების შუალედური, ასევე, მერების რიგგარეშე არჩევნები გაიმართება. კერძოდ, აირჩევიან: საქართველოს პარლამენტის ფოთი-სენაკი-ხობის მაჟორიტარი დეპუტატი, გურჯაანის, თიანეთის, ახალციხის, ტყიბულისა და ქუთაისის საკრებულოების მაჟორიტარი წევრები და ცაგერისა და თერჯოლის მერები. სრულად... წყარო: ორგანიზაციის გვერდი სოციალურ ქსელში

21 მარტს, 19:00 საათზე გიწვევთ საჯარო შეხვედრაზე ფრონტლაინში: „უცხოური გავლენის აგენტების შესახებ კანონპროექტი და ევროპული ინტეგრაცია“. სრულად...

21 მარტს, 13:00 საათზე, „რედისონ ბლუ ივერიაში“ გაიმართება კონფერენცია „როგორ დავიცვათ საქართველოს ევროპული მომავალი“ გაიმართება. დიპლომატიურ კორპუსთან, NGO- სექტორთან და მედია ორგანიზაციების წარმომადგენლებთან შეხვედრაზე, ევროპული საქართველოს ლიდერები და პარტნიორი ორგანიზაციები წარმოადგენენ თავიანთ ხედვას არსებული კრიზისის და შესაძლო გამოსავლის შესახებ. მისამართი: თბილისი, რესპუბლიკის მოედანი #1

თბილისი. წამების მსხვერპლთა ფსიქოსოციალური და სამედიცინო რეაბილიტაციის ცენტრი (GCRT) აქვეყნებს საინფორმაციო პოსტს, რომელშიც აღწერილია მოძალადის მხრიდან, ბავშვებისა და მოზარდების სექსუალურ ქცევაზე დაყოლიების ნიშნები. Grooming სექსუალურ ქცევაზე დაყოლიებას ნიშნავს და ასეთ დროს: ბავშვებს უჩნდებათ საჩუქრები, რომლებსაც მალავენ ან ვერ ხსნიან წარმომავლობას და კითხვის შემთხვევაში, გამოხატავენ ბრაზს. ისინი ოჯახის წევრებს აღარ უზიარებენ დღის განმავლობაში მიღებულ შთაბეჭდილებებს. საუბრობენ უფროსი ასაკის ადამიანებთან (შეიძლება არასრულწლოვანთან) და მათთან დიდი დროის გატარების სურვილი აქვთ. ცდილობენ წავიდნენ შეხვედრაზე ზრდასრულ ან ხანდაზმულ ადამიანთან. არ საუბრობენ იმაზე, თუ რა ხდება მსგავსი ტიპის შეხვედრებზე. სრულად... წყარო: ორგანიზაციის გვერდი სოციალურ ქსელში

რაჭა ლეჩხუმი-ქვემო სვანეთი. რაჭა-ლეჩხუმის და ქვემო სვანეთის რეგიონული ჰაბის - ფონდი „აფხაზინტერკონტის“ ორგანიზებით, 2023 წლის 16-17  მარტს, ცაგერისა და ლენტეხის მუნიციპალიტეტში მოქმედი სამოქალაქო საზოგადოების ორგანიზაციების, სათემო კავშირების წარმომადგენლებისა და საჯარო სკოლების სამოქალაქო განათლების პედაგოგებისთვის ტრენინგი ჩატარდა. ტრენინგის მიზანი იყო მონაწილეების გადამზადება შემდეგ საკითხებში პროექტის წერა პროექტების ფინანსური მენეჯმენტი/მართვ ფონდების მოძიება ორგანიზაციის ფინანსური მდგრადობა ტრენინგები ჩატარდა ევროკავშირისა და კორნად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში