თბილისი. საერთაშორისო გამჭვირვალობა - საქართველოს ინფორმაციით, ნინოწმინდის საკრებულოს თავმჯდომარის მოადგილის ტელევიზია ნინოწმინდის მუნიციპალიტეტში ტენდერებს უკონკურენტოდ იგებს. „ნინოწმინდის საკრებულოს თავმჯდომარის მოადგილის, კონსტანტინ ვარდანიანის ტელე-რადიო კომპანია „ფარვანას“, 2014 წლიდან დღემდე, მას შემდეგ, რაც ვარდანიანი თანამდებობაზე დაინიშნა, ნინოწმინდის ბიუჯეტიდან 320 645 ლარი დაერიცხა. შვიდ წელში მიღებული 12 შესყიდვიდან 9 მათგანი „ფარვანამ“ ნინოწმინდის მერიასთან და მის ააიპ-ებთან გააფორმა. ვარდანიანის თანამდებობაზე დანიშვნის შემდეგ, „ფარვანამ“ მერიისგან ნინოწმინდაში უსასყიდლოდ 273 კვ.მ. ფართიც მიიღო“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციას (საია) განცხადებით, 17 ივლისს, მართლმსაჯულების საერთაშორისო დღე აღინიშნება. „1998 წლის 17 ივლისს, რომის სტატუტის მიღებით სისხლის სამართლის საერთაშორისო (ჰააგის) სასამართლოს სახით მართლმსაჯულების საერთაშორისო სისტემის შექმნას ჩაეყარა საფუძველი. აღნიშნული სასამართლოს მიზანს განსაკუთრებით მძიმე დანაშაულების (ომის დანაშაული, გენოციდი, კაცობრიობის წინააღმდეგ მიმართული დანაშაული და აგრესია) გამოძიება და პასუხისმგებელ პირთა გამოვლენა წარმოადგენს. შესაბამისად, ჰააგის სასამართლო საერთაშორისო დანაშაულების მსხვერპლებისთვის სამართლიანობის აღდგენის მნიშვნელოვანი მექანიზმია“. სრულად... წყარო: gyla.ge

თბილისი. თბილისის სააპელაციო სასამართლომ, დააკმაყოფილა საქართველოს დემოკრატიული ინიციატივის (GDI) შუამდგომლობა განაჩენის გადასინჯვის თაობაზე. „სასამართლომ გააუქმა მსჯავრდებულისთვის სასჯელის სახედ და ზომად დანიშნული 5 წლიანი პატიმრობა და ის გაათავისუფლა პენიტენციური დაწესებულებიდან. მსჯავრდებული 2017 წლიდან სასჯელს იხდიდა ნარკოტიკული დანაშაულისთვის, კერძოდ მეტამფეტამინის, წონით 0,000036 გრამი და ამფეტამინის, წონით 0,000033 გრამი შეძენისა და შენახვისთვის“, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. საქართველოს ახალგაზრდა იურისტთა ასოციაციამ (საია) პროექტის „ყველაზე მოწყვლადი პირების და თემების სოციალურ-ეკონომიკური უფლებების დაცვა და ხელშეწყობა საქართველოში“, ფარგლებში გამოცხადებულ საგრანტო კონკურსში გამარჯვებული პროექტები გამოავლინა. „კონკურსში გამარჯვებული პროექტები მიზნად ისახავს ხელი შეუწყოს სოციალურ-ეკონომიკური უფლებების დაცვას საქართველოში, ადგილობრივ დონეზე შემოსავლის მომტანი აქტივობების ხელშეწყობას და განვითარებაზე ორიენტირებული მიდგომების დანერგვას სიღარიბით გამოწვეული ადამიანის უფლებათა დარღვევების შესამცირებლად. საგრანტო კონკურსში გამარჯვებული პროექტებია: - ა(ა)იპ „თავისუფალ ჟურნალისტთა სახლის“ პროექტი „მაღალმთიანი მუნიციპალიტეტების სოფლების მახალაკური, ჩანჩხალო და ბზუბზუს მოსახლეობის საცხოვრებელი პირობების გაუმჯობესება“. - ა(ა)იპ „ჭიათურელთა კავშირის“ პროექტი „ჭიათურის მუნიციპალიტეტის სოფელ სვერის საბავშვო ბაღის სასმელი წყლის სისტემის რეაბილიტაცია“.  - ა(ა)იპ „სამოქალაქო აქტივობების ცენტრის“ პროექტი „ხევსურეთში დაცლის პირას მყოფ სოფლებში ეკონომიკური ზრდის ხელშეწყობა““. სრულად... წყარო: gyla.ge

17 ივლისს, 17:00 საათზე EMC-ის ფეისბუქ გვერდზე გაიმართება დისკუსია და პოლიტიკის დოკუმენტების პრეზენტაცია - „უსახლკარობასთან ბრძოლა - რა ზომები უნდა მიიღოს სახელმწიფომ?“. სრულად...

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება რუსთავში არსებულ ეკოლოგიურ კრიზისს და მოუწოდებს საქართველოს პარლამენტს დაუყოვნებლივ გაატაროს ინიცირებული საკანონმდებლო ცვლილებები გარემოსდაცვითი პასუხისმგებლობის შესახებ. „დაბინძურებული ჰაერს ადამიანის ჯანმრთელობისთვის მძიმე და მრავალმხრივი ზიანის მიყენება შეუძლია. დაბინძურებული ჰაერი ზრდის უნაყოფობის, სხვადასხვა ონკოლოგიური და გულსისხლძარღვთა დაავადების, კოგნიტური დაქვეითების, რესპირატორული პრობლემების ჩამოყალიბების რისკს“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, 2 აპრილს, ბათუმში კომენდანტის საათის დროს პოლიციელთა მხრიდან განხორციელებული ფიზიკური და სიტყვიერი შეურაცხყოფის მსხვერპლს, ლაშა მიქაბერიძეს, დაზარალებულის სტატუსი ამ დრომდე არ მინიჭებია. ორგანიზაცია მიიჩნევს, რომ პროკურატურის მიერ ლაშა მიქაბერიძისათვის დაზარალებულის სტატუსის მინიჭებაზე უარის თქმა უკანონო და დაუსაბუთებელია. საია უარს სასამართლოში ასაჩივრებს. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ინტეგრაციის 2021-2024 წლების ახალი სამთავრობო სტრატეგიის შემუშავების პროცესისთვის დაგეგმილ სტრატეგიულ შეხვედრაში პლატფორმა სალამის ჩართვაზე შერიგებისა და სამოქალაქო თანასწორობის საკითხებში სახელმწიფო მინისტრის აპარატის უარს და სოლიდარობის ნიშნად ისიც უარს აცხადებს დაგეგმილ შეხვედრაში მონაწილეობაზე. „სამწუხაროდ, ნაცვლად იმისა, რომ სახელწიფო ინსტიტუტები სალამს და მის მსგავს გაერთიანებებს სამუშაო, საკონსულტაციო და სხვა პოლიტიკურ პლატფორმებში პატივისცემით იწვევდნენ, უსმენდნენ და მათ მოსაზრებებს ითვალისწინებდნენ, სახელმწიფო მინისტრის აპარატმა ინტეგრაციის ახალი სტრატეგიის შემუშავების პროცესისთვის დაგეგმილ სტრატეგიულ შეხვედრაში მონაწილეობაზე პლატფორმა სალამს სრულიად დაუსაბუთებელი უარი განუცხადა“. სრულად... წყარო: emc.org.ge

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ორგანიზაციის იურისტის თათია ქინქლაძის პოლიტიკის დოკუმენტს: რატომ არის საჭირო გენდერული კვოტები? „გენდერული კვოტირების მექანიზმის ამოქმედება არ წარმოადგენს ერთადერთ და საკმარის გარანტიას, რომ ქალთა მიმართ უთანასწორო მოპყრობა და დისკრიმინაცია შესუსტდება. ამისთვის მნიშვნელოვანია გაგრძელდეს ანტიდისკრიმინაციული კანონმდებლობის რეფორმირების პროცესი და დაინერგოს ის მექანიზმები, რომელიც ხელს შეუწყობს ქალთა ეკონომიკურ გაძლიერებას, გენდერული ნიშნით განხორციელებული ძალადობრივი ქმედებების ეფექტურ გამოძიებასა და მათ პრევენციას, ასევე იმ სისტემური პრობლემების აღმოფხვრას, რაც ქალთა მიმართ უთანასწორობას იწვევს“. სრულად... წყარო: isfed.ge

თბილისი. პორტალი ადამიანის უფლებების შესახებ აქვეყნებს ლანა გიორგაძის ბლოგპოსტს: საპარლამენტო არჩევნები პანდემიის პირობებში. „2020 წლის ოქტომბერში საქართველოში საპარლამენტო არჩევნები გაიმართება, სწორედ ამ დროს ელოდებიან ეპიდემიოლოგები ახალი კორონავირუსის მეორე ტალღას. 2 ივლისს საარჩევნო კოდექსში შევიდა ცვლილებები, რომლის თანახმად დაზუსტდა ზოგიერთი საარჩევნო ღონისძიება და ვადა, ხოლო ახალი კორონავირუსის გავრცელების პრევენციის მიზნით, რა შეზღუდვები იქნება არჩევნების დღეს, ან რა წესების დაცვა იქნება აუცილებელი საარჩევნო უბნებზე, ამას საარჩევნო კოდექსის თანახმად, ცენტრალური საარჩევნო კომისია საჭიროებისამებრ განსაზღვრავს“, ნათქვამია ორგანიზაციის ვებგვერდზე. სრულად... წყარო: humanrights.ge

16 ივლისს, 16:00-ზე ჰაინრიჰ ბიოლის ფონდი წარმოგიდგენთ ონლაინ საჯარო დისკუსიას: ტურიზმი საქართველოში: სექტორის განვითარების ძირითადი მახასიათებლები და მომავლის პერსპექტივები. სრულად...

თბილისი. ხელმომწერი ორგანიზაციები და შშმ აქტივისტები ეხმიანებიან 14 ივლისს, პარლამენტის მიერ „შშმ პირთა უფლებების შესახებ“ კანონის მიღებას. „მიუხედავად რიგი პოზიტიური ცვლილებებისა, მიგვაჩნია, რომ აღნიშნული კანონი, მისი დეკლარაციული ხასიათისა და შინაარსობრივი გამოწვევების გათვალისწინებით, ხელისუფლების მხრიდან შშმ პირთა რეალური გაძლიერების კიდევ ერთი ხელიდან გაშვებული შესაძლებლობაა“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) უარყოფითად აფასებს საქართველოს პარლამენტის გადაწყვეტილებას, რომლის მიხედვითაც საქართველოს მთავრობას მიენიჭა უფლებამოსილება 2021 წლის 1 იანვრამდე, შეზღუდოს უფლებები კანონქვემდებარე აქტებით. „მიგვაჩნია, რომ მართალია, ახალი კორონავირუსის გავრცელებასთან დაკავშირებით შესაბამისი რეგულაციების მიღება ემსახურება ლეგიტიმურ მიზანს, თუმცა საქართველოს მთავრობისთვის კანონპროექტში აღნიშნული უფლებების შეზღუდვის უფლებამოსილების გადაცემა არ შეესაბამება საქართველოს კონსტიტუციის სტანდარტს და ზემოაღნიშნული შეზღუდვები უნდა მოხდეს მხოლოდ კანონის შესაბამისად“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. 14 სამოქალაქო საზოგადოების ორგანიზაციისა და კვლევითი ორგანიზაციების ექსპერტების მონაწილეობით საქართველოს მიერ 2020 წლისთვის აღმოსავლეთ პარტნიორობის 20 შედეგის პროგრესის შესახებ პირველი დამოუკიდებელი ანგარიში მომზადდა. „ანგარიში ფარავს აღმოსავლეთ პარტნირობის ხუთივე პრიორიტეტულ მიმართულებას: კომპლექსური შედეგები, უფრო ძლიერი ეკონომიკა, უფრო ძლიერი მმართველობა, უფრო მტკიცე კავშირები და უფრო ძლიერი საზოგადოება. თითოეული შედეგის მიმოხილვა მოიცავს 2020 წლისთვის 20 შედეგის იმპლემენტაციის პროცესში მიღწეული პროგრესის, შედეგებისა და დარჩენილი გამოწვევების ანალიზს“. სრულად... წყარო: isfed.ge

თბილისი. საბჭოთა წარსულის კვლევის ლაბორატორია საქართველოს მთავრობას განცხადებით მიმართავს. „უკვე 4 თვეზე მეტია, კორონავირუსის პანდემიის გამოცხადებისა და შესაბამისი ზომების - კარანტინისა და საზოგადოებრივ სივრცეებში მასობრივი თავშეყრის შეზღუდვის შემოღების გამო მოქალაქეთა მიღება და მომსახურეობა შეჩერებული აქვს სახელმწიფო არქივებსა და პარლამენტის ეროვნულ ბიბლიოთეკას. თითქმის 1 თვეა, რაც საჯარო და კერძო დაწესებულებების უმრავლესობამ განაახლა მოქალაქეთა მომსახურეობა, ვირუსისაგან დაცვის შესაბამისი ზომების გათვალისწინებით. სამწუხაროდ, სახელმწიფო არქივები და პარლამენტის ბიბლიოთეკა კვლავ დახურულია. არ მოიპოვება ინფორმაცია თუ როდიდან იგეგმება მათი მუშაობის განახლება. პანდემიისაგან შექმნილი საფრთხის გათვალისწინებით, მკვლევართა და მკითხველთა საზოგადოება ამ თვეების განმავლობაში ადეკვატურად აფასებდა არსებულ შეზღუდვებს, რომლებმაც მრავალი დაბრკოლება შეგვექმნა კვლევის პროცესში. დღეისათვის, შექმნილი სიტუაციიდან გამომდინარე მოვითხოვთ, ამ დაწესებულებებმა მაქსიმალურად სწრაფად განაახლონ მკვლევართა და მკითხველთა მიღება, შესაბამისი უსაფრთხოების ზომების გათვალისწინებით“, ნათქვამია მიმართვაში. სრულად... წყარო: sovlab.ge

თბილისი. ჰაინრიხ ბიოლის ფონდის სამხრეთ კავკასიის ბიურო აქვეყნებს გიორგი რაჯებაშვილის პუბლიკაციას: მასობრივი ტურიზმის ზეგავლენა ყაზბეგის რეგიონზე. ნაშრომში წაიკითხავთ იმ საფრთხეებზე, რომელიც ტურიზმის სტრატეგიის არარსებობის შემთხვევაში თვითნებურად და ქაოტურად განვითარებულ მასობრივ/ჭარბ ტურიზმს ახლავს თან, რაც უკვე სტეფანწმინდის რეგიონშიც შეინიშნება. სრულად... წყარო: ge.boell.org

სამეგრელო. 13 ივლისს, ზუგდიდში გაიმართა დიალოგი ადგილობრივ ხელისუფლებასა და სამოქალაქო საზოგადოებასთან Covid 19-ით გამოწვეული ეპიდემიის გავლენაზე ადგილობრივ ეკონომიკაზე. პრეზენტაცია აღნიშნულ თემაზე გააკეთა ბატონმა კახაბერ დაუშვილმა. დიალოგის მონაწილეებმა იმსჯელეს არსებულ სიტუაციაში გამოწვევებზე და მათი გადალახვის გზებზე. ღონისძიება ორგანიზებული იყო „კონსულტაციისა და ტრენინგის ცენტრის“ და ზუგდიდის რეგიონული ჰაბის ასოციაცია „ათინათის“ მიერ. ადგილობრივი დიალოგი გაიმართა პროექტის „სამოქალაქო საზოგადოების განვითარების ინიციატივის“ ფარგლებში, რომელსაც კონრად ადენაუერის ფონდის (KAS) ხელმძღვანელობით ახორციელებს კონსორციუმი: სამოქალაქო საზოგადოების ინსტიტუტი (CSI), საქართველოს სტრატეგიული კვლევებისა და განვითარების ცენტრი (CSRDG), კონსულტაციისა და ტრენინგის ცენტრი (CTC) და განათლების განვითარების და დასაქმების ცენტრი (EDEC). პროექტის ფინანსური მხარდამჭერია ევროკავშირი და კონრად ადენაუერის ფონდი. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამვირვალობა - საქართველო მიიჩნევს, რომ ბაჩანა შენგელიას წინააღმდეგ დაწყებული დისციპლინური წარმოება მიკერძოებისა და ანგარიშსწორების აღქმას აჩენს. „ბაჩანა შენგელია ხელისუფლებას, მისი დედის, ია კერზაიას გარდაცვალების საქმეზე არაეფექტიანი გამოძიების გამო აკრიტიკებდა. მის მიმართ დაწყებული დისციპლინური წარმოება რამდენიმე მიმართულებით არის პრობლემური და იუსტიციის მინისტრის მხრიდან მიკერძოებულობისა და შერჩევითობის აღქმას აჩენს. კერძოდ: მინისტრის დებულებაში შეტანილი ცვლილების ქრონოლოგია დისციპლინირების მექანიზმის ანგარიშსწორების ინსტრუმენტად გამოყენების შთაბეჭდილებას ქმნის;  დისციპლინირების საფუძველი სათანადოდ განჭვრეტადი არ არის და გარდა ამისა, შესაძლოა, კონსტიტუციასთანაც მოდიოდეს წინააღმდეგობაში; დისციპლინური წარმოების ზეპირი მოსმენის გარეშე ჩატარება პრობლემურია; ნოტარიუსთა სამუშაო პროგრამაზე წვდომის შეჩერება დაუსაბუთებლად მოხდა.“ სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აფასებს უცხო ქვეყნის მოქალაქის, ვ. პ.-ს სავარაუდო გაუპატიურების ფაქტზე საქართველოში მიმდინარე გამოძიების პროცესს და შინაგან საქმეთა სამინისტროსა და პროკურატურას დროული, ეფექტიანი და ობიექტური გამოძიების ჩატარებას სთხოვს. „ვ.პ-ს სავარაუდო გაუპატიურების საქმეზე მიმდინარე გამოძიების ანალიზი აჩვენებს, რომ უკანასკნელი წლებში ქალთა მიმართ ძალადობის წინააღმდეგ ბრძოლაში გაუმჯობესებული სისხლის სამართლის პოლიტიკის მიუხედავად, სქესობრივი თავისუფლების წინააღმდეგ მიმართულ დანაშაულებს კვლავ თან სდევს სამართლებრივი, ინსტიტუციური და კულტურული გამოწვევები, რომლებიც მსგავსი საქმეების ეფექტიანი და რეალური გამოძიების პროცესს არსებითად აზიანებს“, ნათქვამია ორგანიზაციის ვებგვერდზე. სრულად... წყარო: emc.org.ge

იმერეთი. 14 ივლისს, ქუთაისში გაიმართა დიალოგი ადგილობრივ ხელისუფლებასა და სამოქალაქო საზოგადოებასთან Covid 19-ით გამოწვეული ეპიდემიის გავლენაზე ადგილობრივ ეკონომიკაზე. პრეზენტაცია აღნიშნულ თემაზე გააკეთა ბატონმა კახაბერ დაუშვილმა. დიალოგის მონაწილეებმა იმსჯელეს არსებულ სიტუაციაში გამოწვევებზე და მათი გადალახვის გზებზე. ღონისძიება ორგანიზებული იყო „კონსულტაციისა და ტრენინგის ცენტრის“ და რეგიონული ჰაბის „ადგილობრივი დემოკრატიის სააგენტო - საქართველოს“ (LDA-Georgia) მიერ. ადგილობრივი დიალოგი გაიმართა პროექტის „სამოქალაქო საზოგადოების განვითარების ინიციატივის“ ფარგლებში, რომელსაც კონრად ადენაუერის ფონდის (KAS) ხელმძღვანელობით ახორციელებს კონსორციუმი: სამოქალაქო საზოგადოების ინსტიტუტი (CSI), საქართველოს სტრატეგიული კვლევებისა და განვითარების ცენტრი (CSRDG), კონსულტაციისა და ტრენინგის ცენტრი (CTC) და განათლების განვითარების და დასაქმების ცენტრი (EDEC). პროექტის ფინანსური მხარდამჭერია ევროკავშირი და კონრად ადენაუერის ფონდი. სრულად... წყარო: ორგანიზაციის გვერდი სოციალურ ქსელში

15 ივლისს, 13:00 საათზე, საქართველოს პოლიტიკის ინსტიტუტი (GIP) ონლაინ დისკუსიას გამართავს. თემა: საქართველოში ეთნიკური უმცირესობების სამოქალაქო ინტეგრაციასთან დაკავშირებული პროგრესი და გამოწვევები. სრულად...